Archives for April 2016

Kosovë-Serbi, takim urgjent në Vjenë ftuar nga BE

April 3, 2016 by dgreca

-Qëndrimi i Qeverisë së Kosovës është se derisa të mos arrihet marrëveshja me ndërmjetësimin e BE-së për njohjen reciproke të certifikatave të ADR-së, masat e reciprocitetit nuk do të hiqen/

PRISHTINË, 3 Prill 2016/ Me ftesë të Bashkimit Evropian, delegacioni i Republikës së Kosovës i udhëhequr nga ministrja për Dialog Edita Tahiri sot ka udhëtuar për në Vjenë për të marrë pjesë në takimin urgjent të ftuar nga BE në lidhje me njohjen reciproke mes dy shteteve, Kosovës e Serbisë, të certifikatave për transportin e mallrave të rrezikshme të njohura si ADR (the European Agreement concerning the International Carriage of Dangerous Goods by Road).

Në delegacionin e kryesuar nga ministrja Tahiri është edhe Hykmete Bajrami, ministre në Ministrinë e Tregtisë dhe Industrisë.

Njoftimi i sapodërguar thekson se, përpjekjet e BE-së për zgjidhjen e çështjes për njohjen reciproke të certifikatave ADR janë në përkrahje të zbatimit të Marrëveshjes së Brukselit për tregtinë e lirë mes dy shteteve të arritur në vitin 2011 dhe në pajtim me parimet e CEFTA-në. Për këtë çështje është biseduar në Bruksel gati më shumë se shtatë muaj me kërkesën dhe insistimin e ministres për Dialog Edita Tahiri, që nga koha kur Serbia bllokoi importet nga Kosova. Mirëpo, Serbia nuk tregoi gatishmëri që përmes dialogut të Brukselit të arrihet marrëveshja për njohjen reciproke të certifikateve të ADR-së, edhe pse më parë ishin arritur marrëveshje për njohjen reciproke të certifikatave fitosanitare dhe të produkteve famaceutike. Si kundër përgjigje për mosgatishmërinë e Serbisë dhe vënien e bllokadës për importin nga Kosova në kundërshtim me CEFTA-në, Qeveria e Kosovës mori vendim për masa reciprociteti për mosnjohjen e certifikatave dhe ndaloi importin e mallrave të rrezikshme nga Serbia, vendim ky të cilin e mori Ministria për Tregti dhe Industri.

Qëndrimi i Qeverisë së Kosovës është se derisa të mos arrihet marrëveshja me ndërmjetësimin e BE-së për njohjen reciproke të certifikatave të ADR-së, masat e reciprocitetit nuk do të hiqen.

Ministria për Dialog e ka njoftuar rregullisht BE-në për këto zhvillime duke argumentuar se sjellja e Serbisë është në kundërshtim me parimet evropiane për normalizimin e marrëdhënieve ndërshtetërore mes Kosovës dhe Serbisë, e cila rezultoi në thirrjen urgjente të këtij takimi.

Takimi i paraparë që të mbahet në Bruksel kësaj radhe do të mbahet në Vjenë, për shkak se Aeroporti i Brukselit ende nuk është hapur për qarkullim të lirë pas ngjarjeve tragjike të ditëve të fundit./b.j/ Foto:Arkiv

Kosovë-Shpërthim e të shtëna në veri

April 3, 2016 by dgreca

-Raportoi media serbe para vizitës së kryeministrit të Serbisë Vuçiç/

PRISHTINË, 3 Prill 2016-B.Jashari/ Është hedhur bombë dhe është shtënë me armë automatike, sot rrëth orës 03:00, në sallën e sportit në Zubin Potok, ku ishte planifikuar që kryeministri i Serbisë, Aleksandar Vuçiç, në vizitën e nisur në mëngjes në veri të Kosovës, t’u drejtohej qytetarëve pasdite në orën 15:00.

“Në sallë në kohën e sulmit ishin 10 punëtorë, të cilët montonin tribunën. Nuk ka pasur të lënduar”, raporton media serbe, sipas së cilës, në shpërthim është dëmtuar një veturë e parkuar në afërsi dhe janë plasaritur disa xhama në sallë, ndërsa në vendin e ngjarjes janë parë gëzhoja.

“Policia e Kosovës ka ngritur shkallën e sigurisë në Zubin Potok në nivelin më të lartë”, thekson media serbe në raportimet nga veriu.

