Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Anamalasit u mblodhën si Shiponjë rreth Flamurit Kombëtar

by

Nga Keze Kozeta Zylo/
Në mjediset lluksoze të Hotelit “Hilton” në Staten Island, New York shoqata e mirënjohur shqiptaro-amerikane “Ana e Malit” organizoi 102 Vjetorin e Pavarësisë së Shqipërisë dhe të Ditës së shenjtë të Flamurit.
Qindra shqiptarë me vajzat si Zana dhe djemte si azgan së bashku me prindërit e tyre vinin grupe-grupe kuq e zi për të festuar 102 vjetorin e Pavarësisë së Shqipërisë. Në një atmosferë krejtësisht festive dëgjohej Gjuha e bukur Shqipe në fjalët e mirëseardhjes nga organizatorët e shkëlqyer me kryetar Ismet Kurtin, n/kryetar Xheladin Zenelin dhe Fatmir Kallaba si dhe bordin drejtues. Programin e ka hapur znj.Leonarda Gjoni në fjalën e të cilës plot kulturë ndihej shpirti i zjarrtë i patriotizmit, dashuria për gjuhën Shqipe dhe vendin e të pareve të saj.
Moderatori i programit ishte Flamur Anamali, emri dhe mbiemri i të cilit është binom i simbolit të shenjtë të shqiptarëve, që në syte e mi dukej dhe Flamur dhe Anamalas si krah shqiponje në Flamur. Me zë burrëror dhe me një shqipe të bukur ai ftoi të gjithë të pranishmit për të kënduar dy Hymnet kombëtare, shqiptare dhe amerikane. Hymnet janë interpretuar nga nxënësja e shkëlqyer e shkollës Shqipe “Alba Life”, nga artistja e vogël që premton shumë në të ardhmen Kristina Melo. Pas hymneve kombëtare u mbajt një minutë heshtje në shenjë nderimi dhe respekti për të gjithë ata që kanë dhënë jetën për Lirinë e Atdheut.
Znj.Leonarda Gjoni ka prezantuar para publikut filantropistin dhe bankierin nga më të suksesshmit amerikan shqiptarin Richard Lukaj “Nderi i Kombit” duke thënë se ai është një superstar. Ai pasi i ka uruar pjesëmarrësit për Festën e Flamurit tha se kam kënaqësi që ndodhem midis bashkatdhetarëve të mi Anamalas dhe i falënderoj për një punë të palodhur që po kryejnë në shërbim të Kombit. Ne duhet ta mbështesim shoqatën Ana e Malit për misionin e saj fisnik, të bashkuar përballë integrimit. Shoqata “Ana e Malit” me seriozitetin e duhur ka ditur të përballojë sfidat përpara dhe të jetë pjesë e përfaqësimit të denjë shqiptar dhe patriotik në rrugë demokratike. Ajo mbron interesat kombëtare dhe ky do të jete dhe në të ardhmen shërbimi më i madh që i bëhet Kombit.
Fjalimi i Z.Lukaj ishte mbresëlënës, plot dashuri për Kombin, Flamurin dhe vizion të qartë për Diasporën dhe të ardhmen e Mëmëdheut tonë.
Në skenë ka dalë përsëri Kristina Melo e cila ka përshëndetur të pranishmit në emër të gjithë mësueseve, prindërve dhe nxënësve të Shkollës Shqipe Alba Life me këngën “Gjuha Shqipe” që është dhe himn i shkollës. Interpretimi i saj dhe bukuria melodioze e këngës nën drejtimin e prof.Petrika Melos ka bërë që të mirëpritet me duartrokitje në këtë ditë të shenjtë.
Në këtë mbrëmje përshëndeti Konsullja e Përgjithshme e Kosovës në New York, Vlora Çitaku e cila ishte dhe folësja kryesore. Znj. Çitaku iu ka uruar gjithë pjesëmarrësve: Gëzuar festën e Flamurit, Gëzuar 102 Vjetorin e Pavarësisë së Shqipërisë. Ambasada e Kosovës është dhe shtëpia juaj ngase ne jemi vëllezër dhe motra që flasim një gjuhë, kemi të njëjtat doke dhe zakone, prandaj jeni më se të mirëpritur. Gjithë Kosova është shumë mirënjohëse për kontributin tuaj të jashtëzakonshëm në Pavarësinë e Kosovës. Znj. Çitaku solli dhe një detaj të bukur për emrin e saj shumë domethënës, Vlora, emër të pagëzuar nga gjyshi i saj i cili ishte pjesëmarrës në ditën e Pavarësisë në Vlorë.
Ambasadori Ferit Hoxha, përfaqësues i përhershëm i Republikës së Shqipërisë ka përshëndetur të gjithë të pranishmit në emër të shtetit shqiptar dhe iu ka uruar atyre: Gëzuar Festën e Flamurit! Ambasadori Hoxha foli me krenari për arritjet e Shqipërisë në arenën ndërkombëtare.
Me duartrokitje është mirëpritur Ansambleisti i shtetit të Nju Jorkut, shqiptari i parë që është ulur në karrigen e Senatit të Nju Jorkut, z.Mark Gjonaj, i cili pasi uroi pjesëmarrësit për 102 Vjetorin e Pavarësisë tha se bekuar qofshin prindërit që marrin me vehte në këto ditë festash kombëtare dhe fëmijet e tyre. Me këtë veprim ata transmetojnë tek brezat traditat dhe vlerat e mrekullueshme të Kombit shqiptar. Z.Mark Gjonaj me prindër me origjinë nga Ulqini i cili ndihej si në shtëpinë e tij në këtë festë, por në fakt ai kudo që vete e ka vendin në krye të qoshesë, ngase ai është i të gjithë shqiptarëve dhe i ka lënë vend vehtes për punën e palodhur, i kudogjendur dhe përkushtimin qe ka karshi bashkatdhetarëve dhe Kombit.
Në emër të komunës së Ulqinit ka përshëndetur z.Fatmir Gjeka njëherazi dhe kryetar i Komunës së Ulqinit. Z.Gjeka sillte nga larg bukën e Ulqinit, bukën e Mëmëdheut për ta ndarë së bashku në këtë pervjetor të Pavarësisë. Z.Gjeka tha se Diaspora është një urë lidhëse midis Amerikës dhe Atdheut dhe për këtë ju jemi shumë mirënjohës për gjithcka që ju keni bërë dhe vazhdoni me këmbëngulje dhe dashuri të ecni në gjurmët e të parëve tuaj. Ne ju jemi mirënjohes për kontributin tuaj dhe ju falënderojmë në emër të gjithë Komunës së Ulqinit duke premtuar se do të vazhdojmë lidhjet tona të ngushta për çështjen kombëtare foli plot krenari vazhdoi z.Gjeka.

