Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Archives for June 2019

NJOFTIM I VATRËS PËR PROTESTËN KUSHTUAR 75 VJETORIT TË GJENOCIDIT GREK KUNDËR ÇAMËVE

by

Të nderuar vatranë/

Siç jeni njoftuar nga Gazeta DIELLI online dhe publikimet e Vatrës në Facebook(dielli vatra fb) si dhe Gazeta Dielli-fb, (edhe në gazetën e qershorit në print) nesër më 27 Qershor 2019, ora 12.00, para Konsullatës së Greqisë, që ndodhet në 69 E 79th  St, Neë York, NY 10075, midis Madison Ave & Park Ave, – me rastin e 75 vjetorit të masakrës greke kundër popullsisë shqiptare të Çamërisë, të udhëhequr nga gjenerali Napoleon Zerva, organizohet protesta kundër gjenocidit ndaj popullsisë të pambrojtur Çame, të papranuar deri më sot nga shteti grek.

Vatranë, bashkohuni me protestuesit për të ngritur zërin e protestës kundër masakrës së përgjakur,gjenocidin e ushtruar, ku u vranë, u masakruan, fëmijë, gra, pleq, dhe u përzunë dhunshëm nga shtëpitë e tyre mijëra çamë.

MOTO E PROTESTËS: DUAM DREJTËSI DHE NJOHJE TË GJENOCIDIT NGA SHTETI GREK!

FESTIVALI I USTERIT, PASAPORTA IDENTITARE E SHQIPTARËVE….

by

….JO VETËM NË MASSACHUSETTS….

DIELLI-FESTIVALI I USTERIT, PASAPORTA IDENTITARE E SHQIPTARËVE, JO VETËM NË MASSACHUSETTS /

Shqiptarët e Amerikës organizojnë prej disa dekadave festivale, ku shpalosin vlerat identitare të Kombit, siç është Festivali i Shqiptarëve të Nju Jork-ut , festivali në Waterbury, festivali i Detroitit, por më jetëgjati prej tyre, më i hershmi, që organizohet në një cikël kohor në çdo dy vjet, është ai i Worcesterit, që ka për organizatore Kishën Orthodokse “Fjetja e Shën Marisë”. Kisha ka pritë e ndihmuar mijëra shqiptarë që kanë mbërritur në këtë qytet përgjatë 100 viteve të fundit. Tradita ka nisë që me 1 qershor 1983.

Festivali i Usterit është i veçantë për faktin se ka arritur që të fitojë statusin e përkrahjes jo vetëm nga komuniteti shqiptar, por edhe nga ai amerikan, si dhe nga; bashkia e qytetit, nga institucionet sociale dhe kulturore, nga figura të njohura politike lokale e qendrore, nga departamenti i policisë, Sherifi i Worcester County, Lew Evangelidis, me origjinë shqiptare, ambasada e Shqipërisë në Washington, ka mbështetjen e institucioneve shkollore,Muzeut të qytetit, dhe ka mbështjen e më shumë se 120 kompanive, bankave, e individë që reklamojnë në mbështetje të festivalit. Drejtuesit e festivalit pohojnë se në tre ditët e kësaj ngjarjeje kulturore numri i vizitorëve shkon më shumë se 12 mijë, ndërkohë që gjeografia e pjesmarrësve shtrihet nga Toronto-Kanada, Florida, Illinois, New York, New Jersey, Connecticutt etj.

