Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

KOSOVË, DASHURIA IME E PARË

by

Nga Rrustem Geci,Dortmund */
Letërsia i përket atij që krijon, ndërsa historia atij që jeton. Jeta njerëzore përherë ka nevojë të çlirohet, të ndërtoj, dhe me çaste të dehet. Polibi, historinë e quan shkollë të së vërtetës, shkollë që parapërgatit dhe përgatit shtetin. Krijimtaria poetike, dhe ajo historike e Prof.dr. Sabile Keçmezi- Basha, është e gjerë dhe e thellë. Në poezi Sabilja rrëmon të bukurën, të magjishmen, shpirtin e përgjakur të dhimbjes, ndërsa në histori, ajo mëton kuptimin e luftave dhe të betejave, dhe hapin e pandalshëm të kohërave.
Është lëngu i thellësive që i pjek drithërat, që i lulëzon pemët, që zambakët i bënë me lule, dhe gurin e shndërron në trëndëfil. Gjaku i shkruar i poetëve dhe shkencëtarëve vete tek gjithsecili njeri, i heshtur dhe mizor. Edhe njeriut, edhe historisë, jo rrallë i shkyhen këpucët, i vjetrohen rrobat, e kaplon trishtimi. Udhët në jetë janë të pafund, por mbërritjet herë-herë vonohen, lexoj në një petale të lagur peme. Historia s´ guxon të harron, shprehet Sabilja. Janë shumë pikat e gjakut që na thërrasin t´i lexojmë, ti trajtojmë dhe ti vejmë në libra. Harresa bën dëm si vërshimet, edhepse ne me të jemi të afërm.
Sabile Keçmezi – Basha, është autore e 17 veprave shkencore. 21 veprave letrare, dhe 300 publikimeve në gjini të ndryshme, 34 fejtone, dhe gjithë vepra e saj mund të përmbledhet në në 38 libra, me rreth 10 mijë faqe tekst të shkruar. Sabile Keçmezi-Basha u lind në vitin 1954, në Koretin të Dardanës. Shkollën fillore e kreu në vendlindje, ndërsa të mesmen në Dardanë.
Shkrimtarja, Shkencëtarja dhe publicistja Sabile Keçmezi-Basha, Fakultetin e Shkencave Politike e kreu në Beograd, ndërsa Magjistroi dhe Doktoroi në Shkencat Historike, të Universitetit të Prishtinës. Sabile Keçmezi – Basha, është Shkencëtarja, dhe Shkrimtarja më prodhimtare në Kosovë.

Veprat shkencore dhe letrare të Sabiles, janë kreshta të një shpirti krijues, dhe me shumë talent. Në peisazhin e veprave të Sabile Keçmezit Bashës, lexuesi has në të gjitha ngjyrat e ylberit. Vreshta poetike e Sabile Keçmezit-Basha, është përplotë veshul të të gjitha kohërave. Ah, kjo ëndërr e çastit / në mungesë të letrës / ngeli dhe pa bar / ngeli dhe pa fushë të blertë …Poezia e Sabile Keçmezit-Basha, është e ardhë nga terrinat e shpirtit, dhe nga dallgët shpërthyese të përroit të jetës.

Në këtë fillim shekulli, shprehet poetja Keçmezi- Basha, mbërritja mbërriti e munduar dhe në fytyrë na erdhi pak me ca pikëla. Rruste, poezisë jo rralë sytë i mbushen me lot e revoltë të paparë. Bota poetike por edhe ajo shkencore e Sabile Keçmezit-Basha, është e gjerë dhe e thellë. Dy botët e saj, poetikja, dhe historikja, rendin në një qerre, historia tek betejat, dhe poezia tek e bukura, sublimja dhe shpirtërorja.

S´dua të jem peng i së tashmes së shkaparderdhur, Poezia dhe historia janë në ADN e gjakut tim, shprehet Sabile Keçmezi-Basha. Në kraharorin tim ( shprehet shkrimtarja ) , bëhet luftë e madhe, luftë për lulen që s´dinë ta mbajnë veten, dhe luftë për lulet që vyshken përpara se të lulëzojë. Unë rrëfen Sabilja, detin e shikoj edhe nga bregu i detit, por, bregun e shikoj edhe nga thellësia e detit. Në këtë mynyrë, poezia tek unë hapur i ka të gjitha dritaret. Me poezinë shprehet shkrimtarja Basha, unë jam e vet-përgjakura e vargjeve të mia. Ndryshe bima poetike, bima që e krijoj unë s´do kishte as rrënjë, as trung dhe as degë.

