Mergata – Page 97 – Dielli

Studiuesi i Nënë Terezës në shërbim të shoqërisë shqiptare

May 22, 2014 by dgreca

*Alpion: “Nuk do të antarësohem asnjëherë në ndonjë parti politike por me kënaqesi do t’i ofroj ekpertizën time çdo qeverie të zgjedhur në mënyre demokratike.”

*Alpion nuk e pranoi ftesën për të promovuar Edi Ramën në një klip televiziv gjatë fushatës elektorale në zgjedhjet e Qershorit 2013
Ne Foto: Intelektualet Dibrane, Takim me Presidentin z Bujar Nishani, 7 Maj 2014/
Profesor Gëzim Alpion, një ekspert i shquar i Nënë Terezës, sapo është kthyer nga Shqipëria, vendi i murgeshës së nderuar, ku zhvilloi bisedime me disa nga autoritetet më të larta të vendit gjatë të cilave ai theksoi rëndësinë e ndërtimit të një autostrade për zhvillimin e rajonit.
Profesori i sociologjisë në Universitetin e Birminghamit argumenton se rruga ka rëndësi lokale, kombëtare dhe ndërkombëtare dhe se ajo do të përmirësojë në mënyrë të ndjeshme infrastrukturën ndërmjet Shqipërisë, Kosovës, Maqedonisë dhe Bullgarisë, duke kontribuar kështu në integrimin e kësaj pjese të Ballkanit në Bashkimin Evropian.
Përpjekjet e Alpion për t’i dhënë jetë shoqërisë civile në Shqipëri kanë tërhequr vëmendjen e disa mediave përfshirë ato britanike, indiane dhe sllovake.
Reporterët e huaj, përfshirë edhe ish-gazetaren e BBC World Service Rashmee Roshan Lall, ndërsa e kanë nënshkruar peticionin dhe përkrahin përpjekjet e Alpion, kanë shprehur rezerva përsa i përket predispozicionit të qeverisë shqiptare për të implemetuar ndryshimet e rekomanduara me pasion nga Alpion. “Mos vallë duhet ta përdorim fjalën ‘ndryshim’ me rezerva kur flasim për Shqipërinë?’ shkroi ajo në mënyre retorike në artikullin në mbështetje të nismës së Alpion në Prill të këtij viti.
Alpion thotë se Rruga e Arbërit, që do të ketë gjatësinë 72 km, do të përmirësojë shumë jetën e më se 200,000 banorëve në zonën e Dibrës që, pas Traktatit të Londrës në 1913, u nda ndërmjet Shqiperisë dhe Mbretërise së Serbisë. Aktualisht Dibra lindore është pjesë e ish-republikës Yugosllave të Maqedonisë.
Sipas Alpion, të dy anët e Dibrës janë lenë vazhdimisht në harresë nga qeveritë në të dyja anët e kufirit.
Intelektualët dibranë në Shqipëri kanë lobuar për ndërtimin e rrugës që në vitin 1995.
Në bazë të rekomandimeve të studimit për fizibilitetin e rrugës, studim që përfundoi në vitin 2004 me një kosto prej 110,000 dollarësh amerikanë, qeveria shqiptare e aprovoi ndërtimin e kësaj vepre në vitin 2005. Që nga ajo kohë, vetëm 16 milion euro janë investuar nga 350 milion euro që është kostojo përfundimtare e rrugës.
Në dhjetë vitet e fundit ndërtimi i rrugës është trumbetuar si prioritet në programet elektorale të të gjitha partive kryesore të cilat e kanë lënë atë në harresë sapo kanë ardhur në pushtet.
“Në përgjithësi politikanët nuk para shquhen se e mbajnë fjalën në asnjë vend të botës”, shprehet Alpion, “por në Shqipëri atyre nuk iu kërkohet llogari për premtimet e rreme elektorale. ”
“Në mungesë të një opozite të efektshme dhe besnike në politikën shqiptare,” shton ai, “shoqëria civile, që është akoma në një fazë embrionale, duhet të ndihet dhe të bëjë presion mbi qeverinë me mjete demokratike në mënyrë që Rruga e Arbërit të përfundojë në përputhje me standarded ndërkombëtare.”
Pasi zhvilloi takime me drejtuesit kryesore të pushetit lokal në Dibër në të dyja anët e kufirt, Alpion u prit nga Presidenti i Republikës së Shqipërisë z. Bujar Nishani, Kryetari i Kuvendit z. Ilir Meta dhe Ministri i Transportit dhe Infrastrukturës z. Edmond Haxhinasto. *Në të gjitha takimet Alpion u shoqërua nga dy intelektualë dibranë që e kanë përkrahur peticionin që në fillim: znj Erisa Saraçi, e cila po studion për doktoratën në Universitetin e Leipzigut në Gjermani, dhe z. Bujar Karoshi, botues dhe editori i gazetës mujore ‘Rruga e Arbërit’.
Presidenti dhe Kryetari i Kuvendit e vlerësuan punën që Profesor Alpion dhe kolegët e tij po bëjnë me peticionin dhe i siguruan ata për përkrahjen e tyre për Rrugën e Arbërit.
Në Tirane Alpion organizoi një tavolinë të rrumbullakët ku morën pjesë deputetë të Dibrës dhe me origjinë dibrane, drejtues të shoqërisë civile dhe përfaqësues të mediave kombëtare. “Ana pozitive e të gjitha këtyre aktiviteteve dhe takimeve”, u shpreh Alpion, “është se të gjithë janë në një mendje se rruga duhet të përfundojë sa më shpejt që të jetë e mundur. ”

