Zëvendës-sekretarja e shtetit amerikan Victoria Nuland nesër në Kosovë

July 9, 2016 by dgreca

Foto ARKIV i Gazetës DIELLI: Nuland në Prishtinë para një viti, në 12 korrik 2015/

-Për nesër paralajmërohet edhe vizita e zëvëndës asistentit të Sekretarit të Mbrojtjes së SHBA-ve Dr Michael Carpenter në Ministrinë e Forcës së Sigurisë së Kosovës/

PRISHTINË, 9 Korrik 2016-B.Jashari/ Zëvendës-sekretarja e shtetit amerikan Victoria Nuland viziton Kosovën, ku dhe do të takojë udhëheqësit shtetërorë.Axhenda nis nesër në mëngjes me takimin me presidentin e Kosovës, Hashim Thaçi dhe vazhdon me pritjen te kryetari i Kuvendit, Kadri Veseli.

Takimi me kryeministrin Isa Mustafa, zëvendëskryeministrin Hajredin Kuçi dhe kryediplomatin Enver Hoxhaj është i përbashkët.Më pas, në axhendë është edhe takimi me zëvendëskryeministrin Branimir Stojanoviç, nga komuniteti serb në Kosovë.

Victoria Nuland në vizitën në Prishtinë në korrikun e para një viti vlerësonte progresin që po arrihet në Republikën e Kosovës, duke shprehur përkrahjen e mëtutjeshme të Shteteve të Bashkuara të Amerikës.Për nesër paralajmërohet edhe vizita e zëvëndës asistentit të Sekretarit të Mbrojtjes së SHBA-ve Dr Michael Carpenter në Ministrinë e Forcës së Sigurisë së Kosovës dhe pas takimit me ministrin Haki Demolli një deklaratë e përbashkët për shtyp.

Tronditje, pikëllim dhe thirrje për unitet pas ngjarjeve në Dallas

July 8, 2016 by dgreca

Shtetet e Bashkuara janë përfshirë nga dhimbja dhe tronditja që ka shkaktuar vrasja e pesë policëve dhe plagosja e 7 të tjerëve mbrëmë në Dallas. Reagime të forta bënë figura të larta politike, si demokrate, ashtu edhe republikane, duke bërë thirrje për unitet dhe solidaritet përballë kësaj ngjarjeje të dhimbshme.

Policët ishin në detyrë për të ruajtur rendin gjatë një proteste paqësore në qendër të Dallasit. Demonstrues ishin mbledhur për të protestuar pas vrasjes së dy afrikano-amerikanëve, në incidente që ishin komentuar si shembuj të përdorimit të forcës së tepruar nga policia kundër afrikano-amerikanëve.

Presidenti Barak Obama, i cili ndodhet në Varshavë për takimin e NATO-s, reagoi menjëherë pas ngjarjes, pasi ishte informuar nga ekipi i tij.

“Ajo që kemi mësuar është se ka pasur një sulm të egër, të mirë-llogaritur dhe të neveritshëm ndaj forcave të rendit. Policia në Dallas ishte në krye të detyrës, duke garantuar sigurinë e popullatës gjatë protestave paqësore,” tha presidenti.

“U bëj thirrje të gjithë amerikanëve të luten për këta policë dhe familjet e tyre, t’i mbajnë në mendjet e tyre. Si komb, të shprehim të gjithë mirënjohjen tonë të thellë për djemtë e vajzat tona në uniforma blu, jo vetëm sot, por çdo ditë,” tha presidenti.

Në Kongres, Kryetari i Dhomës së Përfaqësuesve Paul Ryan dukej shumë i prekur nga ngjarja:“Jemi shumë të tronditur nga ngjarjet e mbrëmshme në Dallas. Jemi të revoltuar. Sulmi ndaj atyre që na mbrojnë është sulm ndaj të gjithë neve. Me zemër jemi pranë Departamentit Policor të Dallasit. Me zemër jemi pranë viktimave dhe familjeve të tyre. E kam të qartë se kur je bashkëshorti apo bashkëshortja e një polici, jeton me rrezikun e skenarit më të keq, por askush nuk do ta kishte menduar një tmerr të tillë”.

Zoti Ryan vazhdoi më tej me thirrjet për unitet përballë incidenteve të shpeshta me armë zjarri:“Do të ketë joshje që t’i hapim rrugën zemërimit tonë, që të thellojë dallimet mes nesh. Nuk duhet ta lejojmë. Do të ketë joshje që revoltimi që ndjejmë të na shtyjë më thellë në skaje larg njëri-tjetrit. Nuk duhet ta lejojmë. Ai skenar shkruhet lehtë, por nuk i dihet fundi. T’u bëjmë sfidë këtyre skenareve. Një numër i vogël keqbërësish nuk na përfqëson ne. Nuk na kontrollon. Faji bie mbi ata që kryen këto akte të shëmtuara, mbi askënd tjetër. Siç e tha me të drejtë presidenti, drejtësia do të vihet në vend. Por duhet të lejojmë vend edhe për shërim”.

