dgreca – Page 1125 – Dielli

PRESIDENTI THAÇI, GATI PER KOMPROMIS HISTORIK

January 29, 2019 by dgreca

PRESIDENTI THAÇI FTON PRESIDENTIN TRUMP NE PRISHTINE/

-Presidenti Thaçi i shkruan presidentit Trump, zotohet se do të punojë për marrëveshjen historike me Serbinë/

-Më lejoni të shfrytëzoj këtë mundësi dhe t’ju ftoj për të vizituar Kosovën, të takoni popullin më proamerikan dhe amerikanët që shërbejnë në Kosovë, si dhe të bëheni dëshmitar i suksesit tonë të përbashkët në ndërtimin e një Kosove shumetnike, e përkushtuar për paqe, liri dhe drejtësi.

PRISHTINË, 29 Janar 2019-Gazeta DIELLI nga korrespondenti në Kosovë/ Presidenti i Republikës së Kosovës, Hashim Thaçi, në fillim të këtij muaji ia ka kthyer letrën Presidentit të Shteteve të Bashkuara të Amerikës, Donald Trump.Në letrën e tij dërguar presidentit Trump, presidenti Thaçi është zotuar se do ta kryej pjesën e tij të punës dhe do të apelojë tek qytetarët që të ndjekin thirrjen e bërë nga presidenti Trump në letrën e dhjetorit që “të flasin me një zë gjatë bisedimeve për paqe dhe të përmbahen nga veprimet që do të bënin një marrëveshje më vështirë të arritshme”.Presidenti Thaçi e ka siguruar Presidentin Trump se është i gatshëm dhe i vullnetshëm që të bëjë kompromiset e nevojshme për të arritur një marrëveshje gjithëpërfshirëse dhe të balancuar, e cila do t’i përfshinte të gjitha çështjet e hapura dhe do i jepte fund konfliktit shekullor me Serbinë.

Kjo është përmbajtja e letrës së presidentit Thaçi dërguar presidentit Trump:

I nderuar z. President,

Më lejoni të filloj duke ju dëshiruar juve dhe familjes suaj gëzuar Vitin e Ri dhe shumë suksese në vitin 2019. Populli i Kosovës dhe unë jemi veçanërisht të gëzuar me letrën që më keni dërguar më 14 dhjetor 2018, në të cilën shprehni përkrahjen e palëkundur të Amerikës për Kosovën “e pavarur dhe sovrane”.

Siç kemi diskutuar në Paris – dhe siç u kam shpjeguar më në detaje Sekretarit të Shtetit, Mike Pompeo, si dhe Këshilltarit për Siguri Kombëtare, John Bolton, gjatë vizitave të mia të paradokohshme në Uashington – pajtohem me ju se një marrëveshje që do të zgjidhte të gjitha çështjet e hapura në mes të Kosovës dhe Serbisë është afër tani.Prandaj, më lejoni t’ju ofroj garancitë e mia personale se si President i Kosovës do të jem i gatshëm dhe i vullnetshëm që të bëjë kompromiset e nevojshme për të arritur një marrëveshje gjithëpërfshirëse dhe të balancuar, që do të përfshijë të gjitha çështjet e hapura, duke i dhënë kështu fund konfliktit shekullor me Serbinë.

Më lejoni të nënvizoj, z. President, karakterin historik të kësaj për të cilën po flasim këtu.

Marrëveshja e arritur nuk do të jetë paqe e përkohshme apo konflikt i ngrirë. Ne po mundohemi të dalim nga ky qark dhe të arrijmë një marrëveshje permanente në të cilën të dyja palët e njohin njëra-tjetrën dhe heqin dorë nga konflikti dhe sipas të cilës Kosova bëhet anëtare e Kombeve të Bashkuara.

Një arritje e tillë historike kërkon angazhim maksimal nga të dyja palët. Unë zotohem se do të kryej pjesën time të punës. Do u apeloj bashkëqytetarëve të mi kosovarë që të ndjekin thirrjen që keni bërë në letrën e dhjetorit që “të flasin me një zë gjatë bisedimeve për paqe dhe të përmbahen nga veprimet që do të bënin një marrëveshje më vështirë të arritshme”.

