Archives for October 2015

Faslli Haliti Sjell poetin nga Korea e Jugut ne Sofren e Diellit

October 7, 2015 by dgreca

K O U N/

Ko Un, i lindur në vitin 1933 në Korenë e Jugut gjatë sundimit japonez, është poeti më i rëndësishëm i gjuhës Koreane. Bir fshatari, asiston në tmerrete e Luftës së Dytë Botërore dhe të luftës midis dy Koreve. Nëntëmbëdhjetë vjeç u bë murg budist, pas 10 vjetësh ai e braktisi manastirin dhe tentoi disa herë për të vrarë veten. Aktivist i të drejtae të njeriut në vitet ’70, ai u arrestua, u burgos dhe u torturua. Ka qenë midis finalistëve të Nobelit për Letërsi.

Edhe këtë viti, 2015, është përsëri në listen e të nominuarëve për Nobelin.

Midis veprave të përkthyera në italisht Lule të një momenti (2005), Ishulli që këndon (2009) dhe, Ç’është (Knight Bus, 2013).

BIOGRAFIA IME E SHKURTËR.

Ndonjëherë ëndërroj.

Pas fluturimit të një pelikani mbi Oqeanin Indian

unë ëndërroj.

Siç guxonte të bënte babai në fshatin e tij të lindjes.

Me t’u zhdukur drita pas perëndimit të diellit, në atë errësirë

Unë ëndërroj.

I zgjuar së rish nga ëndrra

unë gjallërohem si një linjë elektrike që qan nga era.

Deri sot kam përzënë ëndrrat e mia.

Madje në ëndërr

unë luftoj të përzë ëndrrat.

Kështu,

Ç’ishin fantazi

ose teori dominuese të një epoke

unë i përzuara.

Ekzistonin vetëm gjërat ashtu siç janë.

Pashë

dritat fluoreshente që shkëlqenin mbi det gjatë natës.

Pashë

nofullat e bardha të valëve që sapo vetëtinin,

t’i varroste errësira.

Ekzistonin vetëm gjërat ashtu siç janë.

Unë pashë

shkëndijimin e dritës fosforeshente dhe fshehjen e saj

të ngjashme me shikimin që bashkon nënën me foshnjën e saj të sapo lindur.

Tani i pranoj ëndrrat.

Gjërat s’janë më vetëm siç janë.

Unë ëndërroj.

Dje

S’është sot.

Sot

S’është nesër.

Por unë ëndërroj të nesërmen.

Toka nënë është varr i ekspreriencave.

Më mbetet një ëndërr:

në të ardhmen e largët mundet që Uni im – fosile, varrosur në tokë

të bëhet një këngë fosile.

Përktheu: Faslli Haliti

POETI NEKI LULAJ NE SOFREN E DIELLIT

October 7, 2015 by dgreca

Neki Lulaj, poet nga Gjermania enkas për sofrën poetike të Diellit/

PIKË NE ZEMËR/

Ndarja shpupurish prushin e zemrave që prushojnë/

E muret e shpirtit lahen me ujin kristal të hënës/

Pikë në zemër më mbeti, u ligshtuam fort/

Atë ditë gushti ndarja kishte marrë shtegun e ëndrrës/

Mbi gurra jete prej guri nga ndarja loti ia kaloi detit/

Ditët e numëruara vrapuan si era,si një kalë i pashaluar/

Bashkë i grrithëm pak këto vite të ikura të kurbetit/

Na sëmboi në zemër kjo temë e imponuar/

U kthyem te adoleshenca e zbritëm nëpër zgafella shpirti

Nxorrëm nga kujtesa fëmijërore ditët në prehërin e etërve

Nga ajo ditë, ah, në gjokse ndryshe zemra shkrofëtiti

Pse dasmat i bëmë në dhe të huaj larg trurit, larg bjeshkëve?