Të njëjtën gjë do bëja dhe unë si amerikan për të mbrojtur Flamurin tim

Me mjaft interes është pritur fjalimi i Kongresistit republikan amerikan z.Michael Grimm i zgjedhur për të tretën herë në Kongresin Amerikan. Me një fjalim të shkurtër dhe thënë gjithçka pasi i uroi gjithë pjesëmarrësit ai falënderoi gjithë shqiptarët kudo që janë për mbështetjen maksimale që i kanë dhënë në rizgjedhjen e tij në Kongresin Amerikan dhe për dashurinë që keni për Amerikën. Përballë meje vazhdoi Kongresisti Grimm ndodhet Droni me Flamurin Kuq e Zi, Ismail Qemalin dhe Isa Boletinin që u lëshua nga ajri në stadiumin e sportit në Serbi. Sportistët shqiptarë e mbrojtën me gjoks dhe zemër Flamurin Shqiptar, Flamurin e tyre, të njejten gjë do të bëja dhe unë dhe çdo amerikan për Flamurin e tyre. Fjalimi i tij u ndërpre me duartrokitje ku në sytë e pjesëmarrësve shprehej respekti për z.Grimm i cili merr pjesë vazhdimisht në aktivitetet e shqiptarëve dhe i mbështet ata kudo.
Në këtë mbrëmje nderonin përfaqsues të organizatës “Rrënjët” me president z.Marko Kepi, nga shoqata Dibra me kryetar z.Musa Pacuku. Gjithashtu kishte dhe përfaqsues nga Fondacioni Plavë e Guci me kryetar Esad Gjonbalaj, njëherazi dhe koordinator i shoqatave në SHBA, i cili në broshurën që ishte shpërndarë rreth aktivitetit të shoqatës “Ana e Malit” si dhe dhurimet që ishin bërë nga afaristë, kompani dhe biznesmenë të ndryshëm, në tekstin e përshëndetjes thuhej se: Shoqatat tona me veprimtari në SHBA me origjinë nga trojet tona etnike nen Malin e Zi, kanë më shumë se një vit që bashkëpunojnë me pikësynim unifikimin e veprimtarive në një zë të vetëm në aspektin Kombëtar.
Sot në trupin koordinues të shoqatave bashkëpunuese kemi 9 shoqata. Ne shpresojmë dhe besojmë në unifikimin e tërësishëm të Diasporës Shqiptare në SHBA në një zë të vetëm, zë që do të jetë ma i fortë më i fuqishem në sherbim të interesave nacionale shqiptare në tërësi.
Në fund të përshëndetjeve të ndryshme e ka marrë fjalën i zoti i shtëpisë kryetari i shoqatës “Ana e Malit” z.Ismet Kurti i cili me një shqipe të bukur dhe fjalë mirësjelljeje ndër të tjera tha se: Kam nderin që në emër të të gjithë komunitetit Anamlas , kryesisë dhe bordit të shoqatës të falënderoj për pjesëmarrje të gjithë mysafirët e mbrëmjes të cilët me prezencën e tyre e rritën madhështinë e mbrëmjes sonë.
Prandaj në këtë ditë të shenjtë, unë bashkë me ju dhe të gjithë shqiptarët anë e mbanë botes, duhet së pari të shprehim nderimet dhe mirënjohjen më të lartë përpara veprës së dëshmorëve, të cilët dhanë jetën për të na mundësuar të gëzojmë Lirinë që kemi sot. Historikisht, Kombi ynë dhimbjen gjithmonë e ktheu në forcë. Duke marrë parasysh antagonizmat dhe përçarjet e tanishme politike, si në Shqipëri, në Kosovë, por edhe në të gjitha trojet shqiptare në Ballkan, dëshmorët janë ata që duhet të na bashkojnë të gjithëve pasi ata luftuan për një ideal të shenjtë, megjithëse ato vinin nga të gjitha krahinat dhe u përkisnin rrymave të ndryshme politike. Qëllimi i vetëm dhe i përbashkët i tyre ishte: të krijojnë një Atdhe të denjë dhe të pavarur për shqiptarët. Pavarësia është fituar me luftë kur ishte nevoja, ndërsa sot dashuria për Atdhenë dhe për Pavarësi, do të duhej të tregohej me punë e vepra. Sot, kombi shqiptar ka nevojë për vizionarë, politikanë dhe aktivistë që me punë përpiqen të çojnë në vend amanetet e të parëve dhe të shpërblejnë gjakun e derdhur të dëshmorëve për Lirinë dhe Pavarësinë e kombit shqiptar. Mysafirë të nderuar, më lejoni ta mbyll duke ju thënë se shumë sfida të mëdha ende ngelen para nesh dhe ne të gjithë së bashku duhet të jemi të përgatitur për të bërë përpjekjet dhe sakrificat e duhura për t’i kaluar ato. Gëzuar Ditën e Pavarësisë dhe Zoti e bekoftë Shqipërinë dhe Kombin shqiptar!
Pas përshëndetjeve znj. Naile Tahir Taipi me veshje të bukur të krahinave ka prezantuar grupin artistik “Tradita”. Në sallë kanë hyrë vajzat me kostumet e bukura tradicionale me ngjyra marramendëse dhe burrat me kostumet burrërore të grupit artistik “Tradita” me president Selaudin Gjeloshi të cilët kishin ardhur nga Ulqini me ftesë të Anamalsve të Amerikës për të festuar së bashku Ditën e Flamurit. Pamja e tyre magjike, vallëzimet profesioniste ndezën sallën me duartrokitje të cilët shkrepnin aparatet, filmonin dhe valëvisnin flamujt kuq e zi. Vajza e talentuar nga Shkodra Egzona Salaj me zërin e saj melodioz shoqëronte grupin “Tradita” duke interpretuar aq bukur dhe me pasion këngën:
Ty Flamur të duam shum’/ Ti për ne je nën’ e bab’/ Për ty gjakun derdhim lum’/ O Flamur i kuq me shkab.
Me duartrokitje kanë dalë në skenë artistët e mirënjohur të komunitetit Shaban Lajci si Ismail Qemali, Tom Gjergji si Isa Boletini dhe aktori Agim Rugova të cilët me një tekst mjaft të përzgjedhur interpretuan mjeshtërisht përballë pamjes së Dronit që kishte Flamurin, Ismail Qemalin dhe Isa Boletinin. Mbrëmjes nuk i mungoi dhe humori i hollë shkodran interpretuar nga Bujar dhe Besnik Cinari.
Mbrëmja madhështore u mbyll nën tigujt e Valles së Shqipeve e cila ishte një shfaqje e mrekullueshme dhe arriti kulmin me valëvitjen e Flamurit nga një valltar i cili e çoi në majë, që dukej sikur shpoi tavanin dhe doli në kupë të qiellit për Bashkimin e Kombit. Ndërsa valltari valëviste Flamurin, publiku thoshte me brohorima: Prapë, prapë, me një fjalë të përsëritej Vallja e Shqipeve dhe ashtu u bë. Gjithë salla u çua në këmbë duke mbajtur Flamurin ndër duar, Flamur që pothuajse mbulonte pistën e sallës komplet.
Pjesëmarrësit kaluan një natë të mrekullueshme, të paharruar, të cilët u argëtuan nën tingujt e muzikës DJ Sam, nën orkestracionin e Tom Lleshaj me këngëtarë Shkëlzen Jetishi, Suad Shaptafi nga grupi “Tradita” dhe Valdet Luka.
Anamalasit u mblodhën atë natë si shqiponjë rreth Flamurit Kombëtar.
25 Nëntor, 2014
Staten Island, New York