                                          ***

 Në pamundësi për të qenë të pranishëm në natën e parë të festivalit, të premten me 31 Maj, editori së bashku me anëtarin e  kryesisë së Vatrës, arkëtarin Marjan Cubi, udhëtuan për në Worcester, për të qenv të pranishëm në ditën e  dytë, të shtunën me 1 qershor. Edhe pse festivali fillonte në orën 12 të mesditës, ne arritëm shumë herët. Mikpritësi ynë , studiuesi Thanas Gjika, sekretar i degës së Vatrës të Usterit, sapo u takuam na ftoi në shtëpinë e tij, ku së bashku me zonjën Julia, na ofroi mëngjes, bujari e mikpritje. Në emër të Jurisë së konkursit të 110 vjetorit të Gazetës Dielli, editori dhe z. Cubi, i dorëzuan studiuesit Thanas Gjika çertifikatën dhe pllakën simbolike të fituesit të konkursit për studimin më të Mirë: “Vështrim Krahasimtar në Studimet e Sotme për Faik Konicën”.

  Më pas çvendosemi në mjediset e festivalit.Tenda e madhe ka filluar të mbushet herët.Ushqimet janë gati. Të duket se je në një panair ku serviren ushqime të shumëllojshme dhe autentike shqiptare që gatuhen aty; qengja të pjekur, shish kebap, meatballs, suxhuk, por mbi të gjitha lakrorët karakteristikë të Korcës; ku preferohen ata me spinaq, pastiço të ndryshme, musaka, bakllavë, tiramisu,petulla e biskota të ndryshme,shumë ëmbëlsira të llojeve të ndryshme etj.

Nën shoqërimin e Thanas Gjikës ne takuam e fotografuam dhjetëra bashkatdhetarë, individë dhe familje, ndër ta dhe familje vatranësh.

Në mjediset përreth tendës dhe brenda kishës vizituam pazarin, ku shiteshin orendi, veshje me simbolet kuq e zi, ikona dhe simbole të tjera kishtare,punime argjendarie, ekspozitën e piktorit Sterio Shkodrani, punimet në dru të mjeshtrit Zija Karini, Shtëpinë e Kujdesit për të moshuar me emrin”Vatra” me qendër në Boston etj.

   Takuam edhe me koreografin e njohur, Dhimitraq Demiri, që prej vitesh u mëson brezave të rinj vallet e traditës shqiptare. Janë me dhjetëra fëmijë që mësojnë prej maestros vallet e bukura shqiptare prej një periudhë prej 12 vjetësh. Më shumë se 150 fëmijë kanë kanë mësuar dhe kanë interpretuar vallet e bukura tradicionale shqiptare nën drejtimin e mjeshtrit Demiri. Për këtë festival, ai ka përgatitur me fëmijët 7 valle të reja, që u interpretuan me shkathtësi e dinamizëm.

Koreografi udhëton 5 mile në ditë për t’u mësuar fëmijëve vallet. Është pasioni,që i përballon vështirësitë e kësaj pune vullnetare, thotë ai për Diellin.

Dhimitraq Demiri është rritur me vallet dhe identifikohet me to. Ai kujton se pasionin për vallet e kishte zbuluar një mësues i tij që kur ishte në klasën e pestë të tetëvjeçares. Ai që kishte spikatur talentin e lindur për vallet të Dhimitraqit, kishte qenë vëllai i mjeshtrit Agron Aliaj, që e rekomandoi të studionte në shkollën koreografike, të cilën e nisi më 1982 dhe e përfundoi më 1986. Ai kujton suksesin e  parë në skenat jashtë vendit kur u përfshi në radhët e asamblit” Skënderbeu” të Korçës.

Pas bisedës, grupin e valleve”Valletona”, e ndoqëm dhe e duartrokitëm në skenën e festivalit, ku tre breza valltarësh, shpalosën magjinë e valleve tradicionale shqiptare nga të gjitha trevat e vendit.

