dgreca – Page 1625 – Dielli

Kryepeshkopi Janullatos bëhet shqiptar- Ia patën refuzuar 4 presidentë

December 24, 2017 by dgreca

Presidenti Meta i jep shtetësinë shqiptare kryepeshkopit Anastas Janullatos/

Presidenti Ilir Meta i ka dhënë shtetësinë shqiptare kryepeshkopit të Kishës Ortodokse Autoqefale Shqiptare, Anastas Janullatos. Lajmi është konfirmuar nga zëdhënësi i president Tedi Blushi.Më herët shtetësia i është refuzuar nga presidenti Rexhep Meidani, Alfred Moisiu, Bamir Topi dhe Bujar Nishani. Në një intervistë tre ditë më parë për një televizion grek, kryepeshkopi Janullatos tha se pas largimit të tij, në krye të Kishës Ortodokse Autoqefale Shqiptare duhet të jetë patjetër një shqiptar dhe jo një shtetas grek. Po ashtu dhe me anë të një postimi në Facebook, Meta shpreh falenderim për peshkopinm dhe ka bërë publik vendimin e tij. Postimi i Metës Të dashur miq, Në vigjilje të Krishtlindjeve, kam kënaqësinë të bëj publik vendimin tim për t’i dhënë shtetësinë shqiptare Kryepeshkopit të Tiranës, Durrësit dhe gjithë Shqipërisë, Fortlumturisë së Tij, Anastas Jannullatos. Kontributi dhe përkushtimi i tij në 25 vite i ka shërbyer jo vetëm ringritjes kanonike dhe shpirtërore të Kishës Ortodokse Autoqefale të Shqipërisë dhe arsimimit e përgatitjes së brezit të ri të klerikëve shqiptarë por edhe afirmimit ndërkombëtar dhe njohjes së Kishës Ortodokse Autoqefale të Shqipërisë kudo në botë. Fortlumturia e Tij ka dhënë, në bashkëpunim të ngushtë me udhëheqësit e tjerë të besimeve fetare në Shqipëri, një kontribut të jashtëzakonshëm në forcimin e harmonisë, tolerancës dhe bashkëjetesës ndër-fetare, kësaj pasurie kombëtare të popullit tonë. Bekuar qoftë harmonia dhe bashkëjetesa fetare mes shqiptarëve!

Presidenti i Kosovës në 2017-tën dy vizita në Amerikë

December 24, 2017 by dgreca

-Presidenti i Kosovës, Thaçi: Vitin 2017 e fillova me vizitë në SHBA dhe takim me Zëvendëspresidentin e atëhershëm Biden, ndërsa e vazhdova me vizitën tjetër në SHBA në shtator, duke takuar Zëvendëspresidentin e tashëm Pence/

-Kosova në prag të 10-vjetorit të Pavarësisë me 115 njohje nga shtetet anëtare të OKB-së. 2017-ta vit i suksesit për Kosovën, 2018-ta i lëvizjes më të shpejtë në perspektivën europiane e euroatlantike/

-Adresime të fundvitit të Presidentit të Republikës në Kuvendin e Kosovës, edhe në takim me median, ku ishte i ftuar korrespondenti i akredituar i Gazetës DIELLI – organ i Federatës Pan-Shqiptare të Amerikës VATRA/

–The President calls for political and civic unity during 2018/

SPECIALE-Gazeta DIELLI nga korrespondenti në Kosovë Behlul JASHARI/

PRISHTINË, 22 Dhjetor 2017/ Presidenti i Republikës së Kosovës, Hashim Thaçi, në fjalimin e fundvitit në Kuvendin e Republikës së Kosovës tha se 2017-tën e nisi me vizitën në Shtetet e Bashkuara të Amerikës, ku përsëri ishte në të dytën vizitë brenda një viti, në shtator.“Vitin 2017 e fillova me vizitë në SHBA dhe takim me Zëvendëspresidentin e atëhershëm Biden, ndërsa e vazhdova me vizitën tjetër në SHBA në shtator, duke takuar Zëvendëspresidentin e tashëm Pence”, theksoi Presidenti i Kosovës. Këto dy vizita, vijoi ai, kanë konfirmuar edhe një herë se Shtetet e Bashkuara të Amerikës mbesin partner i Republikës së Kosovës dhe se Uashingtoni mbetet i përkushtuar për paqen dhe stabilitetin e qëndrueshëm në Kosovë dhe në rajon.“Por, pjesë e këtij partneriteti është edhe përgjegjësia jonë që të sillemi si shoqëri dhe si shtet i pjekur politikisht, i gatshëm të luajë rol konstruktiv në rajon dhe më gjerë, duke ndërtuar marrëdhënie të mira fqinjësore me të gjitha shtetet e rajonit”, tha Thaçi.

Presidenti i Kosovës shtoi se gjatë këtij viti ka realizuar vizita bilaterale dhe ka marrë pjesë në forume dhe konferenca të ndryshme.“Me ketë rast, dua të veçoj edhe vizitat bilaterale në Kanada, Kroaci e Turqi.Kam takuar Presidentin e Bullgarisë në Sofje, Presidentin e Austrisë në Vjenë dhe Mbretin Abdullah në Aman.Jam nderuar me audiencë tek Ati i Shenjtë, Papa Françesku.Kam përfaqësuar Kosovën në Konferencën e Sigurisë në Munih të Gjermanisë, në Forumin Ekonomik Ndërkombëtar në Jordani, në Konferencën Ndërkombëtare të Sigurisë në Halifax, në Forumin e Kroacisë dhe në Samitin Bërdo-Brione, etj.”, tha presidenti kosovar.Në këto forume, theksoio Thaçi, ndër të tjera me krenari kam prezantuar transformimin e Kosovës nga një konsumues i mekanizmave të paqes e sigurisë në një promovues dhe kontribuues të paqes dhe bashkëjetesës në mes të popujve.“Kjo ka forcuar bindjen në botë se pavarësia e Kosovës ka sjellë paqe të qëndrueshme në tërë Evropën Juglindore”, tha Thaçi.Ai vlerësoi se, viti 2017 ishte vit i të arriturave përkundër shumë sfidave. “Kemi kaluar dy palë zgjedhje, ato të përgjithshmet në qershor dhe ato për kuvende komunale e kryetarë komunash në tetor. Këto dy procese elektorale kanë dëshmuar edhe një herë pjekurinë e politikës dhe shoqërisë kosovare në përgjithësi. Kjo i ka hapur rrugë formimit të qeverisë së re, kuvendeve të reja komunale dhe zgjedhjes së kryetarëve të rinj të komunave të Kosovës. Qytetarët e Republikës së Kosovës kanë treguar qartë se duan të shohin liderët e tyre të zgjedhur politikë të bashkuar në të gjitha çështjet e interesit nacional dhe shtetëror”, tha presidenti Thaçi.

