Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

COVID- 19: Kosova në përballje me pandeminë, faza e tretë e lehtësimeve 

by

-Kryeministri Hoti falënderoi stafin shëndetësor për punën e palodhshme në përballje me pandeminë COVID 19. Plan mjaft të zhvilluar për përballje afatgjate me këtë pandemi. Situata epidemiologjike është nën kontroll dhe e qëndrueshme/

PRISHTINË, 4 Qershor 2020-Gazeta DIELLI/ Kryeministri i Republikës së Kosovës, Avdullah Hoti, vizitoi Ministrinë e Shëndetësisë, ku u prit nga ministri Armend Zemaj me bashkëpunëtorë.

Kryeministri Hoti, pas takimit me ministrin Zemaj, zhvilloi një takim edhe me drejtorët e institucioneve vartëse dhe udhëheqësit e departamenteve në këtë ministri. Gjithashtu, kryeministri Hoti vizitoi linjën e ndihmës psikologjike për COVID 19, si dhe Qendrën operative emergjente të Ministrisë së Shëndetësisë.

Kryeministri Hoti tha se vizitën e parë në dikastere të Qeverisë e kishte në Ministrinë e Shëndetësisë, për të treguar se mbeten të përkushtuar për situatën në të cilën po kalon vendi ynë.

 “Takuam ekipin që gjatë gjithë kësaj periudhe, gjatë këtyre muajve ka qenë në krye të detyrës. I falënderova sinqerisht për punën që kanë bërë. Na informuan për ato që na presin në javët e ardhshme. Drejtori na informoi në detaje se si është menaxhuar situata deri më tash, si janë shifrat e qytetarëve të prekur nga kjo pandemi. Po lutemi që ta kalojmë sa më lehtë dhe po duket se jemi duke e kaluar lehtë”, tha kryeministri Hoti.

Kryeministri Hoti, gjatë këtij takimi, kërkoi nga drejtori i Institutit Kombëtar të Shëndetësisë Publike, Naser Ramadani dhe nga ministri Zemaj që të mbajnë lart vetëdijen e qytetarëve derisa përfundimisht të kalohet kjo gjendje.

 “Ashtu siç e kam prezantuar në seancën e Kuvendit dhe siç e kemi në programin qeverisës, ne kemi një plan mjaft të zhvilluar për përballje afatgjate me këtë pandemi, e cila mundëson që, ndërkohë që hapen gradualisht shoqëritë, bizneset, arsimi dhe institucionet, në të njëjtën kohë të ndërmarrim masat e nevojshme për të parandaluar përhapjen e virusit. Atë që drejtori i Institutit vazhdimisht e ka thënë që të mos i japim virusit këmbë që të shkojë nga një person te personi tjetër, duke ndërtuar një rrjetë të institucioneve shëndetësore nga niveli terciar deri në nivelin primar publik dhe privat, duke e fuqizuar në veçanti stafin shëndetësor që janë përballja e parë me rastet potenciale”, theksoi Kryeministri Hoti.

Më tej, ai pohoi se në ditët e ardhshme do të ketë takime shumë intensive për të miratuar një plan më afatgjatë për t’u përballur me këtë pandemi.

Po ashtu, Kryeministri Hoti ka ngushëlluar familjet e personave të prekur nga kjo pandemi, derisa u ka uruar shërim atyre që janë në trajtim e sipër dhe ka falënderuar gjithë stafin mjekësor, stafin mbështetës dhe gjitha strukturat për punën kolosale që kanë bërë gjatë 2-3 muajve të fundit në përballje me këtë pandemi.

Ministri i Shëndetësisë, Armend Zemaj, pasi falënderoi Kryeministrin Hoti për vizitën, tha se do të punojnë në rritjen e transparencës dhe llogaridhënies në interes të publikut dhe mbi të gjitha të ruajtjes së shëndetit publik dhe jetës së qytetarëve të Republikës së Kosovës, si dhe të avancojmë sistemin shëndetësor në vend.