Qëllimi kryesor i vizitës së Alpion në Tiranë në Maj ishte dorëzimi formal i peticionit Kryeminsitrit të Shqipërisë z. Edi Rama. Kjo nuk u realizua jo sepse z. Rama refuzoi hapur ta priste Alpion. Nga mesazhet e paqarta nga Zyra e Kryeministrit, Alpion dhe ekipi i tij krijuan përshtypje se, mesa duket, z. Rama nuk ka kurajo ta thotë hapur se si qëndron çështja e fondeve për këtë projekt.
“Një numër zyrtarësh na thanë se për këtë projekt po zhvillohen bisedime me qeverinë kineze,” thotë Alpion duke shtuar se “megjithëse na u la të kuptojmë se një marrëveshje me kinezët mund të nënshkruhet në çdo moment, ajo që na shqetëson ne është se askush nuk ishte në gjendje të thotë se kur.”
Duke pasur parasysh premtimet e shumta që nuk janë mbajtur në të kaluarën, thekson Alpion, ai dhe kolegët e tij do ta besojnë qeverinë për aq kohë sa të jetë e arsyeshme. “Ne do ta ngremë zërin po qe se brenda një kohe të arsyeshme qeveria nuk prononcohet zyrtarisht për marrëveshjen me Kinën, nënshkrimi i të cilës, me sa konkluduam nga bisedimet zyrtare që zhvilluam në Tiranë, është diçka iminente”, thekson Alpion.
Peticioni jo politik që Alpion filloi para zgjedhjeve parlamentare më 18 Mars 2013, tashmë ka mbi 7000 përkrahës online dhe në formularë.
Kur e pyetëm nëse ai do të pushonte së lobuari për rrugën po qe se Kryeministri i Shqipërisë e fton atë ta dorëzojë peticionin në muajt e ardhshëm, Alpion u përgjigj: “Ne do të pranojmë me kënaqësi një ftesë nga Kryeminsitri në çdo kohë por peticioni do të qëndroj i hapur deri në inagurimin përfundimtar të rrugës.”
“Kur të sigurohen fondet për rrugën”, theksoi Alpion, “ne do t’ju kërkojmë njerzve që ta nënshkruajnë peticionin edhe në një numër më të madh. Në atë fazë, ne do të kujdesemi që fondet të mos përdoren për vepra të tjera, siç ka ndodhur në të kaluarën, dhe që të mos i bëhet asnjë ndryshim projektit të aprovuar. Po kështu, ne do t’i bëjmë presion qeverisë që të marrë të gjitha masat e duhura që fondet të mos përfundojnë në xhepat e zyrtarëve të korruptuar.”
Peticioni u përkrah që në fillim nga mediat në Shqipëri, Kosovë, dhe Maqedoni dhe gëzon mbështetjen e mediave shqiptare në disaporë, veçanërisht në Mbretërinë e Bashkuar, Shtetet e Bashkuara të Amerikës, Kananda, Australi, Itali, Zvicër, Greqi dhe Rumani.
Shqiptari 51-vjeçar Alpion ka afro 30 vite që studion dhe banon jashtë. Ai ka një BA nga Universiteti i Kajros dhe në vitin 1997 përfundoi studimet e doktoratës në Angli në Universitetin e Durhamit, një institucion me famë botërore. Alpion vlerësohet nga kritika si studiuesi me autoritar i Nënë Terezës në gjuhën angleze.Kur e pyetëm nëse ai do të konsideronte një karierë politike në Shqipëri, Alpion u përgjigj pa hezitim: “Nuk do të antarësohem asnjëherë në ndonjë parti politike por me kënaqesi do t’i ofroj ekpertizën time çdo qeverie të zgjedhur në mënyre demokratike”. Në përputhje me qëndrimin e tij konsekuent për të qëndruar jashtë influences së partive politike, Alpion nuk e pranoi ftesën që ju bë për të promovuar z. Rama në një klip televiziv gjatë fushatës elektorale në zgjedhjet e Qershorit 2013.
* C. M. Paul
Matters India
New Delhi, 16 Maj 2014

http://mattersindia.com/mother-teresa-scholar-bats-for-albanian-society/

Adnan Januzaj e Elona Zhana takohen në Bruksel

May 22, 2014 by dgreca

Elona Zhana, e cila kandidon në zgjedhjet e datës 25 maj 2014, për deputete në Parlamentin Rajonal të Brukselit, në radhët e partisë Belge “CDH”, pati një takim të këndshëm me talentin e madh shqiptaro-belg të futbollit, Adnan Januzaj. Ku takim ishte shumë i papritur, duke parë se axhenda e Januzaj për momentin është shumë e ngarkuar, për shkak se ai është përzgjedhur dhe po përgatitet për të marrë pjesë në Botërorin “Brazil 2014”, me Belgjikën.
Ky takim kaloi shumë mire në zyrën e punës së zonjës, Zhana.
Adnani, i cili jeton dhe ai në Bruksel, është shumë krenar që shumë bashkatdhetarë të ardhur nga Shqipëria e Kosova po përparojnë e po shkëlqejnë në fushën e politikës e drejtime të tjera. Ai mbështet kandidaturën e Elonës në komunitet.
Koçidenca më e madhe është se Adnani luan në fanellën e tij me numrin 44, gjithashtu dhe Elona kandidon me numrin 44. Siç duket “nr 44” është krijuar si numër fati për të dy këto personazhe, që të kapin majat e të dalin fitues e kampionë.
Elona ndihet shumë krenare për këtë takim me Adnan Januzaj. – “Ne ndajmë dashurinë për shqiptarinë, Brukselin, respektin ndaj talentit dhe nr 44” – shprehet Elona Zhana, në profilin e saj, “facebook”.