Ai ka paralajmëruar se edhe në të ardhmen do ta përcjellë me vëmendje punën e institucioneve shtetërore në përmbushjen e aspiratave dhe synimeve të qytetarëve të Republikës së Kosovës.“Prandaj, uroj që të na prijë e mbara në realizimin e qëllimeve tona të mira në shërbim të qytetarëve dhe shtetit tonë. Le të jetë viti 2018, vit i unitetit politik e qytetar të Kosovës”, është shprehur presidenti i Republikës.Edhe në takimin me median, presidenti Hashim Thaçi vlerësoi se 2017-ta është vit i suksesit për Kosovën dhe shprehu besimin se 2018-ta e jubileut të 10 vjetorit të pavarësisë do jetë i lëvizjes më të shpejtë drejt perspektivës europiane e euroatlantike. Presidenti Thaçi në adresimet e fundvitit në mbrëmjen e djeshme kishte edhe një bashkëbisedim me gazetarët e ftuar-të akredituar, mes të cilëve korrespondenti i Gazetës DIELLI, ku theksoi se Kosova e përmbyll këtë vit me arritjen në 115 të numrit të njohjeve të pavarësisë dhe me anëtarësime të reja në organizata ndërkombëtare.

“2017-ta është për t’u vlerësuar edhe si vit i vazhdimit të thellimit të reformave demokratike nga institucionet e vendit, në ekonomi, në politikë, edhe në legjislacion”, u shpreh ai, duke theksuar edhe rritjen ekonomike prej 4 për qind.Ky vit, vijoi presidenti i Kosovës, ishte i sukseshsëm edhe për organizimin e dy palë zgjedhjeve, të përgjithëshme dhe lokale, të lira dhe demkratike e në një proces transparent.“Kosova do hyjë edhe në vitin e ri 2018 me axhenda dhe proritete të qarta për konsolidimin e brendshëm dhe të jashtëm të shtetit”, tha presidenti Thaçi duke theksuar edhe pritjen për liberalizim vizash, e më parë kalimin në Kuvend të marrëveshjes për demarkacionin.Një adresim fundviti presidenti Thaçi e kishte edhe në 5 dhjetor para pjesëtarëve të Forcës së Sigurisë së Kosovës, ku ka theksuar se e ardhmja e vendit që po mbushë 10 vite pavarësi “është e natyrshme dhe e sigurt në kuadër të Bashkimit Evropian, NATO-s dhe OKB-së”.“Qëllimi ynë mbetet i qartë, të ndërtojmë një ardhmëri të Kosovës si një vend i lirë, demokratik dhe paqedashës, i cili do të jetë atdhe i të gjithë qytetarëve të saj”, është shprehur Thaçi.Presidenti ka theksuar se, “Republika e Kosovës si një vend i pavarur, sovran, demokratik, unik dhe i pandashëm, me përcaktim evropian dhe euroatlantik, duhet të jetë e pakontestuar dhe e integruar në familjen e kombeve botërore”.Thaçi ka paralajmëruar edhe se, “Kosova do të arrijë të përmbyllë me sukses periudhën e vuajtjeve dhe konfliktit me Serbinë, duke nënshkruar Traktatin e Paqes dhe Pajtimit”.Një nga mesazhet e presidentit ishte edhe se, “qytetarët e Republikës së Kosovës duan të shohin liderët e tyre të zgjedhur politikë të bashkuar në të gjitha çështjet e interesit nacional dhe shtetëror”.Në adresimin publik për qytetarë të bërë nga kazerma “Adem Jashari” e Forcës së Sigurisë së Kosovës, presidenti Thaçi ka thënë edhe se “Forcat e Armatosura të Kosovës po bëhen në koordinim të plotë me NATO-n dhe partnerët tanë”. “Ashtu siç krenohemi sot me Forcën e Sigurisë së Kosovës, ashtu do të krenohemi me të edhe si forcë shumetnike, profesionale dhe mbrojtëse”, është shprehur ai.Në 23 dhjetor 2016, në fjalimin fundvitit në Kuvendin e Kosovës, të parin si president Republike, Thaçi theksonte se, “këtë vit kemi vendosur marrëdhënie kontraktuale me BE-në dhe kemi nisur dialogun politik me NATO-n” dhe se, “janë këto dy pika të përcaktuara si qëllimet tonat dhe për këtë kemi konsensus të plotë politik dhe shoqëror”.

“Do të dëshironim që udhëtimi ynë drejt NATO-s e BE-së të jetë më i shpejtë”, shprehej presidenti i Kosovës.Në Vitin e Ri 2018 Kosova feston jubileun e 10 vjetorit të Pavarësisë së shpallur në 17 Shkurtin historik 2008, kur Deklaratën në seancën solemne e të jashtëzakonshme të Kuvendit e lexoi atëherë kryeministri Hashim Thaçi.

Prej atëherë, sipas Ministrisë së Punëve të Jashtme, Kosova është njohur nga 115 shtete anëtare të OKB-së, ka vendosur marrëdhënie diplomatike me 88 shtete, është anëtarësuar në më shumë se 60 organizata rajonale, evropiane dhe ndërkombëtare, ka hapur gati 40 misione diplomatike dhe poste konsullore dhe ka të akredituar ambasadorë jo-rezidentë në rreth 60 shtete.

Presidenti bën thirrje për unitetit politik e qytetar në vitin 2018-të

Prishtinë, 22 dhjetor 2017 – Presidenti i Republikës së Kosovës, Hashim Thaçi, sot ka mbajtur fjalimin e fundvitit në Kuvendin e Republikës së Kosovës.Në fjalën e tij para deputetëve, presidenti Thaçi ka renditur sukseset dhe sfidat që kanë karakterizuar vitin 2017.Kreu i shtetit ka thënë se prioritet yni i përbashkët mbetet gjithmonë angazhimi për përmirësimin e jetës së qytetarëve tanë.Ai ka thënë se qytetarët e Republikës së Kosovës kanë treguar qartë se duan të shohin liderët e tyre të zgjedhur politikë të bashkuar në të gjitha çështjet e interesit nacional dhe shtetëror.Presidenti Thaçi ka paralajmëruar se edhe në të ardhmen do ta përcjellë me vëmendje punën e institucioneve shtetërore në përmbushjen e aspiratave dhe synimeve të qytetarëve të Republikës së Kosovës.

Ky është fjalimi i plotë i presidentit Thaçi:

I nderuar Kryetar i Kuvendit të Kosovës,

I nderuar Kryeministër dhe Ministra të Qeverisë së Republikës së Kosovës,

Të nderuar ambasadorë dhe përfaqësues të misioneve ndërkombëtare,

Të nderuara deputete, të nderuar deputetë,

Të nderuar qytetarë Republikës së Kosovës,

Me lejoni që t’ju falënderoj juve të nderuar deputetë të Kuvendit të Republikës së Kosovës, që më keni dhënë këtë mundësi të raportoj përpara jush dhe qytetarëve tanë për punën time si President i Republikës së Kosovës, respektivisht për punën tonë të përbashkët në forcimin e shtetësisë së Kosovës.

Sigurisht, prioritet i ynë i përbashkët mbetet gjithmonë angazhimi për përmirësimin e jetës së qytetarëve tanë.Në kuadër të këtyre përpjekjeve, jam angazhuar për respektim dhe fuqizim të të drejtave të njeriut për secilin qytetar të Republikës së Kosovës.Duke filluar nga diskutimet për nevojën për përfaqësim të barabartë të gruas në të gjitha institucionet e deri te Parada e Nderit, e kam bërë të qartë se:Shteti i Kosovës, shoqëria kosovare, janë ndërtuar mbi parimet e lirisë dhe barazisë për secilin qytetar;

Kosova është shtet i të gjithë qytetarëve të saj dhe të gjithë duhet t’i gëzojnë të drejtat e barabarta në përpjekje për të realizuar aspiratat e tyre.