Rruste, me historinë mua më bashkon qëndresa, qëllimi, kryengritjet, burrrëria e luftave dhe betejat të pareshtura të popullit tim. Letrat e pabotuar të kryengritjeve, të luftave dhe të aspiratave të popullit tonë për mbijetesë, ( që flejnë ende nëpër arkiva të ndryshme të botës) janë drama që zhvillohen në kraharorin tim. I nderuar, edhe historisë i shkyhen këpucët, i vjetërohen rrobat, dhe paqja herë- herë, atë e bën të mërzitet. Historia shprehet Sabile Keçmezi – Basha, vazhdimisht armatoset, dhe vet-armatoset, duke marr në dorë vet flamurin në luftat globale.
Ajrgjaku i jetës sime është poetik. Njëherë në kopsht ( kur isha moshë e re ) desha ta prek një zog, por zogu u tremb, duke më thënë, mos m´prek, prekja jote më le gjurmë. Unë e habitur, u skuqa nga përgjigjja e zogut krah shkruar. Prandaj, që nga ai çast rinor, natyra mbetet poetika ime. Lulet femra dhe lulet meshkuj unë i pëlqej shumë. Motivet me ushtarë të historisë, dhe me prijës të saj, më stërngarkojnë të rrëshqas Kutia e Pandorës nga anija e dhimbjes, dhe nga hamaj të hamallosur.

Prof. dr. Sabile Keçmezi-Basha është veprimtare e palodhur e çështjes kombëtare. Deputete në legjislacionin e parë të Parlamentit të Kosovës. Ambasadore e Paqes, dhe anëtare e Akademisë Evropiane të Arteve. Anëtare e Këshillit të Shkencës në MASHT, anëtare e kryesive të shumë shoqatave shkencore e letrare, anëtare e disa redaksive dhe revistave. .

Prof. dr. Sabile Keçmezi – Basha, është e vlerësuar me shumë çmime të para dhe mirënjohje nga institucione e shoqata të ndryshme. Sabilje Keçmezi- Basha, është anëtare e Shoqatës së Shkrimtarëve në Itali. Ajo deri më tani ka marrë pjesë në mbi 70 tubime shkencore në vend dhe jashtë vendit. Shumë vepra të Prof. dr. Sabile Keçmezit – Basha, janë përkthyer në disa gjuhë të huaja. Figura krijuese e Prof. dr. Sabile Keçmezi Basha me 38 vepra, 300 publikime, 38 fejtone të botuara, dhe me rreth 10 mijë faqe tekst të shkruar, Prof Sabile Keçmezi-Basha, lirisht mund të quhet, krijuesja, Nder i Kombit.
Kontributi letrar dhe shkencor i Prof. dr. Sabile Keçmezit- Basha është kreshtë vullkanore. Autorja e 38 veprave letrare dhe shkencore është sukses i talentit dhe pasionit të saj për artin dhe shkencën. Unë kujtoj se nuk ka një të parë në Kosovë, që të mos krenohet me krijimtarinë poetike dhe shkencore, të Prof.dr. Sabile Keçmezit – Basha. Veprat e Sabiles, „Këmishë e Atdheut“, „Metafora“, „Kujtesën e ka kapur skleroza“, „Natyra pa kornizë“, „Malli për Itakën“, „Kodi i pritjes“, „Lëkura e grisur“,…dhe dhjetra vepra të tjera, janë kështjella të palëkundura përballë erërave të kohës. Mungesa e disa pjesëve të mohuar dhe të pashkruara të historisë sonë, shprehet shkrimtarja dhe shkencëtaraja Sabile Keçmezi-Basha, kraharorin ma bën të digjet dhe të tymojë. Itakë, gërsheti im i përgjakur, më le të dua, më le të përqafoj, tek ti kam një pik të gjakut tim, të stërgjyshërve të mi të mohuar. Suksese, dhe jetë të gjatë autores!
*(Ne Foto: Prof.dr. Sabile Keçmezi- Basha)

