VAZHDOJNË ZJARRET NË PLAVË GUCI/
Plave Guci-20 Nëntor 2015/
Sipas kontakteve të redaksisë së faqes Plavë Guci me banoret nga treva e jonë, ditëve të fundit kane filluar të përhapen zjarre të dyshimta në disa lokalitete të ndryshme në Plavë Guci . Sonte në orët e mbrëmjes mësojmë se zjarri është afruar afër lagjes Gropë të fshatit Martinaj dhe se flaket kanë kapluar shtëpinë e Sadik Bardhit Balidemaj këtu është vrenjtur edhe intervenimi i zjarrfikëseve. Po ashtu mësojmë se sonte edhe në lagjen Qosaj të fshatit Vuthaj saktësisht tek Llazi i Vogël ka filluar një zjarr që gjer me tani është përfshire një hapësirë prej 1-2 hektar dhe se zjarrin po e ndihmon edhe era e fort që ka tendencë të përhapet në drejtim ne Vuthajve. Zjarre ka edhe mbi fshatin Kukaj dhe mbi lokalitetin e njohur si Zagraj afër Kodrës se Jerinës.(dergoi per Diellin Esad Gjonbalaj)
Good news
We wanted to Pass Along to you a good news! Dea & Teuta Will ring the closing bell on the New York Stock Exchange at 1pm on Friday, November 27th on BEHALF of Miracle Day Network.
Miracle Day is a fundraiser for children ‘s programs sponsored by the Canadian bank ( CIBC ) .
Dea and Teuta Have the Opportunity to stand at the podium and ring the closing bell with other children from the participating charities in Miracle Day .
The closing bell is at 1pm . Can you please pass this information to our friends and remind them say f Can They tune in ( CNBC is Generally the best) to see us live on TV ringing the bell .
Thank you so much,
Deda and Ariana Elezaj
Universalizmi dhe Nacionalizmi
Shkroi: Mihal Zallari*/
Qysh prej shekujsh vazhdon lufta midis këtyre të dy botëkuptimeve. Kjo luftë filloi aty nga i XII shekull me Kartën e Madhe. Filloi në mënyrë të dukshme kur populli englez vendosi të shkëputet prej ndikimit së kishës universale. Lufta vazhdon e ashpër edhe sot nën forma të ndryshme. Nga ana e universalistave lufta bëhej dhe bëhet në bazën e një arsyeje shumë herë gjeniale, por gjithmonë arësye të ftohtë dhe spekulonjëse. Kurse nacionalistët i ka shtytur instikti, kishte me thanë vetë natyra. Natyra i do individet, do shumëllojshmërinë ndër njerëz, ndër kafshët dhe bimët. Për me i dalë zot këtij qëllimi, jo vetëm i ka krijuar racat, llojet e kafshëvet dhe të bimëvet, por iu ka dhanë armët dhe mjetet ma të rafinuara për t’u mbrojtur.
Universalistat nuk pranojne kufi nga jashtë, por aq më të ngushtë i venë kufijtë nga mbrenda. Flasin për njerëzin mbarë, për ide të përgjithshme, për njësi dhe vllazëri të përbotshme. Forma e universalizmit eshte imperializmi, qofte fetar ose shekullar. Siç thashë imperializmi përdor si parim të domosdoshëm shprehjen: “kufi të gjërë nga jashtë dhe të ngushtë nga brenda”. Që të kuptohemi ma mirë, po iu jap disa shembuj. Çdo fe e organizuar që ka prirje universale thotë: Më fal arsyen tënde, gjykimin tënd dhe unë të zbuloj të vërtetën absolute. Imperializmi shekullar romak ose englez etj., ka thënë ose thotë: falmë urinë tande si individ ose si komb dhe une do të ngreh një shtet i cili përfshin gjithë njerëzinë dhe gjithe dheun, ku do të sundojë rregulli dhe paqa. Komunizmi, një tjetër formë e universalizmit, thotë: Hiq dore nga vëllau tënd i gjakut dhe unë të bëj vëlla me të gjithë njerëzit e kësaj bote. Kjo bie erë diçka si ajo puna e shejtanit, i cili i paska thënë Krishtit: Bjer në gjunjë, falmu mua dhe unë të fal gjithë pasurinë e kësaj bote. Shkurt, çdo imperializëm, në emrin e një ideje universale, kërkon dhe ka kerkuar: Hiq dorë nga personaliteti tënd dhe nga lirija personale. Universalizmi ka patur gjithmonë një fuqi të madhe dhe tërheqëse në njerëzit e ligshtë. Mirëpo njeriu i fortë nuk e pranon. Ai gjen në kraharorin e tij, në familjen e tij, në popullin e tij një botë pa kufi, të cilin ai nuk e shkëmben me gjithë universin dhe me gjithë yjet e panumurt të tij. Nacionalisti i ka vënë vetes kufij nga jashtë, për të ruajtur personalitetin e vet dhe kërkon kufij të gjërë nga brenda, për me qenë i lirë në zhvillimin e natyrshëm të vlerave të tij, të prirjeve të tij, shkurt të karakterit të tij. Kurse universalisti thotë: bëju si unë; nacionalisti përkundrazi lyp: bëju siç je, me fjalë të tjera, qëndro besnik i vetvetes.