Kjo nënkupton, që ne duhet të sigurojmë prosperitet dhe dinjitet për secilin qytetar, qoftë për punëtorin, për pensionistin, mjekun, policin, ushtarin, për mësuesin, studentin apo nxënësit në shkolla.

Ne e dimë se për ta rritur mirëqenien e qytetarëve tanë, ne duhet ta zhvillojmë ekonominë tonë dhe ta rrisim prodhimtarinë vendore.

Në shërbim të këtij qëllimi, jam angazhuar në mënyrë aktive në promovimin e ekonomisë kosovare, të prodhimeve kosovare, në përfshirjen sa më të madhe të diasporës në investimet në Kosovë.Me konsolidimit e shtetit tonë, përkrahja e zhvillimit ekonomik të vendit ka filluar të marrë vend qendror në angazhimin tim si president, por edhe të institucioneve tjera të shtetit të Kosovës.Në koordinim me institucionet relevante, e kam përkrahur nënshkrimin e kontratës për projektin për Kosovën e Re, që sjellë investimin më të madh privat në historinë e Kosovës, me 1.3 miliardë euro investime e që do të hap mbi 10 mijë vende pune.

Përveç kësaj, unë vazhdoj të besoj se përmirësimi i infrastrukturës rrugore është kusht i domosdoshëm për zhvillim të qëndrueshëm ekonomik.Prandaj, kam përkrahur përfundimin e projekteve për autostrada që do të lidhin Kosovën me rajonin e më gjerë, duke u mundësuar lëvizje më të lirë njerëzve dhe mallrave.Sigurisht se sot ishte kënaqësi të inauguronim edhe segmentin e dytë të autostradës “Arbër Xhaferi”.

Të nderuar deputetë,

Qytetarë të Republikës së Kosovës,

Të gjithë jemi të vetëdijshëm se bazamenti kryesor i çdo shteti demokratik, duke përfshirë shtetin tonë, është sundimi i rendit dhe ligjit.

Asnjë fushë e shoqërisë sonë, nuk mund të jetë funksionale në rast se ne nuk e fuqizojmë sundimin e rendit e ligjit dhe në rast se ne dështojmë të garantojmë se të gjithë janë të barabartë para ligjit.

Me dekretimin e prokurorëve dhe gjyqtarëve nga komunitetet jo-shumicë, shumica nga të cilët punojnë në pjesën veriore të Kosovës, kemi shtrirë rendin kushtetues e ligjor të Kosovës në çdo cep të shtetit tonë.Për këtë qëllim, kam punuar me të gjitha institucionet e drejtësisë që të vazhdojmë reformën dhe konsolidimin e gjyqësorit për të garantuar që jo vetëm të kemi ligje të shkruara mirë, por edhe implementim të plotë të këtyre ligjeve.Lufta kundër krimit të organizuar, korrupsionit dhe terrorizmit janë dhe duhet të mbeten prioritete.Kosova nuk do të dorëzohet në përballje me këto sfida dhe nuk do të lejojmë që vendi ynë të perceptohet si i korruptuar.Heronjtë e sotëm janë ata që rreshtohen në luftë të pa kompromis kundër krimit të organizuar dhe korrupsionit.

Të nderuar deputetë,

Qytetarë të Republikës së Kosovës,

Zonja dhe zotërinj,

Viti 2017 ishte vit i të arriturave përkundër shumë sfidave.Kemi kaluar dy palë zgjedhje, ato të përgjithshmet në qershor dhe ato për kuvende komunale e kryetarë komunash në tetor.Këto dy procese elektorale kanë dëshmuar edhe një herë pjekurinë e politikës dhe shoqërisë kosovare në përgjithësi.Kjo i ka hapur rrugë formimit të qeverisë së re, kuvendeve të reja komunale dhe zgjedhjes së kryetarëve të rinj të komunave të Kosovës.Qeveria e Republikës së Kosovës dhe kryetarët e zgjedhur të komunave, tani duhet të punojnë me përkushtim për realizimin e prioriteteve të përcaktuara dhe ta përmirësojnë jetën e qytetarëve.Kur jemi tek zgjedhjet e lira, me lejoni të theksoj se unë nuk kam hequr dorë nga puna ime që të punojmë bashkërisht me partitë politike për të përfunduar me sukses procesin e reformës zgjedhore.

Unë konsideroj se pjesa më e madhe e punës në këtë drejtim ka përfunduar dhe gjatë vitit në vijim ne duhet ta përfundojmë këtë proces.Përkundër faktit se zgjedhjet qendrore dhe lokale kanë konsumuar shumë kohë dhe energji, prapëseprapë, si president në koordinim me institucionet tjera, kam vazhduar punën në realizimin e prioriteteve të rëndësisë shtetërore.Ndër prioritet kryesore në këtë aspekt ka qenë vazhdimi i punës për themelimin e Forcave të Armatosura të Kosovës.Ky është një proces shtetëror i natyrshëm dhe i domosdoshëm, i cili vjen edhe si rezultat i punës së pjesëtarëve të FSK-së, të cilët e kanë ngritur nivelin e përgatitjes dhe tani janë të gatshëm për detyra e kompetenca të reja.Forca e Sigurisë së Kosovës është forcë shumetnike në të cilën mbi 10 % e pjesëtarëve të saj vijnë nga komunitetet jo-shumicë.Forcat e Armatosura të Kosovës, po ashtu do ta ruajnë dhe fuqizojnë karakterin shumetnik.Tani jemi pothuajse në fazën përfundimtare të përpjekjeve tona për të siguruar përkrahjen që procesi i themelimit të FAK-ut të bëhet nëpërmjet ndryshimeve kushtetuese.Këtë jemi duke e bërë dhe do ta bëjmë në koordinim të plotë me NATO-n dhe partnerët e tjerë strategjikë.Unë sot ju siguroj se Kosova gjatë vitit 2018 do të ketë kapacitet e veta mbrojtëse, pra një ushtri moderne që do t’i kontribuojë paqes dhe stabilitetit në rajon dhe kudo në botë.Kur jemi te siguria e Kosovës, më lejoni të theksoj se jam krenar që shteti ynë është lider në rajon në luftimin e ekstremizmit, radikalizmit dhe terrorizmit.Ky përkushtim i ynë ka marrë mirënjohje nga të gjithë liderët e botës së lirë e demokratike.E shfrytëzoj këtë rast që të falënderoj të gjithë mekanizmat e sigurisë kombëtare që kanë kontribuar në ruajtjen e rendit dhe sigurisë në Kosovë, por edhe në rajon.