I gëzohem mundësisë që të bashkëpunojmë ngushtë me ju dhe me shumë miq tonë në Shtetet e Bashkuara në zhvillimin e kësaj iniciative diplomatike. Dhe, siç keni sugjeruar me zemërgjerësi, nuk ka mënyrë më të mirë për të celebruar suksesin tonë se sa të ndjekim lidershipin tuaj dhe t’ju bashkohemi në Shtëpinë e Bardhë, ku paqja dhe historia krijohen bashkë.

Në fund, më lejoni të shfrytëzoj këtë mundësi dhe t’ju ftoj për të vizituar Kosovën, të takoni popullin më proamerikan dhe amerikanët që shërbejnë në Kosovë, si dhe të bëheni dëshmitar i suksesit tonë të përbashkët në ndërtimin e një Kosove shumetnike, e përkushtuar për paqe, liri dhe drejtësi.

Sinqerisht,

Hashim Thaçi

President i Republikës së Kosovës

Ambasadori Amerikan: Policia e Kosovës ndër më të mirat në Evropë

January 29, 2019 by dgreca

-Drejtori i Përgjithshëm i Policisë së Kosovës Rashit Qalaj: Policia e Kosovës është përkrahur në vazhdimësi nga institucionet relevante të Shteteve të Bashkuara të Amerikës/

-Ambasadori Amerikan në Prishtinë, Philip S. Kosnett: Policisë së Kosovës i uroj suksese të mëtejme përderisa vazhdon të ndërtojë namin si njëra ndër organizatat më të mira të policisë në Evropë/

Gazeta DIELLI nga korrespondenti në Kosovë Behlul Jashari/

PRISHTINË, 28 Janar 2019/ Drejtori i Përgjithshëm i Policisë së Kosovës Rashit Qalaj priti sot ambasadorin Amerikan në Prishtinë, Philip S. Kosnett, i cili mori pjesë në ceremoninë e fillimit të projektit trajnues që realizohet nga Zyra e Programit për Asistencë Kundër Terrorizmit (ATA). Ky trajnim, në të cilin marrin pjesë përfaqësues nga Policia e Kosovës, Prokuroria dhe Gjykata, ka për qëllim rritjen e kapaciteteve për zbatues të ligjit në Kosovë, avancimin e zyrtarëve të Policisë së Kosovës në zhvillimin e aftësive teknike si dhe për të adresuar kërcënimet e lidhura me terrorizmin.

Drejtori Qalaj në fjalën e tij të rastit tha se institucionet e Republikës së Kosovës, ashtu si edhe qytetarët e saj, janë përcaktuar qartë për ndërtimin e një shoqërie demokratike në Republikën e Kosovës, ku respektimi i të drejtave të njeriut, të lirive fundamentale, gjithëpërfshirja dhe sundimi i ligjit janë të garantuara për të gjithë qytetarët, pavarësisht përkatësisë etnike, fetare, apo të dallimeve të tjera dhe po ashtu potencoi se jemi të përcaktuar qartë në orientimin proevropian dhe synimin për integrimin në institucionet dhe organizatat euro-atlantike.

Në frymën e kësaj, Policia e Kosovës mbetet e përkushtuar në fuqizimin e sundimit të rendit dhe ligjit si dhe në parandalimin dhe luftimin e të gjitha dukurive negative dhe krimit të organizuar në përgjithësi e veçanërisht në parandalimin dhe luftimin e ekstremizmit të dhunshëm dhe terrorizmit.

Ndër të tjera drejtori Qalaj tha se Policia e Kosovës është përkrahur në vazhdimësi nga institucionet relevante të Shteteve të Bashkuara të Amerikës. Falë ndihmës, shkëmbimit të përvojave dhe praktikave, si dhe përkrahjes së vazhdueshme nga SHBA-të, Policia e Kosovës, në bashkëpunim edhe me institucionet tjera vendore ka arritur të mbrojë Republikën e Kosovës dhe qytetarët e saj nga aktet e terrorizmit, andaj për këtë ju jemi mirënjohës dhe falënderues SHBA-ve.

Nga ana tjetër ambasadori Amerikan Philip S. Kosnett u shpreh se Ambasada Amerikane është krenare që po bashkëpunon në këtë trajnim dyditor, i cili ofron kornizën organizative të ligjeve dhe politikave për t’u marrë në konsideratë nga zyrtarët kur hetojnë apo gjykojnë terroristë. Kjo ngjarje është e rëndësishme për sundimin e ligjit dhe për sigurinë rajonale.

