Vatra – Page 38 – Dielli

GJON BUÇAJ: VATRA, SHTËPIA E TË GJITHË SHQIPTARËVE

January 1, 2017 by dgreca

Intervistë e z. Gjon Buçaj, Kryetar i Federatës Panshqiptare të Amerikës”VATRA” dhënë bashkëpunëtores të gazetës”Dielli” Marjana Bulku/

Pyetje: Çifti Buçaj, simbol mikpritjeje sa herë që “Vatra” çel dyert ju jeni aty me prezencën e përzemërt e bujare që qartazi dëshmon karakterin tuaj, çfarë i keni dhënë Vatrës në këto vite duke qenë drejtues i saj, çfarë ju ka dhënë ajo juve?

Përgjigje: Mikpritja asht nji ndër virtytet e thelbit etnik të shqiptarit, prandej na në “Vatër” përpiqemi t’i presim mysafirët me përzemërsi simbas traditës si dhe me qellim që ata të ndjehen si në shpi të vet; “Vatra”, në të vërtetë, asht shpi e të gjithë shqiptarëvet, prandej edhe quhet “Vatër”, rreth të cilës mblidhen antarët e familjes. Përpiqemi që të jemi të dy së bashku, sidmos kur mysafiri ose ndonji nga mysafirët asht femën.Përsa i përket pjesës tjetër të pyetjes, mund të them se “Vatrës” do të doja t’i kisha dhanë ma shumë, por kohën dhe përpjekjet për t’a ndimue, ia kam kushtue me dashuni, i motivuem kryesisht nga idealizmi atdhetar i paraardhësavet tanë. Kam pasë fatin të kem bashkëpuntorë të përkushtuem për arritjet sado modeste që mund të jenë. Kemi hapë ose rihapë degë në disa shtete të Amerikës e në Kanada dhe, kështu, kemi rritë numrin e antarëve. Në vitin 2012 kemi përkujtue 100 vjetorin e themelimit të “Vatrës” me nji konferencë shkencore dhe me nji darkë kremtimi, ku kanë marrë pjesë ma se 1000 vetë, nga shumë anë të Amerikës, të Kanadasë dhe t’Europës, si dhe nga trojet tona. Atë kremtim e kemi njehë si përkujtim e mirënjohje për themeluesat dhe për ata që e mbajtën “Vatrën” gjatë nji shekulli, në shërbim të çashtjes kombëtare. Me pjesëmarrjen n’atë kremtim të klerikëvet ma të naltë, si përfaqësuesa të besimevet tona tradicionale, kemi dashtë me dëshmue randësinë që “Vatra”, në traditën e trashigueme prej Rilindjes, i jep harmonisë ndërfetare te shqiptarët dhe e çmon si gur me randësi në themelin e ndërtesës së përbashkët të kombit.

Nga “Vatra”, si organizatë vullnetare dhe jo fitimpruse, askush nuk pret ndonji shpërblim material, por vetëm moral: kënaqsinë kur je i vetëdijshëm se, me anë të saj, ke kontribue për interesin kombëtar. Jam i nderuem dhe i lumtun që kam pasë rastin t’ia ndiej atë kënaqsi për kontributin tim sado e vogël.

Ju jeni larguar nga Shqipëria në moshë të re, në vitin 1951, si ka mundësi që gjuha shqipe, traditat kanë mbetur kaq të gjalla tek ju?

Përgjigje: Besoj se kjo mund të spjegohet nga disa faktorë, tue fillue prej karakteristikës së shqiptarit si tradicionalist, cilësi të cilën e ka luftue komunizmi për t’i lëshue rrugë krijimit të “traditave” të reja të ideologjisë së huej që, për afër gjysmë shekulli, helmoi përbamjen shpirtnore të kombit. Qëndresa kundër kësaj ndërhymjeje shkatrruese e spjegon deri dikund egërsinë me të cilën regjimi e nënshtroi tragjikisht kombin, sidomos segmentet e tij, ku kjo qëndresë ishte ma e fuqishme. Përveç asaj, në fatkeqsinë e largimit prej atdheut, kam pasë edhe fatin e mirë me qenë me gjithë familje, antarët e së cilës ishin të moshave të ndryshme. Kudo që na ka hjedhë fati, të rijt i kanë mësue gjuhët e vendit në shkollë ose në punë, por prania e të vjetërve ka ndimue që në shpi të flitet vetëm shqip. Të vjetrit ankoheshin se komunizmi, përveç tjera të zezave, luftonte edhe traditat, prandej besoj se vetvetiu ka lindë dëshira me i ruejtë ato. Kështu asht krijue, në mënyrë spontane, nji lloj mbështjellësi virtual rreth familjes për mbrojtjen e traditave të mira nga tjetërsimi, qoftë me humbjen e tyne ose me depërtimin e veseve këqija të ambjentit rretherrotull. Në këtë kuptim, në kontaktin e parë me njerzit tanë mbas periudhës së komunizmit, asht vrejtë shpesh njifarë ndryshimi, pse na ishim të kohës kur kishim lanë vendin, kurse ata të vitit të takimit.

