Presidentja Jahjaga – Page 5 – Dielli

President Jahjaga awarded writer Ismail Kadare the Order of Independence

September 11, 2015 by dgreca

The President of the Republic of Kosovo, Madam Atifete Jahjaga, met today, at his home in Tirana, the big Albanian world-renowned writer, Mr. Ismail Kadare, whom she awarded the Order of Independence, for the outstanding contribution for the affirmation of Albanian culture and literature and for the great contribution in the efforts of Kosovo for freedom and independence.

President Jahjaga highly praised all the work and commitment of Ismail Kadare not only in the field of literature and thanked him for the great support for the people of Kosovo in the worst times of its history.

The big writer, Ismail Kadare, while thanking President Jahjaga for honoring him, stressed that she has played an extraordinary role in the building of the image of Kosovo in the world.

Presidentja e Kosovës, Jahjaga e dekoroi shkrimtarin Ismail Kadare me Urdhrin e Pavarësisë

September 11, 2015 by dgreca

TIRANË, 11 Shtator 2015/ Presidentja e Republikës së Kosovës, Atifete Jahjaga, takoi sot në shtëpinë e tij në Tiranë shkrimtarin e madh shqiptar me renome botërore, Ismail Kadare, të cilin e dekoroi me Urdhrin e Pavarësisë, për kontributin e jashtëzakonshëm për afirmimin e kulturës dhe letërsisë shqipe dhe për kontributin e madh në përpjekjet e Kosovës për liri dhe pavarësi.Presidentja Jahjaga e vlerësoi lart gjithë punën dhe angazhimin e Ismail Kadaresë jo vetëm në fushën e letërsisë dhe e falënderoi për gjithë përkrahjen dhe mbështetjen e madhe për popullin e Kosovës edhe në kohët më të rënda të historisë së tij.

Shkrimtari i madh Ismail Kadare, duke e falënderuar Presidenten Jahjaga për nderimin që i ka bërë, theksoi se ajo ka luajtur një rol të jashtëzakonshëm në ndërtimin e imazhit të Kosovës në botë./b.j/