FJALA E AMBASADORIT AMERIKAN NË KOSOVË PHILIP S. KOSNETT GJATË HAPJES SË PUNËTORISË: PËRDORIMI I TEKNOLOGJISË PËR QËLLIME TERRORISTE, 28 JANAR 2019

Zonja dhe zotërinj, mirëmëngjesi. Drejtor i Përgjithshëm i Policisë, ju faleminderit për fjalët e mira.

Para se të flas për temën e kësaj konference, dëshiroj ti them disa fjalë për Policinë e Kosovës.

Siç e dinë shumë njerëz, kam shërbyer në Kosovë para 15 viteve dhe më vjen shumë mirë kur e shoh sa ka përparuar Policia e Kosovës gjatë këtyre viteve. Profesionalizmi dhe guximi i Policisë së Kosovës janë më se të ditura.

Po ashtu, dëshiroj të vë në pah komentet e Drejtorit të Përgjithshëm për përkushtimin e organizatës për të ndërtuar forcë policore shumetnike. Unë besoj se të keni forcë policore që i përfaqëson të gjithë qytetarët e një vendi është jetike për zhvillimin e shoqërisë, si dhe për qëllimet specifike të policisë për luftimin e krimit. Dëshiroj t’ju nxis të vazhdoni në këtë drejtim.

Ti kthehemi tani temës së punëtorisë: “Përdorimi i teknologjisë për qëllime terroriste”. Ju faleminderit edhe njëherë për mundësinë për të folur sot.

Shtetet e Bashkuara të Amerikës mbesin të përqendruara për promovimin e sundimit të ligjit dhe të sigurisë rajonale. Si pjesë e këtij qëllimi, jemi duke mbajtur këtë program me vlerë 1.4 milionë dollarë për trajnim dhe asistencë kundër terrorizmit për mbështetjen e këtyre përpjekjeve në Kosovë. Na vjen jashtëzakonisht mirë që po i shohim pjesëtarët e palodhshëm të Policisë së Kosovës, prokurorët dhe gjyqtarët duke e ndjekur këtë kurs dyditor dhe njërin ndër shtatë kurset e sponsorizuara nga ATA.

Ambasada është krenare për bashkëpunimin për këtë trajnim dyditor, i cili iu jep udhëheqësve kornizën organizative dhe politikat që mund të shqyrtohen gjatë hetimit dhe ndjekjes penale të terroristëve. Kjo është ngjarje e rëndësishme për sundimin e ligjit dhe sigurinë rajonale.

Askush, asnjë vend nuk është imun nga terrorizmi. Institucionet e Kosovës kanë kryer punë mbresëlënëse në vitin 2016 për të penguar një sulm të planifikuar gjatë ndeshjes së futbollit Shqipëri-Izrael, duke përdorur dronët për të bartur dhe shpërthyer eksplozivin. Në maj të vitit të shkuar, tetë qytetarët të Kosovës janë dënuar pas akuzave për terrorizëm për rolin e tyre në këtë tentim të sulmit.

Para dy javëve, Policia e Kosovës ka arrestuar një individ për kërcënim ndaj kryeministrit Haradinaj përmes rrjeteve sociale dhe internetit. Këta shembuj tregojnë rritjen e hatashme në zhvillimin e aftësive dhe angazhimin me partnerët rajonalë dhe ne shpresojmë që do të vazhdojmë ta ndihmojmë Policinë e Kosovës për të vazhduar këto suksese.

Mentorët dhe instruktorët me përvojë të zbatimit të ligjit: Xhim Ficsimons (Jim Fitzsimmons), Majk MekTavish (Mike McTavish), Art Ihuan (Art Ehuan) dhe Shon Flëri (Shawn Fleury) kanë ekspertizën dhe shkathtësitë e duhura për të bartur njohurinë dhe për të trajnuar zyrtarët e Qeverisë së Kosovës. Përderisa Jim-i dhe Mike-u tashmë po punojnë dhe po ndihmojnë Njësitin kundër terrorizmit të Policisë së Kosovës, këtë trajnim do ta udhëheqin Shoni dhe Arti. Jemi të bindur se kjo punëtori do të jetë edukative dhe e leverdishme për Qeverinë e Kosovës përderisa teknologjia vazhdon të luajë rol jetik në veprimtaritë terroriste.

Më lejoni ta mbylli fjalën time duke ju falënderuar edhe njëherë për mundësinë për të folur sot para jush. Shpresojmë që do të vazhdojmë angazhimin dhe bashkëpunimin me ju për këto çështje. Policisë së Kosovës i uroj suksese të mëtejme përderisa vazhdon të ndërtojë namin si njëra ndër organizatat më të mira të policisë në Evropë.