Nji spjegim tjetër, besoj, vjen nga fakti se atdheun e vlerëson dhe e don ma shumë kur të mungon, e ne na ka mungue për shumë kohë. Atdheu përfshin jo vetëm vendin si kuptim gjeografik dhe popullin, por edhe trashigiminë historike, kulturore e shpirtnore, ku bajnë pjesë edhe traditat dalluese të brumit tonë etnik.

Nëse do bënim një udhëtim në kohë në cilin vit do ndalonit, cilën ngjarje e ruani ende të gjallë?

Përgjigje. Janë shumë, prandej e kam të vështirë të veçoj nji vit ose nji ngjarje të vetme. I kam shumë të freskëta kujtimet dhe të forta mbresat e disa ngjarjeve në vitet e jetës sime: ardhja e komunizmit; vrasja e babës; ikja me familje prej Shqipnije; dy burgosje në Jugosllavi; dalja në botën e lirë; vdekja e vëllaut; martesa; diplomimi në mjeksi; ardhja në Amerikë; shembja e komunizmit; lufta e Kosovës me tragjedinë dhe lavdinë e saj dhe pavarësia; antarësimi i Shqipnisë në NATO; largimi i Nanës nga kjo jetë; qindvjetori i “Vatrës”….. Megjithatë po veçoj vitin 1947, në nderim të kujtimit të Nanës me mirënjohje, kur jam largue prej shpije në kërkim të shkollimit. E vejë me katër fëmij të vegjel, megjithëse në nji familje të madhe me kunetën e kunata ku ndima e kujdesi nuk mungojshin, Nana kishte nevojën e fëmiut ma të madh. Megjithatë, ajo më nxiti e më dha bekimin me shkue larg shpisë, në kërkim të nji ardhmënije që mund të ndërtohej vetëm me shkollim.

Cila është historia më e bukur e jetës tuaj?

Përgjigje: Padyshim harmonia dhe dashunia në jetën familjare, nga ku buron shija për jetën dhe energjia me ecë përpara.

Shqipëria ka përjetuar shumë udhëkryqe, cili mendoni se ia ka kërcënuar seriozisht të ardhmen asaj?

Përgjigje: Kadare thotë se kombi shqiptar ka përjetue dy kataklizma, të cilët ia kanë ndryshue fizionominë: okupimi afër pesëshekullor otoman dhe komunizmi. Të dy këta faktorë kanë qenë okupues, me ndryshimin se ai otoman u imponue dhe u mbajt gjithnji me praninë e kambës së huej, kurse komunizmi u përqafue nga nji pjesë e shqiptarëve të cilët, me porosinë dhe ndimën e anmiqvet shekullorë të kombit, e imponuen dhe e mbajtën me dhunë për afër nji gjysmë shekulli. Komunizmi, i përhapun nga shqiptarët shërbëtorë të këtij okupimi ideologjik, ka mujtë me depërtue edhe në familje, në çerdhet ma intime të shoqnisë shqiptare, ndërsa kamba e huej e okupatorit, qoftë otoman ose e kujdo tjetër, ka mbetë gjithmonë e hueja dhe, si e tillë, nuk ka mujtë me nxanë vend as me damtue si mikrobi i mbrendshëm i sëmundjes komuniste. Me ndryshimin e palcit etnik dhe me izolimin nga bota e civilizimit perëndimor, regjimi komunist e ka kërcnue të ardhmen e identitetit tonë si komb dhe, me politikën vetëvrasëse të internacionalizmit, e ka lanë Shqipninë pa aleanca mbrojtëse për të ardhmen e saj si shtet i pavarun.

Teksa ju sheh bashkë me ”Zambakun e Prizrenit”, zonjen tuaj Nikoleta, nënkupton se lidhja juaj bashkëshortore është inspiruese brenda familjes por edhe jasht saj, dua mendimin tuaj të përbashkët cilat do ishin tre tipare thelbësore që gruaja nënë, zonjë do duhej ti trashëgonte tek bijat, nuset, zonjat përreth?

Përgjigje: Ndershmënia, bujaria dhe përkushtimi për familjen.

Intelektuali dhe patrioti, veprimtari dhe humani Buçaj që jetën e vet e lidh ngushtë me atë të atdheut, cila mendoni se është ngjarja më e bukur që i ka ndodhur ndonjëherë Shqipërisë që sot duket e pashpresë?

