zgjedhjet ne Shqiperi – Dielli

SHPËTIMI I SHQIPËRISE PO AFRON

September 12, 2021 by s p

Thanas L. Gjika*

*Ky shkrim është një qëndrim personal i autorit dhe nuk përfaqëson mendimin dhe qëndrimin e Vatrës.

Sivjet më 21 qershor gjatë kthimit me autobuz me grupin e Rotarianëve korçarë nga Shkodra në Korçë u hap biseda lidhur me zgjedhjet e 25 prillit. U shpreha mendimin se politika amerikane kishte zgjedhur si të keqen më të vogël, të përkrahte në ato zgjedhje Partinë Socialiste. Kur në pushtet të jetë PS-ja, Amerika do të ndihmojë rigjenerimin e Partisë Demokratike. Pas rigjenerimit të PD-së SHBA-të do t’i futen punës për sjelljen e kësaj partie në pushtet për të goditur PS-ë. Më kundërshtuan duke më thënë se klasa politike shqiptare është një e vetme e lidhur pavarësisht nga ndarja në partira politike dhe nuk mund të luftohet, gjë që nuk lejon rigjenerim politik.

Mirëpo SHBA-të e gjetën rrugën e shpëtimit me anën e shpalljes së Sali Berishës “Non grata” prej Departamentit te Shtetit. Ky vendim e detyroi Lulzim Bashën të mbajë qëndrim dhe të kërkojë largimin e Sali Berishës nga PD dhe nga grupi i saj parlamentar. Ky vendim i detyron anëtarët e PD të pozicionahen nëse do të mbrojnë interesin personal të Sali Berishës dhe të jenë antiamerikanë, apo do të mbrojnë interesin e tyre dhe të Shqipërisë dhe të jenë proamerikanë. Kuptohet se shumica e anëtarëve të PD-së nuk mund të bashkohen me S. Berishën.

Lulzim Basha pas këtij vendimi do të bëhet udhëheqësi real i PD-së dhe kjo do ta forcojë atë politikisht dhe do ta kthejë PD-në në një forcë politike të vërtetë poramerikane. Kjo do të shpjerë në forcimin e PD-së dhe së shpejti do të sjellë nevojën për zgjedhje të reja, të cilat do t’i fitojë Partia Demokratike e rigjeneruar dhe e forcuar si forca e vetme poramerikane në Shqipëri. Kjo parti pas ardhjes në pushtet do të vijojë goditjen e korrupsionit dhe do të kryejë përfundimisht Reformën në Drejtësi, pra shpëtimin e Shqipërisë.

Tiranë: Ambasada Amerikane gati të marrë masa ndaj atyre, që nxitin apo pranojnë dhunën gjatë zgjedhjeve

March 26, 2021 by dgreca

KQZ ka kërkuar hetime të thelluara për 28 kandidatë për deputetë: 5 nga Aleanca ABEKO, 2 nga Bindja Demokratike, 2 nga Lëvizja për Ndryshim, 1 nga Lëvizja e Re, 6 nga LSI, 2 nga Nisma Thurrje, 4 nga Partia Demokratike, 3 nga Partia Socialiste dhe 3 nga Partia Social-Demokrate.

Nga Ilirian Agolli/ VOA

Me hapjen zyrtare të fushatës zgjedhore për parlamentin e ri ambasada e SHBA-ve në Shqipëri gjeti edhe një herë rastin t’u bëjë thirrje publike udhëheqësve partiakë që të refuzojnë qartas dhunën, dhe kandidatët për deputetë të zbatojnë ligjet vendase dhe standartet ndërkombëtare.

Ambasada amerikane deklaroi se Shtetet e Bashkuara i kanë bërë të qarta pritshmëritë dhe shpresat e veta, si mike dhe aleate e Shqipërisë.

“Ne do të marrim masat e duhura në përgjigje të atyre që pranojnë ose nxisin dhunën, pranojnë ose nxisin shkeljen e ligjeve zgjedhore dhe standardeve ndërkombëtare, apo përpiqen të minojnë integritetin dhe besimin në procesin zgjedhor dhe rezultatet e tij” – thuhet në deklaratën e ambasadës amerikane. – Ne do t’i mbajmë përgjegjës udhëheqësit, që janë në poste drejtuese dhe kanë përgjegjësinë e parë dhe më të rëndë për të vepruar në interesat e vendit”.

