Albin Kurti – Page 14 – Dielli

Erion lëre Albinin, shqiptarët duan vaksinën!

December 16, 2020 by dgreca

NGA ILIR LEVONJA/

Zevëndëskryeministri i Shqipërisë ka bërë publike një ankesë karshi liderit të Vetvendosjes Albin Kurti. Kjo për faktin se ky i fundit dënoi po publikisht dhunën policore në protestetat e revolucionit të adoleshentëve. Megjithëse e ”fituan” betejën e radhës, prapë pasojat janë aty. Do dali dikush të qahet, dikush duke ofenduar, dikush duke përbuzur, dikush duke çmendur shqiptarët me alergjinë karshi shashkave apo zjarrit të adoleshentëve. Kërcejnë përpjetë sikur janë prej celefoni, megjithëse janë mbrujtur prej atij burimi, prej asaj udhe, duke djegur e shkatërruar sa kanë dashur. Një herë del ai i bashkisë, një herë ndonjë topgop modele nate, ndonjë show girl fushatash aq sa është naive të mendosh se shqiptarët kanë qeveri për punët e tyre. Sot doli Erioni i Kryeministrisë dhe iu drejtua publikisht Albinit. Jo ti kështu e ashtu. Jo po ti nuk e di se kush i organizon këta. Po a ke punë për të bërë o zëvendëskryeministër? Lëre Albinin o njeri, siguroju shqiptarëve vaksinën kundër covidit. Nxito dhe kaq. Adoleshentëve ua gjete anën. Ashtu si edhe studentëve vitin që shkoi. Siguroju shqiptarëve vaksinën pa të tjerat i dinë vet ata. Se po t’i futemi arave Albini është ajo soj race politikani i formuar në protestë. Megjithëse i majtë nuk ka universitet Zërin e popullit, por burgjet e Millosheviçit. Eshtë një protestues i lindur. Ndofta nuk të kujtohen demonstratat e tetorit 1997-të, e studentëve në Prishtinë. Ishin të Albinit. U dënua me 15 vjet burg, nga regjimi i Serbisë. Atëherë bota u indinjua me Millosheviçin, pati plot nota proteste. Pra në raport me kohën, Albini student digjej për Kosovën dhe çështjen shqiptare, kurse kasta jote digjnit Shqipërinë. Një klasë politike e përgjegjshme nuk do t’ia lejonte kurrë vetes një 97-të si ajo e Shqipërisë. Ishit investitorë tek firmat piramidale, nga ana tjetër dogjët vendin për shkak të tyre. Atëhere djegia ishte standart, hapja e depove të armëve po ashtu. Kurse sot djegia e një peme butaforike është vandalizëm rrugeçërish. Qe koha kur nga Shkumbini e poshtë shqiptari përndiqej nga shqiptari kurse në Prishtinën e gjakosur, shqiptari ndiqej e burgosej nga i huaji. Qe koha më e mbrapshtë, një 1913-të tjetër. Një 1944 tjetër, gati ta zvogëlonte akoma edhe më Shqipërinë shtetërore. Një formë amorfe mes Tiranës dhe Durrësit. Megjithatë kur ua do mideja flisni me tonin e heroit kombëtar. I pordhalisesh Albinit se beson tek drejtësia, ndërkohë ata për të cilët qaravitesh se të kanë djegur Shqipërinë, të kanë vrarë, vetëm publikisht i akuzon. Në pushtet nuk është Albini, por ti. Në raport me kohën, Albini shiti shtëpinë për të paguar programin e tij politik. Kurse ti dhe kasta jote nga një apartament parafabrikat nga koha e kontributit me orë pune, jeni sot të gjithë vilaxhinj. Nuk u lodhët duke sharë njëri-tjetrin, megjithëse jeni kopja e përkryer e shoqishoqit. Albini erdhi me votë në krye të qeverisë dhe iku me votën e dorës përpjetë. Pa u ankuar, pa u shkumosur foltoreve. U rrëzua për tu ngritur. Kurse ju vini me votë të vjedhur dhe largoheni duke djegur Shqipërinë dhe shqiptarët. Dhe arsyeja është e thjeshtë, ti dhe kasta jote doni karriken. Kurse Albini, Kosovën. Madje më shumë se kaq, Shqipërinë në rrafshin e saj natyral.

Albin Kurti-Beteja Vazhdon!

May 29, 2020 by dgreca

Një vlerësim të plotë e të hollësishëm nga këshilltarët tonë ligjorë do të mund ta kemi pasi ta marrim tekstin e plotë të Aktgjykimit./

Albin Kurti reagoi ne fb:Mbrëmë natën, në orët e vona, morëm njoftimin nga Gjykata Kushtetuese lidhur me Aktgjykimin për dekretin antikushtetues të Presidentit.

Le të themi qysh në fillim, se në tekst dhe nëntekst nuk gjendet shumë lidhur me çështjet kushtetuese sa me metodën e pashembullt të shprehjes së parullave disiplinuese-ndëshkuese.

