Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Opozita në Kosovë: Protesta në Kuvend dhe jashtë tij, nuk do të ndalet

by

-Opozita ia paraqiti Presidentes së Kosovës kërkesat për tërheqje nga marrëveshjet me Serbinë dhe Malin e Zi/
-Mbledhja e Kryesisë së Kuvendit të Kosovës, e shtyrë, konferencë shtypi pritet në orën 15:00/
Nga Behlul Jashari/ PRISHTINË, 20 Tetor 2015/ Opozita kosovare shprehet se nuk ndryshon qëndrimin kundërshtues për 4 marrëveshjet e 25 gushtit të qeverisë së Kosovës me Serbinë dhe për marrëveshjen e demarkacionit me Malin e Zi, edhe pas takimit sot te Presidentja e Republikës, Atifete Jahjaga të tre liderëve Visar Ymeri i LVV, Ramush Haradinaj i AAK dhe Fatmir Limaj i Nisma.
“Tre kryetarët e subjekteve politike ia paraqitën Presidentes Jahjaga kërkesat e opozitës për tërheqje nga marrëveshjet me Serbinë dhe nga ajo për demarkacionin me Malin e Zi, si kërkesa të cilat nuk kanë kompromis e as që janë të diskutueshme”, bëhet e ditur në deklaratën pas takimit, ku theksohet se “ky takim ishte ftuar nga Presidentja”
Theksohet se, po ashtu e njoftuan Presidenten se protesta e opozitës së bashkuar në Kuvend dhe jashtë tij, nuk do të ndalet me asnjë kusht deri në realizimin e këtyre kërkesave.
“Kryetarët e tre subjekteve shprehën kundërshtimin e tyre të fuqishëm për masat represive policore të cilat po i ndjek qeveria me rrëmbimin e deputetëve dhe torturimin e aktivistëve të subjekteve opozitare me qëllim të frikësimit dhe ndaljes së protestës. Vetëm tërheqja nga marrëveshjet e ndal protestën. Çkado tjetër dërgon në përshkallëzim të situates”, shprehet opozita e bashkuar.
Ndërsa, dje pasdite, Presidentja Jahjaga ka zhvilluar takim me Hashim Thaçin dhe Isa Mustafën në cilësinë e kryetarit të Partisë Demokratike të Kosovës, respektivisht të Lidhjes Demokratike të Kosovës dhe shefat e grupeve parlamentare të këtyre dy subjekteve, Adem Grabovcin dhe Ismet Beqirin.
Në takim ishte edhe Kryetari i Kuvendit të Kosovës, Kadri Veseli.
Këto zhvillime janë në kuadër të iniciativës së Presidentes Jahjaga që të ftojë në takime të ndara udhëheqësit e subjekteve politike në Kosovë për të tejkaluar gjendjen e krijuar në vend.
Në pritje të takimeve të Presidentes me drejtuesit politikë, mbledhja e Kryesisë së Kuvendit të Republikës së Kosovës, e paraparë për dje, është shtyrë për ditën e sotme. “Përgatitjet për vazhdimin e seancës plenare” janë e vëtmja pikë në axhendë në mbledhjen e Kryesisë së Kuvendit që pritej të zhvillohej në këto momente të mesditës, ndërsa paralajmërohet konferencë shtypi për në orën 15:00. Nuk ka ndonjë njoftim kur do ketë seancë plenare të Kuvendit.
Kosova po vazhdon të humb në kohë me Kuvendin e saj, i cili në legjislacionin e kaluar ishte 7 muaj jofunksional, 1 muaj para e 6 muaj pas zgjedhjeve parlamentare parakohëshme të 8 qershorit, derisa u mblodh në seancën konstituive shumë të vonuar në 8 dhjetor 2014.
Para më shumë se një muaji, raportimi i qeverisë së Kosovës lidhur me katër marrëveshjet e arritura në Bruksel më 25 gusht 2015 ishte në axhendë në seancat e para të sesionit vjeshtor në 17 e 22 shtator. Në seancën e parë nuk ishin të pranishëm raportuesit dhe koalicioni qeverisës kërkoi shtyrje, ndërsa në të dytën që u shpall e mbyllur pas disa ndërprerjeve e pa u zhvilluar pati edhe gjuajtje vezësh nga opozita drejt kryeministrit sapo ai nisi raportimin.

