Nga Ahmet ZANI*/
Fshatrat e Mirdites rrezikojnë të izolohen plotësisht, për shkak të amortizmit të rrugëve që i lidh ato me qendren e Rrëshenit. Mungesa e investimëve në këto segmente rrugore ka sjellë degradimin e plotë të tyre, duke bërë që në këto rruge banorët të lëvizin vetem me mjete të rënda. Kjo situatë ka sjellë paralizimin e jetes së banorëve që jetojnë në këto zona, ndërsa më e vështirë situata parqitet për të sëmuret të cilët për të marrë shërbimin mjekësor ju duhet të ecin me orë të tëra. Banoret e fshatrave të Mirdites thonë se nuk është vënë dore prej dekadash në këto akse rrugore, ndërsa sëfundëmi ka munguar edhe mirëmbajtja e tyre. Sipas Banorëve në shumë raste kanë ndërhyrë ato vetë në riparimin zhbllokimin e rruges, pasi ka munguar vemendja e pushtetit vendor. “Rruga që të çon drejt fshatit tonë ka degraduar thuajse plotësisht. Lëvizja mund të kryhete vetem me mjete të rënda, pasi nuk ka asnjë mënyre tjeter. Këtu nuk është investuar prej dekadash por, prej disa mujash mungon edhe mirëmbajtja. Rruga bllokohet disa here, pasi ka reshqitje të dherave dhe askush nuk nëdrhyn. Kemi qenë vetë në banoret që kemi ndërhyrë me forcat tona, pasi bashkia na ka harruar plotëisht. Këtu ka dhe përsona të sëmurë dhe që ju duhet që të ikin për të marrë ndihmë mjekësore, por që të përshkojmë 15 km rruge ne na duhet që të lëvizim dy orë me mjete të rënda. Kjo nuk është apsak normale që pushtetarët të vinë këtu vetem për të marrë votat dhe më pas të mos kujtohen për ne” u shpreh Bardhok Lleshi Banor i Kaçinarit Gjendjen në fshatrat e Mirdites e ka inpsektuar edhe Deputetja e Zones Albina Deda. Sipas sajë pushteti vendor dhe qëndror e ka braktisur këtë zonë, duke i lënë këta banorë në mëshirë të fatit. “Kemi ispektuar pjesen më të madhe të rrugëve që lidhin fshatrat e Mirdites me qytetin e Rrëshenit. Situata është mjaft alarmante dhe këto zona janë në prag të izolimit të plotë. Në këto kushte qytetarët e kanë të pamundur që të marrin shërbime dhe situata më e vështirë është për të sëmuret dhe nxënësit e shkollave. Ata duhet të ecin me orë të tëra, për të shkuar në qytetin e Rrëshenit. Shumë rrugë janë të pakalueshme, pasi mungon terësisht mirëmbajtja. Kryetari i Bashkisë e ka braktisur këta qytetar edhe pse ju premtoj në fushatë, se prioritet kryesr do të jetë rikonstruksioni i rrugëve. I bëj thirrje pushtetit vendor dhe atij qëndror që të ktheje sytë nga Mirdita, pasi situatë në këtë zonë është mjaft alarmante” u shpreh Albina Deda Deputete e PD-së Mirditë E njëjta situate paraqitet në të gjitha rruget që lidhen Njesitë Administrative me qytetin e Rrëshenit, ku gropat e mëdha me ujë dhe reshqitje dherash në disa vende janë panorama që të serviret.
* Bashkëpunëtor i Diellit, Shqipëri
Presidentja e Maltës, vizitë në Kosovë
– Pritja ceremoniale bëhet në orën 10:00 në Sheshin “Ibrahim Rugova” në Prishtinë/
PRISHTINË, 15 Shkurt 2016-B.Jashari/ Presidentja e Republikës së Maltës, Marie Louise Coleiro Preca, mbërrin për vizitë në Kosovë, ku nesër paradite Presidentja e Republikës, Atifete Jahjaga i organizon pritje zyrtare.
Pritja ceremoniale bëhet në orën 10:00 në Sheshin “Ibrahim Rugova” në Prishtinë, ndërsa pas takimit mbahet konferencë shtypi.
Axhenda e dërguar bën të ditur se, Presidentja e Maltës Marie Louise Coleiro Preca do takohet edhe me kryetarin e Kuvendit të Kosovës, Kadri Veseli, si dhe me kryeministrin Isa Mustafa.
