Rajon – Page 189 – Dielli

Kosove-Serbi -Ashton: Paketa për drejtësi do të finalizohet në takimin e ardhshëm

April 1, 2014 by dgreca

Nga B.Jashari/.-Në raundin e së hënës të takimit ndërmjet delegacioneve të nivelit të lartë të Kosovës dhe Serbisë me ndërmjetësimin e Bashkimit Evropian është diskutuar për sistemin e drejtësisë në pjesën veriore të Kosovës.

“Ne vazhduam punën në çështjet e ndërlidhura me implementimin e Marrëveshjes së Prillit”, thuhet në deklaratën e përfaqësueses së lartë të Bashkimit Evropian për politikë të jashtme dhe sigurisw, Catherine Ashton, dërguar nga zëdhënësja e saj, Maja Kocijançiq, njofton Radio Evropa e Lire.
Në njoftim theksohet se “të dy palët gati e kanë përfunduar diskutimin e tyre për drejtësi dhe duke pritur harmonizimet e domosdoshme paketa do të finalizohet në takimin e ardhshëm”.
Në kumtesë thuhet se të dy palët, poashtu, “diskutuan për hapat e ardhshëm në këtë dialog dhe u pajtuan të takohen përsëri”.
Në takimin e sotëm Kosovën e përfaqësoi kryeministri Hashim Thaçi, ndërsa Serbinë, kryeminsitri Ivica Daçiq dhe zëvendëskryeministri Aleksandar Vuçiq.

Merkel-Rama: Presim raportin e KE për statusin, do e vendosim në vështrim pozitiv

April 1, 2014 by dgreca

Nga B.Kastrati/.- Kancelarja gjermane, Angela Merkel deklaroi sot se vendimi për statusin e vendit kandidat për Shqpërinë varet nga raporti që Komisioni Europian do të publikojë në muajin qershor.Deklarata e znj. Merkel u bë gjatë konferencës së përbashkët për shtyp me kryeministrin shqiptar Edi Rama, i cili ndodhet sot në Berlin për një vizitë zyrtare.

Gjatë takimit dypalësh zyrtarët e lartë diskutuan për procesin eurointegrues të Shqipërisë, domosdoshmërinë e një bashkëpunimi më të thellë ekonomik mes dy vendeve, si dhe situatën dhe rolin e shtetit shqiptar në rajon.
Në konferencën për mediat znj. Merkel tha se vendeve të Ballkanit Perëndimor i kemi dhënë perspektivë dhe në fund të një rruge të gjatë do të kemi integrimin e plotë të tyre.

E pyetur për qëndrimin që do të mbajë Gjermania në qershor në kuadër të marrjes së statusit kandidat për Shqipërinë, Merkel tha se “ne i trajtojmë vendet në bazë të raporteve të Komisionit Europian”. Sipas saj, Komisioni paraqet raport për statusin, për gjendjen e punëve dhe hapi tjetër që vjen për Shqipërinë është statusi i kandidatit. “Ne në qeshor do të marrim një raport të ri. Komisioni do të ketë regjistruar përparimet dhe ne do të shikojmë me një vështrim pozitiv për statusin e kandidatit për Shqipërinë. Gjithmonë është një çështje, kur do ta merrni. Nuk duhet të keni frikë se nuk do të jepet statusi i kandidatit, por raportet duhet ta bëjnë të mundur që t’ua japim. Këtë e folën shumë hapur edhe me Kryeministrin”, deklaroi ajo.

“Kryeministri, tha Kancelarja, më ftoi për vizitë dhe unë i thashë se do ta respektoj këtë ftesë dhe nëse më pyesni pas një viti unë do të kem qënë në Shqipëri”.
Ajo gjithashtu vlerësoi pjesëmarrjen e grave në kabinetin qeveritar shqiptar, ndërsa tha se investimet gjermane në Shqipëri i sheh si një instrument të transformimit të kulturës së sipërmarrjes.