Ju faleminderit.

PRESIDENTI IBRAHIM RUGOVA NUK E HUMBI ASNJËHERË RRUGËN DREJT PAVARËSISË*

January 29, 2019 by dgreca

Nga Frank Shkreli/

Në Janar të vitit 2009, komuniteti shqiptaro-amerikan organizoi një akademi përkujtimore me rastin e 3-vjetorit të vdekjes së Presidentit të parë të Republikës së Kosovës, Dr. Ibrahim Rugovës. Këtë muaj u bënë 13 vjetë nga ndarja prej kësaj jetë e Presidentit Rugova. Me këtë rast e kujtojmë këtë burrështeti me fjalën e mbajtur në akademinë pëkujtimore mbajtur me 17 Janar, 2009, në universitetin e njohur amerikan, Fordham të Nju Jork-ut:

“Presidentin Ibrahim Rugova e kujtojmë si diellin që gjatë viteve të kalvarit të Kosovës nuk e humbi kurrë rrugën drejt objektivit të tij, për një Kosovë të lirë e të pavarur, as nepër vranësitë më të errëta të jetës kombëtare, politike dhe shoqërore të vendit të tij.

Presidenti Rugova na la në kohën kur Kosova dhe Kombi ynë kishin më së shumti nevojë për një njeri si ai, për një hov të pashterrshëm të ndjenjave për atdhedashuri dhe të vlerave tona kombëtare.

Unë kam pasur privilegjin ta njihja Presidentin Rugova, si njeriu i cili megjithë qenjen e tij qëndronte kundër atyre që mohonin traditat tona më të shëndosha dhe kundër sistemit komunist, që për pothuaj 50-vjetë u përpoq të shlyente të gjitha virtytet tona stërgjyshore, në favor të një ideologjie sllavo-aziatike.Disa thonë fati, por unë them ishte Perëndia që përcaktoi Ibrahim Rugovën të jetonte në një periudhë historike për Kombin tonë, kur kënaqjet ishin të paka dhe mjerimet të shumta. Kjo periudhë historike kërkonte guxim e vendosmëri – bërtiste për një udhëheqës ndryshe për shqiptarët. Presidenti Rugova shpesh thonte se gjatë historisë, Kombi ynë ka patur shumë dështime megjithë përpjekjet e mëdha dhe flijimet e patriotëve shqiptarë që nga periudha e Gjergj Kastriotit-Skendërbeut e deri tek rilindasit në fillim të shekullit të kaluar. Megjithë këtë histori dhe vuajtjet personale dhe familjare, Dr. Ibrahim Rugova asnjëherë nuk u dmeoralizua as nuk ndërpreu përpjekjet e tija, por përdori çdo rast, sidomos me të huajt, të lartësonte emrin e Kombit shqiptar dhe të Dardanisë së tij të dashur, duke ndërkombëtarizuar njëkohësisht edhe çështjen e Kosovës dhe vuajtjet e shqiptarëve nga një shtet terrorist.

Ai ishte i bindur në drejtësinë e kërkesave të shqiptarëve të Kosovës dhe nuk kurseu asgjë për të siguruar sigurinë, paqën dhe një jetë më të mirë dhe në liri për popullin e vet.Ç’prej se e kam njohur Ibrahim Rugovën – në fund të viteve 80-ta të shekullit të kaluar, ai asnjëherë nuk u lëkund nga vija e drejtë e shqiptarizmit dhe as nga ideali, përpjekjet e tija dhe as nga bindja e tij se me ndihmën e miqëve tanë perëndimorë, Kosova, më në fund, do të çlirohej nga zgjedha serbe dhe se më në fund do të fitonte lirinë dhe do të siguronte pavarësinë. E kishte shumë të qartë objektivin përfundimtar, si dhe mënyrën për realizimin e këtij objektivi.

Presidenti i parë i Kosovës, Ibrahim Rugova me diplomacinë e tij personale – që në të vërtetë filloi me vizitën e tij të parë në Shtetet e Bashkuara në vitin 1989, e që mund të konsiderohet gjithashtu edhe si zanafilla e diplomacisë moderne të shtetit të Kosovës – ishte një testament para botës, sidomos asaj perëndimore, e cila nuk na njihte vetëm ndoshta si “rebela” – se Ibrahim Rugova në të vërtetë rrjedhte nga një familje dhe nga popull që mendjen, zemren dhe karakterin e tij ia brumosën në frymën e idealeve të burrënisë e të nderit dhe të traditave shekullore të shqiptarit.

