Archives for August 2016

Goditet mafia “Cosa Nostra” në Nju Jork, 46 persona në pranga, 12 nga Bronksi

August 4, 2016 by dgreca

46 mafiozët janë arrestuar në New York, Newark(NJ), Boston, Miami e New Haven./

Me anë të një superoperacioni, policia amerikane ka goditur orët e fundit rrjetin e mafias siçiliane Cosa Nostra në New York.Agjensia Federale Amerikane FBI informon se ka arrestuar 46 persona të lidhur me familjet mafioze Genovese, Gambino, Lucchese e Bonanno.

Mes të arrestuarve është dhe bosi mafioz i Filadefias Josef Merlino.
Të arrestuarit rrezikojnë deri në 20 vite burg.

Sipas komunikatës së shtypit të FBI ky operacioni është ekzekutuar pas disa vitesh hetime e ka përfshirë të gjithë territorin e brigjeve lindore të SHBA.46 mafiozët janë arrestuar në New York, Newark, Boston, Miami e New Haven.Mediat amerikane informojnë se mes të arrestuarve ka dhe eksponentë të familjes së njohur mafioze Columbo.

Dyzet e gjashtë figura të dyshuara mafioze me pseudonime te tilla si “Muskujt”, “Nicky parukja”, “rimorkiatori” dhe “Mustache Pat” u akuzuan të enjten në gjykatën federale në Manhattan per veprimtari kriminale.

Ne nje material prej 30 faqesh Aktakuza thotë se te akuzuarit janë pjesë e një ndërmarrje shumështetësh ne bregun lindor te Cosa Nostres, të angazhuar dhe të koordinuar ne veprime kriminale që variojnë nga gjobëveniet, zjarrvënie dhe sulme të frikshme për mashtrim kartë krediti, shitjet pataksuara cigareve dhe trafikimit të armëve të zjarrit.

Aksioni I prangosjeve erdhi pas regjistrimeve mijëra orëshe si dhe nga depertimi i nje informatori,nje agjenti te fshehte te FBI-se.

Prokurori Preet Bharara ka treguar rrezikshmerine e ketij rrjeti kriminal, ndersa Diego Rodriguez, kreu i zyrës së FBI-së në New York , tregoi per modernizimin e mjeteve te sotme te Mafias.Në aktakuzë shkruhet se:Nga Nju Jork dhe Masaçusets ,në Pensilvani dhe Florida, gangsterë të angazhuar në rrjete kriminale , kanë koordinuar vazhdimisht dhe kanë “funksionuar si një njësi të perhershme.”

Reforma mbaroi, kush janë pro dhe antiamerikanët

August 4, 2016 by dgreca

Nga Mal Berisha/

1.- PROAMERIKANËT DHE PSEUDO– PROAMERIKANËT./

Reforma kaloi. Përgjigjja e pyetjes: Kush janë proamerikanët dhe kush janë antiamerikanët e vërtetë në Shqipëri, mbetet. Ata që kanë rrënjë të thella antiamerikane deshën një reformë si të baballarëve të tyre: Një drejtësi politike të kapur nga një njeri ose të njëjtë me atë që ishte: Pa Ministri Drejtësie dhe pa avokaturë, siç e kishin baballarët e tyre. Baballarët që bërtisnin rroftë Tito, rroftë Stalini, rroftë Hrushovi, rroftë Mao Ce Duni, rroftë Zhao Amazonas, rroftë Fasko Dinuci, dhe… Poshtë Amerika!

Bijtë e tyre sot janë “zgjuar” dhe bërtasin “Rroftë Amerika!” dhe na hiqen më proamerikanë se tërë të persekutuarit e Shqipërisë që vuajtën thjesht pse njerëzit e tyre të afërt kishin ikur në Amerikë, ose pse kishin ideale proamerikane– perëndimore. Sot, proamerikanët e vërtetë, që nuk kanë nevojë të shtiren, janë ata që shpëtuan drejtësinë nga kapja e një njeriu. Për të qenë proamerikan i vërtetë, nuk ka nevojë të bërtasësh “Rroftë Amerika!”.

Në vend të kësaj, zbato parimet amerikane! Madje, bëj gjithçka, siç u bë, që të detyrosh pseudo–proamerikanët të pranojnë principet amerikane të drejtësisë, siç ndodhi në Parlamentin e Shqipërisë, natën e 21 korrikut 2016.

