dgreca – Page 1878 – Dielli

Kosova dhe Shqipëria, arsimin prioritet kombëtar

August 2, 2017 by dgreca

-Vlerësohet si mision i lartë patriotik puna e mësuesve me fëmijët shqiptarë në diasporë për të ruajtur gjuhën, traditën dhe kulturën shqiptare/

PRISHTINË, 2 Gusht 2017-Gazeta DIELLI-B.Jashari/ Ministri i Arsimit, Shkencës dhe Teknologjisë në Qeverinë e Kosovës, Arsim Bajrami, ka pritur sot në takim ministren e re të Arsimit dhe Sportit të Shqipërisë, Mirela Karabina, me të cilën ka biseduar për bashkëpunimin në arsim të të dyja vendeve.Ministri Bajrami, me këtë rast, tha se me ministren Karabini janë dakorduar që arsimi dhe edukimi duhet të jetë një fushë ku duhet të realizohet integrimi i sistemit arsimor, të ofrohet një arsim sa më unik dhe kombëtar, i bazuar në vlerat tradicionale kombëtare, por edhe në trendet bashkëkohore dhe evropiane.

“Shfrytëzojmë rastin që t’i bëjmë apel Qeverisë së Kosovës dhe asaj të Shqipërisë që të vendosin edukimin dhe arsimin si prioritet kryesor kombëtar, sepse ne vlerësojmë që të ofrosh një arsim cilësor është gjëja më e rëndësishme për të rinjtë e të dyja vendeve, duke pasë parasysh që Shqipëria dhe Kosova kanë një popullsi të re dhe inteligjente”, tha ministri Bajrami.

Ndër të tjera, ministri Bajrami theksoi se sistemi arsimor ende nuk është në nivelin që e dëshirojmë, por tha se gjatë këtyre tri viteve është vënë një bazë e mirë e bashkëpunimit dhe është rrëzuar muri ndarës i sistemit të edukimit.Ndërsa, ministrja e Arsimit dhe Sportit e Shqipërisë, Mirela Karabina tha se shpreson që vitet e ardhshme të kemi edhe më shumë të materializuar bashkëpunimin ndërmjet dy qeverive.Ministrja Karabina theksoi faktin se dje bashkë me ministrin Bajrami kanë marrë pjesë në hapjen e Seminarit të 13-të mbarëkombëtar të mësimit plotësues në gjuhën shqipe në diasporë. Ajo e vlerësoi si mision të lartë patriotik punën e mësuesve që punojnë me fëmijët shqiptarë në diasporë për të ruajtur kështu gjuhën, traditën dhe kulturën shqiptare.

Ambasada amerikan në Tiranë fton gazetarët investigativë

August 2, 2017 by dgreca

*Gazetarët investigativë shqiptarë do të kenë mundësinë për të mësuar drejtpërdrejtë nga profesorë të shkollës së gazetarisë Cronkite nga Universiteti Shtetëror i Arizonës. /

Ambasada e SHBA Tirane njofton/Ne nje postim te sajen, date 1 gusht Ambasada e SHBA ne Tirane shkruan:Ju mbetet kohë deri të dielën, 6 gusht, për të aplikuar në Laboratorin e Gazetarisë Investigative. Pjesmarrësit jo vetëm do të punojnë me disa nga gazetarët më të mirë shqiptarë, por do të kenë mundësinë për të mësuar drejtpërdrejtë nga profesorë të shkollës së gazetarisë Cronkite nga Universiteti Shtetëror i Arizonës.

Je student gazetarie që dëshiron të luftojë korrupsionin? Ne të ftojmë të aplikosh për të qenë pjesë e laboratorit të gazetarisë investigative! Studentët e përzgjedhur që do të shfaqin pasion dhe kurajo për gazetari të pavarur dhe investiguese, do të ftohen për të marrë pjesë në një program trajnimi, si dhe do të shkruajnë raportime investiguese mbi çështje të rëndësishme në Shqipëri. Pajisje teknologjike nga më të fundit dhe trajnim mbi gazetarinë do të ofrohen nga ekspertë shqiptarë dhe profesorë të shquar gazetarie nga Shtetet e Bashkuara. Shihni faqen që kanë krijuar studentët e laboratorit të këtij viti:www.pse2017.com
Për të aplikuar, klikoni këtu: https://goo.gl/mbBzyV