Mund të gjenden pak ose aspak raste në botën demokratike kur fituesi i zgjedhjeve dhe vetë qeveria në detyrë janë të gatshëm për zgjedhje të reja dhe kjo ju pamundësohet nga Gjykata Kushtetuese dhe Presidenti duke u thirrur në shumica fiktive në Kuvend dhe duke spërdredhur deklarimet dhe shkaqet objektive siç ishte gjendja e rëndë e pandemisë.

Në vend se të bëjë interpretim të Kushtetutës, Gjykata duket se kishte këtë qasje: meqë presidenti ka të drejtë, le të përpiqemi ta arsyetojmë.

Gjykata ka theksuar se në vitet 2010 dhe 2017, pas mocioneve të suksesshme të mosbesimit, nuk ka pasur vullnet dhe as shumicë në Kuvend për të formuar një Qeveri të re, mirëpo se si e kanë konstatuar këtë nuk dihet, pasi shpërndarja e Kuvendit ka qenë automatike.

Është e vërtetë që Presidenti s’ka një të drejtë absolute për të shpërndarë Kuvendin, por, pikërisht për këtë arsye, ajo është e kufizuar në mocionin e mosbesimit si kriter për këtë.

Gjykata e ka shkruar njoftimin në mënyrë të atillë thua se fituesi i zgjedhjeve nuk ekziston fare, sikur fituesi të jetë inekzistent. Ndërkaq, në anën tjetër, Gjykata shlyen dallimin midis shkarkimit dhe dorëheqjes së ekzekutivit.

Gjykata paragjykon kur thotë se fituesi jo vetëm që s’ka propozuar një kandidat, por as që ka shprehur interesimin për një gjë të tillë. Kjo nuk qëndron, sepse në vazhdimësi është theksuar nga ne se fituesi i zgjedhjeve nuk po heziton dhe nuk po refuzon.

Në disa raste Gjykata në vend të interpretimit është marrë me shkrim e rishkrim të Kushtetutës, psh. në pikat 13 dhe 18.

Formulimet e llojit “… Gjykata thekson se është e vetëkuptueshme, që ky “konsultim” formal, duhet të përmbyllet sa më shpejtë që të jetë e mundur dhe ngërthen në vetvete kërkesën për dinamikë të shpejtë ndërveprimi”, apo, “E drejta për të propozuar mandatarin për Kryeministër është edhe përgjegjësi edhe privilegj” përbëjnë shembuj eklatant të kreativitetit të gjyqtarëve të Gjykatës Kushtetuese në shprehjen e admirimit të tyre ndaj vendimeve të Presidentit të vendit.

Një vlerësim të plotë e të hollësishëm nga këshilltarët tonë ligjorë do të mund ta kemi pasi ta marrim tekstin e plotë të Aktgjykimit.

Fatkeqësisht, Gjykata Kushtetuese u rreshtua me kapësit e shtetit. Ajo foli për veten, më parë e më shumë sesa për çështjen që trajtoi. Ajo e vulosi veten, ajo e zhvlerësoi veten.

Beteja jonë vazhdon, bashkë me popullin e vetëdijësuar, kundër kësaj kaste të korruptuar.

Për fund, ne njëmend nuk kemi pasur shpresa të mëdha për vendimin e Gjykatës Kushtetuese, mirëpo, ky vendim është përtej imagjinatës e nën çdo nivel (logjik e juridik). Si i padrejtë, ai është i papranueshëm. Për hapat e tjerë politikë do të njoftojmë qytetarët në ditët në vijim.

Albin Kurti priti në takim disa prej miqve të ngushtë të Ukshin Hotit

May 16, 2020 by dgreca

Kryeministri në detyrë Kurti priti në takim disa prej miqve të ngushtë të Ukshin Hotit/

Prishtinë, 16 maj 2020– Sot më 16 maj, disa prej miqve të ngushtë të Ukshin Hotit, zotërinjtë Sherif Konjufca, Ekrem Kryeziu, Ali Kryeziu, Mentor Kaçi, i bënë një vizitë Kryeministrit në detyrë Albin Kurti, i shoqëruar nga Enver Dugolli dhe Liburn Aliu. Biseda mbuloi që prej kujtimeve të burgut deri në rrethanat e inteligjencës politike.
Aliu, Ekremi dhe Mentori kanë qenë të dënuar bashkë me Ukshinin në vitin 1981.
Enveri dhe Liburni kanë qenë shokët e burgut të Dubravës, prej ku edhe u zhduk Ukshin Hoti.
Ali Kryeziu tha dy përcaktime. Ukshini ka qenë ideolog, jo politikan. Sepse nuk mund ta thjeshtosh kurrë kompleksitetin e dijes së tij në analizues rrethanash, por vetëm ta ndeshësh si sintetizues politike. Ai ka qenë pra më shumë se ç’mund të themi për të. Ishte në natyrën e tij, si mendues e veprues, të trondiste çdo konceptim me një artikulim që e përmbyste dëshirën për me u vendos në një marrëdhënie të qetë me kohën.

