Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

DASH: Pengimi i Kuvendit në Kosovë, problem serioz

by

Ne Foto: Sekretari amerikan i Shtetit, John Kerry/

Një nga problemet më serioze të të drejtave të njeriut në Kosovë, gjatë vitit 2015, ka qenë pengimi, herë-herë i dhunshëm, i Kuvendit nga deputetët opozitarë në periudhën tetor-dhjetor, thuhet në raportin e Departamentit Amerikan të Shtetit për të Drejtat e Njeriut në vitin e kaluar.Pengimi i tillë, thuhet në raport, ka bllokuar debatin e lirë dhe kalimin e ligjeve.Korrupsioni endemik në qeveri dhe në sektorin privat, si dhe mungesa e ndëshkimit për vepra korruptive kanë qenë po ashtu problem i madh i të drejtave të njeriut, thuhet në raport.Sipas të njëjtit, dhuna dhe diskriminimi shoqëror kundër pjesëtarëve të pakicave etnike, grave, personave me aftësi të kufizuara dhe anëtarëve të komunitetit lesbik, homoseksual, biseksual dhe transseksuaal kanë përbërë shqetësimin e tretë.

Problemet e tjera, sipas raportit, përfshijnë keqtrajtimin e raportuar të të burgosurve, frikësimin e mediave nga zyrtarët publikë dhe elementet kriminale dhe dhunën kundër personave të zhvendosur që kanë kërkuar të kthehen në shtëpitë e tyre.

Në raport theksohet se dialogu për normalizimin e marrëdhënieve midis Kosovës dhe Serbisë ka vazhduar, se strukturat gjyqësore në veri të Kosovës kanë nisur të integrohen në strukturat shtetërore dhe se kryeministri i Kosovës, Isa Mustafa, ka nënshkruar Marrëveshjen e Stabilizim Asociimit me përfaqësuesen e lartë të Bashkimit Evropian, Federica Mogherini.Në aspektin global, Departamenti amerikan i Shtetit ka vlerësuar se bota po përballet me krizë të qeverisjes, pasi “edhe qeveritë, edhe aktorët joshtetërorë shkelin të drejtat e njeriut”.

Në raport, sekretari amerikan i Shtetit, John Kerry, ka thënë se Uashingtoni sheh veprime të aktorëve shtetërorë dhe joshtetërorë “për të mbyllur hapësirën për shoqërinë civile, për të shtypur median dhe lirinë në internet, për të margjinalizuar zërat e opozitës dhe, në raste më ekstreme, për të vrarë njerëz ose për t’i larguar ata nga shtëpitë”.Kerry po ashtu ka denoncuar qeveritë për goditje ndaj lirisë së shprehjes “duke burgosur gazetarë që kanë shkruar artikuj kritikë” ose duke sulmuar organizatat joqeveritare për gjoja promovim të ideologjive të huaja.

Kerry ka thënë se aktorët joshtetërorë, si militantët e Shtetit Islamik dhe ata të Boko Haramit, në vitin 2015, kanë kryer krime kundër njerëzimit, përfshirë gjenocid.Ai ka thënë se grupet e tilla “kanë lulëzuar në mungesë të institucioneve të besueshme dhe efektive shtetërore”.Përgatiti: Valona Tela

Kosova në takimet e FMN dhe BB në Uashington

by

UASHINGTON, 13 Prill 2016/ Delegacioni i Republikës së Kosovës i kryesuar nga Ministri i Financave Avdullah Hoti, po merr pjesë në takimet e rregullta vjetore të Fondit Monetar Ndërkombëtar dhe të Bankës Botërore, të cilat po zhvillohen në Uashington D C.

