Archives for July 2016

Viti i Nënë Terezës

July 22, 2016 by dgreca

Foto Gazeta DIELLI-Behlul Jashari: Shtatorja e Nënë Terezës në Sheshin kryesor të kryeqytetit të Kosovës- Prishtinë, korrik 2016/

-Qeveria e Kosovës, mbështetje aktiviteteve që lidhen me kanonizimin dhe shpalljen e shenjtërisë së Nënës Terezë/

PRISHTINË, 22 Korrik 2016/Gazeta DIELLI-B.Jashari/ Qeveria e Kosovës në mbledhjen e sotme vendosi të ndajë mjete financiare me qëllim të mbështetjes së aktiviteteve që lidhen me kanonizimin dhe shpalljen e shenjtërisë së Nënës Terezë.Kryeministri Isa Mustafa tha se kanë pasur disa biseda me Ipeshkvinë e Kosovës dhe me Ipeshkvin, ku është prezantuar programi që do të mbahet në Vatikan me këtë rast, të cilin e ka vlerësuar tepër të rëndësishëm për Kosovën.

“Unë mendoj se ky do të jetë një kontribut i veçantë. Është fjala për një ngjarje tepër të rëndësishme, për një figurë shumë të rëndësishme dhe ky do të ishte një kontribut i yni në këtë aspekt”, theksoi kryeministri Mustafa.

Viti 2016 është Viti i Nënë Terezës në Kosovë, i deklaruar në 15 janar të këtij viti nga qeveria kosovare në mbledhjen ku kryeministri Mustafa ka prezantuar iniciativën e zëvendëskryeministrit, njëherësh ministër i Kulturës, Rinisë dhe Sportit, Kujtim Shala. “Duke pasur parasysh që ky vit do të jetë vit i shenjtërimit të Nënë Terezës, këtë vit simbolikisht ta cilësojmë edhe si Vitin e Nënë Terezës në Kosovë, të cilin do ta shfrytëzojmë për afirmimin e humanizmit, mirëkuptimit, ndihmës, raporteve të mira dhe korrekte, të paqes dhe dinjitetit në Kosovë”, është shprehur kryeministri kosovar.

Kosova ka shpallë 5 Shtatorin “Dita e Bamirësisë – Nëna Terezë”. Për këtë, Kuvendi i Republikës së Kosovës në seancën plenare në 11 korrik, me votim unanim, ka miratuar propozimin e Kryesisë së Kuvendit.

Qeveria e Republikës së Kosovës zhvilloi sot mbledhjen e 101-të të rregullt, të 33-tën në vitin 2016, në të cilën ka miratuar projektligje dhe dokumente tjera të fushës së përgjegjësive kushtetuese dhe ligjore. Mes tjerash, ka miratuar në parim edhe nismën për lidhjen e marrëveshjes ndërkombëtare ndërmjet qeverisë së Republikës së Kosovës dhe qeverisë së Republikës së Francës për bashkëpunim kulturor.

Qeveria e Kosovës: Sulmi i VV kundër institucioneve të Republikës

July 22, 2016 by dgreca

PRISHTINË, 22 Korrik 2016/ Qeveria e Republikës së Kosovës deklaroi pak më parë se, dënon ashpër sulmin e kryer sot nga Lëvizja Vetëvendosje, i cili ka vënë në rrezik shëndetin dhe jetën e ministrit të Punëve të Brendshme, Skënder Hyseni.Deklarata thekson se, ky akt kriminal, i kryer nga aktivistë të Vetëvendosjes, është sulm kundër institucioneve të Republikës së Kosovës dhe qytetarëve të saj.