Albin Kurti, ligjeratë (Virtualisht) në universitetin Harvard të hënën, 18 Maj

May 16, 2020 by dgreca

Kryeministri i Kosovës, Albin Kurti, do të mbaj ligjeratë (Virtualisht) në universitetin Harvard të hënën, 18 Maj/

Biseda do të moderohet nga Profesori i njohur i Diplomacisë dhe Marrëdhënieve Ndërkombëtare, Ambasadori Nicholas Burns. Profesori Burns ka shërbyer në qeverinë e Shteteve të Bashkuara për 27 vjet. Si Oficer i Shërbimit të Jashtëm, ai ishte Nën sekretar i Shtetit për Çështjet Politike nga 2005 deri në 2008. Ai ka drejtuar negociatat mbi Marrëveshjen Bërthamore Civile të SHBA-Indisë; një marrëveshje afatgjatë rreth ndihmës ushtarake me Izraelin; dhe ishte negociatori kryesor amerikan në programin bërthamor të Iranit. Burns ishte Ambasadori amerikan në NATO (2001-2005), Ambasadori në Greqi (1997-2001) dhe Zëdhënësi i Departamentit të Shtetit (1995-1997).

Kjo ngjarje vjen në një kohë të rëndësishme duke marrë parasysh situatën aktuale në Kosovë. Kryeministri Kurti kohët e fundit foli për ndërhyrje nga i dërguari amerikan në Kosovë, Richard Grenell dhe Presidenti Trump, për rolin e tyre në rrëzimin e qeverisë në Kosovë. Gjithashtu, Kryetari i Komisionit të Dhomës për Punë të Jashtme Eliot Engel dhe Robert Menendez kanë folur kundër politikave të Trump ndaj Kosovës-Serbisë.

Biseda do të transmetohet drejtpërdrejt në kanalin YouTube të Shoqatës së Studentëve të Harvardit live në orën 12:00 të Bostonit ose 18:00 në Prishtinë. https://www.youtube.com/channel/UCSRqLkjurSsuiQcXAdxa_TA

Për më tepër, studentët, pedagogët, studiuesit dhe të ftuarit e tjerë të Harvardit do të jenë në gjendje t’i bëjnë Kryeministrit pyetje gjatë këtij aktiviteti.

JO AMNISTI PER KRIMET NE KOSOVE

April 27, 2020 by dgreca

Osmani: Për Mejën dhe secilin vend të Kosovës ku u kryen krime nuk mund të ketë amnisti*/

Kryetarja e Kuvendit të Kosovës, dr. Vjosa Osmani, bashkë me Kryeministrin në detyrë, z. Albin Kurti, kanë bërë homazhe në Kompleksin Memorial në Mejë të Gjakovës, në 21 vjetorin e ekzekutimit të 376 burrave të këtij fshati nga forcat policore serbe dhe ushtria jugosllave.

“Sikurse çdo vit, edhe në këtë 21 vjetor Lëndina e Pikëllimit në Mejë është vendi ku duhet të përkulemi, të ndjejmë dhimbje e të mos rreshtim së kërkuari drejtësinë. Sikurse çdo vit, do t`i kujtojmë 376 burra të këtij fshati të moshës 15 deri në 75 vjeç, të cilët u ndanë nga familjet e tyre dhe u ekzekutuan nga forcat policore serbe dhe ushtria jugosllave. Ekzekutimi brutal i civilëve tregoi se synim i forcave policore serbe dhe ushtrisë jugosllave nëpërmjet operacionit të quajtur “Reka”, ishte spastrimi etnik dhe gjenocidi”, ka thënë kryeparlamentarja Osmani.

Sipas saj, më shumë se dy dekada më pas, përveç kujtimit për të vrarët, Srebrenica e Kosovës jeton me ankthin e 28 të pagjeturve.

“Në Kompleksin Memorial “27 Prilli” në Mejë, ende varret e tyre janë të hapura, teksa ne nuk e kemi përfunduar punën që trupat e tyre të prehen në vendin e lindjes e familjet ta kenë një adresë ku përfalen për të afërmit e tyre”, është shprehur zonja Osmani.

Sipas saj, në ditën kombëtare për të pagjeturit, secili duhet ta kthejë kokën nga Meja dhe të reflektojë me bindjen se borxhi ndaj këtyre të rënëve ende mbetet peng, derisa kryesit e këtij akti makabër nuk vihen para drejtësisë.

“Për Mejën dhe secilin vend të Kosovës ku u kryen krime nuk ka dhe nuk duhet të ketë amnisti! Vetëm drejtësia mund ta përmbyllë këtë kapitull historie! Të rënëve lavdi, e familjeve të të pagjeturve kurajo, ngase fati i familjarëve të tyre do të jetë preokupim i vazhdueshëm deri në zbardhjen e fatit të tyre”, ka thënë Osmani.* Me shume foto shih ne fb Gazeta Dielli dhe Dielli vatra