Kosovë- Festohet 100 vjetori i shkollës shqipe në Deçan

September 1, 2015 by dgreca

-Jahjaga: Jemi larg e afër nga BE-ja aq sa kemi kryer punët tona/
-Kosova ka një trashëgimi të pasur kulturore e fetare, dhe një prej tyre është edhe Manastiri i Deçanit/
Nga Behlul Jashari/ DEÇAN, 1 Shtator 2015/ Kosova është afër a larg Bashkimit Evropian aq sa kryen punët e veta, u shpreh sot Presidentja e Republikës, Atifete Jahjaga.
“Ne jemi aq larg po edhe afër nga BE-ja për aq sa kemi kryer punët tona. Dhe, prandaj duhet të tregojmë pjekurinë tonë dhe vizion për të ardhmen, e cila ndërtohet bashkërisht për një shoqëri të njerëzve të lirë me mundësi të qarta dhe të barabarta për zhvillim dhe përparim. Një shtet të së drejtës, me një sistem të përparuar e modern të arsimimit”, theksoi ajo në manifestimin për 100 vjetorin e shkollës shqipe në trevën e Deçanit.
“Dëshmia më e mirë është shënimi i këtij përvjetori të 100-të të shkollës shqipe në këto treva”, u shpreh Presidentja e Kosovës në manifestimin e organizuar nga shoqata e historianëve të Kosovës “Ali Hadri”, dega në Deçan.
“Kosova si edhe çdo vend tjetër i ka vështirësitë e veta të tranzicionit, që shkaktojnë dhimbje, padurim, por edhe mospëlqim. Një periudhë që ndoshta zgjat më shumë, sepse kërkon më shumë punë dhe reforma të thella në shoqëri, që sado të dhimbshme të jenë këto reforma, janë të domosdoshme për neve, për shoqërinë tonë, për shtetin tonë dhe do të ndihmojnë shoqërinë tonë të përafrohet me BE-në”, tha Jahjaga.
Kosova, vijoi ajo, është vend i traditave të mirëkuptimit e mirëbesimit, vend shumëkulturor i tolerancës dhe kultivimit të harmonisë kombëtare dhe fetare. “Në veçanti kjo pjesë e Kosovës, Rrafshi i Dukagjinit, ka dëshmuar me shekuj këtë histori të tolerancës dhe të bashkëpunimit fetar”, u shpreh Presidentja kosovare.
Jahjaga theksoi se, Kosova ka një trashëgimi të pasur kulturore e fetare, dhe një prej tyre është edhe Manastiri i Deçanit, një objekt tashmë në mbrojte të UNESCO-s, vend anëtar i së cilës organizatë së shpejti do të bëhet edhe Kosova.
“Ky Manastir, që mban emrin e qytetit tuaj, një objekt i trashëgimisë dhe kultit fetar ortodoks, gjatë historisë mbijetoi dhe u ruajt nga banorët e zonës – kryesisht fise shqiptare. Kjo traditë besoj se duhet të kultivohet edhe në të ardhmen, sepse kështu ruajmë pasuritë dhe trashëgiminë e Kosovës dhe sepse kështu kultivojmë ndjenjën e lirisë dhe të barazisë”, tha ajo.
-Unë, vijoi Jahjaga, angazhohem që marrëdhëniet me Manastirin të zhvillohen në frymën e bashkëpunimit të mirë, të mirëkuptimit dhe mirëbesimit me ata që shërbejnë në atë vend, duke mundësuar njëkohësisht edhe kryerjen e të gjitha detyrave dhe obligimeve si pushtet komunal.
“Ne duhet ta respektojmë frymën e Kushtetutës dhe të Ligjeve të Republikës së Kosovës dhe njëkohësisht obligimet tona të marra me Paketën e Ahtisaarit. Vetëm sundimi i ligjit dhe zgjidhjet institucionale janë të qëndrueshme dhe njëherësh të pranueshme”, tha Presidentja Jahjaga.
Në manifestim morën pjesë edhe ish-presidenti i Kosovës, Fatmir Sejdiu, ish-kryetari i Kuvendit, Jakup Krasniqi, kryetari i komunës së Deçanit, Rasim Selmanaj, anëtarë të familjeve të dëshmoreve, përfaqësues të Institutit të Historisë dhe studiues.
Pas përfundimit të manifestimit, Presidentja Jahjaga vizitoi shkollën fillore “Sylë Alaj” në Drenoc të Deçanit dhe bashkëbisedoi me nxënësit dhe me personelin arsimor, ndërkohë që sot në gjithë Kosovën filloi viti i ri shkollor.
Komuna e Deçanit kufizohet me Shqipërinë dhe Malin e Zi, është në pjesën më perëndimore të Kosovës, te Alpet Shqiptare, ka një sipërfaqe prej 372 km², 66000 banorë, dendësi të popullsisë rreth 200 banorë në 1km², lartësitë mbidetare prej 550 deri në 2.656 metra.

Kosovë – Kongresistët amerikanë vlerësojnë të arriturat, theksojnë mbështetjen e SHBA-së

