ne Kuvend – Dielli

Kosovë-Priten mungesa votash në Kuvend

May 9, 2017 by dgreca

-Nesër mocioni i mosbesimit për qeverinë e pastaj demarkacioni, priten mungesa votash në Kuvend/

PRISHTINË, 9 Maj 2017-Gazeta DIELLI-Behlul Jashari/ Kuvendi i Kosovës mblidhet nesër në një seancë me të vetmen pikë në axhendë: “Shqyrtimi i Mocionit të mosbesimit ndaj Qeverisë së Republikës së Kosovës, të propozuar nga grupet parlamentare: Nisma për Kosovën, Aleanca për Ardhmërinë e Kosovës dhe Lëvizja Vetëvendosje, mbështetur nga 42 deputetë”.

Por, për të rrëzuar qeverinë duhen së paku edhe 19 vota për të arritur numrin 61 – një më shumë se gjysmën e Kuvendit të Kosovës me gjithësej 120 deputetë. Ndërkohë që nuk ka deklarime tjera publike për votë pro mocionit të mosbesimit, votimi i fshehtë mund të rrisë numrin e votave kundër qeverisë apo për t’i dhënë fund udhëheqjes së saj nga partia e dytë me numrin e deputetëve.

Në Kuvendin e Kosovës aktualisht Partia Demokratike e Kosovës ka 36 deputetë, Lidhja Demokratike e Kosovës 33, Lëvizja Vetëvendosje 16, Lista Serbe 11, Aleanca për Ardhmërinë e Kosovës 8, Gjashtë Plus (i komuniteteve pakicë) 6, Nisma për Kosovën 6, ndërsa pa grup parlamentar janë 4 deputetë.

Qeveria e Kosovës pas shtyrjes së mbledhjes së djeshme, ku sipas axhendës pritej procedimi i demarkacionit, ka parlajmëruar se do e mbajë pas seancës së nesërme të Kuvendit të mocionit të mosbesimit.

“Pas diskutimeve të partnerëve të koalicionit qeverisës PDK-LDK, ku ishin të pranishëm edhe përfaqësuesit e Shteteve të Bashkuara të Amerikës, u arrit dakordimi që mbledhja e kabinetit qeveritar ku do të shqyrtohet Projektligji për Ratifikimin e Marrëveshjes për Kufirin Shtetëror ndërmjet Republikës së Kosovës dhe Malit të Zi, të mbahet pas seancës së Kuvendit të Republikës së Kosovës, që do të zhvillohet të mërkurën”, bënte të ditur komunikata dërguar nga Kryeministria.

Projekligji për Ratifikimin e Marrëveshjes për kufirin Shtetëror ndërmjet Republikës së Kosovës dhe Malit të Zi ishte në axhendën e Kuvendit të Kosovës në seancën e 1 shtatorit 2016, por u tërhoq nga qeveria derisa opozita e kundërshtonte edhe me protesta e mungonte Lista Serbe dhe nuk ishte e sigurt se për miratim do arriheshin të paktën 80 vota.

Ky numër i nevojshëm i votave – dy të tretat e totalit të deputetëve nuk mund të arrihet edhe nëse votojnë pro të gjithë nga grupet parlamentare të dy partitve më të mëdha të koalicionit qeverisës PDK e LDK me gjithësej 69 deputetë, e edhe nëse atyre u bashkohen edhe 6 deputetët e Gjashtë Plus të minoriteteve dhe 4 deputetët pa grup, në numrin total 79 do ishte mangu një votë dhe kjo do pamundësonte ratifikimin e demarkacionit.

Tre partitë opozitare, madje edhe disa deputetë nga maxhoranca, kanë paralajmëruar votim kundër dhe sipas disa deklaratave mosratifikimi i demarkacionit me Malin e Zi në votimin në seancën e Kuvendit Kosovën e çon në zgjedhje të parakohëshme, fillimisht në shpërndarjen e parlamentit.