Adnan Januzaj
Adnan Januzaj ( i lindur në Bruksel, 5 shkurt 1995) është lindur në Belgjikë nga prindër Kosovarë, e konsiderohet si një prej talenteve të rinj më të mirë të futbollit Europian.
Ai luan si mesfushor dhe aktualisht ka kontratë 5 vjeçare me Mançester Junajtid.
Januzaj është një mesfushor krijues e luan dhe si sulmues, ndonjëherë luan dhe si anësor. Ka filluar të luajë me Mançester Junajtid që nga viti 2011. Fillimet e karrierës i pati në klubin belg FC Bruksel dhe Anderlecht.

Elona Zhana
Me origjinë nga Bajram Curri, Tropojë, Elona Zhana jeton në Bruksel që prej vitit 2001. Është diplomuar për Marrëdhënie me Publikun dhe Administrim e Menaxhim të Punës në ULB – Université libre de Buxelles (Universiteti i Lirë i Brukselit). Në zgjedhjet rajonale të datës 25 maj 2014, ajo është kandidate për deputete në Parlamentin Rajonal të Brukselit, në radhët e partisë CDH (Centre démocrate humaniste)”– (Qendra e demokracisë humaniste), është Parti e qendrës së djathtë, anëtare të PPE (Partive Popullore Europiane).

Sonia .M

Reagimet nga mërgata shqiptare për zgjedhjet në Kosovë 2014!

May 21, 2014 by dgreca

Nga Asllan Dibrani/
Qazim Bajgoraliu kryetarë i LDK-së – dega në Gjermani dhe anëtarë i Këshillit të Përgjithshëm të LDK-së këto ditë shprehu pakënaqësinë vërejtjet dhe sugjerimet e zgjedhjeve në Kosovë. Opinionin e tij vërejtjet janë edhe të tjerëve në shumë pika edhe jashtë partisë që ju ka drejtuar zoti Qazim Bajgora ish presidentit të Kosovës Fatmir Sejdiut . Zoti Qazim Bajgoraliu është një punëtor shumë vjeçar dhe veprimtar i dalluar në shumë aktivitete , aksione , simpoziume dhe konferenca për çështjen e Kosovës, po i bashkëngjis reagimin e tij si më poshtë:
I nderuar President Sejdiu,
Me zhgënjim të madh, por jo edhe befasues për mua, mora lajmin për mospërfshirjen Tuaj në listën e kandidimit për delegat të Kuvendit të Republikës së Kosovës, e cila vjen si pasojë e lojërave të pista, që kanë filluar të luhen, që, para vendimit të Gjykatës Kushtetuese. Kjo fatkeqësisht ndodhi edhe nga lidershipi i vetë LDK-së, duke injoruar, sabotuar deri në përpjekje për denigrim të figurës dhe të punës Tuaj. Ata të cilët ishin bërë si hija Juaj, ishin të gatshëm edhe shtratin ta qonin në zyrën, kudo ku mundë të ishte presidenti Sejdiu. Unë po tregoj një shembull, kur në vitin 2011 në zyrën e LDK-së në Prishtinë, nga LDK, dega në Gjermani, u dha çmimi “Ora e Presidentit”. Unë porosita që të ftohet presidenti Sejdiu, por nuk kishte lejuar Ismet Beqiri. Unë për të gjitha manifestimet e degës sonë, kam ftuar gjithmonë Isa Mustafën si kryetarë i partisë dhe edhe presidentin Sejdiu si Ish-President dhe ish-kryetarë i LDK-së e kryetarë Nderi tani. Në një bisedë telefonike, Ismet Beqiri më tha: “Shoki, nuk po bëni mirë që po i thirrni do njerëz e nuk po vetni “!
– I thashë se nuk di nëse kam ftuar vikend që nuk e meriton, më trego, se ndoshta keni informacione të gabuara?
– Më tha:-
“Po, po thërret Fatmir Sejdiun dhe nuk po bënë mirë”?!.
-I thashë se unë do ta thërras përderisa konsideroj se ai e meriton dhe nuk konsideroj se ai ka punuar kundër LDK-së dhe partisë.
– Më tha:
-Ani, ani shoki bëni qysh doni veç pa neve!?.Keshtu perfundon zoti Bajgoraliu dialogun me zoti Ismet Beqirin siç duket revolta e tij u shfaq edhe sipas raporteve te fundit ne mes z. Fatmir Sejdiut dhe z.Isa Mustafe vazhdon reagimi i z. Bajgoraliut :

-Pra edhe ndodhi injorimi! Nga kryetari Isa Mustafa, më, për asnjë figurë që ne përkujtuam dhe për asnjë manifestim, nuk pa të arsyeshme të dërgoj qoftë edhe dy rreshta për të përshëndet tubimet tona). Unë i bëra me dije që duhet të kemi parime dhe nesër mund të jeshë një Ish-… dhe si të duket nëse nuk të respektojnë te tjerë!!!. Ka edhe raste të tjera, të cilat i din edhe Isa Mustafa, kurse Ismetit ia thashë në janar të këtij viti, kur ishte në Zvicër dhe ai u tregu shumë i papjekur dhe i pasinqertë, deri në gënjeshtarë të pa skrupullit!!!

Më kanë befasuar shumica e kryetarëve të degëve, të cilët ranë nën këtë ndikim, u treguan frikacakë, u treguan mosmirënjohës ndaj kontributit të madh të presidentit Sejdiu, të cilët u shndërruan në servil për interesa personale e në dëm të LDK-së.