2.- ÇIFUTI SABATTAI ZEVI -RREZIKU ANGLO-AMERIKAN NDAJ SHQIPËRISË, DÖNMEHËT DHE RILINDASIT.

Në historinë tonë aq të bollshme kanë zënë vend edhe figura më interesante, më mashtruese dhe më e besuar e një pjese të mirë të hebrenjve. Ai quhet Sabattai Zevi. Ky hebre kishte lindur në Izmir më datën 1 gusht të vitit 1626 dhe vdiq me datën 17 shtator 1676 në Berat, pasi kishte kaluar vitet e fundit të jetës në internim, në Ulqin.

Ai njihet si mashtruesi, i cili u premtoi hebrenjve Tokën e Shenjtë dhe kthimin atje. Ai pretendonte se Zoti e kishte pajisur me vullnetin e vet dhe e kishte dërguar në tokë si Messiah, ose zoti i izraelitëve, i cili do t’i udhëhiqte ata “një milion mbështetës”, duke vënë në rrezik edhe vetë Perandorinë Osmane.

Sulltan Mehmeti i Katërt e thirri Sabattain në Top Kapi dhe i tha: “Duhet të heqësh dorë nga mashtrimet tua ose ke dy zgjedhje: E para: “Ja ku është xhelati që do të heqë kokën tani në sytë e mi dhe e dyta: Do të shndërrohesh në Islam.” Mashtruesi çifut zgjodhi të shndërrohej në islam dhe t’i shpëtonte sëpatës së xhelatit. Kështu ai i shndërroi një million hebrenj, ashkinazë, sefardikë dhe romaniotë në tërë Europën në Denmeh, ose në të shndërruarit. Vitet e fundit të jetës ai i kaloi në internim, një pjesë të mirë të tyre në Ulqinin e atëhershëm shqiptar dhe ditët e fundit të jetës në Berat, buzë Lumit Osum.

Kur vdiq dhe vajtën ta marrin për ta varrosur, nën kokën e jastëkut të tij nuk gjetën Kuranin e Shenjtë të Islamit, të cilit i ishte betuar para Sulltanit, por Torahun, Librin e Shenjtë të hebrenjve. E njëjta gjë ka ndodhur edhe me komunistët shqiptarë: Në vitin 1990 ata u vunë përpara dy zgjedhjeve: O me Perëndimin, o me urinë masive që po pllakoste vendin dhe izolimin total.

Ata u bënë dönmeh, pra u shndërruan në të dashur të Euro-Amerikës dhe tani vonë sajuan edhe sektin e tyre me emër Rilindja, e cila po na vdes ndër duar me librin “Rreziku Anglo-Amerikan për Shqipërinë”, nën jastëk, duke bërtitur: “Rroftë Amerika!”.

3.- ARADHA E PARË ANTIAMERIKANE NË SHQIPËRI.

Por kush është pjesë e aradhës pseudoproamerikanëve sot? Janë dönmehët, rilindasit, antiamerikanët, që u shndërruan sa hap e mbyll sytë në dashnorët kodoshë të Amerikës. Dönmehët, që në dhjetorin e vitit 1990 ishin në anën antiamerikane të barrikadës së ndryshimeve demokratike në Shqipëri. Tek i sheh ata të përgjërohen për Amerikën të vijnë ndër mend transmetimet televizive të fundvitit 1990: Byroja Politike, Ramizi më vemjet e tij, që mendonin se a duheshin përdorur armët apo jo që të mposhteshin ata, proamerikanët, “reaksionarët”, “agjentët e Amerikës”, fëmijët dhe të afërmit e të arratisurve në Amerikë!?

Sipas tyre, duheshin zhdukur tërë ata që kishin lidhje me Amerikën: Familje të intelektualëve që kishin punuar me amerikanët për ngritjen e shkollave shqipe gjatë viteve të Mbretërisë, familje të arratisurish nga regjimi komunist, ata që kishin përfunduar nëpër burgje politike dhe kampe internimi, familje properëndimorësh…

Duheshin vrarë tërë ata që i vunë gjoksin shembjes së diktaturës më antiamerikane në botë. Tani brezi tjetër i byroistëve na del më proamerikan se vetë ata që shembën diktaturën e tyre. Të shohësh në televizionin shqiptar djem anëtarësh të byrosë, djem të sekretarëve të Parë, madje edhe djalin e një nënkryetari të Komisionit të Dëbim Internimeve ndaj njerëzve që iu arratiseshin të afërmit në Amerikë, tek flet në emër të proamerikanizmit, është si të besosh Sabattai Zevin, duke kënduar sure islame në xhami.

