Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Referendumi Në PS/ Blushi: Marrëzi e Ramës ….

by

..që do të konkurrojë me vetveten/

Deputeti Ben Blushi e ka cilësuar si marrëzi propozimin e Edi Ramës për referendum për mandatin e kryetarit të PS-së.

Sipas tij nuk mund të bëhet referendum për një emër, sepse referendumet bëhen për çështje.

“Deri sot kanë domiuar dy linja që janë përplsur brenda partisë. Njëra e arsyeshme që kërkonte zbatim të statutit, tjetra që ishte kundër. Sot u shtua linja e marrëzisë. Referendumet bëhen për çështjet, jo për njerëzit. Rama kërkon të bëjë një referendum për të marrë një mandat të përhershëm. Absurdi është që kërkon të shkohet në referendum pa zbatuar statutin. Kjo do kthehet në barsaletë. Nuk është se jam kundër referendumit. Nëse ky statut hidhet për referendum jam dakord, por kush është pyetja që hidhet në  referendum. Besoj se është marrëzia e një njeriu që do të shkojë në zgjedhje vetëm pa kandiat, që Edi Rama të kandidojë pa kandidat”, tha Blushi.

Më tej ai e quajti censurë faktin që fjala e tij nuk u transmetua live në media.

Blushi ripërsëriti akuzat ndaj Ramës për papunësinë, rritjen e borxhit dhe taksave, si dhe u shpreh i gatshëm për një ballafaqim publik për të gjitha këto çështje.

Blushi vlerësoi gjithashtu fjalimin e deputetes Arta Dade në Asamble, për të cilin tha se ishte një nga më të bukurit që ai kishte dëgjuar në këto 20 vjet në Partinë Socialiste.

“Për aq kohë sa nuk ka zgjedhje, për aq kohë sa të mendoj se Rilindja dhe PD-ja janë dy parti të djathta, për aq kohë sa partia ku jam futur nuk respekton statutin e vet, unë do të vazhdoj të flas”, u shpreh Blushi para gazetarëve.

Duke iu përgjigjur akuzave të Ramës dhe mbështetësve të tij që thonë se ai po flet me gjuhën e Berishës, Blushi tha se për asnjë ditë nuk ka menduar si Saliu.

“Kam mendimet e mia, mbroj pikëpamjet e mia, që thonë se duhet të qeverisim më mirë. Ka akoma mundësi që PS-ja të ndryshojë drejtim”, theksoi Blushi.

Koment: Zemra e ftohtë e Evropës

by

BE dëshiron ta zhvendosë në Turqi krizën e refugjatëve. Viktimat e para presin në Idomeni, mendon Bernd Riegert./

Në samitin e posaçëm të nivelit të lartë të BE të hënën, për shkak të vetos gjermane u debatua për orë të tëra për fjalinë në deklaratën përfundimtare, nëse është i mbyllur krejtësisht për refugjatët apo jo itinerari ballkanik. Kancelarja gjermane Merkel zbatoi vullnetin e saj dhe bëri që deklarata e skajshme të zbutet pak, sepse Merkel ëndërron ende për një zgjidhje evropiane. Vetëm 24 orë më vonë, anëtarët e BE, Slloveni dhe Kroaci krijuan sërish fakte dhe i mbyllën kufijtë e tyre zyrtarisht dhe krejtësisht. Nuk ka veprime të përbashkëta. Angela Merkel me sa duket e ka humbur edhe atë autoritet të fundit që i kishte mbetur në Evropë. A është kjo ende Evropa juaj, zonja Merkel?

Izolim dhe kthim pas është tani motoja, në bazë të tregtisë që po përvijohet me Turqinë. Kjo u bë e qartë edhe të hënën në Parlamentin Evropian. Këshilli i BE, si dhe Komisioni i BE dërguan vetëm zyrtarë të rangut të dytë. Zëvendësit përsëritën pa dëshirë fraza njëra pas tjetrës. Zhvendosja e problemit të refugjatëve në Turqi dhe përfundimi i ndërtimit të kështjellës Evropë u shit si “zgjidhje evropiane”. Kjo është e hidhur. Është madje çnjerëzore, sepse njerëzit që kanë ngecur sot në Greqi para dyerve të mbyllur të Evropës as u përmendën në deklaratat zyrtare.