Dje dhe sot, të shumtë janë ata të cilët më telefonuan dhe më shkruan, për zhgënjimet dhe indinjatën e thellë, për këtë listë e cila përfshinë njerëz dhe prurje, të cilët u rangun në pjesën e lartë të listës, njerëz të cilët jo vetëm që nuk kanë dhënë kontributin e tyre për çështjen e Kosovës, por ishin dhe punuan kundër LDK-së dhe presidentit Rugova, shkatërruan LDK-në dhe ndërruan më shumë se dy parti deri tani. U injoruan njerëz që kanë dhënë shumë për Kosovën dhe nëpërmjet LDK-së, të cilët kanë kontribut dhe përvojë të madhe në ndërtimin e shtetit dhe të gjitha proceseve shtetformuese, sikur jeni Ju z.Fatmir , ndër më të përgatiturit politikisht dhe në fushën diplomatike që ka pas dhe ka Kosova .
-Mospërfshirja e juaj , është një lehtësim për Ju, për të pushuar dhe për të qenë më i relaksuar, sesa të merresh e të bësh politikë, me njerëz të pabesë, njerëz të bizneseve të pista, që fatkeqësisht janë shumica e kësaj liste dhe e spektrit të gjerë politikë të Kosovësthot, por fatkeqësia është humbja e madhe për të ardhmen e mirë të Kosovës, e cila me Ju dhe nënlidershipin Tuaj, do të kishte shpresa më të mëdha për të na dërguar drejt synimit të shumicës së shqiptarëve, drejt BE dhe aleancës Veri-Atlantike, me një shtet ligjorë, pa korrupsion, pa grupe të mafies politike e ekonomike. Gjatë qëndrimit tuaj në Gjermani, Juve personalisht iu shtrua edhe kërkesë – apel, që të jeni pjesë aktive e politikës kosovare, sepse siç u tha, pa ju në lidership, e ardhmja e mirë për Kosovën do të jetë larg.
Do të kisha dëshiruar shumë të dijë, nëse në këtë listë prej 110 kandidatëve, kishte ndonjëri burrëri dhe intelektual, e të ketë treguar gadishmërin për të lëshuar vend për Ju, pas thënies së arsyes Tuaj, shumë burrërore, se nuk lejon që askënd prej tyre të largohet nga lista e publikuar.
Kur e mendoj se kënd kishte LDK kryetarë, kënd kishte LDK sekretarë dhe kënd ka tani, LDK ka një devalvim skajmërisht të kundërt nga vlera e madhe që kishte për vite të tëra.
Mjerimi për LDK, fillon nga ata që besojnë, se sot, në lidershipin e LDK-së, ka njerëz më të mirë e më të zot, më të përgatitur e më të aftë se presidenti Sejdiu.
Kështu e përfundon letrën dërguar zotitFatmir Sejdiut ,z.Qazm Bajgoraliu
kryetar i LDK-së – dega në Gjermani dhe anëtarë i Këshillit të Përgjithshëm të LDK-së, nga e cila vërtet pezmi dhe ky opinion mbretëron edhe tek partitë tjera që këto ditë kanë filluar t’i japin sinjalet negative. Kjo frikë qëndron se do te përsëriten gabimet, keqpërdorimet , diferencimet paraprake .po edhe në manipulimin e këtyre zgjedhjeve aktuale te Qershorit 2014. Janë të pa shmangshme kur intelektualet , e denje , veprimtaret e denje largohen dhe zëvendësohen me njerëz te korruptuar , me njerëz të pa dije dhe me njerëz te pa vlerë me çka “Mërgata(Diaspora) shqiptare po i ndien në palcë manipulimet edhe të këtyre zgjedhjeve .