Prandaj, shndërrimi pragmatist në proamerikan të këtij lloji, sot është si shndërrimi i çifutëve në dönmeh. Sabattai jetoi me Torahun e tij të shenjtë dhe u shtir si islam, këta jetojnë me “Rrezikun Anglo–Amerikan ndaj Shqipërisë” në zemër dhe shtihen si proamerikanë.

4.- TË JESH PROAMERIKAN, NUK DO TË THOTË THJESHT TË KESH NJË OSE DY MIQ AMERIKANË

Reforma kaloi. Ajo do të ishte njësoj si ajo e vitit 1976, nëse do t’i dorëzohej një njeriu në dorë. Por atë e shpëtuan proamerikanët. Reforma kaloi. Ajo do të sjellë një sistem gjyqësor me avokatë dhe të drejta njeriu dhe jo një sistem të kapur nga një individ, kushdo qoftë ai. Ajo do të ketë jetë të gjatë, shumë më të gjatë se ai që deshi ta kapte atë.

Në vend të tij do të jetë ai që e mbrojti nga kapja, për të mos e kapur as ai vetë. Sepse ky është standardi amerikan, jo standardi i pseudo–proamerikanëve. Reforma kaloi. Reforma shpëtoi nga dönmehët hipokritë, pseudoproamerikanë në gjenezë. Të jesh me Amerikën, nuk do të thotë thjesht të kesh një mik amerikan. Madje, as dy. Të jesh me Amerikën do të thotë të zbatosh standardet demokratike të këtij vendi të madh mik për Shqipërinë.(Kortezi:Syri.net)

Shpërthim në Prishtinë pranë Kuvendit të Kosovës

August 4, 2016 by dgreca

*Mësohet se ka qenë një granatë dore e cila ka sulmuar Kuvendin, sipas medias./

*AAK: Sulmi ne ndertesen e Kuvendit akti kriminal/

Prishtinë, 4 Gusht 2016-Gazeta DIELLI/ Në Prishtinë, sonte pak pas orës 23:00 ka ndodhur një shpërthim i fuqishëm pranë ndërtesës së Kuvendit, në qendër të qytetit ku është edhe ndërtesa e qeverisë së Kosovës. Policia ka mbërritur në vendin e ngjarjes, si dhe autoambulanca, por nuk raportohet për pasoja në njerëz. Raportohet se gjurmë shpërthimi vërehet në fasadën e jashtme të ndërtesës së Kuvendit të Kosovës dhe rruga para saj te Sheshi Ibrahim Rugova është bllokuar e mbyllur për qarkullim.

Ende nuk ka njoftime zyrtare nga Policia e Kosovës.

Sipas një raportimi më të ri të medias, burime brenda Policisë së Kosovës kanë bërë të ditur se Kuvendi i Kosovës është goditur me zollë. Predha ka rënë në trekëndëshin që gjendet te Kuvendi. Zolla është armë që përdoret për të shkatërruar tanket.

Njoftimi më i ri është se Policia ka rritur distancën në të cilën po kontrollon rreth shpërthimit që ka ndodhur në drejtim të Kuvendit të Kosovës.

Në vendin e ngjarjes para pak çastesh kanë mbërritur edhe ushtarë të KFOR-it.

Një dëshmitar ka thënë se ka parë xhama të thyer në ndërtesën e Kuvendit të Kosovës.

Sipas njoftimeve të tjera të medias, jo zyrtarisht mësohet se gjatë sulmitë në Kuvendin e Kosovës është dëmtuar fasada e objektit si dhe janë thyer disa xhama të kësaj ndërtese.

Policia e Kosovës shumë shpejt do të dal me një deklaratë.

Mësohet se ka qenë një granatë dore e cila ka sulmuar Kuvendin, sipas medias.