Anëtarë të Grupit të Ligjvënësve për Çështje të Komunitetit Afrikano-Amerikanë folën sot në një konferencë për shtyp. Konferenca ishte organizuar që më parë për të ngritur shqetësimin për vrasjen e afrikano-amerikanëve në incidente me policinë. Dy incidente të tilla këtë javë ishin shkaku i protestave paqësore mbrëmë në Dallas. Në konferencën e sotme, kryetari i grupit, ligjvënësi G.K. Butterfield i bëri thirrje Kongresit të mos largohet për pushimet e verës pa hedhur në votë një projekt-ligj për të ulur dhunën nga armët e zjarrit. Nëse Kongresi nuk e ndërmerr këtë hap, tha ai, “do të jetë një verë e gjatë dhe e nxehtë”.

Dy kandidatët për president, demokratja Hillary Clinton dhe republikani Donald Trump kanë pezulluar aktivitetet për fushatë pas ngjarjes në Dallas.

“Mbaj zi për policët e vrarë dhe plagosur në krye të detyrës së tyre të shenjtë për të mbrojtur protestues paqësorë; mbaj zi për familjet e tyre dhe të gjitha ata që shërbejnë përkrah tyre” shkruan zonja Clinton në llogarinë e saj në Twitter.

“Lutje dhe ngushëllime për të gjitha familjet që janë prekur kaq rëndë nga tmerret që kanë tronditur vendin tonë,” shkruan kandidati Donald Trump në Twitter.(VOA)

SHBA-Kosovë, Memorandum për programin Fulbright

July 8, 2016 by dgreca

-Qeveria e Kosovës sot zotoi 1.5 milionë euro përgjatë pesë viteve të ardhshme në mbështetje të programit Fulbright – kontribut ky që pritet të fillojë gjatë vitit akademik 2016-2017 dhe të vazhdojë deri në vitin akademik 2020-2021.Njoftimi dërguar nga Ambasada e SHBA në Prishtinë thekson se, e mirëpresim këtë nismë për zgjerimin domethënës të numrit në dispozicion të bursave studimore dhe besojmë se ky zotim do të ndihmojë në zhvillimin e prijësve të ardhshëm të Kosovës/

-Kryeministri Mustafa: SHBA-të po ndihmojnë fuqishëm në ngritjen e infrastrukturës arsimore, shkencore dhe ekonomike/

-Kryeparlamentari Veseli: Kur Kosova dhe ShBA-ja kanë ecur së bashku, suksesi asnjëherë nuk ka munguar/

-Ministri Bajrami në veçanti falënderoi ndihmës sekretaren e Shtetit për Edukim, znj. Evan Ryan për telegramin e urimit që ka dërguar me rastin e nënshkrimit të Memorandumit/

PRISHTINË, 8 Korrik 2016-Gazeta DIELLI-Behlul Jashari/ Ambasada e Shteteve të Bashkuara të Amerikës në Prishtinë nënshkruajti sot pasdite Memorandumin e Mirëkuptimit me qeverinë e Kosovës për programin Fulbright, në një ceremoni në Bibliotekën Kombëtare, ku morënë pjesë edhe kryeministri Isa Mustafa e kryeparlamentari Kadri Veseli.

Ambasadori i Shteteve të Bashkuara në Kosovë, Greg Delawie dhe Ministrisë i Arsimit, Shkencës dhe Teknologjisë në qeverinë kosovare, Arsim Bajrami, nënshkruan Memorandumin e Mirëkuptimit në mbështetje të programit Fulbright për shkëmbim akademik.

Ky Memorandum i Mirëkuptimit po vijon mbi bazat e një programi të vazhdueshëm dhe të suksesshëm të shkëmbimit akademik që ka përfshirë mbi 80 studentë dhe studiuesë nga Shtetet e Bashkuara dhe Kosova prej vitit 2008.

Qeveria e Kosovës sot zotoi 1.5 milionë euro përgjatë pesë viteve të ardhshme në mbështetje të programit Fulbright – kontribut ky që pritet të fillojë gjatë vitit akademik 2016-2017 dhe të vazhdojë deri në vitin akademik 2020-2021.

Njoftimi dërguar nga Ambasada e SHBA në Prishtinë thekson se, e mirëpresim këtë nismë për zgjerimin domethënës të numrit në dispozicion të bursave studimore dhe besojmë se ky zotim do të ndihmojë në zhvillimin e prijësve të ardhshëm të Kosovës.