Edhe zhgunat e mallit, edhe vuajtjet i patëm atje nën qiellin gri

Dhashtë Zoti vdekja (jetë) në arkëmort të na vijë këtu

Në tokën e prindërve tanë që i bekuan perenditë

në këto shtigje ku bukës një ditë i thamë bukë

Heeeej si e merrja dikur këtë metaforë kurbeti tërë plagë

Kur shihja atë ndarje të kurbetçinjve nga pragu i odës

Sytë u mrrolën si mjegulla mbi Dugaxhin, mbi Rozafë

E mbi Bunë pa shtrëngatë bjen një shi i madh lotësh

E Nana shtatë ditë në sofër pjata e lugë i len aty të ngatë

Pikë në zemër më mbeti, si gur që e mban një zemër e fortë…….

Thaj lotët si gurrë e pashterrur mbi tullat e faqeve rrëkajë

o vëllau im i vogël, banor i ri në tokën e largët të pagojë.

M’u bënë shumë figura xixillonja në sytë e ngrohtë

Ndjenja mashtron arsyejen, kur ndarja dhembje ka

Mbi fytyrat e ndarjes kishte ra një tisk i hollë.

Unë plaku i thinjur isha bërë dimër me borë në Sharr.

E ti ishe bërë sugari, kuqëlor trëndafil i pari

I shtrënguam fort duar dhe zemra në kraharor

hej po pika e zemtës do na ndrijë si pishtari

Ani pse ti ike në Amerikë e unë në Europë.

XHANI I GJYSHIT/

Ti je zile shkollë abetareje me 36 shkronja të ndriçuara

Që trokun e zemrës sime e ke shaluar pa kthim

Si gan si dafinë, si sy dielli në qiellin e praruar

Të shpleks fytyra si buza e hënës me trishtim.

Ti emrin nga Baba në gjysh ma ke dhënë mua vit pas viti

Je botë engjëllore, me ty jetoj qindra çaste hyjnore

Edhe kur me kaplon malli për atdhemirin

Dhe loti kur më rrjedh si krua nëpër faqe në mote

Ti më shtrëngon me duart e tua të vockëla

Je harmoni shpirti, o nipçja ime e mbarë

Me ty nuk më shpërblen as ari që ka bota

Me ty harroj mallin e gurrës e aromën e bukës pogaqe

Harroj orën e babës që e mbante te shtrati, te ara

Harroj edhe fanarin që rrinte varur te grazhdi ku vritej nata

Harroj edhe higëllimën e kuajve të lama

Harroi çka more

nuk harroj se di vetëm xhëxheza dhe përralla

Se ty të kam te zemra, ti më je vig lumi në kalim

Ti qe ecën i sigurtë mbi vaun e shpirtit tim

Je engjëlli që i lëshon dritëhije shpirtit tim

I bukuri i gjyshit je xhani im…

VAJZËS SIME NË MEKSIKË
Udhët meksikane të presin me tinguj kitarash si simfoni
Do të vijë lahuta e gjyshit që jehon mes arave
Do të të shfaqet lesa e drunjtë e kullës se gurit në Bërliq
Në zërat e shesheve do të vijë ehoja e druvarëve

Me këngë drejt pyllit në cingërimën e celularit
Do të vijë zërin im me lotin e ngrohtë mbështjellë

Aty , në udhë qiellore do të të kapë një lak malli
Aty ku një copë Kosove do të vijë dhe në natën e terrtë

Gjitë kitarat e brigjeve të të ulen në gjunjë
Një kapele kashte do të të vihet bukur në flokë
Motërmira Albianë do të të vijë dhe në gjumë
Plisi i bardhë si ylber syrin do të ta gëzojë.