LIDHJA E SHKRIMTARËVE NË GJERMANI NDERON KOLOSIN E LETRAVE SHQIPE,AZEM SHKRELIN

May 21, 2014 by dgreca

Nga Shaban CAKOLLI/
Azem Shkreli,një autoritet i cili nuk mund të zëvendsohet,njeri i madh i kulturës sonë kombëtare,që me mençuri lëroj gjuhë e kulturë kombëtare i cili u ngjit në majë të letrave shqipe dhe vetës i krijoi pavdekësinë,i mungon Kosovës,anekënd trojeve shqiptare,shumë letrar Europian thonëse i mungon Europës,na mungon neve mërgimtarëve të shkapërderdhur ënë e kënd nëpër botë,me te kishim një krijimtari më të fortë,më moderne,kinomatografi më të sukseshmet,qenja e tij i kushtohej poezisë,ishte dhe mbetet figura më madhore që mbajti gjallë lirinë e Kosovës.Për mërgatën tonë shqiptare, në veçanti për krijuesit tanë të cilët jetojnë dhe veprojnë në Gjermani,Azem Shkreli ishte shpresa dhe drita e mërgimtarëve,ishte ambasadori i vërtetë i kulturës sonë,bashkëpunonte me ne dhe na jipte këshilla,nga se kush pos tij atëbotë nuk mirrej me kulturën tonë në mërgim,pos tij.Azem Shkreli ka kohë nuk është fizikisht me ne,por për ne krijuesit në mërgatë mbetet figura më madhore,më e çmuara,udhërrëfyesi më i mirë i krijuesve në mërgim.
LSHAKSH në Gjermani gjithnjë nderon veprën e tij,organizon takime të llojllojshme për te,por tani katër vite me radhë organizon manifestimin tradicional për Azem Shkrelin,manifestim ky garues në të cilin ipen çmime për tri veprat më të mira.Këtë të shtune me 17 maj,në sallën e kulturës në Ennepetal të Gjermanisë LSHAKSH,mbajti takimin tradicional Azem Shkreli në mërgatë 2014.Manifestimit ia shtuan gjallërinë pjesëmarrja e familjes Shkreli,znj.Behare Shkreli dhe Valon Shkreli,të cilët janë shumë të çmuar dhe rrespektuar për mërgimtarët,shkrimtarë,poet,e dashamir të fjalës së shkruar,mërgimtarë të ardhur anë e kënd Europës,këngëtarë,piktor,aktor,nxënës të shkollës shqipe të Wupertalit me mësuesin e tyre Sami Thaçi,etj….Kishin ardhur edhe shkrimtarë e poet nga Kosova si Halil Xani dhe Qëndresa Halili,xhirues nga RTK-ja Ragip dhe Kushtrim Rama.Blerta Kelmendi,si moderatore mjaft e sukseshme e moderoj programin,ku në fillim ftoj për fjalën përshëndetëse kryetarin e nderit të LSHAKSH,z.Martin Çuni,i cili me pak fjalë të ngohëta,këshilluese dhe edukative,u ndoq me vemendje të lartë dhe shpërtheu me duartrokitëje nga masa.Për jetën dhe veprën e Azem Shkrelit,foli kryetari i LSHAKSH,z.Pal Sokoli,i cili mestjerash shtoi:Azem Shkrelí lindi më 1938 në Rugovë të Pejës. Shkollën fillore e kreu në vendlindje, ndërsa në Prishtinë ai vazhdoi shkollën e mesme për të vazhduar fakultetin Filozofik,degën e gjuhës dhe të letërsisë shqipe. Për shumë vjet ai ka qenë kryetar i shoqatës së Shkrimtarëve të Kosovës, drejtor i Teatrit Krahinor në Prishtinë dhe themelues e drejtor i Kosova Filmit. Vdiq në pranverën e vitit 1997.
Ka botuar këto vepra në poezi Bulzat (1960), Engjujt e rrugëve (1963), E di një fialë prej guri (1969), Nga bibla e heshtjes (1975), Pagëzimi i fjalës (1981), Nata e papagajve (1990), Lirikë me shi (1994), Zogj dhe gurë (1997). Në prozë: Karvani i bardhë (1961), Sytë e Evës (1975), Muri përfundi shqipes Shtatë nga at, si dhe dramat: Fosilet (1968), Varri i qyqes (1983) etj. Poezitë e tij janë përkthyer në shumë gjuhë të huaja.
Shfaqja e Azem Shkrelit si poet, përpos që përputhej me ardhjen e talentit të fuqishëm, shënonte njëkohësisht kthesën e parë drejt hapjes dhe modernizimit të poezísë shqipe të Pasluftës. Shkreli u ngjít natyrshëm në kulmet e poezisë së sotme shqiptare dhe këtë vend ai e konsolidoi dhe e përforcoi nga njëra vepër poetike në tjetrën, deri në atë të fundit, që e la dorëshkrim “Zogj dhe gurë”, botuar më 1997.
Veprimtaria në poezi dhe në prozë e Azem Shkrelit në fund të viteve pesëdhjetë dhe në fillim të gjashtëdhjetave, shënon kthesë cilësore dhe kthesë në praktikat krijuese letrare. Gjatë viteve pesëdhjetë, si gjimnazist, Azem Shkreli, ka mundur të lexojë nga letërsia e kohës në gjuhën shqipe një poezi tematikisht të kufizuar, me strukturë dhe sajim artistik gjuhësor pa origjinalitetin e duhur. Në prozë gjendja ishte edhe më e varfër. Me përjashtim të ndonjë emri, (Hivzi Sulejmani) ajo pak prozë e autorëve jo fort të talentuar, kryesisht trajtonte tematikën e luftës dhe të fitores përmes rrëfimit klishe bardh e zi dhe të metodës së realizmit socialit.
Kështu Azem Shkreli shënoi kthesën e parë më të rëndësishme në poezi, në radhë të parë, duke e çliruar Unin lirik intim nga ai kolektlv, duke selitur në të temën e dashurisë për vendlindjen dhe duke portretizuar njeriun e truallit rugovas, me ngjyrimet e traditës dhe të lashtësisë, dashurinë për vashën, lirikën peizazhiste, etj. Nga ana tjetër thyerjen e parë të madhe në letërsinë shqiptare, kosovare, Shkreli e bëri me romanin “Karvani i
bardhë” si edhe me tregimet e përfshira në vëllimin “Sytë e Evës”, që qëndrojnë ndër më të realizuarat në prozën tonë të shkurtër.
Hasan Qyqalla,Kryetar i LKSHM, i cili përshëndeti familjen Shkreli dhe të gjithë të pranishmit, foli p rëndësinë e manifestimit Azem Shkreli,lëvdoi veprimtarinë e Azem Shkrelit në përgjithësi dhe të veçantë në letërsinë shqipe.LSHAKSH në Gjermanirolin prioritar ia lë bashkëpunimit me rininë tonë të mërguar.Falemnderuar mësuesit Sami Thaçi,i cili me nxënësat e tij të shembullor ka vite që bashkëpunon me ne, u prezantuan me këngë