Të nderuar deputetë,

Të nderuar qytetarë të Kosovës,

E kaluara e jonë është e dhimbshme dhe kujtimet për vuajtjet tona ende mbeten të freskëta.Por, e kaluara e jonë është edhe ajo që na bën krenarë dhe na jep forcë për të shikuar me këmbëngulje nga e ardhmja.Për këtë qëllim, me përkushtim kam vazhduar punën për themelimin e Komisionit për të Vërtetën dhe Pajtimin, që synon të ndihmojë përpjekjet e shoqërisë sonë për mbylljen e kapitullit të luftës, të armiqësive dhe arritjen e pajtimit të ndërsjellë.Prandaj jam i lumtur që pas një pune të madhe, kemi arritur të themelojmë ekipin përgatitor për Komisionin për të Vërtetën dhe Pajtimin.Jam i sigurt se puna e këtij komisioni do të japë rezultate konkrete gjatë vitit 2018 dhe më këtë rast, dua të falënderoj organizatat e familjeve të të pagjeturve, shoqërinë civile dhe partnerët ndërkombëtarë për mbështetjen e tyre.Dialogu mbetet mekanizmi i vetëm dhe i pazëvendësueshëm për zgjidhjen e problemeve brenda shtetit tonë, por edhe me shtetet tona fqinje.

Në kuadër të angazhimit tim për ndërtimin e paqes së qëndrueshme në tërë Evropën Juglindore, është edhe përkushtimi i ynë i përbashkët në kuadër të dialogut për normalizimin e marrëdhënieve ndërmjet Republikës së Kosovës dhe Serbisë.Tani jemi gati për të vazhduar fazën përfundimtare të këtij procesi, i cili do të vazhdojë të ndërmjetësohet nga BE-ja dhe të përkrahet fuqishëm nga SHBA-ja.Sigurisht se kjo fazë përmbyllëse nuk do të jetë aspak e lehtë.Për ketë qëllim, kam filluar konsultat formale dhe jo formale me partitë politike dhe shoqërinë civile, me qëllim që të themelojmë një Grup të Unitetit për të siguruar gjithëpërfshirje në këtë proces.Unë edhe sot ju bëj thirrje publike që të jemi të bashkuar në këtë proces dhe në çdo proces tjetër që është me interes shtetëror.Sa herë jemi bashkuar, Kosova ka fituar dhe qytetarët tanë na kanë mbështetur.Kështu duhet të jetë përsëri, sepse e ardhmja e jonë, integrimi i shtetit tonë në strukturat veriatlantike, varet në masë të theksuar nga ky proces.Në çdo rrethanë, unë ju siguroj juve të nderuar deputetë dhe qytetarë të Republikës së Kosovës, se procesi i dialogut do të jetë transparent dhe se çdo marrëveshje e arritur, do të ratifikohet nga Kuvendi i Republikës së Kosovës.

Të nderuar deputetë,

Të nderuar qytetarë të Kosovës,

Kredibiliteti ynë shtetëror në arenën ndërkombëtare dhe shpejtësia me të cilën i afrohemi anëtarësimit në BE dhe NATO, varet kryesisht nga serioziteti ynë në përmbushjen e obligimeve tona shtetërore.Në këtë aspekt, ne nuk mundemi që në vazhdimësi të drejtojmë gishtin nga BE-ja, NATO-ja apo bashkësia ndërkombëtare duke kërkuar që t’i mbajmë ata fajtorë të vetëm për ngecjet tona.Ne duhet t’i pranojmë lëshimet tona dhe t’i përmirësojmë ato sa më shpejt që mundemi, sepse vetëm kështu mund ta zëmë hapin me shtetet fqinje në procesin e integrimeve euroatlantike.Prandaj, duhet ta ratifikojmë pa humbur kohë marrëveshjen për shënimin e vijës kufitare me Malin e Zi.

Ratifikimi i kësaj marrëveshje i jep fund izolimit të padrejtë të qytetarëve të Republikës së Kosovës.Janë inkurajuese bisedat e fundit që janë duke u zhvilluar në kuadër të institucioneve të Kosovës, të përfshirë të gjithë, edhe Kuvendi, edhe Qeveria dhe gjithë njerëzit vullnetmirë, ekspertë vendorë e ndërkombëtarë, që të gjendet një zgjidhje sa më shpejt që është e mundur, pra në javët e ardhshme.Duhet që pa humbur kohë të themelojmë Asociacionin e Komunave me shumicë serbe në përputhje me marrëveshjen e Brukselit dhe vendimin e Gjykatës Kushtetuese, sepse BE-ja dhe shumë shtete tjera partnere janë të zhgënjyera me paaftësinë tonë për të zbatuar zotimet e marra përsipër.Sa më shpejt përmbushim detyrat tona, aq më shpejt do të mund të bëjmë hapa seriozë drejt anëtarësimit në BE dhe NATO.Si President i Republikës së Kosovës i kam bërë thirrje vazhdimisht BE-së për veprime jo vetëm teknike, por mbi të gjitha strategjike për anëtarësimin e shteteve të Ballkanit Perëndimor në Bashkimin Evropian.Më vjen mirë që tani së fundmi edhe Bashkimi Evropian e thotë qartë se mënyra më e mirë për të siguruar paqen afatgjate në rajonin tonë është anëtarësimi i të gjitha shteteve të Ballkanit Perëndimor në BE.Unë vazhdoj të besoj se mënyra më e mirë është që të gjitha shtetet e Ballkanit Perëndimor të anëtarësohen në BE në të njëjtën kohë, pavarësisht faktit se disa shtete kanë bërë progres më të madh në përmbushjen e kritereve për anëtarësim.

Të nderuar deputetë,

Të nderuar qytetarë të Kosovës,

Një kohë të konsiderueshme të punës sime ia kam kushtuar edhe përpjekjeve për konsolidimin e shtetit të Kosovës në skenën ndërkombëtare.Vitin 2017 e fillova me vizitë në SHBA dhe takim me Zëvendëspresidentin e atëhershëm Biden, ndërsa e vazhdova me vizitën tjetër në SHBA në shtator, duke takuar Zëvendëspresidentin e tashëm Pence.Këto dy vizita kanë konfirmuar edhe një herë se Shtetet e Bashkuara të Amerikës mbesin partner i Republikës së Kosovës dhe se Uashingtoni mbetet i përkushtuar për paqen dhe stabilitetin e qëndrueshëm në Kosovë dhe në rajon.Por, pjesë e këtij partneriteti është edhe përgjegjësia jonë që të sillemi si shoqëri dhe si shtet i pjekur politikisht, i gatshëm të luajë rol konstruktiv në rajon dhe më gjerë, duke ndërtuar marrëdhënie të mira fqinjësore me të gjitha shtetet e rajonit.Gjatë këtij viti kam realizuar vizita bilaterale dhe kam marrë pjesë në forume dhe konferenca të ndryshme.

Me ketë rast, dua të veçoj edhe vizitat bilaterale në Kanada, Kroaci e Turqi.Kam takuar Presidentin e Bullgarisë në Sofje, Presidentin e Austrisë në Vjenë dhe Mbretin Abdullah në Aman.Jam nderuar me audiencë tek Ati i Shenjtë, Papa Françesku.Kam përfaqësuar Kosovën në Konferencën e Sigurisë në Munih të Gjermanisë, në Forumin Ekonomik Ndërkombëtar në Jordani, në Konferencën Ndërkombëtare të Sigurisë në Halifax, në Forumin e Kroacisë dhe në Samitin Bërdo-Brione, etj.Në këto forume, ndër të tjera me krenari kam prezantuar transformimin e Kosovës nga një konsumues i mekanizmave të paqes e sigurisë në një promovues dhe kontribuues të paqes dhe bashkëjetesës në mes të popujve.Kjo ka forcuar bindjen në botë se pavarësia e Kosovës ka sjellë paqe të qëndrueshme në tërë Evropën Juglindore.

