per zgjedhjet shqiptare – Dielli

ODIHR dhe SHBA – deklarata për zgjedhjet Shqiptare

June 26, 2017 by dgreca

1 ODHIR

Vëzhguesit pohuan se procedurat zgjedhore nuk u respektuan plotësisht në shumë qendra votimi, dhe ndodhën përsëri votimi në grup dhe ndërhyrja e aktivistëve të partive. Po ashtu, transparenca e numërimit të votave nuk është e garantuar. Dita e zgjedhjeve kaloi në mënyrë të rregullt, thuhet në deklaratë, por disa procedura të rëndësishme nuk u respektuan plotësisht, në një numër të konsiderueshëm qendrash votimi të vëzhguara./

Nga Ilirian Agolli/Voa/Vëzhguesit ndërkombëtarë, që vëzhguan zgjedhjet parlamentare këtë të dielë në Shqipëri, theksuan deklaratën e tyre paraprake të paszgjedhjeve në një konferencë shtypi se zgjedhjet u mbajtën pas një marrëveshje dypartiake, dhe kjo siguroi pjesëmarrjen e opozitës, por zbatimi i saj krijoi një sfidë për administratën zgjedhore dhe rezultoi në një zbatim selektiv dhe jo të qëndrueshëm me ligjin.

Misioni ndërkombëtar i vëzhgimit të zgjedhjeve pohoi se partitë ishin në gjendje të bënin fushatë lirisht dhe liritë themelore u respektuan.

“Politizimi i vazhdueshëm i organeve dhe institucioneve të lidhura me zgjedhjet, akuzat e gjera për blerjen e votave, dhe presioni ndaj zgjedhësve ulën besimin e publikut në procesin zgjedhor” – tha Roberto Battelli, Koordinator i Posaçëm dhe udhëheqës i misionit të vëzhguesve afatshkurtër të OSBE-së, në deklaratën e përbashkët të vëzhguesve ndërkombëtarë.

“Praktikat e të kaluarës u përsëritën, veçanërisht shqetësimet për frikësime dhe presione ndaj votuesve, duke krijuar një atomosferë negative.

Marrëveshja PS-PD ishte një zhvillim pozitiv, por ajo solli tendosje në procesin zgjedhor.

Marrëveshja e 18 majit ishte e rëndësishme për të mbajtur zgjedhjet dhe solli disa përmirësime, pohuan vëzhguesit në deklaratën e përbashkët, por disa zhgënjime erdhën prej zbatimit të selektiv dhe të paqëndrueshëm në kurriz të ligjit.

Vonesave në formimin e komisioneve të shkallëve më të ulta dhe të numrit të madh të zëvendësimeve, – thuhet në deklaratë, – një pjesë e mirë e stafit zgjedhor nuk arriti të trajnohej. Të gjitha këto e ulën efektivitetin e administrimit të zgjedhjeve.

Zgjedhjet u zhvilluan në klimën e ndarjeve të thella dhe të gjata politike mes Partisë Socialiste dhe Partisë Demokratike të opozitës, si dhe në klimën e një besimi të ulët të publikut tek procesi zgjedhor.

Vlerësimi përfundimtar i zgjedhjeve, thuhet në deklaratë, do të varet pjesërisht nga mënyra se si do të zhvillohen fazat përfundimtare të procesit zgjedhor, duke përfshirë numërimin e votave, shpalljen e rezultateve dhe trajtimin e ankesave apo apelimeve të mundshme.

Misioni ndërkombëtar i vëzhgimit të zgjedhjeve përbëhet nga 330 vëzhgues nga 43 vende, duke përfshirë 255 vëzhgues afatgjatë dhe afatshkurtër të vendosur nga OSBE/ODIHR-i, 36 parlamentarë dhe punonjës nga Asambleja e OSBE-së, 25 nga APKE dhe 11 nga PE-ja.

Ambasada e Shteteve të Bashkuara të Amerikës uron qytetarët shqiptarë

Shtetet e Bashkuara uruan qytetarët shqiptarë për ushtrimin e të drejtës së tyre demokratike të votës në zgjedhjet parlamentare të 25 qershorit, 2017. Në një deklaratë të ambasadës së Shteteve të Bashkuara thuhet se votimi u krye me efikasitet dhe në mënyrë paqësore në pjesën më të madhe të Qendrave të Votimit.

“Ne përgëzojmë punonjësit dhe vëzhguesit e përkushtuar të zgjedhjeve së ditës së votimit, të cilët punuan gjatë një dite feste kombëtare dhe të nxehti ekstrem, për të përmbushur detyrat e tyre” – vlerësohet në deklaratë.

Vëzhguesit ndërkombëtarë, thotë ambasada e SHBA-ve në Shqipëri, dëshmuan incidente të blerjes së votës, fotografimit të fletës së votimit, dhe presoni ndaj votuesve, por zyrtarët e zgjedhjeve dhe forcat e rendit iu përgjigjën pjesës më të madhe të këtyre ankesave, disa prej të cilave përfunduan në arrestime.