Qyteti i Nju Jorkut stoliset me flamuj kuq e zi me rastin e Ditës së Flamurit

by

Më shumë se 800 flamujt që mbajn shqiponjën e zezë me dy koka në një sfond të kuq janë janë vendosur qysh dje në disa nga rrugët kryesore në zemër të qytetit të Staten Island dhe Bronxit- Nju Jork. /
Nga Beqir SINA – New York/
BRONX – STATEN ISLAND NYC – Lagjia më e madhe e shqiptarëve të Nju Jorkut, Bronxi, për të pestën herë dhe për herë të parë edhe ishulli i Staen Island ku mendohet se jetojnë afro 30 mijë shqiptarë, është përfshirë këto ditë nga atmosfera e festave të nëntorit, teksa i gjithë qyteti është zbukuruar e hijeshuar, i mbushur përplotë nga ngjyrat kuq e zi të flamurit tonë kombëtar.
Zbukurimet e “kryeqytetit” të ri të Shqiptarëve të Amerikës, Nju Jorkut, janë bërë në të gjithë shtëpitë klubet, e lokalet e shqiptarëve, në disa prej rrugeve më të frekuentuara nga shqiptarët si në Bronx, Bruklin, Staten Island, Kuins, e Longa Island.
Mirëpo ajo që të bie në sy menjëherë sa hynë në zemër të qytetit natyrisht që për të 5-tin vit me rradhë janë dy anët e rrugët e hijeshuar këto ditë me flamurin kuqë e zi, në segmenti e rrugës që mbanë emrin Nëna Tereses ” Lydig Avenue dhe Hollanda Avenue,” Avenyja e famshme “Arthur Avenue”, si edhe anët e rrugëve që kanë shumë biznese e dyqane shqiptare, si në “Morris Park”, “Huge Avenue”, “187 Street”, “William Bridge”, “Pelham Park”,etj.
Këto rrugë dhe disa të tjera në ishullin Staten Island gjithë këtë javë, janë lajmëtarët e festës së pavarësisë, teksa janë të stolisure me flamurin kuq e zi. Ndërkohë, që edhe kompani argëtimi, shoqatat e arganizatat e komunitetit kanë ditë që kanë nisur përgatitjet për mbrëmjet festive, dhe kan paraljmëruar koncerte me këngëtar edhe nga Kosova, Shqipëria dhe trevat e tjera shqiptare
Dy qytet më të mëdha me popullsi shqiptare në Nju Jork ishulli i Staten Island dhe Bronxi janë mbuluar këto ditë në vigjilje të 28 Nëntorit Ditës së Flamurit – Shpalljesë Pavarësisë së Shqipërisë me flamuj kuq e zi, dhe përkrah tyre në shenjë falënderimi ndaj SHBA-së për terë kontributin e saj që ka dhanë dhe që vazhdon të jap për Kosovën e çështjen shqiptare me flamuj amerikan.
Vendosja e flamujve është bërë i mundëshëme nga inisiativa Mark Gjonaj – i cili është dhe sponsorizuesi kryesorë me kontributin financiar edhe atë të veprimtarëve të tjerë të komunitetit si : Harry Bajraktari , Ben Çelaj, Beqir Kuka, dhe të rinjëve dhe të rejave nga Rrënjët Shqiptare (Marko Kepi president) dhe nga bordet e komuniteteve dhe disa anëtarëve të Këshillit të Qytetit.
Mark Gjonaj-Zëri Shqiptar në Asamblenë e Shtetit te New Yorkut, gjithmonë veprues për komunitetin tonë për dy vjet skuq sheshet dhe rrugët e Bronxit me Flamujt kuq e zi me rastin e Festës së Pavarësisë së Shqipërisë
Me këtë rast krenaria shqiptare – flamuri kuq e zi mund të shihet, këto ditë vigjilje duke u valivitur krah atij amerikan – lart mbi shtyllat e ndriçmit në rrugët e qyteti të Bronxit dhe ishulllit të Staten Island në nder të 102 Vjetorit të Shpalljes së Pavarësisë të Shqipërisë, Ditës së Flamurit – 28 Nëntorit 1912.
Këtë vit më shumë se 800 flamujt që mbajn shqiponjën e zezë me dy koka në një sfond të kuq janë janë vendosur qysh dje në disa nga rrugët kryesore në zemër të qytetit të Staten Island dhe Bronxit- Nju Jork.