Ndërsa, së fundi, Policia e Kosovës ka njoftuar për mdian se, “me 04.08.2016 rreth orës 23:00, në ndërtesën e Kuvendit të Kosoves, në rrugën Agim Ramadani në Prishtinë, nga distanca ka ndodhur një sulm me një mjet të dyshuar shpërthyes. Si pasojë janë shkaktuar dëme materiale, por nuk raportohet për të lënduar në njerëz. Policia e Kosovës me njesitet relevante të saj menjëher ka reaguar në lokacion dhe veprime intensive operative dhe hetimore janë duke u kryer për të identifikuar të dyshuarit e involvuar në rast”.

AAK: Sulmi ne ndertesen e Kuvendit akti kriminal/

Aleanca për Ardhmërinë e Kosovës dërgoi sonte këtë deklaratë: Ngjarja e sontme në Prishtinë, është një akt kriminal, I cili kërkon zbardhje urgjente. Sulmi në ndërtesën e Kuvendit të Kosovës, është një sulm mbi shtetin dhe mbi demokracinë, është një sulm mbi të gjithë qytetarët e Kosovës. Kushdo që qëndron prapa këtij shpërthimi apo sulmi, cfarëdo që të jetë ai, është kundër Kosovës dhe qytetarëve të saj.

Aleanca për Ardhmërinë Kosovës, e dënon fuqishëm këtë akt kriminal dhe kërkon nga organet e rendit që të bëjnë krejt cka është në dorën e tyre, që të kapën autorët e tij dhe të nxirren para drejtësisë.

AAK

MOS NA VDEKTË FJALA, O NIKOLLË CAMAJ !

August 4, 2016 by dgreca

Nga Ramiz LUSHAJ/

Z. Nikollë CAMAJ, e çmoj lart Fjalën Tuaj të mbajtur në Manifestimin Tradicional “Alpet Shqiptare” më 1 gusht 2016 në Vuthaj të Plavë-Gucisë. “Pushkë Hoti” ishte Fjala e Juaj.

Burrat e ditur si Ju, veprimtarët dinjitarë si Ju, nuk kanë çka bajnë ma shumë përveçse mos me na vdek Fjala për Kombin tonë të cunguem në pandalshmëri, për mbrojtjen e të Drejtave e Lirive Themelore të shkelura në përditshmëri, në gjithanshmëri e në skajshmëri nga shteti malazez , etj.

Ju po jeni nji tribunal atdhetar kombëtar ma shumë se partiak, ma tepër se mësues, ma mirë se qytetar, ma qartë se euro-atlantik. Më pëlqeu Vërejtja Jote e thuktë e publike që i adresuat Presidentit të Repuiblikës së Shqipërisë për dekorimin e gafuar të Kryeministrit aktual të Malit të Zi me Urdhrin e Flamurit Kombëtar, ndërkohë që ende në të voglin shtet shoven malazez ka probleme të mëdha antidemokrtaike e antishqiptare, pasi ende nuk po lejohet me u mbajt zyrtarisht Flamuri Kombëtar Shqiptar e shqiptarët etnik ende denohen me burgim mesjetar për valëvitjen e Tij, etj. etj. Edhe mue m’u ka duktë sikur Sulltan Abdyl Hamidi po dekoronte Krajl Nikollen e Malit të Zi.

Gjithsesi, unë ndjehem me merak për hapat e tu në Kombëtari, për Jetën tande në Tuz, për Fjalen tande në zenit, pasi ende Moraça e Limi kullojnë gjak dhe Podgorica e tashtit e Cetina e çdo kohe prodhojnë pabesi. Na kie me veti…

Mendoj se ka ardhë Koha që Partia jote të mos mundet të drejtoj Ty , por ndryshe: Ju të drejtoni Partinë Tuaj, Partinë Lidhja Demokratike, ma e vjetra parti shqiptare në Malin e Zi, etj.

Mos t’u ndaltë Hapi Shqiptar e mos të vdektë Fjala Kombëtare në oda e kuvende, në tribuna e media, o Nikollë Camaj, malësor klasik e modern, i ndritshmi mendtar e prijtar euro-atlantik, nji nga tribunalët e kohës e tokës panshqiptare!

Mos na vdektë Fjala e rroftë Kombi Ynë Shqiptar, o Nikollë Camaj!

