Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Venizelos viziton Kosovën në një kohë që Greqia nuk njeh pavarësinë

by

Vizita e Ministrit të Jashtëm grek ka filluar një tur në Ballkan/

Ministri i Jashtëm grek, Evangelos Venizelos, ka filluar një tur në Ballkan, me cilësinë e kryesuesit të radhës të bashkimit Europian.Venizelos do të jete në Prishtinë, ku, sipas programit, do të takohet me kryeministrin Hashim Thaçi dhe ministrin e jashtëm, Enver Hoxhaj. Greqia vazhdon të mos e njohë Kosovën, por Athina konsideron se ky fakt nuk e pengon normalizimin e plotë të marrëdhënieve me Prishtinën, siç ka deklaruar në një intervistë me gazetarin e ABC News, Robert Goro.

Ministri i Jashtëm grek Evangelos Venizelos viziton Kosovën në një moment që Greqia ende nuk ka njohur pavarësinë e vendit. Në një intervistë për ABC News Venizelos ka shpjeguar arsyen pse nuk ka ndodhur ende një gjë e tillë dhe planet për bashkëpunim mes dy vendeve.

“Mesazhi im për qytetarët e Kosovës, që kisha rastin t’ia përcjell edhe kryeministrit, edhe ministrit të jashtëm, të cilin e takova edhe para disa ditësh, për të tretën herë, dhe me të cilët kemi një marrëdhënie shumë të mirë, është ky: Ne besojmë në normalizimin e plotë të marrëdhënieve me Kosovën. Kemi krijuar faktikisht premisat për prezencën e një zyre të fuqishme përfaqësimi, kryesisht ekonomik, të Kosovës në Athinë. Dhe synimi ynë është që procesi që ka filluar për negociatat dhe anëtarësimin e Serbisë në BE, të shërbejë si një levë e ndryshimit të klimës edhe për Kosovën. Çdo gjë që ka lidhje me Serbinë dhe mbështetjen e diaologut Beograd-Prishtinë ka një impakt shumë pozitiv në gjithë rajonin, njëkohësisht edhe në perspektivën europiane të Kosovës, të cilën do ta mbështesim pse besojmë edhe në marrëdhëniet tona të mira dypalëshe, por besojmë edhe në atë se duhet të kapërcehen problemet historike të së kaluarës”, vuri në dukje zëvendëskryeministri.

 

Evangelos Venizelos ka shpjaguar edhe arsyet pse Greqia nuk e ka njohur Kosovën, në përgjigje të pyetjes së ABC News nëse diplomacia greke e ka në axhendën e vet njohjen e Kosovës si shtet i pavarur.

“Shikoni, të gjitha do të bëhen në mënyrën që duhet. Rëndësi ka pjesa esenciale e marrëdhënieve tona. Ne do të jemi tepër krijues dhe shumë bashkëpunues në raportet tona me Kosovën. Dhe do të diskutojmë në esencë dhe në thellësi të gjitha çështjet; thjesht, duhet të kemi parasysh edhe vende të tjera komunitare të cilat kanë një qëndrim të ngjashëm me tonin. Nuk duhet të injorojmë disa rregulla që përshkojnë funksionimin tonë në brendësi të BE. Mirëpo, besojmë se ekziston një kuadër dhe një trend, ekziston edhe një objektiv i cili është i qartë. Dhe besojmë vërtet se Kosova mundet të gjejë një nivel prosperiteti me të vërtetë europian dhe një nivel stabiliteti i cili do të jetë shembullor për rajonin. Ka rëndësi shumë të madhe të mbështesim dialogun ndërmjet Beogradit dhe Prishtinës”, u shpreh Venozelos.

Pas Prishtinës, Venizelos do të shkojë në Shkup, ku të enjten do të ketë një seri takimesh, duke filluar nga takimi me presidentin Ivanov e kryeministrin Gruevski. Venizelos do të takohet edhe me kryetarin e BDI Ali Ahmeti, si dhe me zëvendëskryeministrin Fatmir Besimi dhe ministrin e jashtëm Nikola Poposki. Shefi i diplomacisë greke do të takohet edhe me shefin e opozitës, Zoran Zaev.

