-Komuniteti i biznesit dhe Qeveria e Kosovës duhet të punojnë ngushtë për zbatimin e politikave të cilat nxisin zhvillimin ekonomik dhe adresojnë konkurrueshmërinë e Kosovës në tregun global/
-Zgjidhja e këtij qorrsokaku politik dhe një Kuvend funksional janë të nevojshëm për të përmirësuar ekonominë, të sjellin Kosovën më afër anëtarësimit në Bashkimin Evropian dhe në UNESCO, si dhe të ndihmojnë përpjekjet e Kosovës për liberalizim të vizave-
Nga Behlul Jashari/ PRISHTINË, 22 Tetor 2015/ Sundimi i ligjit, siguria rajonale, zhvillimi ekonomik dhe funksionimi i institucioneve janë elemente kyçe për të ardhmen e Kosovës. Këto ishin pikat kryesore të fjalimit të Ambasadorit të Shteteve të Bashkuara të Amerikës, Greg Delawie para pjesëtarëve të komunitetit të biznesit në një ngjarje të organizuar nga Oda Ekonomike Amerikane në Kosovë, gjatë të cilës ai është emëruar zyrtarisht Anëtar Nderi i Bordit të Guvernatorëve të Odës Amerikane.
Ambasadori Delawie falënderoi Odën ekonomike amerikane në rolin e saj udhëheqës në ngritjen e zërit për çështjet që preokupojnë komunitetin e biznesit, duke shprehur përkushtimin e ambasadës amerikane për të vazhduar mbështetjen për misionin e Odës Amerikane.
Ambasadori Delawie lavdëroi progresin që ka bërë Kosova brenda një periudhe të shkurtër kohore që nga Pavarësia, duke shtuar se Kosova ende vuan pasojat për të tërhequr investime të huaja dhe për të promovuar rritjen e qëndrueshme ekonomike, derisa korrupsioni vazhdon të pengojë zhvillimin ekonomik të Kosovës. Ai ftoi komunitetin e biznesit të ngris zërin dhe të vazhdojë të luftojë për të ardhmen ekonomike të shtetit, meqë nuk ka më kohë për t’u humbur, thekson njoftimi dërguar sot nga Oda Ekonomike Amerikane në Kosovë.
“Kriza e emigrimit gjatë dimrit që lam ishte një sinjal i zëshëm dhe i qartë për mua se rinia e Kosovës, e që është resursi më i vlefshëm i saj, ka filluar të humbasë shpresën për të ardhmen në Kosovë”, tha Ambasadori, duke shtuar se ai ka tre prioritete kryesore që duhen adresuar, e që përfshijnë sundimin e ligjit, sigurinë rajonale dhe zhvillimin ekonomik.
Ambasadori Delawie gjithashtu theksoi se ai beson se arritja e progresit të qëndrueshëm në të gjitha këto çështje është esenciale për Kosovën për ta arritur qëllimin e saj dhe për t’u bërë pjesë e të gjitha institucioneve kyçe evropiane. Ambasadori kërkoi nga pjesëtarët e komunitetit të biznesit që të mos lejojnë shtrirjen e korrupsionit në bizneset e tyre, meqë kjo do t’i kushtojë Kosovës me vendet e nevojshme të punës të cilat do të ndihmonin rininë të ndërtojnë të ardhmen e tyre në Kosovë.
Ambasadori theksoi se SHBA-të kanë investuar 15 milionë dollarë amerikanë për fuqizimin e gjyqësorit dhe sundimit të ligjit, duke trajnuar policinë, prokurorët dhe gjyqtarët. Ai inkurajoi bizneset të ndihmojnë në këto përpjekje duke raportuar çfarëdo dëshmie të korrupsionit.
“Komuniteti i biznesit dhe Qeveria e Kosovës duhet të punojnë ngushtë për zbatimin e politikave të cilat nxisin zhvillimin ekonomik dhe adresojnë konkurrueshmërinë e Kosovës në tregun global”, tha Ambasadori Delawie. Ai tha se ekonomia e Kosovës nuk do të mund të rritet derisa të mos ketë mjedis të përmirësuar për investime, korrupsion të reduktuar, sistem efikas të gjyqësorit për zgjidhjen e kontesteve, si dhe stabilitet politik. Ai komentoi se raportet mediale anembanë botës rreth ngjarjeve të fundit në Kosovë nuk paraqesin pasqyrë të një vendi politikisht stabil.
“Kuvendi nuk është vend për armë, për pengesa, ose për dhunë. Nëse vazhdon ky konfrontim, e ardhmja e Kosovës në Evropë do të vonohet, si dëmi më i vogël në skenarin më të mirë. I dëshiroj Presidentes Jahjaga gjithë të mirat në përpjekjet e saj për të promovuar dialogun politik”, tha Ambasadori i SHBA-ve. Delawie shtoi se zgjidhja e këtij qorrsokaku politik dhe një Kuvend funksional janë të nevojshëm për të përmirësuar ekonominë, të sjellin Kosovën më afër anëtarësimit në Bashkimin Evropian dhe në UNESCO, si dhe të ndihmojnë përpjekjet e Kosovës për liberalizim të vizave.