Do të të vijnë mollëgjylet e Bërliqit atje larg.
Si mollët e dasmave, si mollët e gjyshes në sepet
Babagjysh Halili do vijë me një fyell të lashtë
Gjyshe Ajna do të sjellë një bukëmisri valë të nxehtë

Nënë Fetanetja ta ka ruajtur një ftua një shami me ngjyra
Lumëbardhi do ta hedhë vetëm për ty një palë ujëvare
Në vise të largëta kurrë të të mos ligshtohet fytyra
Kurrë të të mos shuhet kujtimi për gurët në varre.

Atje do të vij dhe unë me vargun e brishtë e të ngrohtë
ngrohur mbi një zjarr që dhe lotin e burrit ma fsheh
Ariani dhe Aulona le të marrin fjalë urimi si kurorë
Të jenë flamurtarë të një ëndrre që i jep gaz dhe jetë

Do të vijnë vëllezrit Adriatiku dhe Armendi

Me një frushkull buzagazi dhe një buqet trëndafillashl

Do të vijnë,…….d……të….v…..d…

Kosovë-UNDP, komunat me plane kundër korrupsionit

October 7, 2015 by dgreca

PRISHTINË, 7 Tetor 2015/ Në Kosovë, komuna e Mamushës dhe Programi i Kombeve të Bashkuara për Zhvillim (UNDP) nënshkruajnë sot marrëveshje për zbatimin e aktiviteteve kundër korrupsionit.

Me këtë plan kundër korrupsionit, komuna e Mamushës i bashkohet komunave të tjera që tashmë janë duke e realizuar, si: Prishtina, Gjakova, Gjilani dhe Graçanica. Më përfshirjen e shoqërisë civile, do të sigurohet transparenca dhe llogaridhënja rreth zbatimit të këtij plani karshi qytetarëve.

Programi i UNDP-së kundër korrupsion mbështetet financiarisht nga Agjencia Zvicerane për Zhvillim dhe Bashkëpunim (SDC). Në saje të kësaj mbështetjeje, zyrtarët komunal të Mamushës së bashku me Agjencinë Kundër Korrupsion do të hartojnë hapat konkretë për të parandaluar dhe luftuar dukuritë korruptive në komunën e tyre.

Nënshkrimi i marrëveshjes bëhet në mesditë, në ndërtesën e Kuvendit Komunal në Mamushë. Në këtë ngjarje do të marrin pjesë kryetari i komunës së Mamushës, Arif Bytyq, drejtori i SDC-së, Patrick Etienne dhe zëvëndës përfaqësuesja e përhershme e UNDP-së në Kosovë, Alessandra Roccasalvo.

Mamusha, në rajonin jugor, rrethina e Prizrenit, është komuna e vetme e banuar me shumicë nga komuniteti turk në Republikën e Kosovës me gjithësej 38 komuna, 10 prej tyre me shumicë serbe – 4 në veri./b.j/

Kosova pret të votohet rezoluta për pranimin në UNESCO

October 6, 2015 by dgreca

-Takim koordinues me shtetet e Kuintit për procesin e anëtarësimit të Kosovës në UNESCO dhe për proceset e tjera integruese/

Nga Behlul Jashari/ PRISHTINË, 6 Tetor 2015/ Kosova pret që Bordi Ekzekutiv i UNESCO-s të votojë gjatë këtij muaji rezolutën për pranimin në UNESCO. Kështu u tha sot në një takim koordinues me shtetet e Kuintit për procesin e anëtarësimit të Kosovës në UNESCO dhe për proceset e tjera integruese, bën të ditur MPJ kosovare.
Njoftimi i sapodërguar sonte thekson se, zëvendësministri i Punëve të Jashtme të Republikës së Kosovës, Petrit Selimi, ka pritur sot në takim pune ambasadorët dhe përfaqësuesit e shteteve të Kuintit në vazhdën e koordinimit të aktiviteteve në kuadër të procesit të anëtarësimit të Republikës së Kosovës në Organizatën e Kombeve të Bashkuara për Arsimin, Shkencën dhe Kulturën (UNESCO) dhe për proceset e tjera integruese.
Zëvendësministri Selimi falënderoi ambasadorët dhe përfaqësuesit e vendeve të Kuintit për mbështetjen e vazhdueshme dhënë Kosovës në procesin e anëtarësimit në UNESCO dhe në organizma të tjerë të rëndësishëm ndërkombëtarë dhe kërkoi vëmendje të shtuar ndaj gjuhës negative dhe pozicionit tejet negativ të Serbisë që rrezikon edhe vet procesin e normalizimit.