Në fjalën e tij, Ambasadori Delawie uroi qeverinë e Kosovës për këtë investim të rëndësishëm, duke shtuar se, pas shumë dekadave, do të shikojmë kah kjo ditë si një ditë e rëndësishme për të ardhmen e Kosovës – me qindra të diplomuar përmes programit Fulbright, të cilët kanë fituar njohuri të reja domethënëse në fushën e tyre të ekspertizës, si dhe që kanë ndërtuar ura të qëndrueshme të bashkëpunimit ndërmjet Shteteve të Bashkuara dhe Kosovës.

Programi Fulbright është program i çmuar ndërkombëtar i shkëmbimit akademik, i sponzorizuar nga qeveria amerikane dhe i përpiluar për të rritur mirëkuptimin e ndërsjellë ndërmjet popullit të Shteteve të Bashkuara të Amerikës dhe popujve të vendeve tjera.

Ky program është themeluar në vitin 1946 në bazë të legjislacionit të paraqitur nga senatori i ndjerë, J. William Fulbright nga Arkanzasi, financohet kryesisht nga Kongresi i Shteteve të Bashkuara dhe zbatohet nga Zyra për çështje arsimore dhe kulturore e Departamentit Amerikan të Shtetit.

Kryeministria kosovare në njoftimin e dërguar bën të ditur se, në fjalën përshëndetëse, kryeministri Mustafa falënderoi qeverinë Amerikane që, përmes programeve të tilla, po ndihmon Republikën e Kosovës në ngritjen e infrastrukturës arsimore, shkencore dhe ekonomike.Kryeministri Mustafa e ka quajtur një ditë të rëndësishme nënshkrimin e memorandumit që mundëson shkollimin e studentëve dhe të rinjve në programin Fullbright, si një program tepër i rëndësishëm i cili ka dhënë rezultate në përgatitjen e kuadrove të Kosovës për shkencë, arsim dhe ekonomi.“Ne në qeveri keni dhënë zotimin tonë se ne do të përkrahim edhe për këtë vit edhe për vitet e ardhshme këtë program i cili do t’iu mundësoj shumë të rinjve tanë që të studiojnë në nivele të ndryshme të studimeve në Shtetet e Bashkuara të Amerikës dhe që këto kuadro pastaj t’i kontribuojnë zhvillimit të institucioneve tona. Ne e kemi parë të arsyeshme që edhe pjesëmarrja e ministrive tona në financimin e këtij programi, përmes qeverisë të jetë e tillë që ne të shpërndajmë edhe nevojat tona tek Ministria e Arsimit, Shkencës dhe Teknologjisë, Ministria e Financave, Ministria e Punëve të Jashtme, Ministria e Integrimeve Evropiane, Ministria e Punës dhe Mirëqenies Sociale, Ministria e Bujqësisë, Pylltarisë dhe Zhvillimit Rural, në mënyrë që karshi nevojave që ne i kemi për kuadro të kemi një ndërlidhje më të fortë të ministrive përkatëse me njerëzit tanë që shkollohen në Shtetet e Bashkuara të Amerikës në këtë program”, tha kryeministri.

Kryeministri Mustafa, më tutje theksoi se kjo është një mundësi e veçantë që i ofrohet Kosovës dhe një pjesëmarrje e veçantë e Shteteve të Bashkuara të Amerikës në financimin e njerëzve të Kosovës që të shkojnë atje për studime.

“Andaj, dëshiroj sot të falënderoj Shtetet e Bashkuara të Amerikës përmes ambasadorit Delawie që së bashku është me ne këtu dhe qeverinë Amerikane për të gjithë atë që po bënë për ngritjen e infrastrukturës arsimore, shkencore dhe ekonomike të Republikës së Kosovës dhe ngritjen e institucioneve tona”, tha kryeministri Mustafa.

Njoftimi dërguar nga Kuvendi Kosovar thekson se, duke e konsideruar këtë ngjarje si shumë të rëndësishme për edukimin në Kosovë, kryeparlamentari Veseli tha se marrëdhëniet e Kosovës me Shtetet e Bashkuara të Amerikës kanë qenë dhe vazhdojnë të jenë të shkëlqyera, dhe se vetë kjo marrëveshje përbën një dimension të veçantë të këtyre marrëdhënieve. Veseli tha se falë saj, shumë të rinj tanë, kanë mundësinë të kenë qasje dhe studiojnë në institucionet arsimore prestigjioze të ShBA-ve, truallit të demokracisë dhe njëkohësisht, të zhvillimit ekonomik, ndërsa dijen dhe përvojën e fituar në këto institucione ta investojnë në Kosovë.