August 20, 2015 by dgreca

-Presidentja Jahjaga theksoi rëndësinë e partneritetit të Kosovës me SHBA-në dhe angazhimin amerikan për stabilitetin dhe paqen jo vetëm në Kosovë por edhe në gjithë rajonin e Evropës Juglindore/
-Kryeministri Mustafa shprehu përkushtimin për fuqizimin e bashkëpunimit bilateral dhe shkëmbimeve të gjithanshme me SHBA-të, si partneri kryesor strategjik i Republikës së Kosovës/
Kryeparlamentari Veseli theksoi se, Kosova vazhdon të mbetet prioritet i Shteteve të Bashkuara të Amerikës, kjo është një garanci e fuqishme që ne do të kemi sukses në projektet tona të mëdha të zhvillimit ekonomik, të forcimit si shtet i pavarur dhe demokraci funksionale/
Nga Behlul Jashari/ PRISHTINË, 20 Gusht 2015/-Kongresistët amerikanë në vizitën e takimet në nivel të lartë në Prishtinë vlerësojnë të arriturat e mëdha të Kosovës dhe theksojnë mbështetjen e SHBA-së.
Presidentja e Republikës së Kosovës, Atifete Jahjaga priti sot në takim delegacionin e kongresistëve të Kongresit të SHBA-së, Vern Buchanan, David Price, Adrian Smith, Dina Titus dhe Susan Davis, me të cilët bashkëbisedoi për zhvillimet aktuale në Kosovë si dhe për mundësitë e zhvillimit ekonomik të vendit.
Anëtarët e delegacionit të kongresistëve të Kongresit të SHBA-së vlerësuan të arriturat e mëdha të Kosovës dhe theksuan mbështetjen e SHBA-së për proceset në të cilat ndodhet vendi. Ata thanë se gjatë vizitës kanë parë kapacitet të mëdha njerëzore dhe resurse natyrore për një zhvillim ekonomik të vendit që do të mundësojë hapjen e vendeve të punës për të rinjtë e Kosovës. Anëtarët e delegacionit theksuan rëndësinë e forcimit të partneritetit të SHBA-së me Kosovën dhe kërkimin e mënyrave të bashkëpunimit më të ngushtë ekonomik, me mundësi të investimeve.
Presidentja Jahjaga theksoi rëndësinë e partneritetit të Kosovës me SHBA-në dhe angazhimin amerikan për stabilitetin dhe paqen jo vetëm në Kosovë por edhe në gjithë rajonin e Evropës Juglindore. Ajo tha se vazhdimi i pranisë amerikane, përmes angazhimit në forcën paqeruajtëse të NATO-s, ka një domethënie të madhe për sigurinë dhe paqen në gjithë rajonin dhe është një garantuese e stabilitetit. Ajo theksoi se Kosova sot ka nevojë për forcimin e mëtejmë të partneritetit me SHBA-në për të garantuar suksesin në proceset demokratike në të cilat aktualisht ndodhet.
Presidentja Jahjaga theksoi se Kosova ka arritur të konsolidohet në skenën ndërkombëtare dhe po kërkon vendin e saj në organizatat ndërkombëtare, përfshirë edhe OKB-në dhe BE-në. Ajo tha se Kosova është një faktor i stabilitetit dhe i fqinjësisë së mirë dhe ka treguar edhe përkushtimin e saj për të jetuar ne paqe me të gjithë fqinjët e saj përfshirë edhe Serbinë, me të cilën aktualisht ndodhet në një proces të dialogut për normalizimin e marrëdhënieve. Ajo gjithashtu theksoi rëndësinë e mbajtjes hapur të perspektivës evropiane të Kosovës dhe të gjithë rajonit, që do të ndihmonte të gjitha vendet e Evropës Juglindore përfundimin e reformave në shoqëri, ruajtjen e momentit të krijuar të marrëdhënieve të mira dhe do të pengonte ndikimet nga një palë e tretë.
Presidentja Jahjaga tha se Kosova është duke forcuar sundimin e ligjit dhe të rendit dhe po bëhet një kontribuuese e fuqishme në fushën e sigurisë globale, si një partnere e rëndësishme ndërkombëtare në luftën kundër ekstremizmit dhe radikalizmit dhe se vendi asnjëherë nuk do të bëhet strehë e sigurt për ekstremistët. Presidentja Jahjaga foli edhe për viktimat e dhunës seksuale gjatë luftës dhe përpjekjet, pas 15 vjet të përfundimit të luftës, për të rehabilituar dhe re integruar në shoqëri viktimat e kësaj dhune.
Kryeministri i Republikës së Kosovës, Isa Mustafa, priti poashtu në takim delegacionin e kongresistëve të Shteteve të Bashkuara të Amerikës, të përbërë nga Vern Buchanan, David Price, Adrian Smith, Dina Titus dhe Susan Davis.
Gjatë takimit, kryeministri Mustafa dhe kongresistët amerikanë biseduan për proceset aktuale në Kosovë, për reformat që po ndërmerr Qeveria e Kosovës në shumë fusha, mundësitë e zhvillimit ekonomik dhe proceset integruese euroatlantike.
