Archives for June 2016

Kosovë-Demarkacioni diskutohet në një komision parlamentar

June 8, 2016 by dgreca

PRISHTINË, 8 Qershor 2016/ Në Kuvendin e Kosovës, Komisioni për Bujqësi, Pylltari, Mjedis e Planifikim Hapësinor, në mbledhjen e sotme të kryesuar nga Duda Balje, kryetare, diskutoi për demarkacionin e kufirit me Malin e Zi, si dhe çështje të tjera nga fushëveprimtaria e tij.

Anëtarët e komisionit kërkuan që të insistohet që materiali për demarkacionin të sillet në komision për shqyrtim, për faktin se, siç u tha nga anëtarë të tij, kanë kaluar 10 muaj që kur ky material është dërguar në Komisionin për Integrime Evropiane, ndërsa nuk ka arritur në Komisionin për Bujqësi, Pylltari, Mjedis e Planifikim Hapësinor, si komision përgjegjës për çështje të kësaj natyre.

Kryetarja e komisionit, Balje, tha se do të procedojë kërkesën që komisioni të ketë këtë material./b.j/

Festivali i tretë i shkollave shqipe në Amerikë një aktivitet madhështor dhe kombëtar

June 8, 2016 by dgreca

Nga Keze Kozeta Zylo/

Në ishullin e bukur Staten Island që lidhet me Brooklinin dy nga lagjet e njohura të Shtetit të Nju Jorkut nëpërmjet urës së famshme Verazano Bridge e cila është e vetmja urë në botë që mbahet në bazë të forcës së tërheqjes u zhvillua Festivali i tretë i Shkollave Shqipe në Amerikë, ide e hedhur 4 vite më parë nga ish Konsulli I Përgjithshëm i Kosovës në New York, z.Bekim Sejdiu.

Shkolla publike amerikane: Ps 48 dukej sikur kishte hapur krahët për të mirëpritur, nxënësit, mësuesit, prindërit dhe gjithë mysafirët që kishin ardhur për të marrë pjesë në këtë Festival të mahnitshëm. Edhe pse natyra derdhi gjithë paraditen e saj shiun me shtama dukej sikur ishte në harmoni perfekte me hapjen e diellit në orën 2 mbasdite orë kur filloi kënga dhe vallja shqiptare të interpretuar aq profesionalisht nga nxënësit e Shkollave Shqipe të cilat ishin pjesëmarrës në këtë festival.

Nxënësit vinin grupe grupe të shoqëruar nga prindërit dhe mësuesit e tyre, ndërsa në hyrje të derës i mirëpriste çifti Adelina dhe Imer Lacaj si dhe Elda Rama, ndërsa zotërinjtë si Safet Doçi, Agim Pira dhe Përparim Likollari merreshin me sigurimin dhe lëvizjet me radhë të nxënësve të Festivalit të Shkollave Shqipe si: Shkolla Shqipe ne Clifton, New Jersey, me drejtor z.Shaban Gjoka, Shkolla Shqipe të Qendrës Kulturore në Riverdale, New Jersey, me drejtor z.Zulfi Alla dhe n/drejtor z.Nebi Kaba, Shkolla Shqipe “Hasan Prishtina” në Waterberry, Connecticat, me drejtor z.Rakip Hetemi, Shkolla Shqipe ne Bronx, New York, me drejtor z. Mustaf Qosja, Shkolla Shqipe “Alba Life” që vepron në tri lagje të Nju Jorkut si në Staten Island, Brooklyn dhe Manhattan, me drejtor z.Qemal Zylo, kishin bërë një punë të shkëlqyer për te arritur rezultate të epërme, rezultate që cuan në vlerësime dhe mirënjohje nga të gjithë prindërit qëI sjellin me aq dashuri fëmijët e tyre.

Drejtor organizativ i Fesivalit ishte z.Qemal Zylo, drejtor artistik z.Petrika Melo dhe regjisore znj.Lindita Mezini Lole.

Festivali filloi ekzaktësisht në orën 2 mbasdite në atë orë që ishte vendosur fillimi i programit pasi vetëm me korrektësi dhe punë serioze edukohen nxënësit nëse ke vendosur të punosh në këtë mision nga më fisnikët.

Prezantuesit e programit zonjusha simpatike Drenica Qelia një gazetare me plot sharm, veshur plot shije, me përvojë në TV-t në Shqipëri dhe z.Marko Kepi President i organizatës “Rrënjët shqiptare” dhe aktivist i shquar i Diasporës në Amerikë prezantuan Festivalin e tretë të Shkollave Shqipe në Amerikë.

Të dy iu uruan mirëseardhjen të gjithë pjesëmarresve ne edicionin e tretë të festivalit të Shkollave Shqipe në Diasporë që këtë vit organizohet këtu në ishullin e bukur të Nju Jorkut, Staten Island, në këtë sallë moderne, ku Nju Jorku do të ushtojë SHQIP! Salla shpërtheu nga duartrokitjet kur në skenë u shfaqën 200 nxënës shqiptarë të lindur dhe rritur në Amerikë me ngjyrat e Flamurit kuq e zi. Ishte një pamje e hatashme, një pamje që do të magjepste dhe Van Gogun në se do të ishte gjallë dhe pjesëmarrës në këtë festival i cili me siguri që do kishte krijuar pikturën më të bukur në botë me Engjëj Shqiptarë në Diaspore.

Pamja mrekulluese rrëmbeu pjesëmarrësit me duartrokitje kur filluan të këndoheshin të dy hymnet shqiptare dhe amerikane interpretuar përsosmërisht nga artistja e vogël e Diasporës që premton shumë Kristina Melo, nxënëse e shkollës shqipe “Alba Life”, New York.