Kryetari Veseli tha se ky program ofron një mundësi të mirë për të rinjtë tanë që të jenë konkurrues me moshatarët e tyre në vendet perëndimore dhe njëkohësisht, të njihen krenarë me identitetin dhe vendin e tyre.“Është nevojë urgjente investimi në fuqizimin e sistemit të edukimit, në rritjen e cilësisë së tij, konform standardeve perëndimore të shkencës dhe formimit profesional, hapja dhe krijimi i partneriteteve me institucionet akademike të botës perëndimore në SHBA dhe BE, si dhe orientimi strategjik në fushat e dijes për të cilat ka nevojë shoqëria dhe shteti ynë”, theksoi kryetari Veseli.

Ai shtoi se në kushtet bashkëkohore të globalizimit, axhenda ekonomike është e pandashme nga axhenda e fuqizimit të edukimit.

“Sot tregu i brendshëm dhe tregjet ndërkombëtare të punës kërkojnë popullsi të kualifikuar. Arritja e këtij qëllimi, për një popullsi të re, siç e ka vendi ynë, është një interes prioritar nacional. Ky progam Fullbright është një nga mundësitë që ne të ecim në këtë drejtim. Jam thellësisht i bindur se do të kemi sukses, sepse suksesi asnjëherë nuk ka munguar kur Kosova dhe Shtetet e Bashkuara të Amerikës kanë ecur së bashku. Jam i bindur se edhe këtë radhë do të na ecë mbarë”, theksoi kryeparlamentari Veseli.

Ministri kosovar i Arsimit, Shkencës dhe Teknologjisë, Arsim Bajrami theksoi se Programi Fulbright ofron mundësi të shkëlqyera për shkëmbim akademik për të rinjtë, në drejtim të përgatitjes së një gjenerate të re, e cila do të jetë bartëse e tanzicionit dhe transformit demokratik.

“Falënderojmë Qeverinë Amerikane, e cila po investon në edukim, sepse edukimi është çelësi i suksesit për shoqërinë tonë”, tha ministri dhe në veçanti falënderoi ndihmës sekretaren e Shtetit për Edukim, znj. Evan Ryan për telegramin e urimit që ka dërguar me rastin e nënshkrimit të Memorandumit.

Pasi që përmendi edhe Programin për Transformimin e Lidershipit, përmes të cilit më shumë se 180 studentë nga Kosova kanë pasur fatin të studiojnë në universitetet më të mira të ShBA-ve, ministri Bajrami tha se MAShT do të ofrojë mbështetjen e plotë që të punojmë me të gjitha forcat për një arsim konkurrent, i cili do të mundësojë zhvillimin ekonomik dhe do të përgatisë një gjeneratë, e cila do të marrë përsipër zhvillimin e Kosovës.

Signing of Memorandum of Understanding in Support of the Fulbright Program between the Embassy of the United States of America and the Ministry of Education, Science and Technology of the Republic of Kosovo

United States Ambassador to Kosovo Greg Delawie and Republic of Kosovo Minister of Education, Science and Technology (MEST) Arsim Bajrami signed a Memorandum of Understanding (MOU) in support of the Fulbright Academic Exchange Program today at the National Library in Pristina, Kosovo.

This MOU builds on an ongoing and successful educational exchange program that has involved over 80 students and scholars from the United States and Kosovo since 2008. Today, the Government of Kosovo pledged 1.5 million euros over the next five years to support the Fulbright Program—a contribution that is anticipated to begin with the 2016-2017 academic year and continue through the 2020-21 academic year.

We welcome this initiative to greatly expand the number of scholarships available, and believe this pledge will help develop the future leaders of Kosovo. In his remarks, Ambassador Delawie congratulated the Government of Kosovo on this important investment. He added that decades from now, we will look back on this day as an important step in the future of Kosovo—with hundreds of Fulbright alumni who will have gained significant new knowledge in their fields of expertise, and also built enduring bridges of collaboration between the United States and Kosovo.

The Fulbright Program is the flagship international educational exchange program sponsored by the U.S. Government and is designed to increase mutual understanding between the people of the United States and the people of other countries. The program was established in 1946 under legislation introduced by late Senator J. William Fulbright of Arkansas, is funded primarily by the United States Congress, and is implemented by the United States Department of State’s Bureau of Educational and Cultural Affairs. For more information on the Fulbright Program in Kosovo, see the Embassy’s website athttp://pristina.usembassy.gov/culture_edu_xchng.html or the Department of State’s website at https://eca.state.gov/fulbright.