Kuvendi i Kosovës pa asnjë seancë të përfunduar në sesionin vjeshtor vazhdon të jetë i bllokuar nga opozita.

“Aksionet simbolike” të opozitës, me “rrethime” të foltores e kryesuesëve, fërshëllima, gjuajtje vezësh e gazi lotësjellës në sallën e seancave të Kuvendit, janë pjesë e kundërshtimeve edhe me protesta në rrugë dhe me një peticion me rreth 200 mijë nënshkrime deri tani, të 4 marrëveshjeve të 25 gushtit me Serbinë dhe marrëveshjes së demarkacionit me Malin e Zi.
Presidentja Jahjaga, priti dje në takim edhe përfaqësues të shoqërisë civile, të cilat ditë më parë bënë deklaratë të përbashkët në mbështetje të dialogut politik për të adresuar zhvillimet e fundit në vend.
Organizata të shoqërisë civile në Kosovë në një deklaratë kanë shprehur opinionin se, “thirrja e seancave plenare pa ndryshim të qëndrimeve dhe rrethanave politike, nuk i shërben daljes nga situata e krijuar politike”, ndërsa theksojnë se “gjuha e dialogut politik është forma e vetme e zgjidhjes së problemeve politike”.

Protesta & Dhunë në Podgoricë – Opozita Malazeze kërkon dorëheqjen e kryeministrit Gjukanoviç

by

PODGORICË, 19 tetor – Millo Gjykanoviç e qeveris Malin e Zi si një shtet privat, thotë opozita. Protestat kritike ndaj qeverisë mposhten me forcë. Por rezistenca po rritet në shetin e vogël ballkanik.Në ditën e dytë radhazi protestat të dielën (18.10) në Mal të Zi u përshkallëzuan në konfrontime të dhunshme mes demonstruesve dhe policisë. Mijëra vetë në mbrëmje dolën në rrugët e Podgoricës duke kërkuar dorëheqjen e kryeministrit Millo Gjykanoviç dhe qeverisë së tij të majtë, siç njofton një gazetar i agjencisë së lajmeve AFP. Nga radhët e demonstruesve u hodhën gurë dhe flakhedhës në drejtim të policisë. Forcat e rendit përdorën gazin lotsjellës.
Të shtunën policët kishin penguar marshimin e qindra njerëzve drejt parlamentit. Njësi të përforcuara policie rrethuan parlamentin dhe godinën qeveritare. Kur demonstruesit u përpoqën të çajnë bllokadat, policia përdori gazin lotsjellës.
Pak më parë policia kishte shpërndarë një kamping protestuesish të vendosur qysh përpara disa javësh para parlamentit. Shumë protestues u dëbuan nga ky shesh.
Opozita në Mal të Zi kërkon një qeveri tranzicioni dhe zgjedhje të reja. Qysh në fund të shtatorit mijëra vetë në Podgoricë kanë protestuar kundër Gjykanoviçit. 53-vjeçari është që nga fillimi i viteve 90-të në pushtet në ish-republikën jugosllave me rreth 630.000 banorë. Në këtë mënyrë ai është ndër politikanët me vjetërsinë më të lartë në Europën Juglindore.
Në qershor Gjykanoviç u rizgjodh në krye të partisë socialiste në pushtet në Mal të Zi me rezultat eksepsional prej njëqind për qind të votave. Kjo ndodh rrallë madje edhe tek udhëheqësit e fortë partiak në gadishullin e Ballkanit.
Zgjedhjet e rregullta parlamentare në Mal të Zi zhvillohen në pranverë 2016. Për të shtunën (24.10) e ardhëshme opozita planifikon protesta masive.

