-Binjakëzim në mes të Komunës së Vushtrrisë të Kosovës dhe qytetit Norwalk të Iowas, të Shteteve të Bashkuara të Amerikës. Miqësia me shtetin e Iowas, dëshmi e miqësisë së përjetshme me SHBA-të/
-Tom Philips, kryetar i qytetit Norwalk nga Iowa, u shpall qytetar nderi i Vushtrrisë/
VUSHTRRI, 10 Maj 2018-Gazeta DIELLI/ Të gjithë ne që jemi këtu sot, jemi të lumtur dhe të ngazëllyer për miqësinë që kemi me shtetin e Iowas dhe ShBA-të, e cila është ndërtuar në etapa të rëndësishme historike. Kështu tha kryeministri i Republikës së Kosovës, Ramush Haradinaj, në ceremoninë e nënshkrimit të marrëveshjes së binjakëzimit në mes të Komunës së Vushtrrisë dhe qytetit Norwalk të Iowas, të Shteteve të Bashkuara të Amerikës.
Kryeministri Haradinaj shprehu falënderim për gjithë ata që u angazhuan për të krijuar partneritetin me shtetin e Iowas dhe binjakëzimin e qytetit të Norwalk me atë të Vushtrrisë, duke i dhënë atribut angazhimit të veçantë kryetarit të Vushtrrisë, Xhafer Tahirit, por edhe prezencës së kryetarit të Norwalk, në Kosovë dhe angazhimit të tij në këtë projekt.
”Të gjithë ne që jemi këtu sot, jemi të lumtur dhe të ngazëllyer për miqësinë që kemi me shtetin e Iowas dhe ShBA-të, e cila është ndërtuar në etapa të rëndësishme historike. Të gjithë jemi të lumtur dhe të gatshëm të kontribuojmë në të, por sonte heronjtë e kësaj miqësie janë dy kryetarët, Xhafer Tahiri dhe Tom Philips. Si Kryeministër i këtij vendi, më vije mirë që jam dëshmitar i kësaj miqësie, për të cilën lutem që të zgjasë gjithmonë”, tha kryeministri Haradinaj.
Kryetari i Komunës së Vushtrrisë, Xhafer Tahiri, tha se sot lidhet një marrëveshje miqësie, me një qytet dhe një shtet, që popullit të Kosovës ju gjend në momentet më të vështira. “Sot është një ditë të veçantë për qytetin e Vushtrrisë, për qytetarët e Vushtrrisë, për fermerët dhe për nxënësit e Vushtrrisë”, tha kryetari Tahiri.
Kryetari i qytetit Norwalk, Tom Philips, u shpreh i lumtur për pritjen dhe për zyrtarizimin e binjakëzimit në mes të dy qyteteve Norwalk dhe Vushtrrisë, dhe shtoi se zyrtarët e Norwalk dhe të Departamentit të Zhvillimit Ekonomik, kanë punuar me shumë zell dy vitet e fundit që ta realizojnë këtë partneritet.
Komandanti i Gardës Kombëtare të Iowas, Gjeneralmajor, Timothy Orr, tha se është nder të qëndrojë pranë jush, në shtëpinë tonë. “Sonte ne fillojmë një ëndërr të re, kemi njerëz, kemi resurse dhe kemi një zemër të madhe”, tha Gjenerali Orr, duke shprehur besimin edhe për bashkëpunime tjera në të ardhmen.
Tom Philips, kryetar i qytetit Norwalk nga Iowa, u shpall qytetar nderi i Vushtrrisë.Qyteti i Vushtrria është mes kryeqytetit të Kosovës, Prishtinës, dhe qytetit më të madh verior, Mitrovicës.
Vushtrria është një ndër qytetet më të vjetra të Kosovës, ku më parë në Dardani ekzistonte qyteti i vjetër nga periudha romake Vicianum. Dihet se një rrugë e rëndësishme e antikitetit aso kohe kalonte afër Vicianumit – Vushtrrisë. Rruga gjendej afër fshatit Stanofc i Poshtëm, ku është lidhur me rrugën e njohur Lisus (Lezha)-Naissus(Nishi), e cila kalonte përmes qytetit Ulpiana (Prishtina) dhe ka shkuar në Shkup dhe Selanik./b.j/
PRISHTINË, 12 Maj 2017-Gazeta DIELLI/ Komandanti i Forcës së Sigurisë së Kosovës (FSK), gjenerallejtënant Rrahman Rama priti në takim në Ministrinë për FSK, anëtarin e Kongresit të SHBA-ve, republikanin nga Ajova, zotëri Steve King. Në takimin e përbashkët të gjeneral Ramës dhe kongresistit King u bisedua për marrëdhëniet e mira ndërmjet SHBA-së dhe Kosovës, bashkëpunimin e mirë ndërshtetëror në mes të Kosovës dhe Ajovës dhe në veçanti për bashkëpunimin dhe koordinimin e aktiviteteve ndërmjet FSK-së dhe Gardës Kombëtare të Ajovës dhe Ushtrisë amerikane në përgjithësi. Komandanti i FSK-së, gjeneral Rama, e njoftoi kongresistin King për zhvillimin dhe avancimin e Forcës së Sigurisë së Kosovës si dhe për progresin e saj në aspektin e nderveprueshmerisë me të gjithë partnerët, sipas standardeve të NATO-s.Gjithashtu, gjeneral Rama e njoftoi anëtarin e Kongresit Steve King edhe mbi planet strategjike për zhvillimin e Forcës së Kosovës, konkretisht mbi synimin e shtetit të Kosovës që FSK-ja të transformohet në Forcë të Armatosur, me mision dhe detyra të mbrojtjes së vendit.