Skena rrezëllinte e tëra, ndërsa Flamuri Kombëtar i Shqiperise, Amerikës dhe flamuri i shtetit të Kosovës mbaheshin dhe valëviteshin me krenari nga duartë e flamurtarëve të cilët ecën përgjatë skenës për të nderuar kombet përkatëse.

Hapja zyrtarisht e Festivalit dhe përshëndetjet

Të dy prezantuesit Qelia dhe Kepi ftuan në skenë drejtorin organizativ të festivalit dhe mikpritësin e këtij aktiviteti z.Qemal Zylo themelues i Shkollës Shqipe “Alba Life” dhe i TV “Alba Life”, New York për të hapur zyrtarisht Festivalin e tretë të shkollave shqipe në Amerikë, hapje që u mirëprit me duartrokitje të përzemërta nga të gjithë pjesëmarrësit në sallë.

Z.Qemal Zylo në përshëndetjen e tij koncentrat tha:

Të dashur, prindër, mësues, dashamirës dhe të ftuar në Festivalin tone të tretë të Shkollave Shqipe në Amerikë! Kam kënaqësinë sot, t’ju përshëndes e mirëpres në emër të Këshillit Organizativ të Festivalit dhe t’ju uroj mirëseardhjen në këtë aktivitet shumë të rëndësishëm e të larmishëm të shkollave tona shqipe dhe shpresoj se do të kaloni një kohë të këndshme duke dëgjuar këta 200 nxënës të vegjël. Këta nxënës megjithëse janë lindur këtu në Amerikë e larg trojeve ku u lindën e u rritën prindërit e tyre, kanë mësuar jo vetëm të flasin e të shkruajnë shqip, por edhe të këndojnë këngët e bukura folklorike e të vallëzojnë vallet popullore që janë pjesë e kulturës sonë Kombetare shqiptare.

Ne jemi krenar që kemi ulur numrin e nxënësve që nuk flasin shqip, sepse siç thote Rilindasi i shquar Sami Frashëri: “Viktimat e gjuhës, janë më të shumta, se viktimat e shpatës”. Prandaj le t’ju dhurojmë një duartrokitje për paraqitjen me sukses sot në Festival. Më lejoni që me këtë rast të falënderoj të gjithë prindërit që na kanë mbështetur në këtë mision të vështirë, por mjaft fisnik, të falënderoj të gjithë mësuesit dhe drejtuesit artistik që me nje perkushtim të madh kanë ditur të punojnë dhe të përballojnë edhe vështirësi që kanë të bëjnë me nivele të ndryshme të të njohurit të gjuhës shqipe dhe të moshave të ndryshme.

ë lejoni të falënderoj përfaqesuesen e Ambasadës së Shqipërië në Washington znj.Irena Daji, Konsullin e Përgjithshëm të Republikës së Kosovës, z. Ylber Kryeziu, dhe gjjithashtu falënderoj të gjithë kryetarët e shoqatave që sot ndodhen në këtë festival. Një falënderim të veçantë për të gjithë këshillin organizues, drejtorin artistik, z.Petrika Melo, si dhe të gjithë drejtuesit artistik të shkollave, koreografët e stafin për përgatitjen e zhvillimin me sukses të këij Festivali. Falënderoj të gjithë mediat, të cilat do ta bëjnë të mundur ta përçojnë këtë tek ata që nuk patën mundësi ta ndjekin nga afër këtë festival. Pa dashur t’ju marrë shumë kohë le t’ju lë tani të ndiqni programin e Festivalit të tretë të shkollave Shqipe këtu në Amerikë. Zoti e bekoftë Amerikën! Zoti e bekoftë Shqipërinë dhe Kosovën, të cilave ju uroj një bashkim sa më të shpejtë në një Shtet Etnik Shqiptar, me një Gjuhë dhe një Flamur.

Pas përshëndetjes së z.Zylo fjalën e ka marrëz.Ylber Kryeziu, Konsull i përgjithshëm i Kosovës i cili tha:

Të dashur bashkëkombas, vëllezër dhe motra, Është nder i madh për mua dhe kënaqësi të jem këtu me ju të gjithë me rastin e Festivalit të 3-ë të fëmijëve.

Ky festival më jep privilegjin e rrallë për të parë dhe shijuar momentet magjike të krijuara nga zemrat e guximshme të fëmijëve tanë, që njëherësh jane kujdestarët e ardhshëm të vlerave tona tradicionale. Ne kemi përgjegjësinë e dorëzimit të vlerave tona kulturore të brezit të sotëm për të mbajtur gjallë zakonet dhe traditat e pasura të kombit tonë me anë të aktiviteteve të ndryshme kulturore siç është Festivali i Shkollave Shqipe. Unë do të doja të falënderoj dhe të njoh përpjekjet e palodhshme të drejtorëve të shkollave shqipe, të cilët përmes punës angazhimit dhe guximit të tyre kanë dhënë kontribut të jashtëzakonshëm në ruajtjen dhe promovimin e gjuhës dhe kulturës shqipe ndër vite. Andaj, zgjerimi me sukses i aktiviteteve tuaja, është dëshmi për fuqinë e diasporës shqiptare këtu në New York dhe unë si përfaqsues i shtetit të Kosovës, jam krenar të qëndroj para jush. Për vite me radhë fëmijët e komunitetit tonë kanë fituar njohuri në trashëgiminë e pasur të artit tonë, kulturës, gjuhës, letërsisë, zakonit dhe traditës tonë. Eshtë inkurajuese për të parë fëmijët tanë, që përkundër largësisë nga kanë ardhur prindërit dhe gjyshërit e tyre, tek këndojnë, vallëzojnë, flasin e mendojnë shqip. Ata, kanë krijuar tanimë lidhje shpirtërore me rrënjët e tyre. Kjo i ndihmon ata të zhvillojnë një personalitet shumë dimensional, duke bërë të mundur edhe fuqizimin e tyre për t’u përballuar nesër në mjedise konkuruese. Sot unë jam i bindur se përpjekjet e këtyre shkollave kanë ndihmuar jashtëzakonisht në transformimin e së ardhmes se fëmijeve tanë. Sot, unë jam i bindur se përpjekjet e këtyre shkollave kanë ndihmuar jashtëzakonisht në transformimin e së ardhmes së fëmijëve tanë. Kjo është e qartë nga fytyrat rrezatuese që ata japin në skenë, por dhe nga numri I prindërve që jeni ulur dhe shijoni suksesin e fëmijëve tuaj.