Dy bashkëkryetarët e Festivalit, nënkryetari i degës së Vatrës Franklin Zdruli dhe vatrani Gregory  Steffon, ishte e vështirë t’i gjeje një moment të lirë. Por më në fund, u takuam dhe ata u vunë në dispozicionin tonë për të përcjellë informacionet e kërkuara. Franklin Zdrili përshkruan natën e parë të festivalit, ku ceremonia kishte qenë emocionuse.Në përgjigje të pyetjes tonë se kur kishin filluar përgatitjet për edicionin e sivjetshëm, Zdruli informoi: – Ky festival, ashtu si paraadhësit e tij të mëparshëm i ka fillimet e organizimit herët, gati 3 muaj pasi ka përfunduar festivali i mëparshëm i vitit 2017, kemi nisë të mendojmë e skicojmë planin për këtë edicion, 31 Maj- 2 Qershor 2019. Është e domosdoshme që përgatitjet të nisin herët, ndryshe nuk mund të kemi sukses. Bashkëpunimi është kyçi i suksesit tonë. Përgatitjet për këtë festival nisën me vlerësimin e festivalit paraardhës, çfarë mund të ishte bërë më mirë, çfarë mund të përmirësohej, cilat ishin pikat më të arrira etj. Duke nxjerrë në pah anët pozitive të festivalit të mëparshëm, ne kemi synuar përmirësimin gjatë këtij festivali. Punë intensive është bërë në gjatësin e 12 muajëve, kur përgatitjet kanë qenë gjithëpërfshirëse.Tashmë ky nuk është vetëm festivali i shqiptarëve, ai përfshinë gati të gjithë qytetin.

Frank Zdruli është pjesë në grupin drejtues të këtij festivali, që sivjet kishte 36 vjetorin, për më shumë se 10 vitesh. Vetëm në festivalin e vitit 2007 ishte pjesë e stafit për muzikën e festivalit, ndërsa pas atij festivali ka qenë bashkëdrejtues.

Në ekipin e drejtimit të festivalit për këtë edicion, bashkëdrejtues ishin: Gregory  Steffon, Frank Zdruli,Mary Beker,Carol Laska, Helios Mako
 dhe Klevis Naqe.

Pyetjes së Diellit se : Cili është mekanizmi që e bën të suksesshëm këtë festival, Zdruli përgjigjet:-Të punuarit në ekip. Një gjellë, spjegon ai,- që të gatuhet mirë dhe të bëhet e shijshme, i kërkon të gjithë elementët dhe  gjithçka të jetë me masë. Kjo llojshmëri ka nevojë edhe për harmoni. Harmonia fillon që nga familjet e deri në bashkimin e madh në grup. Dëshira për ta organizuar sa më mirë është e të gjithë shqiptarëve. Janë më shumë se 200 vullnetarë që punojnë në tre turne. Nuk do të quhej sukses nëse do ta kishim festivalin vetëm për shqiptarët, përfshirja dhe e kombësive të tjera si pjesë e këtij festivali, na e ka rritur krenarinë, ne shqiptarëve, thotë Zdruli për Diellin.

– Çfarë do veçonit nga ceremonia e natës së parë?

Zdruli: – Ishte gjithçka e mrekullueshme.Pjesmarrja e shumtë në numër dhe prania e shumë personaliteteve jo vetëm të qytetit tonë, ia rriti vlerat. Pjesmarrja e kryetarit të bashkisë me këshilltarët e bashkisë; sherifi i Worcester County-it që është me origjinë shqiptare; pjesmarrja e ambasadores shqiptare në Washington Floreta Faber dhe personalitete të tjerë.

– Pjesmarrja në festivalet e fundit ka qenë mesatarisht nga 10 deri në 12 mijë , pa përfshirë fëmijët të moshës deri në 12 vjeç.

NËPËR DITËT E FESTIVALIT

1- E Premte, 31 Maj 2919. Festivali nisi në orën 5 pasdite dhe vazhdoi deri në 12 të natës. Ushqimet u shërbyen deri në orën 10 të mbrëmjes, ndërsa bari ishte i hapur. Muzikë nga DJ Andrea, Helios, Mikel & Vini, vazhdoi deri në mesnatë. Në orën 7 të mbrëmjes u organizua ceremonia zyrtare hapëse, ku u Himni Amerikan u interpretua nga Rachel Stoja, Himni shqiptar nga Androniqi Danga. Kanë  përshëndetur festivalin përfaqësues zyrtarë të qytetit, ndërkohë që ambasadorja e Shqipërisë në Washington, Floreta Faber, ka shprehur mirënjohjen për qytetin dhe organizatorët. Nga ora 8 e mbrëmjes deri në mbyllje ka vazhduar muzika, vallet, ndërsa këngëtarja Eli Fara, e ka ndezë festivalin me zërin e saj.