Presidenti Nishani, darkë për Fiter Bajramin në Pallatin e Brigadave

July 5, 2016 by dgreca

Presidenti Nishani feston Fiter Bajramin: Të na i pakësojë ky Bajram keqkuptimet, grindjet, sherret, dhe të na i shpeshtojë mirëkuptimet, bashkimet!/

Presidenti i Republikës, Sh. T. Z. Bujar Nishani dhe Zonja e Parë, Odeta Nishani kremtuan në Pallatin e Brigadave Fiter Bajramin me një darkë festive ku ishin të pranishëm Kreu i Kuvendit Ilir Meta, Kryetari i Komunitetit Mysliman Shqiptar Haxhi Skënder Bruçaj, Kryegjyshi Botëror i Bektashinjve, Baba Edmond Brahimaj, Fortlumturia e Tij Kryepiskopi Anastas, Nunci Apostolik Imzot Ramiro Moliner Ingles, përfaqësues të lartë të besimeve fetare në Shqipëri, drejtues institucionesh të pavarura kushtetuese, deputetë, klerikë si dhe shumë besimtarë myslimanë.

Në përshëndetjen e Tij, Kreu i Shtetit shqiptar u shpreh: “Është kënaqësi e jashtëzakonshme për mua që festës Suaj, lumturimit Tuaj, devocionit Tuaj, në këtë ditë të shënuar, t’i bashkoj përunjësisht urimin tim: Për shumë vjet gëzuar Bajramin e shenjtë, këtë festë madhështore të myslimanëve të botës, këtë mundësi të mrekullueshme që na afron me njëri-tjetrin dhe me Zotin, që na pakëson vuajtjet dhe dëshpërimet, dhimbjet e plagëve na i bën të durueshme.

Të dashur besimtarë myslimanë! Të bëjmë çmos të na e shtojë ky Bajram ndjeshmërinë ndaj fukarenjve dhe të dëshpëruarve, për t’i bërë ata më pak të varur ekonomikisht dhe më të sigurt e më të fortë shpirtërisht.

Të na i pakësojë ky Bajram keqkuptimet, grindjet, sherret, dhe të na i shpeshtojë mirëkuptimet, bashkimet.

Paçi vetëm gëzime në jetët Tuaja, Familjet Tuaja, punët Tuaja!

Kurrë mos u ndaltë adhurimi Juaj për Zotin, bashkë me të mirat e gjithfarshme dhe obligimet e domosdoshme që rrjedhin nga ky adhurim!

Kurrë mos u shterrtë mes Jush dashuria, mirësia, mëshira, urtësia, për veten, për njëri-tjetrin, për komunitetin, për Kombin, dhe më gjerë për njerëzimin që aq shumë etje ka për Besim, aq shumë uri ka për paqe, aq nevojë të ngutshme ka për begatim të tanishëm dhe shpresë për të ardhmen.

E bekuar qoftë dëshira Juaj për më tepër prehje shpirtërore dhe shoqërore me të gjithë, pavarësisht nga Besimi apo të tjera dallime.

Të vazhdojë të forcohet bindja Juaj se po aq e madhe sa është Mëshira e Zotit është edhe falënderimi ynë, edhe vetëdija jonë për përunjësi të pafundme ndaj Tij në çdo aspekt, në çdo rast dhe në çdo çast.

Kurrë mos u pakësoftë frika ndaj mëkatit. Po të lutemi me gjithë shpirt, Zoti që na i ka dhënë të gjitha liritë dhe na ka lënë të zgjedhim, mëkatet na i fal. Por gjatë rrugës së mundimshme drejt përsosjes duhet të kemi mirë parasysh sa pa besimin tek Zoti, rrëshqitja në mëkat është fare e kollajtë.

Kurrë mos u pakësoftë por vetëm u shtoftë bindja e brendshme e solidaritetit reciprok human të atyre që kanë ndaj atyre që s’kanë, të atyre që u tepron ndaj atyre që u mungon, të atyre që Fati i ndihmon ndaj atyre që Fati i harron.

Ta gëzojmë si e meriton këtë ditë të lumnueshme si mundësi e rrallë për të reflektuar hollësisht dhe thellësisht për principe themelore, ato principe të cilat, të rrëmbyer nga telashet e përditshmërisë, ndodh që edhe i nënvlerësojmë, pse jo dhe i harrojmë, si për shembull për çfarë është e shenjtë e çfarë është banale, çfarë paraqitet si e dobishme por është e dëmshme, çfarë duket e drejtë por është e shtrembër, çfarë duket e mbarë por është e mbrapshtë, çfarë shfaqet si e arsyeshme por është e gabuar, çfarë duket e këshillueshme por është kurth. Të reflektojmë në këtë ditë për arsyet e vështirësive të komunikimit ndërnjerëzor kryesisht ndërpersonal, kollajllëkun e sherrit, mungesën e urtësisë, dhe të mundohemi t’i ndreqim duke pasur parasysh se të dish të pendohesh është më e vështirë, por më e dobishme se të vazhdosh të gabosh, të japësh është e vështirë, por e shenjtë, të marrësh pa e merituar është e kollajtë, por kriminale, të fitosh është më e vështirë se të humbësh, por është e lavdishme, të pajtohesh është më e vështirë se të dhunosh, por është e shenjtë.