BE quan Europë vetëm BE – Opozita nuk është rrezik për Kosovën – Status quo-ja e imponuar nga BE po!

by

Nga Elida Buçpapaj/
Në janar të këtij viti kam shkruar një opinion me titullin eksplicit „Kosova geto në zemër të Europës“. Nuk e ka krijuar Kosova këtë situatë, që të vetëgetoizohet, por ndërkombëtarët, ose shkurt thënë BE-ja. Kosova në fund të shekullit XX viktimë e një regjimi kriminal, vijon në shekullin XXI të mbetet viktimë e mentalitetit anakronik të BE-së.
Kosova vendi i vetëm në Ballkan që nuk përfiton nga sistemi Shengen, dhe tani populli i Kosovës po kërcënohet nga faktorë kryesorë të BE-së se, nëse mbështet opozitën, do të mbetet jashtë Shengenit përsëri!
Opozita e Kosovës nuk është armikja e Kosovës. Opozita e Kosovës nuk është as fashiste dhe as terroriste. Opozita e Kosovës është pro Amerikane, pro BE dhe pro Kosovës, por që nuk mund të ngopet me lugën bosh, sepse as barku i popullit të Kosovës nuk ngopet me lugën bosh.
Tash opinioni kosovar e ka kuptuar qartë se BE-ja ka përdorur mënyra jodemokratike për të mbajtur Thaçin në qeverisje, duke synuar edhe riciklimin e tij si President. Hashim Thaçi një lloj hibridi i Putinit në Ballkan, i krijuar si lider kukull me vizën e BE-së! Krejt absurde dhe në kundërshtim me vlerat demokratike të Perëndimit.
Kur opozita krijoi pas zgjedhjeve të qershorit 2014 aleancën e VLAN-it, BE-ja nuk e pranoi fuqinë e votës së opozitës në Kosovë, që do t’ja hiqte Thaçit shansin të qeveriste vendin për mandat të tretë. Kur opozita përdorte pushtetin e votës, BE-ja nuk e pranoi këtë pushtet, duke i imponuar Kosovës një aleancë kukull – midis Thaçit dhe Isa Mustafës. Them aleancë kukull, sepse Isa Mustafa, kur hyri në aleancë me Thaçin, ai e tradhtoi elektoratin e tij. Në fushatën zgjedhore Mustafa e kërkoi votën për LDK-në me premtimin dhe qëllimin politik se do ta linte Hashim Thaçin në opozitë.
BE-ja nuk e pranoi fuqinë e votës së opozitës së Kosovës kur kjo ishte me formacionin politik si VLAN, duke krijuar kështu përshtypjen në mbarë opinionin shqiptar se ishte vetë BE-ja pas martesës perverse midis Thaçit dhe Isa Mustafës, kur as njëri dhe as tjetri nuk gëzojnë simpatinë minimale, sepse janë vetë institucionet ndërkombëtare Perëndimore që qeverisjet e tyre i vlerësojnë të korruptuara dhe autokratike.
Veprimet e opozitës aktualisht në Parlamentin e Kosovës janë legjitime.
Opozita duhet të jetë shumë e kujdeshme, sepse SHIK-u synon ta inkriminojë. Për të mbrojtur integritetin e saj, opozita duhet të mos shkaktojë asnjë lloj dëmi që ia cënon asaj imazhin e veprimit politik, për të tjerat, brenda normave demokratike, është e lirë të veprojë. Të evitohet edhe rasti si i deputetes Flora Brovina. Asnjë dëm dhe dëmtim të mos shkaktohet nga veprimet opozitare.
Ndërsa pretendimet se veprimet e opozitës janë fashiste dhe rrezik jo vetëm për Kosovën, por edhe për rajonin janë manipulim i pastër. Fotoja e zëvendësit të Hashim Thaçit, Petrit Selimi, me të birin bashkë me Daçiçin, ndërkohë që Daçiçi deklaron se Kosova është ISIS, janë shprehja më vulgare se shefi i Petrit Selimit është në pozita thellësisht vasale me Serbinë. Daçiç quan Kosovë vetëm Thaçin dhe Petrit Selimin, ndërsa pjesa tjetër, sipas tij, është ISIS. Por Kosova nuk mund të barazohet as me dy vetë apo me tre vetë, me Hashim Thaçin, Petrit Selimin e Isa Mustafën. Kosova barazohet me popullin e saj, të papunë dhe lënë në mjerim nga kjo qeverisje.