“Edhe pse disa nga shkeljet zgjedhore të dëshmuara ishin serioze dhe duhen adresuar, ato nuk ishin aq të përhapura sa të ndryshonin rezultatin e përgjithshëm të zgjedhjeve” – thuhet në deklaratë.

Greqia e varfëruar financon autobusët për të votuar kandidatët e PBDNJ-OMONIA

June 19, 2015 by dgreca

Ne Foto:, Vasil Bollano, Leonidha Papa, Andoni Samaras, Fredi Beleri, 4 Qershor, në zyrën e DR, kryetarit./

Nga Arben LLALLA/

Greqia ka disa vite që ndodhet në kolapsin e rrënuar ekonomikisht. Më 30 Qershor është afati i fundit që ky shtet duhet të paguaj këstin e radhës prej 1.6 miliardë euro. Nëse ky këst nuk paguhet atëherë më 1 Korrik pritet të shpallet falimentimi i Greqisë, ky është mesazhi nga kryetarja e FMN, Cristine Lagarde. Por Greqia edhe pse ka probleme të rënda ekonomike Ministria e Punëve të Jashtme- drejtoria e Diasporës ka marrë përsipër pagesën për rreth 100 autobuzë për të sjellë në Shqipëri emigrantët shqiptar për të votuar më 21 Qershor në zgjedhjet për kryetar Bashkie. Javën e parë të muajt Qershor në Athinë ishin Kryetari i OMONIA, Leonidha Papa, Vasil Bollano dhe Fredi Beleri, kandidati për kryetar të bashkisë së Himarës i mbështetur nga PBDNJ-OMONIA. Këta pasi bënë disa takime me mbështetësit e tyre që i përkasin krahut të djathtë ekstremistë u pritën nga përfaqësuesi i zyrës për Diasporën në MPJ greke për të kërkuar mbështetje financiare për autobëz falas për votuesit shqiptar. Kjo zyrë ju premtoj Papës, Belerit dhe Bollanos se do tju sigurojë financa në të holla për rreth 100 autobuzë. Autobuzët që do financojë MPJ-Drejtoria e Diasporës Greke, do nisen ditën e Premte dhe të Shtunën, gjatë udhëtimit në çdo autobuzë do ketë ciceron të PBDNJ-OMONIA i cili do ti orientojë udhëtarët se për kë kandidat duhet të votojnë. Në një farë mënyre dhënia e biletave të udhëtimit falas nga MPJ të Greqisë në drejtim për të votuar kandidatët e PBDNJ-OMONIA është futje hundët në punët e brendshme të Shqipërisë, por është edhe një formë e shit-blerjeve të votave që duhet të dënohet zyrtarisht nga shteti shqiptar.

Pas këtij takimi me përgjigje pozitive përfaqësuesit e PBDNJ-OMONIA kërkuan takim me qeveritarët grek, por morën përgjigje negative. Kryeministri Çipras ishte shprehur në kofidencë se nuk ka asnjë preferencë për të mbështetur kandidatët e PBDNJ. Pas refuzimit nga ana e përfaqësuesve të qeverisë greke, më 4 Qershor, Leonidhas Papas, Vasil Bollano dhe Fredi Beleri trokitën në dyert e partisë opozitare të Demokracisë së Re dhe u pritën nga kryetari i saj Andoni Samaras i cli ju premtojë se ditën e zgjedhjeve do dërgoj disa deputet të partisë së tij për të ndikuar në rezultatin që të fitojnë kandidatët e PBDNJ-OMONIA.

Reeker: Shqipëria të mbajë zgjedhje të rregullta

June 22, 2013 by dgreca

Zëvendësndihmës sekretari amerikan i Shtetit tha në një intervistë për Zërin e Amerikës se të gjitha palët duhet të respektojnë rezultatin/

Nga Isak Ramadani/

Duke folur për zgjedhjet e 23 qershorit në Shqipëri, Zëvendësndihmës sekretari amerikan i Shtetit, Philip Reeker, tha se u takon të gjitha palëve të përfshira që të respektojnë rezultatin përfundimtar. Ai tha se ka rëndësi të madhe që Shqipëria të veprojë në përputhje me statusin e saj si vend anëtar i NATO-s duke mbajtur zgjedhje të rregullta. Roti Reeker i bëri komentet gjatë një vizite në Shkup, në një intervistë për Zërin e Amerikës.