AMBASADORI AMERIKAN NE PRISHTINE, APEL PER T”I IKUR DHUNES
*Delawie: Parlamenti nuk është vend i armëve e dhunës
*Ambasadori amerikan në Kosovë Greg Delawie u bën thirrje partive që të gjejnë zgjidhje/
Ambasadori Shteteve të Bashkuara në Kosovë, Greg Delawie u ka bërë thirrje partive politike që të ulen dhe të gjejnë zgjidhje për situatën e krijuar. Ai i ka bërë këto thirrje pas një takimi me presidenten e Kosovës Atifete Jahjaga lidhur me ngjarjet e fundit në Parlamentin e Kosovës, ku opozita hodhi sërish gaz lotsjellës për pamundësuar mbajtjen e seancës.
Ambasadori Delawie u tha mediave se partitë politike duhet të gjejnë një gjuhë të përbashkët për të dalë nga situata politike në të cilën ndodhet Kosova.
“Para së gjithash, Shtetet e Bashkuara të Amerikës mbështesin të ardhmen e Kosovës në Bashkimin Evropian dhe zhvillimet e saj demokratike. Unë besoj që parlamenti është vend për diskutim, debat, si dhe për mos pajtueshmëri. Por, jam i sigurt që ai nuk është vend për armë, dhunë dhe pengim”, tha ambasadori Delawie duke bërë thirrje që të mos rrezikohet e ardhmja e Kosovës.
“Do të doja të inkurajoja të gjitha partitë që të marrin frymë thellë, ta pyesin vetën se a po i ndihmojnë veprimet e tyre të ardhmes së Kosovës si demokraci evropiane, apo po rrezikojnë izolimin. Dua të inkurajoj të gjitha partitë të gjejnë një mënyrë për të ndihmuar parlamentin, krijuesin e demokracisë së Kosovës, që t’i kthehet rendi”, tha ambasadori Delawie.
Që nga 22 shtatori partitë opozitare nuk kanë lejuar mbajtjen e seancave të parlamentit, në shenjë kundërshtimi ndaj marrëveshjeve të arritura në bisedimet me Serbinë dhe shënimit të vijës kufitare me Malin e Zi.
APartitë në pushtet ndërkaq po i bëjnë thirrje opozitës të lejojë debatin në parlament, duke tërhequr vërejtjen se bllokimi i punës së tij është shembull i dëmshëm për të ardhmen.
Ambasadori Lu, pas takimit me Nishanin, takoi Ramën & Tahirin dhe Metën
Kryeministri Rama zhvilloi sot, e Hene 21 Shtator, një takim me ambasadorin amerikan në vendin tonë Donald Lu. Në takimin e mbajtur në kryeministri, ishte i pranishëm edhe ministri i Punëve të Brendshme, Saimir Tahiri.
Po sot, ambasadori amerikan ka zhvilluar një takim dhe me Presidentin Bujar Nishani. Për të dy takimet nuk ka pasur njoftime për temat e diskutuarat nga Zyrat e Shtypit. Ndërsa në orën 13:30 Ambasadori i SHBA ka zhvilluar një takim me kreun e Kuvendit, Ilir Meta.
Burime jo zyrtare nga Kryeministria thanë për mediat se në takim është diskutuar për vizitën që pritet të bëjë këto ditë në SHBA kryeministri Edi Rama. Megjithatë, vizita e kryeministrit në SHBA nuk mund të ketë qenë temë e takimit të ambasadorit Lu dhe me Presidentin, apo dhe me kreun e Kuvendit. Ka diçka që nuk thuhet, porse kanë filluar fjalët e para të dalin për një ndryshim në Qeveri. Kush ikën edne nuk dihet, komenton ne botimin e saj ne online gazeta Koha Jone !
Duke pasur parasysh dhe zhvillimet e fundit, akuzat për trafikun e drogës dhe dekriminalizmin, duket se takimet e sotme nuk janë zhvillime rutinë. Diçka po luhet në politikë. Pas takimeve të tilla gati urgjente, gjithmonë fshihen lëvizje të forta në politikë.
Prej ditësh ambasadori i SHBA-së ka qenë tepër aktiv lidhur me largimin e zyrtarëve të korruptuar dhe inkriminuar. Javën e kaluar ambasadori zhvilloi takime të veçanta me kryetarin e Opozitës Lulzim Basha, por dhe me ministrin e Brendshëm Saimir Tahiri në ministrinë e këtij të fundit. Gjithashtu aktivitete publike të ditëve të fundit përcolli apelin për domosdoshmërinë e reformës në drejtësi, luftës së krimit të organizuar dhe korrupsionit.
AMBASADA AMERIKANE: KUJDES ME KANDIDATET E KRIMNUAR!