Shqiptarët e Kosovës nuk janë indianët e Amerikës të kohës së Kristofor Kolombit. Populli i Kosovës nuk mund të qeveriset nga një regjim, cilësuar nga më të korruptuarat e Europës, vetëm për të kënaqur orekset e Beogradit, që në të gjitha daljet zyrtare e konsideron Kosovën si pjesë të Serbisë, kur 25 vende të BE-së e kanë njohur Kosovën si shtet të pavarur. Kjo e detyron BE-në që në raportin Kosovë-Serbi, të operojë në përputhje me verdiktin e shumicës së popujve të BE-së që e kanë njohur pavarësinë e Kosovës si shtet sovran.
BE-ja duhet të dale nga statusi i burokratit që dëmton së pari interesat e vetë Europës. Një BE burokratike, indiferente, cinike ndaj fatit të pjesës të saj, siç është Kosova, është e papranushme. Kur ekzistonte Muri i Berlinit ishte e justifikuar, tani jo!
Pasojat e strategjisë izolacioniste të BE-së, ku për të, Europë domethënë vetëm BE, është shkatërrimtare për Europën. Kriza sot me refugjatët sirianë që po dynden me miliona në BE duke rrezikuar vërtetë stabilitetin e BE-së, është produkt i verbërisë së saj. Zyrtarët e BE-së dhe padronët e tyre u treguan syleshë, sepse të mësuar me limuzina e avionë me bileta të klasit të parë, të rrethuar nga sekretaret dhe mantenutat, nuk e kanë imagjinuar se sirianët apo popullsia nga vendet e Afrikës mund të arrinin në zemër të BE-së duke përshkruar në këmbë me mijra e mijra kilometra.
Po më në fund, a i ka dalë gjumi BE-së ?
Sepse produkt i syleshësisë të BE-së është edhe e status quo-ja në Kosovë, që ka imponuar një regjim mizerabël dhe të dështuar, ku papunësia, informaliteti dhe korrupsioni ua ka djegur të gjitha shpresat popullit të Kosovës. Pas sirianëve, kosovarët janë të dytët që ikin nga sytë këmbët nga vendi i tyre. Prej deportimit të kohës të Milosheviçit, ky është dëbimi i dytë që i bëhet popullit të Kosovës nga qeverisja. Pavarësisht se Zoti e ka krijuar Kosovën në zemër të Europës, ajo është një geto dhe Tokë e Djegur për popullin e saj.
Pretendimet e BE-së se Thaçi vendos stabilitet është iluzion dhe spekulim. Kosova do të jetë e destabilizuar deri sa aty nuk do të ketë kushte minimale të jetës. Njerëzit mund t’i vrasësh në dy mënyra: përmes bombave të Asadit, përmes barbarive të ISIS ose duke ua hequr qytetarëve perspektivën e së ardhmes që të fitojnë bukën e gojës për fëmijët e tyre me punë të ndershme.
Prandaj veprimet e opozitës të Kosovës nuk janë kundër Kosovës, por pro Kosovës.
Organizimet e opozitës të Kosovës kanë „degjeneruar“ dhe prodhuar dhunë vetëm kur segmente të SHIK-ut, njerëz të Thaçit dhe Kadri Veselit kanë interferuar kriminelë midis protestuesve.
Prandaj opozita tani operon brënda Parlamentit të Kosovës me vezë dhe gazlotësjellës.
Zgjidhja është se Kosova nuk mund të qeveriset nga regjime kukulla, të cilat brenda vetes janë të kalbura nga krimi dhe korrupsioni. Kosova është Europë ndaj kërkon nga BE-ja një qasje të përgjegjëshme sipas parimeve demokratike të Perëndimit.
Kosova e ndërton vetë demokracinë, në bashkëpunim me aleatin e saj jetik SHBA dhe BE, në kuadrin e integrimeve Euro-Atlantike, por jo si deri më tani, si një koloni në Afrikën e kohës koloniale. Kosova është Europë. Europë nuk do të thotë vetëm BE.
Për 15 vjet rresht pas ndërhyrjes të NATO-s, qytetarët e Kosovës, duke iu bindur verbërisht verbërisë të BE-së nuk e kanë gëzuar të drejtën e lëvizjes përmes sistemit Shengen, dhe tani BE-ja kërkon t’ju imponohet duke i kërcënuar se do t’i lejë prapë pa Shengen !
Mënyrat e imponimit të BE-së permes ndëshkimeve që BE-ja iu bën jo politikanëve të korruptuar, por popullit të Kosovës janë dështimi më i madh i BE-së.
Dhe bilbilat e gazi lotsjellës në Parlamentin e Kosovës është këmbanë për ndërgjegjen e BE-së.
Që të zgjohet sa më parë deri sa nuk është vonë!