Tiranë, 4 gusht 2016

Fjalimi i fundit madhështor i Gjergj Kastritotit

August 4, 2016 by dgreca

Nga Aurenc Bebja, Francë*/

Fjalimi i më poshtëm është marrë nga libri i autorit Stephan Zannovich, me titullin « Le Grand Castriotto d’Albanie, Histoire ». Teksti prej 131 faqesh është botuar në vitin 1779 nga shtëpia botuese J.J.Kesler, Frankfurt. Gjergj Kastrioti, i sëmurë, nuk mund ti shmangej vdekjes dhe për këtë arsye fton në vatrën e tij princat, ambasadorët, gjeneralët, dhe drejtuesit kryesorë të vendit që tu lë amanetet e fundit ashtu siç i ka hije një luftëtari të madh. Para se heroi ynë të fillonte fjalimin, urdhëron që djali i tij i vetëm, Gjoni, asokohe dhjetë vjeç, të ndodhej mes të ftuarve. Fjalimin e Princit të Matit dhe mbretit të shqiptarëve e gjejmë në faqet 70 – 89 të librit, i shkruar në gjuhën frënge. Sipas autorit të veprës, ja si është shprehur Gjergj Kastrioti :

« Jam në prag të varrit. Po ju lë një mbretëri me forca të afta për ta mbrojtur, por me një pasardhës të paaftë nga mosha për ta drejtuar. Megjithatë, në qoftë se në të ardhmen ju bëheni trima dhe të virtytshëm, ju mund të përballoni të gjitha sulmet e armiqve tuaj. Nuk është sipërfaqja e vendit ajo që bën një fron të respektueshëm, por aftësia e atij që ulet mbi të. Në qoftë se ju jeni i djallëzuar, shërbëtor i ministrave tuaj, dhe naiv i lajkave të oborrtarëve tuaj, atëherë asgjë nuk do të jetë më e lehtë sesa përmbysja nga maja më e lartë ku ju ndodheni. Duhet të jetë virtyti themel i fronit. Virtyti nuk është fantazi. Ndoshta do ju a thonë një ditë, por mos harroni se ai që do ju a thotë, është një tradhtar, një dinak, që për të mbretëruar në vendin tuaj, do ju sugjerojë maksima të rreme, të cilat herët a vonë do të shkaktojnë përmbysjen tuaj. Duke pasur virtytin si udhërrëfyes, lajkatarët dhe të pabesët do të largohen prej jush…Të virtytshëm, ju mund të mbani lehtë perandorinë që po ju lë të tronditur nga lufta e vazhdueshme ; ta përforconi, ta rimëkëmbni nëpërmjet pushimit dhe qetësisë…

Krijoni vendshkrime të paçensuruara në të gjithë sipërfaqen e mbretërisë ku mund të publikohen të gjitha padrejtësitë dhe dhuna që mund të ushtrohen nga drejtuesit e krahinave tuaja. Bëni këtë edhe për miqtë apo familjarët e tyre që jetojnë në oborrin tuaj, të cilët i fshehin këto shkelje apo i përdorin nën pretekstin e drejtësisë dhe të domosdoshmërisë. Shqyrtoni gjithçka nga ju vetë, dhe nëse magjistrati, ushtari apo kleriku janë mashtruesë dhe të padrejtë, atëherë pa mëshirë varini në shtyllë në vendin e krimit : ju do të vini re se pasardhësi i tij do të bëhet i drejtë dhe i njerëzishëm…Kur sapo të keni marrë drejtimin e pushtetit, ju do të kujdeseni për Drejtësinë, e cila është themeli i të gjitha virtytëve. Ju do të mbroni artizanët, si njerëzit më të dobishëm të zonave të pushtetit tuaj, dhe do të parandaloni shtypjen e tyre nga pasanikët. Krenaria dhe lluksi i bën pasanikët të pandjeshëm ndaj fatkeqësive të varfërve, të cilët nuk kanë as tituj (grada) e as mbështetje. Duhet të jeni të butë dhe të dashur me njerëzit tuaj ; dukuni shpesh mes tyre, bisedoni me ta, pyesni ata nëse dëshirat tuaja për drejtësi janë ekzekutuar nga minisitrat tuaj. Princi që qëndron i mbyllur me oborrtarët e tij shikohet nga populli i tij si armik dhe tiran…Dëgjoni ankesat dhe kërkesat e popullit tuaj me qetësi sa që ti frymëzoni besim atij për t’ju ndihmuar të korrigjoni abuzimet dhe fatkeqësitë e shtetit.

