Rajon – Page 112 – Dielli

Kosova dhe Iowa, partneritet model

June 30, 2016 by dgreca

-Për kontributin e jashtëzakonshëm në fushën e sigurisë, Presidenti i Republikës së Kosovës, Hashim Thaçi, ka dekoruar gjeneralmajorin Timothy Orr me Medaljen Presidenciale të Meritave/

PRISHTINË, 30 Qershor 2016-Gazeta DIELLI-B.Jashari/Presidenti i Republikës së Kosovës, Hashim Thaçi, ka pritur sot në takim një delegacion të Gardës Kombëtare të Iowa-s, SHBA, të prirë nga gjeneralmajori Timothy Orr.

Presidenti Thaçi ka falënderuar gjeneralmajorin Orr për mbështetjen që i ka dhënë Kosovës përmes partneritetit ndërmjet Kosovës dhe Iowa-s, që fillimisht ishte përqendruar në bashkëpunim ushtarak.“Ky bashkëpunim u zgjerua shumë shpejt në fusha të tjera. Sot, partneriteti ndërmjet Kosovës dhe Iowa-s është shndërruar në një model për të gjithë. Ky bashkëpunim është rritur edhe falë angazhimit tuaj të drejtpërdrejtë”, ka thënë presidenti Thaçi.

Ai ka shtuar se si President i Kosovës do të mbështes çdo projekt dhe ide që del nga ky partneritet.

Gjeneralmajori i Gardës Kombëtare të Iowa-s, Timothy Orr, ka thënë se Kosova është vendlindja e tij e dytë. “Ajo që kemi arritur për pesë vjet të partneritetit ndërmjet Kosovës dhe Iowa-s është e jashtëzakonshme. Por, pa mbështetjen tuaj zoti president, ky sukses nuk do të ishte kaq i madh”, ka thënë gjeneralmajori Orr, citon njoftimi i dërguar nga Presidenca kosovare.

Për kontributin e jashtëzakonshëm në fushën e sigurisë, Presidenti i Republikës së Kosovës, Hashim Thaçi, ka dekoruar gjeneralmajorin Timothy Orr me Medaljen Presidenciale të Meritave.

VATIKAN-Kosova, bashkëpunim konkret në fushën e kulturës

June 30, 2016 by dgreca

– Ministri i Kulturës, Rinisë dhe Sportit në pritjen te Kardinali Gianfranco Ravasi shtroi nevojën që Kosova, si shtet i ri, të bëhet pjesë e organizatave relevante ndërkombëtare, meqë kjo ndikon në ruajtën e pasurisë kulturore të Kosovës dhe në njohjen e saj si vlerë për të gjithë/

PRISHTINË, 30 Qershor 2016-Gazeta DIELLI-B.Jashari/ Në kuadër të vizitës zyrtare në Itali, Ministri i Kulturës, Rinisë dhe Sportit i qeverisë së Kosovës, Kujtim Shala, i shoqëruar nga zëvendësministri Rexhep Hoti, është pritur sot në Vatikan nga Kardinali Gianfranco Ravasi, Kryetar i Këshillit Papnor për Kulturë në Vatikan.

Në një takim të përzemërt ndërmjet Ministri Shala dhe Kardinalit Ravasi, u bisedua për një varg çështjesh të interesit të përbashkët, veçmas për hapësirat që ekzistojnë për bashkëpunim kulturor ndërmjet Kosovës dhe Vatikanit. Në këtë drejtim Ministri Shala dhe Kardinali Ravasi, biseduan për mundësitë konkrete për fillimin e bashkëpunimit ndërmjet institucioneve të Kosovës dhe atyre të Vatikanit, në fushën e kulturës, por edhe të sportit.

Kardinali Ravasi shprehu gatishmërinë e tij dhe të institucioneve kulturore të Vatikanit për bashkëpunim në tema dhe fusha specifike që kanë të bëjnë me kulturën, sidomos të institucioneve kulturore të Kosovës me Muzeun e Vatikanit, me Universitetin Papnor Urbaniana, atë Gregorian, me Bibliotekën e Vatikanit dhe Bibliotekën Apostolike, arkivat, si dhe me Institutin e Konservimit të Librit.

