Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Archives for April 2023

KUSH SI VOTOI PËR KOSOVËN NË KËSHILLIN E EVROPËS?

by

Prof.Xhelal Zejneli/

Komiteti i ministrave të Këshillit të Evropës, në seancën e mbajtur më 24 prill të vitit 2023 vendosi të ngrihet procedurë për shqyrtimin e kërkesës së Kosovës për t’u pranuar në këtë organizatë.

Për këtë propozim votuan 33 shtete:

Andora, Austria, Belgjika, Britania e Madhe, Bullgaria, Çekia, Danimarka, Estonia, Finlanda, Franca, Gjermania, Holanda, Irlanda, Islanda, Italia, Kroacia, Letonia, Lituania, Lihtenshtajni, Luksemburgu, Mali i Zi, Malta, Maqedonia e Veriut, Monako, Norvegjia, Polonia, Portugalia, San-Marino, Sllovenia, Suedia, Shqipëria, Turqia, Zvicra.

Kundër këtij propozimi votuan 7 shtete: Azerbajxhani, Gjeorgjia, Hungaria, Qiproja, Rumania, Serbia, Spanja.

Abstenuan në votim 5 shtete: Bosnja dhe Hercegovina, Greqia, Moldavia, Sllovakia dhe Ukraina.

Nuk votoi 1 shtet – Armenia.

* * *

Komiteti i ministrave të Këshillit të Evropës ka 46 shtete anëtare.

Kërkesa e Kosovës do t’i përcillet Asamblesë Parlamentare të Këshillit të Evropës.

Votimi për pranimin e Kosovës në Këshillin e Evropës mund të realizohet brenda një viti.

* * *

Ish-zëdhënësi i Ministrisë së Jashtme dhe i Punëve Evropiane i Sllovakisë, Peter Stano (1975- ), tani zëdhënës i përfaqësuesit të lartë të BE-së për Politikë të Jashtme¸ Zhozep Borel (Josep Borrel Fontelles, 1947- ), deklaroi se institucionet e Brukselit janë në dijeni se Serbia votoi kundër aplikimit të Kosovës për anëtarësim në Këshillin e Evropës.

Hungaria është një shtet që e ka njohur pavarësinë e Kosovës. Është për t’u ardhur keq sesi ky shtet, i udhëhequr nga kryetari Viktor Orban (Viktor Mihály Orbán, 1963- ), votoi kundër propozimit që Kosova të bëhet anëtare e Këshillit të Evropës.

Ministri i Punëve të Jashtme i Serbisë, Ivica Daçiq (Ivica Dačić / Ивица Дачић, 1966- ) ishte zemëruar tej mase për votën e Malit të Zi, në favor të Kosovës, ndërsa kryeministrja Ana Bërnabiq (Ana Brnabić / Ана Брнабић, 1975- ), në shenjë proteste dhe hidhërimi për abstenimin e Greqisë në votim, si duket nuk do të marrë pjesë në Forumin VIII Ekonomik që mbahet në Delfi të Greqisë më 26-29 prill 2023.

* * *

Këto ditë Uashingtoni dhe Brukseli mbështetën drejtësinë:

– Kosova do të fitojë liberalizimin e vizave;

– I njohën zgjedhjet në veri të Kosovës; dhe

– Votuan me shumicë që Kosova të jetë anëtare e Këshillit të Evropës.

* * *

Vota e Serbisë kundër aplikimit të Kosovës për anëtarësim në Këshillin e Evropës paraqet shkelje të Marrëveshjes për normalizimin e raporteve që Kosova dhe Serbia arritën gjatë vitit 2023.

Kryeministri i Kosovës, Albin Kurti dhe kryetari i Serbisë, Aleksandar Vuçiq, më 27 shkurt të viti në vazhdim, u pajtuan në Bruksel për një marrëveshje që ka të bëjë me normalizimin e marrëdhënieve ndërmjet dy vendeve. Ndërkaq, në takimin e mbajtur në Ohër më 18 mars të viti 2023 këta u duk sikur u pajtuan për Shtojcën e zbatimit të kësaj marrëveshjeje.

