Archives for July 2015

TE KTHEHET DENIMI ME VDEKJE

July 4, 2015 by dgreca

Ftesë për një referendum mbarë popullor për rivendosjen e DËNIMIT ME VDEKJE/
Opinion nga Abdurahim Ashiku, gazetar ne Athine/
Ne Foto:Michal Svatos dhe Anna Kosinova/
 Na fton ta bëjmë këtë gjaku i çiftit çek Michal Svatos dhe Anna Kosinova që me miqësinë e dhuruar, me përcjelljen e vlerave të natyrës dhe të popullit tonë do të ishin vlerë e shtuar në fjalët e shkruara të Edith Dyrham, Hahn e shumë njerëzve të mëdhenj që i ngritën lart virtytet e tona…
…Atij që iu pre miku, çdo send do t’i nepet me dorë të majtë e për nën gju, mje qi ki të paguej mikun. Dora e majtë në kanu quhet e pavlefëshme, e cila merr e nuk ep. Me mik nuk falet. Veç i pabesi me të pabesin falen me të… …Natën e festave, me ndërmjetësinë e dashamirëve ose të ndrikullave që me këtë rast përmbysin djepin, mund të falet djali, babai ose vëllai i vrarë, por kurrë miku”…(neni 110) 
Krenohemi se jemi shqiptarë, krenohemi me besën shqiptare, krenohemi me mikpritjen dhe tërbohemi kur dikush na e dhunon me poshtërsi besën tonë, mikpritjen tonë, na vret në mes të ditës mikun që vjen paqësisht. Dy të rinj, një djalë dhe një vajzë si drita e diellit, dy miq nga Çekia, ditën me dritë, dritën me diellin në perëndim, u vranë me plumb prapa… Michal Svatos dhe Anna Kosinova u prenë në besë… E lexova, rilexova, pashë disa herë radhazi lajmin dhe fotografitë që ata kishin përcjellë për ti treguan botës mbarë bukuritë e vendit tim, ndjeva në shpirt të qeshurën që u ndriçonte fytyrën mes mrekullive natyrore të një vendi që ata e deshën që në vështrimin e parë. Policia kishte vënë në dispozicion tridhjetë mijë euro për këdo që do të informonte për këtë vrasje që se mban toka shqiptare, që se mban shpirti i pastër shqiptar, që e dënon i madh e i vogël. Policia do t’i gjej vrasësit, e uroj këtë. Do t’i çojë në gjyq ku ndonjë avokat do të dalë (për turpin e profesionit të tij) ti mbrojë. Gjykata do ti dënojë me “Burgim të përjetshëm”. Kështu thotë ligji shqiptar. Madje, po qe se ata e pohojnë vrasjen vullnetarisht, do ti dënojë me njëzet e pesë apo tridhjetë vjet burg. Taksapaguesit shqiptarë do të mbledhin qindarkë pas qindarke për të paguar çdo muaj 480 euro për të mbajte në burg “me të gjitha komoditetet dhe me të gjitha të drejtat” të burgosurin e përjetshëm, vrasësin, kriminelin. Kështu thotë Evropa… Evropa i thotë “JO” dënimit me vdekje. Nuk na lejon. Nuk na pranon pjesë të saj… Shtetet e Bashkuara të Amerikës i thonë “PO” dënimit me vdekje. Dikur e ekzekutonte në “karrigen elektrike”, sot e ekzekuton “me shiringë në damar”. Është vendi më demokratik në botë… Shqiptarët, në historinë e mbijetesës së vet mijëravjeçare (prandaj nuk jemi shuar) e ka pas në kodin e saj kanunor dënimin me vdekje… Nga libri “E drejta zakonore shqiptare-1” që e mbaj në bibliotekën time në emigracion, botim i Akademisë së shkencave po shkëpus disa fragmente nga kapitulli “MIKU”. I shkëputa për kulturë por edhe si një thirrje shekullore të shoqërisë shqiptare që vrasësi nuk falet…  
