Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosovë-Çmimi “Shaban Jashari” mësueses Kimete Dida

by

PRISHTINË, 3 Mars 2016/ Ministri i Arsimit, Shkencës dhe Teknologjisë, Arsim Bajrami ka ndarë sot çmimin vjetor “Shaban Jashari” për mësimdhënësin e dalluar të vitit, i cili këtë vit i është ndarë mësueses Kimete Dida nga shkolla fillore “Ismail Qemali” në Prishtinë. Ky çmim është ndarë për performancën pozitive të mësimdhënësit model, komunikimit të dalluar me nxënës, prindër dhe rezultate të mira. Gjithashtu, ministri ndau mirënjohje edhe për mësimdhënës të tjerë të dalluar, nga një mësimdhënës për secilën komunë.
 Këto mirënjohje u ndanë në ceremoninë solemne të organizuar me rastin e 7 Marsit – Ditës së Mësuesit, nga ku ministri Bajrami uroi mësimdhënësit në gjithë Kosovën për këtë ditë të veçantë
 Ministri Bajrami, me këtë rast tha se, përveç ngjarjeve të shumta të lavdishme të marsit, në këtë muaj kujtojmë edhe rolin që kanë pasur mësuesit gjatë historisë. “Kujtojmë Shaban Jasharin si një atdhëtar, një veteran të arsimit, i cili diti të luajë rolin e një mësimdhënësi dhe po ashtu të edukojë një familje të tërë në frymën e atdhedashurisë, rezistencës dhe lirisë, dhe dha një provim historik se cili është roli i mësimdhënësit në momente të vështira kombëtare”, tha ministri Bajrami dhe theksoi se jo rastësisht ky çmim mban emrin e Shaban Jasharit.
 Ministri Bajrami kujtoi edhe kohën kur mësimdhënësit kanë punuar në kushte shumë të vështira dhe bashkë me popullin mbajtën të gjallë shkollën shqipe, por edhe idenë e lirisë, sidomos në vitet 90/99. “Të gjithë jemi krenarë për atë periudhë, por edhe jemi të obliguar të njohim atë punë, të njohim rolin e mësimdhënësve”, theksoi ai.
 Sa jemi krenar për rolin që kemi pasur si mësimdhënës, theksoi ministri Bajrami, aq jemi të vetëdijshëm për rolin që duhet ta kemi sot, sepse sot të qenit mësimdhënës është një profesion krenar dhe jemi shumë të lumtur që është një nga profesionet më të kërkuara në tregun e punës.
 Duke e vlerësuar lartë figurën e mësimdhënësit dhe rolin që ka për reformat në arsim, ministri Bajrami theksoi se Kosova është vendi me numrin më të madh të të rinjve, të cilët meritojnë arsim cilësor. “Instrumenti më i mirë për ta ngritur cilësinë në arsim janë mësimdhënësit e përgatitur”, tha ai, ndërsa u shpreh i bindur se së bashku mundemi që Kosovës t’ia krijojmë një sistem të avancuar të edukimit.
 Mësuesja, e cila mori çmimin “Shaban Jashari”, Kimete Dida, u shpreh mirënjohëse për këtë çmim, për të cilin tha se i jep fuqi për të vazhduar edhe më tutje me përkushtim në misionin e shenjtë të edukimit të brezit të ri. “Ne arsimtarët duhet të jemi koshientë për rolin që kemi në transformimin e shoqërisë sonë duke punuar me nxënësit tanë në zbatimin e parimeve etike, humaniste, të siqeritetit, ndershmërisë dhe sjelljes e kulturës, që janë bazë për të ndërtuar një shoqëri të drejtë dhe prosperuese”, tha ajo./b.j/

Ekipi i filmit “Shok” pritet nga kryetari i Prishtinës

by

Prishtinë, 2 mars 2016/ Kryetari i komunës së Prishtinës, Shpend Ahmeti, priti sot në takim ekipin e filmit “Shok”, të cilin e vlerësoi tejet të rëndësishëm për disa arsye.