Kryeministri Rama në deklaratën për mediat tha se e njohu Kancelaren me ecurinë e procesit të integrimit të vendit ndërsa i shprehu asaj angazhimin e qeverisë për përmbushjen e reformave që kërkon ky proces, kryesisht ato në luftën kundër korrupsionit, krimit të organizuar dhe sundimit të shtetit ligjor.
Rama e konsideroi të domosdoshme rritjen e bashkëpunimit ekonomik, referuar edhe rolit transformues të Gjermanisë në sektorin privat. Kjo sipas kryeministrit e bën legjitime kërkesën për praninë e investitorëve gjermanë në Shqipëri.
“Ne e konsiderojmë Europën një destinacion brenda nesh dhe vendi ynë është në Europë, ndaj ne duhet të bëjmë gjithçka, ditë pas ditë, që të meritojmë atë vend që shqiptarët aspirojnë dhe që ne, me ndihmën e Gjermanisë dhe të gjithë partnerëve tanë europianë, do të mund t’ua japim duke bërë çdo reformë, për një proces që nuk është i shkurtër”, deklaroi kryeministri Edi Rama sot në Berlin.

Merkel: Do të inkurajojmë investitorët gjermanë për të ardhur në Shqipëri

Nga Arlindaj Gjonaj

Kancelarja gjermane Angela Merkel deklaroi sot në konferencën e përbashkët për shtyp me Kryeministrin Edi Rama se “do të inkurajojë investitorët gjermane për të investuar në Shqipëri”. Duke u ndalur në çështjen e bashkëpunimit ekonomik, Merkel në përgjigje të intertesit të medias tha se kishte folur me kryeministrin shqiptar për bashkëpunimin ekonomik. “Po unë fola. Folëm për faktin se projektet e caktuara të organizatës kreditore për rindërtimin regjistrohen shumë pozitivisht në Shqipëri, sa i përket konfigurimit të infrastrukturës në Shqipëri. Kryeministri Rama do të zhvillojë bisedime. Ne do të inkurajojmë investitorët gjermanë. Për investitorët privat ka shumë rëndësi siguria juridike. Ata duhet të kenë besim te sistemi juridik. Ndaj dhe ne ngulim fort këmbë të reforma e drejtësisë”, u shpreh Merkel. Kemi shumë sipërmarrje të mesme në Gjermani, tha ajo, që varen shumë nga fakti për të investuar kapitalin e tyre atje ku gjejnë kushte të mira. “Sa më shpejt të mirëformohet kuadri juridik, aq më i madh do të jetë edhe interesi i investitorëve gjermanë për Shqipërinë. Jam e sigurtë që edhe bilanci i import -eksportit do të balancohet”, tha kancelarja gjermane, Merkel.

Ndërsa Kryeministri Edi Rama shtoi në këtë drejtim se ka patur një dakordësi të plotë me kancelaren gjermane, Merkel, lidhur me domosdoshmërinë që rajoni si i tërë të zhvillohet në mënyrë më të integruar dhe bashkëpunimi rajonal në aspektin ekonomik të shkojë duke u forcuar. Ai shprehu angazhimin e qeverisë shqiptare për të bërë gjithçka për të krijuar kushtet, për të tërhequr sa më shumë investime gjermane në Shqipëri. Investimet gjermane në Shqipëri, për kryeministrin Rama, shihen jo vetëm si burim i të ardhurave, por edhe si si transformim i kulturës së sipërmarrjes dhe kulturës së punës. Për këtë arsye, tha ai, i konsiderojmë me një vlerë të dyfishtë. “Do të vazhdojmë kontaktet edhe me sipërmarrjen këtu dhe kemi planifikuar të çojmë më tutje këto kontakte në disa takime të mëtejshme me disa nga grupet e mëdha në Gjermani”, deklaroi Rama

Moore në Tiranë, takime me krerët e shtetit

March 31, 2014 by dgreca

Drejtori për Çështjet e Evropës Juglindore në Departamentin e Shtetit, Jonathan Moore, do të mbërrijë mbrëmjen e sotme në Tiranë për të marrë pjesë në konferencën e parë ndërkombëtare të organizuar nga “Albanian Policy Center” me temë “Bashkëpunimi transatlantik për paqen dhe sigurinë në Ballkan: Një axhendë e Shqipërisë për integrimin në BE dhe NATO”, në datën 2 prill.

Sipas organizatorëve, “kjo konferencë bëhet me rastin e 5-vjetorit të anëtarësimit të Shqipërisë në NATO dhe 5 vjetorit të ratifikimit të MSA-së. Konferenca do të trajtojë edhe çështjen e krijimit të një elite të re politike”.