Presidenti Rugova vinte nga bjeshkët shqiptare, nga atje ku zanat e malit ruajnë sekretet e thelbit etnik të racës sonë, të një race që si e tillë ka siguruar të drejtën që madhështia e veprës së tij të këndohet me lahutë, si kalorës kreshnik i lirisë dhe i pavarësisë së Kosovës — si shtet i ri dhe i pavarur.

Megjith pështjellimet politike, pasionet e përkundërta dhe grindjet politike të botës së vogël shqiptare madje edhe në periudhën post-komuniste, gjatë gjithë kohës që e njoha, Presidenti Rugova i mbante sytë drejt vlerave kombëtare si baza për realizimin e objektivave afat-gjata. Ai i kishte sytë ngulur në epopenë e Lahutës së At Gjergj Fishtës, në thjeshtësinë burrënore të Bajram Currit dhe në politikën largpamëse të Luigj Gurakuqit, për arritjen e lirisë dhe të pavarësisë së Kosovës.

Fatkeqësisht, ai vdiq pa qenë dëshmitar i shpalljes dhe i njohjes zyrtare të pavarësisë së Kosovës nga shumë vende të botës, e sidomos nga Shtetet e Bashkuara të Amerikës, për të cilat kurdoherë që fliste për Amerikën e përfundote me fjalët, “Zoti e bekoftë Amerikën” dhe në “Miqësi të përhershme me Shtetet e Bashkuara”. Por epopeja e tij nuk vdiq me të. Ai është duke lëshuar dritë përherë e më tepër, duke lulëzuar e duke dhënë fryte agimesh të reja e fatlume për Kosovën dhe për mbarë Kombin shqiptar.

Ndoshta duket si e rastësishme që disa organizata në Shqipëri – në bashkpunim me ambasadën gjermane në Tiranë kanë shpallur ditën e sotëme, 17 Janarin, si Ditë Lutjeje dhe Reflektimi Kombëtar, me qëllim për të nxitur mirëbesimin dhe bashkpunimin midis qytetarëve dhe politikanëve. Pas realizimit të madh dhe historik kombëtar — dmth pavarësisë së Kosovës — i ndjeri President Ibrahim Rugova – në këtë ditë përkujtimore — do na këshillonte se nëqoftse dëshironi të kujtoni mua dhe veprën time, atëherë ju lutem promovoni bashkpunimin midis shqiptarëve për të mirën e përbashkët, duke venë mbi të gjitha interesin kombëtar mbi atë partiak dhe interesin publik mbi atë personal.

I përjetëshëm qoftë kujtimi i tij!

*Fjala e mbajtur nga ish-Shefi i Drejtorisë për Evropën në Zërin e Amerikës, Frank Shkreli me 17 Janar, 2009 në akademinë përkujtimore, në 3-vjetorin e vdekjes të Dr. Ibrahim Rugovës, në Universitetin e njohur amerikan, Fordham të Nju Jork-ut.

KRYEMINISTRI HARADINAJ U SHKRUAN KRYEMINISTRAVE TË BOTËS

January 29, 2019 by dgreca

– Kryeministri Ramush Haradinaj: Dialogu Kosovë-Serbi është dialog mes dy shteteve sovrane dhe për subjekt nuk e ka statusin final të Kosovës, por normalizimin e raporteve Kosovë-Serbi, me njohje reciproke/

-Letër edhe ambasadorëve ambasadorëve të Quint-it dhe përfaqësueses së Bashkimit Evropian në Kosovë, ku ka shkruar edhe për atë se kur do pezullohej taksa 100% për mallrat nga Serbia dhe Bosnja/

-. Shtetet e Bashkuara të Amerikës (SHBA) dhe Bashkimi Evropian (BE), pas marrjes së hapave praktik për inicimin dhe mbështetjen e një konference ndërkombëtare (“Konferenca”) me qëllim të arritjes së një marrëveshje gjithëpërfshirëse dhe ligjërisht të detyrueshme ndërmjet Kosovës dhe Serbisë…/

Gazeta DIELLI nga korrespondenti në Kosovë Behlul Jashari
PRISHTINË, 29 Janar 2019/ Kryeministri i Republikës së Kosovës, Ramush Haradinaj bën të ditur se, mëngjesin e sotëm, u ka dërguar letër shpjeguese të gjithë kryeministrave të botës, me anë të së cilës u kam shpjeguar natyrën e dialogut Kosovë-Serbi.