-“E para, që nuk kemi shumë storie të luftës që tregojnë se çfarë ka ndodhur në Kosovë dhe ky film e përçon mesazhin e asaj që ka ndodhur në luftë. Ndërsa, e dyta është se kjo është hera e parë që Kosova përfaqësohet në një ngjarje aq të rëndësishëm për filmin”, tha Ahmeti. 

Ai përgëzoi për punën e bërë dhe uroi sukses në të ardhmen.

Filmi “Shok” ka garuar në ceremoninë më të rëndësishme të artit filmik “Oscars”, ku pjesëmarrja e një projekti nga Kosova ishte një ngjarje historike për kinematografinë kosovare./b.j/

Jonuz Musliu, në Stacionin policor të Bujanocit

by

Kryetari i Këshillit Kombëtar të Luginës së Preshevës, Jonuz Musliu është ftuar të paraqitet në stacionin policor në Bujanoc.

Ftesa, është bërë nga Policia e Serbisë për shkak se, siç ka thënë ajo në ftesë, ai e ka penguar rrugën rajonale, transmeton Koha.net.E vërteta është se Musliu, me një numër protestuesish kanë penguar kalimin e dy maunave të cilët kthenin mbrapa për në Kosovë 103222 tekste shkollore të cilat ishin dhënë donacion nga MASHT-it për nxënësit e Luginës së Preshevës.

Këta libra shkollorë kanë qëndruar në terminalin doganor Buajnocit që nga fundi i gushtit të vitit të shkuar.

Librat janë kthyer në Kosovë me vendim të Minsitrisë serbe të Arsimit, pasi ajo i librat i ka konsideruar nacionalistë.

 

Visar Ymeri në gjykatë

by

Policia e Kosovës e ka shoqëruar për në gjykatë kryetarin e Lëvizjes Vetëvendosje, Visar Ymeri. Lajmin e ka konfirmuar për Radion Evropa e Lirë, zëdhënësja e Policisë së Kosovës, Flora Ahmeti. “Në bazë të një urdhërese të Gjykatës Themelore në Prishtinë, në mëngjes policia ka shkuar në banesën ku jeton deputeti i Lëvizjes Vetëvendosje, Visar Ymeri dhe e ka shoqëruar atë në polici”, ka thënë ajo.

Tash për tash, nuk janë bërë të ditura arsyet pse është shoqëruar në polici Ymeri.Një numër deputetësh dhe aktivistë të kësaj partie politike, kohët e fundit janë përballur me ligjin, qoftë për shkak tët sjelljeve të tyre ne Kuvendin e Kosovës dhe përdorimit të gazit lotsjellës, apo për shkak të protestave në rrugë të cilat në disa raste përfunduan edhe në dhunë dhe përplasje me policinë.

Policia e Kosovës përmes një komunikate me shkrim, ka deklaruar se “urdhëresa e nxjerrë në muajin shkurt të këtij viti, ka specifikuar detyrimin për policinë, që të pandehurin V.Y me datën 02.03.2016, në ora 09:30, ta dërgojë në Objektin e Pallatit të Drejtësisë, saktësisht në Gjykatën Themelore”.

DEKLARATA E VETEVENDOSJES

Arrestohet Kryetari Visar Ymeri

Në mëngjesin e ditës së mërkurë, data 2 mars 2016, disa pjesëtarë të Policisë së Kosovës kanë arrestuar në banesën e tij kryetarin e Lëvizjes VETËVENDOSJE!, Visar Ymerin.

Visar Ymeri është arrestuar edhe pse gëzon imunitet, si deputet i Kuvendit të Kosovës. Ai është dërguar me forcë në gjykatë, ku është i thirrur si dëshmitar.

Arrestimi i kryetarit të subjektit më të madh opozitar vjen pas qindra arrestimesh të aktivistëve e deputetëve të Lëvizjes në gjashtë muajt e fundit.

Arsyet e kësaj përndjekje mesjetare janë tërësisht politike, duke qenë se për gjashtë muaj me radhë Lëvizja VETËVENDOSJE! ka arritur të bllokojë marrëveshjet e dëmshme për vendin, atë për “Zajednicën” dhe “Demarkacionin”.

