Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Archives for October 2017

Diplomati i lartë amerikan Hoyt Yee viziton Kosovën

by

-Zëvendës-ndihmës Sekretari amerikan i shtetit, Hoyt Brian Yee nesër viziton Kosovën/

1 Hoyt Yee

PRISHTINË, 24 Tetor 2017-Gazeta DIELLI/ Zëvendës-ndihmës Sekretari i shtetit, përgjegjës për çështjet europiane dhe euroaziatike, Hoyt Brian Yee, do ta vizitoj Kosovën në 25 tetor, bën të ditur Ambasada e SHBA në Kosovë në njoftimin e dërguar.Sipas axhendës, diplomati amerikan Hoyt Yee do të zhvillojë një sërë takimesh me udhëheqësit Kosovarë, përfaqësues të minoriteteve dhe përfaqësues tjerë politikë.

Në ora 9:00 takim me Presidentin Hashim Thaçi, ora 10:00 me Kryetarin e Kuvendit Kadri Veseli, ora 11:30 me Kryeministrin Ramush Haradinaj./b.j/

Betimi-Gjyqtarë e prokurorë të rinj nga komuniteti jo shumicë

by

-Prokurorët dhe gjyqtarë të komunitetit jo shumicë japin betimin para Presidentit Thaçi/

1 Thaci Betimi-Dekretimi i tyre është edhe një nga masat afirmative, të cilat institucionet e Republikës së Kosovës i ndërmarrin për të arritur  një barazi të plotë dhe efektive të pjesëtarëve të komuniteteve pakicë./

1 ambasad amerikanPrishtinë, 24 tetor 2017-Gazeta DIELLI/ Presidenti i Republikës së Kosovës, Hashim Thaçi në mbështetje të kompetencave kushtetuese dhe ligjore, në pajtim me propozimin e Këshillit Prokurorial, sot, me dekret ka emëruar 40 gjyqtarë dhe 13 prokurorë të rinj të shtetit nga komuniteti jo shumicë.

1 salle

Presidenti Thaçi, pas ceremonisë së betimit, ka uruar të gjithë prokurorët dhe gjyqtarët e rinj, duke iu ofruar mbështetje në punën e tyre të përditshme.“Kosova është ndërtuar mbi parimet kushtetuese, të gjithë përfshirjes, të barazisë dhe të lirisë së secilit individ. Kosova ka miratuar masa adekuate për të promovuar një barazi të plotë dhe efektive ndërmjet pjesëtarëve të komuniteteve në të gjitha fushat e jetës ekonomike, shoqërore, politike dhe kulturore”, ka theksuar presidenti.

Ai ka thënë se dekretimi i gjyqtarëve dhe prokurorëve nga komunitetet jo shumicë, pasqyron plotësisht natyrën shumetnike të Kosovës.Sipas tij, Kosova në vazhdimësi ka bërë dhe po bën reforma në sistemin gjyqësor dhe atë prokurorial, me të vetmin qëllim që sistemi gjyqësor dhe ai prokurorial të funksionojë sa më mirë.“Në këtë rrugëtim kemi pasur mbështetje edhe nga miqtë tonë ndërkombëtarë, të cilët i falënderojmë. Gjyqtarët dhe prokurorët kanë rol të madh në jetën e qytetarëve, në realizimin e të drejtave të tyre dhe në sigurinë e qasjes së barabartë në drejtësi, pa marrë parasysh dallimin e tyre gjinor, racor, fetar e kombëtar”, ka shtuar presidenti.Ai ka thënë se mbi supet tuaja është një përgjegjësi e madhe, përgjegjësi që unë kam besim të plotë se do të dini ta mbani, ndërsa dhe qytetarët e vendit tonë do të ndjejnë veten të sigurt dhe të barabartë para ligjit.“Mirëpres gatishmërinë tuaj për t’u integruar në gjyqësorin e Kosovës dhe për të punuar në përputhje me legjislacionin e Kosovës. Po ashtu, mirëpres gatishmërinë e juaj se funksionin e gjyqtarit, respektivisht të prokurorit, do ta ushtroni me nder, përgjegjësi dhe paanshmëri, duke respektuar rregullat e etikës profesionale”, ka thënë presidenti Thaçi.

