Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosovë-Kuvendi miraton rezolutë për vlerat e UÇK-së

by

-Kuvendi i Republikës së Kosovës zotohet që brenda 6 muajve do ta miratojë Ligjin për mbrojtjen e vlerave të Ushtrisë Çlirimtare të Kosovës dhe luftës së saj për çlirim/

1-kuvendi

-“Debat parlamentar për vlerat e UÇK-së në raport me situatën e krijuar”, ishte pika e vetme e axhendës së Kuvendit të Kosovës në seancën e jashtëzakonshme të zhvilluar dje, të ftuar me urgjencë, me kërkesën e mbi 40 deputetëve, pas vërtetimit nga Gjykata e Apelit të Aktgjykimit të Gjykatës Themelore të Mitrovicës në rastin e njohur si “Drenica 2”, për 10 të akuzuarit që ishin komandantë e pjesëtarë të tjerë të luftës çlirimtare të popullit të Kosovës/

PRISHTINË, 28 Tetor 2016-Gazeta DIELLI-Behlul Jashari/ Kuvendi i Kosovës  në një rezolutë që miratoi sot paralajmëron se brenda gjashtë muajve do nxjerr Ligjin për mbrojtjen e vlerave të Ushtrisë Çlirimtare të Kosovës dhe luftës së saj për liri dhe pavarësi.

“Debat parlamentar për vlerat e UÇK-së në raport me situatën e krijuar”, ishte pika e vetme e axhendës së Kuvendit të Kosovës në seancën e jashtëzakonshme të zhvilluar dje, të ftuar me urgjencë, me kërkesën e mbi 40 deputetëve, pas vërtetimit nga Gjykata e Apelit të Aktgjykimit të Gjykatës Themelore të Mitrovicës në rastin e njohur si “Drenica 2”, për 10 të akuzuarit që ishin komandantë e pjesëtarë të tjerë të luftës çlirimtare të popullit të Kosovës.Seanca e jashtëzakonshme e Kuvendit të Kosovës është zhvilluar me shumë debate dhe replika pozitë-opozitë, me akuza e kundërakuza të shprehura edhe me fjalë të ashpëra dhe deri afër përplasjes fizike në një moment.Duke përmbyllur seancën mbrëmë kryeparlamentari Kadri Veseli paralajmëroi një seancë të veçantë plenare në muajin nëntor për të trajtuar çështjen e shprehjeve parlamentare që mund dhe nuk mund të përdoren në Kuvendin e Kosovës.Pas votimit të rezolutës, sot Kuvendi i Kosovës zhvillon edhe një seancë tjetër, të rregullt, ku një nga 17 pikat e axhendës është Propozim-Deklarata e Kuvendit të Republikës së Kosovës adresuar Unionit Europian për liberalizimin e vizave, e cila ndërlidhet me demarkacionin e kufirit me Malin e Zi dhe edhe pas takimeve të zhvilluara nuk është harmonizuar plotësisht nga subjektet politike parlamentare të pozitës dhe opozitës.

Rezolutë për lirimin nga Serbia të drejtorit të Policisë të Mitrovicës

by

Kuvendi i Kosovës, rezolutë për lirimin nga arresti në Serbi të drejtorit të Policisë së Mitrovicës/

1-kuvendi-i-kosoves

-Pika 1 e Rezolutes: Kuvendi i Republikës së Kosovës kërkon lirimin e menjëhershëm të z. Nehat Thaçi, epror Policisë së Republikës së Kosovës/

-“Ministria e Drejtësisë kundërshton çdo formë të juridiksionit të Serbisë, duke përfshirë bazën e parimit të juridiksionit universal, ku akuzohen shtetas të Republikës së Kosovës për vepra të kryera në Kosovë”, thekson ministria kosovare duke njoftuar se për këtë i është dërguar notë verbale Ministrisë së Drejtësisë së Serbisë/