Kujdesuni që Kombi juaj të rritet nëpërmjet fesë katolike, por mos persekutoni asnjeri që ta ndjekë atë me detyrim. Dielli, që është shëmbëllimi i Perëndisë, shkëlqen pa dallim për turkun ashtu si për të krishterin. Kushdo që këshillon për të luftuar për hir të Perëndisë është një mashtrues i cili dëshiron të sakrifikojë të vërtetën për interesat e tij. Zoti është i fuqishëm, ai mund të bëjë gjithçka vetë, pa ndihmën e askujt…Në qoftë se fati ju bën endacak, të varfër apo nevojtar kurrë mos e ndryshoni fenë për interes…Mbyllini që në origjinë mosmarrveshjet e teologëve dhe hipokritëve, të cilat janë më të rrezikshmet për lumturinë e një shteti. Kemi parë perandoritë më të lulëzuara të përçahen dhe të tronditen nga këta fanatikë…Shihni Perandorinë e Konstandinit të rrënuar nga Muhamedi, dhe princin Jean Paléologue (Gjon Paleologu) i shkelur nga kuajt e Arabëve. Ai ishte supersticioz, priftërinjtë e tij ambiciozë dhe injorantë, oborrtarët e tij të rremë dhe të shthurur nga luksi, dhe tani princi, priftërinjtë dhe oborrtarët kanë vdekur dhe po vdesin në skllavëri.

Nëse keni fat të mjaftueshëm për të pasur filozofë në vendqeverisjet tuaja, të cilët janë të ndriçuar nga drita e arsyes dhe jo nga sistemet e rreme, le të shkruajnë në paqe dhe të reagojnë ndaj paragjykimeve dhe makinacioneve të kujtdo që flet në emër të Zotit me qëllim për të heshtur mbretin dhe drejtësinë. Ju do t’i mbroni ata kundra zellit të tepruar të drejtuesve hipokritë duke i shpërblyer me vende pune në gjykatat dhe oborret tuaja.

Kur të ju flasin keq për dikë, ju do ta dëgjoni me gjysëm veshi… Ju do të jeni të sjellshëm me të gjithë shtresat popullore. Si arsye e dallimit të gradës që do të keni së shpejti në shoqëri, ju duhet të dalloheni nga të tjerët nëpërmjet bujarisë, i cili është karakteri dallues i princave. Një monark, edhe i varfër, duhet të jetë bujar…

Mbroni meritën dhe shpërblejeni atë kudo që ajo ndodhet. Mirësia duhet të shoqërohet me një zemër bujare. Njeriu ndërton tempuj, ngre altarë për Zotin falë mirësisë së tij. Evitoni për gjithmonë shekullit, rrethit dhe rracës tuaj turpin për të pasur njerëz të dëshpëruar nga mizoria, krenaria apo injoranca juaj. Mos harroni se njeriu lind për lumturinë e njëri-tjetrit…

Armatosuni nga guximi dhe vendosmëria në mjerim, me maturi në mirëqenie. Mos u zhytuni në përtaci, ajo është nëna e të gjitha veseve…Mos mbyllni sytë ndaj fqinjëve dhe traktateve të tyre : ata do të presin momentin kur ju do të jeni të brishtë për t’ju akuzuar dhe do të pohojnë pretendime të rreme mbi trashgiminë që po ju lë. Mos përdorni spiunë për të ditur se çfarë thonë njerëzit në lidhje me administrimin tuaj. Bëni punën tuaj ashtu si duhet, njerëzia le të flasin dhe të shkruajë çfarë të dëshirojë…

Ti jepet mundësia gjithsecilit prej rrethit tuaj që të ju shkruajë ; Ju do të punësoni sekretarët tuaj që të pergjigjen për çështje të ndryshme ose publike, por sekretet e shtetit duhen të mbeten mes jush…

Mos përbuzni askënd ; më i vogli dhe më i varfëri mund të ju rrëzojë, ashtu si dhe mund të ju ndihmojë me këshillat dhe kurajon e tij.

