Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Archives for January 2015

Jeffersoni dhe Biblioteka e Kongresit

by

Biblioteka e Kongresit amerikan në Washington, më e madhja në botë, shërben si një mjet kërkimesh për Kongresin dhe është gjithashtu e hapur për publikun. Në vitin 1801, kur u themelua, selia e saj ishte në ndërtesën e Kapitolit. Gjatë Luftës së vitit 1812 ndërmjet Britanisë dhe Shteteve të Bashkuara, britanikët e dogjën Kapitolin, duke shkatërruar një pjesë të mirë prej tremijë librave që ndodheshin aty. Ish-presidenti amerikan Thomas Jefferson ofroi bibliotekën e tij të madhe personale për të zëvëndësuar librat e djegur. Dhe, pikërisht dyqind vjet më parë, më 30 janar 1815, Kongresi e bleu koleksionin e tij. Sot, librat e Jeffersonit ndodhen në ekspozim të përhershëm në Bibliotekën e Kongresit dhe mund t’i shohë kushdo.
Pasioni i Thomas Jefferson-it për librat duket qartë në këtë koleksion të ardhur nga shtëpia e tij në Monticello të Virxhinias.
“Atij i pëlqenin librat që flisnin për shpikjet, për ligjet dhe për dashurinë e tij të madhe, arkitekturën. Kongresi bleu në fakt koleksionin më të madh privat të asaj kohe, 6.487 vëllime,” shprehet Mark Dimunation, shef i seksionit të Librave të Rralla dhe të Koleksioneve të Veçanta në Bibliotekën e Kongresit, i cili thotë se biblioteka fillestare nuk i afrohej fare koleksionit të Jeffersonit.
“Ishte një bibliotekë pune që do t’u duhej anëtarëve të Kongresit – libra për ligjin, tregtinë, fjalorë, libra historikë.”
Ai thotë se interesat e gjera të presidentit e ndryshuar përmbajtjen e Bibliotekës së Kongresit.
“Kjo ndryshoi krejtësisht nocionin se çfarë duhej përfshirë në koleksionin e bibliotekës.”
Marcelo Alvez, është inxhinier dhe profesor nga Brazili, që ndodhet për vizitë në Uashington.
“Është shumë e çuditshme kur sheh që një udhëheqës, një president interesohet për filozofinë, matematikën, fizikën dhe bujqësinë. Ishte një njeri me njohuri të mëdha, që nuk e gjejmë sot”.
Jeffersoni ishte autori i Deklaratës amerikane të Pavarësisë nga sundimi britanik dhe kishte lexuar disa nga librat më me ndikim në politikë të kohës së tij. Ato përfshinin “Federalistin,” një koleksion artikujsh dhe esesh, ku flitej për ratifikimin e Kushtetutës amerikane. Jeffersoni kishte bërë mjaft shënime në librin e tij.
“Ky është një udhëzues për të kuptuar, jo vetëm Kushtetutën amerikane, por edhe udhërrëfyes për krijimin e kushtetutave në mbarë botën.”
Jeffersoni kishte edhe një kopje në anglisht të Kuranit, të cilën e kishte blerë kur ishte student i drejtësisë.
“Ne mendojmë se Jeffersoni e bleu atë, pasi njerëzit e shihnin Kuranin si librin arabisht të ligjeve dhe kjo do ta ndihmonte atë të kuptonte të drejtën ndërkombëtare në vendet myslimane.”
Në vitin 1851, një zjarr që ra në Kapitol dogji shumë libra të bibliotekës dhe më shumë se gjysmën e koleksionit të Jeffersonit. Pas kësaj, u ngrit kjo ndërtesë e bukur posaçërisht për Bibliotekën e Kongresit.
Sot, librat e Jeffersonit kanë nga një shirit, të gjelbër për librat origjinalë dhe ngjyrë ari për ato që u zëvendësuan me të tjerë nga jashtë Bibliotekës. Librat pa shirita janë kopje identike që ndodheshin qysh atëherë në Bibliotekën e Kongresit. Zoti Dimunation thotë se kutitë e bardha janë për librat që ai është ende duke i kërkuar.
“Pra, nga 4000 apo më shumë librat që duheshin për të zëvendësuar ato që humbën nga koleksioni i Jeffersoni, kanë ngelur më pak se 250 libra që duhen kërkuar.”
Pasi Thomas Jeffersoni i dhuroi librat e tij, ai nuk i pa më kurrë ato. Sot, studiuesit mund t’i shfletojnë ato në sallat e Bibliotekës, pikërisht në frymën e Jeffersonit, Presidentit të tretë të Amerikës, i cili dëshironte që librat e tij të përdoreshin nga të gjithë.(Zeri I Amerikes)