Këshilli Gjyqësor i Kosovës dhe Këshilli Prokurorial i Kosovës, në pajtim me përgjegjësitë e tyre kushtetuese dhe ligjore, e kanë konsideruar si veprim afirmativ propozimin e tyre për të rritur numrin e gjyqtarëve dhe prokurorëve nga komunitetet jo shumicë, siç është përcaktuar me Kushtetutë, Ligjin për mbrojtjen nga diskriminimi dhe Marrëveshjen për Drejtësi, të arritur në Bruksel, më 10 shkurt 2015, e cila është vazhdimësi e marrëveshjes së ratifikuar nga Kuvendi i Kosovës.Dekretimi i tyre është edhe një nga masat afirmative, të cilat institucionet e Republikës së Kosovës i ndërmarrin për të arritur  një barazi të plotë dhe efektive të pjesëtarëve të komuniteteve në të gjitha fushat e jetës, ekonomike, shoqërore, politike dhe kulturore.Me aktin e betimit bëhet edhe zbatimi i plotë i Marrëveshjes për Drejtësi të arritur në Bruksel, më 10 shkurt 2015, bën të ditur njoftimi dërguar nga Presidenca e Kosovës.Ndërsa, në Kuvendin e Kosovës, në mbledhjen e Komisionit për Legjilslacion,  sot do të raportojë ministri i Drejtësisë, Aberald Tahiri, lidhur me Marrëveshjen për Drejtësinë, të datës 10 shkurt 2015, të dialogut Kosovë-Serbi, të kryesuar nga Bashkimi Evropian, në Bruksel./b.j/

JERONIM DE RADA:GJUHA SHQIPE ËSHTË SUPERIORE NDAJ ÇDO GJUHE KLASIKE

by

Jeronim De RadaROMË (1899) / JERONIM DE RADA NË KONGRESIN NDËRKOMBËTAR TË POPUJVE TË LINDJES : “GJUHA SHQIPE ËSHTË SUPERIORE NDAJ ÇDO GJUHE KLASIKE. NË TË KA ENDE THESARE TË ÇMUARA GJUHËSORE PËR SHKENCËN.”/

1 De rada1 Aurenc Bebja

NGA AURENC BEBJA, Francë/

Në dokumentin në gjuhën frënge « Actes du douzième Congrès international des orientalistes : Rome, 1899. Tome 1 », gjejmë një shkrim, në faqen n° 212, në lidhje me gjuhën shqipe sipas pikëpamjes së poetit dhe publicistit të njohur shqiptaro – arbëresh, Jeronim De Radës.

Të martën e 10 tetorit 1899, gjatë mëngjesit të seancës n° 7, një ndër figurat më të ndritura të kombit tonë ka trajtuar përpara të pranishmëve tetë argumente për gjuhën shqipe dhe veçantitë e saj.

Në vijim, do të gjeni shkrimin e plotë, të sjellë në shqip nga Aurenc Bebja – Blogu “Dars (Klos), Mat – Albania” :“ Z. De Rada paraqet idetë e tij për atë që karakterizon gjuhën shqipe dhe monumentet e saj :

1.Gjuha shqipe është e përbërë nga fjalë njërrokëshe të cilat vënë në dukje aspekte të ndryshme të fushës. Me ndihmën e prapashtesave ose të ndryshimit të zanoreve në rrënjën njërrokëshe, gjuha shqipe ka mundësitë të formojë fjalët për një ligjërim.

2.Ka dy lakime ku njëri është i shquar; tjetri i pashquar. Tri janë gjinitë, ku ajo asnjanëse shpreh idetë e përgjithshme. Rasat janë shtatë.

3.Format e foljes janë tri : veprorja, joveprorja dhe mesorja; pesë mënyrat ; shtatë kohët.

4.Zanorja e ndryshueshme, si shtesë e prapashtesave morfologjike, ndryshon tonalitetin.

5.Për arsye të burimeve të saj fonetike, gjuha shqipe është superiore ndaj çdo gjuhe klasike.

6.Gjeografia, ashtu si dhe legjendat e kohës parahistorike helene dhe latine ruajnë fjalë shqiptare. Ishin Pellazgë, Trojanë, Frigianë, etj. Ishin Pellazgët që e themeluan Romën.

7.Zotat e paganizmit kanë të gjithë emra që rrjedhin nga rrënjët shqiptare. Është e qartë pra se për kultin e Perëndisë dhe natyrës duhet t’u referohemi Pellazgëve. Pas transformimit të zotit të vetëm në një perëndi shumëformëshe dhe antropomorfe ata ndoqën idhuj, të cilët kishin emra të përkryer shqiptarë, që shprehnin simbolet e tyre.