VOA: Zoti Reeker në fillim të muajit maj, gjatë një dëshmie para Komisionit Amerikan të Helsinikit ju theksuat se “Shtetet e Bashkuara e kanë bërë të qartë se që zgjedhjet të jenë në përputhje me standartet ndërkombëtare duhet të respektohet pavarësia e institucioneve; debati politik duhet të jetë konstruktiv dhe i civilizuar; dhe populli shqiptar duhet të ketë besim si në procesin zgjedhor, edhe në rezultatin e zgjedhjeve”. A mendoni se sot, kur kanë mbetur vetëm pak ditë nga zgjedhjet, Shqipëria ka shans që këtë herë t’i përmbushë standartet ndërkombëtare?
Philip Reeker: Dua të theksoj se Uashingtoni dhe Brukseli, miq të Shqipërisë, po i ndjekim me shumë vëmendje zgjedhjet, procesin deri në ditën e votimeve, mënyrën e zhvillimit të zgjedhjeve dhe reagimin për rezultatin e zgjedhjeve. Është shumë e rëndësishme për popullin e Shqipërisë që këto zgjedhje të kryhen në një formë të tillë që është e përshtatshme për një vend anëtar të NATO-s. Ne jemi krenarë që Shqipërinë e kemi partnere në NATO. Ata duhet të marrin masa që populli shqiptar t’i besojë procesit elektoral dhe që zgjedhjet të plotësojnë standardet ndërkombëtare dhe ato evropiane. Kjo do të krijonte bazën për fazën e ardhshme të integrimit të plotë të Shqipërisë në komunitetin euro-atlantik.

VOA: Duket se Komisioni Qendror i Zgjedhjeve do t’i administrojë zgjedhjet me 4 anëtarë. Si do të ndikojë kjo për zhvillimin e zgjedhjeve? A mendoni se zgjedhjet do të rrezikohen?

Philip Reeker: Një nga gjërat për të cilat kam folur dhe jam shprehur qartazi më parë përpara Kongresit, është se për të plotësuar standartet ndërkombëtare, institucionet duhet të shihen si të pavarura dhe plotësisht funksionuese. Moskonstituimi i plotë i Komisionit Qendror të Zgjedhjeve, paraqet sfida për administrimin me efektivitet të zgjedhjeve, veçanërisht përsa i përket certifikimit të zgjedhjeve dhe trajtimit të apelimeve. Ne dhe partnerët tanë ndërkombëtarë e kemi theksuar se kjo është një çështje e rëndësishme të cilës i duhet kushtuar vëmendje. Ne të gjithë jemi të vetëdijshëm se populli shqiptar, shtetasit me të drejtë vote, kanë më pak besim tek procesi, si rezultat i vazhdimit të vështirësive me statusin e Komisionit Qendror të Zgjedhjeve. Por megjithëse KQZ-ja nuk është e plotë, partitë politike, kandidatët, si qeveria edhe opozita, kanë vendosur t’i zhvillojnë zgjedhjet, dhe ato kanë përgjegjësinë t’i zhvillojnë këto zgjedhje në përputhje me statusin e Shqipërisë si një aleate e NATO-s, në mënyrë që gjithë populli shqiptar të ndihet krenar për to.

VOA: A ekziston shqetësim në Uashington se rezultati i zgjedhjeve nuk do të pranohet nga ndonjëra prej palëve?

Philip Reeker: Le të kujtojmë se në Shqipëri ka mjete ligjore për të apeluar rezultatin e zgjedhjeve përmes sistemit të gjykatave. Si e zhvillojnë fushatën partitë politike, si i zhvillon zgjedhjet Komisionmi Qendror i Zgjedhjeve, si numërohen votat, si zgjidhen mospajtimet, si reagon publiku dhe partitë politike ndaj rezultatit të zgjedhjeve, të gjitha këto do të dërgojnë një mesazh shumë të qartë rreth të ardhmes së Shqipërisë. Bashkimi Evropian e ka bërë shumë të qartë se të gjitha këto aspekte do të kenë rol shumë të madh në përcaktimin e ritmeve dhe hapave të ardhshëm të statusit të Shqipërisë si vend kandidat, dhe do të ishte me pasoja reale nëse do të kishte mosmarrëveshje të gjata dhe të papajtueshme rreth rezultatit. Do të kishte një ndikim për shembull, në vlerësimin që vendet e tjera do t’i bëjnë Shqipërisë përsa u përket kërkesave për viza, do të kishte ndikim se si investitorët e huaj do ta shikojnë Shqipërinë, do të ngrihen pikëpyetje për stabilitetin, për pavarësinë dhe për forcën e institucioneve demokratike. Pra të gjitha këto do të kenë ndikim të madh për të ardhmen e Shqipërisë, për të cilën të gjithë votuesit në Shqipëri janë të interesuar. Ne presim udhëheqje, kandidatë dhe institucione të përgjegjshme që këto zgjedhje t’i zhvillojnë në mënyrë të rregullt dhe më pas, pasi votimi të mbarojë, t’i zhvillojnë fazat e tjera po me rregullsi.