e valle kombëtare dhe një recital dy gjuhësh shqip-gjermanisht.Pjesa e parë e takimit ishte e pregaditur me punime domethënëse nga Azem Shkreli dhe për Azem Shkrelin,ku me poezi për Shkrelin u prezantuan:Dibran Demaku,poet e publicist,aktori Musa Mulolli, Anxhelina Krasniqi-Bardhi,etj.
Me një poezi të arrirë u paraqit edhe poeti ynë i njohur nga Kosova Halil Xani.Driton Gashi,një artist i merituar,i cili në Gjermani ka ardhur si fëmijë,i dalluar në mësime të shkollës gjermane dhe asaj shqipe,tani pedagog në shkollat gjermane,këngëtar i mirënjohur,shkrimtar,para të pranishmëve shpalosi nga reportuari i tij këngët:Kur të jeshë mërzitur shumë(teksti i Dritëro Agollit”)dhe Valësi i lumturisë,kënaqi të pranishmit dhe u shp-
ërblya me duartrokitëje të zjarrta.Ashtu publikun e ndezi me këngë për Pjetër Bogdanin,rrapsodi ynë i mirënjohur Zyber Topalli.Krenaria në mërgim na mbanë kur rinia jonë e mërguar ruan gjuhë,kulturë e traditë,dashurinë për atdheun,kur të rinjët në mërgim i recitojnë e këndojnë atdheut,dëshmorëve të kombit,ndihemi se këta fëmijë nuk mund të asimilohen.Të tillë ishin vëllezërit Kurtishi,të cilët me këngët e tyre për atdheun mrekulluan pjesëmarrësit.
Dihet se me këta djem të rinjë ka punuar shumë edhe babai i tyre dhe këngëtari ynë i merituar z.Llokman Kurtishi.
Sekretari i LSHAKSH-në Gjermani dhe udhëheqësi i komisionit të Konkursit të sivjetmë poeti dhe publicisti Shaban Cakolli, në emër të jurisë se përbërë nga:
1. Shaban Cakolli( poet dhe publicist)
2. Faruk Tasholli(shkrimtarë,poet, publicistë dhe autor i shumë teksteve të këngëve hite)dhe
3. Miradije Gashi, (poete e publiciste).
Shpalli fituesit e vitit 2014 të Konkursit letrarë, ”Azem Shkreli”.
Vendi i parë i takoj poetit, Naim Fetaj: “Terrinë përtej diellit”, përmbledhje poezish
Vendi i dytë shkrimtares, Bukurie Bushati: ”Buzëqeshje me gjurmë lotësh”, tregime
Vendi i tretë poetes, Fakete Rexha: Bota e vogël e Beri Lu, tregime dhe poezi.
Shaban Cakolli tha, këtë vit kemi pasur një konkurrencë vërtetë të madhe, na ka ardhur shumë keq qe na duhej të veçojmë tre fitues po sipas konkurrencës, për jurinë fitues janë të gjithë ata qe konkurruan. Shpërblimet i ndanë në emër të familjes Shkreli, Valon Shkreli, (djali i Azemit) dhe Shaban Cakolli në emër të jurisë se Lidhjes sonë. Në emër të te shpërblyerëve folën Fakete Rexha, “Mua mu nda Cmimi i tretë për librin e botuar mes dy takimeve “Bota e vogël e Beri Lu”. U gëzova. Shumë u gëzova. Ndaj, desha ta falenderoja Zonjën Shkreli bashkë me familjen e saj si donatore kryesore. Pal Sokolin – Kryetar i Lidhjes së SHAK të Gjermanisë. Këshillin Organizativ të manifestimit dhe Jurinë. Edhe gjithë të tjerët që jeni të pranishëm në këte manifestim të fjalës së bukur artistike. Prania e familjes së Azem Shkrelit dhe e tëgjithë ju krijues te dashur,pastaj ky çmim qe mu nda sot,do te jenë frymëzim dhe një motiv më shumë per krijimtari të re. Ndërsa fituesja tjetër Bukurije Bushati tha ;”Hera e parë qe marr pjesë në një konkurs letrar. Kjo në Lidhjen e Shkrimtarëve dhe Artistëve Shqipar në Gjermani. U paraqita me librin tim, përmbledhje tregimesh,” Buzëqeshje me gjurmë lotesh”.Mendoj se të fitosh çmimin libri me i bukur i vitit, eshte me gjithmënd gëzim, por të fitosh, edhe pse jo te parin, por vendin e dytë me cmimin, “Azem Shkreli”, kjo është lumturi! Faleminderit, për vlerësimin, juria, faleminderit Kosova, faleminderit zonja Shkreli! Jam e nderuar prej jush! Këngëtari Driton Gashi ju dhuroj qe të tre fituesve nga një CD dhe nga një Libër mr këngë te reportuarit të tij. U ndanë edhe mirënjohje në emër të Lidhjes Shkrimtarëve, Artistëve dhe Krijuesve Shqiptar në Gjermani. Mirënjohje kësaj radhe i ndamë: Poetit tanimë të ndjerë: Fehmi Korqa, për aktivitete dhe krijimtari pranë LSHAKSH-së në Gjermani. Poetit dhe ish kryetarit të LSHAKSH-së tani i LSHKSHM z. Hasan Qyqalla, për punë dy vjeçare panë saj. Pastaj poetes dhe zëdhënëses së Lidhjes sonë , Sevëme Fetiqi, për veprimtari dhe aktivitet pranë saj. Mirënjohje i ndamë edhe poetit dhe sekretarit te LSHAKSH-së Z. Shaban Cakolli, si krijuesi më aktiv i vitit. Mirënjohje i ndamë edhe zonjës Drita Nikoliqi-Binaj, për pjesëmarrje aktive në aktivitetet e LSHAKSH-së në Gjermani dhe me në fund i ndamë mirënjohje edhe shkrimtares nga Kosova, Qëndresë Halili, si pjesëmarrëse më e re pranë të manifestimit tonë. Mirënjohjet i ndanë Martin Çuni( Kryetari i nderit) dhe Pal Sokoli(Kryetar i tanishëm) të LSHAKSH-së në Gjermani. Kryetari i Shoqatës “Lichtblick” z. Ismet Mehmetaj, në emër të shoqatës se vet, ndau dy mirënjohje, një mirënjohje public ke për LSHAKSH në Gjermani, 2014 për aktivitete dhe organizim të mirëfillte të mërgatës, dhe një mirënjohje për Znj. Mimoza Kallja nga Muncheni.
E cila i gjendët gjithmonë pranë çdo aksion humanitar. Gjithmonë i është përgjigjur thirrjeve për ndihmë, jo vetëm të shoqatës “Lichtblick e. V.” por edhe thirrjeve individuale të njerëzve më nevoja. Para një viti e kemi shpalle ambasadore te shoqatës “Lichtblick e. V.” tha Ismet Mehmetaj
.Në pjesën e dytë të manifestimit,u promovuan dy libra:Romani “Përsëri Përseritet” i autores Qëndresa Halili,për të cilin referoi Musa Mulolli si dhe përmbledhja poetike “Bërthama e fjalës”;për të cilen referoj Maxhun Smajli.