RRUGËTIMI DHE JEHONA E HISTORI SUKSESI SHQIPTARO AMERIKAN NË KOSOVË

by

Pas Mbrëmjes Gala të Historive të Suksesit Shqiptaro Amerikane në New York në Maj të 2014, projekti mbërriti në Prishtinë nga datat 21 deri në 23 Nëntor 2014 me nismën e Ambasadores Amerikane Tracy Ann Jacobson dhe Ambasadorit të Shqipërisë Qemal Minxhozi si dhe Kryetarit të Komunës së Prishtinës, Shpend Ahmeti.
Kryetari Ahmeti kishte qenë pjesë e Mbrëmjes Gala në New York dhe i përfshirë nga energjia pozitive dhe mbresat nga ky eveniment kërkoi bashkëpunimin e projektit për të organizuar një sërë aktivitetesh në Prishtinë së bashku me Ambasadorin e Shqipërisë ata planifikuan një axhendë interesante për pjesëtarët e grupit të Historive të Suksesit të
Shqiptaro Amerikaneve që do të udhëtonin në Prishtinë.
Bordi i projektit bëri të mundur që në një periudhë mjaft të shkurtër të organizojë një grup interesant prej 30 pjesëtarësh nga të gjitha trevat ku jetojnë shqiptarët për të shkuar në Kosovë. Ata jo vetëm gjetën kohë për të udhëtuar dhe për të çuar eksperiencat e tyre të suksesit në Kosovë, por edhe mbuluan shpenizmet e udhëtimit dhe të qëndrimit të tyre,”.
Aktivitetet filluan me 21 Nëntor me një forum të hapur me Sipërmarrës shqiptaro amerikanë organizuar nga Qendra e Inovacioneve të Kosovës dhe kompanisë Solaborate, i cili u moderua nga Uranik Begu, Drejtor i Qendrës së Inovacioneve në Kosovë. Në panel ishin Donald Leka, Themelues dhe Drejtues i kompanive të teknologjisë Glide dhe Jumptuit, Labinot Bytyqi, Themelues dhe Drejtues i kompanisë së rrjetit social të biznesit Solaborate, Giorgio Kolaj, Bashkëthemelues dhe Drejtues i zinxhirit të kompanisë Famiglia-DeBartolo dhe Gazmend Gjonbalaj, Drejtor në Drejtorinë e Aplikimit të produkteve në korporatën Bloomberg. Paneli konsistoi ne pyetje dhe përgjigje nga panelistët për çështje nga më të ndryshmet si nga si të fillohet një kompani, kapitali fillestar, investimet në fusha të ndryshme, shkëmbimeve të eksperiencave, diskutime kokë më kokë dhe intervista ne media të ndryshme. Me të drejtë Etrita Ibroci, një nga pjesëtaret e projektit u shpreh se ishte e mahnituar nga të gjithë ata sipërmarrës të rinj të talentuar në fushën e teknologjisë dhe e quajti Kosovën një “Sillicon Valley” shqiptare.
Grupi shqiptaro amerikan u prit nga Kryetari Shpend Ahmeti në Komunën e Prishtinës, ku ata u falenderuan në emër të shtetit të Kosovës për gjithçka që diaspora shqiptare ka bërë dhe shprehu shpresën që diaspora do të vazhdojë të jetë pjesë integrale e zhvillimeve në Kosovë. Ai gjithashtu i njohu pjesëmarrësit me arritjet dhe sfidat në
Komunën e Prishtinës, më e madhja në Kosovë.
Ambasadorja Amerikane Tracy Ann Jacobson dhe Ambasadori i Shqipërisë, Qemal Minxhozi u takuan me grupin dhe të dy ambasadorët shprehën kënaqësi që është prezent në Prishtinë dhe dëshirën që këto histori susksesi të arrijnë të jenë frymëzuese për të rinjtë në Kosovë. Ambasadorja Jacobson e njohu grupin me shërbimet e Ambasdadës në Kosovë dhe shërbimet dhe asistencën që ofron shteti amerikan në projekte të ndryshme në Kosovë.
Ambasadorja Amerikane Tracy Ann Jacobson dhe Ambasadori i Shqipërisë, Qemal Minxhozi u takuan me grupin dhe të dy ambasadorët shprehën kënaqësi që është prezent në Prishtinë dhe dëshirën që këto histori susksesi të arrijnë të jenë frymëzuese për të rinjtë në Kosovë. Ambasadorja Jacobson e njohu grupin me shërbimet e Ambasdadës në Kosovë dhe shërbimet dhe asistencën që ofron shteti amerikan në projekte të ndryshme në Kosovë.