Kryeministri Mustafa shprehu mirënjohjen e Qeverisë dhe të qytetarëve të Kosovës për përkrahjen e vazhdueshme që Shtetet e Bashkuara të Amerikës po japin për Kosovën, në të gjitha fushat.
Mustafa poashtu shprehu përkushtimin e Republikës së Kosovës për fuqizimin e bashkëpunimit bilateral dhe shkëmbimeve të gjithanshme me SHBA-të, si partneri kryesor strategjik i Republikës së Kosovës.
Duke folur për progresin që po arrihet në Kosovë, kryeministri Mustafa i njoftoi me axhendën e Programit të Qeverisë, e cila e ka prioritet kryesor zhvillimin ekonomik, hapjen e vendeve të punës, forcimin e shtetit ligjor, luftën kundër korrupsionit dhe krimit të organizuar si dhe proceset integruese evropiane.
Gjatë takimit, u bisedua edhe për procese tjera dhe dialogun për normalizimin e raporteve ndërmjet Republikës së Kosovës dhe Serbisë.
Anëtarët e delegacionit të kongresistëve të SHBA-së vlerësuan lart progresin e arritur në Kosovë.
Ata theksuan përkrahjen e mëtutjeshme të Shteteve të Bashkuara të Amerikës për avancimin e proceseve në Kosovë.
Kongresistët amerikanë gjatë takimit, u interesuan edhe për mundësitë e zhvillimit ekonomik dhe për klimën e investimeve në Kosovë.
Edhe kryetari i Kuvendit të Kosovës, Kadri Veseli, së bashku me anëtarët e Kryesisë së Kuvendit, ka pritur sot në një takim një grup kongresmenësh amerikanë, të kryesuar nga Vern Buchanan, të cilët janë anëtarë të Komisionit të Kongresit për Partneritet në Zhvillimin e Demokracisë. Me këtë rast, u bisedua për partneritetin e deritashëm ndërmjet Kongresit Amerikan dhe Kuvendit të Kosovës, si dhe për përkrahjen e madhe që mekanizmat e Kongresit i kanë dhënë Kuvendit të Kosovës në ngritjen e kapaciteteve të tij legjislative dhe politike.
Buchanan u shpreh se përkrahja amerikane do të vazhdojë edhe në të ardhmen, si pjesë e mbështetjes së gjithanshme të SHBA-së për Kosovën.
Kryetari Veseli falënderoi delegacionin e Kongresit Amerikan për këtë mbështetje, duke theksuar se ecja përpara e Kosovës dhe kapërcimi i sfidave me të cilat ballafaqohet aktualisht vendi varen nga partneriteti me SHBA-në dhe botën perëndimore në përgjithësi.
Veseli dhe Buchanan vlerësuan gjithashtu se forcimi i institucioneve demokratike në Kosovë, kërkon mes tjerash, një përqendrim më të madh në fushën e ekonomisë, sepse zhvillimi ekonomik është njëri ndër faktorët më të rëndësishëm në forcimin e demokracisë dhe shtetit të së drejtës.
Kreu i Kuvendit vlerësoi se, ishte, “një takim shumë miqësor dhe produktiv me kongresmenët amerikanë- anëtarë të Komisionit të Kongresit për Partneritet në Zhvillimin e Demokracisë, të kryesuar nga Vern Buchanan”.
“Kosova vazhdon të mbetet prioritet i Shteteve të Bashkuara të Amerikës. Kjo është një garanci e fuqishme që ne do të kemi sukses në projektet tona të mëdha të zhvillimit ekonomik, të forcimit si shtet i pavarur dhe demokraci funksionale”, theksoi Veseli pas takimit.
Ndërkohë, bëhët e ditur se, gjatë vizitës së sotme në Kuvendin e Republikës së Kosovës, delegacioni i kongresistëve amerikanë ka zhvilluar një takim edhe me shefat e grupeve parlamentare.
Në fokus të takimit ishin çështje të zhvillimit ekonomik të vendit dhe të sundimit të rendit dhe të ligjit në Kosovë.
Në këtë takim, në të cilin merrnin pjesë edhe përfaqësues të Ambasadës së SHBA-ve në Prishtinë, si dhe përfaqësues të USAID-it dhe të NDI-së, institucione këto që e mbështesin në vazhdimësi Kuvendin e Kosovës, ligjvënësit amerikanë janë shprehur se Kongresi dhe shteti amerikan do të vazhdojnë ta mbështesin Kosovën në planin e zhvillimit ekonomik, por edhe në atë të sundimit të rendit dhe të ligjit.
Kuvendarët e Kosovës janë zotuar se do të angazhohen për ligje sa më të mira që mundësojnë zhvillim të përshpejtuar ekonomik të vendit dhe garantojnë investimet e huaja në Kosovë.
Të dy palët janë pajtuar se duhet të rritet edhe më roli proaktiv i Kuvendit të Kosovës në mbikëqyrjen e ekzekutivit të vendit.