You have until Sunday, August 6 to apply for the Investigative Journalism Lab. In addition to working with some of Albania’s top journalists, participants will have the opportunity to learn directly from professors from Arizona State University’s Cronkite School of Journalism.
Are you a journalism student who wants to help combat corruption? You are invited to apply to be a part of the investigative journalism lab! Selected students who demonstrate passion and courage for independent, investigative journalism will be invited to participate in a mentoring program and write investigative reports on important issues in Albania. Cutting edge equipment and journalism training will be provided by experts from Albania and distinguished American Journalism professors. Check out the portal created by this year’s lab students: www.pse2017.com
To apply, visit: https://goo.gl/mbBzyV

Në Prekaz u mbajt manifestimi “Dita e Diasporës”

August 2, 2017 by dgreca

–Aktiviteti qendror vazhdoi me programin kulturor, përgatitur nga grupi mjaft i suksesshëm shqiptaro-slloven “Kvali” nga Sllovenia, i cili këndoi këngë të bukura shqipe/
PREKAZ, 2 Gusht 2017-Gazeta DIELLI/ Në kompleksin memorial “Adem Jashari” në Prekaz, nën patronazhin e Ministrisë së Diasporës, mbrëmë u mbajt manifestimi tashmë tradicional “Dita e Diasporës”.Manifestimi filloi me homazhet në varrezat e familjes Jashari, me moton “Një lule për Jasharët”.

Më pas, para një numri të madh të bashkatdhetarëve dhe mysafirëve të tjerë, ministri i Diasporës, Valon Murati, mbajti një fjalë rasti.“Ju keni qenë pjesë e pandashme e rrugës për lirinë e atdheut. Pa punën tuaj, liria do të ishte shumë më vështirë e arritshme. Andaj, duke respektuar angazhimin tuaj dhe lidhjen që keni me lirinë e Kosovën, mblidhemi çdo vit për të shënuar ditët e mërgimtarëve edhe në Prekaz, si simbol i sakrificës së përbashkët. Me punën tuaj të ndershme, me angazhimin tuaj në jetën politike, ekonomike, kulturore, arsimore e sportive të vendeve ku jetoni, po e lartësoni kombin shqiptar, shtetin e Kosovës dhe viset e tjera shqiptare. Po i krijoni atdheut tuaj lidhje të rëndësishme në të gjitha sferat e jetës”, tha ndër të tjera ministri Murati.

Aktiviteti qendror vazhdoi me programin kulturor, përgatitur nga grupi mjaft i suksesshëm shqiptaro-slloven “Kvali” nga Sllovenia, i udhëhequr nga muzikologia Alma Bejtullahu. Ky grup këndoi këngë të bukura shqipe. Vlerën këtij koncerti ia shtoi edhe ikona e muzikës qytetare shqiptare Nezafete Shala, e cila për të pranishmit këndoi këngë të vjetra shqipe.

Në këtë koncert u shqua për zërin e tij karakteristik edhe Alban Spahiu, një fëmijë shumë i talentuar nga diaspora, cili këndoi këngë për Adem Jasharin dhe për mërgimtarët./b.j/

History-Kryengritja e Ilindenit ishte me karakter bullgar

August 2, 2017 by dgreca

1-arben-llalla Masa e gjerë e popullsisë shqiptare që jetonin në fshatrat e Kosturit dhe Follorinës nuk e mbështetën këtë kryengritje sepse ajo nuk kishte karakter për çlirim e popujve që jetonin në Maqedoninë Gjeografike, por qëllimi ishte kontrollimi i Maqedonisë nga forcat bullgare./

Nga Arben LLALLA/Kryengritja e Ilindenit filloj më 2 gusht 1903, të dielën në mbrëmje. Kjo datë lidhet me ditën e Shën Ilias (Elias) të kalendarit Grigorian që praktikohej në atë periudhë nga besimtarët ortodoks të kishës së Pavarur Bullgare Exartia. (Në të vërtetë data e fillimit të kryengritjes është 20 Korriku me kalendarin e vjetër, por kjo datë përshtatet me datën 2 gusht të kalendarit të ri).Kryengritja filloj pasi bullgarët nuk bindën Fuqitë e Mëdha për zgjerimin e kufijve të shtetit të tyre si dhe organizatat e ndryshme bullgare nuk mundën të bindnin popullsinë sllave në Maqedoninë Gjeografike për kryengritje të madhe për tu bashkuar me Bullgarinë. Që nga viti 1880 e deri 1905 misionar të ndryshëm si grek, serb dhe bullgarë bridhnin nëpër fshatrat e Maqedonisë për të regjistruar banorët, përkatësitë e tyre fetare dhe kombësinë si dhe përshkrimin e rrugëve nga fshati në fshat dhe qytetet.