KOSOVË: Zgjedhja e kryetarit te parlamentit – jokushtetuese

by

Gjykata kushtetuese e shpalli jokushtetuese zgjedhjen e kryetarit të Parlamentit të Kosovës.
Gjykata Kushtetuese e Kosovës e shpalli të pavlefshme zgjedhjen e Isa Mustafës si kryetar i Parlamentit të Kosovës në seancën e 17 korrikut.
Ky vendim vjen një ditë pasi që partitë politike që morën pjesë në zgjedhjet parlamentare të tetë qershorit në Kosovë u përballën në Gjykatën Kushtetuese në një seancë dëgjimore lidhur me kërkesën e Partisë Demokratike të Kosovës për “vlerësimin e kushtetutshmërisë së vendimit për zgjedhjen e kryetarit parlamentit në seancën e 17 korrikut”.
Në një njoftim të gjykatës Kushtetuese thuhet se “mbledhja dhe procedura e ndjekur pas pezullimit të seancës së parë të Parlamentit më 17 korrik të këtij viti nga kryesuesja e seancës, kanë shkelur nenet e Kushtetutës dhe pjesë të Rregullores së punës së parlamentit”.
Sipas, gjykatës Kushtetuese zgjedhja e kryetarit të Parlamentit dhe nënkryetarëve është kundër kushtetues, si për nga procedura e ndjekur edhe për nga përmbajtja, pasi nuk ishte grupi më i madh parlamentar ai që propozoi Kryetarin e Parlamentit. “Seanca e Parlamentit që ka filluar më 17 korrik 2014, nuk është realizuar plotësisht, konkretisht nuk janë zgjedhur Kryetari dhe nënkryetarët e Kuvendit. Rrjedhimisht, Parlamenti duhet ta përfundojë seancën konstitutive duke zgjedhur Kryetarin dhe nënkryetarët në pajtim me Kushtetutën dhe në pajtim me këtë Aktgjykim”, thuhet në njoftimin e Gjykatës Kushtetuese.
Partia Demokratike e Kosovës e përshëndeti vendimin e Gjykatës Kushtetuese i cili sipas tyre ishte i drejte dhe që buron nga Kushtetuta e Kosovës dhe nga legjitimiteti i votës së qytetarëve të vendit.
Ndërsa, Koalicioni LDK-AAK-NISMA thotë se e ka marrë parasysh vendimin e gjykatës dhe se është në pritje të publikimit të tekstit përfundimtar. Ky koalicion shprehet i bindur që e “drejta për kandidim i është njohur dhe në këtë mënyrë është hapë dera e vetme për krijim të institucioneve të reja”, thuhet në reagimin e Koalicionit LDK-AAK-NISMA.
Njohës të çështjeve juridike thonë ndërkaq se vendimi i gjykatës e ka sfiduar edhe më shumë krijimin e institucioneve të reja. Ata thonë se me këtë vendim zgjedhja e kryetarit të Parlamentit i takon partisë Demokratike e cila ndërkaq nuk i ka numrat e nevojshëm për zgjedhjen e tij. Ata thonë se për krijimin e institucioneve ose duhet një marrëveshje politike ndërmjet partive politike për të ndarë pushtetin ose të shkohet në zgjedhje të jashtëzakonshme.(VOA)

Kosovë, ndahet nga jeta akademiku Besim Bokshi

by

Presidentja Jahjaga: Vepra e Besim Bokshit do të jetoj ndër mote/
PRISHTINË, 17 Gusht /-Shuhet në moshën 83 vjeçare akademiku Besim Bokshi, i vlerësuar si njëri nga gjuhëtarët më të shquar të Kosovës dhe të shkencës së albanologjisë në përgjithësi.
Besim Bokshi lindi në Gjakovë më 12.XI.1930. Gjashtë klasë të mësimit fillor i kreu në Tiranë, për të vazhduar pastaj shkollimin në Gjakovë, Prishtinë dhe në Beograd. Ka qenë anëtar i komisionit për konkluzione të Konsultës Gjuhësore të Prishtinës më 1968 dhe delegat në Kongresin e Drejtshkrimit të Gjuhës Shqipe në Tiranë më 1973.
Ka qenë deputet në Dhomën për Arsim në Kuvendin Federativ më 1967-69. Në zgjedhjet kosovare parlamentare e presidenciale të vitit 1992, që ishin pjesë e lëvizjes për liri, pavarësi e demokraci, është zgjedhur deputet i Kuvendit të Kosovës. Në vitet 1993-96 ka qenë kryetar i Partisë Socialdemokrate të Kosovës.
Ishte anëtar i Lidhjes së Shkrimtarëve të Kosovës. Anëtar korrespondent i Akademisë së Shkencave dhe të Arteve të Kosovës është zgjedhur më 1991, ndërsa nga viti 1996 ka qenë anëtar i rregullt i kësaj Akademie. Në vitin 2002 u zgjodh nënkryetar, ndërsa në vitet 2008-2011 ishte kryetar i Akademisë së Shkencave dhe të Arteve të Kosovës.
Kryetarja e Komunës së Gjakovës, Mimoza Kusari Lila, në një telegram ngushëllimi familjes është shprehur se, “me hidhërim të thellë morëm lajmin për ndarjen nga jeta të Akademik Besim Bokshit, të bashkëshortit, prindit, vëllait, gjyshit dhe profesorit të çmuar dhe të respektuar gjerësisht nga kolegët, nxënësit dhe studentët e shumë brezave, të cilëve ua mësoi gjuhën e bukur shqipe, letërsinë dhe artin shqiptar, ashtu siç dinte vetëm i madhi Besim Bokshi, poeti, profesori, gjuhëtari, Akademiku ynë. Ai me jetën dhe veprën e tij na bëri të krenohemi se ishim bashkëvendës të tij. Me dijen e thellë në fushën e gjuhës, me krijimtarinë dhe veprat gjuhësore, profesor Besimi dha kontributin e vet të çmuar në pasurimin e shkencës së albanologjisë”