Si Komunitet ne duhet të përparojmë së bashku. Ne duhet të përpiqemi për një të nesërme më të mirë. Ne duhet të ëndërrojmë për një të ardhme më të mirë. Ky bashkëpunim është i mundur me anë të projekteve të tilla të bashkëpunimit me institucione. Për më shumë, plotësimi i dëshirave të fëmijës duhet të inkurajohen nëpërmjet institucioneve të cilat mund të eksplorojnë potencialet dhe aftësitë e tyre të fshehura. Ne kemi nevojë për t’i dhënë fëmijëve liri të plotë për të shprehur emocionet dhe kreativitetin e tyre dhe ne nuk duhet të vrasim dëshirën e tyre për të bërë gjëra që ata duan të bëjnë. Përkundrazi ne duhet të inkurajojmë fëmijët për të përmbushur dëshirat e tyre krijuese. I uroj të gjithë fëmijëve tanë suksese më të mira, duke shpresuar dhe uruar që shoqëria jonë të mbetet e sigurt në duart e brezave tanë të ardhshëm. Zoti ju bekoftë!

Pas fjalës se z.Kryeziu e mori fjalën Konsullja e përgjithshme e Republikës së Shqipërisë në New York znj.Irena Dai e cila tha:

Të nderuar organizatorë të Festivalit të tretë tëshkollave shqipe, të dashur të ftuar dhe performues të festivalit, Jam sot këtu t’ju përcjellë përshëndetjet dhe urimet më të mira të ambasadës së Republikës së Shqipërisë në Shtetet e Bashkuara të Amerikës znj.Floreta Faber e cila për shkak të një angazhimi zyrtar të rëndësishëm e pati të pamundur të vinte këu. Ju përcjell përgëzimet e saj të përzemërta duke ju uruar suksese të të gjitha shkollave shqipe. Mirënjohje të thellë dhe respekt për të gjithë mësuesit e gjuhës shqipe për përkushtimin e tyre në realizimin e një qëllimi unik të ruajtjes dhe mësimit të shqipes. Një falënderim të vecantë e përcjell prej saj për prindërit të cilët mbëshetën dhe inkurajuan fëmijët e tyre të mësojnë gjuhën shqipe. Festivali i tretë është finalizimi i një pune të palodhur të mësueseve, organizatorëve, fëmijëve që padyshim janë një inspirim për cdo kënd dhe mesazhi që transmetojnë është tepër i çmuar dhe për brezat e rinj.

Mësojeni dhe duajeni gjuhën tonë shqipe! Suksese të gjitha shkollave!

Programi i Festivalit të tretë të Shkollave Shqipe në Amerikë

Pas duartrokitjeve prezantuesit Kepi dhe Qelia kanë paraqitur programin sipas radhës

Pë të hapur Festivalin e pati nderin Shkolla Shqipe në Clifton, New Jersey me drejtuesa artistik: koreografi Arjana Cele dhe këngëtari Fatjon Krasniqi, ndërsa muzika e përpunuar nga Fadil Sahatciu. Ata u paraqitën denjësisht në Festival cka fliste për një punë serioze të të gjithë organizatorëve dhe mësuesëve dhe nxënësve.

Shkolla Shqipe në Clifton, New Jersey u paraqit me këtë program ku nxënësit performuan mjeshtërisht:

“ E dua vendin tim” kënduar nga Dielleza Zendelli/ “Kuq e zi je ti”, këndon kori i shkollës nën drejtimin e Fatjon Krasniqit me muzikë tëpërpunuar nga Fadil Sahatçiu/ Kolazh vallesh nga krahinat e Devollit, Tropojës, Librazhdit, Kukësit dhe Tiranës përgatitur nga koreografia Arjana Cela.

Pas shkollës së Cliftonit në skenë erdhën nxënësit e Shkollës Shqipe në Bronx, New York me drejtues artistic Beqir Dedushi të cilët u paraqitën me këtë program si: Kolazh me melodi dhe valle folklorike luajnë Leart Dedushaj, Denis Zadriaj dhe Ëngjëll Juncaj/ “Nina – Nana,” kompozitor Pjeter Gaci, luajtur ne flaut nga Leart Dedushaj/ “O sa mirë me kenë Shqiptar” këndon grupi i shkollës/ Melodi nga Limoz Dizdari luan në piano Erind Rugova/ “Vallja e Logut”, vallëzojne grupi i valltarëve të shkollës / “Shqipëri o Nëna ime “këndon Engjëll Juncaj dhe grupi.

Të gjithë nxënësit u përcollën me duartrokitje të nxehta çka fliste për një debutim serioz dhe përgatije profesionale nga ana e drejtuesve artistik dhe mësuesëve të kësaj shkolle.

Në radhën e tretë erdhën nxënësit e Shkollës Shqipe të Qendrës Kulturore në Riverdale, New Jersey me Drejtuese Artistik znj.Majlinda Kaba.