***   
Në botë theksohet se shqiptari mikpritjen e ka fe dhe me këtë ai dallohet më tepër skocezët, nomadët arabë, dhe fshatarët turq e rusë…(J. Bouchard) Në kreun III MIKU, neni 97 i Kanunit të Lekë Dukagjinit, mbledhur dhe kodifikuar nga Shtjefën K. Gjeçovi thuhet: “Shpia e shqyptarit asht e zotit dhe e mikut.  Për mik kanuja njef çdo njeri qi i thrret në derë të shpisë. Haj i dheas a i fisit, haj mik a anmik, ase i çdo besimi ai kjoftë, kur t’i thërrasë kundrejt ase te dera, asht miku i shpisë. Miku, sa ma i largët të jetë e sa ma i randë, aq ma të madhe ia nep kanuja nderën e rojës” Në vijim, neni 98 (pritja e mikut) theksohet: Shqyptari ka një nderim aq të madh për mik qi bjen në derë, sa shkrihet me gjithshka ka, po guxoi kush me i ba këtij ndoj dhunë, deri sa ta përcjellë atje ku don miku… Neni 99 (Bukë e kripë e zemër) Mikut do ti bahet nderë: “Bukë e kripë e zemër”. Buka e kripa e zemra, zjarrmi e trungu e do firi për shtroje do të gjinden gadi për mik në çdo kohë të natës e të ditës. Për çdo mik duhet bukë si han vetë; për mik të mirë duhet kafja, rakija e buka e shtrueme me ndonji send ma tepër; për mik zemre duhet duhani, kafja e ambël, rakia e bukë e mish. “Mikut të zemrës i lëshohet shpija. Mikut të lodhun do t’i vihet rreth me të pritun me nderë. Mikut i lahen kambët. Përpushet zjarrmi, lypen edhe dru. “Miku don dru”” Neni 107 (Kur pritet mik) “Veç nji gacë me ta lypë te dera për me kallë çubukun, ia dhae e e ngau kush, të pritet mik”… Neni 109 (Detyra me e pague mikun e premë) Miku kuj s’i preket; po u prek s’falet… Neni 110 (përbuzja e atij që iu pre miku) …Atij që iu pre miku, çdo send do t’i nepet me dorë të majtë e për nën gju, mje qi ki të paguej mikun. Dora e majtë në kanu quhet e pavlefëshme, e cila merr e nuk ep. Me mik nuk falet. Veç i pabesi me të pabesin falen me të… …“Natën e festave, me ndërmjetësinë e dashamirëve ose të ndrikullave që me këtë rast përmbysin djepin, mund të falet djali, babai ose vëllai i vrarë, por kurrë miku”…(neni 110)   
***
Në Dukagjinin e besës dhe të mikpritjes u vranë me nga një pëlumb mbas koke një djalë dhe një vajzë nga Çekia. U vranë me të pabesë… U prenë si miq… Nuk ka shqiptar që në deje i vlon gjaku i të parëve që të mos e dënojë këtë akt të pashembullt… Nuk ka kandar drejtësie që e mban këtë peshë gjaku që na ka mbetë në derë…    ***  
Shqipëria është e mbushur me armë, me kallashnikovë që nxirren nga hatullat e fshehura dhe me breshëri çdo ditë marrin jetë njerëzish. Në Lazarat u vra një oficer policie… Nuk janë gjetur ende autorët e vrasjes. Është gjetur arsenali i armëve, nga të gjitha armët e këmbësorisë… Mbase do të gjendet vrasësi… Gjykata, me ndihmën e avokatëve të cilat që tani i kanë përgatitur “pistat e mbrojtjes” do të japë, më e shumta “Dënim me burgim të përjetshëm”… Nuk është rast i vetëm. Janë me qindra. Janë me mijëra. Kudo kërcet kallashnikovi i gjakmarrjes dhe i hakmarrjes. Fëmijë të vegjël, meshkuj e femra, qëndrojnë të ngujuar pa dritën e dijes mes moshatarëve të tyre në shkollë. .. Në diktaturën e “diktatorit” ai që vriste – vritej,. Këmbëzën e pushkës e tërhiqte ligji, shteti. Gjakmarrja kishte shkuar në shuarje… Shqipërisë i duhet ligji me vdekje. Po nuk e vendosi shteti duhet ta vendosë populli. Një referendum popullor për t’i thënë “PO” dënimit me vdekje nuk do të na ndajë nga Evropa. Do të na çojë në Evropë me kokën e lart e me dinjitet.
Abdurahim Ashiku
Athinë, 4 korrik 2015