Përgjigje: Pavarsia e Shqipnisë, që u realizue në nji moment kritik për ekzistencën e kombit, asht pa dyshim ngjarja ma fatlume, edhe pse përfshiu ma pak se gjysmën e popullsisë dhe të trojevet etnike. Pa atë shqiptarët do të mbeteshin të shpërndamë nën sundimin e anmiqvet, pa forcë dhe pa identitet. Nji pjesë do të asimilohej dhe të tjerët do të zhdukeshin ose do të shpërnguleshin me dhunë. Prandej kombi asht përjetësisht mirënjohës rilindasve që e kapën momentin dhe sakrifikuen edhe jetën për shpëtimin e tij. Por ngjarja ma e bukur që i ka ndodhë Shqipnisë e që unë e kam përjetue, asht shpërbamja e komunizmit. Mjerisht, për nji pjesë të madhe të shqiptarëvet, gëzimi dhe entuzjazmi i asaj ngjarjeje ia kanë lëshue rrugën zhgënjimit e dëshprimit, pse me lirinë nuk erdhi drejtësia as mirëqenja e barabartë, por vorfnija dhe diskriminimi ekonomik dhe politik. Sikur politikanët e tranzicionit të kishin pasë pak nga idealizmi dhe përkushtimi i rilindasve, Shqipnia do të dukej sot ma mirë dhe me shpresë ma shumë për të ardhmen.

Pse po ikin shqiptarët, a e ve kjo në pikpyetje patriotizmin e tyre?

Përgjigje: Ikja në masë e familjevet shqiptare, sidomos në këto vitet e fundit, asht nji akuzë e randë kundër qeverisë që, në krye të rendit të ditës ka blemjen dhe manipulimin e votës në luftë për pushtet dhe për pasunim të paligjshëm, dhe jo krijimin e jetës ma të mirë e ma të drejtë për qytetarët e vet. Për gjeneratën time, motivi për të lanë atdheun ka qenë kërkesa për liri dhe shpëtimi prej përsekutimit, në shumë raste edhe shpëtimi i jetës. Sot, shumica e familjevet që ia këthejnë shpinën atdheut, kanë për motiv nji jetë ma të mirë dhe nji ardhmëni ma të sigurtë që në atdhe nuk e kanë. Vorfnija asht aq e madhe sa, në shumë raste, familjet nuk e kanë të sigurtë as bukën. Mjerisht, edhe shumë të rij që ende nuk kanë krijue familje, nuk shohin shpresë për të ardhmen e tyne, prandej detyrohen ta kërkojnë atë jashtë vendit. Rrjedhimisht, mendoj se largimi i shqiptarëvet sot, ve në pikëpyetje ma tepër patriotizmin e politikanëve të korruptuem, se sa të atyne që largohen. Nuk ka dyshim se komunizmi e ka damtue ndjenjën e patrotizmit, por ky damtim asht shumë ma i dukshëm te klasa politike, e cila asht përgjegjëse për mungesën e krijimit të kushteve ma të mira të jetesës për qytetarët gjatë periudhës së tranzicionit.

Konservator dhe novator, çfarë kanë trasheguar bijtë tuaj nga ju?

Përgjigje: Dashuninë për vendlindjen e prindvet dhe për vendlindjen e tyne, Amerikën, ruejtjen e gjuhës dhe respektin për traditat dhe për historinë tonë, ndershmëninë dhe korrektesën në punë e në shoqni ku jetojnë…..

Qofshi të bekuar

NIS BASHKËPUNIMI I VATRËS ME DIASPORËN SHQIPTARE NË ANGLI

December 21, 2016 by dgreca

*FEDERATA VATRA, SHOQATA”ARDHMËRIA” DHE FORUMI I SHOQATAVE SHQIPTARE NË BRITANI NISIN BASHKËPUNIMIN/

*KRYETARI I VATRËS PRITI KRYETARIN E SHOQATËS”ARDHMËRIA” , KRYETAR I FORUMIT TË SHOQATAVE SHQIPTARE NË BRITANI/

Të Mërkurën paradite, 21 Dhjetor 2016, Kryetari i Federatës Panshqiptare të Amerikës “VATRA”, dr. Gjon Buçaj, priti në Selinë e Vatrës, në një takim bashkëpunimi me shoqatat shqiptare në Botë, z. Lutfi Vata, kryetar i shoqatës”Ardhmëria” në Londër dhe President i Forumit te shoqatave shqiptare ne Britani.Z. Lutfi Vata falenderoi Kryetarin e Vatrës me bashkëpunëtorët e tij për pritjen e ofruar dhe për Kontributin e Vatrës në drejtim të çështjes Kombëtare. Ai informoi për aktivitetin e shoqatës që drejton dhe shoqatave të tjera në Mbretërinë e Bashkuar. Z. Vata u ndal gjatë në përvojën e fituar në hapjen dhe funksionimin e shkollave shqipe, bashkëpunimin me Ministrinë e Diapsorës në Kosovë dhe të ambasadës shqiptare në Londër, ndër vite. Ai tregoi edhe përpjekjet e përbashkëta që bëhen nga diapsora shqiptare atje për koordinimin e veprimtarive, me gjithë vështirësitë e mëdha të bashkëpunimit. Vata, tregoi edhe për atë siç e quajti ai, paradën e Qeverisë në Samitin e Diasporës, ku dhe ai mori pjesë, por që e cilësoi të dështuar.