1-drejtori-thaciPRISHTINË, 12 Tetor 2016-Gazeta DIELLI-B.Jashari/ Kuvendi i Kosovës sot në vazhdimin e seancës së jashtëzakonshme, të nisur dje pasdite, të kërkuar me nënshkrimet e mbi 40 deputetëve, pas debatit, miratoi me shumicë votash Rezolutë ku kërkohet lirimi i menjëhershëm i drejtorit të Policisë së Kosovës për rajonin e Mitrovicës, Nehat Thaçi, i arrestuar nga ana e autoriteteve të Serbisë.Pas debatit, të djeshëm deputetët u dakorduan që nëpërmjet përfaqësuesëve të grupeve parlamentare të harmonizohet një tekst i Rezolutës, por sot në votim dolën dy propozim rezoluta, njëri i koalicionit qeverisës, i cili kaloi, dhe tjetri i opozitës që nuk mori votat e mjaftueshme, ndërsa kërkonte pezullimin e dialogut Prishtinë-Beograd deri në lirimin e zyrtarit të policisë kosovare, Thaçit. Ministria kosovare e Drejtësisë ka deklaruar se ka ndërmarrë të gjitha veprimet në kompetencën e vet kundër arrestimit të nënkolonel Thaçi, duke theksuar se ai është ndaluar padrejtësisht nga organet serbe në 29 shtator 2016 në territorin e Serbisë, ku kishte hyrë në udhetim transit drejt një shteti tjetër.

“Ministria e Drejtësisë kundërshton çdo formë të juridiksionit të Serbisë, duke përfshirë bazën e parimit të juridiksionit universal, ku akuzohen shtetas të Republikës së Kosovës për vepra të kryera në Kosovë”, thekson ministria kosovare duke njoftuar se për këtë i është dërguar notë verbale Ministrisë së Drejtësisë së Serbisë me kërkesën për lirimin e menjëhershëm të nënkolonel Thaçit.

Nota është dërguar nga Ministria e Drejtësisë përmes Ministrisë së Punëve të Jashtme dhe zyrës ndërlidhëse të Republikës së Kosovës në Beograd. Kjo është nota e parë që dërgohet në Beograd drejtpërdrejtë përmes kanaleve diplomatike pa kaluar nëpërmjet Përfaqësuesit Special të Bashkimit Evropian në Kosovë.

REZOLUTA

Deputetët e Kuvendit tw Kosovws sot  me shumicë votash përkrahen projektrezolutën e propozuar nga PDK, LDK dhe 6+, e cila ka këtë përmbajtje:

  1. Kuvendi i Republikës së Kosovës kërkon lirimin e menjëhershëm të z. Nehat Thaçi, epror Policisë së Republikës së Kosovës.
  2. Bashkimi Evropian, si ndërmjetësues dhe garantues i dialogut në mes të Kosovës dhe Serbisë, përmes mekanizmave të saj, të ndërhyjë te Qeveria e Serbisë për lirimin e eprorit, Nehat Thaçit.
  3. Ç’do komunikim i Qeverisë së Republikës së Kosovës për rastin e arrestimit të z. NehatThaçi, deri në lirimin e tij, të bëhet vetëm nëpërmjet Zyrës së Mogherinit, si përfaqësuese e lartë e BE-së.
  4. Qeveria e Republikës së Kosovës t’i bëjë me dije BE-së se, veprimet e tilla të Serbisë në raport me institucionet dhe qytetarët e Kosovës, po e rrezikojnë thellë përmirësimin e marrëdhënieve Kosovë-Serbi, si dhe dialogu në mes dy vendeve duke na detyruar në reciprocitet.
  5. Misioni i EULEX-it të deklarohet për rastin e z. Thaçi, njëherësh kërkojmë angazhim të drejtpërdrejtë si mision me kompetenca të veçanta.
  6. Kërkojmë nga Interpoli që, Policia e Kosovës të bëhet pjesë e kësaj organizate, njëherësh insistojmë që fletarrestet politike të shpallura nga Serbia, të largohen nga sistemi i tyre ligjor.

KOMUNIKATA E MD: MINISTRIA E DREJTËSISË KA REAGUAR PËR RASTIN E ARRESTIMIT TË NËNKOLONEL NEHAT THAQI

Prishtinë, 11 Tetor 2016 – Ministria e Drejtësisë kundërshton çdo formë të juridiksionit të Serbisë, duke përfshirë bazën e parimit të juridiksionit universal, ku akuzohen shtetas të Republikës së Kosovës për vepra të kryera në Kosovë.Ministria e Drejtësisë ka ndërmarrë të gjitha veprimet në kompetencën e vet, kundër arrestimit të nënkolonel Nehat Thaqi, të ndaluar padrejtësisht nga organet serbe më 29 Shtator 2016 në territorin e Serbisë.

Nënkolonel Thaqi është ndaluar mbi bazën e akuzës se ka kryer veprën penale të terrorizmit në Korrik të vitit 1999 si dhe në dhjetor 1999 dhe janar 2000 në Lipjan. Akuza daton nga viti 2010 por nuk është komunikuar asnjëherë te organet e Republikës së Kosovës.

