Archives for January 2016

NJOFTIM I VATRES PER FESTIMIN E PAVARESISE SE KOSOVES

January 22, 2016 by dgreca

VATRA DHE BASHKËSIA SHQIPTARE KREMTOJNË PAVARËSINË E KOSOVËS/
Njoftohet Komuniteti Shqiptar në Nju Jork dhe rrethina se me 14 Shkurt 2016, Ditën e Dielë,duke filluar
nga mesdita, ora 12-5. pm, VATRA dhe BASHKËSIA SHQIPTARE organizojnë Festimin tradicional të Pavarësisë së Kosovës. Të pranishëm, mes komunitetit shqiptar, në këtë festim do të jenë Komunitetet
Fetare dhe Diplomatët Shqiptarë.
Festa organizohet në MAESTRO’S RESTORANT.
1703 Bronxdale Ave, Bronx, NY 10462
– Konsulli i Republikës së Kosovës z. Ylber KRYEZIU do të mbajë fjalën përshëndetse me rastin e 8 Vjetorit të Pavarësisë së Kosovës.
– Moderatore: Aida GASHI
Krahas argëtimit muzikor, kwngwve dhe valleve nwn drejtimin e DJ Bendis MANI, do të ketë ushqime dhe pije pa kufizim.

Të rriturit: $ 60.00
Fëmijët deri në 12 Vjeç- $20.00
Mund të rezervoni biletat në nurmat e telefonave të anëtarëve të Komisionit të festës.

KOMISIONI ORGANIZATOR

1- Kryetar: Pashko Camaj-516- 902-0588

2-Zv/kryetar: Saimir Dashi, cel :347-401-8519.

3-Anëtar: Marjan Cubi, cel:914-316-0045.

4-Anëtar: Hakik Mena, cel:201-993-0833

5-Anëtar: Isuf Rexhaj, cel:917-626-5782

6-Anëtar: Fuat Mamo, cel:201-893-6776

7-Anëtare: Arjana Elezi cel:917-445-4126

8-Anëtar: Fitim Krasniqi, cel:347-755-1486.

Krimet e luftës në Kosovë, dënohet një politikan serb nga veriu i Mitrovicës

January 22, 2016 by dgreca

-Shpallet aktgjykimi për rastin e Oliver Ivanoviçit/
Nga Behlul Jashari PRISHTINË, 22 Janar 2016/ Në Gjykatën Themelore të Mitrovicës, dje, një trup gjykues i përbërë nga gjyqtarë ndërkombëtarë e shpalli Oliver Ivanoviçin fajtor për kryerjen e veprës penale “Krime të luftës kundër popullatës civile.”
Gjykata vërtetoi se më 14 prill 1999, forcat serbe i larguan me forcë shumë familje shqiptare nga shtëpitë e tyre dhe i mblodhën jashtë në rrugë. Një grup i paramilitarëve/policëve e ndau dhe mori një grup të meshkujve nga ushtria derisa arritën tek pika e kontrollit të policisë/paramilitarëve. Oliver Ivanoviçi ishte pjesë e grupit të paramilitarëve/policisë të pranishëm në pikën e kontrollit. Ai mbante uniformë të kaltër dhe ishte i armatosur.
Pastaj, këta meshkuj u shoqëruan përmes kësaj pike të kontrollit. Katër meshkuj u vranë derisa ky operacion u ndal për shkak të ardhjes së një personi të uniformuar, i cili dha urdhër për t’u ndalur.
Oliver Ivanoviqi ishte në dijeni të operacionit për dëbimin dhe vrasjen e shqiptarëve. Atë ditë, ai me dashje u pajtua me këtë plan duke e ditur që si pasojë e kësaj do të ndodhnin vrasjet.
I akuzuari Oliver Ivanoviç, u dënua me 9 vjet burgim.
Në lidhje me ngjarjet e 3 shkurtit 2000, pika e dytë e aktakuzës, Gjykata i shpalli të pafajshëm të akuzuarit Oliver Ivanoviç, Dragolub Delibashiç, Nebojsha Vujaçiç, Ilija Vujaçiç dhe Aleksandar Lazoviç, prandaj i liroi ata nga të gjitha akuzat.
Të gjitha palët kanë të drejtë ankese.
Trupi gjykues vendosi që të vazhdohet masa e arrestit shtëpiak. Prokuroria mund të ankohet kundër këtij vendimi gjatë 24 orëve në vijim, njoftoi EULEX.
Në 28 janar 2014 EULEX njoftonte se, me kërkesë të një prokurori ndërkombëtar nga Prokuroria Speciale e Kosovës (PSRK), në mëngjes një gjykatës ndërkombëtar nga Gjykata Themelore e Mitrovicës ka urdhëruar një muaj paraburgim për Oliver Ivanoviçin, i cili dyshohet për krime lufte dhe vrasje të rëndë, bën të ditur EULEX në njoftimin e dërguar.
Me marrëveshje paraprake në mes të prokurorit ndërkombëtar të PSRK-së dhe përfaqësuesit ligjor të Oliver Ivanoviçit, një ditë më parë ai ishte paraqitur vullnetarisht në Stacionin Policor në Mitrovicën e Veriut. Pas intervistimit në cilësinë e të dyshuarit, me urdhër të prokurorit, Ivanoviç u arrestua dhe u dërgua para gjykatësit ndërkombëtar të Gjykatës Themelore të Mitrovicës, përfundointe njoftimi.
Oliver Ivanoviç është politikan i komunitetit serb në Kosovë, në zgjedhjet lokale të vitit të kaluar ishte kandidat për kryetar të komunës së Mitrovicës Veriore, ndërsa kishte funksione të ndryshme. Ka qenë deputet i Kuvendit të Kosovës para shpalljes së pavarësisë .