Ndërsa, drejtori i Institutit të Shëndetësisë Publike, dr. Naser Ramadani, tha se situata epidemiologjike është nën kontroll dhe e qëndrueshme, por që nuk lë vend për vetëkënaqësi, përkundrazi do të ketë angazhim të shtuar duke pasur parasysh se tani ka ndodhur faza e tretë e lehtësimeve.

KRYEMINISTRI HOTI TEK VARRI I RUGOVES

by

Kryeministri Hoti bëri homazhe te varri i ish-presidentit Rugova

Prishtinë, 4 qershor 2020-Kryeministri i Republikës së Kosovës, Avdullah Hoti, në ditën e tij të parë të punës në krye të Qeverisë, bashkë me kabinetin qeveritar, bënë homazhe te varri i ish-presidentit historik të Kosovës, Ibrahim Rugova.

Me këtë rast, Kryeministri Hoti e çmoi lartë figurën e ish-presidentit Rugova, duke e quajtur atë themelues të shtetit, ndërkaq bëri të ditur se vizitën tjetër do ta zhvillojë në Prekaz, si shenjë e respektit ndaj martirizimit të familjes Jashari.

 “Faleminderit të gjithëve që po i përcillni aktivitetet e Qeverisë në ditën e parë tonë të punës. Sot e kemi nisur ditën me protokollin e nevojshëm, të zakonshëm të kryeministrit kur e merr detyrën në konsultimet fillestare që i bëjmë në mbledhjen e Qeverisë dhe pastaj në nderimet që ne shprehim si kabinet qeveritar ndaj themeluesit të shtetit të Kosovës, presidentit Rugova dhe pas kësaj do të jemi në vizitën në Prekaz, tek vendi ku është i shenjtë për të gjithë shqiptarët kudo që janë si shenjë e respektit ndaj martirizimit të asaj familje dhe përmes saj të gjithë atyre që kanë dhënë jetën për lirinë të cilën sot e gëzojmë”, është shprehur kryeministri Hoti.

KRYEMINISTRI HOTI: QEVERIA E RE, FUQI QË BURON NGA KUSHTETUTA E KOSOVËS

by

-Nga punimet e seancës së jashtëzakonshme të Kuvendit për zgjedhjen e Qeverisë së re të Kosovës/

-Me 61 vota pro u zgjodh Qeveria e re e Republikës së Kosovës, me kryeministër Avdullah Hotin: Kjo qeveri e re, fuqi që buron nga Kushtetuta e Kosovës, duke mbrojtur kështu sovranitetin dhe integritetin e qytetarëve, si njësi këto të pandashme dhe të patjetërsueshme/

-Ceremonia e marrjes së detyrës nga Kryeministri i zgjedhur, Avdullah Hoti, do të mbahet nesër/

Gazeta DIELLI nga korrespondenti në Kosovë Behlul Jashari

Korrespondenti i Diellit ne Prishtine Behlul Jashari me Kryeminsitrin e ri Abdullah Hoti.

PRISHTINË, 3 Qershor 2020/ Sot, Kuvendi i Republikës së Kosovës, me kërkesën e 61 deputetëve, mbajti seancë të jashtëzakonshme, me të vetmen pikë të rendit të ditës, zgjedhjen e Qeverisë së Republikës së Kosovës. 

Me 61 vota për, 24 kundër dhe 1 abstenim, Kuvendi i dha besimin qeverisë së re me kryeministër Avdullah Hotin.

Nënkryetari i Kuvendit, Kujtim Shala, i cili ishte i autorizuar për udhëheqje të kësaj seance nga kryetarja e kuvendit, dr. Vjosa Osmani, i dha fjalën kryetarit të GP të LDK-së, Arben Gashi, i cili fillimisht propozoi një minutë heshtje për dy minatorët që humbën jeten dje në minierën e Kishnicës.