***
E shtunë 1 qershor. Festivali nisi që nga ora 12:00 në mesditë deri 12:00 mesnatë. Ushqimet u servirën në llojshmërinë e tyre deri në orën 10 të mbrëmjes, pijet deri në 12 të natës. Valltarët e grupit”Valletona” zotëruan skenën e festivalit, por edhe grupet që erdhën nga Bostoni, Waterbury dhe Toronto. Muzika dhe argëtimi prej DJ Andrea, Helios & Mikel vazhdoi deri në mbyllje , ndërkohë që kulmi ishte programi i Eli Farës shoqëruar nag Orkestra”ALBA”. U duartrokit Kristina Danga.

***

Dita e tretë, e Dielë 2 qershor, ishte më e reduktuar në kohë. Nisi në orën 12 të ditës dhe vijoi gjer në orën 6 të pasdites. Muzikë, valle dhe ushqime.

                                    ***

              Për të plotësuar kronikën përfundimtare të këtij festivali, na erdhi në ndihmë informacioni i gazetarit Adrian Murraj.Citojmë: Për shërbime të veçanta në bashkësi dhe ndihmesë në organizimet e festivaleve gjatë 36 viteve të mbajtjes gjallë të tyre janë nderuar At Timothy Lowe dhe priftëresha Lisa (pas shërbesës 5 vjeçare), Këshilltare dhe ish Kryetare e Bashkisë së Usterit Konstantina Lukes,  Ellen Athanas për bashkëshortin James Athanas (pas vdekjes) si bashkëkryetarë të festivalit të parë më 1983 , Steve Kerxhalli (ndërtues i tendës së parë), Peter Christopher dhe William N. Johns (ndër organizatorët e bashkësisë)….

Ashtu si dhe herë të tjera rritmet e muzikës popullore dhe vallet nga të gjitha krahinat e Shqipërisë që luhen kryesisht nga fëmijët me moshë nga nga 7-18 vjeç (fillore-mesme), si dhe instrumentistë e këngëtarë të spikatur janë një freski në sytë e pjesmarrësve dhe marrin vazhdimisht duartrokitje dhe përgëzim.

“…vetëm me 34 orë përgatitje gjatë periudhës së fundit, vallëtarët e vegjël ju kanë sjellë shtatë kërcime të rinj”;  me këtë cilësim koreografi i grupit “Valletona” Dhimitraq Demiri paraqet punën e femijëve dhe prindërve të tyre që ushqejnë vazhdimisht ruajtjen e kulturës. Rreth 40 kostume popullore (një pjesë e të cilëve u përgatitën nga e para) patën kujdesin e Mimoza Xharja një larmi dhe freski ngjyrash që zbukuron katër shfaqjet e të rinjve në tre ditët e festivalit. Po kështu të rinjtë nga Uoterbërri Kënektikat dhe “Bashkimi Dance” Boston, përshëndetën me vallet e tyre  festivalin.

Me po kaq përkushtim u shqua treshja e motrave Danga, këngëtarja Rachel Stoja, drejtuesët muzikor Natasha Hatibi dhe Petrika Mele, DJ Helios, Andrea, Vini dhe Mikel. Violinistja Kristina Danga me shpërthimin e saj ishte tërheqëse për publikun  sa edhe e mirënjohura Eli Fara e ardhur posaçërisht nga Shqipëria për këtë veprimtari duke mbuluar drejtpërdrejtë me grupin instrumental “Alba” koncertet e dy netëve të para, pjesëmarrja e të cilëve u bë e mundur nga ndihma e bizneseve Shqina e Luarasi (“MEM Connection” dhe “Anisa Party”).