Në Valletta, në qershor 2015, Presidentja Marie-Louise Coleiro Preca, ka pritur në takim zëvendëskryeministrin e ministrin e Jashtëm të Kosovës, Hashim Thaçi gjatë vizitës në Maltë.
Me atë rast Presidentja e Republikës së Maltës tha se Kosova është një shtet që po dëshmon përkushtim të madh për integrim në familjen e madhe evropiane dhe përkrahja e shtetit maltez, i cili ndër të parët ka njohur pavarësinë e Kosovës, nuk do të mungojë edhe në të ardhmen.
Kosovë- Ja si si do të organizohen festimet e 8 vjetorit të Pavarësisë
-Prej sot, deri në 17 shkurt, në të gjitha ambasadat e Republikës së Kosovës organizohen pritje për korin diplomatik, zyrtarë shtetesh, si dhe personalitete të rëndësishme të shteteve përkatëse/
-Kosova këtë javë, pranverë në dimër/
Nga Behlul Jashari/ PRISHTINË, 15 Shkurt 2016/ Në Kosovë këtë javë ka shumë organizime aktivitetesh për festimet e 17 Shkurtit, ditës historike kur në vitin 2008 në Kuvendin e saj shpalli Pavarësinë. Këshilli Organizativ për shënimin e tetë vjetorit të Pavarësisë së Republikës së Kosovës, i themeluar nga qeveria, ka bërë të ditur për Gazetën Dielli axhendën e manifestimeve.
Prej sot, deri në 17 shkurt, në të gjitha ambasadat e Republikës së Kosovës organizohen pritje për korin diplomatik, zyrtarë shtetesh, si dhe personalitete të rëndësishme të shteteve përkatëse.
Sot, 15 shkurt, nga ora 10:00 zhvillohet ceremonia e dhënies së çmimeve letrare në Ministrinë e Kulturës, Rinisë dhe Sportit.
Në ora 11:00, Ministria e Punës dhe Mirëqenies Sociale, në bashkëpunim me Odën Ekonomike të Kosovës, Odën Amerikane në Kosovë dhe Odën Gjermano- Kosovare, organizon panairin e punës në Pallatin e Rinisë dhe Sportit, në Prishtinë.
Po në këtë Pallat, nga ora 17:00, Federata e Futbollit të Kosovës, organizon turneun tradicional në Futsal.
Në ora 20:00, në Teatrin Kombëtar të Kosovës, jepet shfaqja mysafire “Zemra e Huaj” nga Teatri i Sarajevës. Regjia, Dino Mustafiq.
Në 16 shkurt, ora e parë e mësimit në të gjitha shkollat do t’i kushtohet Pavarësisë së Republikës së Kosovës.
Në orën 19:00, Presidentja dhe Kryeministri i Kosovës organizojnë pritje për korin diplomatik dhe përfaqësuesit e institucioneve të Republikës së Kosovës, si dhe mbahet koncert festiv i Filarmonisë së Kosovës.
Në ora 20:00, në Teatrin Kombëtar të Kosovës, do të paraqitet Ansambli i Këngëve dhe Valleve TOBI nga Tirana.
Në 17 shkurt 2016, në ora 10.00, në Prishtinë, sipas vendimit të qeverisë së Republikës së Kosovës do të bëhet parakalimi i kuadrateve të FSK-së dhe njësive të Policisë së Kosovës. Parakalimi përcillet edhe me aktivitete të tjera akrobatike të kadetëve në shesh si dhe nga bendi muzikor i FSK-së.
Në ora 10:00, Biblioteka Kombëtare e Kosovës “Pjetër Bogdani” hap ekspozitën e librit “Kosova në Udhën e Pavarësisë”.
Homazhe, në orën 11:00, në Prishtinë, i bëhen Presidentit historik të Kosovës Ibrahim Rugova, ndërsa në orën 12:00 Komandantit Legjendar Adem Jashari dhe të rënëve të tjerë të familjes Jashari në Prekaz.
Në orën 12:00, Ansambli Shota do të defilojë në Prishtinë në sheshet Zahir Pajaziti, Nënë Tereza dhe Ibrahim Rugova.
Në ora 20:00, Baleti Kombëtar i Kosovës në Teatrin Kombëtar shfaq baletin “Dasma” me regji e koreografi të Mehmet Ballkan.