“Dialogu Kosovë-Serbi është dialog mes dy shteteve sovrane dhe për subjekt nuk e ka statusin final të Kosovës, por normalizimin e raporteve Kosovë-Serbi, me njohje reciproke.

Me anë të këtij sqarimi dhe qëndrimi, synojmë t’i japim fund propagandës serbe se statusi dhe territori i Kosovës është ende në tavolinë.

Kosova e ka përmbyllur shtetësinë e saj më 17 shkurt 2008”, shprehet Kryeministri Haradinaj.

Kryeministri i Kosovës, Ramush Haradinaj dje u ka dërguar poashtu letër ambasadorëve të Quint-it dhe përfaqësueses së Bashkimit Evropian në Kosovë, ku ka shkruar edhe për atë se kur do pezullohej taksa 100% për mallrat nga Serbia dhe Bosnja.

Kjo u bë e ditur në njoftimin e dërguar nga Qeveria e Kosovës mbrëmjen e djeshme.

Letra e Kryeministrit Haradinaj dërguar ambasadorëve të Quint-it dhe përfaqësueses së BE-së në Kosovë është kjo:Pas marrjes së vendimit të Gjykatës Ndërkombëtare të Drejtësisë (GJND-së) se shpallja e pavarësisë nga ana e Kosovës në vitin 2008 nuk ishte e paligjshme, Asambleja e Përgjithshme e OKB-së miratoi Rezolutën nr. 64/298 (2010), e cila njohu përmbajtjen e Opinionit të GJND-së dhe mirëpriti “gatishmërinë e Bashkimit Evropian për të lehtësuar procesin e dialogut ndërmjet palëve”.

Ne kemi bindje të thelle që mund të arrihet në vitin 2019 një marrëveshje gjithëpërfshirëse dhe ligjërisht e detyrueshme ndërmjet Kosovës dhe Serbisë, e cila do t’i adresojë të gjitha çështjet e pazgjidhura, duke përfshirë reparacionet e luftës, të drejtat e minoriteteve në të dyja vendet, si dhe çështjet e ndryshme ekonomike, sociale dhe kulturore – duke shpjer në njohjen e ndërsjellë dhe anëtarësimin e Kosovës në Organizatën e Kombeve të Bashkuara.
Më 21 nëntor 2018, Qeveria e Kosovës vendosi një taksë prej 100% (‘taksa’) mbi importin e mallrave me origjinë nga Serbia si dhe nga Bosnja dhe Hercegovina.
Taksa ka ardhur si përgjigje ndaj shkeljeve të vazhdueshme të Marrëveshjes për Tregti të Lirë me Evropën Qendrore (CEFTA) dhe akteve të vazhdueshme të agresionit që kanë për qëllim dëmtimin e shtetit të Kosovës.
Qeveria e Kosovës do të pezullojë menjëherë tarifën në rast se plotësohen rrethanat e mëposhtme:
1. Shtetet e Bashkuara të Amerikës (SHBA) dhe Bashkimi Evropian (BE), pas marrjes së hapave praktik për inicimin dhe mbështetjen e një konference ndërkombëtare (“Konferenca”) me qëllim të arritjes së një marrëveshje gjithëpërfshirëse dhe ligjërisht të detyrueshme ndërmjet Kosovës dhe Serbisë për zgjidhjen e të gjitha çështjeve të pazgjidhura ndërmjet dy vendeve – konferenca duhet të fillojë sa më parë që është e mundur pas plotësimit të rrethanave të përshkruara në paragrafët 2 deri në 5 më poshtë dhe duhet të përfundojë brenda 14 ditëve:
2. SHBA-të dhe BE-ja do të japin zotime publike dhe do të garantojnë që në Konferencë nuk do të ketë:

(i) Çfarëdo rivendosje të kufijve ekzistues të Kosovës, ose ndarje të Kosovës, ose shkëmbime territoriale të çfarëdo natyre.
(ii) Dhënie të kompetencave ekzekutive të çfarëdo forme për asociacionin e komunave serbe në Kosovë ose ndonjë marrëveshje tjetër që është në kundërshtim me Kushtetutën e Kosovës.
(iii) Masa të çfarëdo natyre të bazuar në koncesione që shkojnë para datës 17 shkurt 2008.