Përveç z, Moore, në konferencë do të marrin pjesë edhe kreu i PD-së, Lulzim Basha, Edita Tahiri, Zevendeskryeministre e Kosoves, Teuta Arifi nga Maqedonia, si dhe deputetët Pandeli Majko, Majlinda Bregu, Arta Dade e shumë të tjerë, theksojnë organizatorët e Konferencës.

Ndërsa mësohet se z. Moore gjatë tri ditëve do të zhvillojë edhe takime me krerët më të lartë të vendit, Presidentin e Republikës, Bujar Nishani, Kryeministrin Edi Rama, Kryetarin e Kuvendit, Ilir Meta dhe kreun e PD-së, Lulzim Basha.

Thaçi: PDSH do ta çojë në hava Car Dushanin

March 30, 2014 by dgreca

PDSH dhe kandidati i saj për president Iljaz Halimi tubimet e radhës të dielën i kanë zhvilluar në rajonin e Tetovës.Kryetari i PDSH-së, Menduh Thaçi para të pranishmëve sqaroi se cili është qëllimi i kandidimit të Halimit për president dhe çfarë do të arrihet me këtë. “Në Maqedoni ka rreth 900 mijë votues që nuk janë maqedonas. Nëse të gjithë angazhohemi për kandidatin tonë më13 prill, mund të ndryshojmë historin. Ne shpresojmë se do të kalojmë pragun prej 300 mijë votuesve dhe pastaj gjithkush që do të hyjë në raundin e dytë të zgjedhjeve do të duhet të bisedojë me ne”, deklaroi Thaçi.

Thaçi ka theksuar se në rast se PDSH vjen në pushtet do të heq përmendoren e Car Dushanit në sheshin e Shkupit si dhe do të bëj ndarjen proporcionale të buxhetit të shtetit. “Në bisedime njëri ndër kushtet do jetë Car Dushani të fluturoj në hava, shtëpia e oficerëve sërb të eleminohet nga themelt e Burmali Xhamisë, të denacionalizohet të gjitha pronat e Bashkësisë islame. BDI për gjashtë vjet ndau pushtetin me VMRO-DPMNE, ndërsa tani sillen ndaj tyre sikur ndaj kundërshtarëve. Nëse ne do të fitojmë do të angazhohemi që të asgjësojmë këtë veprim nga skena politike. Lideri i BDI-së Ahmeti thotë se kot po angazhohemi dhe po punojmë në këtë fushatë, por unë do ta pyesja ate se ku është ligji për pjesëtarët e UÇK-së, përdorimi i gjuhës shqipe, proceset evrointegruese, ndërtimi i bibliotekës dhe teatrit në Tetovë si dhe ujësjellësin në Tetovë”, theksoi Thaçi.

Në tubimin qendror në Poroj të Tetovës, kandidati Halimi kërkoi mbështetje duke theksuar se votimi i një kandidati shqiptar është me rëndësi për vendin. “Mbështetja juaj është me rëndësi, për shkak se me kandidimin tim tregojnë se shqiptarët jemi popull autokton në këto treva dhe se kanë kuadro të afta për të udhëhequr vendin”, theksoi Halimi.

Ai ka folur edhe për përfaqësimin e dobët të shqiptarëve nëpër institucione, ku me theks të veçantë është kabineti i presidentit. “Në këtë drejtim unë do të angazhohem në rritjen e përfaqësimit në mënyrë të denjësishme në kabinetin presidencial dhe institucione tjera”, theksoi Halimi.

Karavani zgjedhor i PDSH sot ka vazhduar edhe në rajonin e Sarajit sin ë Radushë, Rashçe, Svillare dhe Kondovë. Thaçi në Kondovë theksoi se edhe hoxhallarët duhet të angazhohen që të vije në pushtet një shqiptarë musliman i cili do i zgjedh problemet e shqiptarëve.(Ina)

Zbulohen dokumente të reja të Administratës Clinton (1999): Shfaqini krimet serbe në Kosovë

March 30, 2014 by dgreca

Mediat amerikane kanë publikuar rreth 2500 dokumente nga koha kur Bill Clinton ishte president i SHBA-ve. Në mesin e tyre gjendeshin komunikimet konfidenciale me këshilltarët e tij, përkitazi me Serbinë, të quajtura “Unaza rreth Serbisë”. Telegrafi ju sjellë përmbajtjen e këtyre letrave.