Më 3 tetor 2016, Ministria për Punë të Jashtme, Ministria për Punë të Brendshme dhe Ministria e Drejtësisë, nën bashkërendimin e Zyrës së Zëvendëskryeministrit të Parë, dhe në bashkëpunim me Zyrën e Kryeministrit, janë dakorduar për të dërguar notë formale drejtuar Ministrisë së Drejtësisë së Serbisë me kërkesën për lirimin e menjëhershëm të nënkolonel Thaqit.

Në shkresë është argumentuar se Serbia nuk ka juridiksion mbi veprat penale kinse të kryera në territorin e Republikës së Kosovës. Juridiksioni i Serbisë mbi Kosovës është shuar më 10 qershor 1999, kur Kombet e Bashkuara kanë marrë përsipër administrimin e Kosovës. Qe nga shpallja e pavarësisë së Kosovës në vitin 2008, juridiksioni mbi territorin e Kosovës ushtrohet ekskluzivisht nga organet e Republikës së Kosovës.Nota e dërguar i referohet edhe procedurave të dakorduara midis Kosovës dhe Serbisë lidhur me bashkëpunimin juridik të datës 7 Tetor 2015 ku kemi kërkuar nga Ministria e Drejtësisë së Serbisë që të bartë lëndën e nënkolonel Thaqit te organet e Republikës së Kosovës.

Në rast se ka bazë dhe dëshmi se nënkolonel Thaqi, si shtetas i Republikës së Kosovës, ka kryer ndonjë vepër penale në territorin e Kosovës, organet e Republikës së Kosovës do të fillojnë procedurat përkatëse sipas legjislacionit të Kosovës.

Nota është dërguar nga Ministria e Drejtësisë përmes Ministrisë së Punëve të Jashtme dhe zyrës ndërlidhëse të Republikës së Kosovës në Beograd. Kjo është nota e parë që dërgohet drejtpërdrejtë përmes kanaleve diplomatike pa kaluar nëpërmjet Përfaqësuesit Special të Bashkimit Evropian. Duhet theksuar se Ministria e Drejtësisë, në bashkërendim me Zyrën e Zëvendëskryeministrit të Parë, është konsultuar paraprakisht me Zyrën e Përfaqësuesit Special të Bashkimit Evropian, i cili ka refuzuar të përfshihet në komunikimin dypalësh ndërmjet Kosovës dhe Serbisë në këtë rast konkret pasi që nuk është rast tipik i bashkëpunimit juridik të ndërsjellë, por komunikim i karakterit diplomatik.

Ministria e Punëve të Jashtme ka konfirmuar që nota është dorëzuar në Ministrinë e Drejtësisë me datë 7 tetor 2016, por deri tani nuk ka ndonjë përgjigje nga pala serbe. Shkresa e Ministrisë së Drejtësisë është dërguar për njoftim edhe te Përfaqësuesi Special i Bashkimit Evropian dhe te Shefi i EULEX-it, si dhe është shpërndarë nga Zyra ndërlidhëse në Beograd te shumica e ambasadave të huaja për të qartësuar qëndrimin e Republikës së Kosovës lidhur me ndalimin e kundërligjshëm të nënkolonel Thaqit.

Sipas informacioneve të fundit nga Ministria e Punëve të Jashtme, më 10 Tetor 2016, është mbajtur seanca dëgjimore në prokurorinë serbe për krim të organizuar ku sipas avokatëve të nënkolonel Thaqit, janë konstatuar një numër i shkeljeve ligjore lidhur me ndalimin e nënkolonel Thaqit. Kështu, për shembull, është konstatuar se nënkolonel Thaqi nuk është ftuar asnjë herë nga gjykata serbe për t’u paraqitur dhe deklaruar rreth akuzës të cila i bëhet, si dhe është vërtetuar se ai ka kaluar edhe më parë nëpër territorin e Serbisë pa u ndaluar për veprën penale për të cilën akuzohet sot.

Ministria e Drejtësisë është në bashkëpunim dhe bashkërendim të vazhdueshëm me Ministrinë e Punëve të Jashtme, e cila ka rolin kryesor në sensibilizimin e faktorit ndërkombëtar për rastin e nënkolonel Thaqit, si dhe me Ministrinë e Punëve të Brendshme, me Zyrën e Zëvendëskryeministrit të Parë dhe Zyrën e Kryeministrit.