“Kjo i jep bashkësisë shqiptare, këto ditë feste edhe një ndjenjë tjetër të krenarisë sonë kombëtare, kur këto ditë në prag të festës së madhe Ditës së Flamurit, kemi për të parë këto flamuj kuq e zi – duke u valëvitur, përkrah flamurit amerikan si një faleminderim për atë çkan bërë për ne Shtetet e Bashkuara”, thotë Mark Gjonaj – i cili shtonë “Se kjo është diçka që së bashku po e bëjmë për herë të pestë çdo nëntorë në Nju Jork.”
Mark Gjonaj, ose siç njihet ndryshe edhe si asamblesiti i parë shqiptarë në historinë e emigracionit shqiptarë në Shtetet e Bashkuara të Amerikës, – i cili në fund të javës do të organizojë me shpenzimet e tij një festim darkë, e hapur për publikun e gjerë, në Nju Jork, darkë, e cila do të mbahet në Caterers Maestro-së në Bronx – Nju Jork, thotë se :”Ne jemi të inkurajuar të gjithë për të marrë pjesë këto ditë në shumë aktivitete të komunitetit shqiptarë në nderim të ditës së flamurit kuq e zi” dhe shtonë se “shqiptaro amerikanët dhe jo-shqiptarët pra komunitetet e tjera, gjithashtu, janë ftuar të marrin pjesë në ditën e kremtimit të pavarësisë tonë, për të festuar së bashku idealet tona të përbashkëta – të lirisë dhe të demokracisë.”
Sipas Gjonaj, jo zyrtarisht në zonën e Tri-Shtetshit, mendohet se janë mbi 250.000 shqiptarë dhe afërsisht 100,000 jetojnë në lagjet Bronx, Kuins, Bruklin dhe Staten Island në Nju Jork. Është e rëndësishme për shqiptarët që të vazhdojnë për të festuar kulturën e tyre dhe trashëgiminë,” ka deklaruar Gjonaj .

TRAGJEDI SHQIPTARE NË NJU XHERSI, NDËRROI JETË ANILA LLUKAJ

by

* ANILLA LLUKAJ NDËRROI JETË PAS AKSIDENTIT/
* SHËRBIMET FUNERALE ORGANIZOHEN TË MARTËN ME 25 NËNTOR, VARRIMI TË MËRKURËN/
* APEL KOMUNITETIT: NDIHMOJENI FAMILJEN TË KRYEJ RITET! ËSHTË NJË RAST I VECANTË, SAPO KISHIN ARDHË NË AMERIKË/

Në Nju Xhersi ka ndodhur një tragjedi në një familje Shqiptare. Anila Llukaj me familjen sapo kishte ardhë në Amerikë dhe ende nuk ishte sistemuar në punë
Anila u godit nga nje makine ndersa kalonte rrugen.Aksidenti ka ndodhur në mbrëmjen e së premtes të 14 Nëntorit, ne Paramus Road, tek hyrja e Bergen Community College.Shoferi që e ka goditur nuk ka ndaluar dhe policia e ka shpallë në kërkim.
Anila mbërriti gjallë në Hackensack Hospital, por me gjithë përkushtimin e personelit mjeksor, ajo nuk mundi ta kapërcente gjendjen e rëndë.
Familja e Anilës erdhi në Amerikë para tre muajësh pasi kishte fituar Lotarinë Amerikane. Dy djemtë i kishte sistemuar në shkollë, ndërsa ajo me bashkeshortin ishin në kërkim të një pune. Fatkeqsisht kjo tragjedi ndryshoi jetën e kësaj familje.
Shqiptarët duhet të luten për shpirtin e Anilës dhe sipas traditës tonë duhet ndihmuar.
Shërbimet funerale për të ndjerën do të kryhen ditën e Martë, 25 nëntor, pas dite, nga ora 5 deri në 8 pm dhe të Mërkurën 26, nga 10 deri në 11 para dite. Varrimi i së ndjerës do të bëhet në oren 11 a.m paraditen e së mërkurës ne varrezat Redeemer, qe ndodhen ne adresën:
90 Chapel Rd, Mahwah, NJ 07430.(Korresp i DIELLIT)
***
Anilas’s final tributes will be paid at
Van Emburgh-Sneider-Pernice Funeral Home
109 Darlington Ave
Ramsey, NJ 07446
Viewing will be held on Tuesday afternoon from 5pm to 8pm and on Wednesday from 10 am to 11am time when Anila’s body will be carried to her final destination at Redeemer Cemetery
90 Chapel Rd, Mahwah, NJ 07430.
We thank everybody that even without knowing Anila have supported and kept this family on their prayers during this extremely difficult time. We ask that if you can please join us one more time during the announced viewing times to say the final goodbyes to this wonderful mother, Wife and woman.
***