Ministri Shala shprehu falënderimet e tij për pritjen dhe u shpreh se bashkëpunimi konkret në fushën e kulturës ndërmjet Kosovës dhe institucioneve kulturore të Vatikanit, është shumë i rëndësishëm për Kosovën dhe të ardhmen e saj, dhe shtoi se Kosova dëshiron të përfitojë nga përvojat e jashtëzakonshme të Vatikanit në fushat specifike që lidhen me kulturën sepse kjo ndihmon kulturën e vendit tonë.

Ministri Shala po ashtu shtroi nevojën që Kosova, si shtet i ri, të bëhet pjesë e organizatave relevante ndërkombëtare, meqë kjo ndikon në ruajtën e pasurisë kulturore të Kosovës dhe në njohjen e saj si vlerë për të gjithë.

Ministri i Jashtem Hoxhaj në SHBA për lobim

June 30, 2016 by dgreca

-Takon në OKB përfaqësuesit e vendeve jonjohëse/

NEW YORK, 30 Qershor 2016-Gazeta DIELLI/ Ministri i Punëve të Jashtme i Republikës së Kosovës, Enver Hoxhaj ka nisë fushatën e lobimit për njohje të reja të pavarësisë së Kosovës. Ai po qëndron në New York, ku do të takojë dhjetëra përfaqësues të vendeve që nuk e kanë njohur Kosovën të akredituar në Kombet e Bashkuara.

Njoftimi i sapoderguar sot ngA New York thekson se, në ditën e parë, Hoxhaj ka takuar përfaqësuesit e Namibisë, Linda Scott, të Botswanës, ambasadorin Charles Thembani dhe St. Vincent dhe Grenadës, Rhoda King, të cilët i ka njoftuar me zhvillimet më të fundit në Kosovë dhe progresin sa i përket njohjes dhe anëtarësimit në organizata ndërkombëtare.

“Jam në New York për t’i njoftuar edhe njëherë përfaqësuesit e këtyre vendeve për rëndësinë që ka njohja e Kosovës. Misionet diplomatike të këtyre shteteve në OKB janë me shumë peshë dhe ndikim, prandaj lobimi këtu është vetëm njëra anë e aktivitetit tonë para se t’i marrim njohjet e reja së shpejti”, ka thënë Hoxhaj pas takimeve.

Përpos takimeve me përfaqësuesit e vendeve mos-njohëse, Hoxhaj ka takuar edhe ambasadorët e Britanisë të Madhe dhe Gjermanisë pranë OKB-së, të cilët i ka njoftuar me të arriturat e Kosovës.

Diskutimi është fokusuar edhe në reduktimin e misionit të UNMIK-ut në Kosovë, rolin e ri të OKB-së që duhet ta ketë në Kosovë dhe zhvillimet e tjera në rajon dhe më gjerë.

Gjatë ditëve të ardhshme, Hoxhaj do të takoj edhe përfaqësuesit e shumë shteteve që nuk e kanë njohur Kosovën, dhe të atyre njohëse./b.j/

Tryezë shqiptare në Parlamentin gjerman

June 29, 2016 by dgreca

Që nga viti 1986 Parlamenti gjerman ofron bursa për praktikantë në zyrat e deputetëve gjermanë. Prej vitit 2001 në këtë program merr pjesë edhe Shqipëria.

Programi i Bundestagut për praktikantë në zyrat e deputetëve gjermanë

Prej 30 vjetësh Parlamenti gjerman ofron programin IPS(Internationales Parlaments-Stipendium), i cili u ofron çdo vit 120 të rinjve nga vende të ndryshme të botës mundësinë që të njohin nga afër mënyrën e punës së parlamentit dhe të deputetëve gjermanë.

Të rinjtë kanë mundësi të japin kontributin e tyre në punën e përditshme në zyrën e deputetëve, t’i shoqërojnë ata në takimet e Komisioneve Parlamentare, në aktivitete të ndryshme apo takime në zonën e tyre elektorale. Projekti në fillesat e tij ishte konceptuar vetëm për praktikantë nga Shtetet e Bashkuara të Amerikës. Por me kalimin e viteve është u hapure dhe për shumë vende të tjera nga Evropa Veriore, Lindore, Juglindore, vendet e Afrikës Veriore e të Lindjes se Mesme.