Kjo do të jetë vizita e parë pas shumë vjetësh, e një zyrtari të lartë grek në Shkup, në kohën që mosmarrëveshja midis të dy vendeve për çështjen e emrit, që vazhdon prej më shumë se dy dekadash, duket se do ta lejë përsëri Maqedoninë në pritje të trenit për në Bruksel. Mesazhi që Venizelos do t’i përcjellë udhëheqjes maqedonase, ose më saktë do t’i përsërisë, është se çështja e emrit nuk është thjesht një mosmarrëveshje dypalëshe, por një detyrim i Maqedonisë për të dhënë prova në drejtim të fqinjësisë së mirë.

“Ne kemi realizuar një ndryshim jashtëzakonisht të madh nga qëndrimi ynë: Greqia nuk pranonte përdorimin e emrit “Maqedoni”. Tani e pranon përdorimin e këtij emri, por me një përcaktim gjeografik, për të qenë e qartë se ky vend ndryshon nga rajonet greke që quhen “Maqedoni”. Do të më lejoni të them, edhe rajone nga Bullgaria, edhe nga Shqipëria, sepse edhe Shqipëria ka një pjesë të Maqedonisë. Atëherë, ekziston një detyrim për një përcaktim gjeografik. Përcaktim në raport me emrin Maqedoni, jo me termin “republikë”, që ka të bëjë me gjithë vendet e botës.

Atëherë ne themi diçka shumë të thjeshtë, që ndërkaq është çështja e emrit: Për anëtarësim në NATO dhe në BE, përtej dhe pavarësisht çështjes së emrit, duhet të përmbushen gjithë kriteret që kanë të bëjnë me shtetet kandidate për anëtarësim. Gjithë çka duhet të përmbushë Serbia, Mali i Zi, Shqipëria, Turqia, duhet ta përmbushë edhe FYROM, pavarësisht çështjes së emrit. Çfarë thonë konkluzionet e këshillit të 19 dhjetorit 2013? Duhet të bëhen hapa konkretë në drejtim të zbatimit të marëveshjes së 1 marsit 2013, hapa konkretë në drejtim të marrëdhënieve të fqinjësisë së mirë, sepse gjithmonë problemi është fqinjësia e mirë dhe e drejta ndërkombëtare”, nënvizoi ai.

Stacioni i parë i turit të ministrit të jashtëm grek, ka qenë Beogradi. Pas takimit me kryeministrin vendas, Ivica Dacic, Venizelos, ka përshëndetur faktin që, siç tha, në periudhën zgjedhore që po ndodhet Serbia, forcat politike duan të ruajnë të pacënuara negociatat për anëtarësim në BE. Venizelos ka theksuar vullnetin e Athinës që, edhe pas presidencës greke, që bëjë lëvizjet e veta për të ruajtur trendin e procesit integrues të Serbisë.

Venizelos ka vizituar edhe Sarajevën e Podgoricën, ndërkohë që turi i tij do të përfundojë në Tiranë, ku kryesuesi i radhës i BE do të mbërrijë të enjten dhe fillimisht do të takohet me Kryeministrin Edi Rama.

Të premten, Venizelos do të pritet nga presidenti i Republikës, Bujar Nishani dhe pastaj zhvillojë takime të tjera, me kryetarin e parlamentit, Ilir Meta, ministrin e Jashtëm Ditmir Bushati dhe shefin e opozitës, Lulzim Basha.

 

18 të vrarë në përleshjet mes policisë dhe protestuesve ne Ukraine

by

Zjarri dhe granata tymuese përfshinë qendrën e kryeqytetit ukrainas sot herët ndërkohë që policia speciale filloi një operacion në njërin nga kampet kryesore të protestuesve të opozitës pas përleshjeve në të cilat u vranë të paktën 18 njerëz, duke përfshirë shtatë policë.Policia dhe përfaqësuesit e opozitës thanë se shumë njerëz u vranë nga të shtëna me armë zjarri dhe qindra të tjerë janë plagosur. Dhjetra protestues të plagosur janë në gjendje të rëndë.