Në vitin 1878, Rusia pushtoi Turqinë dhe ndaloi në dyert e Stambollit. Traktati i Shën Stefanit u bë në mes të dy ndërluftuesve dhe me të cilin mjeshtërisht Rusia për të mirën dhe përdorimin e vet krijoi një shtet të madh Bullgar, që nga ana Jugore do të shtrihej deri në detin Egje duke përfshirë edhe portin e Selanikut. Kjo shkaktoi mbledhjen e shpejtë të fuqive Evropiane të cilat bënë traktatin e Berlinit. Ky traktat ndaloi formimin e shtetit Bullgar të projektuar nga Rusia dhe vuri në heshtje kërkesat e saja për të pasur një port në detin Mesdhe. Vendimet në Kongresin e Berlinit për të lënë Maqedoninë brenda kufijve të Perandorisë Osmane u kthyen shpejt në zonën e kontestit mes Serbisë, Greqisë dhe Bullgarisë. Lufta e pamëshirshme, e qasjeve propagandistike nxitën më shumë dhunën dhe pamundësinë e fuqive të mëdha për të siguruar një zgjidhje të kënaqshme dhe përfundimtare për territorin e Maqedonisë, ndryshe nga shumica e territoreve të diskutueshme të cilat u zgjidhën përfundimisht.

Bullgarët, duke parë që nuk mund ta gllabëronin direkt Maqedoninë, i dhanë përparësi tendencës së shkëputjes dhe të autonomisë në mjedisin maqedonas dhe veçanërisht në fshatrat sllavofonë. Të njëjtën gjë bënë edhe serbët nga ana e tyre, me shpresë se duke u bërë autonome Maqedonia, dhe duke u caktuar si gjuhë zotëruese, idioma e saj, ai shtet autonom apo i pavarur që do të krijohej, shpejtë a vonë do të ishte nën ndikimin e madje nën zotërimin e tyre. Sipas tyre, e rëndësishme ishte të mos i bashkohej Greqisë, sepse në këtë rast nuk do kishte asnjë shpresë për ndonjë dalje në Egje dhe në Mesdhe.

Tendencat e dy qeverive, bullgare dhe serbe, u përplasën mbi terrenin perëndim-verilindje të asaj që ata e quanin Maqedoni, domethënë në krahinat lindore dhe verilindore të Shqipërisë. Pra, fronti i një lufte gjithnjë e më të ashpër sapo kishte filluar të shoqëruar me propagandë, literaturë dhe etnografinë e Maqedonisë.

Kështu, grupet e organizatave bullgare për të rritur ndërgjegjen e Fuqive të Mëdha për tju bashkangjitur Maqedoninë Bullgarisë themeluan milicinë dhe forcat paramilitare të cilat nisën kryengritje që do të quhet Ilinden.

Kryengritja e Ilindenit më shumë u përhap në Maqedoninë Perëndimore dhe kryengritësi keqtrajtuan popullsinë myslimane dhe ortodokse që besonte në kishën e Fanarit të Stambollit-Patriarkana. Me kryengritësit bullgarë u bashkuan edhe individë shqiptarët të cilët ndoshta kishin probleme me pushtetin osman, por edhe kundrejt ndonjë pagese në të holla. Masa e gjerë e popullsisë shqiptare që jetonin në fshatrat e Kosturit dhe Follorinës nuk e mbështetën këtë kryengritje sepse ajo nuk kishte karakter për çlirim e popujve që jetonin në Maqedoninë Gjeografike, por qëllimi ishte kontrollimi i Maqedonisë nga forcat bullgare. Forcat osmane që ishin kundër kryengritësve patën përkrahjen e forcave vullnetare greke, të kishës greke si dhe të individëve shqiptar të cilët në shumicën e rasteve ishin ushtar me pagesë në ushtrinë osmane. Gjatë kryengritje pati një gjakderdhje të pamëshirshme deri në kanibalizëm nga të gjitha palët që u përfshinë në konfliktin e Ilindenit.