Ambasada amerikane i ftoi qytetarët të zgjedhin ato parti dhe kandidatë, që ofrojnë të ardhmen më të mirë për Shqipërinë, në partneritet me Shtetet e Bashkuara dhe drejt anëtarësimit të plotë në Bashkimin Europian.

Prej shumë muajsh ambasada amerikane po këmbëngul që partitë politike të mbajnë larg listave të kandidatëve personat me rekorde kriminale dhe korruptive.

Në deklaratat e saj është përmendur emri i Tom Doshit, që institucionet të pengojnë hyrjen e tij në parlamentin e ri.

I pyetur për këtë, kryetari i Komisionit Qendror Zgjedhor, Ilirjan Celibashi, deklaroi në konferencën e sotme të shtypit se e ka dërguar për verifikim emrin e Doshit në institucionet përkatëse.

“Në rastin e zotit Doshi KQZ ka marrë shtysën nga të dhëna publike, që e nxitin t’i kërkojë prokurorisë informacione të tjera, veç atyre që ai ka dhënë në formularin e vetëdeklarimin, për të bërë vlerësim më të plotë mbi përputhshmërinë e kandidimit të tij për deputet. Por edhe në formularin e vetëdeklarimit ka të dhëna që shërbejnë si indicie për KQZ-në, për të kërkuar hetim të thelluar për kandidatin” – tha zoti Celibashi.

Ai shtoi se bashkë me zotin Doshi, KQZ ka kërkuar hetime të thelluara për 28 kandidatë për deputetë: 5 nga Aleanca ABEKO, 2 nga Bindja Demokratike, 2 nga Lëvizja për Ndryshim, 1 nga Lëvizja e Re, 6 nga LSI, 2 nga Nisma Thurrje, 4 nga Partia Demokratike, 3 nga Partia Socialiste dhe 3 nga Partia Social-Demokrate.

ZGJEDHJET NË SHQIPËRI-“ EDI RAMA NUK KA FAJ”

June 21, 2017 by dgreca

asllani-56

Opinion nga Asllan Bushati/

Duke i parë nga një këndshikimi i përgjithshëm në zgjedhjet e 2017-ës në Shqipëri, ( krahasuar me të mëparëshmet), mund të konstatohet lehtë se kanë disa ndryshime të dukshme. Që në fillim mund të theksojmë se ata nuk kanë dam-dame, flamuj partiak, banderola, karikatura, shprehje vulgare e poshtruese për kundërshtarët, banda muzikore, grupe fansash që demostrojnë forcë etj. Bukur. Shpresojmë të jetë shprehje e një emancipimi të përgjithëshëm shoqëror e zgjedhor, ku të gjithë aktorët kanë pjesën e tyre. Shpresojmë që ato të jenë më pak të kushtueshme se të mëparëshmet, të drejta, të ndershme , të pa manipuluara, transparente dhe të pranuara pa kontestim nga gjithë pjesëmarrësit në zgjedhje.

Por, nuk mund të kalojmë pa e theksuar se në emër të maxhorancës, në cilësinë e Kryeministrit, dhe të Kryetarit të PS-së, Edi Rama për gati katër vite, për pak sa nuk na shurdhoj veshët duke thënë:”fajin e ka Sali Berisha, fajin e ka qeveria e mëparëshme e PD-së, fajin e ka SHQUP-i, fajin e ka Lulzim Basha e cadra në bulevard. Dhe tani (e moderuar në fushatë), fajin e ka LSI-ja dhe Ilir Meta të cilët e kanë penguar të udhëheq, fajin e ka PDIU-ja e Shpëtim Idrizi,… Ben Blushi e Koco Kokdhima… madje po të shkohet më tutje ndoshta mund të dalë që fajin e ka patur edhe Ramiz Alia e Fatos Nano, por vetëm Edi Rama nuk ka asnjëherë faj”.

