Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Kosovë-Kuvendi në situatë të “ngrirë”

by

-Dimër me acar në ditën kur zyrtarisht sipas “kalendarit” nis sesioni pranveror i Kuvendit të Kosovës/
-Shtypi i Kosovës: “Bllokadë dhe protesta në 8-vjetorin e Pavarësisë”, Opozita do ta bllokojë Specialen”. A do të ketë zgjedhje të parakohëshme parlamentare?/
Nga Behlul Jashari*/ PRISHTINË, 19 Janar 2016/ Kuvendi i Kosovës në një situatë të “ngrirë” që prej fundverës 2015 nga bllokadat e opozitës, sot, në një ditë dimri me acar nis sesionin pranveror zyrtarisht sipas “kalendarit”, ndërkohë që ende nuk është ftuar seancë plenare, e cila pritet nga fundi i janarit, e as nuk është mbledhur për këtë Kryesia me shefat e grupeve parlamentare. Sot mblidhen dy komisione parlamentare, për Zhvillim Ekonomik, Infrastrukturë, Tregti dhe Industri dhe ai për Integrime Evropiane, për të shqyrtuar planet e punës për vitin 2016. Komisionet parlamentare bojkotohen nga opozita, e cila është shprehur se, “Kosova ka nevojë për një front të përbashkët për zgjidhjen e krizës politike”, dhe se “thirrja eventuale e seancave plenare të Kuvendit, nuk i kontribuon zgjidhjes së kësaj krize”.
Kuvendi i Kosovës, i zgjedhjeve të parakohëshme të 8 qershorit 2014 e i konstituuar pas plot 6 muajëve, prej më shumë se 4 muajsh, nga fillimi i sesionit vjeshtor me seancën e 17 shtatorit 2015, bllokohet nga opozita, në kundërshtim të 4 marrëveshjeve të 25 gushtit me Serbinë dhe marrëveshjes së demarkacionit me Malin e Zi, edhe me gjuajtje gazi lotsjellës në seanca e jashtë tyre, pas të cilave zhvillime ka pasur edhe deputetë opozitarë të arrestuar, 13 sipas opozitës, ndërkohë që ka ndodhur edhe lirimi i tyre.
Në 17 dhjetor, Kuvendi i Kosovës, i mbledhur në sallë “alternative” pa opozitën e përjashtuar e cila qëndronte në sallën plenare, të cilën, sipas diskutimeve të pozitës, e kishin uzurpuar dhunshëm, ka përmbyllur në mesnatë seancat plenare për 2015-tën me emërimin e Bordit të Agjencisë Kosovare të Privatizimit, të munguar gjatë vitit.
“Aktulisht nuk kemi asnjë çështje në pritje për shqyrtim në seancën plenare të Kuvendit. Shkojmë në pushimin, të cilin e kemi dimëror”, është shprehur në përmbyllje të seancës së fundit të vitit të kaluar kryeparlamentari kosovar Kadri Veseli.
Opozita në Kosovë, në vazhdimësi të organizimeve, ka paralajmëruar edhe protesta të reja duke u shprehur se “nuk do të ndalen deri në dorëheqjen e qeverisë”.
Në 9 janar 2016, në protestën në Prishtinë, kundër qeverisë, sipas opozitës ishin rreth 100 mijë pjesëmarrës, ndërsa sipas Policisë së Kosovës ishin 8 mijë. Më parë, në 28 nëntor 2015, në manifestimin e opozitës në Prishtinë sipas vlerësimeve të saj ishin 35 mijë pjesëmarrës.
“Bllokadë dhe protesta në 8-vjetorin e Pavarësisë”, është një nga titujt e ballinave në shtypin e sotëm kosovar.
Gazeta Koha Ditore paralajmëron se, procese të vështira e presin Kosovën brenda qarkut njëmujor, kur edhe festohet përvjetori i tetë i Pavarësisë së shtetit.
Madje analistët parashohin përkeqësim të situatës nëse vazhdojnë tensionet aktuale mes qeverisë dhe opozitës.
Zgjedhja e presidentit mes bllokadës në Kuvend dhe protestave të opozitës dhe dialogu me Serbinë po shihen si çështje me të cilat do të përballet Kosova deri më datë 17 shkurt (ditën e përvjetorit të shpalljes së pavarësisë).
Si arsyeja e vetme për festë në përvjetorin e tetë të Pavarësisë do të ishte rekomandimi eventual i Brukselit që Kosovës t’i hiqen vizat. Me gjithë pritjet se aktgjykimi i Kushtetueses mbi parimet e Asociacionit do të ndikojë në kthimin e normalitetit, kjo nuk ndodhi.
Qeveria refuzon ta hedhë poshtë marrëveshjen e 25 gushtit, duke premtuar se frymën e Kushtetutës do ta rikthejë me Dekretin qeveritar dhe Statutin e Asociacionit, përfundon citimi nga gazeta.
Në 23 dhjetor 2015, Gjykata Kushtetuese, pas kërkesës që i është bërë nga Presidentja e Republikës të vlerësojë përputhshmërinë e dokumentit të emërtuar “Asociacioni/Bashkësia e komunave me shumicë serbe në Kosovë – parimet e përgjithshme/elementet kryesore”, ka vendosur se, “këto Parime nuk janë tërësisht në përputhje me standardet kushtetuese përkatëse dhe ka konkluduar se akti ligjor i qeverisë së Republikës së Kosovës dhe Statuti duhet të jenë në përputhje”.
Pas këtij vendimi, qeveria e Kosovës ka siguruar se, “i tërë procesi dhe çdo akt juridik për të finalizuar asociacionin e komunave me shumicë serbe do bëhet duke u bazuar dhe respektuar konkluzionet e Gjykatës Kushtetues” dhe se “edhe Statuti i asociacionit do dërgohet në Kushtetuese”.
Edhe gazeta Zëri në kryetitullin në ballinë sot ka një paralajmërim: “Opozita do ta bllokojë Specialen”, ku theksohet se “çdo iniciativë që vjen nga qeveria, do të kundërshtohet dhe do të bllokohet”.
Kjo gazetë shkruan se, tre partitë opozitare që kanë formuar aleancën anti-qeveri kanë paralajmëruar bllokim të seancave plenare edhe atëherë kur pritet të vihet në votim ratifikimi i marrëveshjes me Holandën për selinë e Gjykatës Speciale. Sipas përfaqësuesve të opozitës, bllokimi i seancave plenare do të vazhdojë pavarësisht presionit ndërkombëtar, por edhe rëndësisë së seancave.

Në këtë vazhdë, ata thonë se do ta pengojnë edhe ratifikimin e marrëveshjes me Holandën për selinë e Gjykatës Speciale, e cila parimisht është vendosur të jetë në Hagë. Për këtë seli janë pajtuar përfaqësuesit e shtetit holandez, por që kjo të jetësohet kërkohet që marrëveshja të ratifikohet me shumicë votash, në dy Parlamentet, të Kosovës dhe të Holandës.