Ditët e udhëtimit sakrifikues drejt Zotit, ditët e Ramazanit të finalizuara me ditën e Bajramit, na dhanë mësimin madhështor se po aq i madh sa është tundimi i mëkatit është edhe kujdesi i Zotit për të na mbajtur gjithmonë sa më larg atij tundimi. Ky kujdes i pandalshëm është arsyeja që sakrifica e ditëve të kaluara nuk ishte i fundit Ramazan, dhe ky sotmi nuk është i fundit Bajram, por çfarë po përjetojmë është vetëm një fragment i rrugës së pafundme të përsosjes së mendjes dhe të shpirtit në zbatim të përpiktë të vullnetit të Zotit, pra pa barrën e zakonshme të materialitetit.

Sa më lart, dhe të tjera, janë të një rëndësie të pallogaritshme. Sidomos sot kur qytetërimi dhe vlerat korresponduese janë më tepër se kurrë të rrezikuara, kur njerëz të të njëjtit Besim, që falen e luten njësoj në emër të të njëjtit Zot, zbatojnë të njëjtat rite si ky Bajram, shkaktojnë barbarizma të pashembullta, kasaphana të përgjakshme duke vrarë njerëz të pafajshëm edhe brenda të njëjtit besim e duke u kallin tmerrin gjithë të tjerëve.

Njeriu që sakrifikon për përsosjen shpirtërore, është i pamposhtur. Energjia e njeriut të pamposhtur vjen pikë së pari nga realizimi dhe respektimi i barazpeshës mes të drejtave dhe detyrave, në mënyrë të atillë që ajo barazpeshë të jetë funksionuese dhe produktive. Nëse barazpesha në fjalë çrregullohet, sidomos kur me të drejtat teprohet, vijnë të gjitha rreziqet që shkaktojnë të gjitha të këqijat. Të mos kujdesesh për ekuilibrin mes të drejtave dhe detyrave, do të thotë të keqes t’i hapësh portën. Të keqes porta nuk i duhet haopur. Të keqes porta i mbyllet. T’ia mbyllësh portën së keqes dhe t’ia hapësh të mirës, për së pari e për së fundi, do të thotë ta kesh mendjen të kthjellët dhe shpirtin të pastër, me fjalë tjera, t’i bindesh vullnetit të Zotit, të zbatosh me përpikëri porositë e Tij. Jo nga frika, por me gjithë shpirt. Pas kësaj, vetëm pas plotësimit të këtij kushti, vijnë të gjitha të mirat.

Ju, besimtarë myslimanë, klerikë të nderuar këtë e keni bërë, po e bëni, dhe do ta bëni.

Kjo është arsyeja që Besimi Juaj, përkushtimi Juaj, sakrifica Juaj, meritojnë të gjitha lëvdatat.

Kjo është arsyeja që unë, Presidenti i Republikës, besues i palëkundur i një bote me sa më pak dhunë dhe sa më tepër Liri, sa më tepër Besim dhe sa më pak zhgënjim, duke ju kujtuar edhe një herë se nuk ka gjë më aftë se të tilla festa për ta larguar urrejtjen dhe afruar dashurinë, pakësuar veset dhe shtuar virtytet, harruar mëritë dhe sjellë pajtimet, si President, personalisht dhe institucionalisht, me gjithë shpirt ju falënderoj e ju uroj: Gëzuar Bajramin!” – theksoi në fjalën e Tij Presidenti Nishani.

Në këtë darkë festive, Kreu i Shtetit shqiptar vlerësoi dhe nderoi figura dhe personalitete të shquara të bashkësisë myslimane si dhe të bektashinjve.

Presidenti Nishani dekoroi me Titullin “Për Merita të Veçanta Civile”: Hafiz Shaban Saliajn (pas vdekjes) “Për kontributin e tij të padiskutueshëm e të vyer në rikthimin e lirisë së besimit fetar dhe ripërtëritjen e praktimit të tij,, duke shërbyer si Myftar i Tiranës dhe njëkohësisht si mësues në Medresenë e Tiranës”; zotin Xhemal Balla “Për kontributin e tij të shquar arsimor e kulturor dhënë nëpërmjet botimeve të shumta dhe veprimtarisë së vyer si mësues e drejtor i Medresesë së Tiranës” dhe zonjën Rukije Skifteri “Në shenjë vlerësimi të figurës saj të papërsëritshme në mbajtjen gjallë të besimit në zot tek njerëzit duke shërbyer me përkushtim për më se 70 vjet në Teqenë e Dervish Hatixhesë, si një nënë me zemër të madhe, e cila me guxim dhe përvuajtje u vetësakrifikua, duke ia dalë mbanë ta shndërronte atë vend të shenjtë besimi në një pikë të rëndësishme pelegrinazhi shpirtëror”.