Duhet theksuar se Ministria e Drejtësisë, në tre muajt e fundit pas fillimit të mandatit të Ministres, ka ngritur një numër shqetësimesh në drejtim të Përfaqësuesit Special të Bashkimit Evropian lidhur me qasjen e Serbisë në kuadër të bashkëpunimit juridik të ndërsjellë. Po ashtu, Ministria e Drejtësisë ka marrë qëndrim parimor se nuk do të ketë bashkëpunim juridik me Serbinë për rastet kur Serbia ka filluar procedura penale kundër shtetasve të Republikës së Kosovës për vepra penale kinse të kryera në territorin e Kosovës.

Ministria e Drejtësisë, po ashtu, kundërshton çdo formë tjetër të juridiksionit të Serbisë, përfshirë mbi bazën e parimit të juridiksionit universal, ku akuzohen shtetas të Republikës së Kosovës për vepra të kryera në Kosovë. Çdo kërkesë e Serbisë për bashkëpunim në këtë drejtim është refuzuar nga Ministria e Drejtësisë dhe do të refuzohet edhe në të ardhmen.

Ministria e Drejtësisë po ashtu ka marrë qëndrim parimor se do të kërkojë ekstradimin e çdo shtetasi të Republikës së Kosovës i cili ndalohet nga një shtet tjetër mbi bazën e akuzave të ngritura të Serbisë për vepra penale të kryera në Kosovë dhe ekstradimin i të cilit kërkohet nga Serbia.

Ministria e Drejtësisë do të bëjë gjithçka që është e mundshme për të evituar ekstradimin e një shtetasi të Republikës së Kosovës për në Serbi, dhe do të ndërmerr të gjitha veprimet e nevojshme, në bashkëpunim me Prokurorin e Shtetit dhe Policinë e Kosovës, që shtetasi i Republikës së Kosovës të gjykohet vetëm në Kosovë për vepra të kryera në Kosovë nëse për këtë ka dëshmi.

Kuvendi i Kosoves-Demarkacioni i kufirit me Malin e Zi ende nuk është në axehendë

by

Kuvendi i Kosovës, miratohen ndryshime e plotësime në Buxhetin e Shtetit 2016/

-Demarkacioni i kufirit me Malin e Zi ende nuk është në axehendë/

PRISHTINË, 14 Korrik 2016- Gazeta DIELLI-Behlul Jashari/ Projektligji për ndryshimin dhe plotësimin e Ligjit për Buxhetin e Shtetit 2016, i miratuar në parim në 7 korrik në Kuvendin e Kosovës, sot në seancën plenare të nisur në mesditë u shqyrtua herën e dytë dhe u miratua me procedurë të përshpejtuar,me shumicë votash -70 pro 2 kundër dhe dy abstenime. Seanca filloi punimet me 77 deputetë në sallë dhe me vonesë afër dy orëshe të nisjes dhe të ardhjes së kryetarit të Kuvendit Kadri Veseli.

Me propozim të kryetarit të Grupit Parlamentar të LDK, Ismet Beqiri, Kuvendi me shumicë votash, 80 pro e 2 abstenime, futi në rend dite me procedurë të përshpejtuar Projektligjin për ratifikimin e marrëveshjes për hua ndërmjet Republikës së Kosovës dhe Bankës Gjermane KfË Frankfurt Am Main për programin “Masat e Efiçencës së Energjisë në Ndërtesat Publike në Nivel Komunal në Kosovë”. Ky projektligj u rendit si pikë e parë e axhendës së seancës plenare dhe u miratua me 87 vota pro, 1 abstenim e 1 kundër. Drafti i buxhetit është diskutuar dhe është i dakorduar plotësish me Fondin Monetar Ndërkombëtar e më pas u miratua në fillim të këtij muaji, në 1 korrik, nga qeveria e Kosovës në mbledhjen e 99-të, të 31-tën në vitin 2016.

Buxheti i Shtetit për vitin 2016, i miratuar në Kuvendin e Kosovës brenda afatit ligjor, si u theksua me atë rast, është në linjë të plotë me objektivat e qeverisë për rritje të qëndrueshme ekonomike e stabilitet buxhetor.

Të hyrat e rregullta buxhetore për vitin 2016 ishin planifikuar të jenë 1 miliard e 598 milionë euro, që është një rritje prej 4.1% krahasuar me vitin 2015 dhe 19% më shumë se në vitin 2014. Për vitin 2016, shpenzimet bazë parashihej të jenë 1 miliard e 678 milionë euro.