8.Në përfundim, Z. de Rada është i bindur se në gjuhën shqipe ka ende thesare të çmuara gjuhësore për shkencën dhe ai pret që të zbulohen  shpejt. ”

 

 

 

Kryeministri Ramush Haradinaj takon Rrustem Gecajn

by

-Kryeministri në takim me afaristin kosovar-amerikan: Koha që Kosova të bëjë më shumë për bizneset dhe investitorët/1 Kryeministri Gecaj
PRISHTINË, 23 Tetor 2017-Gazeta DIELLI/

Kryeministri i Republikës së Kosovës, Ramush Haradinaj, ka pritur në takim veprimtarin e Kosovës dhe biznesmenin e njohur kosovar-amerikan, Rrustem Gecaj, me bashkëpunëtorë, i cili e ka përgëzuar për përgjegjësitë e reja që ka marrë si dhe për një fillim të mbarë.Kryeministri Haradinaj duke e çmuar lartë rolin e Rrustem Gecajt në Lëvizjen Kombëtare, tash afarist në ShBA dhe në Kosovë, ka thënë se Gecaj është shembull i njeriut që i jep atdheut pa pyetur se çfarë mund të bëjë atdheu për të.Mirëpo, po vjen koha që Kosova të bëjë më shumë për bizneset dhe investitorët dhe në këtë kontekst edhe për vreshtarët dhe verarinë kosovare./b.j/

Rekomandohen ndryshime në Projektligjin e Diasporës

by

Diaspora 2Pjesëtarët nga diaspora rekomandojnë ndryshime për Projektligjin e Diasporës/

Projektligji për Diasporës_Çfarë sjellë_Germin

Organizata jo-qeveritare Germin ka organizuar diskutim virtual për Projektligjin e Diasporës me pjesëtarët e diasporës dhe përfaqësues nga Ministria e Diasporës në Kosovë, në kuadër të iniciativës “Dialogu i Strukturuar për të Drejtat e Diasporës”.

“Projektligji për Diasporën: Çfarë sjellë”, i cili u mbajt më 14 tetor 2017 nga ora 18:00, kishte si qëllim realizimin e një diskutimi të frytshëm, ku pjesëtarët e diasporës mund t’i kalonin komentet e tyre për një projektligj me gjithëpërfshirës dhe përmbajtësor.Sipas Behar Ismës, ushtrues detyre në divizionin ligjor në Ministrinë e Diasporës, ishin tri arsye kyçe të nevojshme për ta ndryshuar ligjin aktual.“Statusi i Qendrave Kulturore, Investimet nga Diaspora dhe ndarja e kompetencave, kanë ndikuar që të punojmë në hartimin e një ligji të ri për diasporën”, u shpreh ai.Në anën tjetër paneli diskutues i cili përbëhej nga Brikena Muharremi (Avokate), Hilmi Gashi (Udhëheqës për migracion në sindikatën Unia) dhe Muhamet Idrizi (Profesor i gjuhës gjermane dhe shkencës politike), kërkuan që të ngritet vetëdija tek pjesëtarët e diasporës për rëndësinë e këtij projektligji.

Sipas tyre, Projektligjit aktual për Diasporën duhet të qartësojë më shumë nenin 16 (Statusi i Pjesëtarit të Diasporës), sepse është i paqartë dhe lë hapësirë për keqkuptime. Po ashtu, u propozua që të përmirësohet gjuha në baza gjinore dhe të qartësohen disa përkufizime si p.sh: Qarkullimi i trurit.

Hilmi Gashi rekomandoi që të përfshihet një nen që mbron të drejtat ekonomike, juridike, të kthimit në vendlindje dhe mbrojtjen e interesave bilaterale p.sh sigurimet sociale. Kurse, Muhamet Idrizi propozi që të vendosen kuota për studentët nga diaspora për bursat e shkollimit dhe praktikës. Sipas tij, në projektligj duhet të përfshihet edhe përkthimi i kurikulës nga gjuha shqipe në gjuhën gjermane për mësimin plotësues të gjuhës shqipe. Paneli diskutues rekomandoi po ashtu ndryshime për Qendrat Kulturore në Diasporës, që të quhen “Qendra/Shtëpia e Diasporës”, sepse përqendrimi vetëm në kulturë e limiton rolin e këtyre qendrave.

Organizata Germin propozoi që në ligjin e ri për Diasporën duhet të përfshihet edhe Filantropia Shqiptare. Projektligji për Diasporën është iniciuar nga Ministria e Diasporës dhe Investimeve Startegjike dhe parashikon obligimet që ka Kosova ndaj Diasporës.

Video e plotë e takimit virtual: https://www.youtube.com/watch?v=sWCwLXm4E_0.

Kjo iniciativë përkrahet nga projekti Promovimi i Shoqërisë Demokratike (DSP) – i financuar nga Zyra Zvicerane për Bashkëpunim në Kosovë (SCO-K) dhe Ministria e Punëve të Jashtme e Danimarkës (DANIDA) dhe menaxhuar nga Fondacioni Kosovar për Shoqëri Civile (KCSF).