Ndër të rejat e festivalit të këtij viti dallon edhe bashkëpunimin e shqiptaro-amerikanëve me të tjera shoqata lokale ndër të cilat është dhe Muzeu Historik i Usterit që synon të përcjellë njohjen e bashkësisë shqiptare të vendosur këtu. David Conner (drejtues i Projektit të Pjesëmarrjes së Komunitetit) thekson se muzeu është i interesuar të mbledhë historitë e shqiptarve në Uster përkrah bashkësive të tjera, një projekt që kërkon bashkëpunimin tuaj.

Bashkëkryetarët për Festivalin Shqiptar të Usterit Gregory Steffon dhe Frankli Zdruli çmuan punën e mbi 200 vullnetarëve, anëtarëve të kishës dhe bizneseve mbështetës të cilët mundësojnë mbarvajtjen dhe ecurinë e tre ditëve të festivalit.

KOSOVA PROMOVON 100 VJETORIN E KONFERENCES SE PAQES

by

Amerika i priu NATO-s në Kosovë/

-Kryeministri Haradinaj: Ndërhyrja e NATO-s, prirë nga Amerika, e kthehu shpresën tek populli ynë/

-Promovim i ekspozitës dhe pullës postare me portretin kushtuar 100 vjetorit të Konferencës së Parisit dhe angazhimit të Presidentit Amerikan, Woodrow Wilson dhe Qeverisë Amerikane për të mbrojtur të drejtat dhe integritetin territorial të Shqipërisë/

 PRISHTINË, 24 Qershor 2019-Gazeta DIELLI/ Kryeministri i Republikës së Kosovës, Ramush Haradinaj, mori sot pjesë në promovimin e ekspozitës dhe pullës postare me portretin kushtuar 100 vjetorit të Konferencës së Parisit dhe angazhimit të Presidentit Amerikan, Woodrow Wilson dhe Qeverisë Amerikane për të mbrojtur të drejtat dhe integritetin territorial të Shqipërisë.

Në fjalën e tij, Kryeministri Haradinaj tha se në kuadër të përvjetorëve të rëndësishëm të jetës tonë si Kosovë, por edhe të kombit tonë, ka pas nderin që para pak ditësh të priste në Kosovë Presidentin e Amerikës, Bill Clinton, Sekretaren Madeleine Albright, Gjeneralin Wesley Clark,  dhe se  Kosova i ka nderuar këto figura kyçe të Amerikës  në zbatim të pullës postare.

Kryeministri Haradinaj bëri të ditur se në atë kohë është vënë në dijeni se një nderim i këtillë do të bëhet edhe për Presidentin Wilson duke pasur parasysh rolin e tij të rëndësishëm në një periudhë të rëndësishme të historisë së kombit tonë.

“Mendoj se një sjellje e këtillë e jona falënderuese dhe shprehja e respektit buron po ashtu nga ajo që përjetuam në vitin 1999 kur Amerika i priu NATO-s duke ndërhyrë dhe ndalur tragjedinë. Kjo ndërhyrje bëri që populli i Kosovës të shpëtohet, jeta e njerëzve të pafajshëm të shpëtohet, të rikthehet shpresa”, tha Kryeministri Haradinaj, duke theksuar se aeroplanët e jetës i ndalen trenat e vdekjes dhe tragjedinë në Kosovë.

Kjo ndalje e kësaj tragjedie, siç veçoi Kryeministri Haradinaj, është një vepër e mirë së pari për shqiptarët dhe se ky veprim i NATO-s i ka bërë një nder të madh edhe popullit serb,  duke i shpëtuar nga një krim më i madh se ai që e kishin bërë deri atëherë e që do të ishte një njollë më e zezë për ta, për historinë e popullit serb.