Forumi i hapur me studentë të Universitetin Amerikan të Kosovës me panelistë nga projekti ishte një aktivitet tjetër intresant .Ai u përshëndet dhe moderua nga Presidenti i Universitetit Amerikan Winfred Thompson. Ne forum nepermjet prezantimeve dhe pyetje pergjigjeve u trajtuan çeshtje nga me te ndryshme nga funksionimi i organizatave
jo qeveritare dhe rendesia e mbeshtetejes së tyre, zhvillimi i sipërmarrjes dhe bizneseve, mardhënia e bizneseve me orgnaizatat shtetërore, kariere apo biznes dhe shumë të tjera. Pjesë e këtij paneli ishin Dr. Shpresa Xhakli, Drejtuese e Fondacionit te Fëmijëve
me Autizëm, B. Bix Aliu, Zv/Ambasadori Amerikan në Mal të Zi, Profesor Peter Christopher nga Instituti Politeknik i Worcester, Giorgio Kolaj, Drejtuesi i Kompanisë Famiglia-DeBartolo, Etrita Ibroci, Zv/Presidente e Grupit Pan European dhe Gazmend Gjonbalaj, Drejtor në Drejtorinë e Aplikimit të Produkteve në Korporatën Bloomberg.
Mbrëmja Gala e Historive të Suksesit Shqiptaro Amerikan u organizua në hotelin Swiss Diamond në Prishtinë. Mysafirët u pritën në tapetin e kuq në Sheshin Nënë Tereza nga Ambasadorja Amerikane dhe Ambasadori i Shqiperisë me bashkëshortet e tyre. Në radhën e të ftuarve ishin politikanë, ambasadorë të huaj, gazetarë, pjesëtarë të
shoqërisë civile, biznesmenë e sipërmarrës, studentë etj. Në fjalën e tyre të dy ambasadorët përmendën rëndësinë e këtij projekti për tu identifikuar me vlerat me të mira, për të treguar se si shqiptarët janë integruar dhe janë kontribues në të gjitha fushat e jetës amerikane dhe mundësinë e ndërlidhjes dhe shkëmbimit të eksperiencave në Kosovë, Shqipëri apo gjetkë.
Ambasadorja Amerikane Jacobson shtroi një drekë për grupin në verarine StonCastle, një investim shqiptaro amerikan ku foli për rëndësinë e investimeve shqiptaro amerikane në Kosovë.
Suksesi është i prekshëm dhe i transmetueshëm dhe nuk ka rëndësi cilës fushë i përket apo nga cili rajon vjen.Të gjithë u ndienë dhe ndanë eksperienca interesante si ata nga Prishtina si Mars Podvorica, Jehona Marku, Ismer Mjeku, Shpresa Xhakli, Gazmend Gjonbalaj e Lumi Hadri, po edhe familja Sela nga Dibra, Venera Bekteshi nga Mitrovica
Etrita Ibroci nga Ulqini, Ina Jasini nga Tirana, Profesori Peter Christopher, shqiptaro amerikan I gjeneratës së tretë në Prishtinë për herë të parë, Angjelina e Gëzim Nika nga Tropoja, diplomati Bix Aliu që udhëtoi nga Podgorica e madje dhe amerikania Jeanine
Fagan që kishte ndihmuar Labinot Bytyqin dhe familjen e tij si refugjatë nga lufta e Kosovës, e cila udhëtoi enkas nga Kalifornia.
Fadil Berisha, një nga partnerët në realizimin e këtij projekti tha se projekte të tilla prekin rininë dhe ata kanë nevojë të frymëzohen dhe të ndihen krenar për arritjet në çdo fushë. Suksesi sjell sukses u shpreh ai.
Një nga qëllimet e këtij projekti tha Vera Mjeku,Drejtore Ekzekutive e projektit, është krijimi i lidhjeve dhe rrjeteve të reja si dhe shkëmbimi i përvojave e bashkëpunimi midis pjesëtarëve të projektit dhe më gjërë. Iniciativa të tilla arrijnë të realizojnë shumë sepse
janë siç quhen në Amerikë “grass roots movements”, ato krijojnë lëvizje të brendshme dhe rrjete bashkëpunimi në çdo fushë. Shprehja e famshme e Presidentit Kennedy, nuk ka rëndësi se çfarë bën vendi yt për ty, por çfarë bën ju për vendin tuaj është një aksiomë që tregon se bashkëpunimi në çdo nivel është i rëndësishëm dhe ka frytet e veta.
Histori të Suksesit Shqiptaro amerikan po punon për promovimin e projektit në Mal të Zi, Shqipëri dhe Maqedoni si dhe mbrëmjen gala të radhës në New York.(U Botua ne Dielli, Janar 2015)