Zëvendësdrejtori rajonal i Policisë së Kosovës për veri Besim Hoti ka konfirmuar për Radion Evropa e Lirë që rreth orë tre, pas mesnatës, është hedhur një granatë në oborrin e sallës së re sportive në Zubin Potok. Raportohet se nuk ka të lënduar në njerëz.

Ndërsa, sipas raportimeve të fundit kryeministri i Serbisë, Aleksandar Vuçiç, ka mbërriur sot në mëngjes në veri të Kosovës, ku ka nisur vizitën si ishte planifikuar në flotacionin e Trepçës në Leposaviç.

“Serbinë e fortë asgjë nuk mund ta frikësojë”, citoheta ai nga media serbe lidhur me shpërthimin dhe të shtënat në Zubin Potok.

“Nuk e japim Trepçën, vetën Serbia e fortë mund ta mbrojë popullin e vet”, citohet Vuçiç në titull të raportimeve të agjencisë serbe të lajmeve nga vizita në veri të Kosovës.

Duket se këto deklarata “të forta” të kryeminstrit serb Vuçiç në vizitën në veri të Kosovës janë pjesë e fushatës elektorale para zgjedhjeve në Serbi.

Aeroporti i Kukësit, gati për pasagjerët

April 3, 2016 by dgreca

Pista e aeroportit të Kukësit ka një gjatësi totale prej 1.950 metrash. Edhe pse punimet kanë përfunduar që në vitin 2005 dhe në vitin 2007 ai është çertifikuar për të kryer fluturime, një gjë e tillë nuk ka ndodhur deri më sot. Por marrëveshja e arritur keto ditë për heqjen e ekskluzivitetit të Aeroportit “Nënë Tereza”, tashmë ka sjellë në vëmendjen e të gjithëve këtë aeroport. I pozicionuar 137 km nga aeroporti i Rinasit dhe 120 km nga ai i Prishtinës, ky kompleks synon të shfrytëzojë më së miri pozicionin e tij gjeografik, për të tërhequr pasagjerë jo vetëm nga Shqipëria, por edhe nga Kosova. Aeroporti, që mban emrin “Zayed Bin Sultan” dhe shtrihet në një sipërfaqe prej 66 hektarë, është një donacion i Emiratave të Bashkuara Arabe dhe në projekt është parashikuar që të presë deri në 1 milion pasagjerë në vit. Të vetmit persona që qëndrojnë përreth aeroportit janë punonjësit e sigurisë. Madje edhe segmenti rrugor që lidh qytetin e Kukësit me këtë kompleks ka vetëm një lokal, edhe ai i mbyllur. Por lajmi për nisjen nga puna duket se do të ndryshojë panoramën. I njohur si qarku më i varfër në Shqipëri, Kukësi tashmë sheh një dritë në fund të tunelit. “Ka të mira, sidomos zhvillimin, se edhe Kosova është afër”, thotë një banor i zonës.
“Ky aeroport do të sjellë një sërë vendesh pune sa i përket rrjetit të hotelerisë, ndërsa ka rritur automatikisht vlerën e zonës dhe tokave”, thotë një tjetër. Pas më shumë se 10 vitesh, gjithçka duket se është gati. Pista që ende nuk ka shenja të gomave të avioneve, kulla e komandimit, terminali i pasagjerëve dhe të gjitha strukturat e tjera që i nevojiten një aeroporti. Por mungojnë vetëm pasagjerët. {Sh.K}

UDB-ja JUGOSLLAVE NE MES TE LIDHJES KOSOVARE NE SH.B.A

April 3, 2016 by dgreca

Nga Ilaz Kadriu/Chikago/

Me rastin e botimit te vepres ” Lidhja Kosovare ne Sh.B.A. dhe Jusuf Azemi ” Dokumente sekrete jugosllave, {1971 – 1990 }, botoi ” Vatra” Shkup, 2015, fq.345.

Permbledhjen, perkthimin, redaktimin dhe parathenien: Qerim Lita.

Se mergata shqiptare ne Shtetet e Bashkuara te Amerikes dhe me gjere, ka luajtur nje rrol te rendesishem ne procesin e nderkombetarizimit te ceshtjes shqiptare ne pergjithesi dhe te Kosoves ne vecanti, tregon edhe angazhimi shume serioz i UDB-se jugosllave , ne zbulimin e aktiviteteve kombetare te Lidhjes Kosovare dhe Ballit Kombetar, me theks te vecante, veprimtarise se Jusuf Azemit dhe bashkepunetoreve te tij ne tere teritorin e Amerikes, Kanadase dhe Evropes.