Greqia për të luftuar kundër komitëve të Ilindenit dërgoj dy oficerë të shquar arvanitas Pavlo Melas alias Miqis Zaza dhe Aleksandër Kondulin alias Shkurti të cilët u angazhuan direkt për të shtypur kryengritjen bullgare të Ilindenit. Ata gjetën mbështetje tek fshatrat shqiptar për tu rezistuar çetave komite bullgare si në Bellkamen-Dhrosopogi, Negovan-Flamburo dhe Lehovo që gjenden në prefekturën e Follorinës. Në ato vite zhvilloheshin bisedime për themelimin e një mbretëria të përbashkët greko-shqiptare dhe ky projekt ndikojë dukshëm që shqiptarët të mbështetshin grekët për shtypjen e kryengritjes së Ilindenit. Në kujtimet e tij Pavlo Melas do të shkruante për shqiptarët kapedan Nikolao Kola dhe Zisi Dhumulo nga Lehova të cilët luftonin përkrah tyre kundra komitëve bullgarë. Një nga organizatorët e forcave greke, turke dhe shqiptare ishte Mitropoliti i Kosturit Germanos Karavangjeli i cili u bë frymëzuesi kryesor për aleancën greke-turke-shqiptare kundër komitëve të Ilindenit.

Gjatë kryengritjes së Ilindenit dy armiq historik kundra njeri-tjetrit grekët dhe turqit tani po bashkëpunonin me zell për shtypjen e pamëshirshme të kësaj kryengritje. Kryengritja e Ilindenit u bë shkak që Greqia të mobilizohej për marrjen e pjesës së Maqedonisë që ishte në Perandorinë Osmane të atyre viteve. Pas përfundimit të kryengritjes më të fituar doli pala greke e cila në shumë fshatra që banoheshin nga bullgarët dhe i përkisnin kishës së pavarur bullgare hapën kishat greke të Patriarkanës dhe filloj përpjekjet për çlirim e Maqedonisë me emrin (Agona tis Maqedonias 1904-1908). Pas pak vitesh Greqia do të merrte edhe ato fshatra që banoheshin nga popullsi bullgare, pra eksodi i braktisjeve të fshatrave bullgarë në Maqedoninë e Egjeut filloj dal ngadalë fill pas shtypjes së kryengritje së Ilindenit. Qindra fshatra nga Maqedonia Perëndimore dhe Kirk-Klisse afër Andrianopojë u shkatërruan, mijëra bullgarë braktisën shtëpitë e tyre për të mos i kthyer më kurrë..

Turqia e dobësuar nga kryengritjet e ndryshme në Maqedoni u largua në fund të vitit 1912 duke e lënë atë të copëtuar dhe me pikëpyetje të mëdha se kujt i takon ekskluziviteti i historisë dhe i heronjve të Maqedonisë antike.

Tashmë kryengritja e Ilindenit ka mbetur vetëm në kujtesën e historisë dhe shumica e protagonistëve të saj vijnë përpara syve tanë nëpërmjet propagandës së politikanëve të sotëm të cilët po i çojnë të vdekurit prej varri që ti shfrytëzojnë për nevojat e tyre duke i treguar në versione në të cilat nuk kanë qenë asnjëherë ashtu siç po na i paraqesin.

Kosova do të frymoj edhe pas 3 Gushtit

August 2, 2017 by dgreca

Nga Nue Oroshi/Dallimi në mes të shtetit dhe pushtetit, mospergjegjësia për besimin e dhënë nga populli janë dy gjëra që politikanët e sotëm të Kosovës qe nuk i kanë fare parasysh dhe si duket ose nuk munden me ba këtë dallim ose janë thellë të zhytur në dashurinë dhe lakmin për pushtet që jau ka vërbuar sytë dhe jau ka helmuar trurin. Dita e nesërme me 3 Gusht 2017 ku pritët të bëhet konstituimi i Parlamentit të Kosovës dhe më pas Qeverisë së Kosovës po i gjenë blloqet politike shqiptare skajshmërisht të përçara më njëra- tjetrën, ato blloqe politike në vend që të ulën dhe me gjuhën e koncepteve dhe programeve politike t’i përafrojnë programët e tyre se ku munden me gjetë pika të përbashkëta dhe ku jo, ata gjithë kohën e kanë shfrytzuar se cili do ta shaj dhe lëndoj më shumë njëri -tjetrin pa harruar faktin se edhe nëse mbahen dy apo tre palë zgjedhje të reja ata do të jenë të obliguarë ligjerisht të bashkpunojnë me njëri – tjetrin, qoftë si parti qeverisëse qoftë si parti opozitare.