Në komunat e Kosovës:
Në orën 09:00 bëhen homazhe në varrezat e dëshmorëve dhe tek shtatoret e heronjve të Kosovës;
Autoritetet komunale bëjnë vizita në familjet e dëshmorëve;
Komunat ndërmarrin aktivitete për dekorimin e rrugëve, parqeve dhe shesheve për datat 15-17 shkurt 2016 me flamuj. Bëjnë edhe dekorimin e shesheve dhe rrugëve me logo të 8 vjetorit të Pavarësisë;
Më 17 shkurt 2016, në ora 10:00, kuvendet komunale mbajnë mbledhje solemne me mysafirë të ftuar;
Nga 11 shkurti deri më 17 shkurt, shkollat organizojnë ekspozita me punimet e nxënësve lidhur me përvjetorin e shpalljes së Pavarësisë së Kosovës;
Komunat ndajnë mirënjohje dhe dekorata për personalitete të vlerësuara komunale në shenjë të 8 vjetorit të Pavarësisë së Kosovës;
Manifestime të ndryshme sportive dhe kulturore në varësi të mundësive të komunave.
Po në 17 shkurt, delegacionet e larta të institucioneve të Republikës së Kosovës: Presidenca, Kuvendi i Kosovës, Kabineti Qeveritar, do të bëjnë homazhe tek varrezat dhe përmendoret e dëshmorëve.
FSK do të angazhojë pjesëtarët e saj tek varrezat dhe komplekset e dëshmorëve.
Në 19 shkurt, në ora 13:00, Presidentja e Republikës së Kosovës, Atifete Jahjaga, do të dekorojë me medalje personalitete të shquara.
Protokolli i Shtetit është në dispozicion për të mbështetur të gjitha aktivitetet dhe ceremonitë shtetërore.
Këshilli Organizativ për shënimin e tetë vjetorit të Pavarësisë së Republikës së Kosovës thekson se axhenda mund të jetë subjekt i ndryshimeve.
Tradicionalisht, në çdo 17 shkurt ka edhe koncerte dhe njerëzi në festë mbushin sheshet dhe rrugët me defilime për Lirinë dhe Pavarësinë, për të shprehur edhe falënderimin e mirënjohjen e përjetëshme për të gjithë kontribuesit në botë.
Në këto ditë festimesh, sipas Institutit Hidrometeorologjik, në Kosovë do mbajë mot pranvere në dimër.
—
Koha- Kosova këtë javë, pranverë në dimër/
PRISHTINË, 15 Shkurt 2016/ Kosova këtë javë, gjatë pesë ditëve, do të jetë nën ndikimin e masave të ngrohta të ajrit me origjinë nga jugperendimi, me temperatura pranverore, minimalet 4 deri 7, kurse maksimalet 17 deri19 gradë celcius.
Instituti Hidrometeorologjik i Kosovës në njoftimin e dërguar thekson se, të hënë në pjesën e parë të ditës do të fryjë erë herë-herë me vrull nga drejtimi i jugperendimit me shpejtësi mbi 15 metra në sekondë, do të ketë reshje shiu vetëm në jug dhe jugperendim të vendit, kurse të martën dhe të mërkuren sipas imazheve satelitore dhe situatës sinoptike parashihet të mbajë mot kryesisht me diell.
Nga dita e enjëte do të ketë vranësira të dendura, pasdite vende-vende reshje shiu, të cilat do të vazhdojnë edhe të premten. Era do ta ndërroj kahun nga jugperendimi në drejtim të veriut dhe verilindjes dhe do ndikojë edhe në uljen e temperaturave./b.j/
John Kerry: Jeni në rrugën e duhur; Rama: Në mars, reforma në drejtësi
Kerry: SHBA, krah Shqipërisë në rrugën e reformave; Rama: Në mars votojmë ndryshimet për reformën në drejtësi/
TIRANË, 14 Shkurt/ATSH-Maela Marini/.- “Reforma në drejtësi ka një rol kyç për qëndrueshmërinë dhe rezultatet e çdo reforme tjetër në Shqipëri”.
Kjo u konfirmua nga Kryeministri Edi Rama, në konferencën e përbashkët për shtyp në selinë e kryeministrisë, me Sekretarin amerikan të Shtetit, John Kerry, i cili po zhvillon një vizitë zyrtare në vendin tonë.
Kryeministri Rama vlerësoi ndihmën e SHBA-së për kryerjen e kësaj reforme, si dhe garantoi se “marsi do të jetë muaji kur do të votohet në Kuvend paketa e ndryshimeve Kushtetuese për reformën në drejtësi”.