Tre partitë opozitare, Lëvizja Vetëvendosje, Aleanca për Ardhmërinë e Kosovës dhe Nisma, janë shprehur të vendosura për të kundërshtuar çdo iniciativë të Qeverisë, derisa vendi të shkojë në zgjedhje të parakohshme parlamentare. Opozita e bashkuar edhe një herë ka nënvizuar se marrëveshjet e arritura në Bruksel po shkelin integritetin e vendit dhe Kushtetutën, shkruan gazeta.
Ndërsa, gazeta Epoka e Re paralajmëron në kryetitullin e ballinës se, “Zgjedhjet në Serbi imponojnë edhe zgjedhjet në Kosovë”.
Sipas gazetës, njohësi i rrethanave politike në vend, Milazim Krasniqi, ka vlerësuar se mbajtja e zgjedhjeve në Serbi do t’i imponojë edhe zgjedhjet e parakohshme në Kosovë.
Ai ka deklaruar se një gjë të tillë do ta imponojë Bashkimi Evropian për nevojat e veta në procesin e dialogut për normalizim të marrëdhënieve në mes të dy vendeve.
Në bisedë për gazetën, Krasniqi ka treguar se zgjedhjet në Kosovë do të mbahen tek pas funksionalizmit të Gjykatës Speciale. “Mendoj se zgjedhjet në Serbi do t’i imponojnë edhe zgjedhjet në Kosovë. Jam i bindur që kjo do të ndodhë për shkak të një qëndrimi që do ta formulojë BE-ja për nevojat e veta”, ka thënë Krasniqi, duke përmendur edhe arsyet konkrete pse BE-ja do ta kërkojë mbajtjen e këtyre zgjedhjeve. “Së pari, BE-ja Kosovën dhe Serbinë, veçmas në procesin e Brukselit, në njëfarë forme i trajton si motra siameze. Pra, që janë të lidhura shpinë për shpine dhe në bazë të këtij procesi ato shihen se si mund të avancojnë derisa të shkëputën përfundimisht nga njëra-tjetra. Së dyti, mendoj se ndikimi i politikës serbe, fatkeqësisht në Kosovë, është shumë më i madh sesa që pranohet publikisht në Kosovë dhe kjo ka interferimet e veta jo vetëm në komunitetin serb, por edhe në gjithë Kosovën”, ka deklaruar Krasniqi.
Më tutje, Krasniqi ka sqaruar se me zgjedhjet e parakohshme në Serbi dhe Kosovë, BE-ja do të dëshironte ekipe të reja me mandat të ri për proceset e ardhshme.
*Foto Gazeta Dielli – Behlul Jashari: Dimër me dëborë e acar në Prishtinë – ndërtesat e Qeverisë e Kuvendit të Kosovës

Kosovë-Kuvendi dy seanca, deri natën vonë

by

-Të dy seancat janë mbajtur në sallën alternative, derisa deputetët e opozitës kanë qëndruar në sallën plenare, të cilën, sipas diskutimeve të pozitës, e kishin uzurpuar dhunshëm/

-Veseli, Mustafa e Thaçi deklarata gjatë seancës së Kuvendit të Kosovës/

-Ka mbërritur në nëntë numri i deputetëv e opozitarë të ndaluar gjatë ditës së djeshme dhe mbrëmë/Nga Behlul Jashari/ PRISHTINË, 15 Dhjetor/ Kuvendi i Republikës së Kosovës, i kryesuar nga Kadri Veseli, kryetar, në orët e vona të natës së kalar, ka mbajtur një mbledhje të dytë, sipas vendimit të mbledhjes paraprake në mbrëmje për shmangie nga rregullorja e punës, lidhur me shqyrtimin e Projektligjit për ndryshimin dhe plotësimin e Ligjit për Agjencinë Kosovare të Privatizimit.

Deputetët kishin vendosur që shqyrtimi i këtij projektligji të bëhet me procedurë të përshpejtuar, duke krijuar mundësinë për shqyrtimin e tij në të dy leximet brenda ditës e natës së kaluar.

Në kohën e pushimit midis dy seancave, projektligji është shqyrtuar nga komisionet përkatëse dhe i është rekomanduar Kuvendit miratimi i tij. Me shumicën e votave, Kuvendi ka miratuar për herë të dytë këtë projektligj, me amendamentet e propozuara nga komisioni funksional.

Ndërsa, në mungesë të kuorumit, shqyrtimi i propozim-vendimit të qeverisë, e cila ka mbajtur mbledhje edhe natën vonë, për emërimin e anëtarëve të Bordit të Agjencisë Kosovare të Privatizimit, pritet të bëhet të enjten, në 17 dhjetor, pas seancës së adresimit të presidentes Atifete Jahjaga me fjalimin vjetor në Kuvend.

Të dy seancat janë mbajtur në sallën alternative, derisa deputetët e opozitës kanë qëndruar në sallën plenare, të cilën, sipas diskutimeve të pozitës, e kishin uzurpuar dhunshëm.

Lidhur me zhvillimet e ditës, kryeparlamentari Veseli, duke marrë fjalën në seancë,  tha se “ka tre muaj e gjysmë që Kuvendi ballafaqohet me përpjekje të deputetëve të opozitës për krijimin e një situate kaotike”. Por, vijoi ai, “Kuvendi është i përkushtuar që të vazhdojë axhendën e vet legjislative dhe të kryejë detyrat e përcaktuara me Kushtetutë, ligje dhe rregullore, konform funksioneve të tij”.

Zëvendëskryeministri Hashim Thaçi, në fjalën e tij në seancë, tha se “deputetëve dhe qeverisë po u mohohet e drejta për komunikim me qytetarët, ndërsa qytetarëve informimi lidhur me temat e ngritura”.

“Nga veprimet e opozitës Kosovës po i rrezikohen një varg marrëveshjesh ndërkombëtare, në vlerë prej rreth 60 milionë eurosh”, theksoi ai.

Zëvendëskryeministri dhe minsitri i Jashtëm, Thaçi, dënoi “uzurpimin e dhunshëm të sallës kryesore të Kuvendit nga një grup deputetësh opozitarë”.

Po në këtë frymë, edhe kryeministri Isa Mustafa theksoi se, “gjendja aktuale kërkon ndërmarrjen e masave përkatëse, të cilat do të ndikonin në sanimin e saj”.

“Opozita po përdor mjete të dhunshme dhe të paarsyeshme për situatën dhe se veprime të tilla po ndodhin edhe jashtë Kuvendit”, tha ai.

Kryeministri Mustafa kërkoi nga opozita “që të paraqesë arsyet e vërteta të këtyre veprimeve të saj, sepse, asociacioni dhe demarkacioni i kufirit nuk janë të tilla”.

Pas këtyre deklaratave, gjatë seancës së parë mbrëmë, Kuvendi i Kosovës iu kthye serish axhendës legjislative.

Ndërkohë, ka mbërritur në nëntë numri i deputetëv e opozitarë të ndaluar gjatë ditës së djeshme dhe mbrëmë, sipas njoftimeve zyrtare të dërguara nga Policia e Kosovës.

Policia e Kosovës, mbrëmë rreth mesatës deklaroi se, duke u bazuar në detyrat dhe autorizimet ligjore ka vazhduar me ndërmarrjen e masave të sigurisë në vend, duke përfshirë edhe masat e sigurisë rreth objekteve shtetërore te Kuvendi i Republikës së Kosovës.