BE-ja do të jep zotime shtesë publike dhe do të garanton se:
(i) Do të hyj në fuqi liberalizimi i vizave për qytetarët e Republikës së Kosovës para fillimit të Konferencës.
(ii) Do të zbatohet dhe do të jetë plotësisht funksionale Marrëveshja për Energji e arritur në Bruksel ndërmjet Kosovës dhe Serbisë para fillimit të Konferencës.
Është verifikuar se Serbia ka larguar të gjitha barrierat jo-tarifore të shkaktuara ndaj lëvizjes së mallrave nga Kosova, si dhe të gjitha kufizimeve të paligjshme në tregtinë e shërbimeve dhe lëvizjen e njerëzve nga Kosova në Serbi.
5. Presidenti, Kryeministri ose Ministri i Punëve të Jashtme të Serbisë konfirmojnë publikisht se janë ndaluar në mënyrë permanente të gjitha politikat dhe veprimet e çfarëdo lloji të drejtuara kundër aspiratave të Kosovës si shtet sovran qoftë nëse ato aplikohen në nivel lokal, rajonal apo ndërkombëtar.
Tarifa do të ri-vendoset menjëherë nëse Konferenca nuk përfundon me një marrëveshje gjithëpërfshirëse të detyrueshme mes Kosovës dhe Serbisë, e cila siguron, ndër të tjera, njohjen reciproke dhe anëtarësimin e Kosovës në Organizatën e Kombeve të Bashkuara. Tarifa do të ri-vendoset në një datë të mëvonshme nëse nuk arrihet të zbatohet marrëveshja gjithëpërfshirëse e detyrueshme e arritur në Konferencë.

***

Following the ruling of the International Court of Justice (ICJ) that Kosovo’s Declaration of Independence in 2008 was not unlawful, the UN General Assembly adopted Resolution 64/298 (2010), which acknowledged the content of the ICJ opinion and welcomed ‘the readiness of the European Union to facilitate a process of dialogue between the parties’.

It is our strongly held view that a comprehensive and legally binding agreement between Kosovo and Serbia can be concluded in 2019, which will address all outstanding issues including war reparations, the rights of minorities in both countries, as well as various economic, social and cultural matters – leading to mutual recognition and Kosovo’s membership of the United Nations.

On 21st November 2018 the Government of Kosovo imposed a tariff of 100% (‘the Tariff’) on the importation of goods originating in Serbia and Bosnia & Herzegovina. The tariff is a response to continuing and persistent violation of the Central European Free Trade Agreement (CEFTA) and continuing and persistent acts of aggression intended to undermine the state of Kosovo.

The Government of Kosovo will suspend the tariff immediately on the coming into existence of all of the following circumstances:

The United States of America (USA) and the European Union (EU) having taken practical steps to initiate and support an international conference (‘the Conference’) for the purpose of concluding a legally binding comprehensive agreement between Kosovo and Serbia to resolve all outstanding issues between the two countries – the conference to commence at the earliest practical date following the coming into existence of the all of the circumstances described in paragraphs 2 to 5 below, and to conclude within 14 days:

The USA and the EU having given public commitments and assurances that the Conference will not countenance:

Any redrawing of the current borders of Kosovo, or partition of Kosovo, or land swaps of any nature whatsoever.
The granting of executive powers to any form of association of Serb Municipalities in Kosovo or any other arrangement that violates the Constitution of Kosovo.
Measures of any nature based on concessions that pre-date 17th February 2008.

The EU having given additional public commitments and assurances that:

A visa free travel regime for citizens of the Republic of Kosovo will be in force prior to the commencement of the Conference.
The Energy Agreement concluded in Brussels between Kosovo and Serbia on shall be implemented and fully operational prior to the commencement of the Conference. Serbia having verifiably removed all non-tariff barriers imposed on the movement of goods from Kosovo as well as all unlawful restrictions on trade in services and movements of people from Kosovo to Serbia.

The Serbian President, Prime-Minister or Foreign Minister having publicly confirmed that all policies and actions of any nature directed against the aspirations of Kosovo as a sovereign state whether applying locally, regionally or internationally have ceased permanently.

The Tariff will be immediately re-imposed if the Conference does not conclude with a binding comprehensive agreement between Kosovo and Serbia which provides, inter alia, for mutual recognition and for Kosovo’s membership of the United Nations. The Tariff will be re-imposed at a later date if there is failure of implementation of a binding comprehensive agreement arising from the Conference.