Kosovë, Kuvendi bllokohet nga opozita edhe në vazhdimin e seancës së ndërprerë

by

-Opozita: Shumë të vendosur ta bllokojmë punën e Kuvendit derisa të tërheqet nënshkrimi për ‘Zajednicën’ (Bashkësinë e komunave me shumicë serbe në Kosovë)/

-Opozita e bashkuar ka organizuar edhe një petecion, ndërsa ka bërë të ditur se deri tash janë mbledhur më shumë se 100 mijë firma dhe vazhdohet me nënshkrimet në Kosovë dhe në diasporë/

Nga Behlul Jashari/ PRISHTINË, 1 Tetor 2015/Vazhdimi sot i seancës së Kuvendit të Kosovës, të parës të sesionit vjeshtor, të nisur e ndërprerë në 17 shtator, është rindërprerë, nuk vijon, dhe sipas opozitës nuk do të mund të ketë as nesër sencë të re, e cila është në axhendën e përcaktuar më herët nga Kryesia me shefat e grupeve parlamentare, pa praninë e përfaqësuesve të opozitës.

Kuvendi i Kosovës kishte në axhendë sot shqyrtimin e pikave të papërfunduara në seancën e 17 shtatorit, ndërsa nesër në seancë të re ka në rend dite të shqyrtohen kryesisht projektligje. Kështu ishte paralajmëruar në axhendën zyrtare, por vazhdimin e seancës së ndërprerë në 17 shtator përsëri sot e bllokoi protesta e opozitës së bashkuar me “rrethimin”  te foltorja dhe te kryetari i Kuvendit të Kosovës.

Në pamundësi të zhvillimeve të punimeve të seancës, kryetari i kuvendit të Kosovës, Kadri Veseli dha gjysëm ore pushim.

Përkundër bllokimit nga opozita me 31 deputetë në Kuvendin e Kosovës 120 anëtarësh, Veseli tha se, “sa të jem unë kryetar i Kuvendit në këtë sallë nuk do të hyjë sigurimi në asnjë moment”, ndërsa kërkoi që të mundësohet debati dhe mikrofonin e kryesuesit ia afroi kryetarit të grupit parlamentar të LVV-së, Glauk Konjufca që të shprehte qëndrimin e opozitës së bashkuar.

Sipas Konjufcës, “në 25 gusht Isa Mustafa e ka nënshkruar në Bruksel t’ia japë Serbisë 30 për qind të territorit të Kosovë”, ndërsa shtoi se “askush nuk ka mandat për këtë, të dëmtojë sovranitetin e shtetit tonë”.

“Për këtë arsye, opozita është shumë e vendosur ta bllokojë punën e Kuvendit derisa Isa Mustafa të vijë këtu dhe të tërheqë nënshkrimin për ‘Zajednicën’ (Bashkësinë e komunave me shumicë serbe në Kosovë)”, u shpreh Konjufca, i LVV-së.