PRESIDENTI I BRONXIT NDEROI HERONJTË SHQIPTARË NË DITËN E FLAMURIT

by

Dita e Pavarësisë së Shqipërisë është shënuar edhe nga z. Ruben Diaz Jr. President i qytetit të Bronxit(Bronx Borough President), Proklamatë për të nderuar pesë individë të shquar në kujtim për kontributin e tyre në rrugën e Pavarësisë shqiptare dhe asaj të Kosovës : Azem Bejta, Prek Cali, Riz Zymer Muriqi, Agim Ramadani, Bekim Berisha.
Nga Beqir SINA/
BRONX NYC :(INA :22 Nëntor 2014) Dje, një kolegjin Monroe në Bronx – autoritetet lokale dhe disa udhëheqësit e komunitetit shqiptarë, veprimtar të komunitetit, së bashku janë mbledhur për të shënuar përvjetorin 102th e pavarësisë së Shqipërisë nga sundimi turk. Çdo vit rreth kësaj kohe, rrugët e lagjeve të qytetit të Bronxit si Belmont, Morris Park, Pelham Parkway, dhe më shumë të tjera janë në festën e Pavarësisë së Shqipërisë të cilën e zbukruojnë me flamujt kuq e zi.
– Eventi i mbajtur për të festuar përvjetorin 102th e pavarësisë së Shqipërisë, ishte i bashkë-organizuar me avokatin e njohur Stephen Kaufman dhe Fondacionin e Shoqërisë Shqiptaro-Amerikane – Bijat e bijtë e Shqipërisë në Shtetet e Bashkuara në bashkëpunim me Ruben Diaz Jr Bronx Borough President, Gale A. Brewer Manhattan Borough President, Mark Gjonaj, NYS deputetë, dhe Ritchie Torres, një Anëtarë i Këshillit të Bashkisë së Nju Jorkut – demokrat – i Qarkut 15 në Bronx- të cilët ftuan përzemërsisht të gjithë komunitetin e Bronxit, për të festuar së bashku ditën “102 Vjetori – i Pavarësisë së Shqipërisë në Bronx” të shtunën më 22 nëntor 2014,.
Presidenti i Bashkisë (Borough) Bronx në New York, Ruben Diaz , Jr, ish Assembleisti Stephen Kaufman së bashku me Fondacionin e Shoqërisë Shqiptaro- Amerikane dhe të Bijve dhe Bijave të Shqipëria në Amerikë, “Sons and Daughters of Albania in America” dje mbasdreke me rastin e 102 Vjetorit të Pavarësisë së Shqipërisë kanë nderuar pesë individë të shquar në kujtim për kontributin e tyre në rrugën e Pavarësisë shqiptare dhe asaj të Kosovës, thuhet në një dekleratë për shtyp nxjerr nga zyra e presidentit të bashkisë së Bronxit .
Me rastin e 102 Vjetorit të Ditës së Flamurit – Shpalljes së Pavarësisë së Shqipërisë ata nderuan figurat e : Azem Bejta, Prek Cali, Riz Zymer Muriqi, Agim Ramadani, Bekim Berisha (Abej).
Udhëheqës i ceremonisë ishte avokati Stephen B. Kaufman, Esq, ish- Asambleisiti i shtetit të Nju Jorkut dhe 21 vjet anëtar i Bordit të Drejtorëve – të Fondacionit Shoqëria Shqiptaro Amerikane, i cili gjithashtu ka folur për këtë ngjarje historike të kombit shqiptarë. Egzekutimi i himneve të të dyja vendeve tona :Shteteve të Bashkuara dhe Shqipërisë, është kënduar nga këngëtaria më popullore shqiptare Merita Halili dhe e shoqëruar në fisarmonikë nga mjeshtri Raif Hyseni. Ndërsa, me një minutë heshtje janë nderuar të gjithë të rënët e kombit shqiptarë, për liri e pavarësi.
Përfaqësuesit nga të dy shtetet shqiptare , Shqipërisë e Kosovës, si dhe Ruben Diaz Jr Bronx Borough President, Gale A. Brewer Manhattan Borough President, Mark Gjonaj, NYS deputetë, duke folur për historinë e Shqipërisë, se si Pavarësia ishte e fituar 102 vjet më parë, nga Perandoria Osmane dhe ajo e Kosovës prej Serbisë, para 15 vjetëve, kanë rivendikuar edhe një herë, atë, duke vënë në pah si gjithmonë miqësinë dhe lidhjet e mira shqiptaro amerikane, si dhe folën për kontributin e shqiptarëve të Amerikës, të cilët kan pasur një ndikim të madh, edhe në integrimin e tyre në SHBA. Në rolin e mikpritësit të këtij eventi Stephen B. Jerome – Presidenti, i Monroe College, përshëndeti të pranishmit dhe urojë festën kudo shqiptarëve. Kurse, përshëndetën këtë rast edhe Esad A. Rizai – President dhe Themelues i – Fondacionit të Shoqërisë Shqiptaro Amerikane , Assembleisti Mark Gjonaj, diplomati kosovar Korab Mushkuloaj – Konsull i Kosovës, Profesor Anton Lajçi, profesor Paulo Polombo dhe Prof.Dr. Skënder Kodra – Kryetar i Akademisë Shqiptaro – Amerikane e Shkencave dhe Arteve – Nju Jork, . Udhëheqësi i ceremonisë Stephen B. Kaufman, në fillim të fjalës së tij tha se “unë jam aq i nderuar që të jemë së bashku me ju për të festuar një ditë shqiptare, si kjo që fletë shumë për demokracinë, lirinë dhe shpresën e shqiptarëve – kudo ku janë”, dhe shtoi, se “kjo pjesëmarrje e juaja është tregues i krenarisë dhe unitetin të populli shqiptar, dhe të mysafirëve tanë të nderuar, që pasqyrojnë kontributet e shqiptarëve në SHBA”