FUSHATA E DIELLIT- Dr. PASHKO CAMAJ $300, FRANK SHKRELI $200

January 29, 2019 by dgreca

PASHKO CAMAJ ($300.00) DHE GAZETARI FRANK SHKRELI ($200.00)IU BASHKUAN FUSHATES SE DHURUESEVE TE GAZETES DIELLI/

Dr. Pashko Camaj, shefi I Kabinetit te Kryetarit te Vatres u bashkohet dhuruesve te fushates per 110 vjetorin e Gazetes”DIELLI” duke dhuruar $300.00. Edhe gazetari Frank Shkreli iu bashkua dhurueseve me $200.00.

***FUSHATA E 110 VJETORIT TË GAZETËS “DIELLI” MERR PËRKRAHJET E PARA

– Ja dhuruesit e rinj: Ambasador Mal Berish $ 200.00, Gazetari Sinan Kamberaj $200.00, Anëtari i kryesisë Marjan Cubi $300.00. Alfons Grishaj $250.00, Mondi Rakaj $250,Uka Gjonbalaj $200.00, Asllan Bushati $200.00.
Bashkatdhetarë, doni të dhuroni?
Dërgoni një Chek (Pay to: VATRA- Memo-110 vjetori i Diellit) ose Money Order në adresën:
VATRA
2437 Southern BLVD
BRONX, NY 10458
I falenderojmë dhuruesit e deritanishëm.
Përsërisim thirrjen e Editorit të ditës së enjte, 24 Janar 2019:

***
VATRANË, FUSHATA PËR DIELLIN FILLOI

– NËNKRYETARI Z. AGIM REXHAJ JU FTON NË GARË DUKE PRIRË ME $500.00!

– GARA NISI ME DHURIMET E PARA: MARJANA BULKU $200.00, NAZO VELIU $200.00, AGIM REXHAJ $500.00, DALIP GRECA $200.00-GARA ËSHTË E HAPUR!
Të Enjten në mbrëmje,24 Janar 2019, gjatë takimit të Kryesisë, ku u miratua programi për festimin e 110 Vjetorit të Gazetës”DIELLI”, Editori njoftoi hapjen e Fushatës. E para që iu përgjigj thirrjes ishte anëtarja e Kryesisë së Vatrës zonja, Marjana Bulku me $ 200.00(dyqind dollarë).Menjëherë iu përgjigj sekretarja e Vatrës zonja Nazo Veliu po me $200.00.
Nënkryetari i Vatrës, z. Agim Rexhaj e mbështeti garën, duke prirë, dhuroi $500.00. Në mbyllje të celjes simbolike të fushatës, Editori dhuroi $ 200.00. Gara mbetet e hapur!
Vatranë; është radha juaj të tregoni bujarinë dhe frymën vatrane. Dielli ka 110 vjet që mbahet me dhurime të nxitura nga fryma vatrane dhe shpirti bujar i shqiptarëve të Amerikës.Le të vedosim të gjithë nga një gur në kështjellën e shqiptarizmës këtu në Shtetet e Bashkuara të Amerikës dhe në Kanada, Kështjellën me emrin e bukur VATRA & DIELLI. Secili kontribuon me aq sa mundet, por gur -gur bëhet kalaja. Kështu e kanë mbajtë Kështjellën e shqiptarizmës vatranët këtu në Shtetet e Bashkuara të Amerikës.
Drejtues dhe Kryesi të Degëve të Vatrës
Vihuni në krye të degëve dhe kontribuoni në këtë fushatë që synon të përballojë veprimtaritë kushtuar 110 vjetorit të DIELLIT dhe Konsolidimin në këtë shekull të dytë të gazetës tonë të dashur.
Ju të zgjedhur në strukturat e Vatrës, tregojeni me vepra se dini t’u prini fushatave të Vatrës. Është koha të kryeni obligimet tuaja!
Ju biznesmenë, që ju karakterizon shpirti i patriotizmit, mbështetni gazetën, që ka regjistruar 110 vite jetë të Kombit tonë. DHURONI!
Për ju miq të Diellit dhe të Vatrës, që keni dëshirë të përfshiheni në fushatën tonë, dërgoni një Chek (Pay to: VATRA- Memo-110 vjetori i Diellit) ose Money Order në adresën:
VATRA
2437 Southern BLVD
BRONX, NY 10458