Edi Rama pati premtuar 300 mijë vende pune të reja e shëndetësi falas, por meqënëse ata nuk u realizuan ,” ai nuk ka faj”. Në Parlament e në segmente udhëheqëse të katër vjecarit të tij, erdhën shumë të inkriminuar, “por ai edhe për këto nuk ka faj”. Shkatrroi strukturat kanabiste të fshatit Lazarat, por ata u përhapën në të gjithë Shqipërinë dhe për këtë Edi “nuk ka faj”. Bëri premtime të mahnitëshme në shumë fusha, sa ta kishte ënda ta dëgjoje në fushatën e 2013-tës, por me që ata nuk u realizuan “ai nuk ka faj”. Cdo vit nga Shqipëri janë larguar për në vendet e tjera mesatarisht 30-40 mijë të rinjë se nuk gjenin mundësi punësimi, por edhe për këtë Edi “nuk ka faj”.Pra tani në fushatë nuk i duhet kërkuar llogari për premtimet se ai për katër vjecarin e ardhshëm e don “timonin” dhe “tepsinë”vetëm dhe është shpresëplotë se do të bëjë mbrekullira. Në qoftë se ndonjerit i vete mendja ti kërkojë Edit llogari për të shkuarën, kjo është fyerje për të, është jashtë mode dhe s’ka asnjë përqasje me” idetë madhështore të tij për të ardhmen”. Pa le sa thjeshtë vishet ( ore me citjane), sa bukur flet para turmave me batuta e barsaleta brilante, aktor i vërtetë i shoubizit alla rilindase. Madje edhe për deklaratat për Presidentin Trump dhe për thirrjen drejtuar policisë që pas punës të bëjnë fushatë për PS-në,” ai nuk ka faj”.

Edi Rama s’ka nevojë të jap llogari në këto zgjedhje për dështimet e tij katërvjecare, sepse ai aktualisht është ” shumë i zënë me shpalosjen e filozofisë së bashkimit të së majtës shqiptare”. Kjo është shumë” madhore” në këtë moment, premtimet e së kaluarës dhe të tjerat janë sekondare.Shikojini me vemendje se cfarë janë partitë e vogla dhe partnerët për Edin…ferra nëpër këmbë që i kanë pushtuar administratën, që se kanë lënë të punojë dhe për këtë ai “nuk ka faj”. Plotfuqishmëria e një partie që ai kërkon në këto zgjedhje, “nuk” është dukshëm një autoritarizëm i tipit të ri dhe “shumë e rrezikëshme” për demokracinë në Shqipëri. Jo , betohet Edi dhe kur betohet ai ,duhet te besohet pamedyshje.

Por, unë të dashur bashkatdhetar mendoj se, “Edi Rama ska faj” se ai si person, është i pa përgjegjshëm për cfarë thotë e cfarë bën, është i pa aftë për të drejtuar shtetin, madje edhe po ta cojë atë në greminë (sic deshi të bënte me reformën dë drejtësi dhe zgjedhjet pa opozitën), prap do të thotë “unë nuk kam faj”. Fajtor do të jemi ne votuesit në qoftë se e votojmë përsëri Edi Ramën. Ti japësh edhe një shans tjetër këtij njeriu, kur ka shkatërruar cdo gjë në katër vite, është njëlloj si të vrasësh me vetdije të ardhmen e fëmijëve të tu.

Por edhe LSI-ja dhe Ilir Meta, që tashmë po u bien sirenave, nuk janë pa faj. Aty kanë qenë dhe vazhdojnë të jenë në koalicion me Edi Ramën. Vendimet i kanë marrë bashkë , përfitimet i kanë ndarë bashkë, pisllëqet i kanë bërë bashkë, tani nuk duhet tu largohen përgjegjesive për dështimet. Ilir Meta së bashku me Edi Ramën e Erjon Velinë dhe disa analistëtë sojit të tyre, po përpiqen të krijojnë përshtypjen se të gjithë politikanët shqipëtar, janë të të njejtit format, të të njejtit soji të korruptuar të gjithë njëlloj pra alla Rama-Meta. Unë mendoj se kjo është e qëllimëshme dhe e pa drejtë.

Është krejt ndryshe qëndresa stoike e PD-së dhe e forcave të tjera opozitare që treguan vision për të ardhmen, kulturë demokratike, qëndrueshmëri dhe forcë që e tronditi qeverisjen Rama –Meta. Këto u panë me insistimin për ligjin për dekriminalizimin, për ligjin për vetingun, për qëndrestarinë tremujore për votën e lirë ,e deri në shembja e 11 ministrave të të qeverisë Rama në prag të zgjedhjeve. Programi i Zotit Basha është i qartë, i ndërthurur , i argumentuar dhe i besueshëm, për uljen e taksave, punësimin, rritjen e pagave e të pensioneve, zgjerimin e biznesit, përmirësimin e shëndetësisë e të arsimit, zgjidhjen e problemit të pronave dhe hapjen ndaj biznesit të huaj.