Floreta Faber dekretohet ambasadore e Shqipërisë në SHBA

by

TIRANË, 30 Janar /Presidenti i Republikës, Bujar Nishani, ka dekretuar emërimin e znj. Floreta Faber, ambasadore në Shtetet e Bashkuara të Amerikës, rezidente dhe në Shtetet e Bashkuara të Meksikës, Republikën e Panamasë dhe në Republikën Domenikane, jorezidente.
Më poshtë dekreti i Presidentit të Republikës:
D E K R E T
PËR EMËRIM AMBASADORI NË DETYRË
Në mbështetje të nenit 92, shkronja “dh” dhe nenit 93 të Kushtetutës, me propozim të Kryeministrit,
D e k r e t o j:
Neni 1
Znj. Floreta Faber emërohet në detyrën e ambasadorit të Jashtëzakonshëm dhe Fuqiplotë të Republikës së Shqipërisë në Shtetet e Bashkuara të Amerikës, rezident, dhe të ambasadorit të Jashtëzakonshëm dhe Fuqiplotë të Republikës së Shqipërisë në Shtetet e Bashkuara të Meksikës, Republikën e Panamasë dhe në Republikën Domenikane, jorezident.
Neni 2
Ky dekret hyn në fuqi menjëherë.
Nr. Dekretit 8916
Tiranë, më 29.01.2015
PRESIDENTI I REPUBLIKËS
BUJAR NISHANI

