Gazetat dhe televizionet shqiptare lajme të tilla sporadike për krime e zënka të llojit “zënka grash për vezë pulash” nuk duhet ti publikojnë/
Nga Abdurahim Ashiku-Athinë /
U paralajmërua dhjetë sekonda më parë dhe u dha si lajm i parë, si ngjarje e padëgjuar ndonjëherë (ky është funksioni i krye lajmit). U dha i ilustruar me një “video celulari” përcjellë në internet…
Në Larisa të Greqisë u grindën njeri me tjetrin dy grupe taksixhijsh shqiptarë për konkurrencë pune. U grindën dhe nuk munguan të nxirren nga kroskotët e makinave armët e zjarrit. Si pasojë një taksixhi u plagos në këmbë. Ambulanca e çoi me të shpejtë në spitalin e Larisës…
Se kush ishin pjesëmarrësit në grindje dhe se kush nxori pistoletat nuk jepet asnjë asgjë. Nga Shqipëria telefonat e nënave në shqetësim për bijtë e tyre nuk pushojnë…
Media kombëtare shqiptare i bën jehonë një ngjarje në rrugë, e ve në krye të lajmeve kur nuk duhej të jepej fare.
Në Greqi jeton tash një çerek shekulli një komunitet i madh shqiptarësh që hamendësohet se janë diku tek një milionë, me leje qëndrimi apo ilegalë.
Për ta flitet në krye lajm në televizione e gazeta vetëm kur pushtetarët, qeveritarët e bojërave të ndryshme të “ylberit” shqetësohen për dërgimin e parave në Shqipëri, për “remitancat” fjalë kjo e futur nga fjalorë të huaj për t’i dhënë rëndësi lajmit…
Për ta flitet në krye lajm të gazetave dhe televizioneve satelitore shqiptare kur dikush, diku, bën një krim, bëhet pjesë e një zënke apo edhe e ndonjë vrasje. Bëhet lajm i kopjuar nga interneti apo nga ndonjë stacion grek kur ai thërret me të madhe se keqbërësi është shqiptar. Kjo mbetet e shkruar në lajmet shqiptare edhe në rastet (shumicë) kur policia dhe organet e drejtësisë greke njoftojnë se “krimineli” nuk ishte shqiptar.
Segmente të caktuara ksenofobe dhe neofashiste e duan shqiptarin kriminel, vjedhës, hajdut. Media në shërbim të tyre e shumon, e bën krye lajm.
Në Greqi ka një numër të madh shqiptarësh. Mundet edhe një milionë, me letra e pa letra. Në këtë numër që është sa një e treta e banorëve të Shqipërisë ka edhe kriminelë shqiptarë, vrasës me e pa pagesë, vjedhës bankash e shtëpish. Ashtu siç ka, madje edhe ma shumë, grekë që vjedhin përdhunojnë, trafikojnë fëmijë, shpërndajnë narkotikë etj., etj.
Në Greqi ka një numër shumë të madh shqiptarësh të ndershëm, shqiptarësh që me gjithë “krye lajmet”, nderohen e respektohen nga populli grek. Janë me mijëra gra shqiptare që kanë çelësat e shtëpive dhe të vilave greke, çelësa të dhëna me besim të plotë që ato të bëjnë qetësisht punët shtëpiake.
Në Greqi ka një numër të madh grash e vajzash që mbajnë me një përkushtim të habitshëm gra greke që mosha dhe sëmundjet i kanë shtrirë në shtrat. Urimet e tyre, tek i lajnë si fëmijë gratë shqiptare, shkojnë në “vesh të Zotit”.
Në Greqi ka një numër të madh grash shqiptare që mbajnë tërë ditën foshnja greke në duar, që i ushqejnë fëmijët grekë, i marrin përdore dhe i çojnë në shkollë e i shëtisin në parqe. Gratë greke u kanë lënë në dorë me një besim tepër të madh fëmijët e tyre, shpirtin e vogëlusheve të tyre. A ka besim më të madh se ky?
Në Greqi ka një numër goxha të madh biznesmenësh shqiptarë që jo vetëm kanë punësuar vetveten dhe familjen e tyre, por punësojnë me të gjitha detyrimet burra, gra, vajza greke.
Në Greqi 60 për qind e orkestrës simfonike shtetërore, deri në “violinën e parë” janë djem dhe vajza shqiptare, të barabartë dhe të respektuar nga kolegët dhe fjalëmirë nga drejtuesit e orkestrës dhe titullarët.
Në Greqi fëmijët e emigrantëve shqiptarë kanë vendin e nxënësve më të dalluar, nxënës që në festat kombëtare greke i prijnë kuadratit të shkollës me flamurin e vendit ku jetojnë si më të mirët e shkollës.
Në Greqi, që nga Kavalla e deri në Arta 60 mësues të përkushtuar që gjuhën shqipe e kanë në gjak kanë hapur kurse (shkolla i quaj unë sepse me të vërtetë të tilla janë në funksion dhe në përmbajtje) ku fëmijëve u mësojnë të shkruajnë, lexojnë e këndojnë gjuhën e bukur shqipe. Ata janë mësues vullnetarë që sakrifikojnë fundjavën për ta. Ata janë cilësuar si “Rilindës të kohës sonë”.
Mund të radhis shumë e shumë vlera të shqiptarëve në Greqi (Disa i kam përcjellë në shkrime e disa të tjera në 6 librat e mi të serisë ”Njerëz që i dua”.
Për ta gazetat dhe televizionet shqiptare nuk kanë as sy t’i shikojnë, as vesh t’i dëgjojnë, as laps t’i shkruajnë dhe as kamera t’i filmojnë.
Asnjë gazetë shqiptare nuk ka qoftë edhe një faqe të vetme hapësirë për të përcjellë vlerat e mëdha të shqiptarëve mërgimtarë në Greqi. ASNJË !!!
Lajmi që përcolli sot si “lajm të parë” televizioni kombëtar KLAN ishte një erë e ftohtë polare bri më bri në adresë të qindra mijëra shqiptarëve që jetojnë e punojnë anë e kënd Greqisë, një thikë në dorën e ksenofobëve dhe neofashistëve të kohës kundër shqiptarëve.
Për mua si gazetar ky nuk është lajm, ky është një përrua me ujë të zi që e çon ujin në mullirin e ndarjes dhe përçarjes, e denigrimit të shqiptarëve mërgimtarë që me një përkushtim të jashtëzakonshëm kanë mbajtur në këmbë jo vetëm jetën e tyre por edhe vendin e tyre, familjet dhe Shqipërinë.
Shqipëria, edhe brenda vendit edhe ndër shqiptarët në mërgim, nuk është vendi dhe njerëzit e krimit, është vendi i njerëzve të përkushtuar.
Gazetat dhe televizionet shqiptare lajme të tilla sporadike për krime e zënka të llojit “zënka grash për vezë pulash” nuk duhet ti publikojnë ose, e fundit, ti përmbledhin si lajme shkurt në kronikën e zezë në fund të lajmeve apo në faqen e fundit të gazetave.
Lajm i parë duhet të jetë vlera e mërgatës shqiptare jashtë Shqipërisë në Greqi, Itali, Gjermani, Angli, Kanada, SHBA, Australi. Është një Shqipëri e tërë jashtë që punon edhe për Shqipërinë, që jeton me mendje e shpirt tek trojet e lashta shqiptare.
Abdurahim Ashiku
Gazetar, Athinë 14 janar 2016