Arnisa Tepelija dhe Ermal Ndini bashkë me ambasadorin shqiptar, Artur Kuko

Pratikantë nga Shqipëria

Që nga viti 2001 për programin IPS përzgjidhen çdo vit edhe dy apo tre praktikantë nga Shqipëria. Këtë vit nga Shqipëria kanë ardhur Arnisa Tepelija dhe Ermal Ndini. “Kjo eksperiencë ka qenë jashtëzakonisht informuese, pasuruese dhe me vlerë.” – thotë për DW-në Arnisa Tepelija. Ajo shton se ka mundësinë për t’u njohur nga afër me punën e përditshme të Bundestagut, dhe “të shikoj shpërndarjen e pushtetit në nivele të ndryshme qeverisëse (që nga landet deri në nivel evropian), të shkoj nëpër takimet ku merren vendime kyçe për politikën e brendshme dhe evropiane, kam vërejtur dhe krahasuar edhe metodikën e punës, standardet e larta të angazhimit e profesionalizmit të stafit, atij grupi njerëzish që ekziston mbas personave të skenës politike, kam evidentuar kriteret e transparencës ndaj publikut që këtu konsiderohen të pakompromentueshme.”

Arnisa thotë se përmes kësaj pratike ka arritur të shohë edhe “atë që e bën politikën të njëjtë kudo: mbrojtjen e interesave krejtësisht të ndryshme në rangjet më të larta, përplasjen e ideologjive që mbulojnë të gjithe skeptrin politik nga e majta në të djathtën, përfytyrimet e ndryshme mbi konceptin e së mirës së përgjithshme, sfidat e përmirësimit të cilësisë së demokracisë, sfida e eliminimit të burokracive, përpjekjet për kapërcimin e hendeqeve mes popullit dhe përfaqësusesve të tij, problemet me të cilat ndeshet sot shoqëria gjermane edhe në kuadrin e madh evropian.”

Tryeza shqiptare

Çdo vit për mbrëmjen e praktikantëve në mjediset e Bundestagut organizohet edhe aktivitet prezantues për vendet nga vijnë praktikantët. Me ndihmën e Amasadës Shqiptare në Berlin tryeza e shqiptare këtë vit synonte prezantimin kulturor të Shqipërisë për botën e jashtme. Fletëpalosjet dhe broshurat informative plotësoheshin edhe me ushqime tradicionale shqiptare dhe verë nga Berati si dhe libra për historinë e Shqipërisë dhe të artit shqiptar.

“Besoj se jam rritur goxha nëpërmjet kësaj praktike”

Nga krahasimet mes punës në institucionet shqiptare dhe ato gjermane dy praktokantët shqiptarë, Arnisa Tepelija dhe Ermal Ndini, thonë se kanë identifikuar shumë aspekte konkrete që mund të përmirësohen në Shqipëri. Arnisa tregon se deputeti me të cilin ka punuar intensivisht është anëtar i Komisionit Parlamentar të Peticioneve, ku përpunohen ankesat e qytetarëve dhe përmirësimi i ligjeve sipas propozimeve të tyre konkrete në fusha që i prekin direkt. “Më ka impresionuar thellë puna që bëhet pranë qytetarëve këtu, që pavarësisht se jo perfekte, ushtrohet në shkallë të panjohura për ne. Mënyra se si ata trajtohen është barometër i funksionimit të demokracisë. Kjo, së bashku me transparencën në punën e institucioneve është diçka që tashmë e kam përzemër ta gjej edhe ne Shqipëri, e në mos qoftë akoma aty, të jap kontributin tim modest për ta bërë të mundur.” – thotë Arnisa duke konkluduar me fjalët: “Besoj se jam rritur goxha nëpërmjet kësaj praktike”(DW)

Kosovë-Shqipëri, pikë e përbashkët e kontrollit kufitar

June 29, 2016 by dgreca

-Qeveria e Kosovës zhvillon mbledhjen e 30-të të vitit 2016, miraton strategji për reformën e Menaxhimit të Financave Publike për vitet 2016-2020/

Gazeta DIELLI, nga korrespondenti në Kosovë Behlul JASHARI/

PRISHTINË, 29 Qershor 2016/ Qeveria e Kosovës në mbledhjen e sotme miratoi vendimin për pikë të përbashkët të kontrollit kufitar me Republikën e Shqipërisë, në sezonin veror.