 Rreth orës 17:45, pas daljes nga objekti i Kuvendit të Kosovës, dy deputete, Time Kadrijaj  e Teuta Haxhiu

(të AAK), me urdhër të prokurorit kompetent janë ndaluar nga zyrtarët e Policisë dhe shoqëruar në stacion policor, mbi bazën e dyshimit se  kanë hedhur gaz lotsjellës në sallën ku po mbahej seanca.  Me vendim të prokurorit u është caktuar masa e ndalimit prej 48 orëve.

 Rreth orës 22:50 , po ashtu pas daljes nga objekti i Kuvendit të Kosovës, me urdhër të prokurorit kompetent janë ndaluar edhe deputetët, Faton Topalli dhe Fisnik Ismaili, për mosrespektim të urdhër arrestit shtëpiak, si dhe deputetët Glauk Konjufca, Aida Dërguti dhe Besa Baftija, nën dyshimin e bazuar për hedhje të gazit lotsjellës. Që të pestit janë deputetë të grupit parlamentar të VV.  Ata janë shoqëruar në stacion policor për procedura të mëtutjeshme ligjore.

Policia thekson se, të gjitha veprimet do të ndërmerren në konsultim dhe koordinim me prokurorin kompetent.

Ndërsa, dje pasdite Policia e Kosovës njoftonte për dy ndalime të tjera të deputetëve. Në kontrollin e personaliteteve në hyrje të Kuvendit të Kosovës, gjatë hyrjes, me urdhëresë të Gjykatës kompetente zyrtarët policorë kanë ndaluar deputetin Ismajl Kurteshin (të VV) për mosrespektim të arrestit shtëpiak, me rastin e pjesëmarrjes së tij në manifestimin/protestën e datës 12 dhjetor 2015 në Gjilan. Me vendim të organeve të drejtësisë i është zëvendësuar masa e dënimit nga arrest shtëpiak me masën e dënimit prej 30 ditësh paraburgim.

 Bazuar në urdhëresën e Gjykatës kompetente, pas daljes nga objekti i Kuvendit të të Kosovës është ndaluar deputeti Pal Lekaj (i AAK), i cili është shoqëruar në stacion policor për intervistim dhe procedura të mëtutjeshme.

“Zbatimi i ligjit, garantimi i rendit dhe qetësisë publike, si dhe mbarëvajtja e qetë e të gjitha zhvillimeve është dhe mbetet prioritet i Policisë së Kosovës”, deklaronte mbrëmë Policia.

Gjatë ditës së djeshme, tre  herë është hedhur gaz lotsjellës nga opozita në Kuvendin e Kosovës. Rreth orës 15:35 gazi lotsjellës ndërpreu seancën në sallën alternative të Kuvendit të Kosovës. Seanca plenare në sallë alternative nisi pak para orës 14:00, ndërsa ishte ftuar të mblidhet në orën 10:00. Por, paradite, as nuk filloi seanca, opozita hodhi gaz lotsjellës në sallën plenare, sapo mbërritën të gjithë, edhe deputetët, edhe qeveria, edhe përfaqësuesit ndërkombëtarë, pas kontrollit detaj, madje edhe të dyfishtë, në të gjitha hyrjet e ndërtesës së Kuvendit dhe brenda tij në holl, të cilit iu nënshtruan poashtu gazetarët.

Në këto rrethana, kryeparlamentari Kadri Veseli ftoi për një “pushim” dhe më pas për mbledhjen e Kryesisë së Kuvendit,  ku nënkryetarja e Kuvendit e VV-së, Aida Dërguti, hodhi gaz lotsjellës dhe e ndërpreu. Ndërkohë u mor vendimi për mbajtjen e seancës, si  në disa raste të kaluara në sallën alternative.