Personalisht besoj tek ky program dhe ju ftoj ta votoni. Pas katër vitesh është e drejta jonë ti kërkojmë llogari edhe Zotit Basha se sa i ka realizuar premtimet e marra.

Zgjedhjet shqiptare – KQZ regjistron PD, LSI dhe PR

May 26, 2017 by dgreca

TIRANË, 26 Maj/- Komisioni Qendror i Zgjedhjeve(KQZ), miratoi të premten regjistrimin e Partisë Demokratike dhe te Partise Republikane si subjekte zgjedhore për zgjedhjet parlamentare të 25 qershorit. PD u regjistrua gjithashtu si subjekt zgjedhor edhe për zgjedhjet e pjesshme per kryetar bashkie ne Kavajë.

Komisioni Zgjedhor regjistroi si subjekt zgjedhor dhe Lëvizjen Socialiste për Integrim që do te konkuroje per zgjedhjet për kryebashkiak në Kavajë.

Regjistrimi i dy partive të djathta, PD dhe PR, erdhi pas vendimit të opozitës për futjen e saj në zgjedhje. Republikanet ne momentet e fundit vendosen qe te dilnin me vehte, nderkohe qe parti te tjera te vogla aleate te demokrateve kane pranuar qe kryetaret e tyre: Shehi, Duka, Ndoka, te futen en listat e PD.

KONGRESMENI GARY PETERS:Zgjedhjet e 23 qershorit sfidë dhe mundësi e re për Shqipërinë

June 21, 2013 by dgreca

Zgjedhjet e 23 qershorit sfidë dhe mundësi e re për Shqipërinë

Kongresmeni amerikan, Gary Peters në një intervistë me gazetarin Beqir Sina thekson se zgjedhjet e së dielës në Shqipëri janë vendimtare për shqiptarët.

“E tërë bota pret zgjedhje të pranuara nga të dyja palët më 23 Qershor. Zgjedhje të lira dhe të ndershme të cilat do të jenë një mundësi për Shqipërinë për të treguar maturinë dhe gatishmërinë për tu integruar në Bashkimin Evropian dhe bashkësinë ndërkombëtare”, theksoi kongresmeni amerikan, i cili është edhe bashkëkryetar i Grupit të Çështjeve Shqiptare në Kongresin Amerikan.
Sipas tij, shqiptarët duhet me qetësi dhe maturi të dalin në votime dhe të kalojnë një sprovë të rëndësishme për të ardhmen. “Unë kam shpresë të madhe se këta udhëheqës do të vijojnë me angazhimin e tyre në dobi të të gjithë shqiptarëve si dhe të marrëdhënieve Amerikë – Shqipëri. Shqiptarët me të vërtetë e kuptojnë rëndësinë e përfshirjes në zgjedhje demokratike”, theksoi kongresmeni Peters.
PYETJE: Do dëshiroja t’ju pyes si ligjvënës por edhe si bashkë-kryetar i Grupit të Çështjeve Shqiptare në Kongresin Amerikan, cilat janë sfidat me të cilat ndeshet Shqipëria sot në prag të votimeve të 23 qershorit ?
Peters: Zgjedhjet e së dielës përfaqësojnë një mundësi të jashtëzakonshme për Shqipërinë. Është, shumë – shumë e rëndësishme që këto zgjedhje të bëhen pa kundërshtime ose parregullsi pasi Shqipëria kërkon të vazhdojë rrugën e integrimit drejt Europës. Kur u takova me deputetët e Parlamentit gjatë vizitës time në Tiranë, unë dëgjova me veshët e mij angazhimin e tyre ndaj praktikave demokratike transparente. Unë kam shpresë të madhe se këta udhëheqës do të vijojnë me angazhimin e tyre në dobi të të gjithë shqiptarëve si dhe të marrëdhënieve Amerikë – Shqipëri. Shqiptarët me të vërtetë e kuptojnë rëndësinë e përfshirjes në zgjedhje demokratike.
Rruga drejt Bashkimit Evropian mbetet e rëndësishme për rritjen ekonomike për të ardhmen e Shqipërisë por edhe zgjedhjet e lira dhe të ndershme janë të domosdoshme për të, për të përparuar në rast se dëshiron t’i bashkohet BE -së. Shqiptarët duhet të presin prej drejtuesve të tyre që këta të demonstrojnë respekt të plotë ndaj principeve bazë të demokracisë të cilat dy kombet tona i kanë aq të shtrenjta.
Në zonën time elektorale në juglindje të Miçiganit, unë kam parë me sytë e mi përkushtimin e shqiptarëve ndaj bashkësive të tyre, familjeve si dhe ndaj SHBA -së dhe Shqipërisë.
PYETJE: Ju e keni të njohur fillimin e procesit të nisjes së këtyre zgjedhjeve fatkeqësisht me një ngjarje të pazakonshme të krijuar rreth Komisionit Qendror të Zgjedhjeve, pasi që opozita për arsyet e saj tërhoqi komisionarët e saj. Pra zgjedhjet nuk nisën siç duhet dhe ka shumë dilema tashmë rreth KQZ-së dhe punën vendimtare që duhet ta bëjë ?