Kosovë – Shuhet akademik Esat Stavileci

August 16, 2015 by dgreca

*Jahjaga: Esat Stavileci, njeri i shkencës dhe atdhetar i madh/
*Mustafa: Akademik Esat Stavileci ka dhënë kontribut të madh për Kosovën/
-Deklaratë e Akademisë së Shkencave dhe e Arteve të Kosovës me rastin e vdekjes së akademik Esat Stavilecit-/
PRISHTINË, 15 Gusht 2015/ Shuhet akademik Esat Stavileci. Akademia e Shkencave dhe e Arteve e Kosovës njofton se sot, në orët e pasdites, në shtëpinë e tij, vdiq anëtari i rregullt i Akademisë së Shkencave dhe të Arteve të Kosovës, eksperti i shquar në fushën e shkencave juridike, akademik Esat Stavileci.
Në deklaratën me rastin e vdekjes së akademik Esat Stavilecit Akademia thekson se, është kjo një humbje e madhe për familjen, shkencën dhe Akademinë, për kolegët dhe miqtë e shumtë anë e mbanë Kosovës dhe trojeve shqiptare.
Akademik Esat Stavileci lindi më 11 korrik 1942, në Gjakovë, ku e kreu shkollimin fillor dhe të mesëm, ndërsa Fakultetin Juridik në Prishtinë. Studimet pasuniversitare i vijoi dhe i mbaroi në Fakultetin Juridik të Universitetit të Zagrebit. Studimet e Larta të së Drejtës Krahasimtare i vijoi në disa qendra të tjera evropiane. Doktoroi në Fakultetin Juridik të Universitetit të Sarajevës në vitin 1974. Prej vitit 1965 deri në pensionim punoi profesor në Fakultetin Juridik të Prishtinës, ku edhe pas pensionimit ishte i angazhuar në studimet master dhe të doktoraturës. Krijimtaria e tij shtrihet në shumë fusha të interesimit shkencor, veçanërisht në ato juridike-kushtetuese, në fushën e sistemeve politike krahasimore, të administratës dhe të administrimit publik në përgjithësi, të metodologjisë së shkencave shoqërore dhe juridike dhe në fushën e terminologjisë juridike.
Me këtë rast, Akademia e Shkencave dhe e Arteve e Kosovës i shpreh ngushëllimet më të sinqerta familjes Stavileci, miqve dhe adhuruesve të tij gjithandej Kosovës dhe botës shqiptare.
Mbledhja komemorative do të mbahet të hënën, më 17 gusht 2015, në orën 10:00, në mjediset e Akademisë së Shkencave dhe të Arteve të Kosovës, ndërsa homazhet nga ora 10:30-11:30, po ashtu në Mjediset e Akademisë.
Akademik Stavileci do të varroset në varrezat e qytetit të Gjakovës në orën 17:00, më 17 gusht 2015.
Akademia përkujtimore dhe homazhet do të bëhen në Pallatin e Kulturës “Asim Vokshi” në Gjakovë nga ora 14:00.

BIOGRAFIA

Akademik Esat Stavileci, i lindur më 11 korrik 1942, në Gjakovë, ku ka kryer shkollimin fillor dhe të mesëm (Gjimnazin), ndërsa Fakultetin juridik në Prishtinë. Studimet pasuniversitare i vijoi dhe mbaroi në Fakultetin Juridik të Universitetit të Zagrebit dhe Studimet e Larta të së Drejtës Krahasimtare në Strasburg të Francës, Pescara te Italise, Amsterdam te Hollandes dhe Caracas te Venezuelles. Titullin doktor i shkencave e mori në Fakultetin Juridik të Universitetit të Sarajevës (1974). Prej vitit 1965 punoi në Fakultetin Juridik të Prishtinës ku, megjithë pensionimin në vitin 2007, deri vone ishte i angazhuar në Programin Studimor Master ne lenden Të menduarit dhe të Shkruarit Juridik. Është anëtar i rregullt i Akademise se Shkencave dhe Arteve te Kosoves (2000).

ARSIMIMI DHE KUALIFIKIMET:

Doktor i shkencave juridike – administrative.
Diplome e Studimeve të Larta të së Drejtës Krahasimtare.

ANGAZHIME:

Mësimdhënës në Universitetin e Prishtinës dhe ligjërues në disa universitete të tjera (Universiteti Shtetëror i Tetovës, Universiteti i Evropës Juglindore në Tetovë, Universiteti i Tiranës, Universiteti i Jenës, Universiteti i Sofjes, Universiteti Amerikan në Blagoevgrad të Bullgarisë etj.).
Hulumtues në dhjetra projekte shkencore.
Studiues i sistemeve politike, juridike-kushtetuese dhe administrative, i shtetit dhe kombit, i metodologjisë dhe i terminologjisë.
Hartues i librave universitarë, studimeve shkencore dhe veprave publicistike.
Trajnues i kuadrit në administratën publike.
Eshte laureat i “Shperblimit te Dhjetorit” (1978), “Qytetar Nderi i Gjakoves” (2007), bartes i titullit “Imazhi i Intelektualit Shqiptar” (2009) etj.