U takon të gjitha palëve të përfshira që të respektojnë rezultatin përfundimtar. Është sinjal i rëndësishëm që Shqipëria të veprojë në përputhje me statusin e saj si vend anëtar i NATO-s duke zhvilluar zgjedhje të rregullta, që të njihen si të tilla. Në rajon kemi parë zgjedhje të zhvilluara mirë, si në Mal të Zi, në Maqedoni, në Serbi, që kanë plotësuar standardet e zgjedhjeve të lira e të drejta sipas përcaktimit të OSBE/ODIHR-it. Unë kam besim se edhe në Shqipëri kjo mund të ndodhë, por ajo kërkon përpjekje serioze nga të gjitha palët, nga qeveria, opozita, të gjithë kandidatët, institucionet dhe të gjithë banorët, për të kërkuar që këto zgjedhje të jenë të mira për Shqipërinë dhe për të ardhmen e Shqipërisë.

VOA: Meqë KQZ-ja nuk do të jetë në gjendje ta certifikojë rezultatin e zgjedhjeve, a është e pranueshme që rezultati të certifikohet nga Kolegji Zgjedhor?

Philip Reeker: Ligjet e Shqipërisë, kushtetuta e Shqipërisë, parashikojnë procedura ligjore për këto raste. Siç e theksuam, duke mos e plotësuar KQZ-në, do të ketë vështirësi për administrimin e suksesshëm të zgjedhjeve. Këtë e kemi theksuar shpesh herë. Por megjithë managësitë e KQZ-së, si qeveria edhe opozita kanë vendosur të shkojnë në zgjedhje. Mendoj se numërimi i votave do të jetë një element kritik, një pjesë e rëndësishme e procesit, është një nga elementët që nuk gëzon nivelin më të lartë të besimit të publikut, bazuar në historikun e manipulimeve elektorale në të kaluarën, prandaj u bëjmë thirrje të gjitha partive politike të kenë përfaqësuesit e tyre në aparatin lokal elektoral dhe në grupet e numërimit të votave, që të jenë pjesë e këtij procesi dhe të respektojnë deri në fund, në gërmë dhe në frymë, ligjet. Duke ndjekur ligjet, duke respektuar institucionet dhe pavarësinë e tyre, atëhere edhe elektorati, popullsia, banorët do të kenë besim tek procesi. Përpjekjet për të vonuar ose manipuluar procesin do ta gërryenin më tej besimin e publikut tek zgjedhjet në Shqipëri dhe tek partitë si përfaqësuese të ligjshme të interesave të qytetarëve. Qytetarët e Shqipërisë dhe unë kam folur me shumë prej tyre, presin që zgjedhjet të shënojnë përparim, ata duan të jenë krenarë nga zgjedhjet, të jenë krenarë nga ato që kanë arritur, të thellojnë më tej integrimin euro-atlantik, të tërheqin më shumë investime të huaja dhe të kenë atë qëndrueshmëri dhe begati që meritojnë.

Shtypi amerikan për zgjedhjet e 23 Qershorit në Shqipëri !

June 22, 2013 by dgreca

Kongresisti Eliot Engel : “E gjithë Bota është duke shikuar SHQIPËRINË!”/

Shkruan: BEQIR SINA, New York/

NEW YORK : Nё disa artikuj tё botuar këto ditë, nё shtypin e amerikan duke iu referuar mediave në Shqipëri, flitet për zgjedhjet nё Shqipёri dhё parashtroheshin disa probleme qё dinamika e zgjedhjeve sjell. Mё poshtё po paraqesim njё pёrmbledhje tё disa pikave kryesore, marrё me shkurtime nga mediat në online.

Zëvendës ndihmësi i Sekretarit Amerikan të Shtetit, zoti Filip Riker, ka thënë për Zërin e Amerikës se: “të gjitha palët duhet të respektojnë rezultatin e zgjedhjeve”.
Këtë deklerat, të cilën e publikoi dhe Associated Press, duke iu referuar në një intervistë me Zërin e Amerikës gjatë vizitës në Shkup, Zëvendës Ndihmës Sekretari i Shtetit Filip Riker, thuhet se zoti Riker foli në lidhje me zgjedhjet e 23 qershorit në Shqipëri. Ai tha se “është e rëndësishme për të gjitha palët e interesuara që të respektojnë rezultatin, dhe se Shqipëria duhet të veprojë në përputhje me statusin e saj si një anëtare e NATO-s, duke mbajtur zgjedhje të rregullta”.
Ndërkohë, që kongresisti demokrat nga New Yorku, Eliot Engel kryetar Grupit të Çështjeve Shqiptare në Kongresin Amerikan, ka deklaruar, për zgjedhjet e ditës së nesërme në Shqipëri, duke thënë se : “E gjithë Bota është duke shikuar SHQIPËRINË!”
Kongresmeni amerikan Eliot Engel në një intervistë për gazetën kombëtare Bota Sot, muajin e kaluar tha se reputacioni i vendit do të varet mbi organizimin e zgjedhjeve të lira dhe demokratike, zgjedhjeve të qershorit 23 në Shqipëri..
“Është shumë e rëndësishme që Shqipëria të ketë zgjedhje të lira, të ndershme dhe demokratike, të mos ketë asnjë mashtrim apo manipulim dhe që procesit zgjedhor të jetë i pastër. Shumëkush është duke i monitoruar dhe ndjekur nga afër zgjedhjet në këtë vend. Mbasi Shqipëria është anëtare e NATO-s dhe unë mendoj se zgjedhjet e lira dhe të ndershme do të ndihmojnë Shqipërinë në anëtarësim e saj në Bashkimin Evropian, e kundërta nuk do të jetë lajm i mirë, për shkak se tërë bota është duke shikuar nga Shqipëria nesër “, ia patë deklaruar Bota sot, kongresisti Engel, një demokrat i rangut të lartë në Komitetin e Punëve të Jashtme i Dhomës së Përfaqësuesve, Grupit të Çështjeve Shqiptare në Kongresin Amerikan
Sipas tij, Komisioni Qendror i Zgjedhjeve duhet të punojnë për të arritur standardet ndërkombëtare të zgjedhjeve dhe demokratike.”Mua nuk më intereson se kush është në KQZ, për mua është e rëndësishme që komisioni të bëjë punën në përputhje me ligjet në fuqi në mënyrë që zgjedhjet të jenë të lira dhe demokratike”, ka thënë kongresisti amerikan.

