Shefqet Kercelli – Page 2 – Dielli

Lejtnant Taulant Sulo, nga Forca Detare në Akademitë e SHBA

October 12, 2018 by dgreca

1 Taulant 1 ok Taulanti 2 Taulanti

Nga Shefqet Kërcelli/SHBA/

Ka disa javë që Lejtnant Taulant Sulaj po ndjek në akademinë e Virginias, SHBA, Kursin Ndërkombëtar të Oficerit të Marinës, International Officer Course, {IMOC}. Ky kurs për oficerët e marinës është i barazvlefshëm me Kursin Themelor të Oficerit të Shtabit, KTHOSH, që realizohet në KDS, për oficerët e cdo arme.

I kontaktuar nga ana jonë, Lejtnant Sulaj na sqaron se, kursi ka vlera të gjithanshme për cdo officer që shërben në Forcën Detare, Rojen Bregdetare apo institucione të tjera Detare të shtetit shqiptar. Ai zgjat 16 javë, një periudhë relativisht e mjaftueshme për të arritur objektivat e tij, pasi trajton tema shumë të rëndësishme për formimin e oficerit detar si, zbatimi i ligjshmërisë në det, procedurat e bordimit për një anije që shkel ligjin detar, operacionet e kërkim-shpëtimit, njohjen me strukturat e emergjencave civile, që kanë SHBA në raste fatkeqësish detare, jo vetëm teorikisht, por duke njohur nga afër veprimtarinë e këtyre institucioneve. Niveli i pedagogëve mësimdhënës dhe temave të trajtuara është tepër i lartë, sqaron Taulanti. Për këtë tematikë të zgjeruar detare, në fund të kursit do vlerësohesh dhe certifikohesh. Kursi ka filluar më 13 gusht dhe përfundon më 29 nëndor 2018.

Ndërkohë kursi të afron mundësi të tjera për të njohur historinë, kulturën dhe traditat e Popullit dhe shtetit amerikan. Për këtë me kursantët organizohen udhëtime e vizita në vendet historike dhe institucionet shtetërore në SHBA. Gjithashtu mer rëndësi të vecantë krijimi i mardhënieve shoqërore dhe shkëmbimi i eksperiencave të ndryshme ndërmjet kursantëve nga shumë vende të botës pasi është një kurs në nivel ndërkombëtar.

Po kush është Lejtnant Taulanti, i cili i ka vënë vetes synim të bëhet një oficer i aftë për Forcën tonë Detare: Ai është titulluar oficer në shtator 2012, mbasi kreu Akademinë ushtarake “Skënderbej” në sistemin 4 vjecar, me gradën n/toger. Në vitin 2013, kreu kursin bazë të oficerit në Flotiljen Detare Pashaliman. Taulanti ka kryer detyra të ndryshme kryesisht në Flotiljen Detare Pashaliman si, Specialist i bashkëpunimit civilo-ushtarak dhe Komandant i skuadrës së parë të Bordingut, deri në vitin 2014, Nga viti 2015 e në vijim Taulanti shërben si Komandant i Skuadrës së 4-t të Bordingut në Vendbazimin e Kepit të Palit, detyrë të cilin e mban aktualisht. Si pjesë e Gupeve të Bordinut në Forcën Detare, Taulanti ka marë pjesë në të gjitha operacionet e kryera për zbatimin e ligjshmërisë në det, por dhe stërvitjve të kryera brenda dhe jashtë vendit me aleatët e NATO-s. Ndërkohë ai është certifikuar nga shkolla e bordingut e NATO-s në Kretë{Greqi}, ka kryer kursin bazë të bordingut në Vlorë, është certifikuar nga instruktorët e batalionit të Sanmarkos per prodecurat e bordingut, etj. Lejtnanti ka dhe një diplome të Universitetit të Tiranës në fakultetin e Ekonomisë në nivel bachelor dhe master.

Natyrisht ky arësimim e trajnim më ka ndihmuar të formoj elementët bazë të oficerit, por Kursi që po kryej aktualisht në Virxhinia, thekson Sulaj, më përgatit për më lart në të gjitha drejtimet si oficer marine, qoftë në nivelin teorik dhe praktik. Unë kam dëgjuar fjalë të mira nga pedagogët këtu dhe për oficerët e tjerë shqiptarë që e kanë kryer këtë kurs si, Taulant Bako, Eldi Ormeni, Detjon Bështika dhe Myfit Ferraj. Uroj që këtë kurs ta meritojnë e ta kryejnë dhe oficerë te tjerë të Forcës Detare, thotë Taulanti.