Nxënësit erdhën në skenë dhe interpretuan me një nivel të lartë sikur të ishin vallet e Ansamblit shtetëror. Ata u paraqitën me këtë program: Vallja “Amaneti” me koreografi të Majlinda Bajraktarit vallëzuar nga grupi i më të vegjëlve/ Vallja “Shpresa” me motive nga Shqipëria e Mesme, vallëzojne grupi i valltarëve me Koreografi të Filloreta Hoxha/ “Pse jemi të ndarë” kënduar nga Erion dhe Erlinda Zhaku /Vallja “Rrënjët tona” me motive nga Malësia e Madhe vallëzuar nga grupi I nxënësve më të rritur me koreografi të Shkëlqim Fetahut dhe Majlinda Bajraktari/

Në radhën e katërt dhe të pestë ishin nxënësit e Shkollës Shqipe “Alba Life” në New York me Drejtues Artistike Sopranon Dëshira Ahmeti Kërliu dhe nxënësit e Shkollës Shqipe “Hasan Prishtina” në Waterbary, Connecticat me Drejtues Artistik koreografin Lulzim Kica ku nxënësit prezantuan vetë programin e tyre.

Shkolla Shqipe “Alba Life” u paraqit me këtë program: “Valle e këngë Shqiptare” kompozuar nga Aleksander Vezuli. vallëzojnë grupi i valleve të shkollës “Alba Life” në Staten Island me koreografi të nxënëses Kristina Melo këndon Eneo dhe Kevin Rustani shoqëruar nga kori i shkollës “Alba Life “ në Brooklyn nën drejtimin e sopranos Dëshira Ahmeti Kerliu.

Vazhdoi me shkollën “Hasan Prishtina” me Lekë Pecnikaj. “Valle me motive Kosovare” vallëzojne grupi i valltarëve të shkollës “Hasan Prishtina” ne Waterberry Connecticat me koreografi nga Lulëzim Kica.

Kolazh i Shqipërisë së Mesme vallëzojne grupi i valltarëve të shkollës “Alba Life” në Brooklyn me koreografi të Afërdita Kacupaj/ “Dhuratë për ditëlindjen” orkestacioni Tom Lleshi këndon Kristina Melo dhe shoqëron Kori i Shkollës Shqipe “Alba Life” në Staten Island.

Liri Tahiri, Kolazh me valle të Tiranës vallëzojnë grupi i valltarëve të shkollës “Hasan Prishtina” në Waterberry, Connecticat me koreografi të Lulëzim Kica/ “Mora fjalën” kënduar nga vogëlushja Eliana Dani gjithashtu nga shkolla Shqipe “Hasan Prishtina”

Vallja e Napolonit vallëzojnë grupi i valleve të shkollës shqipe “Alba Life” në Staten Island me koreografi nga Entela Muda.

Ilir Shaqiri “Zëri I Atdheut” Valle për Flamurin vallëzojnë grupi i valltarëve të shkollës “Hasan Prishtina” në Waterberry Connecticat me koreografi të Lulëzim Kicës.

Kënga e Abetares u këndua nga Dea Kerliu dhe Dea Watkins shoqëuar nga kori i shkollave shqipe “Alba Life” në New York nën drejtimin e sopranos Dëshira Ahmeti Kerliu dhe me koreografi të Afërdita Kacupaj.

Prezantuesit Kepi dhe Qelia kanë ftuar në skenë të 200 nxënësit e shkollave shqipe që morën pjesë në këtë festival për të mbyllur programin me këngën: “Gjuha Shqipe Gjjuha Jonë” me tekst nga Kozeta Zylo, muzika Petrika Melo dhe orkestracion të Tom Lleshaj, kënduar nga Kristina Melo dhe kori i të gjithë shkollave shqipe pjesëmarrëse në Festivalin e tretë .

Mbyllja e programit ishte me duartrokitje të stuhishme nga të gjithë pjesëmarrësit, ata të cuar në këmbë dhe shumë prej tyre me lot në sy falënderonin përzemërsisht nxënësit, mësuesit, prindërit dhe të gjithë stafin që punuan aq shumë për realizimin me madhështi tëkëtij programi.

Me të drejtë Marko Kepi gjatë prezantimit tha se shkollat shqipe janë shumë tërëndësishme, nxënësit e tyre janë e ardhmja e Kombit, drejtuesit dhe mësuesit punojnë shumë, ata vinë përherë gjatë javës, kurse organizatat e tjera mund tëmblidhen njëherë në muaj apo në vit për aktivitete të ndryshme, por me shkollat është më e vështirë, shumica janë te vegjel, prandaj ne të gjithë ju shprehim mirënjohjen e pakufishme.

Zonjusha Qelia ftoi Drejtuesin organizativ të Festivalit tëtretë z.Qemal Zylo dhe Drejtuesit e Shkollave Shqipe për të dhuruar Trofetë e Festivalit dhe medaljet për pjesëmarrësit, ndërkohë në skenë u ftuan dhe komisioni organizues si: Irena Dai, Ylber Kryeziu, Zulfi Alla, Shaban Gjoka, Mustaf Qosja, Rakip Etemi, drejtori artistik Petrika Melo dhe drejtuesit artistik si dhe regjisorja artistike sopranoja Lindita Mezini Lole.

Gjithë programi kishte për operator të qendres së zërit, muzikantin dhe dezinjatorin Andrea K.Lole, Odise Salillari inxhinier në sistemimin e zëit, Shpëtim Bardhi teknik për ndricimin dhe ndihmës në qendrën e zërit.

Festivali u filmua nga “Arb TV” dhe studio “Tirana” me producent Xhevdet Bacova si dhe nga Todd Watkins kameraman në TV “Alba Life” dhe Drena Qelia gazetare pranë TV “Alba Life”. Aparatet private s’pushuan shkrap e shkrup duke marrë foto ku ndermjet tyre dha ndihmë dhe dalloheshin profesionalisht z.Esat Ahmeti I shkolles shqipe në Riverdale dhe Shpëtim Bardhi nëshkollën Shqipe “Alba Life”.