Kurse, Kongresmeni demokrat amerikan, nga Michigani, Gary Peters, i cili është edhe bashkëkryetar i Grupit të Çështjeve Shqiptare në Kongresin Amerikan, dje në një intervistë për Bota Sot, deklaroi se ” Zgjedhjet e së dielës përfaqësojnë një mundësi të jashtëzakonshme për Shqipërinë. Është, shumë – shumë e rëndësishme që këto zgjedhje të bëhen pa kundërshtime ose parregullsi pasi Shqipëria kërkon të vazhdojë rrugën e integrimit drejt Europës. Kur u takova me deputetët e Parlamentit gjatë vizitës time në Tiranë, unë dëgjova me veshët e mij angazhimin e tyre ndaj praktikave demokratike transparente. Unë kam shpresë të madhe se këta udhëheqës do të vijojnë me angazhimin e tyre në dobi të të gjithë shqiptarëve si dhe të marrëdhënieve Amerikë – Shqipëri. Shqiptarët me të vërtetë e kuptojnë rëndësinë e përfshirjes në zgjedhje demokratike.”

Rruga drejt Bashkimit Evropian, tha kongresmeni Peters, mbetet e rëndësishme për rritjen ekonomike për të ardhmen e Shqipërisë por edhe zgjedhjet e lira dhe të ndershme janë të domosdoshme për të, për të përparuar në rast se dëshiron t’i bashkohet BE -së. Shqiptarët duhet të presin prej drejtuesve të tyre që këta të demonstrojnë respekt të plotë ndaj principeve bazë të demokracisë të cilat dy kombet tona i kanë aq të shtrenjta.

Në zonën time elektorale në juglindje të Miçiganit, unë kam parë me sytë e mi përkushtimin e shqiptarëve ndaj bashkësive të tyre, familjeve si dhe ndaj SHBA -së dhe Shqipërisë.