Të nderuar deputetë,

Qytetarë të Republikës së Kosovës,

Qytetarët e Republikës së Kosovës kanë treguar qartë se duan të shohin liderët e tyre të zgjedhur politikë të bashkuar në të gjitha çështjet e interesit nacional dhe shtetëror.Prandaj është detyra e imja, detyra e juaja si deputetë, detyrë e të gjithë neve, që të punojmë pa u ndaluar për të mirën tonë të përgjithshme.Si President i Republikës së Kosovës do ta përcjell me vëmendje punën e institucioneve shtetërore në përmbushjen e aspiratave dhe synimeve të qytetarëve të Republikës së Kosovës.Prandaj, uroj që të na prijë e mbara në realizimin e qëllimeve tona të mira në shërbim të qytetarëve dhe shtetit tonë.Le të jetë viti 2018, vit i unitetit politik e qytetar të Kosovës.Në fund, pasi jemi në prag të festave të fundvitit, më lejoni t’ju uroj paqe, shëndet, gëzim e lumturi, juve dhe familjeve tuaja, çdo qytetari të Republikës së Kosovës. Për shumë mot, urimet më të mira për Kërshëndellat dhe gëzuar Vitin e Ri!

Shqipëria e viteve ‘90,Policia sekrete, çdo person i tretë, një spiun

December 24, 2017 by dgreca

1-gezim-llojdia

Nga Gëzim Llojdia/

1 Bujqesia soc 1.Në 14 Mars 1990 midis të tjerave “ Daily Telegraph” shkruante: “Shqipëria ka një performancë ekonomike të dobët, mungesë të stimujve, izolim ekonomik dhe politik dhe krenari kombëtare. Ka 45 vjet të sundimit totalitar pasi Enver Hoxha e tërhoqi vendin nga feudalizmi në komunizëm më 1946. Policia sekrete ,sigurimi – dhe çdo person i tretë se është një spiun i sigurimit.Vizionet e transmetuara nga Italia dhe Jugosllavia i bëjnë shumicën e shqiptarëve të vetëdijshëm për jetën e mirë vetëm përtej mundësive të tyre. Prodhimet e qumështit janë racionuar në një kilogram për familje në javë dhe ka një treg të zi të lulëzuar, që ka lidhje të thyera me Bashkimin Sovjetik dhe Kinën, nuk merr ndihmë të konsiderueshme ekonomike Po të mos ishte eksportimi i kromit, shteti do të falimentonte , Çeliku i çelikut Elbasan është ndoshta fabrika më e paefektshme e çelikut në botë, Shqipëria duket si një muze, një park tematik marksist-leninist, por shumica dërrmuese .Ka pasur një përçarje ideologjike me Moskën në vitin 1961, që kur ka pasur tre dekada të izolimit zyrtar, por Shqipëria nuk do të braktisë qeverisjen komuniste njëpartiake. Kushtetuta e vitit 1967 predikon vetëbesimin dhe ndalon kredinë e huaj, por ka shenja në rritje të problemeve serioze me ekonominë. Këto përfshijnë korrupsionin, mungesën e ushqimit dhe mallrave të konsumit, dhe rezistencën nga konservatorët në reformat e kujdesshme në shtetin më të varfër të Evropës. Fermat kolektive dhe politikat e shpërndarjes së ushqimit janë pothuajse në hije. Ushqimi është ende në furnizim të shkurtër dhe në vende ka shenja të kequshqyerjes në kufi me urinë. Shqipëria është më në kërkim të teknologjisë moderne dhe ka blerë kompjutera nga Greqia dhe pajisjet e mullirit të çelikut nga Suedia dhe Kanadaja. Lidhjet me Londrën janë pezulluar që nga fundosja e dy anijeve luftarake britanike në Kanalin e Korfuzit në vitin 1946. “

2.Sot takojmë në Aeroportin Heathroë të Londrës për fluturimin tonë në Titograd në Jugosllavi. Pas mbërritjes, ne shkojmë në kufi në Han i Hotit dhe në Shkodër, ku kalojmë natën.E diel 25 prill 990:U zgjova papritmas në kohë të ndritshme në orën 7 të mëngjesit. I rrëmbyer me një fëmijë (të quajtur Florentz.Ai më tregoi , së shpejti kishte një koleksion fëmijësh si Piper Piper. Fëmijët janë pak të çrregullt, por kurioz dhe miqësor. Të rriturit janë të dyshimtë dhe një prej tyre e qortoi Florentzin, ndoshta për miqësi me mua. Ata mësojnë frëngjisht më shumë se anglisht. Kishte turma të mëdha në Sheshin Qendror, pa makina në rrugë, shumë njerëz kanë biçikleta , por shumica ecin. Më cuan jashtë qytetit një distancë të shkurtër për të parë një urë të vjetër në Mes.Ura Osmane në Mes (Ura e Mesit “urë në mes”) është një urë në fshatin Mes, rreth pesë kilometra (vijë e drejtë) në verilindje të Shkodrës, në Shqipërinë veriperëndimore. Ajo u ndërtua në shekullin e 18-të, rreth vitit 1780, nga Kara Mahmud Bushati dhe përfshin lumin Kir. Ajo është 108 metra e gjatë dhe përfaqëson një nga urat osmane më të gjata në rajon. Është ndërtuar si pjesë e rrugës, që shkon deri në Luginën Kir, përfundimisht në Prishtinë.

3.Toka është shumë e thatë. Fusha të vogla me kultura. Shtëpitë e varfëra. Meshkujt vishen në stilin perëndimor, por të zymtë, pak si irlandezët. Shumë gra veshin shalle koke. Ata punojnë një javë 6 ditore. Uniforma e gjelbër = ushtri. Blue = policia. Ka shumë pak dyqane dhe nuk ka reklama, përveç sloganeve politike, të cilat të gjitha fillojnë me LAVDI. Kemi shkuar pastaj në Durres. Makina e trajnerit shkoi shpejt përgjatë një rruge shumë të rëndë,u zgjua herë pas here për të pare fshat. Kemi udhëtuar për një kodër të madhe dhe të thatë. Zona ishte e lënë pas dore dhe e prapambetur,ndonjë kamion i rastësishëm, por asnjë makinë fare. Shtëpitë e vjetra, me pllaka të kuqe, të rrethuara nga rrushi në një kafaz rreth 8 të lart. Shumë punëtorë në fusha, pothuajse asnjë makineri. Një vepër e madhe, me sa duket e braktisur. Periferia e Durresit shumë e lënë pas dore, banesa me shumë antena televizive në çati. Ne u ndalëm për të parë një amfiteatër (Roman) të gërmuar kohët e fundit. Jo një copë toke në Colosseum natyrisht.Ecën në rrugën kryesore tregtare në Durrës. Shumë pak dyqane, pothuajse asgjë për të shitur brenda, prezantim shumë i pakëndshëm. Unë mund të kuptoj pse turistët nuk shpenzojnë lekë vetëm mallrat paksa tërheqëse janë për shitje në dyqanin e vështirë të hotelit. Kaluam në Hotel Adriatica. Dhoma e bukur, kishte dush. Ballkon i madh i përbashkët me pamje mbi plazh dhe portin në distancë. Të gjithë fëmijët (dhe nuk duket të jenë qindra rreth 10 vjeç) duan “Steelos” p.sh. stilolapsa.Në mbrëmje qëndrova dhe flisja, ndërsa një grup prej 5 vetësh ka luajtur muzikë me zë të lartë. Pranë nesh ishin ulur 3 burra, jo anëtarë të grupit sonë, ndoshta Sigurimi (policia sekrete). Ata nuk dukeshin të kënaqeshin, nuk qeshnin. Ata u larguan sëbashku .

