Tirana përkujton sot 102 vjetorin e ngritjes së flamurit, Bashkia rikthen bustin e Jeronim De Radës në kryeqytet/
Bashkia e Tiranës siç e ka kthyer tashmë në traditë prej 3 vitesh ka përkujtuar ngritjen e flamurit në Tiranë përmes një ceremonie të veçantë, organizuar pikërisht në vendin ku u ngrit ky flamur 102 vjet më parë.
Ngritja simbolike e flamurit ka hapur këtë ceremoni në të cilën morën pjesë personalitete të shquara të qytetit të Tiranës, përfaqësues të familjeve firmëtare të ngritjes së flamurit dhe shpalljes së pavarësisë, drejtues të pushtetit vendor, Prefekturës, të Qarkut të Tiranës, deputetë etj.
Kryebashkiaku Lulzim Basha duke u përulur me nderim dhe mirënjohje para firmëtarëve të pavarësisë dhe atyre që ngritën flamurin në Tiranë shprehu bindjen se duke bashkuar energjinë pozitive të shpirtit të Tiranës dhe Shqipërisë do të mundësohet tejkalimi i çdo pengese, çdo bllokimi, çdo vullneti të mbrapshtë dhe do të ecë përpara projekti i Shqipërisë moderne, Shqipërisë europiane.
“Duke bashkuar energjinë pozitive të shpirtit të Tiranës, shpirtit të tiranasve do të dimë të tejkalojmë çdo pengesë, çdo bllokadë, çdo bllokim, çdo vullnet të mbrapshtë, për të çuar përpara ëndrrën e shpallësve të pavarësisë në Tiranë, Vlorë e gjithë Shqipërinë, një Shqipëri moderne, një Shqipëri europiane, një Shqipëri të zhvilluar, ku shqiptarët të kenë mundësi dhe shanse të barabarta për të ndërtuar një jetë më të mirë. Sot, këto fjalë përballen me një realitet të cilin shqiptarët e përshkruajnë si të zymtë dhe me shpresë të vakët apo të paktë e shpeshherë pa shpresë. Frymëzimi që marrim nga kjo ngjarje duhet të na shërbejë për të mbledhur forcat tona, për të besuar tek e mira, për t’i thënë ndal së keqes kudo që e gjejmë, brenda vetes sonë, tek njëri-tjetri, tek kundërshtari politik. Ky frymëzim do të na shërbejë për tu bashkuar të gjithë rreth idealit të Shqipërisë europiane, për ta nxjerrë nga mjerimi ekonomik, nga varfëria, nga papunësia, nga padrejtësia, edhe nga dogma e demagogjia. Ky është dhe do të do jetë përjetë ideali flakadan i Tiranës dhe i patriotëve të Tiranës dhe gjithë Shqipërisë” – deklaroi kryebashkiaku Basha.
Kreu i Bashkisë bëri gjithashtu të ditur sot se në mbledhjen e radhës së Këshillit Bashkiak do të propozojnë shpalljen e Ditës së Falënderimit për komunitetin autokton tiranas dhe ngritjen e një komisioni i cili do të përcaktojë vendosjen e emrave të personaliteteve dhe familjeve të njohura tiranase, disa rrugëve dhe shesheve në kryeqytet. “Kam nderin t’ju njoftoj se do i propozoj Këshillit Bashkiak në mbledhjen e ardhshme miratimin e Ditës së Falënderimeve për komunitetin autokton tiranas, për këta njerëz të dyerve më të mëdha edhe se vetë Porta e Lartë, jo për nga dimensioni por për nga bujaria dhe fisnikëria që bënë të mundur pritjen dhe kthimin e këtij qyteti në kryeqytet edhe para dizenjimit si të tillë nga Kongresi i Lushnjës, përmes fisnikërisë, dhembshurisë, largpamësisë që treguan tek pritën bashkëatdhetarët e tyre të përndjekur, nga çdo cep, nga të katër anët e vendit nga shovinistët, nga fqinjët me synime grabitqare ndaj trojeve shqiptare. Po kështu, nismën për krijimin e komisionit për emërtimin e rrugëve të Tiranës, me qëllim që këta patriotë dhe dhjetëra e qindra patriotë të tjerë të Tiranës të kenë vendin, kumtesën, nderimin që meritojnë në rrugët e Tiranës, në sheshet e Tiranës, në jetë të jetëve, në kujtimin tonë dhe brezave që do të vijnë” – deklaroi zoti Basha.