Shembet Shtëpia e zekajve në Lezhë, objekt i shpallur Monument Kulture

January 22, 2016 by dgreca

Nga Ahmet ZANI/
Shtëpia e zekajve në Lezhë, objekt i shpallur Monument Kulture është shembur plotësisht. Kjo banesë karakteristike në lagjen “Sheher” nuk i rezistoj dot motit të keq duke u shembur si pasojë e mos ndërhyrjes në të. Prej 2 ditësh ajo është kthyer në gërmadhë. Ky rrënim i të shkuarës së Shehrit, qytetit të vjetër të Lezhës, ishte paralajmeruar, por Ministria e Kulturës heshti. Ish përgjegjësi i kulturës Kombëtare në Lezhë Paulin Zefi thotë se kemi humbur një perlë arkitekturore, rrënimin e të cilës e kishte paralajmëruar. Sipas tij ministrja Kumbaro heshti ndaj nevojës për të investuar në këtë objekt 12 mijë euro, ndërsa tani do të duhen 150 mijë euro për ta ngritur në këmbë. Sipas Zefit nuk mund të pëdoret justifikim amortizimi ndër vite pasi ishte mundësia për ta mbrojtur.
“Ka qenë i vetëm ansambël ndërtimor dhe kompleks rezidencial në veriun e Shqipërisë i ndërtuar sipas stilit të shtëpive të Gjirokastrës. Eshtë ndërtuar në fund të shekullit të 17 dhe në fillim të shekullit të 18. Eshtë një banesë rreth 300-vjeçare. Edhe pse unë e kam dhënë alarmin për këtë shtëpi se do shembet Mistria e Kulturës nuk mori asnjë masë. Unë vetë peronalisht i ka bërë dy herë kërkesë ministres Kumbaro dhe ja kam shoqëruar edhe me foto që të ndërhyhet sa më parë, kjo e fundit nuk pati asnjë reagim. Kjo shtëpi tani është shembur dhe nëqoftëse në shtator të vitit që lamë pas ne mund të ndërhynim me një shumë prej 12 mijë eurosh, sot nevojiten të pakten 150 mijë euro. Dua të them se kemi humbur një perlë të jashtëzakoshme të historisë së qytetit të Lezhës. Ministria e Kulturës duhet të kishte ndërhyrë me kohë dhe nuk është justifikim që kjo problematikë është e mbartur prej vitesh ky është një version i konsumuar” u shpreh Paulin Zefi Ish përgjegjës i Kultures Kombëtare Lezhë.
Banesa qytetare e Sali Bajram Zeëes në lagjen e vjetër piktoreske Shehër ishte Monument-Kulture i kategorisë së parë, e marrë në mbrojtje që ne vitin 1963 dhe është pronë shtetërore nën administrimin e plotë të Ministrisë së Kulturës.