Më pas, kandidati i propozuar për kryeministër nga koalicioni LDK-NISMA-AKK-Lista serbe, Avdullah Hoti, shpalosi para deputetëve ekspozenë programore të qeverisë së propozuar, duke theksuar prioritetet që do të ketë qeveria me të cilën do të udhëheqë. 

Duke falenderuar të gjithë aktorët kyç në luftën kundër pandemisë botërore Covid-19, Hoti u shprehu ngushëllime familjarëve të viktimave nga pandemia dhe potencoi se kjo do të jetë edhe njëra prej çështjeve kryesore me të cilat qeveria do të merret. 

Duke u rikthyer tek pika e rendit të ditës, Hoti falënderoi të gjithë ata që ia kanë dhënë besimin për të formuar Qeverinë e Kosovës dhe këtë e konsideroi si akt të vetëdijës së lartë politike. Kjo qeveri e re, sipas tij, do të ketë vetëm fuqi që buron nga Kushtetuta e Kosovës, duke mbrojtur kështu sovranitetin dhe integritetin e qytetarëve, si njësi këto të pandashme dhe të patjetërsueshme.

Lufta kundër pandemisë Covid-19 dhe rimëkëmbja ekonomike pas kësaj pandemie, u paraqiten si dy prioritetet e mënjëhershme, të institucionit që do të qeverisë me vendin, por pa lënë anash edhe prioritetet e tjera si forcimi i mëtutjeshëm i shtetit, luftimi i dukurive negative, zhvillimi ekonomik, rritja e punësimit, mos lejimi i shkëmbimit të territoreve, puna drejt integrimit evropian, krijimit të atmosferës së bashkëpunimit, respektimit të marrëveshjeve ndërkombëtare etj. 

Po ashtu, ai paraqiti edhe synimet e qeverisë së tij për avancimin e mëtutjeshëm të fushës së shëndetësisë, arsimit, ekonomisë, sigurisë dhe fushave të tjera me ndikim në jetën e qytetarëve. Ai tha gjithashtu se do të jenë mjaft të hapur për të bashkëpunuar me OJQ-të vendore dhe të huaja, asociacionet e bizneseve, shoqërinë civile në përgjithësi, si dhe mediat, të cilat, sipas tij, do të luajnë rol korrigjues në qeverisjen e ardhshme.

Po ashtu, Hoti theksoi se në qeverisjen e tij, interes jetik do të jetë dialogu me Serbinë dhe arritja e marrëveshjes midis dy shteteve, në respektim të Kushtetutës. 

Në fund të fjalimit kandidat për kryeministër nga koalicioni LDK-AAK-NISMA-Lista serbe dhe minoritetet e tjera, shpalosi kabinetin e tij qeveritar, në këtë përbërje: 

Avdullah Hoti – Kryeministër
Besnik Tahiri – Zëvendëskryeministër i parë
Driton Selmanaj – Zëvendëskryeministër;
Albulena Balaj-Zëvendëskryeministre
Goran Rakiq – Zëvendëskryeministër dhe Ministër i Pushtetit Lokal
Hykmete Bajrami – Ministre e Financave;
Anton Quni – Ministër i Mbrojtjes;
Vlora Dumoshi – Ministre e Kulturës, Rinisë dhe Sportit;
Agim Veliu – Ministër i Punëve të Brendshme;
Arban Abrashi – Ministër i Infrastrukturës
Armend Zemaj – Ministër i Shëndetësisë;
Besian Mustafa – Ministër i Bujqësisë, Pylltarisë dhe Zhvillimti Rural
Meliza Haradinaj – Ministre e Punëve të Jashtme dhe Diasporës
Selim Selimi – Ministër i Drejtësisë,
Blerim Kuçi – Ministër i Ekonomisë dhe Ambientit
Ramë Lika – Ministër i Arsimit dhe Shkencës
Skender Reçica – Ministër i Punës dhe Mirëqenies Sociale
Vesel Krasniqi – Ministër i Tregtisë dhe Industrisë
Dalibor Jevtiq – Ministër për Komunitete dhe Kthim
Enis Kervan – Ministër i Zhvillimit Rajonal.