Po sot, Bashkia e Tiranës në një ceremoni të veçantë ka rikthyer ne kryeqytet bustin e Jeronim De Radës. Busti, vepra e shkëlqyer e Artistit të Popullit Odise Paskali është lënë për vite në harresë. Sot, Bashkia e Tiranës e ka rivendosur në një shesh dinjitoz, ashtu siç e meriton qoftë personaliteti i De Radës, qoftë edhe vepra e shkëlqyer e Odise Paskalit.
Studiuesi i njohur Ndriçim Kulla theksoi se Jeronim de Rada konsiderohet si rilindësi i parë ose si themelues i Rilindjes tonë evropiane. Ndriçim Kulla i ka bërë një apel shtetit për një vëmendje më të madhe ndaj kulturës dhe personaliteteve të shquara të letrave shqipe. “Si një publicist dhe studiues, gjithmonë i kam mëshuar idesë tek rikthimi tek rrënjët, sepse rikthimi tek rrënjët nuk duhet të jetë një formalitet, por është diçka emancipuese dhe diçka e shëndetshme për shpirtin e gjithsecilit. Ne sot po kujtojmë, ose po i bëjmë më mirë homazhe një personaliteti shumë të njohur të kulturës sonë kombëtare, Jeronim De Radës. Ju përgëzoj për këtë aktivitet shumë të rëndësishëm dhe dua të them dhe të përsëris edhe njëherë se Jeronim de Rada konsiderohet si rilindësi i parë ose si themelues i Rilindjes tonë evropiane. Ai, larg atdheut të tij, në Kalabri ishte i pari që frymëzoi ose bëri, nisi përgatitjen kulturore për pavarësinë e Shqipërisë. Unë mendoj se ky njeri mistik e ndjeu se brenda shpirtit të tij, ndjeu një mision për ringjalljen e atdheut të tij, ashtu siç ndjeu edhe Dantja për Italinë, ndonëse ai s’e bëri të qartë kurrë këtë, nuk e sqaroi kurrë. Më vonë, ndoshta edhe për shkak të modestisë, ose nuk qe i sigurt për këtë mision, më vonë ai u shpreh se vlerësimi nuk më takon mua por ky vlerësim i takon gjuhës sonë kombëtare dhe ruajtjes së atdheut tonë të përbashkët, të Shqipërisë. Shkrimtari Ismail Kadare, në vitin 1964 ka thënë: “De Rada u kthye në pallatin e poezisë si një vajzë e freskët, por e belbët, sepse atdheu i tij në atë kohë ishte i humbur” dhe De Rada ishte protagonisti kryesor i cili i bëri të qartë Europës se Shqipëria ishte një vend fisnik, me sentimente të larta njerëzore të pakrahasueshme edhe me kombe të tjerë dhe ishte një vend që kishte heronj si Skënderbeu dhe heronj të tjerë që luftuan për vlerat e Europës që ne sot po aspirojmë të shkojmë si askush tjetër në rajonin e Ballkanit.
Këtë e quajmë vërtetë një kontribut, sepse gjithsecili duhet të krijojë një ndjeshmëri të lartë, kur De Rada në ato kushte kur atdheu nuk ekzistonte krijoi një atdhe që më mbrapa të krijonte një shtet. Gjithsecili nga ne sot duhet ta kthejë këtë moment në një moment reflektimi, që në kushtet e globalizmit, ne duhet të shikojmë të gjithë nga kemi ardhur, të shikojmë frymëzuesit, të shikojmë mendimtarët, t’i kujtojmë në ç’ kushte kanë luftuar për të krijuar Shqipërinë ashtu siç e kemi, por gjithsesi kemi një Shqipëri dhe një shtet të përbashkët. Unë duke përfituar nga rasti, pa e tepruar, dua t’ju bëj thirrje politikanëve, qeveritarëve edhe bashkiakëve, duke marrë shkas nga ky shembull shumë i mirë që duhet t’i kthehemi jo vetëm të kaluarës, por t’i kthehemi kulturës sepse vetëm me njerëz, vetëm duke mësuar, duke u edukuar, duke njohur njerëz si personaliteti i De Radës, ne do ta përballojmë më mirë globalizmin, të cilin neve nuk e ndalojmë dot, por e kemi pranuar dhe jemi përshtatur dhe vetëm në këtë mënyrë ne do të ruajmë identitetin tonë kulturor dhe ndërkombëtar” – theksoi studiuesi Ndriçim Kulla.