Me Dekoratën “Nderi i Kombit” u vlerësuan: Hafiz Xhemal Mullai (pas vdekjes) “Në shenjë vlerësimi të figurës së tij të shquar atdhetare dhe kontributit të vyer si kryetar i Shoqatës ‘Bashkimi’ në Stamboll, si deputet dhe nënkryetar i Asamblesë Parlamentare të Shqipërisë dhe njëkohësisht Kryetar i Komitetit të Drejtësisë në Parlamentin Shqiptar”; Abaz Hilmi Dede Elezi (pas vdekjes) “Në vlerësim të figurës së prijësit të shquar shpirtëror të brezave bektashianë, deri në fund të jetës së tij, mbrojtësit të kodeve zakonore dhe traditave më të vyera të besimit të Haxhi Bektash Veliut.” dhe Dervish Iljaz Qafoku (pas vdekjes) “Në shenjë vlerësimi dhe nderimi ndaj klerikut të përkushtuar, i cili gjatë gjithë jetës së tij u shqua për atdhetarizëm e kontribut të dhënë për arsimin kombëtar, figurë që i dha krahë dhe lartësoi pelegrinazhin e shenjtë në Malin e Tomorrit”.

Ndërsa me Titullin “Naim Frashëri” u dekorua: Haxhi Zyber Halluli (pas vdekjes) “Në vlerësim të kontributit të çmuar si themelues i strehës së parë vorfnore në vendin tonë dhe të rolit të tij të spikatur si kryetar i parë i Bashkisë së Tiranës, menjëherë pas shpalljes së Pavarësisë së Shqipërisë”.

Presidenti Nishani nderoi me “Dekoratën e Flamurit Kombëtar” Haxhi Vehbi Dibrën (Agollin) (pas vdekjes) “Për kontributin e shquar e të vyer në lëvizjen kombëtare për lirinë dhe pavarësinë e Shqipërisë, si firmëtar i Pavarësisë, Kryetar i parë i Parlamentit të Shqipërisë, si Kryetar i Kongresit të Dibrës dhe Kryetar i parë i Komunitetit Mysliman të Shqipërisë”.

Nishani nderon shoqatën “Çamëria” me Dekoratën “Gjergj Kastrioti Skënderbeu”

July 4, 2016 by dgreca

Kreu i Shtetit shqiptar vlerëson Shoqatën Patriotike “Çamëria” me Dekoratën “Gjergj Kastrioti Skënderbeu”/

4 korrik 2016

Në një ceremoni solemne mbajtur në Institucionin e Presidentit të Republikës, Kreu i Shtetit, Sh. T. Z. Bujar Nishani vlerësoi me rastin e 25-vjetorit të krijimit të saj Shoqatën Patriotike “Çamëria” me Dekoratën “Gjergj Kastrioti Skënderbeu”:“Në shenjë vlerësimi për kontributin e vyer e të pamohueshëm dhënë ndaj çështjes çame, si dhe për veprimtarinë e çmuar atdhetare dhe nxjerrjen më në pah të vlerave kulturore dhe etnografike të kësaj bashkësie të rrallë shqiptare me histori sa të lashtë, aq edhe të lavdishme”.

Në këtë veprimtari nderimi ishin të pranishëm Nënkryetari i Parlamentit Shpëtim Idrizi, kryetari i Nderit i PDIU-së Dashamir Muhedini, kryetari i “Shoqatës Çamëria” Abaz Hado si dhe anëtarë të bashkësisë çame.

Në përshëndetjen e rastit, Presidenti i Republikës vlerësoi veprimtarinë e Shoqatës me një shtrirje më të madhe në hapësirë dhe në kohë dhe me rrënjë të thella historike dhe atdhetare. Në vijim të fjalimit drejtuar komunitetit çam, Presidenti Nishani cilësoi tiparin dallues të tyre, krenarinë “për historinë dhe trashëgiminë e pasur të vlerave tuaja të patjetërsueshme atdhetare, kulturore si dhe përpjekjeve tuaja të pareshtura ndër shekuj për të mbajtur të pastër dhe ngritur edhe më lart identitetin tonë karakterizues kombëtar.”