Mos thuaj i vranë. Thuaj i vramë!

July 4, 2015 by dgreca

Nga Ilir Levonja-Florida/
Sikur kaq solidararitet të kemi në të përditshmen tonë. Ne Do ia kalonim edhe Francës. Edhe një demokracie të konsoliduar të një vendi si Amerika. Ne do të ishim modeli i qytetarit të një shoqërie të lirë. Sepse ne jemi vital. Dhe priremi nga zemra.  1) A e dini pse ndiheni të indinjuar? Sepse u përdhos toka juaj. Kjo ka domethënien e madhe të ekzistencës së një populli. Që në fakt bukurinë e vendit të tij e ka ezauruar me folklor të tepruar duke harruar që po e jeton atë. Po kështu edhe bukurinë shpirtërore e përjeton vetëm me ndjesitë e mira. Duke harruar se jeta e njeriut ka edhe poshtërsi. Ose pabesi, e ligësi. Madje në më të shumtën e kohës ne shpenzojmë postulate frazash. Duke u mahnitur frazash jo duke i përjetuar. Duke i treguar, për sportivitet, për dituri. Eshtë kjo arsyeja madhore që ne e kemi të vështirë të kërkojmë ndjesë. Jemi të shkëputur nga realiteti. Jetojmë mendërisht. Jo njëherësh, tokë, trup e shpirt. Kjo ka sjellur edhe vegjetimin sistemesh, qeverish, qeveritarësh. Madje dhe luftra klasore mes njëri-tjetrit. Po sot nuk është koha e politikës. Eshtë e indinjatës shpirtërore. E turpit që ndjejmë. Që është ndryshe nga ai i të ashtuquajturit qeverisës. I yni është turp njerëzor. Ndaj ka një vërshim kudo shqiptar për atë çfarë ndodhi mbrëmë në darkë në Shqipërinë tone. 2)Ne sot u njohëm me turpin. Ndaj na duket sikur bashkë me Majkëllin dhe Anën. Jemi vrarë edhe ne. Një dy apo tre të kërkuar nuk janë shpirti i malësorit shqiptar. Përpjekja e tyre fisnike për të ndrequr atë jetë që është sa krenaria e një e populli. Aq edhe turpi I qeverive. Andej akoma mungojnë kushtet më minimale të jetës bashkëhore. Por asesi përpjekja për të mbijetuar me turizmin. Duke i mëshuar jetës bio. Dhe ia kanë arritur. Deri sa kanë vizitorë. Kanë turistë. Por një, dy apo tre të kërkuar, janë edhe keqja. Për të cilën duhet hera-herës të ulemi e të flasim.  Nga ana tjetër janë atë që prej të cilëve, banorëve aty u kanoset përpjekja me poshtërsi të tilla. Të një dy apo tre personave që për pesë kacidhe. Qofshin prej floriri. Qofshin diamante…, kujtojnë se mund të kapin parajsën. Dhe se ia hodhën jetës.  Çfarë është një vrasës? Janë përpjekur me qindra. Madje e kemi pjesë të emocioneve artistike. Për shkak edhe të marketingut me temë pasionet e çmendura. Apo të sëmura. Sidomos kur vret nga pas. Nga afër. Nuk e di se si në atë vend të halleve të mëdha. Të lindin të tillë pasionantë. Duke I kujtuar njerëzit e thjeshtë, si poseduesit apo zotëruesit e mirëqënies së tyre. Por ja që qënka fakt. Dhe u bënë vite tashmë. Që pikërisht nga toka jonë të dëgjojmë për vrasje dhe grabitje të gjakftohta. Pra se çfarë është një vrasës. Nuk ka më asnjë rëndësi të rrekemi ta gjejmë. Përmes filozofive, emrave dhe të tjera. Ne e dimë tani që, qënka edhe shqiptar. Ndaj u bëm me turp. 3)Në botën virtuale shqiptare po shoh një reagim. Dhe më vjen mire. Po shoh që Shkodra do mblidhet sot në darkë dhe Tirana nesër. Po shoh edhe thirrje të një pasnjëshme. Edhe në Kosovë etj. Shoh njerëz që në statutet e tyre në fb kanë vendosur flamurin e Çekisë. Emrat Majkëll dhe Ana. Kudo ka indinjatë.  Bëjmë mire të mblidhen në të gjithë qytetet e Shqipërisë. Bëjmë mire që të lutemi shpirtërisht, jo për show. Eshtë Turp i tokës. Kështu do lehtësojmë shpirtrat tanë edhe nga turpe të tjera. Brenda vetes. Brenda nesh. Tek vrasjet tona.