Sipas nenit 4 të kësaj marrëveshjeje, Serbia nuk do ta kundërshtojë anëtarësimin e Kosovës në institucionet ndërkombëtare. Rrjedhimisht, vota e Serbisë kundër aplikimit të Kosovës për t’u bërë anëtare e Këshillit të Evropës, paraqet shkelje të nenit të lartpërmendur.

* * *

Thirrja e autoriteteve të Beogradit drejtuar serbëve të Kosovës për të mos dalë në votim në veri, është në kundërshti të plotë me parimet e demokracisë.

Për sjelljet destruktive të sipërthëna, Uashingtoni dhe Brukseli duhet të marrin masa ndëshkuese ndaj Serbisë.

Kujtesë e cekët

by

Astrit Lulushi/

Legjendat për “karrocat qiellore” apo për Atlantis, arritjeve të mëdha teknike, dhe çoroditjeve morale përtej krahasimit, burojnë nga epokat e lashta. Disa legjenda kalojnë në epokën 7000-vjeçare, duke treguar njëfarë ruajtjeje të njohurive përmes kataklizmës së Noas biblik.

Nëse shikojmë te Nostradamus, zbulojmë se parashikimet e tij mbaruan rreth vitit 2000. Edgar Cayce parashikoi një kataklizëm rreth vitit 1999. Matematika e Hale tregon se një e tillë do të vinte rreth vitit 2000. Këto nuk ndodhën. Bota vazhdon, megjithëse përbrënda e prishur.

Gilgameshi kërkoi sekretin e jetës së përjetshme, Atij iu tha se duhej të gjente një njeri me emrin Utna-pishtim, të cilit perënditë i kishin dhënë jetën e përjetshme. Gilgameshi e gjeti dhe e bindi të tregonte se çfarë i kishte ndodhur.

Utnapishtim i pohoi se me të vërtetë, atij i ishte dhënë sekreti dhe perënditë i thanë:

“Braktis pasurinë, shpëto veten; shemb shtëpinë tënde dhe ndërto një anije; Le të jetë e matur mirë”.

Ai përshkruan anijen që ndërtoi, dhe nga të gjitha parimet e arkitekturës detare, ishte një anije që nuk mund të mbytej. Më në fund e ndërtoi. Dhe organizoi një festë për të festuar përfundimin e saj, me birrë, verë dhe mish deleje. Nga të gjithë ata që erdhën në festë, disa duhej të kishin menduar se ai ishte i çmendur. Të nesërmen pas festës, Utnapashtim vendosi se ishte koha për të ngarkuar anijen dhe për ta nisur në det në lundrim për mbijetesën e tij.

”Më pas ngarkova anijen. Gjithë të korrat e jetës që ngarkova – Familjen time, miqtë e mi, kafshët e fushës, bagëtinë e fushës, mjeshtrit dhe veglat e zanateve të tyre – i bëra të gjithë të hipin. Më pas hipa dhe mbylla derën. Sa shkëlqeu një agim në qiell, Qiejt u errësuan, u mblodhën retë e zeza; Së shpejti e gjithë drita ishte kthyer në errësirë; Vëllai nuk mund ta njihte më vëllanë, Kafshët e qiejve nuk mund ta shihnin më njëri-tjetrin.” Utnapishti më pas përshkruan sulmin e stuhisë që shkaktoi tmerr të plotë e të gjithanshëm në anije. Pas kësaj, “Për gjashtë ditë e netë përmbytja vazhdoi, Era e tmerrëshmr pushtoi tokën. Kur zbardhi dita e shtatë, era u qetësua; oqeanet, – vërshimi – që kishin bërë luftë si ushtri, u pushuan. Hapa dritaren dhe pashë shkatërrimin, Dhe gjithë njerëzimi u shndërrua në baltë! Aq e lartë dhe aq e sheshtë sa mbi çatitë shtriheshin këneta. Dhe mijëra të vdekur – nga njerëzit, nga kafshët dhe bagëtia – shtriheshin duke notuar në baltë” Ai më pas vazhdoi të përshkruante përplasjen në mal, lëshimin e tre zogjve, kthimin e gjethes; pasuar nga zbarkimi, ndërtimin e një altari dhe më shumë.