Seanca, vazhdoi me fjalimet e përfaqësuesve nga grupet parlametare, të cilët paraqiten qëndrimet e tyre në raport me formimin e kësaj qeverie.

Kryetari i GP të Vetëvendosjes, Rexhep Selimi, thirrjen e kësaj seance e konsideroi si tentativë e grabitjes së vullnetit të qytetarëve të Kosovës, andaj iu referua si të padrejtë vendimit të Gjykatës Kushtetuese dhe formimit të qeverisë së re në këtë mënyrë. Sipas tij, kjo qeveri nuk përfaqëson shumicën e qytetarëve të Kosovës dhe si e tillë është ilegale, joligjitime dhe shkelëse e Kushtetutës. 

“Vetëm zgjedhjet e parakohshme do të ishin zgjidhja, sepse kështu do të respektohej rendi dhe Kushtetuta”, theksoi Selimi. 

Në anën tjetër, në emër të GP të LDK-së, kryetari Arben Gashi, duke vlerësuar situatën në të cilën ka kaluar Kosova kohëve të fundit, si proces të mundimshëm politik dhe kushtetues, konfirmoi përkrahjen për formimin e qeverisë së re, duke bërë thirrje për qeverisje të mirë dhe të suksesshme. 

Ai theksoi se nuk do të pranohet asnjë lloj arsyetimi nëse s’do të ketë një qeverisje të mirë dhe kërkoi bashkëpunim me të gjithë deputetët e Kuvendit për të proceduar tutje në dialogun me Serbinë.

Nga GP i PDK-së, deputeti Kadri Veseli shfaqi specifika rreth punës, sipas tij, jo të mirë të qeverisë së kaluar, duke e konsideruar një qeverisje të tillë si rrezikuese të egzistencës së Kosovës si shtet. 
Veseli e quajti qeverisjen Kurti si “dëm të pallogaritshëm politik, që i është bërë vendin nga ideologjia antiamerikane’’ dhe njëkohësisht shfaqi mosbesim edhe ndaj qeverisë Hoti, duke deklaruar që si grup parlamentar nuk do ta përkrah.

“Nuk jemi me VV-në. As nuk do të jemi me LDK-në. Nuk ka dhe nuk do të ketë kurrë pazare me mua dhe me PDK-në për pushtet”, tha ai.

Ndërsa, Teuta Haxhiu tha se GP AAK-PSD do të përkrah formimin e qeverisë së re. Sipas saj, duke e parë më se emergjente nevojën për zhvillim më të madh ekonomik, AAK-ja është bërë pjesë e këtij koalicioni, në të cilin do të bashkëqeverisin, duke e kthyer, sipas saj, vendin në binar. Po ashtu, në pika të shkurtra prezantoi politikat mbi të cilat do të punohet si koalicion dhe u zotua në mbikëqyrje të rreptë të punës së qeverisë.

Formimi i qeverisës së re u përkrah edhe nga GP i Listës serbe. Deputeti Igor Simiq, në fjalimin e tij tregoi mbështetje të plotë për kandidatin për kryeministër dhe kabinetin qeveritar të propozuar.

Po ashtu, nga GP NISMA-AKR, Endrit Shala potencoi përkrahjen e këtij grupi për përbërjen e qeverisë së re. 

“Jemi të bindur që programi qeverisës nga partnerët e koalicionit do të zbatohet me përpikëri”, tha ndër të tjera Shala.

Pas diskutimeve, kryesuesi i seancës, Shala, hodhi në votim përbërjen e propozuar të qeverisë. 

Nga 86 deputetë të pranishëm në sallë, në votim me ngritje dore, 61 prej tyre votuan për, 24 ishin kundër, ndërsa një deputet abstenoi. 

Pas votimit të suksesshëm të qeverisë, kryeministri i zgjedhur Hoti lexoi tekstin e betimit para deputetëve të pranishëm. 