“Mendoj që falënderimin më të madh Amerikës duhet t’ia bëj vetë populli serb dhe Serbia, sepse Amerika nuk i la të ecin në rrugën e krimit e cila do të ishte e keqja më e madhe që do të mbahej në mend në historinë e njerëzimit pas Luftës së Dytë Botërore.

Duke qenë kështu ndodhën dy të mira, u shpëtua populli i Kosovës, por u ndal edhe një e keqe”, tha në fjalën e tij Kryeministri Haradinaj.

Një fjalë rasti mbajti edhe Kryeshefi Ekzekutiv i Postës së Kosovës, Sejdi Hoxha.

Të pranishëm ishin edhe ministra, deputetë, personalitete nga jeta politike dhe shoqërore si dhe përfaqësues nga Ambasada Amerikane në Kosovë./b.j/

KOSOVE-NORVEGJI- Marrëveshja për njohje nga Serbia

by

-Deklarata të president të Kosovës, Hashim Thaçi, kryeministrit Ramush Haradinaj dhe ministrit të Jashtëm, Behgjet Pacolli, në takime me ministren e Jashtme të Norvegjisë, Ine Marie Eriksen Søreide/

PRISHTINË, 25 Qershor 2019 – Gazeta DIELLI/ Presidenti Hashim Thaçi tha se Kosova do që njëherë e përgjithmonë ta qartësojë raportin e saj si shtet me shtetin e Serbisë dhe mund të vihet deri tek një marrëveshje ligjërisht obligative, me garancat e nevojshme ndërkombëtare, por nevojitet më shumë vullnet, largpamësi dhe pragmatizëm politik.

“Kosova është e përkushtuar për forcimin e paqes dhe stabilitetit në rajonin tonë. Është shumë i rëndësishëm vazhdimi i dialogut, por ky dialog duhet të rifilloj pa kushtëzime”, theksoi presidenti Thaçi.

Kryeministri Ramush Haradinaj, po ashtu theksoi se “Kosova është e përkushtuar për një dialog të kornizuar dhe përmbajtësor me Serbinë që çon në një marrëveshje finale, ligjërisht të obligueshme, në kufijtë ekzistues dhe me njohje reciproke mes dyja vendeve”.

Ministri i Jashtëm Behxhet Pacolli  tha se “dialogu ndërmjet Republikës së Kosovës dhe Republikës së Serbisë nuk ka alternativë dhe vetëm në mënyrë të barabartë, si dy shtete sovrane dhe me respekt të ndërsjellët, ne mund të normalizojmë marrëdhëniet mes nesh duke ruajtur paqen në rajon për të ardhmen e popujve”.

Këto deklarata u bënë gjatë takimeve me ministren e Jashtme të Norvegjisë, Ine Marie Eriksen Søreide, e cila mbrëmjen e djeshme  kishte një darkë pune me presidentin e Kosovës, Hashim Thaçi, ndërsa sot kishte pritje të veçanta nga kryeministri Ramush Haradinaj dhe ministri i Jashtëm, Behgjet Pacolli.

“Norvegjia mbështet dialogun dhe përpjekjet për normalizimin e marrëdhënieve ndërmjet Kosovës dhe Serbisë”, ka thënë kryediplomatja norvegjeze.

 Norvegjia është shteti i 35-të që ka njohur Kosovën në 28 Mars të vitit historik 2008 të shpalljes së pavarësisë në 17 Shkurt./b.j/