Kosovë-Kuvendi në “sallë alternative” miraton në parim Buxhetin e Shtetit 2016

by

-Kuvendi në seancë të jashtëzakonshme, opozita e pamundëson që në fillim seancën në sallën plenare, protesta e përplasje edhe në shesh/
-Para seancës së sotme të Kuvendit, Qeveria e Republikës së Kosovës ka miratuar vendimin për rritjen për 25% të lartësisë së pagesave për çdo familje që merr asistencë sociale në Kosovë dhe vendime të tjera nga fushat e përgjegjësive kushtetuese dhe ligjore/
Nga Behlul Jashari/ PRISHTINË, 17 Nëntor 2015/ Kuvendi i Kosovës në seancë pa opozitën sapo miratoi sot në parim projektligjin për Buxhetin e Republikës së Kosovës për vitin 2016 me 71 vota pro, 7 abstenime e 1 kundër.
Me kërkesë të qeverisë, e cila u takua edhe në mëngjes, me masa të shtuara të sigurisë Kuvendi i Republikës së Kosovës u mblidh sot paradite në seancë të jashtëzakonshme, ku në axhendë e vetmja pikë ishte shqyrtimi i parë i Buxhetit të Shtetit për vitin 2016, i cili në vlerë prej 1 miliard e 680 milionë euro është miratuar nga kabineti qeveritar në 30 tetor.
Seanca është ftuar dje nga Kryesia e Kuvendit përkundër kundërshtimit të opozitës së bashkuar, e cila kishte paralajmëruar se do vazhdojë me pamundësimin e zhvillimit të seancave plenare. Opozita që në fillim pengoi zhvillimin e seancës, dhe derisa gazi lotësjellës përsëri u pa në sallën e seancave plenare ku kishte edhe përplasje me sigurimin, kryeparlamentari Kadri Veseli dha pushim dhe ftoi për një mbledhje të Kryesisë.
Pas pushimit seanca e Kuvendit të Kosovës kaloi në një “sallë alternative”, derisa edhe në ambiente të tjera të ndërtesës opozita hodhi gaz lotësjellës derisa jashtë kishte grumbullime proteste.
Kryeparlamentari Kadri Veseli hapi punimet e seancës së jashtëzakonshme të Kuvendit, në të cilën kryeministri Isa Mustafa në fjalën e tij shprehu papajtueshmëri të plotë të qeverisë me sjelljet e opozitës duke thenë se kjo që ndodhi sot është akt kriminal i idividëve dhe kërkoi përgjegjësi para ligjit.
“Ata që sulmojnë dhe që hedhin gaz losjellës dhe lëndë kimike me të cilat cënojnë shëndetin e deputetëve, duhet të përgjigjen para ligjit”, theksoi Mustafa.
Ai u shpreh se askush nuk të drejtë të cënojë votën e 90 deputetëve të Kuvendit të Kosovës që ata në mënyrë të lirë e të pavrur të ushtrojnë funksionin dhe pozitën e tyre.
Zëvendëskryeministri i parë i qeverisë së Kosovës, Hashim Thaçi poashtu theksoi se “përsëri sot u ballafaqum me një sulm, jo vetëm veprime opozitare, por edhe fizike çmendurake, kundër koalicionit qeverisës dhe për të penguar punën e Parlamentit të Kosovës”.
“Askush nuk do të mund ta bllokojë Kuvendin e Kosovës dhe teleranca ndaj veprimeve kriminale duhet të jetë zero”, tha Thaçi.
Në sancën pa opozitën, në emer të Komisionit për Buxhet dhe Financa, deputeti Naser Osmani, kërkoi shmangie nga rregullorja që të ketë procedurë të përshepejtuar në afatet kohore të shqyrtimit të parë dhe të dytë për Projektligjin për Buxhetin e Republikës së Kosovës për vitin 2016 dhe kjo u miratua me shumicë 79 vota pro, një kundër e asnjë abstenim.
Projektligjin për Buxhetin e Republikës së Kosovës për vitin 2016 e prezantoi Ministri i Financave, Avdullah Hoti, duke theksuar se është i harmonizuar me Fondin Monetar Ndërkombëtar.
Sipas prezantimit të ministrit Hoti, në përgatitjen e Buxhetit të Republikës së Kosovës për vitin 2016 janë marrë parasysh treguesit kryesorë makroekonomikë dhe në harmoni me rregullën aktuale fiskale të deficitit buxhetor. Rritja ekonomike për tre vitet në vazhdim pritet të jetë 4.2% e Bruto Produktit Vendor. Sa i përket të hyrave të përgjithshme janë planifikuar në shumën prej 1 miliard 598 milion euro që paraqet një rritje prej 4.1% krahasuar me këtë vit dhe 19% më tepër se në vitin 2014. Është paraparë rritje e të hyrave nga Doganat dhe ATK, prej 6.2% respektivisht 6.8%. Në këtë drejtim janë marrë parasysh edhe zbatimi i ligjeve që ndërlidhen me pakon fiskale dhe Marrëveshja për Stabilizim-Asociim me BE-në. Sa i përket shpenzimeve janë planifikuar në shumë prej 1 miliard e 680 milionë euro dhe janë 2% më të larta se së vitin 2015. Është ndarë buxhet për të mbuluar koston për rritjen e shumës për asistencë sociale, për zbatimin e Ligjit për skemat penisionale të financuara nga shteti, për reformën në administratën publike, për shëndetësi, arsim, rend e siguri, drejtësi dhe fusha tjera. Buxheti mundëson realizimin e projekteve kapitale që janë në zbatim e sipër.
LËVIZJA VETËVENDOSJE: POLICIA KA RRAHUR BRUTALISHT DEPUTETIN ALBIN KURTI
Opozita jashtë seancës së Kuvendit deklaroi se, “Kadri Veseli thirri seancë të jashtëzakonshme nën masa të rrepta policore. Kuvendi është mbushur me policë brenda dhe jashtë.
Deputetët e opozitës pamundësuan mbajtjen e seancës, ndërsa tash deputetët e koalicionit të ‘Zajednicës’ i janë kthyer byfesë së Kuvendit për të mbajtur takimet e tyre ilegale aty”.
Në anën tjetër, vijon deklarata, jashtë ndërtesës së Kuvendit, njësitet speciale të policisë intervenuan dhunshëm ndaj aktivistëve të opozitës që ishin duke qëndruar jashtë, në shenjë solidariteti me deputetët e opozitës në Kuvend.
“Ky pushtet, është i gatshëm të trazojë gjithë vendin, për t’i qëndruar besnik Serbisë! Kjo nuk do të tolerohet”, shprehet Lëvizja Vetëvendosje.
“Policia sapo ka rrahur brutalisht deputetin e Lëvizjes Vetëvendosje, Albin Kurtin, duke provuar ta arrestojnë atë, në oborrin e Kuvendit të Kosovës”, njofton subjekti politik LVV.
Sipas LVV, “deputetët e opozitës janë sulmuar dhunshëm nga policia, tek provuan që të futen në sallën ku po mbahet mbledhja ilegale e koalicionit të ‘Zajednicës’. Deputetja Albulena Haxhiu është lënduar nga dhuna e policisë brenda Kuvendit, dhe po dërgohet për ndihmë mjekësore”.
Kuvendi i Kosovës prej plot dy muajsh nga fillimi i sesionit vjeshtor me seancën e 17 shtatorit bllokohet nga opozita edhe me protesta, gjuajtje me vezë e gaz lotësjellës në seanca e jashtë tyre në kundërshtim të 4 marrëveshjeve të 25 gushtit me Serbinë dhe marrëveshjes së demarkacionit me Malin e Zi.
QEVERIA E KOSOVËS MIRATOI VENDIMIN PËR RRITJEN PËR 25% TË NDIHMËS SOCIALE
Para seancës së sotme të Kuvendit, e drejtuar nga kryeministri Isa Mustafa, Qeveria e Republikës së Kosovës, ka zhvilluar mbledhjen e rregullt në të cilën ka miratuar vendimin për rritjen për 25% të lartësisë së pagesave për çdo familje që merr asistencë sociale në Kosovë dhe vendime të tjera nga fushat e përgjegjësive kushtetuese dhe ligjore.
Është aprovuar Projektligji për ratifikimin e marrëveshjes së kredisë ndërmjet Qeverisë së Republikës së Kosovës dhe Unicredit Bank Austria AG për financimin e Projektit të modernizimit të shërbimeve të kardiologjisë invazive në Qendrën Klinike Universitare të Kosovës. Kredia ka vlerën 2.6 milionë euro dhe do të përdoret kryesisht për blerjen e pajisjeve mjekësore.
Qeveria ka miratuar edhe vendimin lidhur me përfitimet e ish-ministrave dhe ish-zëvendësministrave, pas përfundimit të mandatit. Sipas këtij vendimi, zëvendëskryeministrat, ministrat dhe drejtori i AKI-së pas përfundimit të mandatit do të marrin për një vit 70 për qind të pagës, ndërsa zëvendësministrat në periudhën prej 6 muajsh pas përfundimit të mandatit, vetëm nëse nuk marrin të ardhura të tjera nga Buxheti i Kosovës.
Kabineti Qeveritar ka miratuar Koncept-dokumentin për legalizimin e armëve dhe dorëzimin e armëve të vogla dhe të lehta, municionit dhe mjeteve eksplozive. Po ashtu, u aprovua propozimi që të parashihet autorizimi i Ministrisë së Punëve të Brendshme që periodikisht të shpall amnisti për grumbullimin e armëve.
Qeveria e Kosovës, në mbledhjen e sotme ka miratuar vendimin për lartësinë e pagesës së shumës mujore për ndihmë sociale.
Sipas këtij vendimi, rritja e ndihmës sociale për çdo familje do të jetë 25% e vlerës aktuale të ndihmës sociale dhe do të filloj të zbatohet nga nëntori 2015.
Aktualisht, nga Skema e Ndihmës Sociale përfitojnë rreth 26 mijë familje me rreth 115 mijë anëtarë, të cilat kanë marrë ndihmë sociale në bazë të numrit të anëtarëve në familje nga 40-120 euro. Sipas legjislacionit në fuqi, shuma mujore e ndihmës sociale përcaktohet sipas numrit të anëtarëve të familjes dhe kostos së çmimeve të konsumit të shportës së ushqimit, e cila duhet të harmonizohet me indeksin e çmimeve të konsumit të shportës së ushqimit, të publikuara nga Agjencia e Statistikave të Kosovës. Bazuar në një analizë të lëvizjes së çmimeve të shportës së ushqimit, është vlerësuar dhe propozuar që rritja e ndihmës sociale për çdo familje të jetë 25% e vlerës aktuale të ndihmës sociale dhe të filloj të zbatohet nga nëntori 2015. Me këtë propozim do të rritet vlera e pikës nga 1 pikë = 1.00 euro, në 1 pikë = 1,25 euro, që rezulton se familjet do të përfitojnë ndihmë sociale nga 50-150 euro.
Buxheti për mbulimin e kostos së rritjes së vlerës së ndihmës sociale në vlerë prej 25% është planifikuar edhe në Buxhetin për vitin 2016.
Rritja e vlerës së ndihmës sociale, përveç që do të ndikojë në rritjen e mirëqenies së këtyre familjeve, do të ndikojë edhe në zvogëlimin e shkallës së varfërisë, sidomos asaj ekstreme.
Kryeministri Isa Mustafa, tha se propozimi është shumë i qëlluar, meqenëse edhe mjetet janë siguruar.
Ministri i Administratës Publike ka njoftuar kabinetin qeveritar për Konferencën e Shkollës Regjionale për Administratë Publike në Malin e Zi, ku Kosova është anëtare në cilësinë e vëzhguesit dhe në të ardhmen pretendon të bëhet anëtare me të drejta të plota.