“Lëvizja Vetëvendosje me këtë veprim dëshmoi edhe njëherë se është në gjendje të rrezikoj jetën e qytetarëve të vendit dhe të përfaqësuesve legjitimë të institucioneve, me qëllim të realizimit të skenarëve të saj kundër shtetit të Kosovës”, thuhet më tej…

Siç ka ndodhur edhe në muajt e kaluar, vijon deklarata, Lëvizja Vetëvendosje po angazhohet që të dëmtojë progresin e Kosovës në proceset eurointegruese, përkatësisht po bën përpjekje që të pamundësojë lëvizjen e lirë të qytetarëve në vendet e BE-së, siç ka bërë edhe në të kaluarën kur me veprimet e saj ka pasur ndikim në mos anëtarësimin e Kosovës në UNESCO dhe ka dëmtuar ndjeshëm imazhin e shtetit.“Ftojmë organet kompetente që të marrin masat për zbardhjen e kryesve të këtij akti të shëmtuar dhe të vënë para drejtësisë kryesit dhe orkestruesit e këtyre veprimeve kundër jetës së qytetarëve dhe shtetit të Kosovës”, përfundon deklarata.VV njoftoi sot se, gjatë një aksioni simbolik aktivistët e saj kanë gjuajtur me ngjyrë veturën e ministrit Hyseni./b.j/

Kryetari Veseli dënon ashpër incidentin e sotëm në Kuvend

Kryetari i Kuvendit të Republikës së Kosovës, Kadri Veseli, dënon ashpër incidentin e izoluar në hollin e Kuvendit, ku një qytetar nga diaspora gjatë vizitës në ambientet e Kuvendit, ka hequr nga muri fotografinë e ish-presidentit Ibrahim Rugova.

Pjesëtarët e Policisë së Kosovës që kujdesen për sigurinë në Kuvend, kanë reaguar menjëherë dhe pas kryerjes së hetimeve të nevojshme, fotografia e ish-presidentit Rugova është kthyer në vendin e saj.

Kuvendi i Kosovës vazhdon të jetë i hapur për vizita nga të gjithë bashkatdhetarët tanë, por kërkon nga të gjithë vizitorët që gjatë qëndrimit në mjediset e Kuvendit, të respektojnë normat e sjelljes.

Fjalimi i Trumpit mbyll Kuvendin Republikan

July 22, 2016 by dgreca

Ngjitja e pazakontë e manjatit miliarder, pa përvojë politike në njërën prej dy forcave mbizotëruese politike në Shtetet e Bashkuara, duke u bërë kandidati i saj, është një rast i pashembullt në politikën amerikane.

Në fillim të fjalës së tij zoti Trump, tha se e pranonte emërimin me përulësi dhe me mirënjohje.

“Ne do të jemi një vend bujarie dhe ngrohtësie, por edhe një vend i ligjit dhe rendit”, tha ai.

Ai u prit me entuziazëm nga të pranishmit.

Shumë shpejt, ai u përqendrua tek rastet e dhunës në Shtetet e Bashkuara.

“Amerikanët që po shohin sot këtë fjalim, i kanë parë imazhet e dhunës të kohëve të fundit në rrugët tona dhe kaosin në komunitetet tona. Shumë kanë qenë personalisht dëshmitarë të dhunës dhe disa edhe viktima të saj. Kam një mesazh për të gjithë ju: Krimi dhe dhuna që sot ka prekur vendin tonë, do të përfundojë së shpejti. Që nga 20 janari 2017, do të vendoset siguria”.

Një pjesë e mirë e fjalimit të zotit Trump, ishte përqendruar tek sulmet ndaj rivales së pritshme të tij, Hillary Clinton. Madje kritikat e ashpra vinin në qendër njëkohësisht administratën e presidentit Obama dhe zonjën Clinton si pjesë e saj.

“Amerika është më pak e sigurt – dhe bota shumë më pak e qëndrueshme – sesa kur zoti Obama mori vendimin që të vinte Hillary Clintonin në krye të politikës së jashtme të Amerikës”, tha ai.

Ai shtoi se me siguri presidenti Obama është penduar për atë vendim.

“Instinktet e saj të dobëta, dhe gjykimi i saj i keq – diçka që e ka vënë në dukje edhe Bernie Sanders – kanë shkaktuar shumë nga katastrofat që po shfaqen sot”.