Jeni të durueshëm në çështjet e luftës, të patrembur në rreziqe, të butë dhe humanë, kurrë mizorë dhe gjaknxehtë. Fshihni dhimbjen që fatkeqësitë tuaja mund të ju shkaktojnë. Armiqtë tuaj do të jenë gjithmonë të gatshëm të ju fyejnë për fatkeqësitë, dhe ministrat të ju tradhëtojnë. Ftoni mes jush të huaj të arsimuar duke u dhënë një rol këshilltari edhe në rast kur ata nuk janë fisnikë e të pasur. Kompetencat që i akordohen fisnikërisë janë prodhim i politikës. Ju mund të përdorni fisnikët si të dëshironi. Pasanikët injorantë do t’i ledhatoni, kështu do të kurseni pasurinë tuaj për mirëmbajtjen e ushtrisë, dhe do të keni një oborr të shkëlqyeshëm falë krenarëve por dhe budallenjve, që nuk kanë asnjë lloj virtyti përveçse floririt.

Mos jeni të ndrojtur ndaj ndjenjave tuaja. Deklaroni haptazi oborrtarëve tuaj, se ai që do të ju gënjejë dhe do të ju dërgojë në rrugën e gabuar në administrim, pa asnjë falje do të varet në shtyllë. Poetëve që do të ju thurin vargje, për të ju bindur se jeni më i madhi, më bujari, më i mrekullueshmi, luftëtari më i madh ndër të gjithë mbretërit, u dërgoni në këmbim një copë letër, bojë dhe një pendë nga një oborrtar i panjohur, me urdhërin për të dëshmuar të vërtetën e asaj që shkruajnë, dhe në qoftë se nuk mund të bëjnë një gjë të tillë, të kufizojnë veten në dhënjen e këshillave, duke u lënë të kuptohet së nëse vazhdojnë të shkruajnë marrëzira të tilla të rrezikshme, ata do të mbyten nga vetë ju si person i shenjtë i të vërtetës.

Kujdesuni që të keni gjithmonë ushtarë të mirë dhe të disiplinuar ; që ushtarët tuaj të mos bëhen përtacë, ti stërvitni dhe ti trajtoni jo si skllevër por si shokët tuaj. Kur të jeni në luftë, ju do të udhëheqni ushtrinë si gjeneral dhe në betejë do të luftoni si ushtar. Emri i mbretit është një titull shumë i nderuar, por ky titull ka peshë të madhe dhe detyra të vështira për të realizuar. Kryesorja është të pranohesh dhe të respektohesh në rrethin tënd. Zoti nuk ka dhënë fuqinë supreme për të na zhytur në qullësi, për që të jemi mbrojtës të çështjes publike. Për një zemër të butë dhe një shpirt të virtytshëm, mirëqenia e përgjithshme e popullit tënd është kënaqësia më e madhe që mund të përjetohet. Neglizhenca dhe një lloj mirësie që e thërrasim « mendjelehtësia e një princi », u shkaktojnë dëme njerëzve ; dhe ju e dini se roli i mbretit është t’i mbrojë

Dëboni larg jush astrologët gjykatës dhe kimistët prodhuesë ari dhe diamantesh. Një princ është gjithmonë i pasur, kur ai është i mençur dhe i lartësuar shpirtërisht. Emri juaj do të jetë i shkruar në një pllakë prej mermeri të bardhë me shkronja të zeza mbi dyert e kështjellave tuaja të destinuara për të burgosurit. Mjerim për guvernatorin që i feshu mbretit pafajsinë, që përkeqësoi nga koprracia dhe zelli i tij dënimin e fajtorëve…Mbroni njerëzit e dashur dhe të mirë, ndëshkoni shpirtrat e këqinj. Jeni të ndjeshëm ndaj lëndimit, por akoma dhe më shumë ndaj shërbimit të popullit tuaj dhe miqësisë të njerëzve të ngjashëm me ju.