Kryetari i Vatrës, dr. Gjon Buçaj, pasi i uroi mirëseardhjen, e informoi mysafirin për veprimtaritë më të fundit të Vatrës, duke u ndalur në veprimtarinë -bazë të këtij viti, atë të Faik Konicës, që solli krahas të tjerave edhe shumë studime të reja rreth figurës së Faik Konicës, 7 libra të rinjë rreth dhe për Faik Konicën, një ekspozitë me materiale të rralla, për Konicën, artikuj studimor dhe esse, etj. Kryetari Buçaj, sqaroi mysafirin për qëndrimet e Vatrës dhe parashtroi edhe një herë pse Vatra, në mënyrë demokratike, duke e diskutuar pjesmarrjen ose jo në Samitin e Diasporës, e shtroi atë për diskutim në strukturat e veta, dhe me vota, u mor vendimi për të mos u bërë pjesë e paradës paraelektorale të Kryeministrit dhe Qeverisë së tij.Vatra, shtoi kryetari Buçaj, ia ka dhënë shansin Kryeministrit të Qeverisë së majtë, për bashkëpunim në të mirë të Shqipërisë, por ai vetë i largohet Vatrës.Në axhendën e tij ka vetëm një takim me Vatrën, atë të shtatorit 2013, kur një përfaqësi e Vatrës shkoi dhe e takoi në hotelin ku pushonte. Janë të publikuara kërkesat e Vatrës në atë takim. Pas atij takimi, Kryeministri ka ardhë shpesh në Amerikë, por nga Vatra nuk i ka ra rruga asnjëherë.

Më pas biseda është zhvilluar për të përcaktuar pikat e bashkëpunimit mes diasporës së Amerikës dhe asaj të Mbretërisë së Bashkuar.Në bashkëbisedim kanë marrë pjesë edhe Idriz Lamaj, Zef Balaj, Marjan Cubi dhe editori i Diellit, i cili e ka njohur mysafirin dhe shoqëruesit e tij me rrugëtimin 104 vjeçar të Vatrës përmes fotove dhe dokumenteve arkivore.Lufti Vata, është i njohur për kontributin e tij të veçantë në mësimin e gjuhës shqipe në diasporën shqiptare në Mbretërinë e Bashkuar, në hapjen dhe funksionimin e shkollave shqipe në Angli. Në fjalën e tij hyrëse gjatë bisedës më Kryetarin Buçaj dhe bashkëpunëtorët që e shoqëronin, z. Vata, tha se ndjehej i emocionuar që ishte në Federatën VATRA, e cila është Dekane e Diasporës shqiptare, për më shumë se shekull veprimtari Kombëtare, paraendëse e Pavrësisë së Shqipërisë, aktive edhe sot.

I pyetur nga Gazeta “Dielli” se si ndjehej pas takimit, mysafiri me banim në Londër, u shpreh:Takimi i sotëm me zotin Buçaj dhe anëtarët e bordit të Federatës Panshqiptare të Amerikës”VATRA” ishte i një rëndësie të veçantë për shumë arsye! E para, nga Federata Vatra, si një promotore e fuqishme diasporës ndër vite dhe kontribuese me vlera të veçanta në çështjen kombëtare, ke se çfarë mëson!

Në emër të forumit të shoqatave shqiptare në Britani dhe shoqatës Ardhmëria i kërkova zotit Buçaj bashkëpunim për çështjet të rëndësishme dhe rolin që duhet të luajmë ne si diasporë në çështjen kombëtare dhe kordimin me institucionet e vendeve tona, me qëllim që ne si diasporë të bëjmë të pamundurën për hapjen e sa më shumë shkollave shqipe me qëllimin e mirë, që të ruajmë, gjuhën traditën, kulturën tonë kombëtare, që të integrohemi në shtetet dhe vendet ku jemi, por gjithmonë duke ruajtë traditën dhe kulturën shqiptare!

U ndjeva i emociounuar dhe i lumtur të takohem me kryetarin e Vatrës dhe anëtarët e Kryesisë e Këshillit të kësaj federate dhe diskutuam për situatën politike dhe ekonomike të vendeve tona si dhe për projekte të përbashkëta në të ardhmen,ramë dakord për një bashkëpunim të frytshëm dhe ambincioz në fusha të ndryshme që na përkasin neve si diasporë por gjithnjë nën mbështetjen e Federatës “VATRA”.

Në fund z. Lutfi Vata, Kryetari i Ardhmerise dhe Forumit te shoqatave Shqiptare ne Angli dhe kryetari i Vatres dr. Gjon Buçaj, shkembyen dhurata simbolike.