Deputetët e opozitës i drejtohen me parulla në Kuvend Presidentit të Austrisë

October 29, 2015 by dgreca

Presidenti i Austrisë, Heinz Fischer, foli sot para deputetëve të Kuvendit të Republikës së Kosovës lidhur me rëndësinë e marrëveshjeve të fundit mes Kosovës dhe Serbisë, si dhe për demokracinë. Përgjatë fjalimit z. Fischer, kabineti qeveritar qëndronte ulur pas tij, përderisa deputetët e opozitës ngritën dy parulla me këto slogane:
1. Ruaje shpinën z. President, gënjeshtarë të korruptuar janë ulur prapa teje!
2. Mjaft me kënaqjen e hegjemonisë së Serbisë!
Parullat e ngritura sot në Kuvend janë në vazhdën e aksioneve politike të organizuara nga deputetët e opozitës kundër marrëveshjeve të nënshkruara nga Kryeministri i Kosovës dhe Kryesministri i Serbisë në Bruksel, si dhe kundër regjimit shtypës gjysmë-autoritar që të instaluar në Kosovë. Që nga nënshkrimi i marrëveshjeve në Bruksel më 25 gusht, deputetët opozitar kanë dhënë dhjetëra argumente që shpjegojnë se këto marrëveshje e shkelin Kushtetutën dhe kanë efekte shkatërruese në Republikën e Kosovës, duke kontribuar në segregacion, darje territoriale dhe administrative te shtetit, dhe vendosjen e themeleve të “Republikës Serbe” brena Kosovës.
29 tetor 2015
Lëvizja VETËVNDOSJE!

Kosovë-Kriza politike në Kuvend

October 21, 2015 by dgreca

-Shtypi në Prishtinë: Nuk ndërhyjnë ndërkombëtarët/
PRISHTINË, 21 Tetor2015/Përfaqësuesit e vendeve të Quint-it në Prishtinë nuk do të ndërhyjnë për zgjidhjen e krizës politike në Kuvendin e Kosovës, pavarësisht se pozita dhe opozita nuk po arrijnë pajtim për vazhdimin e seancave, shkruan sot shtypi në Prishtinë. Legjislativi ka më shumë se një muaj që është bllokuar nga deputetët e opozitës, madje këta të fundit kanë hedhur gaz lotsjellës në dy seancat e fundit, duke e pamundësuar mbajtjen e seancave plenare pa tërheqjen e marrëveshjes për Asociacionin e Komunave Serbe dhe demarkacionit të kufirit me Malin e Zi. Edhe presidentja Atifete Jahjaga gjatë dy ditëve të fundit ka takuar drejtuesit e partive parlamentare, në përpjekje për ta zhbllokuar punën e Kuvendit, mirëpo asnjëra nga palët nuk po lëshon pe në kërkesat e tyre. Opozita po kërkon tërheqjen e marrëveshjeve, gjë të cilën nuk po e pranojnë partnerët e koalicionit qeverisës. Ambasadorja gjermane në Prishtinë, Angelika Viets, ka deklaruar për gazetën “Zëri” se qytetarët e Kosovës kanë shumë probleme tjera dhe ky fakt, sipas saj, do të duhej të ishte argument i mjaftueshëm që përfaqësuesit e popullit ta tejkalojnë këtë situatë. “Shumë njerëz këtu janë të detyruar që çdo ditë të konfrontohen me probleme krejt tjera. Kjo do të duhej të ishte përgjegjësi dhe obligim i mjaftueshëm për përfaqësuesit e zgjedhur të popullit”, ka deklaruar Viets për gazetën “Zëri”. Ambasadorja gjermane e ka mbështetur ndërhyrjen e presidentes Atifete Jahjaga për gjetjen e një zgjidhjeje, që do të mundësonte tejkalimin e kësaj situate./b.j/