Producenti dhe skenaristi i The Simpsons vjen në Pejë për Anibar

July 4, 2015 by dgreca

 Në edicionin e gjashtë të Anibar që mbahet prej 20 deri me 26 Gusht po vjen regjisori producenti dhe skenaristi i mirënjohur amerikanë Mike Reiss, ndryshe i njohur si producent dhe skenarist i serialit më të famshëm të animuar The Simpsons.  Mike vjen në festivalin Anibar që të prezantoj punën e tij 26 vjeqare në The Simpsons dhe ta ndaj atë me publikun Kosovar.
Reiss ka studiuar në Universitetin e Harvardit, duke u fokusuar më shumë në komedi, shfaqje dhe në skenar. Në Harvard ai u takua me Al Jean, ku të dy bashkëpunuan dhe filluan të shkruanin për revisten satirike Harvardit, Lampoon.
Pas diplomimit, revista satirike National Lampoon, i punësoj Mike Reiss dhe Al Jean të vazhdonin shkrimet e tyre komike, gjatë kësaj periudhe ata punuan edhe si skenarist dhe producent të shumë shfaqjeve televizive.
Në vitin 1989, Reiss u punësua së bashku me Jean në rrjetin televizim FOX si anëtarët të stafit për të filluar serin e animuar Simpsons. Ata më von u bënë edhe producentët dhe përgjegjësit kryesor të serialit Simpsons.
Reiss ishte përgjegjës kryesor për krijimin shumë episodave të The Simpsons,duke përfshirë skenarin, animacionin, zërimin, dhe muzikën.
Mike Reiss ka fituar katër Emmys gjatë njëzet e gjashtë viteve të tij me The Simpsons. Ai udhëhoqi të gjithë sezonin e katërt të The Simpsons që nga Entertainment Weekly është quajtur si “sezoni më i mirë i serialit më të mirë në histori”.
Queer është një tjetër seri e animuar në të cilën Mike Reiss ka qenë skenarist , e që është emëruar në “100 animacionet më të mira të të gjitha kohërave” nga rrjeti BBC.
Po ashtu Reiss është producent në serialin e njohur The Critic që i kushtohet kritikut të filmit të animuar Jay Sherman.
Në vitin 2006 , Reiss ka marrë cmimin për arritje jetësore nga asociacioni i skenaristëve të animacionit
Reiss përveq tjerash ka kontribuar edhe në shumë filma animuar të metrazhit të gjatë si Ice Age, Despicable Me, Kung Fu Panda, ai gjithashtu ishte bashkë skenarist për filmin The Simpsons në vitin 2007.  Mike Reiss në edicionin e gjashtë të Anibar do të bëjë prezantimin The Simpsons Backstage Tour. Ky projekt u financua përmes grantit të Ambasadës Amerikane në Prishtinë. (Behlul Jashari)