“FAIK KONICA-DRITEHIJET E NJE DIPLOMATI” PROMOVOHET NE TIRANE

December 20, 2016 by dgreca

-Libri “Faik Konica – dritëhijet e një diplomati” i autorit Agron Alibali, q u promovua në Bbliotekën Kombëtare në Tiranë, fitoi cmimin”KONICA” në Konkursin e shpallë nga VATRA dhe Gazeta Dielli” në kuadër të “VATRA-2016-VITI I KONICES”/

Në Bibliotekën Kombëtare të Shqipërisë, në kuadër të përmbylljes së vitit kulturor “Faik Konica”, shpallë nga Federata Panshqiptare e Amerikës”VATRA”, u promovua ditën e Premte, 16 dhjetor, vepra studimore “Faik Konica – dritëhijet e një diplomati” të autorit Agron Alibali, me pjesëmarrjen e veçantë të Prof. Aleks Luarasi, Prof. Pëllumb Xhufit, ish-Presidentit të Shqipërisë, Alfred Moisiu, si dhe studies të shquar nga vendi dhe Kosova. Në fjalën e saj përshëndetëse, Drejtoresha e BKSH-së, Prof. Dr. Persida Asllani u shpreh se “kjo vepër studimore risjell në vëmendje një prej figurave më të shquara të kulturës dhe diplomacisë shqiptare, Faik Konica”.

Studimi “Faik Konica – dritëhijet e një diplomati” i Agron Alibalit, i mbështetur në dokumente të panjohura, shumica të shfrytëzuara për herë të parë, përfshirë arkivin e Legatës Shqiptare në SHBA, trajton gjerësisht rolin e Vatrës si “qeveri në mërgim”, marrëdhëniet komplekse midis dy “shokëve të armëve”, Konicës e Nolit; raportet e Konicës me koloninë shqiptare në SHBA etj., ku dalin në pah sidomos edhe “dritëhijet” e tij. Në libër shfaqet figura e Konicës si përfaqësuesi informal diplomatik i Kosovës në SHBA, roli i tij thelbësor për shqipen juridike e diplomatike etj. Rëndësi të veçantë në libër paraqet botëkuptimi shtetformues e kushtetues i Faik Konicës, çka paraqet vlera të posaçme aktuale. Veprimtaria e Konicës përcillet krahas etapave të themelimit e forcimit të shtetit shqiptar, deri në momentet tragjike të pushtimit fashist. Në këtë drejtim, libri rreket të japë kontribut të veçantë në studimet për historinë e shtetit dhe së drejtës në Shqipëri, dhe të rikthejë vëmendjen sidomos në periudhën kritike kur shteti shqiptar u konsolidua nën Mbretin Zog. Në pjesë e tij të fundit trajtohet edhe çështja e bibliotekës së tij të famshme, deri vonë të konsideruar të humbur, si dhe punën për gjurmimin dhe kthimin e kësaj pasurie të çmuar pranë Bibliotekës Kombëtare e Shqipërisë, sikurse e pat lënë amanet vetë Konica.
Pak kohë më parë rreth 270 libra të kësaj biblioteke janë bërë pjesë e fondit të vlerave të rralla të Bibliotekës Kombëtare të Shqipërisë, një pjesë e të cilave u ekspozuan për pjesëmarrësit e këtij aktiviteti.

$18,000.00 për t’i ardhur në ndihmë shqiptares në Tampa

December 12, 2016 by dgreca

*NGA ZAMIRA RUBJEKA/

*Familja Nurka banon prej kohesh në Florida, por vitet e fundit të dyja veshkat e zj. Xhina Nurka po dorëzohen edhe pas shumë seancave të dializës. Xhina, një grua shqiptare, punëtore, një nënë e shkëlqyer, një grua prej 25 vjetësh e bashkëshortit Lulëzim, artistit dhe piktorit nga Korça, një mike dhe një vatrane patriote, mundohet të mbajë gjithmonë një buzëqeshje edhe pse trupi i saj lufton në heshtje. … NDIHMO DHE TI SHQIPTAR, KUDO QE NDODHESH..FUSHATA VAZHDON/

KOMUNITETI SHQIPTAR IU BASHKUA THIRREJES SE VATRES NE TAMPA….VETËM TË BASHKUAR DHE PRANË NJËRI-TJETRIT MPOSHTET ÇDO DHIMBJE/

Festa e Pavarësisë së Shqipërisë u festua me një pjesëmarrje të jashtëzakonshme nga komuniteti shqiptar i Tampa Bay. Misioni i kësaj feste mori ngjyra humane, përveç asaj patriotike. Kur mësuam që familja Nurka nga Korça po luftonte me jetën, i gjithë komuniteti shqiptar i Tampa Bay u prek dhe iu bashkëngjit nismës së Vatra Tampa për të dhuruar të ardhurat e fituara nga Kremtimi i Festës së Pavarësisë. Familja Nurka banon prej kohesh në Florida, por vitet e fundit të dyja veshkat e zj. Xhina Nurka po dorëzohen edhe pas shumë seancave të dializës. Xhina, një grua shqiptare, punëtore, një nënë e shkëlqyer, një grua prej 25 vjetësh e bashkëshortit Lulëzim, artistit dhe piktorit nga Korça, një mike dhe një vatrane patriote, mundohet të mbajë gjithmonë një buzëqeshje edhe pse trupi i saj lufton në heshtje.