E vërtetë që nacionalisti pranon që njeriu ashtu edhe kombi nuk mund të qëndrojnë për vehte dhe të veçuar, se bëjnë pjesë në një tërësi, në të cilën secili është mbështetje dhe mbeshtetet. Por njerëzia, si një tërësi, është e interesueshme dhe mund të lartësohet vetëm atëhere kur individi ose kombi ka dhe di të ruajë karakterin e tij. Nacionalisti i jep një rëndësi të veçantë personalitetit dhe lirisë vetjake. E quan për detyrë të shenjtë të ruajë dhe zhvillojë vlerat e tij; e çmon vehten dhe kërkon që ta çmojnë dhe të tjerët; lyp që ta ketë fatin e vet vetë në dorën e tij; nuk duron të humbasë në turmën e popujve; nuk duron të bëjë pjesë si një numur i një shoqërie anonime; nuk do të fshihet prapa një pseudonimi, por del para botës me gjithë personin e tij përgjegjës, si ai burri i Tepelenes i cili çdo letër e mbaronte me këto fjale: “Unë, Aliu, shkruaj”.
Që ta presim shkurt në një mënyrë konkrete: Ne shqiptaret duam idenë tonë, virtytin tonë, të mirën ose vetveten tonë. Nuk e duam idenë e këtij, atij ose të gjithë botës. Siç thashë, nuk duam të jemi pjestarë në një shoqëri anonime. As duam të jemi dëkorative brenda suazës së një perandorije. Por në një çast fatzi ligështije dhe të krrupës së madhe na sulmoi armiku befas dhe na mashtroi. Hodhi fare të keqe midis nesh dhe organizoi anarkinë e shëmtuar. Ne, që si popull kemi dhënë burra shteti dhe ushtarë të mëdhenj, jetojmë sot turpin, të na heqin nga hunda të huajt! Por krenaria e jonë kombetare na ndalon të organizohemi nën priz të huaj. Vetëdija e jonë kombëtare dhe instikti i vetëmbrojtes na ndalojnë ndër këto kohe fort të rrezikshme të vrasim njeri tjetrin. Mbi te gjitha, nderi i jonë kombëtar na ndalon të gënjejmë, të intrigojmë dhe të shpifim! Jemi vëllezër. Duhet të bëhemi shokë!
Mihal Zallari
Gazeta Kombi 17.10.1943
Marrë nga libri: Elza Poga, Babai im Mihal Zallari, Sh.B. Albass, Tiranë, 2001(E dergoi per DIELLI-n, Saimir Lolja)
OKB, përplasen Serbia me Kosovën
NGA ILIR IKONOMI/
Beogradi dhe Prishtina shkëmbyen akuza të ashpra në debatin e zakonshëm për Kosovën të zhvilluar të enjten pasdite në Këshillin e Sigurimit të OKB-së në Nju Jork.
Ministri i Jashtëm i Serbisë Ivica Daçiç dhe ambasadorja e Kosovës në SHBA, Vlora Çitaku, u përplasën sidomos rreth çështjes së kandidaturës së Kosovës për t’u pranuar në UNESCO, një votim që përfundoi me dështim për Prishtinën.