Sic pohon edhe autori ne parathenien e vepres, ” bartes i aktiviteteve dhe aksioneve te tilla kombetare ne Shtetet e Bashkuara te Amerikes , ishte organizata e Lidhjes Kosovare me qender ne Chicago, e cila , permes degeve te saj, shtrihej edhe ne New York, Detroit Boston, Toronto, si dhe ne shume qendra boterore, si Paris, Rome, Bruksel, Kopenhage, Munik, etj.

Udheheqesit e kesaj lidhjeje,organizuan dhe morren pjese neper shume aktivitete politike gjate nje kohe te gjate te veprimtarise se tyre kombetare dhe patriotike.

Lidhja Kosovareishte ishte edhe anetare e Bashkimit Federalist te Komuniteteve Evropiane , nepermes te ciles kjo organizate demonstronte fuqishem shkeljen e rende te te drejtave njerezore te popllit shqiptar nen regjimin e eger komunist te shtetit te Jugosllavise.Autori, ne baze te raporteve,shkresave, informatave, depeshave dhe njoftimeve te ndryshme zyrtare edhe te atyre ” Top Secret”, vjen ne konkludim se bartes kryesore dhe organizues te ketyre aktiviteteve kane qene Jusuf Azemi, Luan Gashi , Vasil, Andoni, Ajet Rushiti, Ismail Shabani, Osman Shabani,Azem Vuli, Bardhyl Shatku,Qazim Rrushaj, e shume e shume aktiviste te tjere, te cilet ne menyre direkte dhe indirekte permenden kronologjikisht neper raportet , informatat, njoftimet dhe depeshat zyrtare te ambasadoreve jugosllave, konzujve si dhe te agjenturave te ndryshme te lidhura me sherbimet sekrete dhe UDB-ne jugosllave dhe agjenteve te tyre te infiltruar ne kete organizate me shifra dhe kodime te caktuara nga qarqet zyrtare jugosllave.Ne baze te ketyre raporteve, shifet lehte se UDB-ja jugosllave nga cdo qytet shqiptar ne vendlindje ka caktuar me se paku dy shpiune, te cilet panderprerje kane dhene informata qofte ne menyre direkte ne ambasadat, respektivisht konzulatat jugosllave, ose me shkrim drejtuar sherbimeve te Sekretariatit te puneve te Brendshme te Kercoves, Gostivarit, Tetoves, Shkupit, Prishtines, Gjilanit , etj.

Mirepo, shkruar autori, perkunder perpjekjeve te medha te Qeverise Jugosllave qe te njollosi figurat eminente te Lidhjes Kosovare si dhe Ballit Kombetar, veprimtaria e tyre nuk pushoi asnjehere. Ishin te kota perpjekjet e agjenturave jugosllave dhe bashkepunetoreve te tyre qe te diskreditojne veprimtarine patriotike te ketyre organizatave dhe udheheqesve te tyre- shkruan autori.

Kjo permbledhje perfshin 160 dokumente sekrete jugosllave ne forma te raporteve, shkresave, depeshave, planeve operative, telegrameve te karakterit “teper sekret”, njoftimeve te ndryshme zyrtare te cilat njoftojne organet kompetente jugosllave per veprimtarine e gjate te ketyre dy organizatave, te cilat, me aktivitetin e tyre te dendur politik, mbajten gjalle shpirtin dhe frymen nacionaliste shqiptare ne Shtetet e Bashkuara te Amerikes, ne Kanade dhe ne Evrope.

Dokumentet sekrete jugosllave jane sistematizuar ne kete permbledhje nga koleksioni i materialeve arkivore te zbuluara gjate punes se autorit ne Arkivin Shteterot te Republikes se Maqedonise ne Shkup, si dhe nga koleksioni i dokumentave te Lidhjes Kosovare ne Chicago.

Ne vend te perfundimit:

Perbledhja ne fjale eshte produkt i kerkimeve dhe hulumtimeve arkivore te autorit, i cili ne baze te raporteve shume konfidenciale sjell informacione te verteta lidhur me shume persona te dyshimte , te infiltruar ne kete organizate me emra dhe shifra te nje kodimi te caktuar jugosllav. Me kete permbledhje, dhe ne baze te konstatimeve te autorit dhe raporteve, hiqet dilema e shume thashethemave lidhur me udheheqesit e Lidhjes Kosovare dhe te Ballit Kombetar.Perkthimi i dokumentave ne fjale eshte bere nga vet autori, i cili, me kete ka dhene nje kontribut te rendesishem ne zbardhjen e aktiviteteve kombetare te Lidhjes Kosovare dhe me gjere.