Rama-Kerry-konference shtypi Foto Flori Abazi (3)“Diskutuam në veçanti për reformën në drejtësi. U jemi mirënjohës SHBA-së për ndihmën e çmuar që i kanë dhënë vendit tonë në rrugën e kësaj reforme dhe për punën e palodhur të ekspertëve amerikanë në ekipin teknik të reformës. Objektivi ynë i përbashkët është që marsi të jetë muaji i votimit në Kuvend i paketës së ndryshimeve kushtetuese. Kam besim që do t’ja dalim dhe fakti që nuk jemi vetëm, por me SHBA në krah e bën të pakthyeshëm këtë sukses”, deklaroi Rama.
Kryeministri i Shqipërisë, deklaroi se zhvillimi i mëtejshëm i partneritetit mes SHBA-ve dhe Shqipërisë, do të luaj një rol kyç në sigurinë e rajonit. Rama shtoi se shqiptarët u janë mirënjohës Shteteve të Bashkuara, pasi pa ta, shqiptarët në tërësi nuk do të ishin më të respektuar se kurrë më parë.
Rama-Kerry-konference shtypi Foto Flori Abazi (5)“Ne shqiptarët ndajmë me SHBA-në një histori të re marrëdhënie shumë të ngushta që në prill të vitit të kaluar njohën zhvillim të ri përmes dokumentit të Partneritetit Strategjik. Është e vetëkuptueshme se lidhja jonë speciale me SHBA-në na jep përgjegjësi të posaçme në rritjen e sigurisë. Prandaj shqiptarët u janë besnikërisht mirënjohës SHBA”, tha Rama.
Lidhur me bashkëpunimin dypalësh në fushën e zhvillimit ekonomik, Rama u shpreh se “ka një rritje të interesit të kompanive amerikane ndaj Shqipërisë”, ndërsa u zotua se “do të mbështesim fuqimisht shtimin e pranisë së tyre në vendin tonë”.
“Një prej pikave të bisedës ishte siguria energjetike. E informova Sekretarin e Shtetit për ecurinë shumë pozitive të projektit tonë të ndërveprimit rajonal në këtë fushë dhe rolin që Shqipëria është gati të luajë, si një pikë ndërlidhëse këtu në Ballkan me tregun europian të energjisë, në veçanti nëpërmjet gazsjellësit Trans-Adriatik. Po ashtu, edhe për rëndësinë e veçantë që ne i japim shtrirjes së linjës së gazit, lart në korridorin Adriatiko-Jonian, si një domosdoshmëri strategjike, për integrimin rajonal, në kuadrin më të gjerë të integrimit europian dhe euroatlantik”, deklaroi Kryeministri.
Kryeministri Rama theksoi se në fokus të bisedës ishte edhe thellimi i bashkëpunimit në luftën kundër terrorizmit ndërkombëtar dhe ekstremizmit të dhunshëm, edhe si pjesë e koalicionit botëror kundër ISIS. “E informova Sekretarin për masat e fundit që ka marrë Shqipëria në këtë drejtim, për forcimin e kuadrit ligjor, për punën e agjencive ligjzbatuese, për miratimin së fundmi dhe fillimin e zbatimit të strategjisë kundër ekstremizmit të dhunshëm, si dhe për bashkëpunimin rajonal në këtë kuadër”, tha ai.
Sa i përket zhvillimeve në rajon, ai tha se “jemi tejet të kënaqur që Mali i Zi është ftuar në NATO, dëshirojmë shumë edhe të njëjtën gjë për Maqedoninë”. “Ndërsa Kosova dhe Serbia do vazhdojnë dialogun e tyre për të shkuar drejt normalizimit. Ne do ta intensifikojmë bashkëpunimin me SHBA për konsolidimin e zhvillimit demokratik jo vetëm në Shqipëri, por edhe në vendet fqinje. Në rajonin tonë rrjeti i bashkëpunimit nuk ka qenë asnjëherë më aktiv. Tirana ka ambicien të jetë gjithnjë e më shumë zëri i paqes”, tha Rama.
Ai deklaroi gjithashtu se dialogu mes Kosovës dhe Serbisë, nuk është një dialog i lehtë por është pa diskutim e vetmja rrugë për të arritur suksesin.