Ai tha gjithashtu se:” Unë jam duke i ndjekur nga afër ngjarjet që kanë të bëjnë me Komisionin Qendror të Zgjedhjeve. Në një demokraci është e rëndësishme që populli të ketë besim tek institucionet siç është Komisioni Qendror i Zgjedhjeve. Zbatimi i ligjit duhet të sundojë në një mënyrë politike. Megjithatë, është e rëndësishme që KQZ po funksionon dhe rezultati i konsensusit politik. Unë jam i shqetësuar për kundërshtitë që janë krijuar, por mbetem me shpresë se situata do të zgjidhet me sukses.”
Ndërkaq, kryesocialisti Rama, kryetari i opozitës në një intervistë me Bugajski në programin – “ORA e BUGAJSKIT”: ka deklaruar se “Unë nuk besoj në monitorimin e zgjedhjeve” Në show-n “Bugajski Hour” lideri i opozitës Edi Rama ka thënë se ai nuk beson në monitorimin e zgjedhjeve. “Shumica e vëzhguesve duket për mua si spektatorë në një funeral,” i ka deklaruar Rama gazetarit amerikan që punon për televizionin Albanian Screen – Janusz Bugajski.
Kur u pyetë nëse ai mendonte se Shqipëria, ishte duke ecur përpara në këto zgjedhje në krahasim me ato të mëparshme, ai tha se, “Unë do të citoj një ndryshim pozitiv. Ka një larmi të transmetimit televiziv të drejtpërdrejtë dhe të mbulimit të drejtpërdrejtë, më shumë hapësirë për njerëzit që të shprehin veten e tyre dhe për të dëgjuar alternativa. Për pjesën tjetër, institucionalisht, ne nuk jemi edhe aty ku ishim më parë, por ne kemi ndërmarrë hapa mbrapa, sepse ne kemi humbur institucionin qendror i zgjedhjeve dhe KQZ-ja ka bërë një organizimi partiak nga partia në pushtet. ” ka deklaruar zoti Rama.
Kryetari i Delegacionit të Parlamentit Europian Eduard Kukan në ABC News, është shprehur se: “Është shumë e rëndësishme që humbësi ka për të pranuar disfatën”
Këtë dekleratë ai e ka bërë në një intervistë me ABC News, më 19 qershor, Eduard Kukan, kreu i delegacionit të Parlamentit Evropian, që do të monitorojë nga afër zgjedhjet në Shqipëri, nënvizoi rëndësinë e zgjedhjeve të 23 qershorit, dhe çështja e plotësimit të vendeve vakante në KQZ. “Jam i inkurajuar nga informacioni që kam, se fushata zgjedhore e këtij viti nuk ka qenë negativ, por ishte më i civilizuar dhe nuk ka pasur sulme agresive personale ndërmjet liderëve politikë. Unë shpresoj se kjo do të ndiqet edhe në ditën e zgjedhjeve dhe pas votimit. Është shumë e rëndësishme që humbësi pranon humbjen dhe nuk krijojnë probleme për funksionimin e Parlamentit të ardhshëm. Pra, zgjedhjet duhet të shihet si një mundësi për vendin për të avancuar drejt Bashkimit Evropian “.
Ne kemi një deklaratë të përbashkët nga Stefan Füle dhe Catherine Ashton shpreh shqetësim për KQZ-në. Në fakt, ajo që është e vërtetë shqetësim në Bruksel, se KQZ-ja si institucion nuk është optimale apo se ajo mund të përdoret nga humbës në zgjedhjet e konkursit?
Eduard Kukan: Pyetja juaj nxit komente. Në deklaratën e Stefan Füle dhe Catherine Ashton, dhe deklarata e ambasadorit amerikan, ajo është e deklaruar qartë se KQZ-ja është një problem. Ne u bëjmë thirrje udhëheqësve politikë të Shqipërisë të gjejnë konsensus për KQZ. Ne jemi të vetëdijshëm se koha po mbaron dhe e di se kjo është një çështje e komplikuar, për shkak se ajo ka nevojë për votën e Parlamentit nëse anëtarët e KQZ-së do të kthehen në Komision. Por edhe nëse kjo ndodh në orët dhe minutat e fundit, të gjithë do të vlerësojmë këtë. Nëse kjo nuk ndodh, siç keni thënë në pyetjen tuaj, kushtet mund të jetë krijuar për të vënë në pikëpyetje rezultatin e zgjedhjeve. Kjo është për shkak se KQZ-ja nuk mund të marrë këto vendime, të cilat kërkojnë një shumicë të cilësuar. Edhe OSBE-ja ka shprehur në mënyrë të qartë këtë në raportin e saj. Nëse kjo nuk ndodh, ajo do të jetë një minus i panevojshëm për vendin. Pavarësisht se sa të qetë dhe të ndershëm zgjedhor mund të jenë, nuk do të ketë kritika për funksionimin e KQZ-së. Kjo është arsyeja pse unë theksoj se sa e rëndësishme është për të dyja palët për të shmangur këtë pikë negative për KQZ.
Kurse, Kryeministrit Berisha në Agjencinë Austriake APA ka deklaruar thekson shtypi amerikan se :” Ne do të pranojmë rezultatin e zgjedhjeve”
Kryeministri i Shqipërisë këtë deklerat e bëri disa ditë më parë në një intervistë me Agjencinë Austriake për Shtyp (APA). Kryeministri Sali Berisha i tha gazetarit Martin Richter se ai ishte mjaft komod se PD do të fitojë zgjedhjet. Kur u pyetën se çfarë do të ndodhë nëse ai humbet, ai deklaroi: “Sigurisht që ne do të pranojmë vullnetin e popullit shqiptar.” Ai vazhdoi duke shtuar se ai ende ka aq shumë energji, dhe nuk e ka vendosur ende se çfarë do të bënte ai. “Ne do të presim për verdiktin e popullit,” tha ai.
Kryeministri është pyetur rreth mundësisë së një koalicioni të ri në mes PD-së dhe LSI, nëse rezultatet e thirrjes së zgjedhjeve për një në mënyrë që të formojnë qeverinë. Berisha tha se kjo çështje duhet të kërkohet pas zgjedhjeve. Ai shtoi, megjithatë, se lëvizja e Metës ishte “një veprim shumë befasuese dhe të papritura. Kjo ishte koha e gabuar për të marrë një vendim të tillë dhe për të vënë vendin në një situatë të tillë të paqëndrueshëme, vetëm para zgjedhjeve. ”
I pyetur në lidhje me sjelljen e tij politike, nëse ai humbet zgjedhjet, nëse ai do të reagojë me protesta dhe bojkot të Parlamentit, Berisha dha një përgjigje të një fjalë: “Kurrë”.