Largimi i syve nga katastrofa

Emri i qytetit kufitar Idomeni, i cili simbolizon tani mjerimin e refugjatëve, u përmend vetëm nga kryetarja e Grupit Parlamentar të Majtë, Gabi Zimmer. Ajo kritikoi edhe tregtinë e pështirë të njerëzve dhe dëbimet masive, për të cilat do të bihet dakord midis BE dhe Turqisë. Greqia nuk është e aftë ose në gjendje që të kujdeset për tragjedinë akute njerëzore në kufirin e saj. Paratë që ka premtuar BE do të rrjedhin vetëm disa muaj më vonë, sepse më parë duhet të ndryshohen buxhetet. Një ndihmë e vërtetë emergjente nga BE nuk duket gjëkundi, megjithëse do të qe e mundur në bazë të marrëveshjeve të BE. Pse nuk e bën?

Komisari i Lartë i OKB-së për refugjatët, në fjalën e tij para Parlamentit të Stassburgut e akuzoi BE për shkelje të planifikuar të së drejtës dhe për sjellje jonjerëzore. Çfarë duhet të ndodhë që t’i vrasë ndërgjegjja kryetarët e shteteve dhe të qeverive të BE dhe të shteteve kandidate?

Çështje ndërgjegjeje?

Kushtet në Greqi janë shumë më të këqia se ishin kushtet në Hungari në shtator. Atëherë, kancalerja gjermane dhe kancelari austriak dëshmuan – duke vepruar të vetmuar – qëndrim human dhe i lejuan refugjatët që të hyjnë në vendet përkatëse. Prej kësaj tashmë nuk ka mbetur më asnjë gjurmë. Përkundrazi: pamjet e shëmtuara nga Idomeni të familjeve në baltë madje janë të dëshiruara, për të frikësuar migrantët, azilkërkuesit dhe refugjatët që mund të duan të vijnë. Tri javë pas mbylljes së kufirit, ushtria greke ende nuk është në gjendje të shpërndajë bukë dhe ujë?

Një zgjidhje e vërtetë nuk duket në horizont

Bernd RiegertBernd Riegert

Nëse do të arrihet dakordimi për planin e lëkundur, që së bashku me Turqinë të çohet në zero migrimi i pakontrolluar në BE, sot është e pasigurtë. Për disa shtete, kërkesat e Turqisë janë shumë të mëdha, të tjera janë parimisht kundër rishpërndarjes së refugjatëve në BE. Çfarëdo të jetë ajo për të cilën do të bihet dakord në takimin e ardhshëm të nivelit të lartë të BE javën e ardhshme: njerëzit në Idomeni, të cilët thërrasin “mama Merkel”-in me fjalët e shkruar në kartonë, vendimet nuk do t’i ndihmojnë.

Edhe nëse do të ketë sukses kjo strategji izolimi, të gjithë që kuptojnë pak nga situata e kanë të qartë se refugjatët do të kërkojnë rrugë të reja. Dhe jo më nëpërmjet Egjeut, por përmes Bullgarisë ose Shqipërisë, Lampedusas ose Maltës. Vlerat humanitare dhe kristjane, të cilat i theksojnë me dëshirë politikanët evropianë në fjalimet e tyre të të dielave, humbasin krejtësisht këto ditë në debatin për mbrojtje nga refugjatët. Evropa tregon zemrën e saj të ftohtë.(DW)

Ëndrra e paplotësuar evropiane

by

Ariani ka bërë udhëtimin e pabesë nga Afganistani në Evropë, i joshur nga premtimet se do të gjejë punë, do të marrë shtetësinë menjëherë dhe do ta mirëpresin pagesa të bollshme.Por, gati një vit pas mbërritjes në Gjermani, 25-vjeçari ka kuptuar se trafikuesit me njerëz e kanë ushqyer me gënjeshtra për jetën luksoze.

I zhgënjyer me burokracinë, Ariani ka vendosur të kthehet vullnetarisht në Afgansitan.

“Kemi dëgjuar thashetheme nga miqtë se jeta në Evropë do të jetë e rehatshme, me punë të mira dhe mundësi për shkollim të mirë. Trafikuesit u thonë njerëzve se ata e kanë të garantuar shtetësinë. Por, e gjitha është gënjeshtër”, thotë Ariani.

Sipas shumë kushteve, ai mund të konsiderohet migrant ekonomik. Në grupin e tij besohet se bën pjesë rreth gjysma e 200,000 afganëve që kanë ikur për në Evropë. Dhe, prejse vendet evropiane kanë nisur të bëhen gjithnjë e më selektive në pranimin e azilkërkuesve, ata e dinë se shanset e tyre janë të pakta.

Tani, Ariani është penduar.

“Po ta dija se sa i rrezikshëm është udhëtimi në Evropë dhe sa e pasigurt është jeta në Gjermani, nuk do ta lija kurrë Afganistanin”, thotë ish-punonjësi i Ministrisë së Arsimit.