“Që në epokën e artë të Rilindjes të parët tuaj me pushkë e penë, dhe këtu kam parasysh me dhjetëra e qindra patriotë, por do të përmend njërin prej tyre, shumë të veçantë të historisë kombëtare: Hasan Tahsinin, ose si njihej ndryshe Hoxha Tahsin – e deri në fitimin e Pavarësisë ku mes shumë të tjerëve, spikati Abedin Dino – pra të gjithë ata janë shquar ngaherë për kontributet të qenësishme në përpjekjet e pareshtura për liri, dije, arsim dhe kulturë. Në këto njëqind e katër vjet ekzistencë të Pavarësisë së shtetit shqiptar, bashkësia çame ka pasur një përfaqësim jo vetëm intelektual, por edhe qenësisht kontribuues të çështjes kombëtare, të ruajtjes së gjuhës shqipe, zakoneve, traditave të vyera, kulturës sonë kombëtare identifikuese. Deri në ditët tona, çamët të përhapur në pothuajse të gjitha zonat dhe qytetet e Shqipërisë nga jugu në veri, nga Saranda e Vlora, në Fier, Durrës e Tiranë e deri në Shkodër, kudo ku jetojnë e punojnë, kanë spikatur për ruajtjen me fanatizëm të identitetit, të zakoneve fisnike, të gjuhës së pastër shqipe, të muzikës dhe folklorit tonë karakteristik. Vallja tipike para litarit e Osman Takes është një shembull i përkryer i thesarit të çmuar etno-kulturor çam, por jo vetëm, sepse ajo u bë aq e njohur sa fama e saj ka kapërcyer me kohë edhe kufijtë e rajonit tonë ballkanik. Jeta tragjike dhe vepra letrare e Bilal Xhaferit është bërë e njohur deri matanë oqeanit në Amerikën e largët, ku ai u shua para kohe kur ende kishte shumë talent, fuqi dhe dëshirë për të krijuar e për t’iu përkushtuar më tej vlerave tuaj që i përfaqësoi me aq besnikëri.” – tha në vazhdim Kreu i Shtetit.

Më tej Presidenti Nishani theksoi rolin që ka pasur në bashkësinë çame “Krijimi i Shoqatës Patriotike ‘Çamëria’ më 10 janar 1991, në saje edhe të përpjekjeve të Abaz Dojakës në fillimet e demokracisë: “Ajo shënoi jo vetëm themelimin e një shoqate ombrellë për të gjithë ju, çamët krenarë, por i dhuroi mbarë shoqërisë shqiptare edhe një shembull të çmuar se si një bashkësi është në gjendje të shtrëngojë radhët e saj dhe të ruajë, zhvillojë e t’i pasurojë më tej denjësisht të gjitha vlerat e rralla atdhetare, kulturore dhe tiparet thellësisht identifikuese. Ju, që përfaqësoheni e njësoheni me ‘Shoqatën Patriotike Çamëria’ keni në aradhen tuaj të veprimeve, angazhimeve, kontributeve, vlera të patjetërsueshme dhe dinjitet duke u renditur krenarë krah për krah me shoqatat simotra anembanë në çdo cep të Shqipërisë, të cilat ruajnë, pasurojnë dhe zhvillojnë më tej xhevahiret e vyer të kurorës sonë të hijshme historike, kulturore dhe identifikuese. Shoqata Patriotike ‘Çamëria’ ka 25 vjet që me meritë, me zgjuarsi e me aq maturi ka ditur të hedhë hapa të rëndësishme në evidentimin dhe ndërkombëtarizimin e çështjes çame. Ky mision i juaji, i Shoqatës suaj të nderuar, i kontributeve të atyre burrave dhe grave që krijuan këtë shoqatë dhe sot atë e kanë lartësuar me dinjitet në mozaikun e nderimeve që i bëhen kombit, janë argumenti më bindës edhe për Institucionin e Presidentit të Republikës në këtë ceremoni vlerësimi dhe nderimi.” – tha Presidenti Nishani.

Kreu i Shtetit e konsideroi vlerësimin me Dekoratën e lartë “Gjergj Kastrioti Skënderbeu” të Shoqatës Patriotike ‘Çamëria’, edhe si një rast “për të evokuar dhe ndriçuar momente të rëndësishme të jetës historike, publike, kulturore dhe etnografike të një shoqate që meriton vlerësim të lartë nga gjithë institucionet vendimmarrëse të shtetit shqiptar, në mënyrë që çështja çame dhe kauza për zgjidhjen e të drejtave të këtij komuniteti të jenë në agjendën e së ardhmes për diplomacinë, këdo faktor dhe gjithë potencialin intelektual të shoqërisë shqiptare. Suksese të mëtejshme në misionin tuaj fisnik dhe atdhetar!” – me këtë urim Presidenti Nishani mbylli fjalën e Tij të mbajtur me këtë rast.