AMERIKA PËR ZGJEDHJET E 23 QERSHORIT NË SHQIPËRI

May 11, 2013 by dgreca

Nga Frank Shkreli/
Të Hënën që kaloi, më 6 Maj, Komisioni amerikan i Helsinkit mbajti një seancë ku zyrtarë të Departmentit të Shtetit, anëtarë të Kongresit dhe eskpertë të çështeve shqiptare diskutuan për zgjedhjet e 23 qershorit në Shqipëri. Seancën e hapi Senatori Ben Cardin , demokrat nga shteti Marilënd, i cili vuri në dukje se këjo ishte seanca e dytë për të diskutuar për një vend mik dhe aleat të ngushtë të Shteteve të Bashkuara dhe anëtar i OSBE-ës dhe njëkohsisht, një vend aleat i NATO-s. Duke thënë se seanca tjetër e Komisionit amerikan të Helsinkit ishte përqëndruar kohët e fundit mbi Hungarinë, Senatori Cardin theksoi se, “është e mundur që me vendet me të cilat jemi aleat dhe miq të ngushtë, të bisedojmë haptazi dhe sinqerisht në lidhje me përparimin e bërë në procesin e zgjedhjeve, në ndërtimin e institucioneve demokratike, si dhe mbi angazhimet ndaj OSBE-ës.” Qëllimi i kësaj seance, tha Senatori Cardin, është që të shprehim shqetsimet tona dhe të përpiqemi të gjëjmë mënyra pozitive për avancimin e duhur për zbatimin e parimeve të OSBE-ës. Këtë, tha ai, do ta bëjmë edhe me Shtetet e Bashkuara, kur mendojmë se ato nuk veprojnë në përputhje me parimet e OSBE-ës.
”Unë besoj”, shtoi ai, “se populli shqiptar meriton zhvillimin e zgjedhjeve të lira dhe të ndershme, shqiptarët meritojnë zbatimin e parimeve dhe premtimeve të demokracisë, në kuptimin e plotë të fjalës, në përputhje me angazhimet e OSBE-ës.”
Anëtari tjetër i Komisionit amerikan të Helsinkit, Kongresisti Robert Aderholt republikan nga shteti Alabama, tha se në Shqipëri ka “mendje të ndritura si në radhët e shumicës ashtu edhe të pakicës, të cilët duan që vendi i tyre të shkojë përpara.” OSBE-ja tha ai i konsideron zgjedhjet e qershorit si shumë serioze dhe këjo seancë synon, shtoi ai, që të inkurajojë procesin, ashtuqë OSBE-ja të mund të thotë në fund të këtij procesi se zgjedhjet në Shqipëri ishin të lira dhe të ndershme.
Kongresmenët filluan dëshmitë duke ftuar Zevëndës Ndihmës Sekretarin amerikan të Shtetit, Filip Riker i cili foli për marrëdhënjet shumë të mira midis dy vendeve dhe identifikoi disa prej sfidave që mbeten, sidomos në lidhje me procesin zgjedhor. Z. Riker nënvijoi mbështetjen historike të Shteteve të Bashkuara për Shqipërinë, duke filluar nga Shpallja e Pavarësisë së Shqipërisë. Ai përmendi periudhën e izolimit komunist duke thënë se ishte Zëri i Amerikës, ai që solli lajmet dhe informacionin, por edhe frymëzimin për liri e demokraci, një Shqipërie tepër tepër të izoluar.Ai nënvijoi mbështetjen e vazhdueshme të gjitha adminstratave amerikane –demokrate dhe republikane — për Shqipërinë, dhe theksoi rolin pozitiv që Tirana zyrtare luan në fushën ndërkombëtare, duke shtuar se “Shtetet e Bashkuara vlerësojnë shumë kontributet e mëdha që Shqipëria ka dhënë drejtë realizimit të objektivave të përbashkëta”.
Diplomati amerikan, gjatë dëshmisë së tij në Kongres, shprehu përkrahjen e SHBA-s për qendrimin e njohur tanimë të Komisionit Evropian se zgjedhjet e 23 qershorit janë një provë kritike për dhënjen Shqipërisë statusin e vendit kandidat të Bashkimit Evropian, duke cituar nga fjalimi i ish-Sekretares së Shtetit Hillari Klinton në Kuvendin e Shqipërisë se, “Shqipëria dhe Shqiptarët meritojnë vendin e tyre në familjen e kombeve evropiane”.Filip Riker, në emër të Departamentit të Shtetit dhe rrjedhimisht në emër të Shteteve të Bashkuara tha se, “Shtetet e Bashkuara e kanë bërë të qartë qendrimin e tyre se për zbatimin e standardeve ndërkombëtare, është i nevojshëm respektimi i pavarësisë së institucioneve, se diskursi politik duhet të mbetet konstruktiv dhe i qyterëruar dhe se populli shqiptar duhet të ketë besim në procesin si edhe në rezultatin përfundimtar të zgjedhjeve”, dhe shtoi se “Shtetet e Bashkuara janë posaçërisht të shqetësuara në lidhje me pavarësinë e Komisionit Qendror të Zgjedhjeve.”