Kerry: SHBA, përkrah Shqipërisë në rrugën transformuese të reformave
Rama-Kerry-konference shtypi Foto Flori Abazi (2)Ndërsa Sekretari amerikan i Shtetit, Kerry vlerësoi se “Shqipëria është në rrugën e duhur të reformave, veçanërisht atyre që kanë të bëjnë me luftën kundër krimit, korrupsionit dhe forcimit të ligjit dhe shtetit ligjor”.
Duke inkurajuar reformat në Shqipëri, Sekretari amerikan i Shtetit, John Kerry shprehu bindjen se paketa e refomës në drejtësi, që është duke u shqyrtuar do t’i japë një goditje krimit dhe korrupsionit në Shqipëri.
“Kjo kërkon mbështetjen e çdo shqiptari. SHBA janë të gatshme dhe unë jam këtu për t’ju konfirmuar se ne jemi përkrah jush në këtë transformim, por në fund, vetëm shqiptarët mund t’i miratojnë ligjet”, deklaroi sekretari Kerry.
Rama-Kerry-konference shtypi Foto Flori Abazi (6)Ai vlerësoi se “Shqipëria ka bërë shumë përparim”. “Nuk është e lehtë të ndërtosh një demokraci të fortë dhe është puna e shumë dhjetëvjeçarëve. Shqipëria ka bërë përparim domethënës dhe është qartazi e angazhuar. Nuk ka asnjë mëdyshje se ajo do të mbështetet te SHBA”, tha Sekretari Kerry.
Kerry apeloi që gjyqtarët dhe prokurorët t’u përmbahen rregullave dhe të gjithë të trajtohen me drejtësi, pavarësisht se cila parti është në pushtet”.
Duke u ndalur te marrëdhëniet dypalëshe, Sekretari Kerry u shpreh se “Presidenti Obama më ka thënë që të kujdesemi për Shqipërinë”. “Ndodhem këtu sepse jemi miq. Ne jemi aleatë dhe kemi interesa të përbashkëta. Ne përkujtojmë 25-vjetorin e marrëdhënieve tona diplomatike. Shqipëria ka qenë në koalicionin kundër ISIS që nga fillimi dhe po qëndron bashkë me ne në Afganistan. Shqipëria nuk është thjesht një mike. Shqipëria është një vend anëtare e NATO dhe kjo sjell përgjegjësi të veçanta për rajonin”, tha ai, duke shtuar se “Shqipëria është duke lëvizur në rrugën e duhur”.
Mesazhi që la sekretari Kerry në librin e përshtypjeve në Kryeministri
Tirane, 14 Shkurt/ATSH/.- Në kryeministri, sekretari Kerry la sot edhe një mesazh në librin e përshtypjeve.
“Faleminderit popullit shqiptar për pritjen jashtëzakonisht zemërgjerë në vendin tuaj të bukur. Shtetet e Bashkuara të Amerikës janë shumë krenare për miqësinë tonë. Shqipëria është një aleate e shkëlqyer e NATO -s. Një partner në luftën kundër ekstremizmit dhe një mike e shkëlqyer. Përshëndetjet më të përzemërta. John Kerry”.
Sekretari amerikan i Shtetit, John Kerry në Tiranë
Presidenti Nishani i uron mirëseardhjen në Shqipëri Sekretarit amerikan të Shtetit, Kerry/
Tirane, 14 shkurt 2016/
Presidenti i Republikës, Sh. T. Z. Bujar Nishani i uroi mirëseardhjen në Shqipëri Sekretarit amerikan të Shtetit, John Kerry, për t’i shprehur mirënjohjen e thellë të shqiptarëve për të gjithë mbështetjen e pakursyer, veçanërisht për integrimin e vendit në strukturat Euroatlantike.
Presidenti Nishani u shpreh se kjo vizitë është dëshmi e qartë dhe domethënëse se miqtë dhe partnerët tanë më të mirë janë pranë nesh në këto momente që rreziqet dhe kërcënimet janë afruar me Shqipërinë dhe rajonin.
Kreu i Shtetit shqiptar e siguroi Sekretarin Kerry për vendosmërinë e Shqipërisë në luftën kundër krimit të organizuar dhe korrupsionit. Presidenti Nishani përcolli gjithashtu përshëndetje të ngrohta e të përzemërta për Presidentin e Shteteve të Bashkuara të Amerikës, Barack Obama.
- « Previous Page
- 1
- …
- 295
- 296
- 297
- 298
- 299
- …
- 596
- Next Page »