Koncerti i madh Pranveror në Kanada: sukses i jashtëzakonëshëm – publik madhështor!

May 19, 2014 by dgreca

Intervistë e gazetarit Beqir Sina me krijuesin dhe organizatorin e Koncertit, z Tonin Ndoja/
TORONTO – KANADA : Koncerti i madh Pranveror në Kanada, ka mbërritur javën e kaluar në edicionin e 5 të, të tij. Dhe, për të pestin, vit me rradhë, ky koncert i suksesshëm mban “vulën” e krijuesit dhe organizatorit të saj, Z. Tonin Ndoja, një emigruar nga Mirdita, dhe që tani jeton së bashku me familjen e tij në Oakville, Ontario – Kanada.
Gjithçka rrëfen ai është bërë e mundur në sajë të pasionit dhe dëshirës së “zjarrtë” për artin, teksa ai vetë e merr për sipër për të organizuar jetën kulturore artistike të shqiptarëve në Kanada, së bashku me kolegët e tij dhe artistët e këtij komuniteti në Amerikën e Veriut.
Deri tani z. Ndoja, ka realizuar 5 Koncerte të mëdha Pranverore në Kanada, spektaklet me një pjesmarrje të një publiku shqiptarë jashtëzakonisht të madhë, e cila, ka ardhur duke u rritur në çdo vit dhe çdo koncert.
Këto ditë ai po merret me suksesin e Koncertit të Madh të Pranverës 2014, dhe është duke “pjestuar” gëzimin e suksesit, të Konceritit të V-të Pranveror, së bashku me artistët pjesëmarrës, stafin e tij organizator dhe publikun e mrekullueshëm shqiptarë në Amerikën e Veriut.
Mbasi si thotë edhe vetë ai “I gjithë ky realizim madhështor vjen edhe si rezultat i një bashkëpunimi të përkryer me bashkëpuntorët dhe partnerët tanë, publikun e mrekullueshëm shqiptar artëdashës”.
Dhe, shton se “bashkëpunimi i përkryer me dy konferencierët: Edlira Cini dhe Taulant Dedja, bashkëpunimi me sponsorët dhe së fundi një grup artistësh me një harmoni të paparë, që do të mbetet në memorien e të gjithëve për shumë kohë”, tha z. Ndoja.
Gjatë një interviste të posaçme për gazetën tonë, duke folur me gazetarin tonë në SHBA, Beqir SINA, zoti Ndoja, u shpreh se :” Dashuria për artin, përvoja tashmë disavjeçare dhe këmbëngulja janë disa elementë të gërshetuar me njëri-tjetrin dhe bashkëpunimi me elementët, që e duan artin është ajo që të çon drejt suksesit”.
Zoti Ndoja, ditët e fundit, shqiptarët e Kanadasë patën mundësinë të “riktheheshin” në atdhe, përmes muzikës tradicionale shqiptare dhe asaj të lehtë. Ashtu si vitet paraardhëse, Koncerti i Madh i Pranverës bëri bashkë të gjithë shqiptarët me banim në Kanada. Ku u mbajt ai?
Koncerti i Madh i Pranverës u mbajt në Oakville On, më datë 10 maj 2014.
Kush është organizatori i këtij eventi?
Koncerti i Madh i Pranverës, një event tashmë i kthyer në traditë, organizohet nga Albanian Canadian Events dhe ishte i pesti radhas.
Me sa interes u prit dhe si ishte pjesëmarrja?
Pjesëmarrja ishte madhështore, si asnjëherë tjetër. Salla mblodhi shqiptarë nga të gjitha rrethinat: Toronto, London, Kitchener, Woodbridge, Mississauga, Oakville. Nuk e shoh të nevojshme të jap shifra, por interesi i shqiptarëve për këtë koncert duhet thënë se ishte shumë i madh.
Një aktivitet i tillë kërkon muaj të tërë përgatitjesh dhe një staf të koordinuar mirë. Si u përzgjodhën artistët pjesëmarrës dhe cili ishte repertori i tyre?
Ishte një aktivitet i miroganizuar, pasi ne si organizatorë ishim përgatitur për muaj të tërë. Përzgjedhja e artistëve u bë duke pasur parasysh kërkesat e publikut shqiptar artdashës. Repertori ishte i përzgjedhur nga të gjitha trevat, gjë që përcolli mesazhin e unitetit mes shqiptarëve në Kanada. Ajo që duhet theksuar ishte fakti që publiku nuk reshti së duartrokituri për tri orë dhe ovacionet pasuan të gjitha këngët e bukura shqiptare.
Çfarë e bëri më të plotë dhe të arrirë këtë koncert?
Si gjithmonë, muzika live me një orkestër profesioniste.
Kush ishin të ftuarit e këtij viti dhe nga cilat vise shqipfolëse vinin?
Nga Shqipëria kishim të ftuar këngëtarët Kastriot Tusha, Ylli Baka, Irma Libohova dhe Vida Kunora. Nga Struga ishte mysafir Pajazit Myrtishi.
A pati pjesëmarrje të artistëve të komunitetit shqiptaro-kanadez të Torontos dhe Amerikës?
Sigurisht, ishte e pranishme këngëtarja Merita Halili, e cila shoqërohej nga orkestrantët Raif Hyseni, Mirgjen Darova dhe Savim Umer, të cilët iu bashkuan orkestrës bashkë me Tom Lleshajn, Përparim Mefajn dhe Erind Emirin. Nga komuniteti kishim të ftuar grupin “Tingujt” dhe sopranon e mirënjohur Mirela Tafaj.
Organizator i këtij koncerti është Albanian Canadian Events, të cilin e drejtoni ju. Si president, si ju lindi ideja e organizimit të një koncerti kaq të madh në Amerikën e Veriut? Cilat ishin vështirësitë e një sipërmarrjeje të tillë?
Siç edhe e shpreha më lart, kjo është një 5-vjeçare kompanisë që unë drejtoj. Fillimisht ideja lindi duke njohur mirë komunitetin, të cilit i kishte munguar një organizim i tillë që shpalos artin dhe kulturën tonë. Ne jemi dashamirës të artit dhe po mundohemi të kontribojmë maksimalisht për arritur standardet që kërkojmë. Vështirësitë sigurisht që ekzistojnë, ambiciet dhe xhelozitë ndonjëherë i kalojnë limitet dhe në vend që të kontribuojne, që është në të mirën e secilit, shkojnë nga njëherë në kahun e kundërt. Ky fenomen është i pavend, por me këmbëngulje dhe përkushtim në misionin që kemi marrë përsipër, ne shpresojmë t’i kemi kapërcyer dhe këto barriera antishoqërore apo antishqiptare.
Ku e mbështetni suksesin e këtyre koncerteve muzikore në Amerikën e Veriut? Cila është pika juaj e fortë?
Dashuria për artin, përvoja tashmë disavjeçare dhe këmbëngulja janë disa elementë të gërshetuar me njëri-tjetrin dhe bashkëpunimi me elementë që e duan artin. Kjo të çon drejt suksesit.
A pati të ftuar specialë në Koncertin Pranveror? A ishin të pranishëm përfaqësuesit e shtetit shqiptar, përfaqësuesit e Bashkisë së qytetit të Oakvillit, liderë të komunitetit shqiptar-kanadez dhe medias, personalitete të njohura shqiptaro-amerikane?
Ky është një ndër elementët që ne i kemi trajtuar me kujdes. U kemi dërguar ftesë zyrtare përfaqësuesve që ju përmendët, sigurisht jo të gjithë iu përgjigjën ftesës për arsyet e tyre, por pjesëmarrja ishte e kanqshme. Në event ishin të ftuar përfaqësues të Shoqatës Shqiptaro- Kanadeze, televizioni shqiptar në Toronto, Ambasada Shqiptare në Ottaëa, Konsulli i Nderit ne Toronto, Konsulli i Nderit në Michigan e të tjerë.
Në mbrëmje morën pjesë Konsulli i Nderit, Genc Tirana, i cili përshëndeti në emër të qeverisë së Shqipërisë edhe ambasadës shqiptare. Kryetari i Shoqatës Shqiptaro-Kanadeze, Shani Pnishi, njëkohësisht kryeredaktor i gazetës “Flas Shqip”, Professor Saimir Lolja etj.
Ky aktivitet u nderua me një certifikatë mirënjohjeje, e cila na u dorëzua në emër të Kryeministrit të Ontarios.
Sipas jush, cila ishte risia e këtij viti? Çfarë e dalloi këtë kconcert nga ata të mëparshmit?
Niveli gjithnjë e në rritje, por dhe salla e koncerteve tashmë na ofron një garanci më të madhe. Dhe kur suksesi është i madh, edhe motivimi është i tillë. Ne që sot kemi filluar punën për koncertin e madh të pranverës 2015, që do mbahet më 9 maj në të njëjtën sallë.
Duke parë suksesin që ju ka shoqëruar vit pas viti, çfarë synoni të sillni të re në të ardhmen? Cilat janë planet tuaja të afërta?
Një koncert i madh udhëtues, në formë turneu nëpër Amerikë e Kanada, qendrat ku shqiptarët punojnë e jetojnë. Kjo do ishte fantastike dhe unë jam i hapur për bashkëpunim. Duhen gjetur dashamirës të artit të gërshetuar me biznesin dhe muaji maj mund të kthehet në pranverën mbarëshqiptare në Amerikën e Veriut. Koncerti i madh udhëtues do të përshkojë Shtetet e Bashkuara të Amerikës dhe Kanadasë.