Në komentet e saj, zonja Çitaku, vendi i së cilës këtej e tutje do të përfaqësohet në këtë debat në nivel ambasadori, akuzoi Serbinë për fushatën kundër pranimit të Kosovës në UNESCO, duke e quajtur këtë fushatë “shumë brutale, të pandershme, faktikisht të pasaktë dhe madje raciste.”
Nga Serbia, tha ajo, u përdor gjuha e urrejtjes e një niveli të paparë dhe të papranueshëm.
Ministri i Jashtëm serb i hodhi poshtë akuzat, duke i quajtur agresive komentet e ambasadores. Ai tha se zyrtarët e Kosovës duhet të jenë të kujdesshëm me gjuhën që përdorin. Zoti Daçiç gjithashtu e quajti të papranueshme pezullimin e marrëveshjes me Kosovën nga Gjykata Kushtetuese në Prishtinë.
Ai tha se Serbia e do dialogun me Prishtinën jo sepse Kosova është e pavarur, por për të zgjidhur çështjet praktike mes dy palëve.
Ambasadorja e Kosovës, u përgjigj se Kosova është vend i lirë e i pavarur dhe se kjo nuk do të ndryshojë. “Sa më shpejt ta kuptoni këtë, – tha ajo, – aq më mirë do të jetë për Serbinë.” Përsa i përket përpjekjeve të Kosovës për anëtarësim në UNESCO, zonja Çitaku tha se “ne nuk do të kërkojmë lejen tuaj për të ushtruar të drejtën tonë.” Herën tjetër, tha ajo, Kosova do t’ia dali të bëhet anëtare e UNESCO-s.
Në debatin me tone të ashpra, ambasadorja e Kosovës i bëri thirrje Serbisë të mos ndryshojë, siç tha ajo, “faktet e historisë.”
Para kësaj, dy përfaqësuesit shprehën pikëpamjet e tyre për dialogun mes dy vendeve.
Ministri i jashtëm serb kritikoi Prishtinën se sipas tij “ajo nuk respekton marrëveshjet dhe detyrimet që merr” dhe se nuk ka ndërmend për ta bërë më të mirë jetën dhe të drejtat njerëzore të serbëve në Kosovë.
Zoti Daçiç tha se kushtet politike, sociale dhe ekonomike në të cilën jeton komuniteti serb në Kosovë vazhdojnë të jenë shumë komplekse. Ai tha se Serbia pret që bashkësia ndërkombëtare dhe OKB-ja në veçanti, të vazhdojë të ofrojë ndihmë për ndërtimin e besimit, i cili, theksoi ai, është baza e vetme solide për të siguruar një jetë normale për të gjithë në Kosovë.
Ministri i Jashtëm i Serbisë tha se përpjekjet e njëanshme, të tilla si kërkesa për pranimin e Kosovës në UNESCO janë hapa në drejtimin e gabuar dhe dëshmojnë për mospërfilljen e marrëveshjeve të arritura, siç ishte rasti i pezullimit të marrëveshjes për krijimin e asociacioneve në komunitetet me shumicë serbe.
Ambasadorja e Kosovës në SHBA, Çitaku, tha se udhëheqësit në Kosovë përballen me shumë pyetje nga njerëzit dhe nga partitë politike lidhur me vlerën e dialogut, ndërsa Serbia vazhdon të ndryshojë qasjen e saj në varësi të rrethanave.
Në Kosovë, tha ajo, ka një trysni të fortë publike për të justifikuar angazhimin e qeverisë në dialogun me Serbinë. Vendimi i Presidentes së Kosovës për ta kaluar çështjen e asociacionit të komunave serbe në Gjykata Kushtetuese, do të krijojë qartësi, tha zonja Çitaku, e cila shtoi se duhet lejuar që Gjykata të bëjë punën e saj dhe të vlerësojë kushtetutshmërinë e marrëveshjes.
Zonja Çitaku tha se nganjëherë debati politik në Kosovë mund të jetë i ashpër, por askush nuk duhet të ketë dyshime për angazhimin e vendit ndaj vlerave dhe idealeve euroatlantike. E ardhmja evropiane e Kosovës është e pakthyeshme, tha ambasadorja.