Ai premtoi se mund ta ndryshojë gjendjen dhe përcolli mesazhin se gjërat duhet të ndryshojnë.

“Përsa kohë të udhëhiqemi nga politikanë që nuk vënë Amerikën para së gjithash, atëherë vendet e tjera nuk do ta trajtojnë Amerikën me respekt. Kjo do të ndryshojë kur unë të marr detyrën”.

Ai tha se çdo ditë zgjohet i vendosur që të përmirësojë jetën për të gjithë qytetarët e vendit që ai tha se “janë neglizhuar, injoruar dhe braktisur”.

Toni i zotit Trump la të kuptohet se ai po përpiqet ta ndryshojë imazhin si një njeri me një retorikë të ashpër që është bërë objekt kritikash të shumta.

Por edhe më pak se 24 orë para fjalimit, ai ngjalli debate kur tha për gazetën New York Times, se do të vërë kushte për mbrojtjen e aleatëve të NATO-s ndaj një sulmi të mundshëm, një qëndrim që u kundërshtua menjëherë nga Uashingtoni dhe vende të tjera.

Përveç kësaj, refuzimi i Senatorit Ted Cruz për të mbështetur kandidaturën e zotit Trump, nxori në pah përçarjet dhe mosmarrëveshjet që ekzistojnë mes republikanëve.

Zoti Trump u prezantua nga vajza e tij, Ivanka, e cila paraqiti një anë më personale të tij dhe u tha të pranishmëve se ai do të luftojë për të gjithë.

Me përfundimin e Kuvendit Republikan në Klivlend, vëmendja zhvendoset tek kampi demokrat. Zonja Clinton mendohet se do të deklarojë emrin e personit që do të zgjedhë si kandidat për nënpresident këtë fundjavë.

Të hënën në Filadelfia, hapet Kuvendi i Partisë Demokrate ku zonja Klinton do të emërohet zyrtarisht si kandidate e partisë së saj.

Refoma në drejtësi hap historik për qytetarët e Shqipërisë

July 22, 2016 by dgreca

Në fillim të ditës të premten (22.07) pothuajse gjysmë ore pas mesnate, 140 deputetët e Parlamentit të Shqipërisë, miratuan paketën e ndryshimeve kushtetuese për reformën në drejtësi.Vota e konsensuale, që kurorëzoi një proces 18 mujor angazhimi të politikanëve, ekspertëve vendas dhe të huaj, të mbështetur fuqimisht nga BE dhe SHBA, kaloi pas një maratone negociatash që u shoqëruan me mosmarrëveshjesh dhe grindje politike mes palëve pozitë-opozitë. PD i kundërshtoi deri në minutën e fundit disa dispozita të draftit të reformës në drejtësi, gjë që e shtyu zvarriti procesin. Marrëveshja e arritur me maxhorancën qeverisëse në mbrëmjen e së mërkurës (20/07/2016) u anullua nga PD pak orë më vonë për shkak kërkesash të reja që morën dje 14 orë për të arritur përsëri marrëveshjen. Sjelljet politike të opozitës ngjallën zemërimin e Brukselit, Uashingtonit por dhe të qytetarëve të Shqipërisë, që zhvilluan manifestime para Parlamentit në mbështetje të miratimit të reformës. Më tepër se përgjegjshmëria ndaj vendit dhe qytetarëve duket se ka qenë presioni ndërkombëtar në arritjen e konsensusit, presion që arriti kulmin e vet me paralajmërimin për “pasoja specifike, negative, të rënda dhe afatgjata nga Shtetet e Bashkuara” ndaj politikanëve të opozitës nëse nuk arrihej një marrëveshje e re. Ndërkohë që Brukseli paralajmëroi me kohë që dështimi për dakortësi mes palëve “do të hiqte mundësinë e hapjes shpejt të negociatave të anëtarësimit me BE”. Por përtej perspektivës së hapjes së negociatave vota konsensuale u kërkua me këmbëngulje nga maxhoranca qeverisëse dhe faktori ndërkombëtar edhe si një parakusht që reforma në drejtësi të ketë legjitimitet dhe të gjejë zbatim.