Në axhendën e seancës plenare të Kuvendit të Kosovës sot ishin edhe shqyrtimi i dytë i Projektligjit për ndryshimin dhe plotësimin e Ligjit për financat e pushtetit lokal, i cili u miratua, dhe shqyrtimi i Raportit vjetor të Bankës Qendrore të Republikës së Kosovës për vitin 2015, për votimin e të cilit nuk kishte numër të mjaftueshëm të deputetëve në sallë.

Në Kuvendin e Kosovës ende nuk është në axehendë demarkacioni i kufirit me Malin e Zi, për ratifikimin e të cilit duhen së paku 80 vota nga 120 deputetët sa janë gjithësej. Qeveria e Kosovës e ka shtyrë mbledhjen që pritej të mbahej dje, ku do të vendosej për ta proceduar për ratifikim në Kuvend Marrëveshjen për demarkacionin e kufirit me Malin e Zi. Vendimi për shtyrjen e mbledhjes u mor pasi partia më e madhe kosovare, e koalicionit qeverisës, PDK, ka kërkuar që qeveria të mos ngutet.

Sipas shtypit të sotëm në Prishtinë, PDK e sheh të nevojshme arritjen e një konsensusi nacional për çështjen e demarkacionit me Malin e Zi, derisa partia e dytë kosovare dhe e koalicionit qeverisës, LDK, insiston se demarkacioni shumë shpejt do të shkojë në Kuvend. Opozita ka një alternativë që kjo çështje të zgjidhet deri në shtator.

Ndërkohë, kanë nisur iniciativa për t’i ulur përreth një tryeze liderët e partive kryesore të Kosovës në pushtet dhe opozitë, në përpjekjen që të mbërrihen konsensusi dhe qasja e përbashkët rreth çështjes së demarkacionit me Malin e Zi.

Kuvendi i Kosovës, në axhendë ratifikimi për EULEX-in

by

-Grupi parlamentar i LDK propozoi që në rend dite të hyjë sot Projektligji për ratifikimin e marrëveshjes ndërkombëtare në mes të Republikës së Kosovës dhe Bashkimit Evropian për Misionin e Bashkimit Evropian për Sundimin e Ligjit në Kosovë si dhe

-Projektligji për ndryshimin dhe plotësimin e ligjeve që ndërlidhen me mandatin e Misionit të Bashkimit Evropian për Sundimin e Ligjit në Republikën e Kosovës, si pika 18 e 19. Propozimi i mbështetur edhe nga grupi parlamentar i PDK u miratua me 70 vota pro, 12 kundër e 1 abstenim/

 Nga Behlul Jashari/ PRISHTINË, 16 Qershor 2016/ Kuvendi i Kosovës po zhvillon sot seancë plenare të nisur me deklarime jashtë rendit të ditës, para së cilës në mëngjes qeveria mbajti mbledhjen e 95-të, të 27-tën në vitin 2016, pas asaj të djeshme si dhe të hënës, në të cilën ka miratuar Projektligjin për Vazhdimin e Mandatit të Misionit të Bashkimit Evropian për Sundimin e Ligjit në Kosovë, (EULEX Kosova). Ligji është proceduar në Kuvend, por ende nuk ka hyrë në axhendë seance plenare, meqë ndërkohë nuk u  mbajt mbledhja e ftuar e Kryesisë me shefat e grupeve parlamentare dhe kanë vazhduar komunikimet mes krerëve të shtetit dhe përfaqësuesëve të BE-së.

Kryeministri i Kosovës, Isa Mustafa, dje në mbledhje të qeverisë ka informuar për arritjen e marrëveshjes me Bashkimin Evropian lidhur me vazhdimin e mandatit të EULEX-it, dhe ka paralajmërur se ky ky ligj do jetë në axhendën e seancës plenare të Kuvendit për shqyrtim dhe miratim, pasi kabineti qeveritar të zhvillojë edhe një takim tjetër, i cili u mbajt sot.

“Kemi pasë një takim me presidentin, me kryetarin e Kuvendit, me përfaqësuesit e institucioneve të drejtësisë dhe me përfaqësuesin e Bashkimit Evropian, Samuel Zhbogar, me përfaqësues të Ambasadës Amerikane, dhe është arrit marrëveshja lidhur me EULEX-in”, tha Mustafa dje në mbledhjen e qeverisë.