Kreu i opozitës ukrainase Vitali Klitschko u bëri thirrje demonstruesve pro-perëndimor të pushtojnë Shehin e Pavarësisë në Kiev për të mbrojtur pozitat e tyre. Ai paralajmëroi gratë dhe fëmijët që të largohen nga zona.
Më vonë, zoti Klitschko ishte në plan të fillonte bisedime urgjente me presidentin Viktor Janukoviç në një përpjekje për të zgjidhur krizën vdekjeprurëse, më e përgjakshmja që kur Ukraina fitoi pavarësinë nga Bashkimi Sovjetik në vitin 1991.

Ashton: BE shumë e shqetësuar për përshkallëzimin e dhunës

BRUKSEL- Shefja e diplomacisë evropiane, Catherine Ashton, u shpreh sot shumë e shqetësuar nga shkallëzimi tronditës i dhunës në Kiev, ku, sipas policisë, pesë civilë janë vrarë .
“Jam shumë e shqetësuar për shkallëzimin e ri dhe alarmant të dhunës në Kiev”, deklaroi Ashton në një komunikatë. “Dënoj përdorimin e dhunës dhe u kërkoj me forcë autoriteteve ukrainase të luftojnë rrënjët e krizës”, shtoi ajo.

Shtëpia e Bardhë i kërkon me forcë Janukoviçit t’i japë fund dhunës

UASHINGTON- Shtëpia e Bardhë i kërkoi me forcë sot presidentit ukrainas Viktor Janukoviç t’i japë fund shkallëzimit të dhunës që po ndodh në Kiev, duke paralajmëruar se përdorimi i forcës nuk do ta zgjidhë krizën.

“Shprehim keqardhjen për aktet e dhunës në qendër të Kievit”, deklaroi Laura Lucas Magnuson, zëdhënëse e Këshillit të Sigurisë kombëtare (NSC), duke i bërë thirrje presidentit Janukoviç “t’i japë fund përleshjeve dhe të rifillojë dialogun me opozitën.

Policia në sulm frontal kundër manifestuesve në Kiev

KIEV- Policia filloi një sulm frontal kundër manifestuesve në sheshin qendror të Kievit, ”Maidan”, me tre autoblinda të pajisura me ujë me presion që po përparojnë në shesh dhe po i shtyjnë protestuesit.Manifestuesit po kundërpërgjigjen me bomba molotov. Disa tenda të vendosura në sheshin ”Maidan”, i pushtuar që prej afro tre muajve, u dogjën.Nga protestat e sotme kanë humbur jetën pesë protestues dhe dy police.

Pushkov: vendi në prag të luftës civile

Ukraina është në prag të luftës civile, u shpreh sot shefi i komisionit të Çështjeve të Jashtme të DUMA-s, Dhoma e Ulët e parlamentit rus, duke akuzuar perëndimorët si përgjegjës.“Mendoj se në Ukrainë po zhvillohet një skenar ‘portokalli’ i marrjes së pushtetit nëpërmjet kaosit dhe arbitraritetit”, deklaroi parlamentari Aleksei Pushkov, anëtar i partisë në pushtet, ”Rusia e Bashkuar” duke aluduar për Revolucionin Portokalli të vitit 2004 që kishte sjellë në pushtet properëndimorët.