Kosovë-Gjermani, marrëveshje për Efiçiencë në Energji

January 22, 2016 by dgreca

-Nga kjo marrëveshje me KfW (Banka Gjermane për Zhvillim) do të përfitojnë qytetarët e komunave e Gjilanit, Gjakovës, Prishtinës dhe Ferizajt/
PRISHTINË, 22 Janar 2016/ Qeveria e Republikës së Kosovës dhe KfW (Banka Gjermane për Zhvillim) nënshkruan sot Marrëveshjen për masat e Efiçiencës në Energji për nivelin Komunal.
Marrëveshja u nënshkrua nga ministri kosovar i Financave, Avdullah Hoti dhe Drejtori i KfW-së për Evropën Juglindore e Turqinë, Christoph Tiskens, ndërsa pjesëmarrës ishin edhe ministri i Zhvillimit Ekonomik Blerand Stavileci, si dhe kryetarët e komunave përfituese, kryetari i komunës së Prishtinës Shpend Ahmeti, kryetarja e komunës së Gjakovës Mimoza Kusari – Lila, kryetari i komunës së Gjilanit Lutfi Haziri, si dhe kryetari i komunës së Ferizajt Muharrem Sfarqa.
Ministri i Financave Avdullah Hoti, duke falënderuar qeverinë gjermane, BE-në dhe KfW për bashkëpunimin e shkëlqyer të ofruar gjatë të gjitha këtyre proceseve, bëri të ditur se nga kjo marrëveshje do të përfitojnë qytetarët e komunave e Gjilanit, Gjakovës, Prishtinës dhe Ferizajt.
“Kjo marrëveshje vije në sajë të bashkëpunimit të shkëlqyer që kemi me Gjermaninë dhe BE-në. Marrëveshja për këtë projekt kap vlerën prej 7.5 milionë euro, ku 5 milionë euro janë grant, 2.5 nga qeveria gjermane dhe 2.5 nga WBIF. Pjesa e kredisë përfshinë vlerën prej 2.5 milionë euro nga KfW-ja me një grejs periudhe 3 vjeçare dhe me afat amortizimi deri në vitin 2028, me këste që paguhen dy herë brenda vitit”, tha ministri Hoti.
Ai vijoi se, marrëveshja për këtë projekt edhe më tutje konfirmon përpjekjet e qeverisë së Republikës së Kosovës dhe partnerëve ndërkombëtarë për përmirësimin e jetës së qytetarëve të Republikë së Kosovës, pasi që nga ky projekt direkt do të përfitojnë institucionet më të rëndësishme të këtyre qyteteve, siç janë shkollat fillore dhe të mesme dhe shëndetësia primare.
“Kjo marrëveshje vije pas nënshkrimi të marrëveshjes me Bankën Botërore për të njëjtin qëllim për nivelin qendror, i cili njëherit paraqet edhe synimin e qeverisë së Republikës së Kosovës dhe miqve ndërkombëtarë drejt përmirësimit të sistemi të energjisë, si një sektor kyç për zhvillimin e vendit dhe inkuadrimin e mëtutjeshëm në strukturat ndërkombëtare”, theksoi ministri Hoti.
Ndërsa, drejtori i KfW-së për Evropën Juglindore e Turqinë,. Christoph Tiskens, tha se “qëllimi i këtij programi është përmirësimi i kushteve të jetesës për banorët e komunave të Prishtinës, Gjakovës, Gjilanit dhe Ferizajt dhe është i bazuar në studimin e fizibilitetit, i përfunduar në vitin 2012 dhe i financuar nga Korniza Investuese për Ballkanin Perëndimor, ku janë identifikuar 30 ndërtesa në komuna të ndryshme që kanë nevojë për rehabilitimin e masave të efiçiencës energjetike, në ndërrim të dritareve, izolim, sisteme të ngrohjes, të shkollave, kopshteve të fëmijëve, spitaleve dhe qendrave mjekësore. Kostoja e zbatimit është rreth 7.5 Milionë Euro”./b.j/

I kërkoj ballafaqim publik Dick Marty-t

January 22, 2016 by dgreca

Intervistën e Agjencisë së Lajmeve “Presheva Jonë” me senatorin zviceran Dick Marty dhe sidomos titulli bombastik që tregon se kush janë “peshqit e mëdhenj” të krimit në Kosovë dhe kush do të jenë “mysafirët e parë në Hagë” ndikuan që ky lajm të shpërndahet nga disa portale në gjuhën shqipe. Sikur intervista të ishte kufizuar në spekulimet e lartpërmendura nuk do të reagoja për të vetmen arsye se “Loja e kapuçave” me logjikën “Teste-Bosh” ka kohë që ka filluar. Madje, disa që pretendojnë se posedojnë informata nga ata që fshehin emrat “Nën kapuç” vazhdimisht spekulojnë me emra të përveçëm. Edhe pse janë të vetëdijshëm se këtu nuk bëhet fjalë për lojë kapuçash por, për një situatë të rrezikshme ku mund të “përzihen kapuçat shumë keq”.
Ajo që më shtyri të reagoj lidhur me intervistën e Dick Marty-t ka të bëjë me shpërndarjen e të pavërtetave. Nëse është i saktë pohimi se Dick Marty ka deklaruar se gjoja “as ai e as raporti i tij nuk janë kundër UÇK-së e as kundër pavarësisë” po them publikisht se kjo është gënjeshtra më e madhe e vitit. Nëse pohimet e lartpërmendura janë vërtetë të Dick Marty-t atëherë unë, Bardhyl Mahmuti, autori i librit «Mashtrimi i Madh» i bëj apel publik që të ballafaqohemi në një debat publik ku do t’ia sjell provat e pakontestueshme që dëshmojnë se:
– Dick Marty asnjë herë nuk e ka ngritur zërin kundër dhunës që shteti serb ushtronte kundër popullit shqiptar të Kosovës,
– Dick Marty ka qenë kundër intervenimit të NATO-s ndaj regjimit të Millosheviqit;
– Dick Marty ka qenë kundër pavarësisë së Kosovës;
– Dhe se Raporti që mban emrin e tij nuk është asgjë tjetër pos sintezë e të ashtuquajturit “Libër i Bardhë “ i përpiluar nga Shërbimi Sekret Serb.
Të gjitha provat e lartpërmendura janë analizuar në detaje në librin tim «Mashtrimi i Madh». Të gjithë ata që janë të interesuar ta dinë të vërtetën mund të konfrontojnë argumentet.
Me respekt për lexuesit
Bardhyl Mahmuti