Opozita në Kosovë: Protesta në Kuvend dhe jashtë tij, nuk do të ndalet

October 20, 2015 by dgreca

-Opozita ia paraqiti Presidentes së Kosovës kërkesat për tërheqje nga marrëveshjet me Serbinë dhe Malin e Zi/
-Mbledhja e Kryesisë së Kuvendit të Kosovës, e shtyrë, konferencë shtypi pritet në orën 15:00/
Nga Behlul Jashari/ PRISHTINË, 20 Tetor 2015/ Opozita kosovare shprehet se nuk ndryshon qëndrimin kundërshtues për 4 marrëveshjet e 25 gushtit të qeverisë së Kosovës me Serbinë dhe për marrëveshjen e demarkacionit me Malin e Zi, edhe pas takimit sot te Presidentja e Republikës, Atifete Jahjaga të tre liderëve Visar Ymeri i LVV, Ramush Haradinaj i AAK dhe Fatmir Limaj i Nisma.
“Tre kryetarët e subjekteve politike ia paraqitën Presidentes Jahjaga kërkesat e opozitës për tërheqje nga marrëveshjet me Serbinë dhe nga ajo për demarkacionin me Malin e Zi, si kërkesa të cilat nuk kanë kompromis e as që janë të diskutueshme”, bëhet e ditur në deklaratën pas takimit, ku theksohet se “ky takim ishte ftuar nga Presidentja”
Theksohet se, po ashtu e njoftuan Presidenten se protesta e opozitës së bashkuar në Kuvend dhe jashtë tij, nuk do të ndalet me asnjë kusht deri në realizimin e këtyre kërkesave.
“Kryetarët e tre subjekteve shprehën kundërshtimin e tyre të fuqishëm për masat represive policore të cilat po i ndjek qeveria me rrëmbimin e deputetëve dhe torturimin e aktivistëve të subjekteve opozitare me qëllim të frikësimit dhe ndaljes së protestës. Vetëm tërheqja nga marrëveshjet e ndal protestën. Çkado tjetër dërgon në përshkallëzim të situates”, shprehet opozita e bashkuar.
Ndërsa, dje pasdite, Presidentja Jahjaga ka zhvilluar takim me Hashim Thaçin dhe Isa Mustafën në cilësinë e kryetarit të Partisë Demokratike të Kosovës, respektivisht të Lidhjes Demokratike të Kosovës dhe shefat e grupeve parlamentare të këtyre dy subjekteve, Adem Grabovcin dhe Ismet Beqirin.
Në takim ishte edhe Kryetari i Kuvendit të Kosovës, Kadri Veseli.
Këto zhvillime janë në kuadër të iniciativës së Presidentes Jahjaga që të ftojë në takime të ndara udhëheqësit e subjekteve politike në Kosovë për të tejkaluar gjendjen e krijuar në vend.
Në pritje të takimeve të Presidentes me drejtuesit politikë, mbledhja e Kryesisë së Kuvendit të Republikës së Kosovës, e paraparë për dje, është shtyrë për ditën e sotme. “Përgatitjet për vazhdimin e seancës plenare” janë e vëtmja pikë në axhendë në mbledhjen e Kryesisë së Kuvendit që pritej të zhvillohej në këto momente të mesditës, ndërsa paralajmërohet konferencë shtypi për në orën 15:00. Nuk ka ndonjë njoftim kur do ketë seancë plenare të Kuvendit.
Kosova po vazhdon të humb në kohë me Kuvendin e saj, i cili në legjislacionin e kaluar ishte 7 muaj jofunksional, 1 muaj para e 6 muaj pas zgjedhjeve parlamentare parakohëshme të 8 qershorit, derisa u mblodh në seancën konstituive shumë të vonuar në 8 dhjetor 2014.
Para më shumë se një muaji, raportimi i qeverisë së Kosovës lidhur me katër marrëveshjet e arritura në Bruksel më 25 gusht 2015 ishte në axhendë në seancat e para të sesionit vjeshtor në 17 e 22 shtator. Në seancën e parë nuk ishin të pranishëm raportuesit dhe koalicioni qeverisës kërkoi shtyrje, ndërsa në të dytën që u shpall e mbyllur pas disa ndërprerjeve e pa u zhvilluar pati edhe gjuajtje vezësh nga opozita drejt kryeministrit sapo ai nisi raportimin.

Kuvendi i Kosovës pa asnjë seancë të përfunduar në sesionin vjeshtor vazhdon të jetë i bllokuar nga opozita.

“Aksionet simbolike” të opozitës, me “rrethime” të foltores e kryesuesëve, fërshëllima, gjuajtje vezësh e gazi lotësjellës në sallën e seancave të Kuvendit, janë pjesë e kundërshtimeve edhe me protesta në rrugë dhe me një peticion me rreth 200 mijë nënshkrime deri tani, të 4 marrëveshjeve të 25 gushtit me Serbinë dhe marrëveshjes së demarkacionit me Malin e Zi.
Presidentja Jahjaga, priti dje në takim edhe përfaqësues të shoqërisë civile, të cilat ditë më parë bënë deklaratë të përbashkët në mbështetje të dialogut politik për të adresuar zhvillimet e fundit në vend.
Organizata të shoqërisë civile në Kosovë në një deklaratë kanë shprehur opinionin se, “thirrja e seancave plenare pa ndryshim të qëndrimeve dhe rrethanave politike, nuk i shërben daljes nga situata e krijuar politike”, ndërsa theksojnë se “gjuha e dialogut politik është forma e vetme e zgjidhjes së problemeve politike”.