Nga fillimi i verës në vendkalimet kufitare Kosovë-Serbi ka fluks të shtuar që pritet të shënojë rritje gjatë gjithë verës e vitit 2016 edhe krahasuar me vitet e kaluara që ishin gjithnjë me ngritje.

Mes Shqipërisë e Kosovës, më shumë se 2.7 milionë (2732089) hyrje dalje të personave kishte vetëm gjatë tre muajve të verës 2015 – në qershor, korrik e gusht.

Në vendkalimin kryesor nëpër Autostradën e kombit, në Vërmicë-Morinë, sot nga mesdita kolona në dalje nga Kosova në Shqipëri është 50 metra e në hyrja 10 metra dhe kalohet pa vonesa për 2 deri 5 minuta, bën të ditur në këto momente Qendra Kombëtare për Menaxhim Kufitar.

Në dy vendkalimet tjera Kosovë-Shqipëri, Qafë të Prushit dhe Qafë të Morinës, në hyrje-dalje kalohet për 1 deri 3 minuta, pa kolona.

Qeveria e Kosovës, zhvilloi sot mbledhjen e 98-të, të 30-tën në vitin 2016, drejtuar nga kryeministri Isa Mustafa, ku u miratua edhe Nisma për lidhjen e Marrëveshjes për themelimin e Zyrës së Bashkëpunimit të Rinisë. Në këtë marrëveshje janë përfshirë gjashtë shtete të rajonit dhe selia e kësaj zyre do të jetë në Tiranë.

KOSOVA, STRATEGJI PËR REFORMËN E MENAXHIMIT TË FINANCAVE PUBLIKE PËR VITET 2016-2020

Qeveria e Republikës së Kosovës, e drejtuar nga kryeministri Isa Mustafa, miratoi sot edhe Strategjinë për reformën e Menaxhimit të Financave Publike për vitet 2016-2020 dhe Planit të Veprimit për zbatimin e Strategjisë.

Strategjia synon arritjen e menaxhimit të shëndoshë financiar duke përmirësuar sistemet që sigurojnë disiplinë fiskale, efikasitet funksional dhe alokim efektiv të resurseve publike në Republikën e Kosovës. Duke vlerësuar rëndësinë e resurseve buxhetore të Republikës së Kosovës për ofrimin e shërbimeve publike, përmirësimi i menaxhimit të financave publike do të ndikojë në të gjitha fushat e shërbimeve dhe do të jetë i dobishëm për qytetarët që i shfrytëzojnë ato.

Në mbledhjen e sotme, qeveria miratoi edhe Koncept dokumentin për plotësimin dhe ndryshimin e Ligjit për Shëndetësi. Përmirësimi i cilësisë dhe efektshmerisë së shërbimeve shëndetësore, është një nga prioritetet kryesore strategjike të qeverisë së Republikës së Kosovës, u than ë mbledhje.

Kabineti qeveritar shqyrtoi edhe zgjerimin e listës së projekteve kapitale të cilat do të financohen përmes Klauzolës së Investimeve në Republikën e Kosovës. Kjo listë do të zgjerohet pas analizës dhe diskutimit në Këshillin Kombëtar të Investimeve.

Edhe vendimi i qeverisë për fillimin e përdorimit të prokurimit elektronik për të gjitha organizatat buxhetore në Republikën e Kosovës,është diskutuar nga kabineti qeveritar. Qeveria ka insistuar që afatet e miratuara më herët të respektohen dhe të fillojë zbatimi i prokurimit elektronik.

Është miratuar edhe vendimi për ndarjen e mjeteve financiare për përmbushjen e kontributit vjetor ndaj Qendrës Rajonale të Nismës Rajonale për Migrim.

Qeveria e Republikës së Kosovës ka aprovuar vendimin për emërimin e anëtarëve në Bordin e Autoritetit të Aviacionit Civil dhe vendimin për emërimin e drejtorit dhe zëvendësdrejtorëve në Agjencinë e Shërbimeve të Navigacionit Ajror.

Kabineti qeveritar, në mbledhjen e sotme ka miratuar Nismën për lidhjen e Marrëveshjes për Protokollin Financiar ndërmjet Qeverisë së Republikës së Kosovës dhe Qeverisë së Republikës së Francës. Marrëveshja parasheh huan për financimin e projekteve të trajtimit të ujërave të zeza në Republikën e Kosovës.