Njoftimi i sapodërguar thekson se, përveç pjesëmarrjes në sesionin plenar të Fondit Monetar Ndërkombëtar dhe Bankës Botërore delegacioni i Kosovës do të zhvilloj takime edhe me zyrtarë të lartë të FMN-së dhe BB-së, me zyrtarë të Departamentit të Thesarit Amerikan dhe përfaqësues të Departamentit të Shtetit Amerikan, homologë të vendeve të ndryshme,  si dhe me përfaqësues të institucioneve të tjera financiare ndërkombëtare./b.j/

Kosovë-Misioni i OSBE-së, promovim dialogut mes komuniteteve

by

Foto Gazeta DIELLI – Behlul Jashari: Kryeqyteti i Kosovës Prishtina, pranverë 2016/-Në Republikën e Kosovës me gjithësej 38 komuna, 27 janë me shumicë shqiptare, ndërsa 10 komuna janë me shumicë serbe,  5 prej tyre të reja. Një komunë është e banuar me shumicë nga komuniteti turk/

 PRISHTINË, 13 Prill 2016-B.Jashari/ Misioni i OSBE-së ndihmon komunat në Kosovë që të promovojnë dialogun mes komuniteteve. “Me ndihmën e Misionit të OSBE-së në Kosovë, komunat Prishtinë, Graçanicë, Shtime, Lipjan, Fushë Kosovë dhe Obiliq do të nënshkruajnë sot një deklaratë që ka për qëllim avancimin e dialogut dhe bashkëpunimit mes komuniteteve”, thekson njoftimi i dërguar.

 Bëhet e ditur se, “me këtë deklaratë, komunat zotohen që të rrisin ndërveprimin në mes të komuniteteve të ndryshme që jetojnë në këto komuna përmes zbatimit të projekteve dhe aktiviteteve të përbashkëta”.

 Shefi i Misionit të OSBE-së në Kosovë, Jean-Claude Schlumberger, dhe kryetarët e komunave Prishtinë, Graçanicë, Shtime, Lipjan, Fushë Kosovë dhe Obiliq, do të flasin në këtë ngjarje, e cila zhvillohet në mesditë në kryeqytetin e Kosovës.

 Një nga këto komuna, Graçanica, banohet me shumicë nga komuniteti pakicë serb. 

Në Republikën e Kosovës me gjithësej 38 komuna, 27 janë me shumicë shqiptare, ndërsa 10 komuna janë me shumicë serbe,  5 prej tyre të reja – Graçanica, Kllokoti, Ranillugu, Parteshi dhe Mitrovica e Veriut, të formuara sipas Propozimit Gjithpërfshirës për Zgjidhjen e Statusit të Kosovës të kryenegociatorit Martti Ahtisaari – emisarit special të OKB-së.

Po sipas Paketës Ahtisaari, katër komunave me shumicë serbe që ekzistonin në Kosovë, Leposaviçit, Zubin-Potokut dhe Zveçanit, që të trija në veri, dhe Shtërpcës në jug, i është shtuar edhe një tjetër – Novobërda, me zgjërimin e saj.

Një komunë, Mamusha, është e banuar me shumicë nga komuniteti turk, një nga minoritetet tjera në Kosovë. Këtë komunë gjatë ditës së sotme do ta vizitojë kryeministri kosovar, Isa Mustafa.

Sipas regjistrimit të popullsisë të pranverës 2011, në Kosovë, pa veriun, u numëran 1.739. 825  banorë rezidentë,  92.93 % shqiptarë. Pjesa tjetër e përqindjeve iu takon komuniteteve pakicë, 1.58% boshnjakë, 1.47 %  serbë, 1.08 % turqë, etj.

Por, numri i banorëve-shtetasëve të Kosovës është më i madh, meqë regjistrimi i popullsisë nuk ka përfshirë një të tretën e kosovarëve që vlerësohet se jetojnë e punojnë jashtë vendit.

Përqindja e komunitetit serb do ishte më e lartë me përfshirjen e veriut në regjistrim. Në veri të Mitrovicës dhe tre komuna tjera veriore – Leposaviç, Zubin Potok e Zveçan, ku është refuzuar regjistrimi i popullsisë, sipas një shifre që e kanë përmendur autoritetet kosovare, jetojnë rreth 40 mijë serbë.

