Ish-kryeministri Sali Berisha kërkon dorëheqjen e kryeministrit Edi Rama. Në një reagim fill pas deklaratës refuzuese për armët kimike të Ramës, Berisha thekson se këtij Kryeministri që mashtroi botën, aleatët dhe shqiptarët nuk i beson më askush.

“Rinia shqiptare ngadhënjeu mbi mashtrimin e Edi Ramës. Ajo, me protestën e saj historike, mposhti njëriun që mashtroi botën, aleatët dhe shqiptarët!I bëj thirrje Edi Ramës, për hir të Zotit dhe të Shqipërisë, jep dorëheqjen në qoftë se të ka mbetur qoftë dhe një grimcëz përgjegjësi dhe dinjitet. Jep dorëheqjen se kush mbi këtë tokë, shqiptar apo i huaj, nuk të beson më!! Zoti e bekoftë rininë e kombit tonë, nëntorin e bijëve e shndërroi në dhjetorin e etërve të tyre!” shkruan Berisha në fb.

Kryeministri i Shqipërisë Edi Rama deklaroi më herët se Shqipëria e ka të pamundur që të përfshihet në operacionin e shkatërrimit të lëndëve kimike siriane. Në një deklaratë disa minutëshe të ndjekur, Rama shprehu qëndrimin e tij, arsyet se përse e çuan në këtë vendim, ndërsa sulmoi ata që tentuan të hedhin baltë mbi procesin e diskutimeve me aleatët, duke e akuzuar atë se kishte mashtruar shqiptarët dhe se e kishte marrë tashmë vendimin për sjelljen e këtyre lëndëve në Shqipëri.

Basha: Rama problemi i madh i vendit, duhet tu kërkonte ndjesë qytetarëve

Një veprim krejtësisht të imponuar nga revolta e qytetarëve shqiptarë. Kështu e ka vlerësuar lideri i opozitës , Lulzim Basha, refuzimin e armëve kimike të Sirisë nga Kryeministri Rama. Basha tha se opozita ndihet pjesë e gëzimit mbarëpopullor, ndërsa kujtoi se opozita bëri detyrën e saj në shërbim të qytetarëve me dorëzimin e kërkesës për referendum.

“Pak minuta më përpara gjithë populli shqiptar i dha fund alarmit duke detyruar Edi Ramën për bashkimin e jo-së së mekur të tij me jo-në e madhe të popullit kundër ardhjes së armëve kimike në vend. PD dhe mbarë opozita shqiptare ndihen pjesë e gëzimit të ligjshëm mbarëpopullor, sepse ishte pa asnjë ekuivok në krahun e qytetarëve dhe bëri detyrën e saj për të demaskuar gënjeshtrën flagrante dhe mashtrimet e Kryeministrit, duke dorëzuar kërkesën për referendum popullor. Si qytetar u shpreh mirënjohjen të gjithë të rinjve dhe të rejave, qytetarëve shqiptarë që u bënë barrikadë për Kryeministrin në paligjshmërinë e tij”tha ai.

Basha akuzoi kryeministrin Rama se tentoi të luante me shqiptarët për interesa të ngushta personale. Kreu i PD-së theksoi se Rama nuk u konsultua më askënd, nuk bëri transparencë me askënd, pasi kërkonte të fitonte kapital politik me armët kimike, të cilin po e humb me shpejtësi në Shqipëri.

“Një problem u zgjidh, një tjetër ka dalë, ai është kryeministri, Edi Rama. Ai u ofrua jo si Kryeministër për shkatërrimin e armëve kimike, por si hileqar, çifligar, për interesa të ngushta meskine. Nëse do ishte treguar ndryshe do ishte treguar serioz me aleatët, duhet të ishte konsultuar me Presidetin, Kuvendin, aleatët e tij pa qenë nevoja ta fuste në siklet aleatin tonë me garancitë e tij arbitrare. E mbajti për vete për ta kapitalizuar për vete, e gënjeu mendja për shumë gjëra. Rama gënjeu publikun se armët kimike ishin çështje e NATO-s, ai mbeti i vetëm në rrethin e gënjeshtrave të tij, i pabesueshëm për publikun shqiptar dhe aleatët. Sot në vend se tu kërkojë ndjesë qytetarëve dhe aletatit tonë më të madh, ka kurajon të merret me sulmet ndaj opozitës” theksoi Basha.

Në përgjigje të akuzave të Kryeministrit Rama lidhur me raportet me SHBA, Basha akuzoi vetë Kryeministrin si përgjegjës për këtë ndodhi të pakëndshme me aleatin tonë strategjik.

“Rama ka cënuar besimin e qytetarëve shqiptarë dhe besimin e SHBA. Për PD marërdhëniet me SHBA janë dhe do jenë kyçe. Qeveria demokratike ka bashkëpunuar si një aleate e ngushtë për një mbarë çështjesh me rëndësi globale, të karakterit politik dhe sigurisë. Aletatët tanë e njohin shumë mirë përkushtimin e plotë të Shqipërisë nën drejtimin tonë” deklaroi kryetari i PD.

E ndërkaq shefi i opozitës ka siguruar qytetarët se do të vazhdojë të kërkoj transparencë për këtë çështje derisa Kryeministri të marrë përgjegjësinë e plotë të papërgjegjshmërisë së tij.(Foto:Arkiv)