PËRVOJA PROFESIONALE :

Mësimdhënie mbi dyzetë vjet në universitet.
Eksperiencë studimore në universitetet më prestigjioze të Evropës dhe Shteteve të Bashkuara të Amerikës.
Përvojë praktike në institute të administratës publike.
Mbi 1000 paraqitje publike jashtë universitetit mbi Kosovën dhe çështjen shqiptare.
Pjesëmarrje në disa dhjetra konferenca kombëtare dhe ndërkombëtare.

TRAJNIME TJERA:

Në fushën e mësimdhënies.
Në fushën e hartimit të ligjeve.
Në fushën e metodologjisë së hulumtimit shkencor etj.

TITUJT E PUBLIKUAR:

Nga gjithsej tridhjetekater tituj, po veçojmë ata nga fusha e specializmit:
1.Përgjegjësia politike e titullarëve të funksioneve publike dhe vetëqeverisëse, Instituti i Kërkimeve Juridike dhe Shoqërore, Fakulteti Juridik, Prishtinë, 1978.
2.E drejta administrative, Fakulteti Juridik, Prishtinë, 1981.
3.Administrata në shoqërinë vetëqeverisëse, Shoqata Krahinore për Teori dhe Praktikë Administrative, Prishtinë, 1985.
4.Elemente të së drejtës administrative, Fakulteti Juridik, Prishtinë, 1985.
5.Hyrje në shkencat administrative, Enti i Teksteve dhe i Mjeteve Mësimore, Prishtinë, 1997.
6.Nocione dhe parime të administratës publike, aspekte metodologjike dhe shqyrtime krahasimtare, Akademia e Shkencave dhe Arteve e Kosovës, botimi i parë, Prishtinë 2005 dhe botimi i dytë, Prishtinë, 2007.
7.Shteti- shqyrtime të përgjithshme teorike me vështrim rasti i Kosovës, Akademia e Shkencave dhe Arteve e Kosovës, 2008.
8.Fjalor shpjegues i termave administrative, Akademia e Shkencave dhe Arteve e Kosovës, Prishtinë, 2010.

Dhjetë librat e fundit :

1. The Albanian Question At The Crossroads of Peaceful Solution, The Independent Association of Lawyers of Kosova, Prishtina, 1995 (edhe në shqip).
2. Kosova and Albanians, Between Negation and Independence, The Independent Association of Lawyers of Kosova, Prishtina, 1995.
3. Cështja e Kosovës në veprën e Gazmend Zajmit, Shoqata e Pavarur e Juristëve e Kosovës, Prishtinë, 1997.
4. Në mbrojtje të pavarësisë së Kosovës, Shoqata e Pavarur e Juristëve e Kosovës, Prishtinë, 1998.
5. Kosova nën administrimin ndërkombëtar, Forumi për Iniciativë Demokratike, Gjakovë, 2000.
6. Truths on Kosova, Albanian World Federation, Prishtina, 2000.
7. Vazhdimësia e mendimit për Kosovën dhe çështjen shqiptare, Lidhja Shqiptare në Botë, Prishtinë, Tiranë, Tetovë, 2001.
8. Kosova dhe çështja shqiptare në udhëkryqet e kohës (Political History of the Kosova Issue, Instituti për Studime Bashkëkohore, Universiteti Dardania, Prishtinë, 2005.
9. The Trouth About Kosova, Arguments and Facts in Support of Its Independence, Dardania University, Prishtina, 2007.
10. Rrugetimet dhe labirintet e Kosoves dhe te shqiptareve, Forumi per Iniciative Demokratike, Gjakove, 2009.
Jahjaga: Esat Stavileci, njeri i shkencës dhe atdhetar i madh/
Presidentja e Republikës së Kosovës, Atifete Jahjaga ngushëlloi sot familjen Stavileci me rastin e ndarjes nga jeta të Akademik Esat Stavilecit.
Në telegram thuhet:
E nderuara familja Stavileci,
Me pikëllim të thellë mora lajmin për ndarjen nga jeta të Akademik Esat Stavilecit, njeriut të shkencës dhe atdhetarit të madh.
E ndaj me Ju, e nderuara familje dhimbjen për këtë humbje të madhe për ju dhe për të gjithë ne në Kosovë duke e kujtuar me shumë respekt, punën dhe kontributin e çmuar të Akademik Esat Stavilecit.
Akademik Stavileci do të mbahet mend ndër gjenerata për kontributin e jashtëzakonshëm shkencor në fushën juridike-kushtetuese dhe për kontributin e jashtëzakonshëm për vendin e tij.
Ndarja nga jeta e Akademik Esat Stavilecit, është humbje e madhe jo vetëm për ju e nderuara familje Stavileci, por edhe për gjithë komunitetin shkencor të Kosovës, për miqtë, për bashkëpunëtorët dhe për të gjithë ata studiues që patën fatin të punojnë me të dhe të mësojnë nga ai.
Në emër të qytetarëve të Republikës së Kosovës, në emër të Institucioneve dhe në emrin tim personal, ju lutem pranoni ngushëllimet më të sinqerta.