Ambasadori LU, presim që të tërhiqen të tjerë kandidatë nga gara zgjedhore e 21 qershorit/
Në një intervistë për revistën periodike “Java”, Ambasadori amerikan në Tiranë, Donald Lu, ka thënë se pret që partitë politike të heqin edhe kandidatë të tjerë nga lista e garuesve në zgjedhjet e 21 qershorit. Pak javë më pare zoti LU tha se, ambasada u ka dërguar informacion partive politike për kandidatët të cilët dyshohet se kanë të kaluar kriminale.
“Ne e kemi ndarë këtë informacion me kryetarët e partive politike, me kërkesën që ata ta verifikojnë këtë informacion dhe të ndërmarrin veprime. Ata kanë hequr disa prej këtyre emrave nga listat e kandidatëve dhe shpresojmë që do të heqin më shumë. Unë besoj, që votuesit kanë të drejtën të dinë mbi historitë kriminale të kandidatëve politikë. Por, siç thoni ju në shqip “vetëm i zoti e nxjerr gomarin nga balta”, ka thënë Lu. Deri tani zyrtarisht nga gara janë tërhequr dy kandidatë, por nuk dihet nëse tërheqja e tyre ka të bëjë me procesin e dekriminalizimit. Gjithashtu është përfolur edhe për tërheqjen e një tjetër kandidati, i cili akuzohet se është përfshirë në vrasje të ndodhur disa vite më parë.
Ambasadori Lu paralajmëron investitorët amerikanë: Në Shqipëri do përballeni me korrupsionin!
Ambasadori i SHBA-ve në Tiranë e ka bërë këtë vlerësim në takimin me disa biznesmenëve në Nju York dhe Uashington gjatë një vizite para pak ditësh
Nga Elona Memushi/
Ambasadori amerikan në Shqipëri Donald Lu shprehet se Shqipëria është një vend ku mund të investosh në biznes dhe të shpërblehesh ekonomikisht, por për ta bërë këtë duhet të jesh kurajoz pasi të duhet të përballesh me korrupsionin.
Lu e ka bërë këtë vlerësim në takimin me disa biznesmenëve në Nju York dhe Uashington gjatë një vizite para pak ditësh.
Diplomati amerikan teksa ka garantuar mbështetjen e SHBA për luftuar korrupsinin theksoi se puna me e madhe u takon shqiptarëve.
“Zoti ministër Ahmetaj, dua të flas në gjuhën shqipe. Nuk duhet të flas anglisht, duhet të flas vetëm në gjuhën e biznesit. Para pak ditësh isha në Nju Jork dhe në Uashington dhe aty pata mundësinë të flisja më njerëz të biznesit dhe unë u thashë atyre se nëse doni të hyni në tregun shqiptar duhet t’i keni sytë hapur, duhet të përkushtoheni për një kohë të gjatë, duhet të përgatiteti për konkurrencë të fortë dhe duhet të jeni gati të përballeni edhe me korrupsionin. Nëse jeni kurajoz, do të rrezikoheni shumë, por do të shperbleheni shumë. Unë iu inkurajoj të gjithëve të mendoni për menyrat se si dhoma mund të ndihmojë për të përmirësuar klimën e biznesit dhe si të udhëheqë luftën kundër korrupsionit. Ambasada Amerikane është e gatshme të jetë të japë kontributin e saj në këtë luftë, por puna me e rëndësishme u takon vetë shqiptarëve”, tha ambasadori Lu në një takim të zhvilluar nga Dhoma Amerikane e Tregtisë për t’i uruar atij mirëseardhjen dhe në të njëjtën kohë për të përshëndetur ish- Drejtoren Ekzekutive te Dhomës Amerikane, Floreta Luli-Faber, e cila largohet pas 15 vjetësh nga ky pozicion për të përfaqësuar Shqipërinë si ambasadore në Uashington.
Nga ana tjetër, ministri i Zhvillimit Ekonomik, Turizmit, Tregtisë dhe Sipërmarrjes, Arben Ahmetaj, I pranishëm në takim, i cilësoi marrëdhëniet e Shqipërisë dhe SHBA-së si parësore dhe strategjike.
Ahmetaj u shpreh se duke iu referuar shifrave, volumi tregtar mes dy vendeve është rritur ndjeshëm në krahasim me të shkuarën dhe marrëveshja për taksimin e dyfishtë është tashmë e nevojshme.
Në ceremoni morën pjesë autoritete të larta qeveritare, të trupit diplomatik, të organizatave ndërkombëtare si dhe anëtarët e Dhomës Amerikane të Tregtisë.
Dhoma Amerikane e Tregtisë në Shqipëri është një organizatë private e biznesit e angazhuar për të ndihmuar në përmirësimin e klimës së biznesit në Shqipëri si dhe në përmirësimin e imazhit të biznesit shqiptar në tregjet amerikane dhe ndërkombëtare.(E dergoi per Diellin Gazetari beqir Sina)