Ndërkohë, Esad Rizai i cili është organizatori dhe sponsorizuesi kryesorë i këtij eventi për çdo vjet, tha se “Përvjetori i 102 -të, i Pavarësisë së Shqipërisë – do të thotë shumë, për të gjithë shqiptarët në mbarë botën.” Sepse, ka pohuar ai “Ne jemi ndër kombet më të vjetër në Evropë dhe ne kemi qenë të shtypur për një kohë të gjatë, nga padresjtësitë që na janë bërë. Por, falë Zotit, ne kemi arritur për të mbijetuar. “” Mbasi, Shqiptarët, sot janë të bashkuar më shumë se kurrë ndonjëherë, shtoi Rizai, duke u shprehur se ne jemi shqiptarë në radhë të parë. Ne jemi të lidhur nga gjaku shqiptar. Ne kemi kudo një kulturë, një histori, dhe një flamur. Kemi Shqipërinë e lirë, demokratike dhe në Nato, Kosovën e çlirruar dhe të pavarur, dhe për këto ne jemi krenarë, që jemi shqiptarë e mburremi për këtë. ” “Dita e Pavarësisë shqiptare, është një ngjarje e madhe për të gjithë shqiptarët në mbarë botën – dhe na bënë më shumë krenar – sepse ne jemi mbi të gjitha shqiptarë”, tha asamblesiti shqiptarë në Asamblenë e Shtetit të Nju Jorkut- Mark Gjonaj, i cili me këtë rast nuk la pa faleminderuar të gjithë ata që e kan ndihmuar atë të rizgjidhet për mandat të dytë. Mark Gjonaj – është i pari shqiptarë në historinë e shqiptarëve të Amerikës, i cili është zgjedhur në një postë kaq të lart shtetërorë. Në këtë ceremoni të organizuar me rastin e 102 Vjetorin e Shpalles së Pavarësisë së Shqipërisë, ngritjen e flamurit kuq e zi më 28 Nëntor 1912 , disa luftëtarët e lirisë të cilët luftuan për Pavarësinë shqiptare janë nderuar, me Proklamatë nga Këshilli i Bashkisë së Nju Jorkut dhe zoti Ruben Diaz Jr Presidenti i Komunës së Bronxit, duke përfshirë pesë individë të shquar në kujtim për kontributin e tyre në rrugën e Pavarësisë shqiptare dhe asaj të Kosovës si : Azem Bejta, Prek Cali, Riz Zymer Muriqi, Agim Ramadani, Bekim Berisha (Abej).
Dhe, me këtë rast është nderuar nga anëtari i Këshillit të Bashkisë së Nju Jorkut, Richie Torres, dhe zoti Ruben Diaz Jr, Kryetari i Komunës së Bronxit, edhe gazetari Beqir Sina, i cili thuhej në motivacion se ka kontribuar për njëzet vite në medien shqiptaro – amerikane, duke qenë gjithmonë në shërbimim të Komunitetit shqiptar në gjuhën shqipe në SHBA. Zoti Ruben Diaz Jr Kryetari i Komunës së Bronxit, duke marrë fjalën tha se: “Komuniteti shqiptaro – amerikan, si këtu në Bronx dhe në të gjithë botën, janë duke festuar 102 vjetorin e fitores së pavarësisë së atdheut të tyre, Shqipërisë. Me këtë rast historia e njësive bashkiake me komunitetin shqiptar shkon shumë prapa në vitin 1930 , kur një i ri i cili më vonë u bë i famshëm Regis Philbin – (arbereshë, nga ata që ka deklaruar se jam me gjak shqiptarë), është rritur këtu në rrugët e Van Nest dhe Morris Park “. Kurse, sot, nga Belmont në Pelham Parkway në Morris Park, tha zoti Ruben Diaz Jr dhe kudo në mes, tonë, gjenë shumë shqiptarët, të cilët po ndihmojnë për të forcuar Bronxin, sidomos në fushën e biznesit tonë, por edhe me lidhjet e tyre me komunitetet kulturore dhe organizatat jo-fitimprurëse.
Ai tha se :”Bronxi qyteti ynë ka një lidhje të madhe me Shqipërinë, Kosovën dhe shqiptarët, dhe ne jemi krenarë për këtë trashëgimi të përbashkët të qytetit të vogël i cili ka një popullsi prej 12 438 njerëz me prejardhje shqiptare -. Më shumë se çdo qytet i vogël tjetër në New York City, ne kemi komunitetin më të madh shqiptar në SHBA “. “Shqiptaro-Amerikanët në New York City, janë pjesë të rëndësishme veprimtarive multi-kulturore të shoqërisë, duke rritur familjet e tyre me traditat shqiptare, duke i shërbyer komunitetit të tyre, dhe shqiptarët janë një komunitet që përpiqet për të bërë jetën e tyre, më të begatë dhe janë shumë krenarë për vendin e tyre,” tha z Ruben Diaz Jr ..
Andaj sot, unë bashkohem me avokatin e njohur Stephen Kaufman dhe Fondacionin e Shoqërisë Shqiptaro-Amerikane – Bijat e bijtë e Shqipërisë në Shtetet e Bashkuara – për të nderuar heroin shqiptar Azem Bejta, Prek Cali, Riz Zymer Muriqi, Agim Ramadani, Bekim Berisha si dhe gazetarin Beqir Sina për të nderuar atë për punën e tij njëzetvjeçare në fushën e gazetarisë në shërbim të komunitetit në gjuhën shqipe, këtu në komunitetin tonë.
Dhe tani, unë Ruben Diaz Jr Kryetari i Komunës së Bronxit, në këtë mënyrë, zyrtarisht do të shpallë sot më 20 nëntor 2014 – këtë ditë si “102 Vjetori – Dita e Pavarësisë shqiptare në Bronx”/INA/

