PRISHTINË, 17 shkurt /ATSH-AFP/ – Kosova feston gjashtëvjetorin e Pavarësisë të shënjuar nga një përmirësim historik të marrëdhënieve me Serbinë, që u bë e mundur falë një marrëveshjeje të arritur në prill nën drejtimin e Bashkimit Evropian.
“Vizioni ynë për Kosovën e pavarur është ai i një vendi demokratik, gati të zerë vendin e saj në familjen e vendeve te lira”, deklaroi kryeministri kosovar, Hashim Thaçi gjatë një seance përkujtimore të parlamentit kosovar.
Nën presionin e Brukselit, Prishtina dhe Beogradi kanë zbutur tensionet dhe po kryejnë bisedime nën mbikëqyrjen e BE-së, që synon të përmirësojë jetën e përditshme të të gjithë qytetarëve të Kosovës.
Serbia, që më 21 janar filloi negociatat për aderim në BE, kryesisht falë normalizimit të marrëdhënieve me Prishtinën, vazhdon ende të refuzojë me vendosmëri pavarësinë e shpallur në vitin 2008 nga mazhoranca shqiptare e ish-provincës së saj jugore.
Kosova, nga ana e saj, po negocion me Brukselin arritjen e një marrëveshjeje asocim-stabilizimi.
Sot, parakalimi i focave të rendit dhe të sigurisë së Kosovës ka tërhequr disa mijëra persona në rrugët e Prishtinës, e mbushur plot me flamuj kombëtarë.
Megjithatë, veteranët e konfliktit të Kosovës (1998-99), që kanë dalë nga gueriljet që luftuan kundër forcave serbe, deklaruan se nuk do të marrin pjesë në këto festime.
“Nuk do të marrim pjesë në këto festime, në shenjë pakënaqësie”, deklaruan ish-luftëtarët në një komunikim për shtyp.
Sipas shifrave zyrtare, më shumë se 30 për qind e 1,8 milionë kosovarëve janë të papunë. Banka Botërore, nga ana e saj, jep një nivel edhe më të lartë, të përafërt me 40 për qind.
“Jam i lumtur që po festojmë gjashtëvjetorin e pavarësisë, por fakti që nuk shohim asnjë mundësi punësimi e ul shumë gëzimin tim”, deklaron Beqir Krasniqi, 27 vjeç, i diplomuar në drejtësi dhe i papunë.
Kosova që prej shpalljes së pavarësisë, është njohur nga mbi 100 vende dhe nga shumica e anëtarëve të BE-së si edhe nga SHBA-ja.