Reforma në drejtësi mbështetet nga 91% e qytetarëve të Shqipërisë që në jetën e tyre të përdishme kanë vuajtur për më shumë se dy dekada mungesën e drejtësisë prej kapjes së saj në mënyrë kapilare nga gjyqtarë dhe prokurorë të korruptuar. Qytetarët kanë parë mosndëshkimin e politikanëve të korruptuar dhe janë dëshmitarë të rasteve kur gjyqet kundër tyre janë mbyllur për procedurë nga gjykatës të blerë. Interesin e qytetarëve ka kryefjalë edhe deklarata përshëndetëse e BE-së në orët e para të mëngjesit (22.07). BE e vlerëson miratimin e reformës si «një hap të paprecedent , që adreson një kërkesë të vjetër nga shumica dërrmuese e qytetarëve për një drejtësi të përgjegjshme, të pavarur dhe transparente. Reforma përbën gjithashtu një kontribut për luftën kundër korrupsionit dhe krimit të organizuar. Të gjitha këto janë përparësi kyçe për rrugën e Shqipërisë drejt integrimit në BE » theksohet në deklaratën e delegacionit të BE-së në Tiranë.

Edhe SHBA e cilësuan miratimin e reformës «një fitore të popullit shqiptar». Në deklaratën përshëndetëse, ambasadori i SHBA-së, në Tiranë Donald Lu vë në dukje që «SHBA është krenare që ka mbështetur hartimin dhe negocimin e kësaj pakete reforme të fortë».

Rama: fshesa e hekurt e Vetting-ut për gjykatësit dhe prokurorët e korruptuar

Edhe kryeministri Rama e vlerësoi paketën e miratuar si «arritjen më të shëndetshme, më të ndershme, më të drejtë të kësaj reforme. I siguroj të gjithë shqiptarët, se gjykatësit e prokurorët e korruptuar do t’i fshijë nga sistemi i drejtësisë fshesa e hekurt e Vetting-ut”, tha ai pas miratimit të reformës në Parlament.

Marrëveshja mes palëve parashikon që të gjithë anëtarët e Këshillit të Lartë Gjyqësor,(KLGJ) dhe të Këshillit të Lartë të Prokurorisë (KLP) t’i nënshtrohen Vetting-ut nga struktura e Operacionit Ndërkombëtar të Monitorimit (ONM). Ajo parashikon edhe hedhjen e shortit në rast se gjatë dy raundeve të para të votimit, Parlamenti nuk i zgjedh dot anëtarët e KLGJ dhe KLP.

Paketa kushtetuese e miratuar sjell një riorganizim thelbësor të sistemit të drejtësisë në Shqipëri dhe synon pavarësinë e gjyqtarëve dhe prokurorëve nga politika. Ajo do të plotësohet nga ligje dhe akte nënligjore, procedura dhe rregulla që do të shtrihen në gjithë sistemin e reformuar të drejtësisë.

Republikanët e Donald Trump: Të bashkuar vetëm nga armiku

July 22, 2016 by dgreca

Nuk kishte si t’i shkonte më mbarë Donald Trumpit! Problemet gjatë kongresit të partisë e larguan vëmendjen nga fjalimi bosh i tij, ndërkohë që Ted Kruz kthehet në ventil për të gjithë të zhgënjyerit, analizon Ines Pohl.

Nuk kishte si t’i shkonte më mbarë Donald Trumpit! Problemet gjatë kongresit të partisë e larguan vëmendjen nga fjalimi bosh i tij, ndërkohë që Ted Truz kthehet në ventil për të gjithë të zhgënjyerit, analizon Ines Pohl.