Mustafa: Akademik Esat Stavileci ka dhënë kontribut të madh për Kosovën
-Kryeministri Isa Mustafa ngushëlloi familjen Stavileci, me rastin e ndarjes nga jeta të Akademik Esat Stavilecit/
Prishtinë, 15 gusht 2015
Kryeministri i Republikës së Kosovës, Isa Mustafa, ngushëlloi familjen Stavileci dhe të gjithë qytetarët e Republikës së Kosovës me rastin e ndarjes nga jeta të anëtarit të rregullt të Akademisë së Shkencave dhe të Arteve të Kosovës, ekspertit të shquar në fushën e shkencave juridike, Akademik Esat Stavilecit.
“Me pikëllim dhe dhembje të madhe e morëm lajmin për ndarjen nga jeta të Akademik Esat Stavilecit. Akademik Esat Stavileci me punën, angazhimin dhe përkushtimin e tij të jashtëzakonshëm gjatë dekadave të kaluara, ka dhënë kontribut të madh për Kosovën, veçanërisht në avancimin e gjithanshëm të shkencave juridike në shtetin e Kosovës. Akademik Esat Stavileci, do të përkujtohet gjithnjë si një profesor frymëzues për breza të tërë të juristëve të Kosovës dhe për punën dhe kontributin e madh në fushën e studimeve juridike në Kosovë”, thuhet në telegramin e kryeministrit Mustafa.
Duke shprehur ngushëllimet në të sinqerta në emër të Qeverisë së Kosovës për këtë humbje të madhe, kryeministri Isa Mustafa po ashtu thekson se vdekja e Akademik Esat Stavilecit është humbje shumë e madhe për familjen, për miqtë, për kolegët dhe për Republikën e Kosovës.
Kryetarja e Komunës së Gjakovës ngushellon familjen Stavileci

E dashura familje Stavileci,
Të nderuar kolegë, intelektualë dhe miq të profesor Esat Stavilecit,
Me dhimbje dhe pikëllim të thellë, sot morrëm lajmin e hidhur për humbjen e intelektualit, juristit parimor, profesorit universitar, akademikut të shquar dhe bashkëqytetarit tonë, profesor Esat Stavileci.
Kosova dhe shiptarët në përgjithësi sot humbën një personalitet të dalluar të jurispudencës, njeriun e intelektit, autorin e shumë veprave që padyshim në çdo hap të jetës së Tij la gjurmë identifikuese për shtetin dhe të ardhmen!
Akademik Esat Stavileci ka krijuar emër të madh në shkencën Kosovare, duke na ofruar gjithmonë studim të drejtë të çështjes shqiptare.
Ne, morrëm lajmin që më së paku do të donim dhe prisnim, por vdekja nuk pyet dhe na i rrëmben edhe më të mirët, më të duhurit dhe më të nevojshmit. Andaj, duke qenë krenarë që si bashkëqytetar i ynë, profesor Esat Stavileci dha kontribut voluminoz në nivelet akademike, përherë do ndjejmë boshllëkun e krijuar nga humbja e kësaj figure të madhe të shoqërisë sonë!
Shumë të lumtur që ju patëm e jashtëzakonisht të pikëlluar që ju humbëm, profesori ynë i përjetshëm!
Me pikëllim,
Mimoza Kusari – Lila
Kryetare e Komunës së GjakovëPERGATITI: BEHLUL JASHARI/