Z. Riker tha se “udhëheqsit politikë të Shqipërisë duhet të bashkpunojnë, ata duhet të bëjnë kompromis”, ashtuqë ky institucion — që është përgjegjës për mbarvajtjen e zgjedhjeve — të forcohet dhe njëherazi të gjëndet një zgjidhje që bën të mundur që KQZ të ushtrojë mandatin e tij.”
Riker shtoi se, “ne kemi besimin se udhëheqsit shqiptarë do të bëjnë një gjë të tillë.” Diplomati amerikan , përgjegjës për politikën amerikane karshi vendeve të Ballkanit vazhdoi duke thënë se, “Mënyra se si do të zhvillohen zgjedhjet e 23 qershorit, do të jetë një treguesi rëndësishëm i pjekurisë demokratike të Shqipërisë dhe do të dërgojë një sinjal të qartë se Shqipëria është gati për statusin e kandidatit të Bashkimit Evropian”.
Me një zë të patundur dhe të qartë, Filip Riker theksoi qendrimin amerikan duke thënë se ecuria e zgjedhjeve të 23 qershorit, “Do të ketë ndikim në marrëdhënjet tona dypalëshe me Shqipërinë.”
Në seancë mori pjesë edhe kongresmeni Eliot Engel, bashk-kryetar i Grupit të Çeshjteve Shqiptare në Kongres, mbështeti deklaratën e Z. Riker mbi zgjedhjet e ardhëshme në Shqipëri dhe si mik i Shqipërisë dhe i shqiptarëve, ai iu drejtua klasës politike shqiptare me këto fjalë, ndër më seriozet, që kma dëgjuar prej tij: “Unë u bëj thirrje të gjitha partive politike që të zbatojnë premtimet që Shqipëria i ka bërë OSBE-së për mbajtjen e zgjedhjeve dhe për fushatën që i paraprinë atyre. Zgjedhjet duhet të konsiderohen nga OSBE-ja si të lira dhe të drejta. Një gjë e tillë jo vetëm do t’u jepte legjitimitet rezultateve për elektoratin shqiptar dhe komunitetin ndërkombëtar, por do të ishte një mandate,ashtuqë që të gjitha partitë politike të pranonin rezultatet përfundimtare dhe të zënë vendet e tyre në parlament. Këjo fatkeqsisht nuk ka ndodhur në të kaluarën”.
Z. Engel u shpreh se “Amerika nuk ka miqë më të mirë se shqiptarët, pa marrë parasyshë se ku jetojnë ata në Ballkan. Ata kanë qëndruar pranë Shteteve të Bashkuara dhe ne gjithmonë kemi qendruar pranë tyre.” Në këtë frymë, Eliot Engel, si mik i vjetër i shqiptarëve, me pasion u bëri thirrje politikanëve të pozitës dhe opozitës në Shqipëri që, ”të ushtrojnë kurajo politike dhe të bëjnë atë që është e drejtë për të ardhmen e vendit të tyre dhe të popullit të vet, që ata aspirojnë ta udhëheqin drejtë Bashkimit Evropian. Politikanëve, zyrtarëve qeveritarë dhe Komisionit Qendror të Zgjedhjeve, anëtarëve të të gjitha niveleve në Shqipëri, u kërkohet që qershorin që vjen të bëjnë, as më shumë as më pak, se ç’pritet prej zgjedhjeve të vendeve të tjera, anëtare të komunitetit euro-atlantik.”
Kongresmeni Engel e pyeti diplomatin Riker nëse udhëheqsit politikë shqiptarë do të pranojnë rezultatin e zgjedhjeve, cila do palë të fitojë? Përfaqsuesi i Departamentit të Shtetit u përgjigj duke thënë se shpreson që zgjedhjet do të mbahen bazuar në ligjin dhe ashtu siç i ka hije një vendi anëtar i NATO-s. Politikanët shqiptarë, tha ai duhet të “tregojnë para popullit të vet, si edhe para aleatëve dhe para botës, se në të vërtetë, ata mund të bëjnë ato që pritet prej tyre dhe se janë të zotët të zbatojnë angazhimet e marra. Është detyra e udhëheqsve politikë që jo vetëm të sigurojnë ecurinë e rregulltë por edhe të pranojnë dhe të respektopjnë rezultatin.”
Zyrtari i lartë Riker përfundoi duke thënë se për Shtetet e Bashkuara, rëndësi ka procesi dhe jo se kush humb ose kush fiton, duke shtuar se, “Është e rëndësishme që të thuhet në këtë ambient të Kongresit se nuk duhet të ketë asnjë dyshim se Shtetet e Bashkuara, por edhe populli shqiptar, do të jenë shumë të zhgënjyer, nëqoftse ndodhin manipulime në zgjedhjet ose ushtrim presionesh mbi insitutcionet siç është Komisioni Qendror i Zgjedhjeve. Nëqoftse ndodhë një gjë e tillë, ne nuk do qëndrojmë në heshtje”, paralajmëroi në dëshminë e tij në Kongres, diplomati amerikan Filip Riker.