“Ne presim ta marrim këmbimin e letrës nga Përfaqësuesja e Lartë e Bashkimit Evropian,  Federika Mogherini”, tha kryeministri i Kosovës.

Lidhur me këtë çështje kabinetin qeveritar e ka informuar edhe zëvendëskryeministri i pare e ministri i Drejtësisë, Hajredin Kuçi, i cili ka vlerësuar arritjen e marrëveshjes ndërmjet Republikës së Kosovës dhe Bashkimit Evropian për mandatin e EULEX-it për dy vitet e ardhëshme.

 “Në negocimin tonë kemi pasë parasysh dy kritere: e para, që të shfrytëzohet në maksimum mundësia e institucioneve tona për ta ushtruar sovranitetin e plotë në fushën e gjyqësisë dhe prokurorisë dhe njëkohësisht kemi pasë mundësinë edhe kemi shfrytëzuar autoritetin edhe të EULEX-it për ekspertizën e tyre në dy vitet e ardhshme. Kemi arritur një marrëveshje që është në përmbajtjen e letrës së plotë të presidentit që e ka dërguar me datën 9 qershor te Mogherini”, tha ai.

“Mbrëmë e kemi marrë edhe letrën kthyese të përfaqësueses së lartë të Bashkimit Evropian, Federica Mogherini, prandaj kemi proceduar edhe një herë me këto dy projektligje të cilat janë të harmonizuara me letrën e presidentit dhe me Bashkimin Evropian”, tha sot në mbledhjen e qeverisë kryeministri Mustafa.

Kabineti qeveritar fillimisht ka miratuar Projektligjin për ratifikimin e marrëveshjes ndërkombëtare në mes të Republikës së Kosovës dhe Bashkimit Evropian për Misionin e Bashkimit Evropian për Sundimin e Ligjit në Kosovë.

Pas mbledhjes së sotme të qeverisë, derisa zhvillon punimet seanca plenare e Kuvendit të Kosovës, deputetëve u është shpërndarë projektligji për marrëveshjen Kosovë – BE për vazhdimin e Misionit të EULEX-it deri në 15 qershor 2018 

Grupi parlamentar i LDK propozoi që në rend dite të hyjë sot Projektligji për ratifikimin e marrëveshjes ndërkombëtare në mes të Republikës së Kosovës dhe Bashkimit Evropian për Misionin e Bashkimit Evropian për Sundimin e Ligjit në Kosovë si dhe 

Projektligji për ndryshimin dhe plotësimin e ligjeve që ndërlidhen me mandatin e Misionit të Bashkimit Evropian për Sundimin e Ligjit në Republikën e Kosovës, si pika 18 e 19. Propozimi i mbështetur edhe nga grupi parlamentar i PDK u miratua me 70 vota pro, 12 kundër e 1 abstenim. Votim kundër këtij propozimi paralajmëroi grupi parlamentar i Lëvizjes Vetëvendosje, duke kërkuar kohë për shqyrtim dhe procedura për këto projektligje.

 

Kryesia e Kuvendit të Kosovës të hënën, gjatë ditës, në një mbledhje me shefat e grupeve  parlamentare ka ftuar seancën plenare për sot – në 16 qershor, por pas mbledhjes në mbrëmje të qeverisë dhe procedimit të saj të Projektligjit për vazhdimin e mandatit të EULEX një seancë tjetër plenare parlamentare urgjente pritej të mbahej më herët.

Kuvendi i Kosovës në seancën e sotme, sipas axhendës, do të votojë Projektligjin për Ratifikimin e Marrëveshjes Financiare ndërmjet Qeverisë së Republikës së Kosovës dhe Bankës Evropiane për Investime për Projektin e Rehabilitimit të Linjës Hekurudhore 10, i cili është shqyrtuar në seancën e 9 qershorit.

Votimi për këtë projektligj u shty për në seancën e radhës, me kërkesë të Grupit Parlamentar të LDK-së, pasi s’do mund të kishte vota të mjaftueshme për miratim, meqë grupi parlamentar i subjektit politik më të madh opozitar, Lëvizjes Vetëvendosje, paralajmëroi abstenim. 

Linja Hekurudhore 10 është 148 kilometërshe nga Hani i Elezit, kufiri jugor me Maqedoninë, deri në Leshak, kufiri verior me Serbinë, duke kaluar nëpër Fushë Kosovë e Mitrovicë, ndërsa është e rëndësishme edhe për rajonin. 