Dhe në i urojmë oficerit të ri të Forcës Detare, Lt.Taulant Sulaj, suksese deri në përfundim të kursit dhe në karierën e oficerit detar.

Theksojmë se, janë me dhjetra kuadro detarë, kryesisht të Forcës Detare që e kanë kryer kursin e Rojes Bregdetare dhe të IMOC, në Virginia. Por si i përdorim ne këto kudro me vlerë, këtë investim kolosol të popullit e shtetit amerikan, sa e gjejnë veten këta kuadro në strukturat tona ushtarako-civile të shtetit?

Sepse, vërtet këta djem janë asete me vlerë të popullit shqiptar.

Përparësitë e sigurisë detare në botë

September 27, 2018 by dgreca

Simpoziumi i 23 -të ndërkombëtar për detin, mbajtur në Newport
Nga Shefqet Kërcelli/

Simpoziumi i Fuqive detare { International Seapower Symposium, ISS), mbajtur në Kolegjin Detar të Luftës së Shteteve të Bashkuara, U.S. Naval War College (NWC), ne data 18-21 shtator 2018, është forumi i parë detar në botë, ku mblidhen së bashku Komandantët e Flotave nga gjithe bota, për të forcuar sigurinë detare, nëpërmjet diskutimit të sfidave dhe mundësive të përbashkëta.Admirali John Richardson, {CNO} Drejtor i Operacioneve të Flotës së SHBA dhe Presidenti i NWC, Admirali Rear Jeffrey Harley, bashkëpritën simpoziumin, ku morrën pjesë më shumë se 90 drejtues Flotash në botë. Në këtë simpozium morri pjesë dhe Komandanti i Forcës Detare shqiptare, Gjeneralmajor Ylber Dogjani. Vendi ynë merr pjesë në këtë simpozium të rëndësishëm detar në rang botëror, që nga viti 2003. Qëllimi i Simpoziumit Ndërkombëtar të fuqive detare (ISS), është të sigurojë një forum të lartë ndërkombëtar, për të diskutuar sfidat e përbashkëta detare dhe mundësitë për të rritur bashkëpunimin ndërkombëtar të sigurisë detare. Për tre ditë rresht, zyrtarët më të lartë detarë në botë diskutuan këto çështje dhe dëgjuan personalitete të shquar të kësaj fushe.ISS është unike pasi është forumi i vetëm në botë që mbledh së bashku dhe në të njëjtën kohë drejtuesit e shumë Flotave, për të përmirësuar sigurinë detare dhe operacionet bashkëpunuese. Diskutimet në këtë simpozium synuan në shtimin e përpjekjeve për të rritur bashkëpunimin në luftën kundër piraterisë, duke ofruar ndihmë humanitare , duke koordinuar kërkimin dhe shpëtimin në det, përfshi atë me nëndetëse, planifikimin dhe kryerjen e operacioneve ushtarake të koalicionit dhe zbatimin e ligjit të përbashkët kundër trafikimit njerzëzor, drogës, armëve, peshkimit dhe ndotjes së paligjshme. Ata diskutuan evolimin e strategjisë detare dhe mënyrat për të përtërirë dhe shfrytëzuar më së miri burimet e kufizuara. Disa shefa të marinës e përshkruan takimin si një mundësi të rrallë për të takuar krerët e tjerë të marinave dhe shkëmbimin e ideve. Tema ishte siguria, rendi dhe prosperiteti.Simpoziumi shënoi nivel të lartë jo vetëm nga niveli i pjesmarrjes, por dhe i lektorëve. Fillimisht për rëndësinë e kësaj cështje ndërkombëtare foli Sekretari i Mbrojtjes i SHBA-ve, zoti James Mattis, duke i uruar suksese këtij takimi të rëndësishëm. Pastaj referuan Sekretari i Marinës Richard V. Spencer; Admirali në pension Timothy J. Keating dhe Peter W. Singer, Admirali Fitzgerald, i cili ka vizituar vendin tonë në v.2007, strategë dhe ushtarakë të lartë të flotës dhe institucioneve detare të SHBA. “Ne kërkojmë një partneritet të vërtetë, bazuar në konceptin e risqeve të përbashkëta, ndaj duhet të krijojmë shpërblime të përbashkëta”, tha Spencer. “Një partneritet në të cilin asnjë komb i vetëm nuk është eksperti; dhe aftësia për të udhëhequr qëndron brenda të gjithëve ne. Ne mund të prodhojmë një ekuacion ku 1 + 1 = 3, ku të gjithë përfitojnë. ” Gjithashtu panelistët dhe folësit e ISS, shprehën një qëllim të përbashkët për të përmirësuar ndërveprimin midis flotës botërore, bazuar në parimin se “ne jemi më të fortë së bashku”. Duke u stërvitur së bashku, duke marrë vendime të përbashkëta, shkëmbime të personelit, pjesëmarrje në shkolla, akademi e trajnime tek njëri-tjetri, ne rrisim sigurinë globale, u theksua në simpozium. Kështu dhe ky takim i ISS rrit sigurinë reciproke, mbron rendin e bazuar në rregulla e ligje ku përfitojnëtë gjitha kombet duke kontribuar në zhvillimin botëror.Në një krizë detare, aftësia për tu mbledhur shpejt mbështetet në këto lidhje para-ekzistuese ndërmjet flotave, midis vendeve, niset që nga misionet e përbashkëta që kanë rëndësi për sigurinë, rendin dhe prosperitetin ekonomik. “Çdo ditë, aleatët dhe partnerët tanë bashkohen në mbrojtjen e lirisë, duke e penguar luftën dhe duke ruajtur rregullat që garantojnë një ligj të lirë dhe të hapur ndërkombëtar”, tha Spencer. Oqeanet që dikur ishin barriera fizike dhe psikologjike, duke i mbajtur kombet larg, tani janë autostrada detare që i afrojnë kombet së bashku. Flotat e fuqishme detare janë të përshtatshme në mënyrë unike për të ndihmuar në menaxhimin e rritjes dhe kompleksitetit të ndryshimit, në sajë të marrëdhënieve unike produktive që janë të mundshme, si dhe në bazë të historisë së fortë dhe aftësisë për tu sjellë e mirëkuptuar në përputhje me rregullat e ligjet e miratuara ndërkombëtarisht.