Punimet u mbyllën pas fjalimit të tij falënderues dhe mirënjohës ndaj besimit të deputetëve për të dhe qeverinë që do të drejtojë. 

***

CEREMONIA E MARRJES SË DETYRËS NGA KRYEMINISTRI AVDULLAH HOTI MBAHET NESËR

 Zyra për Komunikim Publik-
Zyra e Kryeministrit të Kosovës dergoi sot këtë  FTESË PËR MEDIE:
Njoftohen përfaqësuesit e medieve se ceremonia e marrjes së detyrës nga Kryeministri i zgjedhur, Avdullah Hoti, do të mbahet nesër (E enjte, 04 qershor 2020) me fillim në ora 09:00.

 
VENDI: Ndërtesa e Qeverisë

Qeveria e Kosovës, plotësim vendimit për reciprocitetitin me Serbinë

by

-Qeveria në detyrë e Republikës së Kosovës, ndryshim dhe plotësim vendimit për zbatimin gradual të reciprocitetit si parim në marrëdhëniet me Serbinë/

PRISHTINË, 31 Maj 2020-Gazeta DIELLI/ Qeveria në detyrë e Republikës së Kosovës, ka zhvilluar mbledhje korresponduese (mbledhje elektronike), mbledhjen e 37-të, me kërkesën e Kryeministrit në detyrë, Albin Kurti, dhe në pajtim me Rregulloren e Punës së Qeverisë.
Vendimi i parë i miratuar nga Qeveria në detyrë e Kosovës ishte ndryshimi dhe plotësimi i vendimit për zbatimin gradual të reciprocitetit si parim në marrëdhëniet me Serbinë. Sipas plotësimeve dhe ndryshimeve të këtij vendimi, në marrëdhëniet tregtare me Serbinë, ndalohen dokumentet për produktet bujqësore dhe industriale që përdorin emra të vendeve që përmbajnë elemente të tjera në kundërshtim me Kushtetutën e Republikës së Kosovës, emrat e vendeve në Republikën e Kosovës, por pa emërtimin e shtetit, që nuk i referohen me Republika e Kosovës dhe përmbajnë çfarëdo elementi që mohon pavarësinë dhe sovranitetin e Republikës së Kosovës. Agjencia e Ushqimit dhe Veterinarisë obligohet të përdorë stemën dhe emrin Republika e Kosovës në certifikatat fitosanitare dhe veterinare, ndërsa operatorët ekonomik nga Serbia duhet të pajisen me leje hyrëse për secilin automjet të transportit të mallrave që hyn në Republikën e Kosovës nga Zyra Ndërlidhëse e Republikës së Kosovës në Serbi.
Vendimi mbetet në fuqi për afat të pacaktuar, ndërsa nuk mund të njihet si person juridik një shoqëri tregtare e themeluar sipas rregullave të autoriteteve në Serbi, por vetëm në pajtim me Ligjin për shoqëritë tregtare.

Me propozimin e Ministrisë së Drejtësisë, Qeveria ka miratuar vendimin me të cilin ka vazhduar afatin e paraparë për paraqitje të raportit nga Grupi i ekspertëve të pavarur për dizajnimin dhe përgatitjen e parimeve për reformën e Vetingut në sistemin e drejtësisë, deri më 10 korrik 2020.

\Ka marrë miratimin e kabinetit qeveritar edhe nisma për negocimin e Marrëveshjes së Kredisë në mes të Republikës së Kosovës, e përfaqësuar nga Ministria e Financave dhe Transfereve dhe Bashkimit Evropian, përfaqësuar nga Komisioni Evropian, lidhur me marrëveshjen “Asistenca Makrofinanciare për Kosovën”. Kredia kap vlerën prej 100 milionë eurove dhe do të ketë afat të kthimit deri në 15 vite.
Në vazhdim të mbledhjes është miratuar vendimi për shkarkimin e Bordit të Drejtorëve të Ndërmarrjes Publike, Kompania Rajonale e Ujësjellësit “Gjakova” Sh. A.
Qeveria në detyrë e Kosovës ka emëruar Bordin e Përkohshëm të Drejtorëve dhe ka marrë edhe vendime të tjera, bëhet e ditur në njoftimin e dërguar pas mesnate – në orën e parë të ditës së sotme.