Ajo kritikoi Serbinë se po e keqpërdor Këshillin e Sigurimit të OKB-së, duke u përpjekur të përhapë idenë se statusi i Kosovës nuk është i përcaktuar dhe se pavarësia është e përkohshme.
Zonja Çitaku tha se nuk është e nevojshme që Këshilli i Sigurimit të mblidhet çdo tre muaj për të përsëritur të njëjtat qëndrime të vjetra.
Në seancë folën edhe përfaqësues të vendeve të tjera anëtare. Përfaqësuesi i SHBA tha se gjendja në parlamentin e Kosovës është shqetësuese dhe bëri thirrje për ndaljen e dhunës. “Ne, – tha përfaqësuesi i SHBA, – kërkojmë që qeveria e Kosovës ta zgjidhë këtë gjendje dhe të mos lejojë asnjë aktivitet kriminal në institucionet e saj demokratike. Populli i Kosovës pret që përfaqësuesit e tij të zgjedhur të kthehen në parlament menjëherë.”(VOA)
Kompania amerikane drejt termocentralit të ri në Kosovë
-Nis projekti më i madh në Kosovë, 1 miliard investime, mijëra vende pune/
PRISHTINË, 20 Nëntor 2015/ Ministri kosovar i Zhvillimit Ekonomik, Blerand Stavileci ka bërë të ditur se Komiteti Drejtues Projektit TC Kosova e Re ka marrë vendim që kompania amerikane Contour Global të shpallet fitues i preferuar, për ndërtimin e kapaciteteve të reja gjeneruese me kapacitet 500MW, me një investim prej 1 miliard euro, duke arritur të finalizojë një projekt të nisur për më shumë se një dekadë.
Gjatë një konference për shtyp, ministri Stavileci tha se pas negociatave të suksesshme është arritur që IRR të ulet në 21.5% (nga 30% e vlerës së projektit) nga 23-27% sa ishte kërkesa paraprake e ofertuesit dhe shtoi se komponentët kryesore mbi të cilat janë zhvilluar negociatat ishin sigurimi i furnizimit me energji dhe kosto e përballueshme e tarifave të energjisë.
“Çështja e dytë me të cilën jemi dakorduar ka qenë kapaciteti gjenerues prej 500 MW dhe për më tepër kemi bërë disa avancime tjera të konsiderueshme siç është ndikimi në buxhetin e shtetit që do të jetë 0 % dhe shpresojmë që pas përmbylljes finale të këtij projekti t’i sjellim vendit një investim prej rreth 1 miliard euro, ku 30 % e tyre janë nga investitori privat, që do të jetë investimi më i madh në vendin tonë”, tha Stavileci.
Kreu i MZHE-së bëri të ditur se kjo njësi gjeneruese do ta ketë efiçiencën 40%, që është 3% më e lartë se sa ka qenë plani fillestar dhe i adreson në mënyrën më të mirë të mundshme problemet mjedisore dhe potencoi se janë arritur të gjitha synimet për të pasur një projekt brenda të gjitha standardeve të pranueshme, që do të fillojë t’i jap frymë ekonomisë së vendit tonë.
Sipas Stavilecit, faza e negocimit të marrëveshjeve të tjera deri në përmbylljen e marrëveshjes komerciale do të marrë një kohë prej 4-6 muaj, e cila do të pasohet nga faza e përgatitjes së pakos tenderuese për ndërtimin e termocentralit, dhe sipas planifikimit në fund të vitit 2016 apo në fillim të vitit 2017 pritet të nis ndërtimi.
Ai më tutje theksoi se ky kapacitet do të zgjidh problemin e energjisë në masë të madhe, ndërsa pritet të përfundojë nga fundi i vitit 2021 apo fillimi i vitit 2022, me çka është e lidhur edhe dekomisionimi i TC Kosova A.
Ministri nënvizoi se ky investim pritet të hapë mijëra vende pune dhe përçon një mesazh shumë të mirë edhe te investitorët e tjerë edhe te organizatat e tjera që janë partnere si Banka Botërore edhe organizatat e tjera ndërkombëtare financiare, të cilat e kanë pritur me padurim përmbylljen e suksesshme të kësaj faze, të këtij projekti vital për shtetin e Kosovës./b.j/