Zoti Ndoja, megjithëse ky nuk ishte një festival, pyetja ime është: Cilat ishin këngët dhe këngëtarët me të duartroktiur, më të pëlqyerat në të gjitha pikëpamjet?
Publiku ynë besnik, i cili na ndjek prej 5 vjetësh në koncerte të tilla e admiron muzikën. Unë dua të veçoj këngëtarin Kastriot Tusha. Ai vjen për të tretën herë në bashkëpunim me Albanian Canadian Events dhe publiku që e ndjek është i pandryshuar. Janë fansae e tij besnikë që e admirojnë sa herë që ai vjen. Aktori Pajazit Myrtyshi u prit shumë mirë dhe publiku u ngrit disa herë me duartrokitje të fuqishme. Këngëtari më i ri i koncertit ishte Luigj Ndoja, i cili në tri koncertet e fundit ka sjellë tri këngë të reja. Kënga e fundit ishte me tekst dhe muzikë të kantautorit Pirro Çako. Kënga titullohet “Ti je nëna për mua” dhe i është dedikuar vendlindjes.
Dhe në fund diçka për stafin, ata që dolën në skenë dhe ata që punuan pas perdes. Si ishte bashkëpunimi mes jush? Kush janë ata që e bënë Koncertin Pranveror 2014 në Kanada një event madhështor?
Bashkëpunimi i përkryer me dy konferencierët: Edlira Cini dheTaulant Dedja. Bashkëpunimi me sponsorët dhe së fundi një grup artistësh me një harmoni të paparë, që do të mbetet në memorien e të gjithëve për shumë kohë.