PROJEKT -LIGJI PER PRONAT NE KONFLIKT ME VENDIMIN E GJYKATES SE STRASBURGUT

by

VENDIMI I GjYKATES SE STRASBOURGUT DHENE NE FAVOR TE PRONAREVE, KUNDERSHTON HAPUR PROJKET-LIGJIN E QEVERISE QE PO MIRATOHET NE KUVEND/
NGA AGIM TORO/*
Ne daten 10.11.2015 Gjykata e Strasbourgut mori vendimin e radhes duke u dhene te drejte subjekteve te shpronesuara qe kishin paraqitur kerkese per gjykim ne ate te Nderuar Gjykate.
Ky vendim mer nje rendesi te jashtezakoneshme per pronaret shqiptare, te drejtat e te cileve nuk po respektohen nga ana e Shtetit Shqiptar.
Vleresimi i Gykate se Strasbourgut per te drejten e pronesise ne Shqiperi eshte dhene gjithmone ne favor te pronareve dhe asnjehere ne favor te shtetit. Gykata e Strasbourgut i ka mbeshtetur konkluzionet e veta ne faktin se pronaret shqiptare, nen regjimin komunist, jane shpronesuar me dhune e pa shperblim, kush kundershtonte ndeshkohej. Ndryshim i sistemit totalitar me sistemin demokrat duhej, vec te tjerave te korrigjonte fajet e sistemit te kaluar ne drejtim te te drejtave te njeriut, keshtu nder hapat e pare qe duheshin ndermare ishte kthimi i prones pronareve te shpronesuar padrejtesisht si dhe riabilitimi dhe demshperblimi i te perndjekurve politike.
Persa i perket te drejtes se prones, ne fillim u veprua drejte duke shfuqizuar Kushtetuten e viti 1976 qe e kishte shpallur shtetin, pronar te te gjithe tokes. Por pas ketij akti, nen ndikimin e ideve te bartura nga e kaluara u kalua ne ligje pupuliste, me arsyetimin e gjendjes tejet te varfer te fshtarsise. Me ligjin famekeq 7501 toka ju dha falas fshtareve, por qe nuk e punuan ate per arsye se toka u nda ne mbi 2.5 milion ngastra, kushtet e punimit te tokes ishin tejet mjerane dhe prodhimi vendas nuk mund te konkuronte prodhimin e importuar per shkak te cilesise dhe kostos. Keshtu fshataret ne vend qe te punonin token, emigruan jashte shtetit duke punuar ne tokat e atyre vendeve, por qe ishin shume here me te administruara se sa toka ne Shqiperi. Toka ju dha fillimisht ne perdorim dhe me pas ne pronesi. Shteti padrejtesisht ndau edhe token qe nuk ishte pronar dhe ligjji 7501 nuk u zbatua ne gjithe territorin por vetem ne zonat fushore e kodrinore te Shqiperise.
Mbeshtetur ne parimet e keti ligji u zbatua edhe privatizimi i sektoreve te tjjere te ekonomise si privatizimi i ndermarrjeve ne favor gjoja te puntoreve, privatizimi i dyqaneve ne favor te shitsave etj. etj.
Fillimi i ekonomise se tregut tregoi se sigurimi i nje prone te vlefshme te hapte rrugen per tu pasuruar. Politikanet shqiptare dhe militantet e te gjitha partive politike, sidomos ato parlamentare, ju versulen pronave pa pyetur per demin qe u shkaktonin ekonomise se vendit dhe sidomos pronareve. U miratuan ligje vendime e urdhera qe shkelnin me te dyja kembet normat elementare te nje shteti demokratik. Kjo do te conte ne nje deshtim total te ekonomise dhe nga vendi i pare ne Europen Lindore qe po zbatonim reformat e ekonomise se tregut jemi vendi i fundit ne Europen Lindore per t’ju bashkuar familjes europiane. Korrupsioni dhe makuteria e shkelsave te te drejtave te pronareve, te ndihmuar nga ligjet qe i miratonin vete dhe nga sistemi tejet i koruptuar gjyqesor qe gjeten parajsen ne kete vend te quajtur Shqiperi cuan ne kete situate ku shteti eshte ne prag falimentimi si rezultat I vendimeve te gjykates se strasburgut.
Publiksht u pranua se prona i duhej kthyer pronarit, por pa prekur interesat politike dhe ekonomike te klases politike, u miratuan ligje te cilat ne thelb neperkembnin te drejten e pronesise, kthenin me kufizim token truall dhe do kompensonin pronen qe nuk e kthenin. Nga viti 1993 e ne vazhdim eshte pranuar me consensus te forcave politike ne Kuvend se pronaret duheshin kompensuar, per te githe siperfaqen dhe me cmimet e tregut, por asnjehere nuk u mendua si do realizohej ky dertyrim qe premtohej me aq buje.
Erdhi nje dite dhe pronaret u zgjuan, nuk i besuan me politikes dhe drejtesise shqiptare por ju drejtuan Gjykates se te Drejtave te Njeriut, e cila i vleresoi kerkesat e pronareve si te drejta, ka dhene dhjetra vendime ne favor te tyre dhe eshte duke gjykuar disa qindra te tjere. Ajo dha edhe nje vendim pilot ku jepeshin detyra konkrete per Shqiperine, por keto detyra rane ne vesh te shurdher.Asnje prej ketyre detyrave nuk u zbatuan. Partia politike qe drejton pushtetin ekzekutiv u kujdes me shume qe t’u mbushte mendjen nderkombetareve qe po punonte per te zgidhur problemin e pronave, u kujdes me shume te shtynte afatet e detyrimeve qe kishte ndaj pronareve dhe ne thelb nuk beri asgje. AKKP e ngrakuar nga ligji drejtohet nga nje person totalisht i pa afte dhe qe nuk e njef fare procesin e kthimit dhe kompensimit te pronave dhe megjithese kerkoi dhe miratoi ne Kuvend dy here shtyrjen e ligit per vendimarrjen e kthimit te prones pronareve, nuk ka mare asnje vendim duke u bere shembull i qarte i abuzimit me detyren, por eshte prokuriria qe nuk vepron. Kjo Agjensi ne vend qe te zbatonte detyrat qe i ka vene ligji, justifikohet me arsyetimin se po harton ligjin, qe nuk e ka detyre. Dhe zgjidhja u gjet EUREKA, pronareve nuk u japim asgje, perkundrazi te detyrohen ata t’i japin Qeverise.
Se fundmi Qeveria Shqiptare ka derguar per miratim, me procedure te pershpejtuar nje projekt-ligj te ri, te hartuar nga AKKP, qe eshte vleresuar si nje goditje shume e rende e te drejtave te pronareve. Kalimi me procedure te pershpejtuar duke mos mare parasysh ne asnje germe te tij interesat e pronareve duke i kthyer ata nga kerkues te kthimit fizik ne natyre te prones apo kompensimin e saj, padrejtesisht ne borxhlinj te Qeverise, tregoi haptazi se ky projekt – ligj nuk mer parasysh jo vetem Lirite dhe te Drejtat e Njeriut te shprehura dhe pranuara nderkombtarisht, por edhe te Kushtetutes Shqiptare dhe te rregullave e ligjeve te deri sotme. Vullneti i kesaj Qeverie u duk qartazi ne miratimin e hartes se vleres te miratuar ne vitin 2014 te cilen Gjykata e Strasbourgut e hedh poshte.
