-Kryeministri Haradinaj mori pjesë në përurimin e shtatores së Heroit të Kombit Shkëlzen Haradinaj dhe Obeliskut të 183 dëshmorëve nga Komuna e Pejës/

-Kryeministri Haradinaj falënderoi të gjithë që i kanë shërbyer atdheut, jo vetëm me luftë, por me çdo përpjekje tjetër/

PEJË, 16 Qershor 2019-Gazeta DIELLI/Kryeministri i Republikës së Kosovës, Ramush Haradinaj në 20 vjetorin e çlirimit të Komunës së Pejës dhe Deçanit, mori pjesë në përurimin e sheshit “Shkëlzen Haradinaj”, zbulimin e shtatores së Heroit të Kombit, Gjeneral Major Shkëlzen Haradinaj dhe Obeliskut të 183 dëshmorëve nga Komuna e Pejës.

Me këtë rast, kryeministri Haradinaj tha se, është një ditë e veçantë dhe një bashkim me një porosi të veçantë dhe veçantinë e kësaj dite nuk e bën vetëm Obelisku e shtatorja e heronjve tanë, por e bëjnë edhe të gjallët sot prezent.

Më tutje, kryeministri Haradinaj gjatë fjalës së tij, tha se, fati e deshi që gjatë luftës Shkëlzeni me qenë më afër me luftëtarët e Pejës e Dukagjinit sesa me të dhe Dautin. “Kur flasim për rrugën tonë për liri, nuk harrojmë kontributin e brezave të dijetarëve, luftëtarëve. Jemi në Pejën e Haxhi Zekës, e të gjithë patriotëve që i kanë shërbyer atdheut”, tha kryeministri Haradinaj, duke shtuar se kurrë nuk do të harrohen ata që kanë mbrojtur nderin e atdheut nëpër shekuj, dekada e vite.

Duke kujtuar sakrificën e të gjithë atyre që punuan për të mirën e vendit të vet, presidentit të ndjerë Ibrahim Rugova, kryeministri Haradinaj tha se, nuk do të harrohet çdo mund, angazhim dhe pikë gjaku i tyre.

“Nuk dëshirojmë liri, që e izolojmë atë. E kemi kërkuar lirinë që të jemi vetë të lirë, por edhe për t’iu bashkuar të lirëve, popujve të lirë dhe ata janë popujt euroatlantik, është Evropa, që synojmë të anëtarësohemi, të bëhemi anëtarë të BE-së”, tha kryeministri Haradinaj.

Kryeministri Haradinaj, në këtë manifestim tha se, shqiptarët duhet të angazhohen që të kenë bashkëpunim me të gjithë fqinjët, sepse të gjithë janë pjesë e familjes evropiane.

“Ne jemi krenarë që si Dukagjin e kemi dhënë provimin në kohë të vështira të luftërave çdo herë dhe, edhe kësaj here Dukagjini nuk e la vetëm Drenicën, nuk i la vetëm Jasharajt dhe patriotët e të gjithë brezave”, tha kryeministri Haradinaj, duke shtuar se nuk do ta lënë kurrë vetëm popullin e Kosovës dhe as nuk do t’i tradhtoj miqtë e aleatët tanë.

Kryeministri Hardinaj më tutje theksoi se Kosova është e angazhuar për një tregti të lirë dhe se nuk do t’i vendosë asnjëherë tarifa Shqipërisë dhe se vetëm fjalë janë ato që thonë se do të vendosen tarifat për Shqipërinë.

“Kemi pritur gjatë për të shkuar e ardhur, do t’i lehtësojmë barrierat që ekzistojnë sot”, tha kryeministri Haradinaj, duke shtuar se Kosova është e interesuar të jetojë edhe me Serbinë në fqinjësi të mirë, por të mos njohësh ekzistencën e Kosovës dhe t’ia kërkosh tregun, kjo duhet harruar.

Kryeministri tha se është nevoja të ecet përpara, por duhet nënshkruar një marrëveshje kornizë se për çfarë duhet marrë vesh dhe ajo më nuk është statusi i Kosovës, por janë marrëdhëniet bilaterale me respekt të ndërsjellë.

“Kjo është kohë e respektit të ndërsjellë, e njohjes së ndërsjellë”, tha kryeministri Haradinaj.

Kryeministri Haradinaj falënderoi të gjithë që i kanë shërbyer atdheut, jo vetëm me luftë, por me çdo përpjekje tjetër. 

Kryetari i Komunës së Pejës, Gazmend Muhaxheri, tha se përmendorja e Shkëlzenit dhe Obelisku i dëshmorëve të Pejës, janë jo vetëm obligim, por nder për qytetin dhe për gjeneratat që vijnë, janë obligim që të punohet në ndërtimin e shtetit të Kosovës, për një jetë më të mirë.

Nga një fjalë rasti para të pranishmëve në emër të Këshillit organizativ e ka mbajtur Bashkim Ramosaj, Kryetar i Deçanit, në emër të bashkëluftëtarëve foli Gëzim Ozdreni, ndërsa në emër të shoqatave të dala nga lufta, Safete Shala.Një fjalë rasti mbajti edhe ish-presidenti i Kroacisë, Stipe Mesiq. “Rroftë Kosova e lirë, rroftë populli i Kosovës, rroftë gjithë popullata shqiptare”, tha Mesiq./b.j/