Më në fund kjo vuajtje nuk mund të mbahej brenda mureve të shtëpisë. Tashmë miqtë dhe shokët e kësaj familje mësuan për dhimbjet e saj dhe vendosën të mos heshtin, por përkundrazi, të ndajnë hallin me miqtë e shokët.

Xhina tani ka nevojë për një transplant veshke, por nuk ështëe lehtë të gjesh një veshkë, që t’i përshtatet. Në pamundësi për të gjetur veshkën nga donatorë dhe për të pritur në radhë,sepse do të ishte shumë vonë, burri i saj, Lulëzimi, është ivetmi donator. Kjo familje do të ketë dy operacione. Ky ështënjë vendim sa i vështirë aq edhe human i burrit për gruan e tij dhe nënën e djalit të tij të vetëm adoleshent Xhefrit.

Në emigracion, kur pjesëtarët e familjes janë mijëra kilometra larg, miku, shoku bëhet familje. Duke u nisur nga kjo situatë, Vatra Tampa filloi fushatën e mbledhjes së fondeve për të ndihmuar dhe lehtësuar sadopak hallin e kësaj familje.

Të gjithë vëllezërit dhe motrat shqiptare kontribuuan nëmënyra të ndryshme, duke shpërndarë linkun e Gofund.com.,duke dhuruar financiarisht, duke u lutur për shërimin e Xhinës gjatë gjithë muajit nëntor, përpara dhe pas festës.

Deri tani në llogarinë e Gofundme.com janë mbledhur rreth $18000, ku mbi 90% të dhuruesve janë shqiptarë. Mbi 1500 shares janë bërë në Facebook, që kontribuoi në shpërndarjen e kësaj nisme.

Sot Vatra Tampa organizoi ceremoninë e dhurimit të fondeve për familjen Nurka në shumën e mbledhur prej $6000 te Jessi’s restaurant me pronare familjen e nderuar shqiptare Sulisufay.

Kjo u bë e mundur nga pjesëmarrja masive e komunitetit dhe kontributit vullnetar të anëtarëve të Vatrës dhe bordit të saj, qëdedikuan kohë dhe energji në kremtimin e 104-vjetorit të shpalljes së Pavarësisë.

Sot u ndie dashuria për njëri-tjetrin si një familje e madhe nëdhé të huaj. Shqiptaret si gjithmonë e tregojnë bujarinë, shpirtin human dhe përkrahjen morale. Në këtë mbrëmje ishin të pranishëm miq amerikanë dhe disa familje nga Bosnjë-Hercegovina, që dhuruan dhe morën pjesë në këtë ngjarje.

Zj. Xhina dhe z. Lulëzim falënderuan nga zemra të gjithëshqiptarët e pranishëm, por edhe ata që dhanë kontributin e tyre në ndihmë të familjes së tyre kudo që ndodhën, përsolidaritetin dhe dashurinë e treguar. Z. Nurka tha: “Iu shpërblefsha vetëm për gëzime“. Z. Tasim Ruko, presidenti i Vatra Tampa falënderoi miqtë për pjesëmarrjen dhe donacionet. Ai theksoi se populli shqiptar edhe këtë radhë e tregoi zemërgjerësinë dhe shpirtin human. Këto fonde u bënë të mundura vetëm nga ky komunitet, i ciliu bashkua për t’i treguar që kurrë nuk do të jenë vetëm.

Kompania “ShqipTv” dhuroi dy paketa televizive falas për këtë event. Vatra Tampa falënderon në emër të familjes Nurka të gjithë komunitetin shqiptar në Tampa Bay. Nevojat e komunitetit kanë qenë dhe do të jenë gjithmonë prioriteti dhe misioni i Vatra Tampa.

Falënderojmë Jessi’s Restaurant për ushqimin special dhe Dj Jimmy (Genti Mucollari), që me muzikën e përzgjedhur krijoi një ambient të gëzuar dhe festiv dhe kengetaret nga Gjilani Besim Limani dhe Sadete Shkodra per kenget emocionuese dedikuar Xhines dhe Lulezimit.

Vetëm të bashkuar dhe pranënjëri-tjetrit mposhtet çdo dhimbje. Zoti e bekoftë familjen Nurka. I urojmë shërim sa më të shpejtë. Zoti i bekoftë të gjithë shqiptarët në mërgim.

NJË VIT PËR KONICËN-FITUESIT E KONKURSIT

December 8, 2016 by dgreca

Për një vit, nga Dhjetori i Vitit 2015 e deri në 26 Nëntor 2016, Federata Vatra, organizoi veprimtari kushtuar Faik Konicës. Finalja ishte të Shtunën me 26 Nëntor 2016 me tre veprimtari të përbashkëta: Simpozium kushtuar Veprës dhe Jetës së Konicës, Promovimi i romaneve të Faik Konicës “Martesa e Lejlës” e “Sotiri dhe Mitka”, si dhe Ekspozita për Faik Konicën.Pjesmarrësit ishin të shumtë dhe disa prej tyre e ndoqën në këmbë në fund të sallës, madje dhe në korridor. Kishin ardhë edhe nga Florida, Michigani, Bostoni, Nju Xhersi, dhe Kënektikat.