“Mendoj se Perëndimi dhe politikanët perëndimorë janë kryesisht përgjegjës për këtë duke bërë presion të vazhdueshëm mbi autoritetet ukrainase për rivendosjen e rendit në vend dhe duke lejuar veprimtarinë e organizatave ultraradikale të cilat qëllojnë tani mbi policinë dhe po e çojnë situatën në luftë civile”, shtoi ai, i cituar nga agjencia Interfax.
Ky është reagimi i parë rus që prej njoftimit të vdekjes së pesë civilëve dhe dy policëve nga aktet e dhunës./

 

MINISTRI I JASHTEM I KOSOVES NE RUMANI

by

Nga B.Jashari/.-Ministri i Jashtëm i Kosovës, Enver Hoxhaj, është nisur sot për në Rumani, ku do të marrë pjesë në takimin e dytë jo formal të Organizatës SEECP, Procesi i Bashkëpunimit në Evropën Juglindore.MPJ e Kosovës bëri të ditur se, në vizitën e tij të parë zyrtare në Rumani, ministri i Jashtëm kosovar është ftuar nga homologu i tij rumun, Titus Corlăţean, pasi Rumania është kryesuesja e radhës e kësaj organizate të rëndësishme rajonale që promovon paqen, stabilitetin, sigurinë dhe bashkëpunimin rajonal në frymën evropiane.

Në Samitin dy ditor të SEECP, ku vendet përfaqësohen në nivel të ministrave të jashtëm, Hoxhaj pritet të takojë edhe homologë të vendeve të tjera, me synimin për anëtarësimin e Kosovës sa më parë  në këtë organizatë, që është një prej më të hershmet në Ballkan.

SEECP përbëhet nga 12 shtete anëtare, mes të cilave;  Shqipëria, BeH, Bullgaria, Kroacia, Greqia, Maqedonia, Moldavia, Mali i Zi, Rumania, Serbia, Sllovenia dhe Turqia.

Samiti i Ohrit, vitin e kaluar dështoi për shkak të mos ftesës së palës kosovare në nivelin më të lartë, ku shumica e vendeve anëtare ishin solidarizuar me vendimin e Kosovës për të mos u përfaqësuar në një nivel tjetër

FSK-ja parakalon në gjashtë vjetorin e Pavarësisë së Kosovës

by

B.Jashari/.-Në përvjetorin e gjashtë të shpalljes së Pavarësisë së Republikës së  Kosovës, në sheshet kryesore të Prishtinës parakaluan sot kuadratet e të gjitha njësive të Forcës së Sigurisë së Kosovës, Policisë së Kosovës dhe Shërbimit Korrektues të Kosovës.  Në këtë manifestim, kryeministri  Hashim Thaçi tha se është parada e fundit ku ne shohim parakalimin e FSK-së, me këtë emër, dhe se na ndan një kohë e shkurtër nga themelimi i Forcave të Armatosura të Kosovës.

“Forca e Sigurisë së Kosovës mund të krenohet me shumë arritje të realizuara brenda mandatit të saj të tanishëm. Por, tash është koha të vazhdojmë tutje. Tash është koha kur ne duhet të marrim përgjegjësinë e plotë për sigurinë e shtetit tonë. E kjo do të nënkuptojë ndryshime të rëndësishme në mandatin, misionin, madhësinë dhe strukturën e saj. Kjo do të thotë –  një emër i ri për Forcën e Sigurisë së Kosovës”, u shpreh Thaçi.
Ai  tha se, kjo është parada e fundit e nderimit të Ditës së Pavarësisë, ku ne e shohim parakalimin e Forcës së Sigurisë së Kosovës me emrin e saj të deritanishëm.
“Na ndan një kohë shumë e shkurtër nga themelimi i Forcave të Armatosura të Kosovës. Pra, një kohë shumë e shkurtër na ndan nga forca e re, e cila do t’i ketë kapacitetet e  mbrojtjes dhe do ta ketë një mandat të ri, madhësinë dhe strukturën e re”, tha Thaçi.