Kryetari i grupit parlamentar të PDK-së, Adem Grabovci, tha se, “ne asnjëhërë të vetme nuk kemi qenë kundër debatit, kemi qenë dhe jemi për debat për t’i ngritur e diskutuar të gjitha cështjet bashkërisht”.

Por, vijoi ai, “kjo që po ndodhë nga kolegët e nderuar të opozitës është një mohim i të drejtës së deputetit”.

“Pakica po e pengon shumicën. Parlamenti i Kosovës i ka 120 deputetë dhe duhet t’u lejohet mundësia të gjithëve të paraqesin qëndrimet e shqetësimet e tyre, dhe së fundi e marrim një qëndrim të përbashkët ashtu si na takon si institucion vendimmarrës. Dhe, kurrësesi të bëhen përpjekje që në mënyrë të dhunëshme t’i dëmtojmë interesat e vendit, të shtetit tonë”, tha Grabovci.

“Prandaj, kërkoj që të ndërpritet seanca dhe të thirret mbledhja e Kryesisë me shefat e grupeve parlamentare për të marrë një qëndrim të përbashkët, të bëhet përpjekje për të gjetë gjuhë të përbashkët për të zhbllokuar jetën institucionale, Kuvendin e shtetin e Kosovë”, tha shefi i grupit parlamentar të PDK-së, partisë më të madhe të koalicionit qeverisës.

Ndërsa, nga grupi parlamentar i partisë së dytë të koalicionit qeverisës, LDK-së, Arben Gashi, duke iu drejtuar kryeparlamentarit Vesli tha se e vlerëson vullnetin e tij, por shtoi se “është e papranueshme që deputeti të flasë prej mikrofonit të kryetarit të Kuvendit”, sic foli shefi i grupit parlamentar të LVV-së.

“Duhet të krijohen kushtet që Kuvendi të vazhdojë punimet”, shprehu qëndrimin e grupit parlamentar të LDK-së deputeti Gashi.

Grupi parlamentar i Listës Serbe dhe i ai i komuniteteve tjera pakicë Gjashtë Plus nuk u deklaruan. Pauza e dhënë ende po vazhdon edhe pas kalimit të gjysëm ore.

Në përgatitjet për seancat plenare, në axhendën e mbledhjes së Kryesisë së Kuvendit me kryetarët e grupeve parlamentare ishte edhe “pika e papërfunduar nga seanca lenare më 22 shtator 2015: Raportimi i qeverisë së Republikës së Kosovës lidhur me Marrëveshjet e arritura në Bruksel më 25 gusht 2015”, por u vendos që të mos jetë në rendin e ditës sot as nesër.

Raportimi për katër marrëveshjet e Kosovë-Serbi në Bruksel ishin në axhendë edhe në seancat e 17 e 22 shtatorit, të cilat u ndërprenë nga protestimet e deputetëve të opozitës. Në seancën e parë nuk ishin të pranishëm raportuesit dhe koalicioni qeverisës kërkoi shtyrje, ndërsa në të të dytën që u shpall e mbyllur pas disa ndërprerjeve e pa u zhvilluar pati edhe gjuajtje vezësh nga opozita drejt kryeministrit sapo ai nisi raportimin.

Para seancave plenare sot dhe nesër, opozita e bashkuar nuk ka marrë pjesë në mbledhjen e Kryesisë me shefat e grupeve parlamentare, ndërsa ka paralajmëruar se do ta pamundësojë funksionimin normal të Kuvendit të Kosovës deri në tërheqjen e nënshkrimeve nga marrëveshjet e 25 gushtit me Serbinë dhe nga marrëveshja për demarkacionin me Malin e Zi.

Në kundërshtim të këtyre marrëveshjeve, opozita e bashkuar ka organizuar edhe një petecion, ndërsa ka bërë të ditur se deri tash janë mbledhur më shumë se 100 mijë firma dhe vazhdohet me nënshkrimet në Kosovë dhe në diasporë.