Peters: Unë jam duke i ndjekur nga afër ngjarjet që kanë të bëjnë me Komisionin Qendror të Zgjedhjeve. Në një demokraci është e rëndësishme që populli të ketë besim tek institucionet siç është Komisioni Qendror i Zgjedhjeve. Zbatimi i ligjit duhet të sundojë në një mënyrë politike. Megjithatë, është e rëndësishme që KQZ po funksionon dhe rezultati i konsensusit politik. Unë jam i shqetësuar për kundërshtitë që janë krijuar, por mbetem me shpresë se situata do të zgjidhet me sukses.
PYETJE: Si një mik i madh i shqiptarëve si i vlerësoni marrëdhëniet e forcuara tashmë midis SHBA-ve dhe Shqipërisë, parë në aspektin e zhvillimeve të ndryshme kohëve të fundit në Shqipëri ?
Peters: Kur vizitova Shqipërinë,për herë te fundit – pashë shumë shtëpi me flamuj shqiptar dhe të Shteteve të Bashkuara krah për krah. Shtetet e Bashkuara qëndrojnë pranë Shqipërisë, duke e parë atë si një aleate e fuqishëm me qëllime të përbashkëta ekonomike dhe strategjike. Gjatë më shumë se 20 vjetëve vendet tona kanë ndarë vlera të përbashkëta të pavarësisë, lirisë, prosperitetit, paqes, dhe parimeve bazë të demokracisë.
Është në interesin e të dy vendeve që Shqipëria ti bashkohet me sukses Bashkimit Evropian, çka do të kërkojë përpjekje të fuqishme nga populli shqiptar dhe udhëheqësit e tij të cilët janë ata që duhet ta shtyjnë përpara këtë proces.
PYETJE: Një ngjarje e rëndësishme që ka të bëjë me rajonin janë edhe bisedimet midis Prishtinës dhe Beogradit. Si e vlerësoni këtë proces ?
Peters: Unë kam shpresa se bisedimet që po vijojnë midis Prishtinës dhe Beogradit do të prodhojnë një marrëdhënie funksionale dhe rezultate të prekshme për Ballkanin. Shtetet e Bashkuara të Amerikës do të vazhdojnë të inkurajojnë tëra përpjekjet për të mbështetur paqen dhe prosperitetin në këtë rajon kritik.

PYETJE: Ju keni qenë shumë i interesuar edhe mbi çështjet e shqiptarëve në Mal të Zi, si ju duket juve statusi i shqiptarëve në Mal të Zi dhe a mendoni se të tëra – “të gjitha” çështjet e tyre tashmë janë zgjidhur?
Peters: Çdo vend demokratik duhet të sigurojë të drejtat e minoriteteve dhe e kërkon këtë me përpjekje të vazhdueshme. Në Shtetet e Bashkuara ne vazhdojmë të punojmë për të forcuar të drejtat e minoriteteve dhe unë shpresoj se Mali i Zi do të bëjë të njëjtën gjë. Këto janë çështje për të cilat unë jam jashtëzakonisht i interesuar dhe do ti ndjek nga afër.

PYETJE: Kongresmen Peters më në fund cili është mesazhi që ju dëshironi t’u dërgoni shqiptarëve?

Peters: E tërë bota pret zgjedhje të pranuara nga të dyja palët më 23 Qershor. Zgjedhje të lira dhe të ndershme të cilat do të jenë një mundësi për Shqipërinë për të treguar maturinë dhe gatishmërinë për tu integruar në Bashkimin Evropian dhe bashkësinë ndërkombëtare. Intervistoi: Beqir Sina