Sot më 3 prill

April 3, 2016 by dgreca

Nga Ilir Levonja/Florida/

Me që stuhia e statuteve për 2 prillin ka pushuar. Furia e fb me elozhet për heronjtë. Le të bëjmë një bilanc të demokracisë sonë.

Madje të flasim me çunat. Me ata katër bij nënash. Portretet, idealet që ata kishin janë edhe motoja jonë.
Si tha vëllai i njërit prej tyre. Çdo përvjetor më bëni të njëjtën pyetje. Do i mësoni emrat e vrasëseve apo jo? Zoti vonon, por nuk harron…., etj.
Por ja që Zoti harroka vëlla. Harroka dhe me kujdes të pastër.
Djema u bënë njëzetë e pesë vjetë. Po një orë nuk kemi qënë në pushtet. Një orë sikur të kishim në dorë çelsat e shtetit. Diktaturat qënkan kaq të koklavitura sa dosjet ikin në drejtim të paditur. Dhe se kush shtiu mbi ju është gati e pamundur të zbulohet.
Se, ata, qëllojnë atje…, që të godasin këtu. Ndaj lavdi dëshmorëve si ju. Këtë punë po, dime dhe e bëjmë. Po e bëjmë me zell ama. Po vimë e këlthasim për padrejtësinë e kohës. E të demokracisë sonë. Këlthasim edhe kur gjëndemi aeroporteve të Evropit.
Dhe që ta dini. Demokracia jonë është si vijon.
Në këto njëzet e pesë vite, ngelëm me pushkë krahut duke luftuar komunizmën. Po një komunist nuk kemi vrarë.
Në këto njëzet e pesë vite ngelëm duke share bijtë e komunistëve. Që janë si etërit e tyre. Megjithatë me ata i kemi bërë aleancat.
Demokracia jonë? U ngritëm gërmadhash. Përmbysëm ca pasanikë të ideollogjisë. Për të krijuar ca miliarderë realë.
E kemi bërë vendin si një nga ato komplekset e rritjes dhe mbarështimit të gjës’ së gjallë. Prodhues të krahut të punës për botën karshi.
Demokracia jonë? Shëmbëm një diktator. Dhe kemi sajuar nja pesëmbdhjetë të tillë. Që zhdukin njëri-tjetrin me kamera të fshehta. Rrahin gjoksin. Ngrejnë dy gishtat. Ai shtrëngonte grushtin.
Demokracia jonë? Kemi prodhuar kaq shumë kuadro në një administratë që nuk ekziston. Sa shkon në punë pa brekë dhe pas një jave ke tre shtëpi. Tre makina… tre dashnore, tre restorante të preferuar. Ke edhe elektorat.
Veçse me ambasadën e Amerikës e kanë pak pisk. Nuk u jep vizë.
Demokracia jonë. Kemi shoqata me shumicë… qytetarësh, po qytetar nuk jemi. Shoqata gjithfarësoj. Ndaj gjithëfarësojesh jemi.
Demokracia jonë? Po tha i pari është e kuqe, është e kuqe. Po tha i pari është e zezë, është e zezë. Po tha i pari je armik, je armik. Po tha i pari nuk je armik, nuk je armik.
Demokracia jonë? Tek lapidarët e dëshmorëve, ditën flasin korifejt e demagogjisë. Natën flenë të pastrehët, të palarët, drogaxhinjtë. Të ngopurit dhe të pangopurit. Madje edhe zagarët e rrugës.
Demokracia jonë? Çfarë t’ju them… se, më janë bërë lëmsh arritjet. Shteti i së drejtës, tregu i lire, Europa, ngritja e pages, mirëqënia, arsimimi, kualifikimi, infrastruktura, shitoret e shëtitoret, xhirot, pedonalet, bujqësia, vandalizmi, tritoli, aeroportizmi, kalamajt, këndi lojrave, historia, data e çlirimit, lira dhe demokracia etj.
Sikur të ishit gjallë, ta dini se prapë do ishit armiq të kësaj demokracie. Dhe se prapë do u kishim vrarë.
Kështu siç po u vrasim përditë.