Fol shqip, se je shqiptar- Festë në Manhattan në 102 Vjetorin e Pavarësisë

by

Nga Keze Kozeta ZYLO/
Nxënësit e Shkollës Shqipe “Alba Life” e cila operon në tri lagje të Nju Jorkut dhanë një program të bukur artistik në shkollën publike amerikane PS 173 në Manhattan me rastin e 102 Vjetorit të Pavarësisë. Jo rastësisht u zgjodh Manhattani për të shfaqur këtë program artistik, por kjo u bë me qëllimin për të nderuar shkollën e parë shqipe në Manhattan që u hap muajin e kaluar dhe për t’u bashkuar të gjithë në Diten e Shenjtë të Flamurit.
Në këto ditë festash nxënësit dhe mësuesit janë gjithmonë të preokupuar për ta pritur Ditën e Flamurit me programe të bukura artistike. Salla e veshur me ngjyrat e Flamurit kuq e zi u mbush plot e përplot me nxënësit, mësuesit, artistët dhe prindërit të cilët mezi po prisnin të dilnin në skenë fëmijët e tyre plot talent. Bota e tyre e magjishme tërheq çdo të rritur, kur ata luajnë dhe qeshin me njeri-tjetrin, miqësohen aq shpejt sikur të kenë qenë njohur prej kohësh.
Programin e ka hapur Dr.Valbona Zylo Watkins e cila pasi ka përshëndetur të gjithë të pranishmit dhe iu ka uruar atyre: Gëzuar Ditën e Flamurit dhe 102 vjetorin e Pavarësise, ka ftuar mësueset dhe nxënësit të vazhdojnë programin sipas radhës.
Programi ka filluar me dy himnet kombëtare: shqiptare dhe amerikane. Himni Kombëtar shqiptar është intepretuar nga Dëshira Ahmeti Kërliu sopranoja e parë shqiptare me origjinë nga Dibra e madhe në operën e Shkupit, ndërsa Himni Kombëtar amerikan është intepretuar nga nxënësja e shkollës shqipe, artistja e vogël dhe plot talent Kristina Melo.
Programin e kanë hapur nxenesit e shkollës shqipe në Manhattan që sipas traditës si mikpritesja që ishte i takonte për të qenë e para dhe për të përshëndetur me një buqetë të bukur poezish. Eshtë vendi për të përmendur mësuesen veterane dhe të përkushtuar znj.Liza Pllumbi e cila me një pasion dhe profesionalizëm iu kishte mësuar fëmijëve poezi të bukura atdhetare, patriotike si dhe këngë. Mësuese Liza ka qenë një bashkëpunëtore e ngushtë me bordin e shkollës për të hapur Shkollën Shqipe në Manhattan dhe kanë punuar fort për ta realizaur atë së bashku me znj.Nora Nilaj qe realizuan për të ushtruar mësimin e gjuhës shqipe në mjediset e shkollës publike amerikane PS 173. Për arsye familjare mësuese Lizën e cila nuk kishte mundësi të vinte në këtë program e zëvendësoi mësuese Dita që jep mësim në Brooklyn. Skena ndrinte dhe dukej sikur sytë e fëmijëve lëshonin dritë si prozhektor në sallë nga ndjenja e kënaqësisë dhe krenarisë të cilët e pritën me plot dashuri Festën e Flamurit, ata të veshur me ngjyrat e Flamurit i dhanë jetë e gjallëri ditës së shtunë në këtë festë të bukur. Nxënësit me poezitë si Gjuha Shqipe recituar nga Kevin Preldakaj, sa të dua Shqiperi, nga Anxhelika Hysaj, Shko dallëndyshe nga motrat Kristina dhe Klea Lisi, Gjuha e bukur Shqipe nga motrat Nilaj i dhanë dhe më shumë jetë ditës së shtunë. Nora Hysaj këndoi Qingji i vogël, ndërsa Aleksandra dhe Nora Hysaj kërcyen vallen dyshe malsorshe.
Pas Manhattanit në skenë janë paraqitur nxënësit e shkollës shqipe në Staten Island të drejtuara nga mësuesja e tyre Valbona. Nxënësi Rilind Bardhi ka recituar poezinë Shoku Im, Gjuha Shqipe nga Dea Watkins, Atdheu, Julinda dhe Rozafa Dimnaku, Sabrina Velovic, Flamuri me Shqiponjë, Liana, Ylli i vogël lart në qiell, Fiona Doda Abetare. Pas poezive të bukura nga nxënësit e Staten Island është kënduar kënga aq popullore e dashur për të gjithë shqiptarët: Fol Shqip se je Shqiptar, këngë që u shoqërua me emocion, levizje të trupit, të duarve, nga të gjithë nxënësit e skenës, interpretuar nga Fiona Doda, ndërsa gjithë salla e shoqëronte me duartrokitje ritmike.
Ndërsa i dëgjoja e magjepsur e gjitha melodinë e këngës dhe tekstin me vargjet si: Çdo behar kur vije për festa dhe gëzime, vështirësinë e gjej në gjuhën e nënës sime/ Shqip të foli nëna, kur erdhe në jetë/ mos e harro gjuhën kudo që të jesh/një fjalë po ta them/ amanet nga të parët/ ta mbash për jetë/ fol shqip se je shqiptar!, më dukej sikur Manhattani, qyteti që s’fle kurrë gjumë, oshëtiu i gjithi, ndërsa oqeani buçiti, gjëmoi me zëra fëmijësh Perëndie, SHQIP!