E diela e parë e qershorit, 2016 në Staten Island, ishte një ndër ditët e bukura për të gjithë pjesëmarrësit ishte një ndër ditët që s’do të harrohet kurrë, ngase nxënësit e shkollave shqipe në Amerikë u mblodhën së bashku në Festivalin e tretë për nga radha dhe kënduan dhe vallëzuan shqip. Ata janë e ardhmja e Diasporës, janë e ardhmja që ve ne mendime këdo që i do shkollat shqipe dhe i frymëzon ata që të bashkëpunojnë me themeluesit, drejtuesit, mësuesit, prindërit për të përhapur këtë fjalë hyjnore: MËSONI SHQIP!

Qershor, 2016

Staten Island, New York

Specialistët e BE, testojnë aftësitë ligjzbatuese të institucioneve detare shqiptare

June 8, 2016 by dgreca

Nga Shefqet Kërcelli/

Pasditen e datës 7 qershor 2016, përfaqsues të misionit të ekspertëve në luftën kundër korrupsionit dhe krimit të organizuar në strukturat e Bashkimit Evropian, në zbatim të programit bashkëpunues me Ministrinë tonë të Integrimit, zhvilluan një vizitë në Qendrën Ndërinstitucionale Operacionale Detare, Plepa{Durrës}. Qëllimi i kësaj vizite ishte vlerësimi, bashkëpunimi ndërinstitucional, shkëmbimi i informacionit midis agjencive të zbatimit të ligjit, në luftën kundër krimit të organizuar nga insitucionet shtetërore të QNOD, përfshirë doganat, administratorin e AML dhe shkëmbimin e të dhënave në sistemin MEMEX. Fillimisht ekspertët e BE, të kryesuar nga zoti Theo By, u pritën nga Drejtori Administrativ i QNOD, Gjeneralmajor^{R}, Zyber Dushku dhe kuadro kryesorë, përfaqsues të dikastereve përbërës të qendrës. Në vijim specialistët e BE u njohën shkurtimisht me një historik të shkurtër të QNOD, misionin e saj, institucionet përbërës si, Ministria e Mbrojtjes, e Brendshme, e Transportit, e Financës, e Mjedisit, e Bujqësisë dhe Turizmit, përgjegjsitë e këtyre institucioneve në kuadrin e detyrës së përbashkët, struktura e QNOD, stafi operacional e ai mbështetës, baza ligjore, sistemet në përdorim, disa nga operacionet kryesore të realizuara gjatë këtij viti për shkelje të ligjshmërisë detare dhe shpëtimin e njerëzve, vecanërisht operacionet antidrogë dhe kundër peshkimit të paligjshëm. Gjithashtu misioni i ekspertëve të BE u njoh dhe me patrullimet e kryera nga mjetet e cdo institucioni, analiza e riskut për cdo operacion, sipas modelit të ICITAP, trajnimet dhe stërvitjet e realizuara jo vetëm me personelin dhe kordinatorët e QNOD, por dhe me specialistët e institucioneve kryesore detare të vendit. Sigurisht në këto trajnime, QNOD ka përfituar nga asistenca teknike dhe përvoja e specialistëve të ICITAP, {Ekspertë të SHBA} PAMECA, {BE}, dhe stërvitjet e realizuara me Flotën e 6-të të SHBA e Qendrën e Simulimeve, drejtuar nga specialistë amerikanë. Në përfundim të këtij prezantimi ekspertëve të BE, ju shpjeguan projektet afatshkurtër dhe afatgjatë të zhvillimit të QNOD, si një nga institucionet kryesore të ndjekjes së situatës detare në vendin tonë. Mbas këtij shpjegimi, zoti Theo Bay, shprehu kënaqësinë që të gjitha këto institucione që punojnë së bashku në teatrin detar. Ndërkohë specialistët e misionit të ekpertëve treguan interes për vështirësitë që hasen gjatë bashkëpunimit institucional, funksionimin e QNOD, si një institucion i vecantë që nuk e kanë vendet e tjera, shkëmbimin e informacionit horizontal e vertikal, database i të dhënave, bashkëpunimi me strukturat e MB, ato homologe fqinje, Interpol, Europol, ato të BE e jo anëtare të BE, etj. Misioni i ekspertëve të luftës kundër korrupsionit dhe krimit të organizuar të BE, kërkoi shpjegime në lidhje me operacionet e kryera për ndalimin e trafikantëve të drogës në det, zonat me rrezik, burimet e informacionit, si procedohet për këto raste, kompetencat e hetimit të cështjeve dhe dokumentacioni përkatës që cohet në prokurori. Ishte një debat specialistësh, ku krahas Drejtorit të QNOD, kordinatori i Policisë Kufitare dhe Antikontrabandës Detare shpjeguan praktikën e punës që ndiqet nga strukturat tona që nga zbulimi, ndjekja dhe procedimi penal. P.sh.gjatë periudhës 4 mujore të këtij viti janë zhvilluar disa operacione antidrogë, sidomos në zonën jugperëndimore, të cilat kanë qenë efikase, duke bashkëpunuar me policinë italiane dhe greke. Ekspertët e BE kërkuan realizimin e një operacioni konkret në det, që nga marrja e informacionit, lëvizja, ndjekja e nxehtë në ujërat territoriale dhe ndërkombëtare, deri në kapjen e tij dhe shkalla e veprimit të Kodit Detar e Penal. Në vazhdim specialistët tanë i shpjeguan të gjithë procedurat që ndiqen në këto raste, nga marrja e informacionit, kapjen e shkelsit dhe cuarjen e provave në prokurori, e cila vazhdon hetimin dhe ndëshkimin ligjor. Tashmë është fakt që shteti shqiptar në sajë të asistencës së SHBA dhe BE, i ka strukturat dhe legjislacionin përkatës për të zbuluar, ndjekur e ndëshkuar të gjithë shkelsit e ligjit në hapësirën tonë detare. Për këtë është organizuar puna në grupe drejtimi, grupe në terren dhe grup hetimor, të cilat kanë kapacitetet e nevojëshme për të ndëshkuar cdo incident detar. Kontrabanda detare, emigracioni i paligjshëm, kufiri i përgjegjsisë së QNOD, strukturat dhe legjislacioni, marja dhe shkëmbimi i informacionit, ishin cështje të tjera që u diskutuan gjatë takimit midis ekpertëve tanë dhe BE. Gjatë takimit u nënvizua se, bazuar në strukturat respektive që ka cdo shtet për ndjekjen dhe monitorimin e situatës detare, cdo shtet anëtar ose jo i BE, ka vecoritë e tij në organizimin dhe funksionimin e strukturave për zbatimin e ligjit në det, por ajo që është e përbashkët konsiston në faktin se realizimi i misionit dhe qëllimi është i njëjtë. Psh. tek ne nqs QNOD, Policia Kufitare, Antikontrabanda Detare, Roja Bregdetare, etj, zbulojnë, ndjekin dhe paraqesin provat e faktet në prokurori, në shtete të tjera anëtare të BE, kjo procedurë mund të mbyllet me dy institucione që kanë dhe eksluzivitetin e policisë gjyqësore. Gjatë takimit u shkëmbye eksperienca dhe në mënyrat dhe metodat e trafikut të drogës, nga mjetet e vogla, të peshkimit, kontainierët, anijet e mëdha, drejtimet e lëvizjes së tyre, si dhe vecoritë e cdo vendi për këtë fenomen. Theksojmë se ekspertët tanë të QNOD, Policisë Kufitare dhe Antikontrabandës detare, prezantuan me profesionalizëm mënyrat, mjetet, metodat dhe kapacitet operacionale që disponon shteti shqiptar për ndjekjen dhe parandalimin e akteve terroriste dhe kriminale në hapësirën detare. Këtë fakt e vlerësuan dhe ekspertët e luftës kundër korrupsionit dhe krimit të organizuar në BE. Në fund të vizitës misioni i ekspertëve të BE u njoh konkretisht me punën që bëhet në sallën e QNOD, “Fiqiri Kupe”, për ndjekjen dhe monitorimin e situatës detare nga personeli i institucioneve tona detare, që kryejnë shërbim “non stop”, 24 orë në këtë mision fisnik për popullin shqiptar. Gjatë vizitës misioni i ekspertëve të BE, shoqërohej nga specialistë të Ministrisë sonë të Brendshme, të Drejtësisë dhe Integrimit.