Në Kosovë ka kohë që është krijuar një mentalitet bllokues i partive dhe blloqeve politike shqiptare se ose duhet të bëhet qeverisja, si duam ne ose do të ketë bllokadë totale dhe nuk duhet të egzistoj as shteti e as pushteti. Kjo logjikë kushtëzuese e partive dhe blloqeve politike shqiptare nuk të qon askund përveç se tek një rrugë qorre e ku më së shumti pasojat e kësaj kokëfortësie politike të kësaj rruge qorre i bartë qytetari i Kosovës, nxënësi,studenti, bujku, punëtori, tregtari e prodhuesi.

E këtu logjika e inateve dhe interesave personale dominon mbi logjikën e shtetndërtimitë dhe ecjes përpara. Këtu politikanët shqiptarë të Kosovës, harrojnë dy gjëra: e para dhe shumë e rëndësishmja që lobi sllav në krye me Serbinë dhe Rusinë është shumë aktiv në dëmtimin e prestigjit ndërkombëtarë të Kosovës, dhe janë duke e luajtur politikën shkatrruse por tash të mbeshtjellur me një pelhurë të trashë mashtruse dhe shumë perfide, se gjoja Serbia është demokratizue dhe për ti bindur miqtë tanë se fajtor janë shqiptarët e Kosovës dhe politikanet e Kosovës, për çdo gjë dhe e dyta ngecjet e Kosovës në shumë aspekte në mardhëniet ndërkombtare, siç janë njohjet e metutjeshme të shtetit, antarsimit të Kosovës në organizata nderkombëtare botërore, përgaditjen e terenit për investitor të sigurt nderkombëtarë, sigurimin e terenit për të rinjët dhe të rejat që mos ta lëshojnë Kosovën, me një fjalë fillimi i një rruge tjetër në politikë dhe kalimi nga politika për sjelljen e të mirave materiale te politikanit, në sjelljen e te mirave materiale për mbarë popullin e Kosovës. Ajo që me të vërtetë më dhemb më së shumti, dhe duhet t’i dhemb çdo shqiptari atdhetar është fakti se tri blloqet politike shqiptare që kanë 100 deputetë në Parlamentin e Kosovës, nesër do të shikojnë se si do të jetë sjellja e deputeteve të Listës Serbe për ndërtimin e Institucioneve të Kosovës. Kjo është me qajtë me shami në dorë siç përdorët një fjalë e hershme popullore në traditën tonë të pasur shqiptare. Dhe 100 deputet shqiptarë për shkak të mosgjetjës së gjuhës së përbashkët në mesë të tri blloqeve politike nesër do të jenë nën mëshirën e fatit dhe pritjes se çka po ndodhë dhe si po ndodhë me ndërtimin e Institucioneve të Kosovës.

Dhe krejt lehtë mund të ndodhë që ata nesër ta rrezojnë vetveten dhe të shkrihen si legjistraturë ende pa filluarë të punojnë asgjë. Për fund kam një propozim që me siguri nuk do t’iu pëlqej asnjërit nga tri blloqet politike shqiptare. Nëse nuk gjeni gjuhë të përbashkët që t’i krijoni Institucionet e Shtetit, dhe lakmin për pushtet e qitni para vetdijës shtetërore, ateher do të ishte mirë që te gjith ju sa jeni 100 deputet asnjëri nga ju mosë të kandidoni për postë të ri të deputeit të Parlamentit të Kosovës, për faktitë se besiminë që e morrët nga populli nukë qetë në gjendje ta konkretizoni me ndertimin e Institucioneve të shtetit. Ka Kosova vajza dhe djem shqiptare, edhe ma të mirë se ju, edhe ma të përgaditur në aspektin intelektual se ju, porë edhe në të gjitha aspektët tjera, që mundë ta qojnë përpara shtetin e Kosovës. Porë që janë të bllokuarë nga mosmundësia e terenitë politikë, që e keni krijuar pikërisht ju që sot silleni sikur të ishit 100 Zotëra të Kosovës dhe e harroni faktin se ishin pikërisht votuesit tuaj që ju dhanë votën që t’i ndërtoni institucionet e shtetit të Kosovës, dhe shteti të ecë përpara, si në aspektin politik, ekonomik dhe të zhvillimeve tjera ashtu siç janë duke ecur bota e qytetruar perëndimore. Prandaj është koha që të reflektoni në gjëra pozitive se Kosova do të frymoj edhe pas 3 Gushtit, ajo do të vazhdon jetën Institucionale edhe kur të gjithë ju deputetet e kësaj legjistrature, nuk do të jeni pjesë e politikës.