Pika kulmore e një lufte është çorientuese, duhet ndjerë pasiguria (rreziku). Atëherë kujdesi dhe guximi do të ju shërbejnë më mirë se sa pasuria. Duhet të dish të fitosh, por mos harroni se edhe mund të mposhtesh. Sfidoni veten tuaj : mos e humbisni toruan nga zemërimi, sepse atëherë i thjeshti bëhet i keq dhe mbreti një përbindësh…

Mos harroni se politika turke është për të mbjellë përçarje mes princave të krishterë ; e gjithë madhështia e tyre gjendet në këtë politikë të shkëlqyeshme, e cila bën me shumë pushtime sesa armët e tyre. Së fundi, në qoftë se jeni xheloz se po ju lë një trashgimtar që ju pengon për të marrë fronin, mos harroni se kam qenë babai juaj, dhe shpatën do e përdorni vetëm për të rrëzuar armikun.

Ju do të keni lidhje të shumta me oborrin e Romës, që unë kam qenë deri tani mbështetës dhe mbrojtës. Interesat e mia më kanë detyruar të përshtas politikën time me të sajën. Rrethanat në të cilat jam gjetur veten nuk më kanë lejuar të luftoj uzurpimet turke dhe pretendimet e papës. Për të mirën e krahinave të mia kam qenë gjithmonë i lumtur me veprimet që kam ndërmarrë. Roma është fodulle vetëm me princat e dështuar. Roma, duke më pasur frikë, më ka bërë gjithmonë lajka. Ajo ndryshon maksimat dhe pozicionet sipas rasteve, por frika se humb tokat e saj ndaj sulmeve të Muhamedit, e ka detyruar atë të qëndrojë modeste ndaj meje, duke më njohur të gjitha të drejtat, titujt, dhe zotërimet e realizuara gjatë betejave të mia. Papët nuk kanë arritur kurrë të manipulojnë një ushtar të vjetër si unë, por nuk do të hezitojnë të bëjnë një gjë të tillë ndaj jush si arsye e moshës së re dhe mungesës së eksperiencës për të qeverisur, për të shërbyer. Mos harroni, se me praktikat e shumta që ata përdorin për të arritur qëllimet e tyre, më e forta, është rrëfimi. Por është e lehtë ta kuptoni : kur prifti do të dojë të dijë më shumë sesa mëkatet tuaja, kthejeni si një mashtrues në vendin e tij, dhe dënojeni si të tillë, që të shërbejë si shembull për pasardhësin e tij.

…Megjithatë, është shumë e rrezikshme të kundërshtosh hapur Papën, këtë idhull të madh të fesë sonë. Ai është një njeri si të tjerët, me pasionet dhe dobësitë e tij… Nëse Papa ju dërgon faljet, reliket, bekimet, merrni ato me respekt, dhe i nderoni me njerëzit tuaj duke e dhënë ju shembullin kryesor… Por në qoftë se Papa përpiqet të rrisë numrin e priftërinjve dhe murgjve për të nxjerrë para nga krahinat tuaja…ose ju nxit që të hapni luftëra në emër të Zotit, rrufeja hakmarrëse qëlloftë mbi ju dhe pasardhësit tuaj në rast pranimi. Zoti hakmerret ndaj fyersve të tij, pra nuk ka nevojë për ndihmën e njeriut. Mos kërcënoni Romën, kur ajo nuk ju kërcënon. Por shpallni lulftë ndaj kujtdo që mundohet të prishë harenë e popullit, dhe legjitimitetin e fronit.

Ju do të ndaloni çdo banor i cili ndodhet nën qeverisjen tuaj, që të mos bëhet as prift e as murg pa arritur moshën dyzet vjeçare. Për tu ushqyer nga puna e të tjerëve, duhet më parë që njeriu (mashkulli) të ketë kontribuar në mbështetjen e komunitetit, prej të cilit dëshiron të ndahet për të shijuar jetën e tij… Këta priftërinj dhe murgj duhet të ju ndihmojnë të mbroni kombin në kohë lufte, sepse në kohë paqeje po ky komb i ushqen pa i përdorur. Nëse Papa kundërshton, bindeni atë me butësi, dhe vetëm në qoftë se është e nevojshme përdorni shpatën… Një politikë e tillë do të ju pajtojë me dashurinë atërore të pasardhësve të tij, dhe do të bëheni shembull dhe lider për të gjithë mbretërit, të cilët frikacakë, të dobët, injorantë, budallenj, u uzurpohet nga Papa dhe ministrat e tyre, fuqia që Zoti u ka dhënë për të përhapur lumturinë e Kombeve, ku ata duhet të jenë zotërit dhe etërit ».