Simpoziumin e ka hapë kryetari i Vatrës, dr. Gjon Bucaj, i cili u uroi mirëseardhjen pjesmarrësve dhe prezantoi moderatorin e veprimtarisë Profesorin Mithat Gashi, i cili ftoi Pastor Fr. Nathan Preston – nga Kisha Ortodokse Shqiptare e Shën Kollit, për të përcjellë Lutjen Fetare. Ishin te pranishëm edhe Imam Elez Osmani si dhe dom Fran Kola.

Simpoziumi kushtuar Faik Konicës solli kumtesa me nivel shkencor falë punës serioze të studiuesve: Ilir Ikonomi-gazetar në Zërin e Amerikës, autor i librave “Faik Konica- jeta në Washngton”, “Pavarësia-Udhëtimi i Paharruar i Ismail Qemalit” dhe libri i sapobotuar “Esat Pashë Toptani-Njeriu, Lufta, Pushteti”… Z. Ilir Ikonomi solli një kumtesë interesante për Faik Konicën- Diplomat(sa keq që nuk patën rast ta dëgjonin diplomatët tanë në Nju Jork a Washington!), Neka Doko,drejtoreshë e Bibliotekës Fan S Noli pranë Kryekishës së Shëngjergjit në Boston, studiuese e “shkollës franceze”,-solli Kumtesën për Faikun në Harvard; studiuesi Fotaq Andrea,ardhur nga Franca, që solli në këtë vit të Konicës edhe dy librat e tij” Faik Konica-Përlindësi Modern”, një libër i ndërtuar me fletore Koniciane me 450 faqe, si dhe librin me dy romanet e panjohura të Faik Konicës, alias Gjoni i Krujës”Martesa e Lejlës” dhe “Sotiri dhe Milka”, sponsorizuar nga VATRA(fitues i cmimit “Konica”),u paraqit me kumtesën” Roli i “Vatrës” në trajtimin shkencor dhe evidentimin e vlerave të veprës koniciane “.

– Anton Cefa, ish Editor i Diellit, studiues, kritik letrar, poet e publicist, autor i librit fitues të cmimit Konica” Faik Konica:”Për shpiritën e Vatrës jam responsible unë”, dhe shumë librave të tjerë,solli një kumtesë interesante, duke depërtuar në shpirtin konician, studiusja e bibliotekës”Luigj Gurakuqi” në Shkodër, doktorante,kritike letrare, autore librash Arjeta Ferlushkaj,-solli një kumtesë interesante për Albaninë e Faik Konicës, Studiuesit Idriz Lamaj, ish gazetar i Zëri të Amerikës, dhe autor i shumë librave me studime historike,solli kumtesën”MERITA E FAIK KONICËS PËR PËRCAKTIMIN E ALFABETIT TË PËRBASHKËT SHQIPTAR”, studiuesi Agron Alibali, autor i librit fitues të Konkursit të Vatrës” Faik Konica-Dritëhijet e një diplomati” solli kumtesën ” BIBLIOTEKA E FAIK KONICËS, që u lexua nga Asllan Bushati), studiuesi Thanas Gjika,autor librash e një mori studimesh, pjesmarrës në konkursin e Vatrës me librin”“Mosdënimi i krimit është krim i ri”, – solli kumtesën “DOKTOR GJIPERA –ROMANI I PARE REALIST I LETËRSISË SHQIPE.” e lexuar nga Fotaq Andrea) dhe Editori i Diellit, Dalip Greca solli Kumtesën”Faik Konica dhe Gazeta Dielli”. Studiesit sollën këndvështrime dhe interpretime të reja, fakte, dokumente, letërkëmbime, argumente dhe zbulime të reja rreth veprës dhe jetës së Faik Konicës.

Në seancën e dytë u bë promovimi i romaneve të Faik Konicës. Autori-përkthyes që i solli romanet nga frëngjishtja në shqip, Fotaq Andrea, tregoi me detaje se si ra në gjurmë të romave, këshillimet dhe bashkëbisedimet e gjata me ekspetrtë të historisë dhe të Letërsisë, dhe më pas përkthikmi dhe botimi i romaneve. Ekspertja Neka Doko, në fjalën e saj evidentoi vlerat e romaneve.

Vatrani nga Bostoni, Sotir Pani, i biri i ish kryetarit të Vatrës Vasil Pani, dhe i nipi i Josif Panit, nga pionierët e organizimit të Lëvizjes Kombëtare në SHBA, prezantoi librin”At e bir për mëmëdhenë”, libër që i kushtohet babait dhe gjyshit të tij, me botues Kolec Traboini. Edhe ky libër ishte paraqitë në konkursin për Faik Konicën.