Kosovë- Polemika në Kuvend për 100 ditëshin e qeverisë

April 3, 2015 by dgreca

Me debate e polemika të shumta, Kuvendi i Kosovës ka diskutuar për 100 ditët e para të punës së Qeverisë. Debati i thirrur nga opozita, ka nisur me diskutimin e deputeti të Lëvizjes Vetëvendosje, Glauk Konjufca, si nismëtar i kësaj pike të rendit të ditës.
Ai i ka fajësuar dy partitë e koalicionit, Partinë Demokratike të Kosovës dhe Lidhjen Demokratike të Kosovës, për keqqeverisje ndër vite.
Kurse për kryeministrin e Kosovës, Isa Mustafa, Konjufci ka thënë se “ai mbahet në mend për deklarata të ashpëra në raport me deputetët e LDK-së që nuk e votuan atë për kryeministër, deklarata të ashpëra edhe në raport me qytetarët që migruan jashtë vendit, por edhe me deklaratat se Forcat e Armatosura të Kosovës nuk do të mund të shkojnë në veri të Kosovës”.
“Kjo qeveri e përbërë nga PDK-ja dhe LDK-ja, të cilat mendoj që nga viti 2001, janë përgjegjëse për pesë gjëra shumë të rëndësishme në Kosovë, e që janë, ngecje në zhvillimin ekonomik, lulëzimin e korrupsionit kronik në institucionet tona, degradimin e sistemit të arsimit, erozionin e sovranitetit shtetëror dhe ngulfatje të drejtësisë”, ka thënë Konjufca.
Ndërkohë, kryeministri Isa Mustafa, i ka quajtur të pavërteta deklaratat e deputetit Konjufca.
Ai ka përmendur faktin që ditët e para të qeverisjes ishin të vështira të përcjella me greva e protesta, por ka shprehur bindjen se situata ishte menaxhuar mirë.
Mustafa tha se programi i tij qeverisës “mbështetet në pesë shtylla kryesore, ku bëjnë pjesë, zhvillimi ekonomik, punësimi dhe mirëqenia, shteti ligjor, agjenda evropiane dhe reformat në arsim e shëndetësi”.
“Vetëm një qeverisje e bazuar në ekonomi të tregut dhe shtetin ligjor, mund ta forcoj besimin e qytetarëve të Kosovës dhe partnerëve tanë ndërkombëtar në vitalitetin e Kosovës si shtet i ri dhe i pavarur. Një Kosovë demokratike ku sundon ligji dhe respektohen të drejtat e secilit pa asnjë dallim, që promovon zhvillimin ekonomik dhe mirëqenien, që siguron lëvizjen e lirë të qytetarëve dhe që promovon shoqërinë e dijes”, ka thënë Mustafa.
Ndërkaq zëvendëskryeministri i parë dhe ministri i Punëve të Jashtme në Qeverinë e Kosovës, Hashim Thaçi ka paraqitur objektiva afatshkurta dhe afatgjata, që nisin nga liberalizimi i vizave e deri te njohjet e reja dhe anëtarësimi i Kosovës në organizata e mekanizma ndërkombëtar.
“Synimet afatshkurta për këtë vit do të jenë, nënshkrimi i marrëveshjes për Stabilizim e Asociim, aplikimi për anëtarësim në Këshillin e Evropës si dhe ta bindim Komisionin Evropian që brenda këtij viti të rekomandoj liberalizimin e vizave për Kosovën. Synime afatgjata mbesin fuqizimi i subjektivitetit ndërkombëtar të Kosovës, me theks të veçantë në sigurimin e njohjes nga pesë vendet e mbetura nga Bashkimi Evropian si dhe puna për t’u bërë anëtare e Kombeve të Bashkuara”, ka thënë Thaçi.
Në anën tjetër, kryetari i Aleancës për Ardhmërinë e Kosovës, Ramush Haradinaj, tha se shteti i Kosovës është i kapur, duke i veçuar si problemet kryesore krimin e organizuar dhe korrupsionin.
“Sipas bindjes sime, nëse nuk e trajtoni gjendjen në vend, ju do ta fundosni edhe Kosovën edhe veten, pra edhe këtë qeveri. Pra, duhet ta kuptoni që ç’kapja e shtetit është parametri i parë si edhe ndalja e korrupsionit”, ka theksuar Haradinaj.
Prezantimet e kryeministrit Isa Mustafa dhe zëvendësit të tij Hashim Thaçi, për kryetarin e partisë Nisma, Fatmir Limaj, u kuptuan si tregues për dualizma në drejtimin e koalicionit aktual qeverisës.
“Situata është e rëndë në këtë qeverisje. Në çdo vend në botë del kryeministri raporton për punën e vet dhe kabinetin qeveritar, kurse ne sot i dëgjuam dy raporte, qeveria Mustafa dhe qeveria Thaçi”, u shpreh Limaj.
Debati pritet të vazhdoj edhe të premten. Opozita ka përgatitur edhe disa rekomandime për kryeministrin dhe qeverinë e Kosovës të cilat pret që t’i sjellë në votim në fund të debatit.
Mes tjerash kërkohet që qeveria të jetë më transparente dhe të jap llogari para Kuvendit, qoftë për vendime të mëdha me implikime të brendshme apo edhe në lidhje me bisedimet me Beogradin.
Megjithatë, për miratimin e këtyre rekomandimeve në fund të debatit opozita do të ketë nevojë për mbështetjen e pozitës pasi që nuk i ka votat e mjaftueshme.(Zijadin Gashi)