E hënë 30 prill 1990.Deti shtrihet në horizont përtej ballkonit tim. Anijet janë në horizont. Më poshtë ballkonit tonë 15 vajzat po shqyrtojnë rërën me lopata duke u siguruar që është e pastër për përdorimin e turistëve të pasur. Këto janë normat e pagave në Shqipëri. Hoteli (Adriatika) është fjalë për fjalë pallate.Ditë tjetër e saj e mrekullueshme, ndërsa grumbullohemi në trajnerin në orën 9 të mëngjesit. Atmosfera e 2 guidave shqiptare është shumë liberale. Një nga pjesët tona është një stërvitje treni dhe i është thënë se mund të marrë fotografi nga çdo tren, që dëshironte. Ndërsa na çuan, udhëzuesit dhanë një bisedë shumë interesante për sistemin arsimor dhe çmimet në Shqipëri dhe pagat.

Pagat shkojnë 600-1200 L në muaj.

TV kushton 4000 L, por blloqet e banesave janë të mbuluara me antena.

Ushqimi duket të jetë rreth 30% e çmimit në Britani të Madhe. Banesat janë të lira për të marrë me qira. Njerëzit tani po inkurajohen të ndërtojnë.Fëmijët fillojnë kopshtin e fëmijëve, tani ka një Universitet në Tiranë.

Kemi udhëtuar nëpër fushat e fushave. Pastaj erdhi në Fieri, të gjitha të reja dhe mjaft të çuditshëm. Rrugë të gjera, njerëz që ecin kudo, dhe në biçikleta. Progresi është i vështirë sepse ka pak disiplinë mes përdoruesve të rrugës. Vetë makinat janë jo-ekzistente. Kam parë 2 makina të ngjashme me xhipat për 3 ditë, me sa duket në pronësi të ushtrisë. Në periferi të Fierit është Appolonia, një vend arkeologjik. Ekziston një manastir i vogël (tani i braktisur) dhe një muze i vogël, me të cilin shqiptarët janë shumë krenarë. Kam bërë një skicë të shpejtë të manastirit dhe më pas të Pantheonit.Na cuan në një hotel në qendër të Fierit, dhe patën një vakt të mirë. U hap qendra e rrumbullakët e Fierit, duke marrë fotografi. Ka zakonisht mjaft slogane politike në qendrat e qytetit, por edhe më shumë këtu. Në veçanti, qëndrova në qendër të rrugës kryesore duke marrë fotografi – asnjë trafik fare. Ne vozitëm në Patos.Fusha e naftës në Patos. Pajisjet primitive. Patos Marinza është një fushë nafte shqiptare ,që u zbulua në vitin 1928. Kjo është fusha më e madhe e naftës në Evropë dhe me 11,854 fuçi (1,884.6 m3) çdo ditë fushë më e madhe e prodhimit të naftës në Shqipëri. Fusha e naftës Patos Marinza ndodhet 10 kilometra në lindje të qytetit të Fierit, në jug të Shqipërisë qendrore. Rezervat e provuara janë rreth 2 miliardë fuçi (320 × 10 ^ 6 m3). Patos-Marinzas ka vetëm naftë të rëndë dhe është në prodhim, që nga vitet 1930.Na cuan në Gjirokaster me një gamë të madhe majash në të majtën tonë. Një kreshtë e lartë, me spektakolare në anën e saj. Mendoj se një mal quhet Berretto apo diçka e tillë. Gjirokastra është një qytet me gurë të ndërtuar mbi një kodër. Dy rrugë kryesore janë të vjetra dhe të pjerrëta. Ka shumë rrugë të tjera të ngushta, me gurë dhe tërheqëse. Ne kishim një vakt në hotel, pastaj shkuam të eksploronim në muzg. Kam humbur në rrugët dredha-dredha, dhe përfundova në një rrugë të gjatë nga hoteli. Ne vizituam kështjellën më vonë, një pamje të mrekullueshme mbi qytet. Gjëja më interesante ishte një avion amerikan në shfaqje. Ishte detyruar të zbriste poshtë në vitin 1957 nga Forca Ajrore Shqiptare. Figura e një avioni të braktisur amerikan T-33A Shooting Star (s / n 51-4413) në “Muzeun e Armëve Kombëtare” në Gjirokastër, Shqipëri. Avioni u detyrua më 23 dhjetor 1957. RT-33A 51-4413 i USAF të ulej në në Aeroportin e Rinasit (Shqipëri) nga një skuadron prej 2 MiG në Shqipëri .Më pas vizituan vendlindjen e Enver Hoxhës, e cila ishte e këndshme, me “sofas” të gjithë muret e disa dhomave. Disa njerëz pastaj u ngjitën në kodër në një shtëpi të lartë në kodër, ku u zhvilluan festimet e Ditës së Majit. Ne nisëm nga Gjirokastra, duke shkuar drejt Jugut përgjatë një lugine të gjerë. Pastaj u kthyem drejt, dhe u ngjitëm në një kalim përgjatë rrugës së ndërtuar mirë. Përfundimisht erdhëm në Sarandë dhe pamjen tonë të parë të detit blu, me ishullin e madh të Corfuzit me rreth 2 milje larg dhe mbuluar me mjegull, si Bali-Hai. Drejt në Hotelin tonë, në njërën anë të zhvillimit të hoteleve dhe blloqeve të kullës. Pas drekës, hyra në qytet dhe nga ana tjetër. Nuk ka praktikisht asnjë dyqan apo diçka me interes. Një kodër me konike prapa hotelit paraqet një mundësi për nesër, por së pari dëshiroj të notoj. U ktheva në hotel, mblodha veshjet e notit në çantë shpine, dhe ecur përgjatë rrugës bregdetare në anën tjetër. Uji ishte 20 ° C, unë kurrë nuk e kam parë atë më të ngrohtë në Dorset. Kam notuar për 15 minuta në drejtim të hotelit të ri izoluar .