Selimi u zotua për vazhdimin e fushatës pozitive të Republikës së Kosovës, duke përfshirë angazhimin e të gjithë aktorëve relevantë në mesin e të cilëve edhe mediet, universitetet, institucionet shkencore e kulturore, shoqëria civile e kështu me radhë.

Në 28 shtator edhe Principata e Monakos nënshkroi si bashkësponsorizuese kërkesën e Kosovës për anëtarësim në UNESCO. “Tani janë bërë 47 shtete që janë rreshtuar përkrah Kosovës në kërkesën që çështja e anëtarësisë të shqyrtohet nga Bordi Ekzekutiv në tetor”, bënte të ditur zëvendëskryeministri e ministri i Jashtëm i Kosovës, Hashim Thaçi nga Nju Jorku. “Po ecim përpara hap pas hapi”, shprehej ai.

Ndërsa zëvendësministri i Jashtëm kosovar, Selimi në një konferencë të jashtëzakonshme shtypi në 12 shtator bënte të ditur se Kosova bëri hapin e parë drejt anëtarësimit në UNESCO. “Kërkesa për aplikim është dorëzuar nga Shqipëria dhe është nënshkruar nga 44 shtete anëtare të UNESCO-s, që përbën një numër rekord të bashkësponsorizuesve në historinë e re të UNESCO-s”, theksonte Selimi.

25 TETOR 2015- Albanian American Success Stories; Mbrëmje Gala në Battery Gardens

October 6, 2015 by dgreca

Albanian American Success Stories-së shpejti me një eveniment të rëndësishëm më 25 Tetor, 2015 në Battery Gardens, NYC*/

New York, NY, October 6, 2015. – Pas përfundimit të suksesshëm të fazës së parë të projektit Albanian American Success Stories (Histori Suksesi Shqiptaro Amerikanë), projekti që synon evidentimin dhe promovimin e historive të suksesit dhe krijimin e një rrjeti bashkëpunues të profesionistëve dhe sipërmarrësve shqiptarë,në një Mbrëmje e tipit Gala, do të hapë siparin për nominime të reja në raundin e dytë, me një event në Battery Gardens në New York më 25 Tetor 2015, nga e cila do të përfitojë dhe Fondi Shqiptar për Fëmijë me autizëm.

Kjo mbrëmje do të moderohet nga aktorja dhe producentja e Hollywoodit Masiela Lusha, me pjesëmarrjen dhe performancë nga Diva e operës ndërkombëtare Ermonela Jaho dhe një panel profesionistësh me zë në fusha të ndryshme si Dr. Dennis Dimitri, President i Shoqatës së Mjekëve të Massachusetts, Bankieri Richard Lukaj, Gazetarja e Fox5 Lidia Curanaj, Profesori Peter Christopher, Stilistja Katerina Bocci dhe Sipërmarrësi në fushën e teknologjisë Donald Leka. Ata do të ndajnë detaje dhe këshilla nga historia dhe rruga e suksesit për të qenë aty ku janë sot. Kjo platformë e nxitjes së bashkëpunimit midis profesionistëve, të rinjve dhe studentëve dhe krijimi i mediumeve dhe eventeve të tilla ku ata mund të lidhen dhe bashkëpunojnë por edhe të frymëzohen është shumë i rëndësishëm.