“ISS-23, manifestoi dëshirën për të forcuar lidhjet e besimit midis partnerëve dhe për të eksploruar mundësi të reja bashkëpunimi, nga të cilat ne mund të mësojmë”, tha Richardson. “Mos bëni asnjë gabim, kjo dëshirë për të lundruar së bashku në mbështetje të bashkëqytetarëve tanë – pavarësisht nga erërat, valët dhe moti rreth nesh – është rryma që na ka tërhequr këtu në Newport.”

“Sa më shumë që bashkëpunojmë, aq më mirë do të jemi në gjendje të sigurojmë prezencë globale dhe rreth meridianit”, tha Keating, një nga folësit kryesorë. Ai vazhdoi fjalimin e tij duke thënë se komunikimi i sigurt është thelbësor për një strategji efektive detare.

Në panel diskutimet, prezantimet dhe bisedat nga delegatët kishin të bënin me çështjet e përbashkëta të fushës detare, si operacionet e kombinuara, komunikimin në det, trafikimin e drogës, piraterinë, kontrabandën, lehtësimin e katastrofave natyrore dhe metodat e sigurimit të hapësirës së lirë dhe të hapur të oqeanit .

Gjatë fjalimeve të tij, Singer sugjeroi që, për të ruajtur paqen, fleksibilitetin dhe vetëdijen, është e nevojshme të kuptohen ndryshimet që ndodhin në ujë dhe në botë. Është e rëndësishme për të ardhmen e jo vetëm luftës detare, por edhe të politikës kombëtare.

Adm. Sunil Lanba, [Komandanti i Flotës së Indisë} rekomandoi gjatë një seance krijimin e mbrojtjen e “mirëbesimit të ndërsjellë detar”, si një atribut i rëndësishëm që duhet të përfshihet në themelin e të gjithë bashkëpunimit të tashëm dhe të ardhshëm .