Këshilltarët analizojnë televizivet lokale, të cilat ata i konsiderojnë të përshtatshme për propagandë dhe ku mund t’i investojnë paratë, meqë në këto televizione transmetohej vetëm muzika, seritë e huaja, filmat e vjetër, e asnjë program informativ.

“Plani ishte që të punësojnë dhe të paguajnë gazetarët që në këto stacione televizive të fillojnë të prodhojnë programe të lajmeve. Sinjalet e këtyre stacioneve televizive kanë mbuluar territorin Mitrovicë-Prishtinë-Ferizaj. Ato ishin në pronësi të firmave, qendrat e të cilave ishin në Beograd, ndërsa përfaqësuese ishte Dragana Dojcinovic”, thuhet në dokumente.

Në dokumente gjendet edhe komunikimi i këshilltarëve, ku përmendet xhirimi i filmit për krimet e serbëve në Kosovë. Në komunikime ka marrë pjesë edhe Mona Sutphen, ish shefe e kabinetit të presidentit Barack Obama.

Në emailin me emrin “Letër nga Levini” (Carl Levin, senator demokrat), që është dërguar nga ana e Jane Stromseth në disa adresa, e ku ishte edhe Mona Sutphen, thuhet se Jane ka biseduar me zyrën për krime lufte të Departamentit të Shtetit për idenë për një dokumentar në Kosovë.

“Departamenti i Shtetit për një kohë të gjatë është duke menduar për këtë ide. Në fillim dukej tërheqëse, por pastaj u tha se nuk është ide e mirë, për dy arsye: (1) shpenzimet janë të mëdha dhe (2) dokumentari amerikan mund të rrezikojë të shihet si propagandë, pa marrë parasysh se sa me kujdes do të punohej”, thuhet në email.

Sutphen thotë se ndoshta ndonjë OJQ do ta mbështeste filmin, dhe pyet nëse George Soros, nëse Levin ka vullnet, do të mund të siguronte fonde për këtë.

Në korrespondencë të mëtejshme, Samuel Berger, këshilltari i Clintonit për politikë të Jashtme, ka marrë një letër nga Levini me sugjerimin që SHBA-të të bëjnë dokumentar që flet për krimet në Kosovë. Në kuadër të emailave është dërguar letër tek Bergeri, tek Levini, ku Bergeri falënderon Levinin për raportin që ia ka dërguar pas vizitës së mëparshme në Kosovë.

“Mbështetja e Kongresit për politikën tonë në Kosovë është kritike për rajonin që është i rëndësishëm për vendin tonë.

Unë do ta marrë seriozisht në konsideratë konceptin e një filmi dokumentar për krime lufte në Kosovë, dhe do t’ia përcjelli stafit të gjitha informatat. Në ndërkohë mos harroni se servisi në gjuhën serbe i Zërit të Marikës, Radios Evropa e Lirë dhe ‘Unaza rreth Serbisë’ do të përcjellin lajmet, përfshirë emisionet për krimet në Kosovë.

Kemi menduar edhe në aspektin rajonal, pasi presidenti ka në plan të vizitojë një konferencë në Sarajevë javën e ardhshme (takimi i Paktit të Stabilitetit për Evropën Juglindore). Kjo do të tregojë se klima më e mirë për investime, të drejtat e njeriut dhe demokraci mund të rezultojnë në një jetë më të mirë në rajon. Milosevici (Slobodan), natyrisht nuk do të marrë pjesë dhe mungesa e Serbisë do të forcojë izolimin e tij dhe të vizionit të tij të shterur për rajonin.

Unë pajtohem me ju se ka ende shumë për të bërë sa i përket Kosovës. Besoj se Shtetet e Bashkuara të Amerikës do të kapërcejnë të gjitha pengesat dhe atë me ndihmën tuaj dhe me ndihmën e Kombeve të Bashkuara dhe popujt e organizatat tjera”, thuhet në letrën drejtuar Levinit. /Telegrafi/