USA Republican National Convention in Cleveland Donald Trump Rede

Procesi, gjatë të cilit të dyja partitë kryesore të Shteteve të Bashkuara zgjedhin kandidatët presidencialë është brutal. Muaj me radhë kandidatët bëjnë në fushatë në vend dhe e luftojnë njëri-tjetrin ashpërsisht. Këtë vit u arrit një pikë e re vlimi e kësaj lufte. Deri edhe madhësia e organit gjenital u diskutua para kamerave.

Festa e pajtimit

Për shkak se në fund të këtij procesi, të gjithë janë të dëmtuar, përfshirë edhe fituesin, kongreset e partisë kanë funksionin ta bashkojnë partinë, kështu pozicionet ekstreme në parazgjedhje ua lenë vendin toneve më të moderuara, pas të cilave grumbullohet shumica. Në një festë pak a shumë të sinqertë pajtimi, konkurrentët e dikurshëm radhiten pas fituesit dhe i japin mbështetjen e tyre.

Por kësaj here në Clevenland ishte ndryshe. Nga dita e parë Trump i degradon 2500 delegatët nën sytë e 15.000 përfaqësuesve të mediave nga bota, në spektatorë të një shou bombastik. Ai vetë është i kudogjendshëm. Vjen me helikopter, dërgon mesazhe në monitorin e artë nga Kulla Trump, dërgon një nga një anëtarët e familjes, që të mos kalojë asnjë pjesë në program pa ndonjë lëvdatë për babain e mrekullueshëm, për burrin e fortë dhe të suksesshëm.

Në këtë operetë nuk ka vend për diskutime mbi programin e partisë të kandidatit presidencial. Pse të flitet për përmbajtje, kur ka zbavitje? Jo të gjithë republikanëve u pëlqen ky realitet. Shumë vetë nuk kanë ardhur, sepse nuk duan të shohin këtë spektakël vetëinskenimi, të një njeriu që nuk e vret mendjen aspak të përshtatet me kursin e partisë, një njeri që e kishte bërë për vete partinë, në një kohë kur republikanët mendonin se fantazma e keqe kishte kaluar. Familja Bush mungon në këtë ditë. Edhe republikanë të tjerë me emër si John McCain nuk ia kanë falur Trumpit vërejtjet fyese.

Ted Cruz nuk jep mbështetjen

Një republikan nuk e lë rastin t’i ikë. Ted Cruz, senatori i Texassit e pranon ftesën dhe flet. Dy herë më gjatë se parashikimi. Por fjalinë që e presin të gjithë, “e mbështes Donald Trump”, ai nuk e thotë. Më vonë pas thirrjeve që shoqëruan fjalën e tij, ai thotë se nuk ia fal Donald Trumpit që ka fyer gruan dhe fëmijët e tij. Për Trumpin ky sulm vjen si me porosi. Sepse në ditën e tretë të këtij spektakli, njerëzit mërziten, dhe diskutimi për kopjimin e fjalimit të gruas së Trumpit nga Michelle Obama harrohet.

Gazetarët fillojnë të bëjën punën dhe pyesin, nëse ka diçka tjetër, veç planeve për ndërtimin e një muri në kufirin teksan. Edhe delegatët janë të shqetësuar, ata e ndjejnë se veç shout të një narcisti që rrotullohet vetëm rreth vetes, nuk ka shumë përmbajtje, me të cilën Trump mund të luftojë për të hyrë në Shtëpinë e Bardhë. Prandaj gjendet një ventil, zhgënjimi i adresohet tradhtarit, Ted Cruz. Por ka edhe nga ata që kanë mirëkuptim për Cruz. Shumica projekton tek ai shqetësimin për shpërbërjen e partisë. Por në fund Cruz me shfaqjen e tij ndihmon që të shtrëngohen radhët pas Trumpit. Pavarësisht se sa pak mund të afrohen ata me retorikën e Donald Trumpit, në fund të gjithë janë të bashkuar në urrejtjen kundër kandidates demokrate, Hillary Clinton. Republikanët duket se nuk kanë bazë tjetër të përbashkët për momentin. Kemi të bëjmë një parti që e bashkon vetëm armiku.