Prof. Sally Yozell, Drejtor i sigurisë mjedisore për Qendrën Stimson, ilustroi ndikimin e rrjeteve të paligjshme në burimet natyrore dhe në marrëdhëniet më të mëdha gjeopolitike.”Shtrirja e plotë e peshkimit të paligjshëm, të parregulluar dhe të parroportuar (IUU) shkon përtej mjedisit”, thotë Yozell. “Kjo kërcënon sigurinë ekonomike dhe ushqimore të komuniteteve të varura nga peshkimi dhe ka qenë e lidhur edhe me rritjen e tensioneve gjeopolitike në Jug Detit të Kinës, piraterisë jashtë bririt të Afrikës, dhe tregtisë së drogës në Amerikën Latine. Peshkimi IUU, shpesh përdor të njëjtat rrjete si krimi i organizuar ndërkombëtar të cilët janë të angazhuar në shitjen e mallrave të tregut të zi.Ne duhet të marrim një qasje rajonale dhe të ndajmë inteligjencën në të gjithë marinat dhe rojet bregdetare për të luftuar këto rrjete të paligjshme. “Ndërkohë katër anije të flotës amerikane ishin të pranishme për këtë simpozium: konkretisht, anijet amfibe të transportit USS New York (LPD-21), Destrojeri USS Lassen (DDG-82), transportuesi i shpejtë ekspeditiv USNS “Qyteti i Bismarkut (T-EPF-9), si dhe Rojet bregdetare të SHBA Cutter Lwërence Lawson (WPC 1120). Delegatët dhe bashkëshortët e tyre kishin mundësi të udhëtonin në anije, të nxisin marrëdhënie të mira dhe të përhapnin përvoja për marinarët që merrnin pjesë.Gjatë fjalëve të tij, CNO, Admirali Richardson, shpjegoi rëndësinë dhe domosdoshmërinë e bashkëpunimit detar ndërmjet aleatëve dhe partnerëve, i cili siguron rrugët kryesore detare që mbështesin tregtinë globale.Simpoziumi i parë i fuqive detare u zhvillua në v1969 në Newport dhe u krijua për të lejuar liderët detarë nga e gjithë bota të takoheshin dhe diskutonin çështje të përbashkëta me të cilat ballafaqoheshin, si t’i trajtojnë këto çështje dhe në fund të fundit, të gjejnë zgjidhje për to. Simpoziumet e viteve të kaluara kanë rezultuar në një bashkëpunim të shtuar në luftën kundër piraterisë, duke ofruar ndihmë humanitare, duke koordinuar kërkimin dhe shpëtimin në det (duke përfshirë shpëtimin nëndetës) dhe duke luftuar kundër trafikimit të armëve / drogës / trafikimit të qenieve njerëzore dhe shkeljeve të peshkimit / ndotjes.Ndërsa vendi ku u zhvillua simpoziumi, Kolegji Detar i Luftës,{NWC} është themeluar në vitin 1884. NWC është institucioni më i vjetër i këtij lloji në botë. Më shumë se 50,000 studentë janë diplomuar që nga klasa e parë e nëntë nxënësve në 1885. Përafërsisht 300 admiralë, gjeneralë dhe drejtues të lartë të diplomuar këtu kanë shërbyer në Flotat e Rojen Bregdetare Amerikane.Theksojmë se këtë Kolegj prestigjioz e kanë përfunduar dhe disa ushtarakë detarë nga Shqipëria. Një bashkëpunim që vazhdon.

Projektuesi i sillosëve të grurit në portin e Durrësit dhe… përfituesi i tyre

August 1, 2018 by dgreca

Nga Shefqet Kërcelli/Nuk ka qytetar durrsak ose vizitor të huaj, që gjatë kalimit në portin e Durrësit, mos ti ketë rënë në sy prania e katër hinkave të mëdha metalike ose shkurt sillosëve të grurit.

Të vendosur fillimisht në molin nr. 5 të portit, këto sillosë nëpërmjet grykave të tyre të stërmëdha, kanë shkarkuar me mijëra ton grurë apo drithëra të llojeve të ndryshme, por dhe ngarkesa të tjera rifuxho.

Tani keto konstruksione metalike solide janë vendosur në molin nr.2 të portit, ku vazhdojnë të shkarkojnë tonelata mallra rifuxho, duke i futur arkës së shtetit miliona e miliona $.

Po kush është ideuesi dhe projektuesi i këtyre pajisjeve dobiprurëse?