E mërkurë 02maj 1990.Një ditë tjetër e përsosur. Na thanë se kurrë nuk ka rënë shi për 6 muaj. Me diellin në Lindje, Korfuzi është shumë më i qartë, dhe nga dritarja e dhomës së gjumit mund të shoh një fshat, rrugë dhe një shtyllë televizive atje. Por shumë e saj për të notuar. Na u tha se perëndimorët që kalojnë në ujërat shqiptare kanë anijen e tyre të përkohshëm dhe duhet të paguajnë shumë para të madhe për ti kthyer ato.Kemi shkuAr në Butrint, në pamje të kufirit grek, dhe dukej rreth faqes interesante arkeologjike të Butrintit të vjetër apo diçkaje. Amfiteatri i vogël kishte akustikë mbresëlënëse. Pastaj u ktheva pak në një hotel pranë Butrintit, ku patëm drekë e ndjekur nga një notim i mirë. Na cuan përsëri në hotelin tonë në Sarande. Pastaj shkuam në kërkim të dyqaneve. Këto janë mjaft të vështira për të parë, dhe brenda janë shumë të njëjta. Të gjitha mallrat janë në ekran në pjesën e pasme të dyqanit në raftet prapa banesës. Dikush duhet të qëndrojë në sportelet dhe kolegët në vargjet e mjerueshme të mallrave me cilësi të ulët. Çmimet janë të shtypura në njoftime të mërzitshme. Asistentja e dyqanit nuk bën përpjekje për të ndihmuar dhe pothuajse nuk guxon të kërkoni diçka. Nuk ka konkurrencë kështu që i takon blerësit për të gjetur atë që dëshiron. Nuk ka asnjë përpjekje për ta tallur atë. Më vonë shëtita milje në kërkim të një dyqani librash, që e kisha parë më parë dhe që shiste një libër anglisht.Ndërkohë kam gjetur bibliotekën, e cila i ka mbyllur raftet. Nuk mund të shfletoni raftet. Ju duhet të kërkoni atë që dëshironi.?

03 maj 1990.Vazhdoi në Vlore, mbi një kalim 1,000 m, rrugë të madhe gjatë midis maleve të larta, shumë të thata dhe të mbuluara me pemë ulliri. Kaluam nëpër një pyll të vogël kombëtar. Kishte një vakt në Vlorë në një restorant në një kodër me pamje nga Vlora.Na cuan në një vend të sheshtë, por interesant për në Berat, ku ne të gjithë vizituam një kështjellën .Por kam biseduar gjatë me 2 mjekë nga Shqipëria dhe një ushtar i ri. Një nga mjekët ishte 44 vjeç, dhe të dy tymosnin. Ata thanë se kishte 400 pacientë për 1 mjek në Shqipëri. Ushtari ishte shumë i ri, ndoshta 18 vjeç, dhe e pëlqente orën time. Ai më ofroi për të kapur kapelen e tij me yll të kuq për të. Dy fëmijë u paraqitën për një fotografi në një hark dhe i thashë se do t’i shkruaja atij) Ne shkuam ngadalë poshtë një rruge të pjerrët, rrëshqitëse me kalldrëm dhe u regjistruam në një hotel me 5 yje. Pastaj dola rreth 200 oborre dhe skicova Xhaminë e Plumbit. Unë u rrethova nga fëmijët, të cilët të gjithë duan “stilos”, që do të thotë stilolaps. Eca poshtë në mes të rrugës kryesore, me të gjitha të tjera qindra njerëz duke shëtitur në mbrëmje. Kjo me të vërtetë është shumë e këndshme. Meshkujt, gratë, fëmijët, familjet, çiftet, vajzat e reja, të rinjtë, të moshuarit. Te gjithe ata ecin në mes të rrugës, nuk ka frikë nga trafiku, zilja e rastësishme e biçikletës. Ngrohja e ditës venitet në ftohtësinë e këndshme të mbrëmjes.

Unë jam duke endur rreth qendrës së Tiranës. Është ora 3, dhe është shumë nxehtë në diell, në një qiell gati pa re. Ka shumë njerëz që ecin përreth, në trotuare të gjera ose në rrugë të gjera. Shumë pak bikes, autobusë,kamionë, kamionë dhe makina të rrallë (ambasada, zyrtare, por jo private). Shumë pemë bëjnë hije rrugëve, dhe ka shumë vende me hije, e cila është më e këndshme. Rreth semaforëve në Shqipëri janë në Tiranë. Dyqanet janë shumë të vështira për të parë dhe të mërzitshëm kur hyni brenda. Diku në Tiranë është një dyqan, që përmban diçka që dua të blej, por ku? Unë shkova të shihja 3 buste vetëm brenda një zonë të pyllëzuar jashtë bulevardit kryesor. Një zhurmë doli të ishte një roje me një pushkë që më kërkont e të më largonte. Jo shumë larg ishte një rrugë me së paku me 6 ushtarë të armatosur, të cilët më tundnin armët kur u përpoqa të ecja poshtë. Në rrugën e ardhshme unë u mahiti mbi trotuarën e kundërt nga një roje tjetër e armatosur. Më në fund gjeta dyqanet, në një rrugë që shkonte në perëndim nga hoteli. Një nga këto, në fundin e “dyqanit”, shiti disa “jo të domosdoshme”. Pashë një vazo të zbukuruar prej druri, cilësi të dobët në shtëpi, por këtu një copë shumë luksoze. Bleva atë me kuaj, jo zogj, gjëja e fundit që kishin këtë lloj. Njerëzit janë shumë miqësor këtu. Ndërsa isha ulur mbi një mur, një i ri më tregoi duke treguar se disa para po binin nga xhepi im i lartë. Unë kam provuar të blej dy herë një krem akullore, por janë refuzuar dy herë, kur e shisnin atë tek fëmijët. A po refuzojnë

për të mirën e shëndetit tim apo çfarë?

Kam ardhur nëpër 4 vajza (të cilët mund të jenë ciganë) duke shitur këmisha dhe shishe të vogla, por kur u afrova ato ikën në alarm. Ndoshta pamja ime i frikësonte ato. Kam gjetur një dyqan të monedhës së lashtë dhe bleva një rekord popullor një bust të terrakutës dhe një broshurë politike. I dhashë atyre një notë prej 10 eurosh dhe ata e hodhën poshtë çmimin.

E shtunë 5 maj 1990.Sheshi Skënderbej, Tiranë, nga maja e hotelit Turistik .Pas mëngjesit, së pari shkuam për të parë një Muze Etnologjik pranë Hotel Tirana. Është ai me një mural shumë të madh dhe emocionues në front duke treguar gjithshka që nga kohët historike.Pashë origjinalin e bustit që kisha blerë në muze.Ne u ndalëm për drekë në atë që na u tha ishte një shtëpizë e gjuetisë e përdorur nga Count Ciano, i cili mendoj se ishte dhëndëri i Musolinit. Ne arritëm në kufirin rreth orës 18:00. I kemi kaluar pasaportat tona dhe kemi ecur nëpër zakonet shqiptare. Unë kam qenë i pari, ata nuk duken as në valixhen time as në qese. Pas mbledhjes së pasaportave, ne më pas duhej të ecnim në 100 në oborr përmes tokës së pa njeriut (një rrugë) në doganat Jugosllave.