Të gjithë aktivistët e Lëvizjes VETËVENDOSJE!, përfshirë këtu kryetarin Visar Ymeri, shefin e grupit parlamentar Glauk Konjufca apo sekretarin organizativ Dardan Molliqaj, nuk janë njerëz që arratisen prej Kosovës për t’i ikur drejtësisë, siç bëjnë zyrtarët e lartë të partive në pushtet.

Të gjithë ne jemi të arrestueshëm, ndryshe nga kriminelët dhe multimilionerët e PDK-së dhe LDK-së që janë të paprekshëm. Por nuk do të vijmë vetë në gjyqet politike të urdhëruara nga pushteti. Do të vazhdojmë rezistencën deri sa ta shpërfaqim krejt dhunën policore dhe shumëstandartësinë gjyqësore të këtij pushteti me karakteristika totalitare.

2 mars 2016
Lëvizja VETËVENDOSJE!

Inagurohet qendra per studimin e gjallesave detare ne Lagunen e Patokut

by

Nga Ahmet ZANI/

Qendra për Studimin dhe Ndihmën e Parë për Breshkat Detare në Patok vjen si një financim i projektit NETCET: “Rrjeti për Ruajtjen e Cetaceve dhe Breshkave Detare në Adriatik”. Projekt ky i cili e ka nisur aktivitetin e tij në vitin 2012 dhe përfundon në fund të Shkurtit të vitit 2016. Qëllimi kryesor i këtij projekti ishte zhvillimi i strategjive të përbashkëta për ruajtjen e cetaceve dhe breshkave detare në detin Adriatik. Ky projekt është një bashkëfinancim i Instrumentit të Bashkimit Evropian për Asistencën e Para-Antarësimit dhe 13 partnerëve nga rajoni. Aktivitetet lidhur me breshkat detare në Shqipëri janë mbuluar nga Shoqata Herpetofauna Shqiptare.

Rezultatet e arritura nga ky projekt janë të shumta si:

-Shkëmbimi, standartizimi i njohurive shkencore dhe bashkëpunimi efektiv ndërmjet institucioneve të përfshira në ruajtjen e cetaceve dhe breshkave detare në Adriatik.

-Rritja e kapaciteteve institucionale për ruajtjen e këtyre gjallesave në shtete partnere.

-Shtimi i njohurive mbi popullatat dhe rreziqet që u kanosen cetaceve dhe breshkave detare.

– Rritjen e kapaciteteve teknike për rikuperimin e breshkave detare në Adriatik dhe trajtimi efektiv i breshkave të dëmtuara në qendrat e rikuperimit ekzistente/ të ndërtuara rishtazi.

-Rritjen e mundësisë së shpërndarjes së informacionit përmes qendrave për rikuperim të breshkave detare.

– Rritjen e ndërgjegjësimit të popullsisë bregdetare për praninë dhe nevojën e ruajtjes së këtyre gjallesave.

-Rritjen e njohurive dhe adaptimin nga peshkatarët të formave korrekte të mbajtjes dhe lëshimit të breshkave detare.

-Përmirësimi i praktikave të ruajtjes dhe menaxhimit të popullatave të cetaceve dhe breshkave detare dhe habitatave të tyre në Adriatik përmes bashkëpunimit rajonal.-Krijimi i një krenarie dhe ndjenje pronësie për pasurinë natyrore të Adriatikut.

Përvec veprimtarive të shumta shkencore, edukative dhe ndërgjegjësuese që ka zhvilluar ky projekt, ndërtimi i qendrës për studimin dhe ndihmën e parë për breshkat detare në mjediset e lagunës së Patokut ka shënjuar kulmin e zhvillimeve të tij në vendin tonë për shkak se kjo qendër:

Është e para e këtij lloji në vendin tonë.

-Do të mund të ofrojë një ndihmë të specializuar për breshat e dëmtuara.

-Do të shërbejë si një pikë lidhëse për rrjetin e monitorimit të kapjes aksidentale apo gjetjen e breshkave të ngordhura.

-Do të mund të shpërndajë informacion dhe organizojë aktivitete me grupmosha të ndryshme

-Do të ofrojë mundësinë e zhvillimit të aktiviteteve kërkimore në një mjedis të rëndësishëm për nga biodiversiteti dhe pozicioni siç është laguna e Patokut dhe gjiri i Drinit.