Ai është inxhinjeri i talentuar Shpëtim Prodani, që gjithë jetën e tij e kaloi mes projekteve, skicave e zbatimit të tyre në port e më gjerë. Ing.Shpëtimi lindi në Durrës më 2.11.1950. Mbasi kreu studimet në Fakultetin e Inxhinjerisë mekanike, Universiteti i Tiranës, {1969-1974}, në vitin 1975 filloi punë në portin e Durrësit, ku për vite me radhë punoi në disa sektorë si, oficina mekanike, byroja teknologjike, etj.

Në bashkëpunim me kolegë, por dhe individualisht, ka realizuar dhjetra projekte, është autor dhe bashkëautor në prodhimin e elektrovincave portualë, autor në projektimin e vincave stacionarë për mallrat e lëvizshme në port dhe stacione trenash, bashkëautor në projektimin e pontileve të ndryshëm në bregdetin e Jugut, etj.

Por një nga veprat e tij dobiprurëse për portin dhe ekonominë e vendit janë sillosët për shkarkimin e grurit, një vepër mbi 37 vjecare, që pamvarësisht agjentëve atmosferikë e shfrytëzimit maksimal po i qëndron kohës. Cilido nga ne sheh cdo ditë, se si këta sillosë mbushen me grurë dhe furnizojnë vendin dhe Ballkanin.

Por mjaft qytetarë, nuk e dinë se për këto vepra ka harxhuar netë pa gjumë, inxhinjeri Shpëtimi, sa në tavolinat e projektimeve, aq dhe në shtëpi.

Zonja Shpresa, bashkëshortja e inxhinjerit kujton atë kohë, kur punohej për këtë vepër, ku shpesh herë e ndihmonte dhe ajo për të detajuar këtë vepër inxhinjerike.

Për arësye se ishte djali i Gjeneral Muhamed Prodanit, veprat e tij nuk janë promovuar. Por, Shpëtimi s’ka nevojë për titujt dhe gradat e njerëzve dritë shkurtër, pasi mendja dhe shpatullat e tij i kanë dhënë vendit vepra të pavdekshme, të cilat flasin vetë, ashtu si disa shokë e kolegë të tij në Port, kantier e Flotë Tregëtare.

Inxhinjeri mëndjendritur Shpëtim Prodani punoi në port deri në vitin 1991, me disa ndërprerje kohore në Institutin e Studimeve dhe projektimeve në Ministrinë e Transportit.

Në vitet 1991-1993, punoi në parkun e eksportit si kryeinxhinjer. Pas kësaj, me iniciativën e tij u ngrit një nga kompanitë e para në fushën e spedicionit, Kompania “Dyrrahspeed ShPK”. Ashtu si në fushën e projektimit e zbatimit, dhe në fushën e biznesit, dolën në pah aftësitë e vecanta të Shpëtimit, të cilat shënun një histori suksesi.

Ndërkohë Ing.Shpëtimi është ndër themeluesit dhe aksioner i kompanisë së parë të sigurimeve “Sigma SH.A” dhe Bankës Popullore. Por, Inxhinjeri i punës, projekteve e sakrificave ndërroi jetë para kohe, më 4 janar të vitit 2004, duke mos shijuar punën dhe veprat e tij, të cilave ju kushtoi shumë vite jetë.

Gruaja e tij Ing.Shpresa, djali Jonadri që ecën në gjurmët e të jatit, vajzat Evisi e Lela, që jeton në SHBA, kanë të drejtë të krenohen me veprat e babës së tyre, inxhinjerit të papërkulur, që u përball ashtu si një kapiten anije me dallgët e jetës, duke mos ju dorëzuar kurrë atyre.

Por, ajo që duhet të theksojmë është se në cdo vend kapitalist, si në SHBA e gjetkë, pasuria ka burim pronën e familjes, të trashëguar brez pas brezi, dhe të drejtën e autorit për shpikjen e bërë. Kujtojmë Fordin dikur, ose Microsoft, Google, Aple, etj. sot.

Nuk ta merr kush pronën dhe pasurinë intelektuale kollaj në shtetet e zhvilluara.

Po këtu ke ne cndodh?! Po të kishte shtet ligjor, familja e Inxhinjer Shpëtimit, duhet të ishte nga të parat familje milionere me djersën e ballit.

S’mjafton titulli “Qytetar Nderi” i Durrësit. por duhet të njihet dhe pronësia intelektuale e mjaft inxhinjerëve, montatorëve e novatorëve të vendit tonë, që i kanë dhënë të ardhura shtetit. Kështu fiunksionon kudo në botë.