Kuvendi i Kosovës në seancën plenare në 16 qershor do të shqyrtojë një varg projektligjesh dhe raportesh, me axhendën e përcaktuar nga

Kryesia në mbledhjen e përbashkët me kryetarët e grupeve parlamentare.

Në fillimjavë, kryeministri i Republikës së Kosovës, Isa Mustafa, priti në takim lamtumirës shefin e Misionit të Bashkimit Evropian për Sundimin e Ligjit në Kosovë, Gabriele Meucci, të cilin e falënderoi për angazhimin dhe kontributin e tij gjatë misionit, duke vlerësuar bashkëpunimin ndërmjet EULEX-it dhe institucioneve të Kosovës në avancimin e proceseve, gjatë kësaj periudhe.

 Shefi i deritashëm i EULEX-it,  Meucci, vlerësoi progresin e arritur në Kosovë, duke e falënderuar kryeministrin Mustafa për bashkëpunimin e ofruar.

 

Kuvendi i Kosovës, seancë edhe me VV-në opozitare e pa gaz lotsjellës

by

-Në seancën e sotme të Kuvendit të Kosovës mori pjesë edhe subjekti më i madh opozitar, Lëvizja Vetëvendosje, ndërsa vazhduan me bojkotin dy partitë tjera të opozitës – AAK dhe Nisma/

-Opozitarët e Lëvizjes Vetëvendosje sot nuk hodhën gaz lotsjellës në Kuvendin kosovar, por “hodhën” deklarata e kritika të ashpëra e akuzuese/

-Gjashtë projektligje, prej tyre tre për ratifikime, në axhendën gjithësej 15 pikëshe, duke nisur me deklarimet jashtë rendit të ditës e pyetjet parlamentare/

 Nga korrespondenti në Kosovë i Gazetës DIELLI, Behlul JASHARI/

 PRISHTINË, 9 Qershor 2016/ Kuvendi i Republikës së Kosovës zhvilloi sot një seancë plenare me shqyrtim të gjashtë projektligjeve, prej tyre tre për ratifikime, me axhendë gjithësej 15 pikëshe, duke nisur me deklarimet jashtë rendit të ditës e pyetjet parlamentare.

Në seancën e sotme të Kuvendit të Kosovës mori pjesë edhe subjekti më i madh opozitar, Lëvizja Vetëvendosje, ndërsa vazhduan me bojkotin dy partitë tjera të opozitës – Aleanca për Ardhmërinë e Kosovës dhe Nisma për Kosovën.

Në mbledhjen e djeshme të Kryesisë dhe të Grupit parlamentar të Vetëvendosjes u mor vendim që t’i kthehen punimeve të Kuvendit të Republikës së Kosovës “për të bërë opozitën dhe pengesën për vendimet e dëmshme”.

Këtë e theksoi edhe kryetari i Vetëvendosjes, deputeti Visar Ymeri, në fillim të seancës së sotme të Kuvendit në deklarimet jashtë rendit të ditës, duke u shprehur se Kosova “do të duhej të ishte Republikë e qytetarëve, por u shndërrua në plaçkë të pushtetarëve”. Opozitarët e Lëvizjes Vetëvendosje sot nuk hodhën gaz lotsjellës në Kuvendin kosovar, por “hodhën” deklarata e kritika të ashpëra e akuzuese.

Në vazhdim, pyetjet parlamentare disa mbetën pa përgjigje në mungesë për një kohë në seancë të kryeministrit e disa ministrave, e këtë deputetët opozitarë të Lëvizjes Vetëvendosje e quajtën edhe “bojkot i qeverisë Kuvendit” derisa ata i kishin dhënë fund bojkotit.

Të njëpasnjëshme ishin shqyrtimet e tre projektligjeve për ratifikime. Projektligji për ratifikimin e Konventës për heqjen e Kërkesës për legalizim të dokumenteve zyrtare të huaja (5 tetor 1961), i prezantuar në emër të qeverisë së Kosovës nga ministri i Punës dhe Mirëqenies Sociale Arban Abrashi, u miratua me 83 vota pro, 1 abstenim e asnjë kundër.

Ministri Abrashi theksoi se Mbretëria e Holandës, si vendi depozitues i kërkesës, e ka miratuar kërkesën e Republikës së Kosovës dhe duhet të hyjë në fuqi në 14 korrik 2016 për aderimin në këtë Konventë.