Në 25 Mars 2020, Kuvendi i Kosovës pas shumë debateve e replikave në seancën plenare, më shumë se një orë para mesnate,  votoi me 82 vota pro,  32 kundër  e  1 abstenim mocionin e mosbesimit ndaj Qeverisë së Kosovës të kryeministrit Albin Kurti. Mocioni ishte kërkesë me nënshkrimet e 44 deputetëve, propozuar nga Grupi Parlamentar i Lidhjes Demokratike të Kosovës – partner i koalicionit qeverisës.

Në mbrëmjen e 28 Majit 2020 Gjykata Kushtetuese e Republikës së Kosovës njoftoi vendimin që i hapë rrugë rrugë zgjedhjes së qeverisë së re pa zgjedhje të reja, pasi shqyrtoi kërkesën e Lëvizjes Vetëvendosje të datës 30 prill 2020 për vlerësimin e kushtetutshmërisë së Dekretit të Presidentit të Republikës së Kosovës,  me të cilin Avdullah Hoti nga Lidhja Demokratike e Kosovës iu propozua Kuvendit të Republikës së Kosovës si kandidat për Kryeministër për të formuar Qeverinë e Republikës së Kosovës.

Në seancën e Kuvendit të Kosovës pasditen e 3 Shkurt 2020 u votua me 66 vota pro e 10 abstenime Qeveria e Republikës së Kosovës e Kryeministrit  Albin Kurti –  liderit të Lëvizjes Vetëvendosje në bashkëqeverisje me Lidhjen Demokratike të Kosovës, derisa opozita kishte braktisur sallën. Në zgjedhjet e parakohshme parlamentare të 6 Tetorit 2019, LVV dhe LDK, që ishin parti opozitare, dolën fituese – në vendin e parë e të dytë, ndërsa partia më e madhe e koalicionit qeverisës që ishte – PDK doli e treta.

Pas rrëzimit të Qeverisë së udhëhequr nga Vetëvendosje, LDK synon të krijojë Qeverinë e re në marrëveshje me AAK-në, Nismën e AKR-në, parti që ishin në koalicionin qeverisës me PDK-në./b.j/

Veprat e kompozitorëve të Kosovës, Premierë në Londër

by

–

Për shkak të pandemisë koncertet do të transmetohen drejtëpërdrejt në livestream/

PRISHTINË, 22 Maj 2020- Gazeta DIELLI/

Vepra e kompozitorëve kosovarë “Trio” e Kreshnik Aliçkaj dhe “Optio” e Memli Kelmendit, do të jenë veprat që do të interpretohen Premierë Botërorenga Willingdon House Music Londër. 24 kompozitorë nga mbarë bota u janë përgjigjur thirrjes së aplikimit WHM (RE) Inventions, New music, për shkak të numrit të madh të veprave selektive, koncerti do të mbahet në dy ditë.

Koncerti i parë, “Optio” e Memli Kelmendit do të interpretohet të Premten me 29 Maj në ora 19:30 ndërsa koncerti i dytë, vepra “Trio” e Kreshnik Aliçkaj do të interpretohet të Premten me 5 Qershor në ora 16 :30.

Për shkak të pandemisë globale, virusit COVID-19, koncertet do të transmetohen drejtëpërdrejt në livestream
http://www.facebook.com/willingdonhousemusic

Willingdon House Music është ansambël professional në përbërje nga; Flavia Hirte, Nicola Barbagli, Ellen Bundy and Max Mausen, të cilët njihen për interpretimin e veprave që nga periudha e barokut (intstrumente të barokut) deri tek muzika bashkëkohore.