Ndërsa tek ne është paradoks, njihet cdo lloj pronësie, por jo ajo intelektuale.

Shënim:Të zgjeruar jetën dhe veprën e Ing. Shpëtim Prodanit e gjeni tek “Antologjia e Detarisë Shqiptare”, vëllimi i II-të, faqe.375-377.

Komandanti i Forcës Detare të NATO-s vizitoi Shqipërinë

July 7, 2018 by dgreca

Komandanti i Forcës Detare të NATO-s, NënAdmiral Clive CC Johnstone, vizitoi Shqipërinë/

Nga Shefqet Kërcelli/

Në kuadër të bashkëpunimit midis Forcave tona të Armatosura dhe Aleancës Veriatlantike, në datat 4-5 korrik 2018, zhvilloi një vizitë zyrtare në vendin tonë, Komandanti i Forcës Detare të NATO (Allied Maritime Command, MARCOM), NënAdmiral, {VADM}. Clive CC Johnstone.

Në ditën e parë të vizitës, NënAdmiral Johnstone, u prit nga Shefi i Shtabit të Përgjithshëm të FARSH, Gjeneral Brigade Bardhyl Kollçaku. Mbasi i uroi mirëseardhjen në vendin tonë, Gjeneral Kollçaku, theksoi se Forca Detare është një nga prioritetet kryesore te FARSH, për modernizimin, trajnimin dhe stërvitjet e përbashkëta. Këto aktivitete kanë synim përmbushjen e standarteve e kërkesave të NATO-s, por edhe detyrave në nivel kombëtar, në mënyrë që të mund të shtojmë kontributin e FARSH në hapësirën tonë Detare. Në vijim gjatë takimit Gjeneralbrigade Kollçaku solli në vëmendje kontributin e Forcave Detare Shqiptare në Detin Egje, në kuadër të misionit “Sea Guardian”, me një Anije Patrulluese si pjesë e Grupit Detar të NATO-s, të caktuar për të patrulluar në dy zona kundër emigracionit të paligjshëm, si dhe pjesëmarrjen e tyre në stërvitjet vjetore të marinës, kryesisht me vendet e NATO, si Greqia, Italia, Sllovenia dhe Mali i Zi. Nga ana e tij NënAdmirali Johnstone, vlerësoi maksimalisht shërbimin e Forcës Detare Shqiptare në operacionin “Sea Guardian”, në Detin Egje, duke e siguruar Gjenera Kollçakun dhe FA shqiptare për vijimësinë e bashkëpunimit edhe në të ardhmen, si dhe mbështetjen e Forcës Detare Shqiptare në operacionet e NATO-s. Gjatë takimit, të dy bashkëbiseduesit diskutuan edhe për perspektivat dhe mjedisin e sigurisë si dhe sfidat në kuadër të këtij bashkëpunimi me strukturat e NATO-s. Në ditën e dytë të vizitës, NënAdmiral Johnstone vizitoi Komandën e Forcës Detare, ku u prit nga Komandanti i kësaj Force, Gjeneralmajor Ylber Dogjani dhe kuadro të shtabit. Gjatë takimit Gjeneral Dogjani falenderoi VADM. Johnstone për mbështetjen që komanda Detare e NATO-s ka dhënë për Forcën tonë Detare, veçanërisht gjatë qëndrimit në mision në detin Egje. Ai e njohu VADM Johnstone me gjendjen aktuale të Forcës, arritjet dhe sfidat me të cilat përballet FD shqiptare.