“Anëtarësimi i Kosovës në këtë Konventë fuqizon subjektivitetin e saj në arenën ndërkombëtare. Gjithashtu, Kosova përfiton mjaft në lehtësimin e procedurave dokumentare për qytetarët dhe bizneset”, tha Abrashi.

Projektligji për Ratifikimin e Marrëveshjes për hua ndërmjet Republikës së Kosovës dhe Bankës Evropiane për Rindërtim dhe Zhvillim për rehabilitimin e rrugëve rajonale, i prezantuar nga ministri i Financave, Avdullah Hoti, u miratua me 82 vota pro, asnjë kundër e asnjë abstenim.

Pastaj u shqyrtua Projektligji për Ratifikimin e Marrëveshjes Financiare ndërmjet Qeverisë së Republikës së Kosovës dhe Bankës Evropiane për Investime për Projektin e Rehabilitimit të Linjës Hekurudhore 10.

Ministri kosovar i Financave, Avdullah Hoti, duke prezantuar Projektligjin bëri të ditur se Linja Hekurudhore 10 është 148 kilometërshe nga Hani i Elezit, kufiri jugor me Maqedoninë, deri në Leshak, kufiri verior me Serbinë, duke kaluar nëpër Fushë Kosovë e Mitrovicë, ndërsa është e rëndësishme edhe për rajonin. Votimi për këtë projektligj u shty për në seancën e radhës, me kërkesë të kryetarit të Grupit Parlamentar të LDK-së, Ismet Beqiri, pasi s’do mund të kishte vota të mjaftueshme për miratim, meqë grupi parlamentar i Lëvizjes Vetëvendosje paralajmëroi abstenim. Dy projektigjet-ratifikimet e para u votuan pro me unanimitet edhe nga deputetët e Lëvizjes Vetëvendosje opozitare.

Në vijim të seancës së Kuvendit, në shqyrtim të dytë u miratua projektligji për Agjencinë Kosovare për Krahasim dhe Verifikim të Pronës, me 51 vota pro, 18 kundër e 7 abstenime, si dhe projektligji për Falimentimin me 67 vota pro, 2 abstenime e asnjë kundër, për të cilin VV kërkoi edhe lexim të tretë po nuk kaloi propozimi, ndërsa Projektligji për Investimet strategjike në Republikën e Kosovës, pas diskutimeve e kërkesës së kryeministrit Isa Mustafa me votim nga deputetët u kthye në rishqyrtim në komisionet përkatëse parlamentare dhe të jetë sërish në axhendë në një seancë të ardhshme.

Tre pikat vijuese ishin zgjedhja e tre anëtarëve të Bordit për Ankesa të Mediave, shqyrtimi i Propozim-vendimit të qeverisë së Republikës së Kosovës për emërimin e anëtarëve të Komisionit për Mbrojtjen e Konkurrencës, si dhe shqyrtimi i Propozim-vendimit për caktimin e pagës së Auditorit të Përgjithshëm të Republikës së Kosovës.

Në përfundim të debatit, kryesuesi i seancës, Xhavit Haliti, nënkryetar i Kuvendit, hodhi në votim propozim-vendimin e qeverisë për emërimin e Komisionit për Mbrojtjen e Konkurrencës, me përbërje: Valon Prestreshi, kryetar, Ahmet Krasniqi zëvendëskryetar, Fatime Haziri, Muhamet Krasniqi dhe Shaqir Morina, anëtarë. Deputetët miratuan këtë propozim-vendim të qeverisë.

Seanca shqyrtoi edhe dy raporte për vitin 2015 – të punës së Agjencisë Kosovare të Privatizimit dhe të punës së Zyrës Rregullatore për Ujësjellës dhe Kanalizim, por nuk i miratoi në mungesë votash të mjaftueshme.

Punimet e seancës së Kuvendit para se të përmbyllen patën në axhendë edhe propozimin e grupit parlamentar të Listës Serbe për zëvendësimin e anëtarit në Komisionin për Mbikëqyrjen e Agjencisë së Kosovës për Inteligjencë. Për këtë pati edhe votim formal.

Po ashtu, pati votim formal edhe për propozimet e Grupit parlamentar të Lëvizjes Vetëvendosje për disa ndryshime të përfaqësuesve të saj në komisionet parlamentare.

Në përfundim u paralajmërua se pikat e mbetura të sencës së sotme të Kuvendit të Kosovës do të renditen edhe në axhendën seancës pasuese plenare.