Mbrëmja është ideuar me ecje në tapetin e kuq, intervista nga mediat, mundesi për të komunikuar me panelin e zgjedhur, argëtim, pjesëmarrje në ankand dhe mundësi për përfshirje direkte në hapjen e procesit të nominimit për raundin e dytë. Procedurat për media do të jenë të njëjta si në eventin e kaluar, xhirime, fotografi dhe intervista do të lejohen vetëm gjatë një orëshit në tapetin e kuq.

Ndërsa vitin e kaluar përfitoi Fondi Kosovar për Arsim, nga kjo mbrëmje do të përfitojë Fondi i Fëmijëve Shqiptarë me Autizem i Dr. Shpresa Xhaklit. Nëpërmjet një ankandi që do të zhvillohet gjatë mbrëmjes nën udhëheqjen e Miss Massachusets 2015 do të promovohen stiliste shqiptare nëpërmjet stilimeve të tyre apo personazhe nga projekti me produktet e tyre të dhuruara.

Projekti udhëhiqet nga i njëjti Bord, një grup entuziast profesionistësh të fushave të ndryshme, si Mjeshtrti i Fotografisë Fadil Berisha, Sipërmarrësi Giorgio Kolaj, Financieri Nick Markola, Avokatja Beti Beno, Dr. Kujtim Balidemaj, Avni Mustafaj, Etrita Ibroci, Mark Kosmo, Blerta Alikaj, Ismer Mjeku e Simon Vukel dhe Drejtoreshën Ekzekutive Vera Mjeku dhe një staf teknik i gjerë fotografësh, videografe, editorë, stilistë, grimierë, etj.

Impakti nga faza e parë kanë qenë shumë pozitiv dhe konstruktiv dhe kjo ka bërë që projekti të promovohet dhe në Kosovë dhe Mal të Zi. Historitë e suksesit shqiptaro amerikan janë burim frymezimi dhe bashkëpunimi edhe për shqiptarët në Ballkan dhe për këtë arsye në bashkëpunim me Ambasadat Amerikane në Prishtinë dhe Podgoricë u mbajtën panele në universitete, tryeza të rrumbullakta, vizita në investime shqiptaro dhe amerikane dhe qendra per fëmijë me aftësi të kufizuara për të parë mundësitë se si anëtarë të projektit të inkuadrohen e të ndihmojnë në fusha të ndryshme. Projekti synon që të krijojë shkëmbime të vazhdueshme grupesh profesionishtësh dhe grupe mentorësh për studentë dhe profesionistë të ri.

Kriteret për nominimet do të jenë së shpejti në faqen e projektit në internet www.AlbanianSuccessStories.com. Sic edhe është cilësuar, këto personazhe duhet të kenë histori suksesi interesante, jo vetem në planin personal, po dhe histori frymëzuese që kanë pasur ose që kanë impakt direkt në botën shqiptare amerikane apo atë amerikane.

Projekti i inkurajon anëtarë të komuntetit të nominojnë personazhet e tyre, duke i nominuar me një histori të shkurtër. Disa nga personazhet që janë nominuar tashmë janë shkencëtarja shqiptare Laura Mersini, Kristjan Sokoli, futbollisti në ligën NFL, Polikseni Manxhari, Miss Massachusets 2015, Murat Myftari, anëtar i Forcave Speciale Amerikane, këngëtarja Bebe Rexha, Mario Ademaj, mjeku nga Wisconsin që ka hapur klinika shëndetësore pa pagesë, Adrian Hadribeaj, kampioni botëror në karate e të tjerë.

Pas eventit të radhës në New York, dhe evenimenteve në Kosovë dhe Mal të Zi, projekti do të promovohet në Washington DC në një mbrëmje me anëtarë të Kongresit dhe Senatit si dhe anëtarë të organizatave të rëndësishme në Washington dhe më pas në Tiranë e Shkup.

*Sipas Komunikates per Media

Ne Foto: Pamje nga sezoni i kaluar