***

Në emër të Jurisë të Konkursit për Librat, essenë, studimin më të mirë për Konicën(Vetëm për vitin 2016), Editori i Diellit prezantoi fituesit. Ai falenderoi vatranin biznesmen Zef Balaj,për sponsorizimin e këtij konkursi. Po ashtu iu ndanë “Mirënjohje” studiuesve kontribuesë për Jetën dhe veprën e Konicës.

Në emër të Jurisë(Adnan Mehmeti, Idriz Lamaj, Dalip Greca) të Konkursit për Librat, essenë, studimin më të mirë për Konicën(Vetëm për vitin 2016), Editori i Diellit prezantoi fituesit. Ai falenderoi vatranin biznesmen Zef Balaj,për sponsorizimin e këtij konkursi, duke i shoqëruar çmimet shpërblime.

Z.Balaj i dorëzoi studiuesit Anton Çefa, Çmimin-Për librin “Faik Konica: Për shpiritën e Vatrës jam responsible unë”, botim i vitit 2016 me vështrime të reja, analiza, esse, që fokusohen në vlerat shpirtërore, kombëtare, vatrane të Faik Konicës.

Çmimi Konica iu dha z. Fotaq Andrea për librin me Esse”Faik Konica-Përlindësi modern” dhe sjelljen në gjuhën shqipe të romaneve”Martesa e Lejlës” dhe “Sotiri e Milka”, botime të vitit 2016.

Çmimi Konica iu dha Z. Agron Alibali për librin “Faik Konica- Dritëhijet e një diplomati”, botim i vitit 2016 qe sjell fakte të reja, analiza dhe interpretime që hedhin më shumë dritë rreth diplomatit, bashkëthemeluesit të Vatrës, Faik Konica.

Ndersa çmimi për studimin më të mirë i shkoi studiueses Dr. Yllka Filipi- Për studimin “Faik Konica: Katër Përralla nga Zullullandi”, që sjell analiza, vështrime të realiteteve historike shqiptare të veprës së Konicës dhe vlerave të satirës dhe humorit Konician.

Po ashtu u ndanë “Mirënjohje” studiuesve kontribuesë për Jetën dhe veprën e Konicës.

Federata”VATRA” nderoi me MIRËNJOHJE Studiuesin Ilir Ikonomi:Për kontributin e veçantë dhe standartatet e reja të vendosura prej tij me librin” Faik Konica -Jeta në Washington”, botim i Onufrit 2011.

Federata”VATRA” nderoi me MIRËNJOHJE studiusen Neka Doko:Për kontributin e veçantë dhënë në studimin e figurës së Faik Konicës dhe evidentimin e trashëgimisë”Konica” në Bibliotekën Fan S. Noli pranë Katedrales së Shën Gjergjit në Boston.

Federata”VATRA” nderoi me MIRËNJOHJE studiusen Arjeta Ferlushkaj:Për Kontributin e veçantë që ka dhënë në studimin e vlerave Koniciane të revistës Rilindase të Faik Konicës “Albania”.

Federata”VATRA” nderoi me MIRËNJOHJE studiuesin Bejtullah Destani: Për studimin dhe evidentimin e vlerave të Faik Konicës përmes korrespondencës së zgjedhur për vitet 1896-1942.

Federata”VATRA” nderoi me MIRËNJOHJE studiuesin Thanas L. Gjika: Për ndihmesën e dhënë në fushën e studimeve dhe sjelljen e vlerave të veprave të Faik Konicës, veçanërisht të romanit “Doktor Gjilpëra”

***

Kolec Ndoja, Kryetar i degës së Vatrës në South Florida, pasi përshëndeti organizatorët, ligjërusit, vlerësoi figurën e Faik Konicës. Ai u zotua se do të merrte përsipër që me shpenzimet e veta do të vendosë një Bust të Faik Konicës në Shkodër, pranë Kolegjit, ku mësoi Faiku. Inisiativa e tij mori duartrokitjet e të pranishmëve.

Z.Ndoja u zotua se së shpejti do të jepte lajmin e blerjes së shtëpisë të Fan S. Nolit dhe kthimin e saj në shtëpi muze.

Ilir Ikonomi, i dhuroi Kryetarit të Vatrës me dedikim librin e tij më të fundit”Esat Pashë Toptani-Njeriu, Lufta, Pushteti”. Z. Ikonomi tërhoqi vëmendjen për shtëpinë e Faik Konicës në Konicë, të cilën ai e kishte vizituar dhe fotografuar në vitin 2010. Ikonomi kërkoi që Vatra të bëjë përpjeke, duke i kërkuar shtetit shqiptar, që kjo shtëpi në Konicë, së paku të ketë një pllakë ku të shkruhet se aty ka lindë Faik Konica. Autoritetet greke e ruajnë atë shtëpi thjesht si një ndërtesë muslimane për të tërheqë turistët, por nuk japin identitetin e saj.

Pas simpoziumit u shtrua një kokteijl në Bibliotekn e Vatrës.Në fund të veprimtarisë u vizitua Ekspoziat për Konicën.(Korresp i Diellit)