Këto ngjarje kanë ndodhur jo një, por disa herë, dhe përsëri do të ndodhin. Është cikël. Edhe krijimi i botës në Bibël, i ngjan një dalje nga kataklizma dhe rifillim i jetës, megjithëse për shumë gjëra kemi kujtesë të cekët.

Nëse do të përcaktonim sa më saktë që të jetë e mundur se sa kohë kemi përpara kataklizmës së ardhshme; duhet të bëjmë diçka në kohën që na ka mbetur për t’u përgatitur për të. Disa thonë se shpëtimi mund të vijë duke u ngjitur lart, por agjencitë për fluturime në hapësirë merren me të tjera gjëra, në dukje pavlerë, përpara mbijetesës.

photo by: m.shein.com

Edmond Smajli, pilot luftarak në Forcat Luftarake Amerikane!

by

Dr. Lulzim Nika/

Të arriturat e të rejave dhe të rinjve shqiptarë po na bëjnë krenarë gjithandej ku jetojnë ata. Këto të arritura, në fusha të ndryshme, na bëjnë të gjithëve krenarë.

Forcave Ajrore Amerikane, sot iu shtua një kuadër, një i ri, një shqiptar bir shqiptari, pasardhës i denjë i prindërve të tij atdhetarë, bir i veprimtarit të shquar të çështjes kombëtare, Ismet Smajli që bashkë me shumë atdhetare kanë dhënë kontribut ne komuniteti shqiptar të Dallasit qe nga themelimi i tij.

Nga sot, Edmond Smajli është pilot me gradën Oficer Pilot i luftarak i pari shqiptare në Forcat Luftarake Amerikane (US AIR FORCE). Këtë lajm të madh për mua dhe të gjithë shqiptarët, e mora sot nga babai i tij, Ismeti.

Atdhetari Ismet Smajli dha kontribut të veçantë në luftën për lirinë e Kosovës, ndërsa sot interesat nacionale janë në rend të parë me miqtë e shumtë amerikanë dhe rrethet që kanë ndikim në politikën amerikane.

Është krenari që një shqiptar sot, bëhet pjesë e kësaj force ajrore e cila solli dritën e lirisë për Kosovën, solli shpresën dhe çlirimin e plotë nga okupatori shekullor. Është kjo forcë e cila ndërpreu gjenocidin serb në Kosovës, është kjo forcë e cila edhe sot është gardiane e fuqishme e lirisë e pavarësisë tonë.

Edmondi e arriti këtë sukses pas një përkushtimi dhe pune disa vjeçare, falë vendosmërisë për të arritur suksese të shkëlqyera, sot, ai me krenari u rreshtua si pilot luftarak në Forcat Luftarake Amerikane (US AIR FORCE), duke pilotuar aeroplanin A-10 Warthog.

Sot, të gjithë ne, jemi të lumtur me arritjen e Edmondit, si bir i një atdhetari në Amerikë, i rritur në familjen atdhetare, i përkushtuar për atdheun dhe i gatshëm për të kontribuar kurdo që e kërkon nevoja.

Kosova kalon me sukses fazën e parë të anëtarësimit në Këshillin e Evropës

by

Albin Kurti/

Komiteti i Ministrave të shteteve anëtare, me mbi dy të tretat e votave të nevojshme, i dha sot mbështetje aplikimit të Kosovës në Këshillin e Evropës, duke përmbyllur kështu fazën e parë të anëtarësimit të plotë të Republikës sonë në këtë organizatë të rëndësishme ndërkombëtare.

Shteti ynë do të jetë vlerë e shtuar për Këshillin e Evropës. Këshilli i Evropës do t’i shtojë vlerë demokracisë, të drejtave të njeriut dhe sundimit të ligjit në shtetin tonë.

Falënderoj ministrinë e Punëve të Jashtme dhe Diasporës, ministren Gërvalla, zëvendësministrin Ahmeti dhe ekipet e tyre për punën e pandërprerë, si dhe partnerët tanë e shtetet anëtare, për përkrahjen e pakursyer.