Deputeti kosovar në programin studimor në SHBA

by

-Deputeti i Kuvendit të Republikës së Kosovës, Veton Berisha merr pjesë në programin studimor në Kongresin e SHBA-ve, dedikuar rolit të parlamenteve në forcimin e integritetit publik/PRISHTINË, 13 Prill 2016/Me ftesë të Komisionit për Partneritet në Zhvillimin e Demokracisë (HDP) të Kongresit të Shteteve të Bashkuara të Amerikës, në Uashington, deputeti i Kuvendit të Republikës së Kosovës, Veton Berisha, është duke marrë pjesë në programin studimor me temën: “Roli i parlamenteve në forcimin e integritetit publik”.Programi është organizuar në partneritet me Institutin Kombëtar Demokratik (NDI) dhe është i përqendruar në çështjet që kanë të bëjnë me etikën parlamentare, integritetin institucional dhe rolin që duhet të ketë parlamenti për të forcuar legjitimitetin e institucioneve dhe për të ruajtur besimin e publikut.Deputeti Veton Berisha, si përfaqësues i Kuvendit të Republikës së Kosovës në këtë program studimor, merr pjesë me deputetët e parlamenteve të shtatë shteteve nga katër kontinente. Pjesëmarrja në këtë ngjarje është një rast i mirë për të shkëmbyer përvojat kuvendore të Kosovës me praktikat e vendeve tjera pjesëmarrëse, thekson njoftimi i dërguar.Në kuadër të programit do të diskutohet edhe për sfidat me të cilat ballafaqohen parlamentet në tranzicion, përpjekjet për të ndërtuar mekanizmat e nevojshëm për të ushtruar me efikasitet funksionin ligjvënës, dhe veçanërisht rolin mbikëqyrës në raport me Qeverinë. Programi përqendrohet edhe në rrolin dhe mënyrën e funksionimit të Komisionit të Etikës, formën e rregullimit të çështjeve që ndërlidhen me deklarimin e pasurisë, deklarimin e kontributeve gjatë fushatës zgjedhore, konfliktin e interesit dhe standardet etike për përfaqësuesit e zgjedhur.

Ky program synon të kontribuojë në nxitjen e diskutimeve rreth parimeve dhe normave të etikës në Kuvendin e Republikës së Kosovës, si dhe rritjen e mbështetjes për iniciativat që kanë për qëllim rishikimin e Kodit të Mirësjelljes dhe krijimin e mekanizmave efikas që sigurojnë vënien në zbatim të standardeve më të larta të etikës parlamentare.

 Gjatë zhvillimit të punimeve të këtij programi studimor, deputeti Veton Berisha, nga komuniteti egjiptian, ka pasur takime me kongresmenë dhe zyrtarë të lartë të administratës së Kongresit, duke u njohur nga afër me parimet dhe normat e etikës parlamentare në SHBA./b.j/

Kosovë-Katër prokurorëve Çmimi për Drejtësi “Sali Çekaj”

by

PRISHTINË, 13 Prill 2016/ Katër prokurorë, për kontributin e dhënë në ndërtimin e sistemit të pavarur të drejtësisë në Kosovë, pranuan sot Çmimin për Drejtësi “Sali Çekaj”.Me  propozimin e Zyrës së Kryeprokurorit të Shtetit, Ministria e Drejtësisë në shenjë mirënjohje për kontributin e dhënë në ndërtimin e sistemit të pavarur të drejtësisë në Kosovë, iu ndau Çmimin për Drejtësi “Sali Çekaj” prokurorëve: Drita Hajdari, nga Prokuroria Speciale e Republikës së Kosovës, Admir Shala, nga Prokuroria Speciale e Republikës së Kosovës, Blerim Isufaj nga Prokuroria Speciale e Republikës së Kosovës dhe Fikrije Fejzullahu nga Prokuroria Themelore në Prishtinë. Kryeprokurori i Shtetit, Aleksandër Lumezi, i cili ua dorëzoi sot prokurorëve çmimin e ndarë nga Ministria e Drejtësisë, i falënderoi këta prokurorë, duke vlerësuar dhe çmuar punën dhe angazhimin e tyre të palodhshëm në ndërtimin e sistemit të pavarur prokurorial dhe në forcimin e sundimit të ligjit në vendin tonë.Ministria e Drejtësisë çdo vit ndanë Çmimin “Sali Çekaj”, me qëllim të promovimit dhe shpërblimit të punës së individëve në fushën e drejtësisë në Kosovë, për kontributin e dhënë në avancimin e çështjeve ligjore me rëndësi, promovimin e të drejtave të njeriut, për arritjet e reja në fusha të ndryshme të drejtësisë, promovim të sundimit të ligjit dhe të arritura tjera./b.j/