Kongresisti Engel dhe ambasdorja Jacobson vizitojnë Teqenë e Madhe në Rahovec

July 4, 2015 by dgreca

RAHOVEC : Në profilin e saj në face book, Teqeja e Madhe e Tarikatit Alie-Halvetie e Baba Shejh Sylejmanit – Rahovec, shkrunate sot se :” 4 Korriku, ditë e madhe e miqëve tane, për të festuar së bashku Pavarësinë e Shteteve të Bashkuar (USA). Të falemenderojm ata që kan kontribuar për Kosovon si në kohën e luftës, kohën kur Kosova është dashur të filloj të marr hapat fillestare pas luftës si nji shtet i ri, diten e pavarësis, si dhe në ditët e sodit. Falemenderojm mikun tonë Kongresmenin Eliot Engel si dhe Ambasadoren Tracey Ann Jacobson që na vizituan sonte, në këtë ditë të madhe për kombin Amerikan.”
Delegacioni Amerikano-Shqiptar, i cili është duke zhvilluar një vizitë disa ditore në Kosovë, kryesuar nga Kongresisti, e mbi të gjitha Lobisti i Kauzës Shqiptare Eliot Engel, miku i dëshmuar i shqiptarëve në Kongresin amerikan, dhe Ambasadoria Tracey Jackobson, biznesmeni shqiptaro-amerikan Harri Bajraktari, botuesin e gazetës shqiptaro amerikane ‘Illyria’ në SHBA, z. Vehbi Bajrami, veprimtari i njohur Rrustem Gecaj, si dhe shumë miq të tjerë nga bota akademike, ajo e biznesit, medias dhe nga sfera tjera të jetës shoqërore në vend e rajon, kan zhvilluar sot një vizitë në Teqen e Madhe e Tarikatit Alie-Halvetie e Baba Shejh Sylejmanit – Rahovec
Keshtu te pakten thuhet në rrjetin shoqëror facebook teksa njoftohet se Kongresisti Eliot Engel – i shoqëruar nga ambasadorja amerikane Tracey Jacobson dhe anëtarët e tjer të delegacionit nga Amerika, kanë vizituar Teqen e Madhe në Rahovec, ku me këtë rast Engel bëhet e ditur se ka theksuar se SHBA-ja është vendi me demokracinë më të vjetër, derisa Kosova me demokracinë më të re.
“Sot në Rahovec, në Teqene e Madhe, na nderuan me vizite Kongresisti Eliot Engel dhe Abasadorja Amerikane me bashkepunetore te tjere. Festuam bashke diten e pavaresise se ShBA-ve, ketij vendi mik. Sipas Kongresistit Engel, ShBA eshte vendi me demokracine me te vjeter, nderkaq Kosova me demokracine me te re qe ka shume per te mesuar”, shkruan Ministri i Financave Avdullah Hoti në faqen e tij facebook./Beqir SINA/