Qendrimi i Shoqates Kombetare te te Shpronesurve “Pronesi me Drejtesi” ka qene gjithmone ne perputhje me Kushtetuten tone dhe Karten Europiane te te Drejtave te Njeriut, por ka qene dhe eshte Qeveria Shqiptare ajo qe nuk pranon asnje konsultim me Shoqaten dhe nuk respekton e nuk zbaton te drejtat e tyre. Nuk eshte faji i Shoqates qe ndeshkimet e Strasbourgut po vine dhe do te vine njeri pas tjetrit, duhet qe Qeveria, Kuvendi dhe te gjithe te kuptojne se ceshtja e pronave nuk eshte ceshtje e pronareve por e Shtetit Demokratik.
Pa respektimin e te drejtes se prones nuk ka Shtet Demoktratik, nuk ka drejtesi, por ka vetem korrupsion dhe pasurim te politikaneve. Ky eshte thelbi i projket ligjit qe po miratohet ne Kuvend. I bejme thirrje Kuvendit te mos gaboje dhe te miratoje kete projekt-ligj, port ta ktheje mbrapsht per te hartuar nje projekt-ligj te ri ne perputhje me ato qe kerkon e drejta kushtetuese.
Shoqata jone ka kundershtuar fort projekt-ligjin sepse kerkon:
Toka qe nuk kthehet duhet te kompensohet me cmimet e tregut sot. Kurse projekt – ligji i Qeverise nuk parashikon ne asnje rast kthimin fizik te prones pronareve qe u takon, por fut termin e ri, abstract, kompensim brenda prones se pronarit. Pra pronari do kompensohet brenda prones se vet, pra edhe e njef pronen e pronarit me kufi e vendndodhje dhe i thote qe te kompensoj per vleren e gjithe prones, brenda tokes se vet dhe kete e ben duke ndruar zerin kadastral dhe e vlereson me vleren e nje toke tjeter. Lind pyetja e theshte pse nuk perdoret fjala kthim. Sepse Shteti ben dy vleresime per token e pronarit nje me zerin kadastral te 1945 dhe nje me zerin kadstral te 2015 duke ulur cmimet deri 200, 300 deri 1000 here.
Cmimet e tokave sidomos ne qytete gjate ketyre viteve por sidomos ne vitin 2014 pesuan nje ulje drastike, te pa justifikuar edhe para Gjykates se Strasburgut. Kjo i parapriu miratimit te ketij projekt – ligji, pacavure, i cili u miratua nga Qeveria ne menyre te fshehte e pa asnje konsultim .
Prona nuk eshte thjesht prone fizike por te paret tane i kane blere ato per te shtuar kapital, pra per t’u zhvilluar ne te ardhurat e tyre dhe ne zhvillimin prespekriv te prones. Ne e shohim pronen jo si nje send te thjeshte por si nje aset qe prodhon kapital dhe ky eshte nje process ne vazhdim. Meqenese pronat fizike jane te kufizuara dhe kerkesat per zhvillim jane ne rritje atehere pashmangerisht vlera e prones rritet dhe eshte kjo arsyeja qe ne nuk biem dakort me emertimet dhe vleresimet e vitit kur eshte konfiskuar prona, por te pakten me vleren e tregut sot. Nuk eshte shteti qe i ka dhene vlere dhe qe po e perfiton ate tani, por eshte zhvillimi ekonomik i shoqerise qe ka rritur vleren e prones. Sistemi komunist ne kundershtim me ate kapitalist perkundrazi nuk e ka zhvilluat pronen ne vlere te njejte me sistemin kapitalist, prandaj dhe sistemi komunist deshtoi. Poqese pronaret do te gezonin pronen nga viti 1945 e ketej, duke qene se do te ishin ne sistemin ku zhvillohet privatisht prona do kishin perfitime shume here me te medha nga sa kerkojne pronaret sot.
Me i cuditshem eshte fakti se me kete ligj urdherohet Gjykata e Strasbourgut te mos gjykoje me ceshtjet e ardhura nga pronaret shqiptare. Nuk kuptojme ne cfare pozite e kane vene veten hartuesit e ketij projekt-ligji por edhe ne cfare pozite e ve veten Qeveria kur guxon te urdheroje Gjykaten Nderkombetare te Strasburgut? Vaj medet mendesise qe kane, kujtojne se jane keta zoterit e Europes .Por Gjykata e Strasburgut nuk eshte sistemi gjyqesor shqiptar i korruptuar dhe qe perpunohet sipas deshirave te politikaneve shqiptare.
Gykata e Strasburgut shprehet qarte se kthimi i fizik ne natyre i prones eshte nje detyrim dhe vetem ne rastet kur nuk eshte i mundur kthimi fizik ne natyre i prones, ajo te kompensohet dhe kompensimi duhet bere vetem per pronat qe u perdoren per interes public dhe per kete duhet te paguaje e gjithe shoqeria. Por, korrupsioni ekonomik dhe politik nuk lejon kthimin fizik ne natyre te prones. Sot Qeveria ndan tokat me ligjin famekeq 7501, shet toka me 1 euro, jep me qera tokat per 99 vjet me cmime qesharake, nderton gjoja fshatra turistike dhe ua shet token pronareve te vilave (kryesisht politikane dhe pushtetare) me cmime thuajse falas, legalizon falas gjithe ndertimet pa leje edhe ato te ndertuara ne vitin 2014. Vetem mendohet sit e sajojme ne ligj qe pronaret te mos marrin asgje.
Nuk eshte e rastit thirrja e zv.ministrit te drejtesise qe Shteti Shqiptar eshte ne prag te falimentimit dhe se Shteti Shqiptar shkel perdite te drejtat e njeriut. Po te mos luftohet korrupsioni ekonomik e politik dhe po mos kete nje drejtesi qe te mos lejoje ne asnje rast shkeljen e ketyre drejtave sigurisht qe Shqiperia do falementoje jo vetem ne fushen e pronave por ne cdo gje dhe eksperincat e vendit tone ne kete drejtim nuk mungojn.
Gjykata e Strasbourgut jo ne nje rast i ka ardhur ne ndihme Shtetit Shqiptar me konkluzione dhe detyra konkrete por ka qene Shteti Shqiptar qe nuk I ka vleresuar dhe nuk I ka zbatuar ato dhe per kete nuk eshte faji i pronareve.
Me poshte po japim pjese te vendimit te Gjykates se Strasbourgut te dates 10.11.2015 ku trajtohen temat e mesiperme.
2. Vlerësimi i Gjykatës