Kosovë-Qeveria e zgjedhjeve të para dy viteve zhvillon mbledhjen e 91-të

June 8, 2016 by dgreca

Në foto: Kryeministri Isa Mustafa, zëvendëskryeministri parë, Hajredin Kuçi dhe zëvendëskryeministri Kujtim Shala në mbledhjen e qeverisë së Kosovës, 8 qershor 2016/

-Në mbledhjen e sotme, qeveria e Kosovës ishte e kompletuar edhe me emërimin, në 2 qershor, të zëvendëskryeministrit të parë, Hajredin Kuçit, i cili vazhdon të jetë edhe ministër i Drejtësisë, dhe ministrit të Punëve të Jashtme, Enver Hoxhajt, të cilat poste i mbante Hashim Thaçi deri në zgjedhjen President i Republikës në muajin shkurt/

-Pas mbledhjes së tretë, të 3 qershorit në Prishtinë, të qeverive Kosovë-Shqipëri nis zbatimi i marrëveshjeve të reja të nënshkruara/

Nga Behlul Jashari/ PRISHTINË, 8 Qershor 2016/ Qeveria e Republikës së Kosovës, e pas zgjedhjeve të pikërisht para dy viteve – 8 qershorit 2014, zhvilloi sot mbledhjen e 91-të të rregullt, të 24-tën në vitin 2016, nën drejtimin e kryeministrit Isa Mustafa, në të cilën ka miratuar dokumente dhe vendime të përgjegjësive kushtetuese dhe ligjore.

Në mbledhjen e sotme, qeveria e Kosovës ishte e kompletuar edhe me emërimin, në 2 qershor, të zëvendëskryeministrit të parë, Hajredin Kuçit, i cili vazhdon të jetë edhe ministër i Drejtësisë, dhe ministrit të Punëve të Jashtme, Enver Hoxhajt, të cilat poste i mbante Hashim Thaçi deri në zgjedhjen President i Republikës në muajin shkurt.

Në hapje të mbledhjes, kryeministri Mustafa uroi zëvendëskryeministrin e parë Kuçi dhe ministrin e Jashtëm Hoxhaj, e në vazhdim qeveria miratoi Projektligjin për Ratifikimin e Marrëveshjes Përkitazi me Themelimin e Fondit të Ballkanit Perëndimor.

Ky projektligj është hartuar pas miratimit të nismës dhe nënshkrimit të Marrëveshjes për themelimin e Fondit të Ballkanit Perëndimor nga qeveria e Republikës së Kosovës.

U miratua edhe Nisma për lidhjen e Marrëveshjes Financiare për IPA 2016, ndërmjet Republikës së Kosovës dhe Bashkimit Evropian.