Rrjetet e trafikimit kanë lulëzuar në Afganistan, edhe pse ndryshimet e propozuara nga Bashkimi Evropian dhe Turqia për trajtimin e migrantëve që ikin nga Siria, Iraku, Afganistani dhe vendet e tjera, mund të ndryshojnë lojën. Trafikuesit që marrin migrantë nga Afganistani, zakonisht i dërgojnë ata përmes Iranit e Turqisë në Evropë.

Në përpjekje për të rrëzuar mitet për punë të garantuar dhe pagesa të bollshme në Gjermani, ambasada gjermane ne Kabul, vitin e kaluar, ka nisur një fushatë mediatike në gjthë Afganistanin, duke paralajmëruar banorët që të mos i dëgjojnë trafikuesit.

Homayun ka kaluar tetë muaj në Gjermani. Sikurse Ariani, ai është kthyer në Kabul, pasi pritjet e tij nuk janë realizuar.

Homayun ka arritur në Evropë vetë, me idenë se familja e tij mund t’i bashkohet.

Por, Qeveria e Gjermanisë, e shqetësuar se numri i migrantëve mund të tejrritet, vitin e kaluar, ka pezulluar përkohësisht rregullat që u lejojnë migrantëve bashkim familjar.

Atij i është thënë se duhet të presë dy deri në pesë vjet për t’u ribashkuar me familjen në Gjermani.

“Më ka munguar familja dhe nuk kam rrezikuar të pres në Evropë”, thotë Homayun, baba i një fëmijë njëvjeçar.

Rreth 65,000 azilkërkues afganë kanë arritur në Gjermani vitin e kaluar. Sipas Agjencisë për Refugjatë të Kombeve të Bashkuara, afganët përbëjnë grupin e dytë më të madh të migrantëve që arrijnë në vendet e Bashkimit Evropian, pas sirianëve.

Vetëm nëntë afganë janë dëbuar me forcë nga Gjermania në vitin 2015. Por, sipas Organizatës Ndërkombëtare për Migrim, numri i të kthyerve vullnetarë ose të asistuar nga Gjermania është rritur nga 92 në vitin 2014, në 304 në vitin 2015.

Në muajin shkurt, ambasada e Afganistanit në Gjermani ka thënë se janë rreth 1,000 migrantë afganë në këtë vend që presin të kthehen vullnetarisht në Afganistan.

Ambasadori i Gjermanisë në Afganistan, Markus Potzel, i ka thënë Radios Evropa e Lirë në muajin nëntor se mbi 50 përqind e azilkërkuesve afganë në Gjermani janë “migrantë ekonomikë” që nuk arrijnë të dëshmojnë se “jeta e tyre është në rrezik”, andaj edhe u refuzohet kërkesa për azil.

Kjo nuk do të thotë se arsyet e largimit të afganëve nuk janë të vlefshme, edhe nëse ata nuk vijnë nga ndonjë rajon ku situata e sigurisë është e paqëndrueshme, ku talibanët ose grupet e tjera militante kanë kontrollin ose ku pakicat etnike dhe fetare janë në rrezik.

Njerëzit që kanë ikur nga luftimet në Afganistan, kanë tkurrur kapacitetet e qyteteve si Kabuli, duke i kontribuar papunësisë masive dhe ekonomisë së lodhur.(Përgatiti: Valona Tela-Europa e Lire)

Tre vjet burgim për kosovarin që iu bashkua ISIS-it

by

Një trup gjykues i Departamentit të Krimeve të Rënda të Gjykatës Themelore në Gjilan ka shqiptuar dënimin prej tre vjetësh burgim për shtetasin kosovar, F.B., pasi i njëjti është shpallir fajtor sepse më 17 shkurt, 2015, i është bashkuar organizatës terroriste ISIS.

“Duke iu bashkuar kësaj organizate, i akuzuari ka kryer trajnimin teorik dhe praktik për përdorimin e armës së zjarrit AK-47 dhe bombës së dorës”, thuhet në njoftimin e gjykatës.

I akuzuari ka pranuar fajësinë.

Ai do të shërbejë dënimin pas plotfuqishmërisë së këtij aktgjykimi, ndërsa nga sot masa e paraburgimit i ndërpritet.

Mbrojtja gëzon të drejtën e kontestimit të këtij aktgjykimi në Gjykatën e Apelit.

Lajm i fundit:Arrestohen dy deputetë të opozitës

by

VetëVendosja: Arrestohen dy deputetë të opozitës/

Në ambientet e Kuvendit të Kosovës u arrestuan sot dy deputetë opozitarë, Salih Salihu dhe Mytaher Haskuka, njofton Lëvizja Vetëvendosje. Në Kuvendin kosovar opozita ka hedhur sot dy herë gaz lotsjellës, e pastaj ka braktisur seancën. “Protestat tona do të përshkallëzohen”, paralajmëron VV.