Ai shtoi se, Forcat e Armatosura të Kosovës do të zhvillohen që të janë të gatshme dhe të afta ta mbrojnë sovranitetin dhe integritetin territorial të Republikës së Kosovës.
“Forcat e Armatosura të Kosovës do t’i mbrojnë interesat e Kosovës, qytetarët e saj dhe pronën e tyre, do të kontribuojnë për ndërtimin dhe ruajtjen e stabilitetit rajonal dhe atij global”, theksoi kryeministri Thaçi.
Ai tha se, aftësia që ne vet ta mbrojmë vendin tonë dhe t’i plotësojmë nevojat tona të sigurisë është po ashtu parakusht për integrimin e suksesshëm të Kosovës në strukturat Euroatlantike.
Presidentja e Republikës,  Atifete Jahjaga, tha se “suksesi i reformimit dhe profesionalizimit tuaj të mëtejshëm është i garantuar falë guximit, kurajës, durimit dhe zotimit për ta përmbushur misionin tuaj për një Kosovë paqësore dhe demokratike, për një shoqëri që ka për synim parësor investimin në sigurinë e çdo qytetari të saj dhe ku secili qytetar bashkëpunon me institucionet me besimin se ato ekzistojnë për t’i mbrojtur ata”, tha ajo.
“Jam e bindur se përkushtimi ynë për t’i ruajtur vlerat e idealet mbi të cilat u betuam dhe për të përforcuar dhe avancuar bashkëpunimin me aleatët tanë strategjikë, kurrë nuk do të vihet në dyshim”, tha Presidentja Jahjaga.
Ajo tha se, synimet e përcaktuara qartë për shtetin tonë, nuk mund të mbesin të papërmbushura, “sepse ne do të vlerësohemi për vlerat që po ndërtojmë, për idealet që po provojmë të krijojmë – të shtetit të së drejtës, të një shteti të lirë dhe të përparuar dhe në veçanti do të vlerësohet për luftën tonë në mbrojtje të këtyre idealeve”.
Në këtë manifestimin qendror të 6 vjetorit të Pavarësisë së Kosovës morën pjesë edhe  komandanti i Gardës Kombëtare të Ajovës, gjenerali Timothy Orr, ministri i FSK-së Agim Çeku, komandanti i FSK-së, gjenerallejtënant Kadri Kastrati, komandanti i KFOR-it, gjeneral major Salvatore Farina, ambasadorët dhe atashetë e akredituar në Kosovë,  si dhe qytetarë të shumtë nga e gjithë Kosova.

 

Dhjetra nxënës të helmuar nga gazi në Gostivar

by

Helmohen nxënësit shqiptarë të shkollës së mesme ekonomike të Gostivarit. Dyshohet që persona të panjohur të kenë kanë hedhur gaz në ambientet e shkollës, duke shkaktuar helmimin e dhjetëra nxënësve, pjesa më e madhe e të cilëve po kurohen në qendrën klinike në Shkup, për shkak të pasojave të rënda nga gazi. Në mesin e të helmuarve përveç nxënësve është dhe drejtori i shkollës dhe disa profesorë. Tek nxënësit shqiptarë të cilët kanë qenë duke ndjekur procesin mësimor përnjëherë kanë filluar t’iu paraqiten simptoma të kollitjes, frymëmarrjes së vështirësuar dhe djegies së syve.  Nga Klinika Toksikologjike në Shkup kanë theksuar se janë ndërmarrë të gjitha masat për t’iu dalë në ndihmë nxënësve të helmuar dhe se atyre u janë bërë të gjitha analizat e duhura të gjakut, të cilat më pas do të tregojnë shkaqet e helmimit. Ndërkohë kryetari i komunës së Gostivarit  Nevzat Bejta helmimin e nxënësve shqiptarë e ka quajtur akt çnjerëzor. Edhe pse zyrtarisht nuk është njoftuar se cilat janë shkaqet e helmimit masiv të nxënësve shqiptarë të Gostivarit, dyshimet e para flasin se në ambientet e shkollës së mesme ekonomike është hedhur gaz helmues nga persona të panjohur në turnin e nxënësve shqiptarë. Ekipet e Sektorit të Punëve të Brendshme të Gostivarit kanë njoftuar se janë duke punuar në zbardhjen e plotë të kësaj ngjarjeje të rëndë.