Qeveria gjithashtu miratoi vendimin per themelimin e Grupit Ndërministror për hartimin e Strategjisë nacionale për mospërhapjen e armëve të shkatërrimit në masë dhe Planin e Veprimit, që përbëjnë edhe përmbushje të obligimeve ndërkombëtare të Republikës së Kosovës që dalin nga Rezoluta 1540 e Organizatës së Kombeve të Bashkuara dhe obligime tjera që dalin nga marrëveshje dhe traktate tjera ndërkombëtare.

Kabineti qeveritar mori edhe vendimin për ndarjen e mjeteve financiare për pagesën e kontributit në Fondin e Inovacionit të Mekanizmit të Zhvillimit të Ndërmarrësisë dhe Inovacionit të Ballkanit Perëndimor.

Mbledhja e sotme e qeverisë së Kosovës ishte e para pas mbledhjes së tretë të përbashkët me Këshillin e Ministrave të Shqipërisë, në Prishtinë, në 3 qershor, pas së cilës nis zbatimi i marrëveshjeve të reja të saponënshkruara.

“Thellimi i bashkëpunimit ndërmjet dy qeverive tona është në interes të qytetarëve tanë, është në interes nacional dhe shtetëror, prandaj në këtë interes dhe mbi këtë interes do të gjejmë gjithnjë gjuhën e përbashkët për të çuar proceset tona përpara”, është shprehur kryeministri kosovar në mbledhjen e përbashkët.
“Afrimi dhe bashkëpunimi ynë s’ka qenë kurrë më i mirë e më vëllazëror se sa në këtë epokë, sepse ne tani e kemi të njëjtë edhe orientimin tonë politik, atë të integrimeve euroatlantike, e kemi të njëjtë edhe gjuhën ekonomike, atë të integrimit të lirë dhe konkurrues, por edhe gjuhën shtetërore, atë të forcimit të shtetit të së drejtës, luftës kundër krimit dhe korrupsionit”, ka theksuar ai në mbledhjen e qeverive Kosovë-Shqipëri.Qeveria e Kosovës, e koalicionit të dy partive më të madha PDK e LDK, ku përfshihen edhe minoritetet, është votuar në 9 dhjetor 2014, një ditë pas konstituimit të Kuvendit të zgjedhjeve të parakohëshme parlamentare që ishin mbajtur gjashtë muaj më parë – në 8 qershor.

Në muajin e Ramazanit Hapet ekspozita “Besa” në xhaminë shqiptare në Staten Island- NY

June 8, 2016 by dgreca

Nga Beqir SINA – New York/

STATEN ISLAND NY : Në sajë të një bashkëpunimi mes udhëheqesve fetar nga Hebrew Union College dhe udhëheqsve shpirtëror të Qendrës Kulturore Islame Shqiptare e Staten Island janë formuar dy grupe të përbashkëta, të cilat bënë edhe transferimin të një koleksioni të fotografive të quajtur BESA, dhe materialeve të tjera, të mbledhura nga fotografi i njohur hebre, Norman H. Gershman, përfshirë fotoalbumin e librit të tij BESA.

Javën e kaluar Instituti Hebraik Religion Museum, dhe kolegji, Hebrew Union College transferuan Koleksion Besa në Qendrën Kulturore Islame Shqiptare e Staten Island – një Koleksion ky që dokumenton rolin e Komunitetit Mysliman të Shqipërisë, në shpëtimin e komunitetit Hebre gjatë Holokaustit, thuhet në një njoftim për media nga Xhamia në Staten Island.

Trasferimi zyrtar i këtyre dokumentave, të nxjerra nga Hebrew Union College – Jewish Institute of Religion (HUC-JIR) Museum, është bërë më 31 maj, 2016, pohon njoftimi zyrtar, duke e konsideruar këtë një ngjarje historike.

Për këtë arsye Hebrew Union College dhe Instituti Hebre i Fesë (HUC-Jir) , lëshoi një dekleratë, ku thotë se “është mjaft i kënaqur, që zyrtarisht Koleksioni Besa, gjatë këtij muaji do të jetë edhe në xhaminë e shqiptarërve, në Qendrën Kulturore Islame Shqiptare në Staten Island, në partneritet me Këshillin e Komuniteti Hebre dhe Wagner College.

Ndërkohë, Dr. Imam Tahir Kukaj, nga Qendra Kulturore Islame Shqiptare e Staten Island – vuri në dukje, me këtë rast se “Shqiptarët, dhe hebrenjtë, kanë shumë atribute të ngjashme, të dy vendet janë shumë krenarë për historinë dhe trashëgiminë e tyre. Është, një nder i madh dhe privilegj për Qendrën Kulturore Islame Shqiptare, që të jetë një shtëpi e përhershme e këtyre dokumenteve dhe fotografive të asaj periudhe së Luftës së Dytë Botërore, ku tani çdo njeri nga ne mund të tregojë nëpërmjet këtij koleksioni aktin e madh të popullit shqiptarë Besën, dhe të frymëzojë njerëzit në lidhje me rëndësinë e shpëtimit të jetës së Hebrenjëve, nëpërmjet virtyteve të popullit shqiptarëve, të guximit, sakrificës dhe mirënjohjes”.

Në njoftim thuhet gjithashtu se Koleksioni “Besa: Muslimanët Shqiptarë të cilët shpëtuan hebrenjtë në Luftën e Dytë Botërore”, është një set i gjatë i fotografive nga Norman Gershman që tregon historinë e muslimanëve shqiptarë, që kan strehuar hebrenjtë, të ikur persekutimit nazist.

Jean Bloch Rosensaft, Drejtor, i Muzeut Hebraik, dhe Instituti Hebre i Fesë (HUC-Jir) në New York, ka deklaruar se:”Ky koleksion i fotografive, është një përkujtes e fuqishëme sot, për të treguar atë se si dhe çfarë bënë shqiptarët, e të gjitha besimeve fetare, për të shpëtuar jetë njerëzish, dhe na mëson se ne duhet të punojmë së bashku për të ndërtuar një botë të mirëkuptimit, të drejtësisë, respektimin e të drejtave të njeriut dhe paqes”.