Kosovë-Peticioni mbi 90 mijë nënshkrime në 8 ditë

by

-Shtypi: Opozita pa alternativë/PRISHTINË, 27 Shtator 2015/ “Afër 100 mijë nënshkrime kundër ‘Zajednicës’ dhe demarkacionit me Malin e Zi”, janë mbledhur sipas njoftime të opozitës në Kosovë. “Dita e tetë 90,076 nënshkrime”, është numri deri në përfundimin e ditës së djeshme, i peticionit që vazhdon të nënshkruhet, organizuar nga opozita, e cila shprehet me fjalën serbe “Zajednica” që në shqip do thotë “Bashkësi” dhe nënkupton Bashkësinë e komunave me shumicë serbe në Kosovë, e cila është një nga katër marrëveshjet e 25 gushtit Prishtinë-Beograd, në Bruksel.

 “Qeveria të tërheqë menjëherë nënshkrimin nga katër marrëveshjet me Serbinë të datës 25 gusht 2015 si dhe nga marrëveshja për demarkacionin me Malin e Zi”, kërkohet në peticion.

“Opozita e bashkuar” kosovare ka paralajmëruar protesta pas peticionit. Subjekti më i madh opozitar në Kosovë, LVV, ka bërë  edhe “thirrje për vullnetarë, për mobilizim të përgjithshëm për ta mbrojtur Republikën”.

“Thërrasim për vullnetare e vullnetarë që janë të gatshëm të na ndihmojnë në organizimet tona të përditshme siç janë aksionet simbolike, tubimet me qytetarë, peticioni, organizimi i protestave, punë administrative, organizimi i takimeve të ndryshme, punët logjistike, ndihma në punën dhe kontaktin me media dhe qytetarë, etj.”, shprehet  LVV.

Tre subjektet opozitare të Kosovës, LVV, AAK e Nisma, me gjithësej 31 deputetë në parlamentin 120 anëtarësh, kanë protestuar në Kuvend dhe kanë bllokuar e ndërprerë seancën e parë të sesionit vjeshtor, në dy ditë – të nisjes dhe të vazhdimit, ku ka pasur edhe gjuajtje me vezë drejt kryeministrit kosovar.

Ndërsa, “Opozita pa alternativë”, është kryetitull i shtypit të sotëm në Kosovë.

Gazeta Koha Ditore  shkruan se, në vend të argumenteve, janë thyer vezët këtë javë në Kuvend. Ato u hodhën nga deputetët opozitarë në drejtim të kryeministrit Isa Mustafa që në nisje të raportimit të tij për katër marrëveshjet e fundit me Serbinë.

Opozitarët i ikën ballafaqimit të argumenteve në këtë seancë plenare, e cila u shty për një ditë tjetër, shkaku që, pas aksionit kundër Mustafës, ata penguan fizikisht edhe zhvillimin e punimeve të mëtejme. Një seancë e ndërprenë edhe javën e shkuar.

Dhe, këtyre veprimeve dhe arsenalit të vezëve i kanë paraprirë edhe aksione të tjera, sikur gjuajtja në dy raste të ndara në drejtim të eskortës së kryeministrit, tentativa për të zhvilluar edhe aksione proteste në shtëpinë e tij në fshatin Prapashticë të Prishtinës, e edhe shfryrja e gomave të dhjetëra veturave qeveritare.

Veprimet janë dënuar nga institucionet shtetërore, ndërsa kanë marrë notë negative edhe nga shumë diplomatë të akredituar në Prishtinë.

Radikalizmi i opozitës shihet si pafuqi e saj për të konkurruar me ide në skenën politike, e njëkohësisht mungesë e alternativave kundrejt politikave qeveritare.

Vëzhgues të zhvillimeve politike thonë se do t’i kushtojë kjo më së shumti vetë opozitës. Po kështu, edhe se viktimizimi i kryeministrit mund ta mobilizojë rreth tij një pjesë të heshtur të elektoratit. Një alarm që japin, është edhe ai se armiqësia mund të bartet edhe në publik”, thuhet, mes tjerash,  në shkrimin e gazetës./b.j/