Shefi i Shtabit të Përgjithshëm të Serbisë akuzohet për krime lufte në Kosovë

by

BEOGRAD, 30 janar /– Një organizatë joqeveritare serbe ka akuzuar shefin e Shtabit të Përgjithshëm të ushtrisë serbe, gjeneralin Ljubisha Dikoviç, për krime lufte në Kosovë gjatë konfliktit të armatosur të fundviteve ’90 të shekullit të kaluar, akuza të ngritura edhe më parë dhe të refuzuara nga Ministria serbe e Mbrojtjes.
Sandra Orloviç, shefe e Qendrës Ligjore Humanitare (FHP) u tha gazetarëve se posedon dokumente që provojnë përgjegjësinë e Dikoviçit në vrasjen e kosovarëve në vitin 1999.
Në atë kohë, gjenerali ishte në krye të Brigadës së 37-të të Motorizuar të ushtrisë jugosllave, e konsideruar përgjegjëse për vrasjen e kosovarëve, eshtrat e të cilëve u zhvarrosën nga një varr i përbashkët në Rudnicë, vitin e kaluar.
Ministri serb i Mbrojtjes, Bratislav Gashiç, në një sqarim publik foli për një sulm të llogaritur kundër Dikoviçit duke thënë se bëhej fjalë për të njëjtat akuza të ngritura në vitin 2011, kur Dikoviç mori postin e shefit të ushtrisë.
Dikoviç nuk është shprehur ende për këto akuza, ndërkohë që në mbrojtje të tij kanë dalë kryeministri serb, Aleksandar Vuçiç dhe ministri i Jashtëm, Ivica Daçiç.
Vuçiç e ka konsideruar këtë ngjarje si ”fushatë kundër forcave të armatosura nga ana e disa politikanëve që duan të shkatërrojnë atë çka Serbia ka pozitive”.
”Por, nuk do t’ia arrijnë”, ka theksuar ai.

Pse një qeveri teknike për Kosovën

by

Nga Kim MEHMETI/
Ia lidhën duart kryetarit të Komunës së Prishtinës, por harruan se regjimi që mbështetës të vetëm ka policinë, se pushtetarët që prangosin të zgjedhurin e popullit, kurrë nuk do mund t’i shpëtojnë mallkimit të popullit. Si diktatorë të vegjël e të mjerë, dalin e paturpshëm thonë se mediat janë duke ua rrënuar shtetin, e nuk shohin se për çdo natë, Kosovën e braktisin me qindra të rinj. Dhe me të drejtë e dënojnë dhunën dhe thonë se vota, e jo protesta në rrugë, të sjellin në pushtet, por harrojnë se deri dje këtë e thoshin edhe robëruesit e Kosovës, harrojnë se drejtuesit e shtetit nuk përfaqësojnë vetëm votuesit e tyre, por e kanë në duar fatin e tërë popullit. Dhe si të tillë-njësoj si çdo zaptues, i cili fatin e shtetit e të popullin e barazon me fatin e vet politik-ata e konsiderojnë armik çdonjërin që i kundërshton, si të tillë ata shohin vetëm gurët e protestuesve, por jo edhe pamjet trishtuese kur të riut të shtrirë, i vërsulen policët!
Dhe drejtues të tillë janë të rrezikshëm për popullin dhe shtetin, drejtuesit e tillë janë trishtues për tërë shqiptarinë, ngaqë ata janë të gatshëm t’ia thyejnë popullit edhe boshtin e patriotizmit! Andaj duhet thënë: Regjimi i sotëm që drejton Kosovën, me shumëçka është fytyra e së djeshmes, që vret dhe varros të sotmen dhe të ardhmen e rinisë kosovare! Nëse do ishte ndryshe, nëse drejtuesit e sotëm të Kosovës me të vërtet do kishin për qëllim të mirën e vendit dhe të popullit, atyre do u mjaftonte edhe një pik gjaku polici apo protestuesi, që të dilnin e të thoshin: Ne jemi pushtetarë, por jo pushtues të popullit e të vendit tonë, andaj ejani që gjithë së bashku ta ndajmë të mirën e të keqen e këtij vendi! Pra ata do propozonin të mundshmen që sot mund ta qetësojë Kosovën: një Qeveri teknike, që do e nxirrte vendin nga ky tunel ku është futur! Por, këtë nuk mund ta presësh nga ata me mendësi nga djeshmja e pushtuesit, nga ata që marrjen e votës, e barazojnë me marrjen e ‘tapisë’ që të shpallë pronarë të Kosovës!”