Kjo veprimtari e mbajtur në Qendrën Kulturore Islame Shqiptare e Staten Island thotë njoftimi do të shoqërohet edhe me një ekspozitë të çelur në muajin e madhërishëm, që përkon me kohën më të shenjtë në kalendarin islamik, muajin e Ramazanit.

Kurse, në bashkëpunim me Kolegjin Wagner, Qendra për Studime të Holokaustit do të ketë në partneritet, zhvillimin e një programi i projektuar për të qenë për mbledhjen e dokumenteve dhe fotografive të Luftës së Dytë Botërore, për tua treguar studentëve të universitetit “ Se cili ishte akti i guximit dhe humanizmit të muslimanëve shqiptarë gjatë Holokaustit, Besa e shqiptarëve, kapur kaq bukur në këtë ekspozitë, ajo do të frymëzojë brezin e ardhshëm për të ndërmarrë veprime pozitive ndaj paragjykimeve, anti-semitizmit dhe racizmit. Ne shohim përpara për të punuar së bashku për të edukuar të rinjtë e të gjitha besimeve”, vuri në dukje Prof. Lori Weintrob, Drejtor, Qendra për Arsim e Holokaustit, në Wagner College

Ndërsa, Rabbi Bob Kaplan i Qendrës për Arsim e Holokaustit, në Manhattan New York, vuri në dukje se “Është ky lloj partneriteti që e bën qytetin tonë aq emocionuese. Ne mësojmë nga njëri-tjetri dhe të ndajnë historitë tona të thella mes njeri tjerit dhe se si komunitetet e qytetit tonë janë duke krijuar rrugët e paqes dhe të bashkëpunimit përtej atyre që kërkojnë të na ndajnë “ thotë Rabbi Bob Kaplan i Qendrës për Arsim e Holokaustit.

Rreth ekspozitës:

Besa: Myslimanët që shpëtuan hebrenjtë në Luftën e Dytë Botërore, fillon me udhëtimin e fotografit të njohur hebre Norman Gershman në Shqipëri dhe Kosovë, në vitin 2004, kur ai u “ hipnotizua” nga fragmentet të tregimeve rreth hebrenjve që mbijetuan ,nga lufta, ngaqë u mbajtën të fshehur nga shqiptarët, në Shqipëri e Kosovë e viset shqiptare. Ai më pas bëri udhëtime të shumta në Shqipëri së bashku me një përkthyes dhe u mirëpritë nga populli shqiptar, i cili ishte i etur për të treguar dhe ndarë historitë e tyre, me pjesën tjetër të botës, pas rrëzimit të rregjimit komunistë të Enver Hoxhës. Lufta e Dytë Botërore e pati shkatërruar Europën, edhe nga humbja e popullsisë së hebreje, por do të gjendej një vend shpëtimtar, që ishte Shqipëria , dhe populli i saj i cili ishte i vetmi vend që doli pas luftës të tregojë se një numër i para Holokaustit ishte më i madh i hebrenjve, rreth 2000 që ishin të pasluftës së Dytë Botërore.

Mbi 2,000 hebrenj në Shqipëri, që shkuan më pas në Greqi, Austri dhe Itali ishin nga ata që u strehuan në shtëpitë e familjeve shqiptare. Përgjigja mbizotëruese në pyetjen e diferencës së qëndrimit në Shqipëri ka qenë gjithmonë e njëjtë … sepse ishte BESA, ai kodi nderi i Shqiptarëve që mbrojti me konceptin e respektit, altruizmit dhe besimit, Besës për të mbajtur një premtim, për të ofruar ndihma, për mikun dhe të huajin.

BESA ka zbuluar nga takimet me miqt e tij shqiptarë fotgrafi i njohur hebre Gershman është :” Mbajtja e premtimit është thelbi i këtij kodi madhështore të sjelljes njerëzore. Besa tij ose të asaj — është besim dhe nderim – dhe është virtyt shqiptarë i cili vjen si burim i guximit personal, sidomos në shpëtimin popullin hebre, gjatëHolokaustit. Portretet individuale të familjeve shqiptare që shpëtuan çdo jews, në atë kohë janë në dokumentat zyrtare Muzeum Kombëtar Yad Vashem në Jeruzalem, Izrael, dhe janë ekspozuar, më pas edhe në selinë e Kombeve të Bashkuara në New York City.

Libri fotoalbum i hebreut Norman H. Gershman që u botua në vitin 2008 nga “Syracuse University Press” në gjuhën angleze, është si rrjedhojë e ekspozitave të mbajtura në fillim në Jerusalem duke u bartë deri në selinë e Organizatës së Kombeve të Bashkuara në Nju Jork ,me rastin e ditës ndërkombëtare të përkujtimit të holokaustit.

Libri është i ilustruar me përplot fotografi të cilat përcjellën me deklaratat e protagonistëve që kanë sakrifikua veten dhe familjet e tyre vetëm me një qëllim-ti shpëtojnë me aq forcë dhe guxim sa kanë pas familjet apo individët të përkatësisë fetare të hebrenjve të cilët ndiqeshin nga nazistët gjerman çdo vend ku kishte shkel këmba naziste gjermane, e me këtë rast në Kosovë dhe Shqipëri.

Libri është botuar nga një material i lartë kualitativ dhe ka gjithsejtë 119 faqe. Libri BESA i Norman Gershman, dhe ekspozita e Holokasustit se si shqiptarët shpëtuan Hebrenjët janë nderuar edhe nga Dhoma e Lordëve në Londër në vitin 2011.