78. Duke pasur parasysh natyrën joefektive të sistemit aktual të kompensimit dhe duke pasur parasysh, në veçanti, për faktin se tani ka 8 deri 21 vjet që subjektet e shpronesuara presin kompensimin, gjykata, pa i paragjykuar zhvillimet e mundshme në të ardhmen, qe ka parasysh krijimin e një mekanizmi efektiv të kompensimit, e konsideron të arsyeshme për të dhënë subjekteve te shpronesuara, qe jane ankuar ne Gjykate një shumë e cila do të përfaqësojë një zgjidhje përfundimtare dhe shteruese të rasteve.
79. Gjykata përsërit parimin e saj përcaktues se dëmi pasuror të jepet në rastet e shpronësimit të paligjshëm duhet të korrespondojë me vlerën aktuale të pronës nëse kthimi fizik ne natyre nuk eshte i mundur. (shih Brumărescu v. Rumanisë (i drejtë) [GC], nr. 28342/95, §§ 19-24, GJEDNJ 2001-I, dhe Scordino v. Italy (nr. 3) (i drejtë)).
80. Gjykata shqyrtoi një çështje të ngjashme në Vrioni dhe të tjerë k. Shqipërisë, nr. 35720/04 dhe 42832/06, §§ 33-39, 7 dhjetor 2010, në të cilën ajo ka arsyetuar dhe ka arritur në përfundimin se, në rastin e shpronësimeve të paligjshme, të tilla si në aplikimet pranishëme ne Gjykate, në lidhje me të cilën autoritetet duhet t’i japin kompensim në vend te kthimit ne natyre të pasurisë, shuma e kompensimit do të korrespondojnë me vlerën aktuale të pronës.
81. Në Vrioni dhe të tjerët (i drejtë), cituar më lart, Gjykata i dha kompensim në bazë të hartave të vlerësimit të pronave të miratuara në vitin 2008. Kjo metodë e llogaritjes së dëmit material është aplikuar në mënyrë konsistente në të gjitha gjykimet e mëvonshme të miratuara nga Gjykata ( shih Manushaqe Puto dhe të tjerë, cituar më lart, § 125;. Delvina kundër Shqipërisë (i drejtë), jo 49106/06, § 17, 21 maj 2013;. Karagjozi dhe të tjerët [Komiteti], cituar më lart, §§ 63 dhe 65; Siliqi dhe të tjerët [Komiteti], cituar më lart, § 27; dhe Metalla dhe të tjerët [Komiteti], cituar më lart, § 37).
82. Në rastin konkret, Gjykata duhet të përcaktojë nëse ajo duhet t’i referohet hartave të vlerësimit të pronave të vitit 2008 apo ato të vitit 2014 për llogaritjen e dëmit monetar. Pasi shqyrtoi argumentet e palëve, gjykata bën vërejtjet e mëposhtme.
3. Ne vendimin pilot Manushaqe Puto dhe të tjerë, cituar më sipër, në lidhje me dështimin e autoriteteve për të paguar kompensim në vend të kthimit te pronës u dha nga Gjykata më 31 korrik 2012. Ai u bë përfundimtar më 17 dhjetor 2012. Në paragrafin 121 dhe dispozita operative nr. 7 Gjykata nuk vendosi të shtyjë seancën gjyqësore të rasteve që kishin qenë të parashtruara para dorëzimit të këtij vendimi, por për të vazhduar shqyrtimin e tyre edhe pasi vendimi mori formë të prerë. Në lidhje me këtë, aplikimet e pranishëme ishin paraqitur në Gjykatën midis 15 majit 2008 dhe 19 dhjetor 2011. Njoftimi I per keto aplikimeve i është derguar Qeverise nga 25 janar 2010 deri me 20 dhjetor 2013 .
84. Gjykata merr parasysh argumentet e Qeverisë në favor të aplikimit të hartave të vlerësimit të pronës të vitit 2014 për llogaritjen e dëmit material. Ajo mirëpret faktin se vlerësimet e pronës janë (menduar të jetë) të përditësuar çdo vit në bazë të një metodologjie që u miratua me vendim të Qeverisë në vitin 2012. Megjithatë, kjo nuk është bindur nga propozimet e Qeverisë.
85. Në radhë të parë, hartat vlerësimi i pronës 2014 janë miratuar pas futjes së aplikacioneve të pranishëm, që po shqyrtohen në përputhje me udhëzimet e përcaktuara në vendimin pilot. Në këndvështrimin e Gjykatës, referenca për hartat e vlerësimit të vitit 2014 do të sjellin pabarazi në trajtimin e aplikantëve për aq sa mbështetje të çmimit referent është i shqetësuar.
86. Së dyti, Gjykata do të referohen rezervave të bëra gjatë takimit parlamentar të 7 maj 2012 që vërteton se transaksionet e regjistruara me ZRPP nuk pasqyronin në përgjithësi dhe nuk pasqyronin domosdoshmërisht vlerën reale të tregut, si rezultat i evazionit fiskal të kryer nga palët në një kontratë e shitjes. Rrjedhimisht, Gjykata vlerëson se mbështetja në çmimet e shitjes të transaksioneve të regjistruara do të jetë në mospërputhje flagrante me parimin e mirë-vendosur që kompensimi, në rastet e shpronësimit të paligjshëm, duhet të korrespondojë me vlerën e tregut,dhe Gjykata nuk eshte për të treguar masat për të frenuar dhe luftuar evazionin fiskal.
87. Së treti, dhe e lidhur ngushtë me arsyen e dytë, Gjykata është e shqetësuar se çmimet e pronave në disa qytete, veçanërisht në zonat që përjetojnë një rritje të zhvillimit relativisht të lartë, të tilla si qendër të kryeqytetit, Tiranë, kanë përjetuar një rënie të madhe. Gjykata nuk është në gjendje të flasë arsyet për rënie të tillë, por ajo nuk është e bindur se ata objektivisht pasqyrojnë vlerën aktuale të tregut dhe se ata ishin “interesat dhe inflacioni indeksuar”, në mënyrë që të mbulojë për dëmin shkaktuar nga pamundësia e kompensimit gjatë gjithë këtyre viteve (krahasoni Vrioni dhe të tjerët (shpërblim), cituar më lart, § 37).
88. Nuk mundet qe Gjykata të pranojë raportet e ekspertëve të paraqitura nga aplikantët. Vlerësimi i tyre ishte bazuar kryesisht në çmimet e shitjes të blloqeve të apartamenteve ngritur në parcela ngjitur e tokën në vend të vlerave të krahasueshme të ngastrave fqinje të tokës. Në çdo rast, raportet e ekspertëve nuk jane mbështetur ne çmimet e referencës të cilat, ata, përmendin duke u mbështetur në dokumentet mbështetëse.
89. ……
90. Duke pasur parasysh vlerësimet e mësipërme, Gjykata arrin në përfundimin se ajo duhet të përcaktojë dëmin financiar mbi bazën e hartave të vlerësimit të pronës të vitit 2008. Duke pasur parasysh materialin në zotërim të tij, Gjykata e çmon të arsyeshme për të bërë çmime në lidhje me dëmin pasuror dhe jopasuror te tabuluar në shtojcën nr 3.
Agim Toro
Sekretar i Pergithshem i Shoqates Kombetare te te
Shpronesuarve “Pronesi me Dretesi”
* Shkrimit i paraprine kjo leter per Redaksine e Gazetes Dielli:

Kosova drejt BE-së, çështje thelbësore

by

-Kuvendi i Republikës së Kosovës zhvilloi seancë të veçantë për nder të presidentit të Austrisë, Heinz Fischer/
-Lidhjet e shumëfishta miqësore me Austrinë për Kosovën paraqesin një vlerë kombëtare-/
Nga Behlul Jashari/ PRISHTINË, 29 Tetor 2015/ Kuvendi i Republikës së Kosovës zhvilloi sot seancë të veçantë solemne për nder të presidentit të Austrisë, Heinz Fischer, i cili theksoi se, ndër shtetet e para kemi qenë si Austri që e kemi pranuar shtetin e Kosovës.
“Dhe, në një kohë të mëhershme kemi zhvilluar dhe kontribuar për studimet e ndryshme dhe njohjen e vendit të Kosovës si shtet por edhe për investime në fushën ekonomike, dhe për një zhvillim ekonomik i cili e jep mundësinë për zhvillimin e mëtejmë të bashkëpunimit ekonomik dhe besoj shumë që kjo do të shërbejë edhe më tej në raportin e mirë dhe miqësor në mes Kosovës dhe Austrisë dhe e cila do të kontribuojë në rend të parë për Kosovën dhe ne si Austri jemi të angazhuar që marrëveshjet të cilat arrihen në fillim të këtij viti, që miku im Ahtisari nga Finlanda ka qenë aktiv në shtetndërtimin tuaj dhe këto marrëveshje të realizohen në mënyrë paqësore dhe të bëhen ashtu siç janë parashikuar”, u shpreh presidenti austriak Fischer.
“Ne do të mundohemi që edhe në vitet e ardhshme të kemi marrëdhënie të mëtejshme, t’i thellojmë dhe intensifikojmë bashkëpunimin ekonomik dhe kjo është një çështje për politikën e jashtme thelbësore si rrugë për të qenë pjesë e BE-së dhe integrimit të saj në Bashkimin Evropian. Pra, është i kuptim plotë se integrimi në Evropë nuk është asgjë tjetër veç se një mësim nga historia”, theksoi Fischer.
“Kisha paraparë 15 minuta të flas dhe të ju drejtohem juve për t’u përgjigjur ftesës tuaj që të shpalosë disa mendime për demokracinë, për pluralizmin dhe Evropën”, u shpreh presidenti austriak.
“Edhe një herë dua të falënderohem përzemërsisht për ftesën tuaj dhe e di që kjo nuk është përditshme dhe këtë e vlerësoj shumë dhe falënderoj shumë për vëmendjen tuaj dhe të Parlamentit në këtë vend, demokracisë së vendit, Qeverisë e po ashtu opozitës çdo të mirë dhe përshëndetemi nga ju me dëshirat më të mira për zonjën presidente dhe të ardhmen e vendit tuaj. Faleminderit!”, ka përfunduar presidenti Fisher, i përcjellë me duartrokitje, sikurse edhe në momentin e hyrjes në sallën e sencave të Kuvendit të Kosovës.
“Në emër të Kuvendit të Kosovës, dua t’i shpreh gjithë mirënjohjen shtetit dhe popullit austriak për ndihmën e vazhdueshme dhënë popullit tonë, në kohë të ndryshme, në rrethana të ndryshme, në ditët e vështira që ne kaluam nga koha e çlirimit deri tek pavarësia”, tha kryeparlamentari kosovar, Kadri veseli, duke iu drejtuar presidentit të Austrisë Heinz Fischer.
“Zotëri President, lidhjet e shumëfishta miqësore që vendi ynë ka me vendin tuaj për ne paraqesin një vlerë kombëtare. Ne do të vazhdojmë t’i kultivojmë këto lidhje në funksion të paqes, stabilitetit, zhvillimit ekonomik dhe demokratizimit të plotë të Ballkanit perëndimor, që tani është në rrugën e përbashkët të integrimit në familjen e madhe të demokracive evropiane”, ka theksuar Veseli, duke i uruar mirëseardhje presidentit Fischer edhe në gjermanisht dhe duke e ftuar që t’i drejtohet Parlamentit të Kosovës.
Ai theksoi se, fjalimi i presidentit austriak “shprehë më se miri frymën e bashkëpunimit në mes dy vendeve tona, shprehë përkushtimin e shtetit austriak për t’i qëndruar pranë vendit tonë, në rrugëtimin e tij të konsolidimit demokratik, zhvillimit ekonomik dhe integrimit evropian”.
Adresimi i Presidentit të Austrisë, Heinz Fischer, deputetëve të Kuvendit të Republikës së Kosovës, ishte pika e vetme e axhendës, ndërsa sot ishte seanca e parë e sesionit vjeshtor pa bllokatën e opozitës së bashkuar të tre partive, e cila është shprehur se adresimi i presidentit austriak është nder për Parlamentin.
Liderët e opozitës kanë pasur një takim ku megjithë rezervat e shprehura për Marrëveshjen e Stabilizim-Asociimit të qeverisë së Kosovës me BE-në, se “ajo nuk është e plotë, se ka mundur të negociohej më mirë dhe gjëra të tjera”, është konfirmuar se “opozita nuk do ta bllokojë procesin e votimit për ratifikimin e projektligjit për MSA-në”.
Presidenti austrik dje në takim me presidenten kosovare është shprehur se “ne po i vëzhgojmë me interes edhe ngritjen dhe forcimin e sistemit demokratik në Kosovë, bashkëpunimin midis qeverisë dhe opozitës, gjë që në të gjitha demokracitë është një problem, që mund të jetë problem i vështirë dhe në të cilin mund të ketë momente të vështira”.
“Mirëpo, me vullnet të mirë, këto vështirësi mund të tejkalohen. Këtë e kanë kaluar edhe shtete të tjera demokratike. Edhe për Kosovën do të ketë një sistem të mirë dhe solid demokratik dhe një bazë të mirë ligjore, e cila shërben edhe për zgjidhjen e problemeve”, theksoi presidenti Fischer.
Ndërsa, në takim me kryeparlamentarin Kadri Veseli, duke folur për gjendjen aktuale të krijuar në Kuvendin e Kosovës, presidenti Fischer theksoi se, “ne në Austri, sidomos në përvojën shumë të mirë të Republikës së Dytë, pas Luftës së Dytë Botërore, besojmë se problemet dhe çështjet, edhe kur janë të dhimbshme, duhet të trajtohen e zgjidhen në mënyrë paqësore dhe demokratike”.
Presidenti i Austrisë, Heinz Fischer sot, ditën e dytë të vizitës zyrtare në Kosovë e nisi me takimin në mëngjes me kryeministrin Isa Mustafa.
Në vazhdim të axhendës, sot, presidenti Fischer dhe presidentja Jahjaga marrin pjesë në Forumin Ekonomik Kosovar-Austriak në Prishtinë dhe vizitojnë Prizrenin, Kishën Katolike dhe Xhaminë e Sinan Pashës në qytetin më të madh jugor të Kosovës.