As Zoti nuk e shpëton më Edi Ramën

by

Nga Ilir Levonja/

Eshtë logjika më idiote ajo që vlon studiove mbi precedentin dhe faktin e shmangies nga skandali i përgjimeve. Askush nuk do ta kuptoj se ajo që e çoi opozitën në heqjen dorë nga mandati qe pikërisht prova që ajo donte t’u jepte shqiptarëve mbi vjedhjen e zgjedhjeve, prishja e balancës së ndarjes së pushtetit dhe kapjen e shtetit nga krimi. Dhe ishte më se e logjikshme pavarësisht habisë gjoja kristalinë të ca manekinëve që kurrë nuk duan ta kuptojnë se politika është sfidë, madje me pengje të forta. Opozitën krimi e ka kërcënuar publikisht, nga dyert e gjykatave pas skandaleve me rrëmbime në dhoma motelesh, a histori me drogë dhe grupe pranë kryetarësh bashkish. Këto janë evidente dhe mjaftueshëm për tu indinjuar apo braktisjen e një mandati nul për të bërë punë të vlefshme në demokraci. Kaq, të tjerat janë gjepura mbi precedentin. Apo me histori nga e kaluara se si i vidhte pd-ja dikur zgjedhjet në iks katund apo provincë ku vetëm era mbretëron. Eshtë fare e thjesht, nëse edhe ministrat a kryetarët e bashkive të pd-ës kapen me presh në duar si këta të rilindjes, ps-ja ka të drejtën legjitime të djegi jo mandate por edhe kuvendin. Mirëpo nuk është kjo në fakt e keqja e ardhmërisë së Shqipërisë. Eshtë pikërisht kjo idiotësia e interpretimeve pa fund mbi precedentin, si e qysh, ai apo ky, duke harruar faktin që na solli këtu, vjedhjen dhe qenien në pushtetin e krimit. Përkrah Edi Ramës sot, Shqipëria ka një shpurë gjoja intelektualësh që nuk shohin asgjë, por xhelin e Lulzim Bashës dhe emrin nocion a indeks, Sali Berisha. Kjo është një marrëzi vrastare që shpesh ka shoqëruar çdo shef qeverie, aq sa nuk është aspak e rastit që një komisioner zgjedhor a një gjykatës kolegji flet si president a si kryeministër. Eshtë skandaloze kur një ministër i brendshëm, në detyrë i thotë gazetarit se dosja e përgjimit duhet të çohet në prokurori që kjo e fundit të ngrejë akuzat. Eshtë skandaloze sepse ato nga prokuroria dolën, megjithatë asnjë nga ata që kanë marrë rrogën nuk rezulton që për dëmin e shkaktuar, e para, duke marrë rrogën dhe e dyta, duke mos kryer detyrën, nuk rezultojnë me ndonjë masë administrative, vazhdojnë punën të qetë. Dhe për më zi as që përfliten fare se janë po aq të dëmshëm sa qelbësirat. Dhe akoma më zi që kreu i komisionit të ligjeve jo vetëm që vazhdon detyrën, por me 120 kilometër në orë mbledh firma për të shkarkuar presidentin. Eshtë ai që fliste me q dhe me k, e që, kishte prespektivë të garantuar për poste më të larta për këta tipat me q e me k. Janë një shpurë e tërë të pafytyrësh që mirë shqiptarëve ua kanë marrë dorën për t’i mashtruar, por fëmijëve, familjeve të tyre si u përgjigjen? Që këtu ka vdekur perspektiva. Ndaj debatet në studio mbi fatin e opozitës, precedentin, e të tjera janë humbje kohe. Ne sot Shqipërinë duhet ta ruajnë nga papërgjeshmëria morale. Një i vetëm nuk doli e të thotë, po jam unë. Dhe nuk e di se si ua shohin sytë, si pranoni t’ju drejtojnë. Por ta dini, si këta dhe Edi Ramën që bën fushatë edhe në kisha, as Zoti nuk e mbron më. As ju, jo e jo…, janë ca papërgjeshmëri sociale që Ai nuk t’i fal, është ajo kohë e pashmangshme e theqafjes. Dhe nuk ka më kthim mbrapa. Kurse opozitës vetëm sa për kujtesë, nuk ka negociata me krimin, me Ed evlatin, kjo është arsyeja që edhe sheshet janë plot. Kaq dhe popullojeni burgjet se e ka vendi të domosdoshëm një katarsis social.