Zoti Dogjani theksoi se, po synohet realizimi i objektivave që ka Forca Detare, për sa i përket situatës detare, shkëmbimit të informacionit dhe rritjes së ndërveprueshmërisë me aleatët, gjithashtu vlerësoi operacionin në detin Egje, si një nga eksperiencat më të vyera për efektivat tanë. Nga ana e tij VADM Johnstone, shprehu interes veçanërisht mbi sfidat dhe vështirësitë me të cilat përballet Forca Detare shqiptare dhe nënvizoi mbështetjen e tij për shtimin e kapaciteteve operacionale të FD shqiptare. Për sa i përket operacionit “Sea Guardian”, në detin Egje, VADM. Johnstone tha se, prania e anijes shqiptare atje ndihmoi të balancohej prania e forcave në det, ndaj shprehu falënderim për këtë. Ajo që dua të theksoj është: “Jam i befasuar nga aftësitë që demonstrojnë efektivat tuaj, janë staf shumë i zoti, keni oficerë shumë cilësorë dhe faleminderit për këtë”. Vice Admirali u njoh gjithashtu me strukturën dhe kapacitet që ka Forca Detare dhe më pas zhvilloi vizitë në një nga anijet e klasit Iliria. Zoti Johnstone vizitoi anijen “LISSUS”, e cila ishte bregëzuar enkas për këtë vizitë në molin nr.5 të portit të Durrësit. Këtu Komandanti i MARCOM, u prit nga kuadro dhe detarë të Grupit patrullues të Kepit të Palit dhe ekuipazhi i anijes. Gjatë takimit VADM Johnstone falenderoi direkt detarët tanë për aftësitë e tyre profesionale dhe kontributin në kuadër të operacioneve të NATO-s. Gjithashtu zoti Johnstone zhvilloi një bisedë të ngrohtë, të hapur e miqësore si detari me detarët, pamvarësisht gradës e funksionit. Ndërkohë kuadrot e Flotiles sonë detare dhe ekuipazhi i anijes “LISSUS”, falenderuan VADM Johnstone për vizitën dhe i premtuan se, dhe në të ardhmen detarët tanë do jenë të përkushtuar për kryerjen e operacioneve e stërvitjeve të përbashkëta me strukturat e Komandës detare të NATOS. {MARCOM}. Mbasditen e 5 korrikut, VADM Johnstone u largua nga vendi ynë.

Zhytësat shqiptarë dhe ata amerikanë në një trajnim të përbashkët në Pashaliman

May 17, 2018 by dgreca

Nga Shefqet Kërcelli/DIELLI

Në zbatim të programit të bashkëpunimit midis Forcës sonë Detare dhe Flotës së SHBA, miratuar nga Ministria e Mbrojtjes, nga data 11 deri më 17 maj 2018, në Qëndrën e Zhytjeve Pashaliman u zhvillua trajnimi i personelit të kësaj qëndre për kërkimin dhe asgjesimin e municioneve në det, nga skuadra e trajnimeve nënujore, EOD, e Flotës së SHBA.

Në zbatim të këtij programi, fillimisht mbas rikonicionit të kryer nga specialistët amerikanë para 3 muajsh, nga Qëndra e Zhytjeve Pashaliman, u morrën të gjitha masat e nevojshme organizativo-teknike, që trajnimi të vijojë normalisht për të arritur objektivat e caktuara. Në trajnim morrën pjesë zhytësa të Qendrës sonë dhe zhytësa amerikanë, të Marinës së SHBA.

Për një javë rresht instruktorët amerikanë trajtuan teorikisht dhe praktikisht cështje të tilla si, mjekësia nënujore, mënyrat e kërkimit nënujor për municionet luftarake të paplasura, njohja me këto municione, njohja e minave detare e silurave, nxjerrja e tyre nga fundi i detit në sipërfaqe dhe afrimi në breg, vendet ku mund të ngrihen e transportohen dhe zbatimi i masave të sigurimit teknik në këto raste. Për këtë u provuan disa lloj lidhjesh, ngritjesh dhe tërheqjesh për në breg e mole të sigurta. Gjithashtu nga instruktorët amerikanë u zhvillua trajnimi për përdorimin e dhomës hiperbarike nga personeli ynë zhytës sipas standarteve përkatëse.

Gjatë këtyre ditëve midis zhytësave shqiptarë dhe amerikanë u zhvilluan aktivitete sportive, si ndeshje futbolli, ndërkohë që personeli amerikan u njoh me resurset turistike e traditat historiko-kulturore të zonës së Vlorës.

Në përfundim të këtij trajnimi, më datën 17 maj u zhvillua ceremonia e certifikimit të zhytësave shqiptare për operacionet nënujore EOD, ku u theksua rëndësia e këtij trajnimi dhe bashkëpunimi në të ardhmen.

Theksojmë se që nga viti 1995, ka pasur një bashkëpunim të rregullt midis zhytësave tanë dhe atyre amerikanë, ku vec trajnimeve dhe zhytjeve në thellësitë joniano-adriatike, pala amerikane ka afruar ndihma e pajisje për zhytësat tanë.