Foto Gazeta DIELLI-Behlul Jashari: Sheshi Skënderbej në Prishtinë – Teatri Kombëtar i Kosovës/
-“Niketë Dardani” i ndahet Seniha Spahiut dhe Sevime Gjinalit, ndërsa çmimi “Bekim Fehmiu” Bislim Muçajt/
-Çmimet e muzikës ndahen në 8 qershor, ndërsa çmimet nga fusha e kinematografisë në 10 qershor/
PRISHTINË, 4 Qershor 2016-B.Jashari/ Në Kosovë, profesoreshat e muzikës Seniha Spahiu dhe Sevime Gjinali janë lauretae të Çmimit për vepër Jetësore për muzikë “Niketë Dardani” për vitin 2015, ndërsa çmimi për Vepër Jetësore në fushën e kinematografisë “Bekim Fehmiu” i ndahet aktorit Bislim Muçaj.
Me çmimet vjetore në fushën e muzikës janë nderuar veprat e kompozitorëve: Dafina Zeqiri- Nushi për “Fantazia e Fuga” për duo pianistik, Mendi Mengjiqi për “Suitë shqiptare për orkestër harqesh”, Kreshnik Aliçkaj për “Koncert për violinë e piano e orkestër” si dhe Drinor Zymberi për “Cantata Metamorphosis” për solistë, kor e orkestër.
Ndërsa, çmimi vjetor për kinematografi i është ndarë Produktorit (Producentit) të filmit “Shok”, Eshref Durmishit.Juritë profesionale për çmimet për Vepër Jetësore në fushat e Muzikës “Niketë Dardani” respektivisht Kinematografi “Bekim Fehmiu” kanë qenë në përbërje të Akademik Zeqirja Ballata, kompozitorit Valton Beqiri dhe Baki Jasharit, kompozitor dhe dirigjent.
Ndërsa juria profesionale që ka vlerësuar çmimet për Vepër Jetësore “Bekim Fehmiu” për Kinematografi, dhe çmimet vjetore ka qenë në përbërje të: Xhevat Qorraj, aktor, Isa Qosja, regjisor, Menduh Nushi, kameraman, Igballe Qena, aktore dhe Jahi Jahiu, dramaturg.
Vlerësimet e jurive profesionale për çmimet që ndahen në fushat e muzikës, respektivisht kinematografisë, bëhen të ditura nga Ministria e Kulturës, Rinisë e Sportit e Kosovës,
Në një solemnitet në këtë Ministri, çmimet e muzikës ndahen në 8 qershor, ndërsa çmimet nga fusha e kinematografisë do të ndahen në 10 qershor.