Kufiri shqiptar dhe një ushtar po qëndronin para trajnerit. Teprica është e ndaluar në mënyrë eksplicite në Shqipëri dhe tashmë na është paralajmëruar jo për ta bërë këtë. Në postën doganore Jugosllave më pyetën “A keni ndonjë letërsi shqiptare?” Unë i thashë jo dhe u hoqa dorë. Në fakt kisha një broshurë për politikën anti-shqiptare të Britanisë në vitet 1939-45, e cila do të ishte konfiskuar po të isha kapur…Këtu përfundonë rrëfimi

I autorit Jon Palmer si dhe falendrimi që ai bënë për Rafail Luzin për përkthimin e fotove dhe diciturave që ishin vendosur nëpër murre,fasada pllatesh,dyqanesh,magazive dhe uzinave e veprave të tjera të kohës,të cilët u fotgrafuan nga autori i shkrimit në muajin e 4 të vitit 1990,në udhëtimin e parë në Shqipëri.

VATRA: GËZUAR DITLINDJEN MARASH MRNAÇAJ!

December 24, 2017 by dgreca

KRYETARI I VATRËS, VIZITË NË FAMILJEN E MARASH MRNACAJ PËR DITËLINDJE/

Mbrëmjen e së Shtunës, Kryetari i Vatrës z. Dritan Mishto, i shoqëruar nga anëtarët e kryesisë Marjan Cubi, Zef Balaj, e Editori i Diellit, shkuan në familjen e Marash Mrnacaj, babai i heroit të Demokracisë Nick Mrnacaj.
Vizita u bë me rastin e ditëlindjes së Marash Mrnacaj, i cili me 21 dhjetor mbushi 91 vjet.
Familja Mrnacaj, me Marashin dhe Mrijen në krye, ka dalë tek porta dhe u uruan mirëseardhjen e mysafirëve. Ndërkohë që përcillen urimet për ditëlindjen e Marashit dhe Krishtlindjet, tavolina shtrohet sa hap e mbyll sytë.Marashi ndjehet i nderuar për vizitën dhe falenderon kryetarin e Vatrës dhe bashkëpunëtorët e tij për këtë vizitë:-Më keni nderuar burra, faleminderit që më erdhët. Ngrihen gota dhe përcillen urimet.Kryetari Mishto e nxit bisedën duke kërkuar nga Marashi të sjellë në kujtesën shtegtimin e tij të guximshëm të arratsijes prej regjimit komunist me gjithë familjen, me gjithë bagëtinë e kafshët e ngarkesës. Kujtesa e Marashit është e kthjellët ai e kujton gjithcka me detaje. Ishte koha kur vëllanë Nikollën ia kanë arrestuar pa bërë asnjë faj, pa kryer asnjë krim, ndërkohë që dhe familjes po afrohej arrestimi i vëllait tjetër, Pjetrit dhe familja ishte futë në listën e internimit. Në këto kushte u mor vendimi i ikjes. Ishte tamam dita e lindjes së tij, 21 dhjetori.
E ndjek me interes bisedën për të provuar kujtesën e tij. Është tepër i saktë, tregon gjithcka sic ma kishte treguar gjatë intervistës që i pata marrë me rastin e 90 vjetorit.
Marashi tregon: Dolëm nëpër natë dhe me kujdes, pa u ndjerë, u kaluam pas shpine rojeve, që po ndërroheshin tek burimi pranë fshatit. Pasi u bashkuam me babën e morëm bagëtinë përpara, ecnim ngadalë. Ishte frikë e madhe sepse kishim edhe dy fëmijë të vegjël, njërin 3 vjeç dhe tjetrin 9 muajësh. Po sikur ata të qanin? Gjithçka përfundonte aty…Ishte terr i thellë. Ecja nëpër pyll u vështirësua shumë. U hymë në hak edhe mushkave të ngarkuara, ato pengoheshin nga degët e pemëve. Asgjë nuk shihej para këmbëve. Hapat hidheshin kuturu. Vdekja përgjonte në çdo hap. Mund të binim në honet e thella që shtriheshin poshtë këmbëve tona. Rrëzoheshim, ngriheshim me mundim dhe vazhdonim të ecnim. Qëndruam pak se menduam, ndoshta do të na ndihmonte hëna që duhej të lindëte në ato çaste, por për fatin tonë të keq, terri u shtua, ia nisi shiu. Ecja u vështirësua shumë.Marashi, kujton se kishte një elektrik të vogël me bateri, me të cilin ndriçonte para këmbëve që të vazhdonin mundimshëm ecjen. Pas shiut nisi bora.Keq e më keq, rrugëtimi u vështirësua. Dukej se po përjetonim një tmerr ferri. Fëmijët kishin ngrirë, duart u ishin ënjtur. Nisën të qanin. Diku, gjatë ditës së nesërme, rrëzë një shkëmbi,u përpoqëm të ndezim zjarrin, nga që fëmijët nuk pushonin së qari, por ishte e vështirë, lagështia, bora pengonin. Na ka parë në ato momente një malësor treshian dhe na është ofruar. Duke zbërthyer fishekët, u morëm barutin dhe e ndezëm zjarrmin. Treshiani, që u përvëlua nga baruti, na tha se duhej të lëviznim sepse ushtarët shqiptar vinin deri aty për kontroll. Ishim vetëm pak metra larg piramidës. Në ato çaste na doli dhe një problem me bagëtinë, që na u kthyen mbrapa, rihynë në pjesën shqiptare. Shkoi treshiani dhe i ktheu mbrapsht. Pastaj erdhi dhe na mori e na çoi në shtëpinë e vet në Bekaj të Trieshit. Morëm frymë të lehtësuar. Ishim të lagur deri në kockë. Na veshën me rrobat e tyre, edhe pse na rrinin të mëdhaja, nga që ata ishin trupmëdhenj.Na ushqyen. Pasi e kishim marrë disi veten, mikpritësi njoftoi policinë malazeze. Na shoqëruan gati 20 trieshianë për në zyrat e policisë. Fëmijët vazhdonin e qanin nga që trupi u ishte ënjtur e fytyrat u ishin bërë plagë. Bagëtinë, s’mund ta merrnim me vete, ia lamë atij që na kishte ndihmuar. Na çuan në Titograd, ku na mori në pyetje UDB-ja. Çdo i rritur i qëndronte më vete në një dhomë, ku ballafaqoheshin përgjigjet e intervistave që na bënin. Pyetjet vazhduan për dy javë.U bindën se nuk ishim të dërguar nga sigurimi shqiptar dhe na dhanë strehim politik.
Rrëfimi i tij është dramatik, plot ndodhira… E ndërpret dhe uron:Gëzuar….Mirëserdhët! Si pa u kuptuar kaluan më shumë se dy orë në atë familje të mrekullueshme mes rrëfimeve, urimeve dhe bujarisë karakteristike kelmendase.
Nga familja Mrnacaj janë anëtarësuar në Vatër Marashi, vëllai Pjetër dhe nipi Marku- rritur në kampet e internimit, i biri i vellait Nikolla, qe kaloi rreth 20 vjet burgjeve dhe vdiq ne kampet e internimit. Marku është anëtar i Keshillit të Vatrës.
Kryetari i Vatrës dhe bashkepunetoret e tij falenderuan për mikpritjen.