Mësuese Afërdita ka drejtuar programin e nxënësve të saj në Brooklyn që ka filluar me poezitë të recituara nga Lejla Hasani, Irsa Cinari, Gabriela dhe Griselda Përmeti, Angie Bahçja, Sara Lunaj, Brian Kacubaj, Agolli. Në violinë ka interpretuar Brian Kaçubaj, Ode to Joy të Bethovenit. Të gjithë fëmijët së bashku kënduan këngën: “Hapa dollapa” dhe kërcyen mjeshtërisht Buburrecin.
Mësuese Marjana e ka filluar programin në radhë të parë duke përshëndetur prindërit, mësuesit, nxënësit dhe shprehu kënaqësinë që ishte pjesë e stafit të shkolles dhe falënderoi organizatorët e hapjes së shkollës shqipe për mundësitë që i kanë dhënë per ta ushtruar profesionin e mësuesisë, me nxënësit e rritur. Mësuese Marjana e ka hapur programin e saj me Anisa Shahun që recitoi “Atdheu”, Sa të dua Shqipëri nga Endri Gjona, Gjuha jonë nga Ariela, O malet e Shqipërisë nga “Oresti Salillari dhe Rafael Gjona”, Ty Flamur të duam shumë nga Sabrina Lulanaj dhe Aurora Shahu. Pasi kanë mbaruar interpretimet nxënësit janë drejtuar nga sopranoja e shquar, Lindita Mezini Lole për të kënduar këngën “Zogu i verdhë”, këngë që dukej dhe ndjehej aq ëmbël si cicërrima fëmijësh. Programi është mbyllur me këngën e Gjuhës Shqipe që është njëkohësisht dhe hymn i shkollës kompozuar nga prof.Petrika Melo dhe interpetuar nga Kristina Melo dhe gjithë nxënësit. Nxënësit këndonin me dashurinë e papërshkruar për Gjuhën Shqipe si: Mezi presim shkollën shqipe, që të flasim dhe të mësojmë, me shkronjat e alfabetit, si ëngjëjt Kombin e mbrojmë. Interpretimi i tyre u shoqërua duke valëvitur Flamujt Kuq e Zi që mbanin në duar me shkabën dykrenore.
Pas programit të pasur artistik, z.Qemal Zylo themelues i shkollave Shqipe ka falënderuar në radhë të parë të gjithë nxënësit që vinë me aq dashuri dhe pasion dhe ulen në bangot e shkollës për të mësuar SHQIP, prindërit, shprehu mirënjohjen e pakufishme për bashkëpunimin me mësueset e përkushtuara si Ditën, Lizën, Marjanën, Armelën, etj, të gjithë të pranishmit si dhe Konsullen e Përgjithshme znj.Vlora Citaku, Konsullin e Kosovës z.Korab Mushkolaj dhe z.Ismet Kurti kryetarin e shoqatës së mirënjohur “Ana e Malit” që morën pjesë në këtë manifestim të bukur shkollor. Z.Zylo iu uroi të gjithë të pranishmëve: Gëzuar Festën e Pavarësisë, Ditën e Flamurit që u ngrit më 28 Nëntor 1912 nga plaku i urtë Ismail Qemali me Is Boletinin prej Kosove dhe gjithë shqiptarët.
Znj.Vlora Citaku iu ka uruar gjithë të pranishmëve: Gëzuar Ditën e Flamurit, Ditën tonë kombëtare, ku për këtë ditë u derdh shume gjak për ta kurorëzuar me Pavarësinë e saj. Sot në këtë ditë dua të nderoj dhe kujtoj dhe Kongresin e Manastirit që mblodhi gjithë dijetarët shqiptarë, më 14 Nëntor deri më 22 nëntor, për përcaktimin e Alfabetit të gjuhës shqipe, ndaj dhe u quajt edhe Kongresi i Alfabetit të Gjuhës Shqipe.
Znj.Çitaku tha se: Nuk ka më kënaqësi dhe emocion që të shikosh gjithë këta nxënës shqiptarë të lindur dhe rritur në Amerike dhe të flasin dhe të këndojnë shqip. Kurrë mos e harroni gjuhën e nënës, vazhdoni ta pasuroni atë, se nëpërmjet saj ju do të njiheni dhe do të ndjeni në shpirt traditat dhe kulturën e mrekullueshme të popullit shqiptar. Sot si Konsulle e Përgjithshme e Kosovës, në emrin e Repbulikes së Kosovës dhe Ministrit të Diasporës z.Ibrahim Sh.Makolli do t’ju ndaj çertifikatën e mirënjohjes për kontribut të veçantë në arsimin plotësues të mësimit shqip në Diasporë si Shkollë Shqipe në Amerikë. Vlerësimi i saj për Shkollën Shqipe “Alba Life” është mirëpritur me duartrokitje nga të pranishmit.
Festimi i Ditës së Flamurit në Manhattan ishte një ditë që u nderua me madhështi nga nxënësit e Shkollës drejtuar nga mësuesit e tyre në Gjuhën Shqipe, në gjuhen e nënës së tyre! Ishte një e shtunë Manhattani i cili oshëtiu në 102 Vjetorin e Pavarësise së Shqipërisë nga kënga: Fol SHQIP, se je SHQIPTAR!

22 Nëntor, 2014
Manhattan, New York