Jahjaga: Vepra e Besim Bokshit do të jetoj ndër mote
Presidentja e Republikës së Kosovës, Atifete Jahjaga, ngushëlloi sot familjen Bokshi, me rastin e vdekjes së më të dashurit të tyre, akademik Besim Bokshi.
“Me dhembje e morëm lajmin për ndarjen nga jeta të më të dashurit tuaj, poetit e intelektualit të shquar, ish-Kryetarit të Akademisë së Shkencave dhe të Arteve të Kosovës, akademik Besim Bokshi”, thuhet në telegram.
Presidentja Jahjaga shprehet se, humbja e akademik Besim Bokshit, nuk është humbje vetëm për familjen Bokshi, por është humbje e madhe për kulturën, gjuhën shqipe, është humbje e madhe për Akademinë e Shkencave dhe të Arteve të Kosovës dhe për Kosovën në përgjithësi.
“Akademik Bokshi do të mbahet në mend për punën e tij dhe kontributin e vazhdueshëm për krijimtarinë dhe veprat gjuhësore, për kontributin e çmuar në fushën e albanologjisë si dhe për angazhimin dhe punën e tij për Akademinë e Shkencave dhe të Arteve”, thekson Jahjaga. Sipas saj, vepra dhe krijimtaria e akademik Besim Bokshit do të jetoje ndër mote duke shërbyer si motivim për studiuesit e rinj dhe për intelektualët e Kosovës

Kosovë, krerët fetarë takojnë komandantin e KFOR-it

by

PRISHTINË, 16 Gusht-Krerët fetarë të Kosovës, ai mysliman, Myftiu Naim Tërnava, ortodoks, Peshkopi Teodosje e katolik, Imzot Dodë Gjergji janë takuar sot në Prishtinë me komandantin e KFOR-it, Gjeneralmajor Salvatore Farina, në kampin “Film City”.
Në një komunikatë të KFOR-it thuhet se krerët fetarë kanë dënuar fuqimisht përdorimin e emrit të Perëndisë për të kryer vepër penale kundër njerëzimit.
“Fetë kurrë nuk duhet të justifikojnë urrejtjen dhe dhunën, Perëndia është paqja. Pas debatit të ditëve të fundit rreth ekstremizmit dhe radikalizmit fetar, ne duam të theksojmë se prania e shumë komuniteteve fetare në rajon është një burim për shoqërinë tonë. Bashkësitë fetare janë miq të arsimimit shpirtëror që mësojnë të jetohet në paqe dhe në respektimin e dallimeve. U bëjmë thirrje të gjithë besimtarëve tanë që të distancohen nga çdo formë e ekstremizmit ose dhunës për të mbështetur paqen për një të ardhme më të mirë për familjet tona dhe fëmijët tanë”, thuhet në komunikatë.( B.Jashari)

KOSOVE- KQZ publikoi rezultatet përfundimtare të zgjedhjeve parlamentare 2014

by

Komisioni Qendror i Zgjedhjeve ka shpallur rezultatet përfundimtare të zgjedhjeve parlamentare të 8 qershorit.Sipas rezultateve të KQZ-së, PDK-ja ka marr 30. 38 për qind, LDK-ja 25. 24 për qind Lëvizja Vetëvendosje 13. 59 për qind, AAK 9. 54 për qind, Nisma 5.15 për qind dhe SL 5. 22 për qind.
Ndërsa, në bazë të rezultateve përfundimtare, PDK–ja do të ketë 37 deputetë, LDK-ja 30 deputetë, VV-ja 16 deputetë, AKK-ja 11 deputetë Srpska Lista 9 deputetë dhe Nisma 6 deputetë.
PDK 222 mijë e 181 vota, LDK 184 mijë e 596, VV 99 mijë e 397, AAK 69 mijë e 793, LISTA SERSPKA 38 mijë e 199, Nisma 37 mijë e 681 dhe AKR 34 mijë e 170 vota.
Partitë tjera të minoriteteve i kanë siguruar gjithsejt 11 deputetë.