Dy turistë cekë, të vrarë me armë zjarri në veri të Shqipërisë

July 4, 2015 by dgreca

Dy turistë çekë, pjesë e një kampingu të ngritur nga të rinj nga Çekia, në zonën malore në veri të Shqipërisë, u vranë mbrëmë me armë zjarri teksa po udhëtonin me makinën e tyre në drejtim të qytetit të Shkodrës. Ngjarja ndodhi rreth orës 20 të natës së kaluar, në një zonë piktoreske, në afërsi të fshatit Prekal të Komunës Postribë, rreth 19 kilometër nga qyteti i Shkodrës.
Dy të rinjtë, Michael Svatos, 27 vjeç dhe Anna Kosinova, 36 vjeçe, po udhëtonin me makinen e tyre me targa 4P8:9798 nga kampingu në drejtim të qytetit të Shkodrës kur u qëlluan për vdekje. Nga hetimet paraprake të policisë dyshohet se autori i vrasjeve ka qenë nje përson i trete, i cili udhëtonte së bashku me viktimat.
Forcat e policisë, që shkuan në vendin e ngjarjes, gjetën automjetin e turistëve çekë në rrugën kryesore që lidh Prekalin me Shkodrën dhe, në brendësi të tij, dy shtetasit çekë, një djalë dhe një vajzë, të vrarë me armë zjarri automatike. Gjithashtu, në brendësi të automjetit u gjet një armë automatike, ndërsa jashtë tij një krehër fishekësh dhe dy gëzhoja, të cilat po analizohen nga grupi i ekspertëve të policisë dhe prokurorisë.
Që nga nata e kaluar, forca të shumta të policisë vendore, të mbështetura dhe nga forca speciale të policisë, të ardhurra nga Tirana, kanë nisur një operacion të gjërë për krehjen e zonës, me synim zbulimin dhe kapjen e autorëve. Deri në mesditë, policia kishte shoqëruar 30 përsona për t’i marrë në pyetje.
Gjithashtu, policia njoftoi sot një shpërblim prej 30 mijë eurosh, për cilindo që do të japë informacione të vleftëshme, që qojnë në zbulimin dhe kapjen e autorëve. Policia u bëri thirrje banorëve të zonës që të bashkëpunojnë me policinë për çdo informacion që lidhet me ngjarjen dhe vuri në dispozicion një numër telefonik.
Gjatë një konference shtypi, të mbajtur në mesdite në Drejtorinë e Policisë së Qarkut të Shkodrës, Zv. Drejtori i Përgjithshëm i Policisë së Shtetit, Ardian Çipa, e cilësoi ngjarjen si shumë të rëndë dhe u shprehu ngushëllime familjarëve të dy të rinjve çekë. Zoti Çipa tha se ngjarja ka angazhuar policinë dhe prokurorinë për të zbuluar sa më parë autorët dhe për t’i vënë ata përpara drejtësisë. Ndërkohë, ai kërkoi ndihmën dhe mbështetjen e të gjithë komunitetit, gjithë qytetarëve dhe, në veçanti, të banorëve të zonës, për të trasmetuar informacione të vleftëshme mbi autorët e kësaj ngjarje të rëndë. Policia, shtoi ai, ka vënë në dispozicion një shpërblim prej 30 mijë eurosh për kapjen e autorëve të kësaj ngjarje të rëndë, duke garantuar edhe anonimatin për përsonat që do të informojnë policinë.
Mbështetur mbi veprimet e para proceduriale dhe hetimore të kryera në vendin e ngjarjes, zv. Drejtori i Përgjithshëm i Policisë bëri të ditur se janë hedhur dyshime të forta se autori i kryerjes së krimit ka qenë në brendësi të automjetit të dy viktimave, duke realizuar kështu nga brenda vrasjen e tyre.
Provat e gjetura në vendngjarje si dhe dëshmitë e përsonave të shoqëruar po i nënshtrohen procedurave hetimore që po kryhen nën drejtimin e prokurorit Besnik Cani.
Rreth 14 vite më parë, në tetor të vitit 2001, në zonën malore të Shkodrës humbën tre turistë të rinj nga Çekia; Jan Pavenka, Mihal Pavenka dhe Lenka Tuçkova. Megjithë hetimet, që zgjatën disa vjet, nxitur edhe nga interesimi i vazhdueshëm i familjarëve dhe autoriteteve çeke, ngjarja dhe trupat e tre të rinjve çekë, nuk u zbuluan kurrë.
Zona malore e Dukagjinit dhe, në veçanti, ajo e Thethit, tërheqin çdo vit me mijra turistë të huaj, kryesisht të rinj nga Çekia, të cilët pëlqejnë turizmin malor.