Teuta Rugova, ‘për hir’ të Presidentit Rugova, mbështetje Haradinajt

July 21, 2017 by dgreca

Teuta Rugova: Jam keqkuptuar, nuk do të veproj kundër qëndrimit të LDK–së(KOHAnet)/

*LDK: Refuzim të plotë për çfarëdo bashkëpunimi me koalicionin PAN/

Deputetja e zgjedhur e Lidhjes Demokratike të Kosovës, Teuta Rugova, i ka dhënë mbështetje kandidaturës së Ramush Haradinajt nga koalicioni PAN, për postin e kryeministrit të ardhshëm të Kosovës. Përkundër deklarimeve nga LDK-ja se deputetët e kësaj partie politike janë unikë dhen uk do t’i bashkohen ndonjë koalicioni tjetër, Teuta Rugova, e bija e presidentit të ndjerë të Kosovës, Ibrahim Rugova, themeluesit të LDK-së, megjithatë ka konfirmuar se e mbështetë Haradinajn, nga koalicioni rival i LDK-së.

“Unë kërkoj nga strukturat udhëheqëse të LDK-së, që në Qeverinë e gjerë dhe stabile që po kërkohet nga miqtë tanë të përhershëm, SHBA-të dhe BE-ja, në marrëveshjen e koalicionit, para ndarjes së përgjegjësive qeveritare të vendosen prioritetet për qytetarët e Kosovës, e që janë: formimi i ushtrisë, zgjidhja e problemit të demarkacionit që do të rezultonte me liberalizim vizash, reforma zgjedhore dhe përmirësimi i jetës së qytetarëve të Kosovës”, ka shkruar Teuta Rugova në rrjetin social Facebook.

Paraprakisht familja Rugova ka pritur në shtëpinë e tyre Ramush Haradinajn.

“Nuk është e drejta jonë të injorojmë votën e qytetarit, por nuk është as e drejta jonë të injorojmë bashkëpunimin e ngushtë të babait tim, Presidentit historik Dr. Ibrahim Rugova me Ramush Haradinajn. Unë ju siguroj se babai im, Presidenti historik Dr. Ibrahim Rugova, në situatën e sotme kurrsesi nuk do të kishte udhëhequr LDK-në në asi mënyre që të bllokoj proceset dhe të injoroj rekomandimet e miqve tanë të përhershëm, SHBA-ve dhe BE-së”, është shprehur Rugova.(Europa e Lire)

KOHAnet

Teuta Rugova: Jam keqkuptuar, nuk do të veproj kundër qëndrimit të LDK–së

Deputetja e LDK-së, Teuta Rugova në një postim të ri në Facebook theksuar se “deklarata ime është keqkuptuar nga disa në raport me qëndrimin tim”, transmeton Koha.net.

“Unë jam deputete e LDK-së dhe as tash nuk do të veproj as edhe kurrë më parë nuk kam vepruar jashtë qëndrimit të LDK-së”, ka thënë ajo.

Në postimin paraprak ajo e kishte ftuar partinë e saj që ta votonte të nominuarin e PAN-it për kryeministër, Ramush Haradinajn.

Ky është postimi i ri i Teuta Rugovës:

“Mendoj se deklarata ime e mëparshme është keqkuptuar nga disa në raport me qëndrimin tim sepse shumë thirrje e mesazhe më kanë ardhur me pyetje rreth votës time. Unë jam deputete e LDK-së dhe as tash nuk do të veproj as edhe kurrë më parë nuk kam vepruar jashtë qëndrimit të LDK-së”..

***

LDK: Refuzim të plotë për çfarëdo bashkëpunimi me koalicionin PAN

PRISHTINË, 21 Korrik 2017-Gazeta DIELLI/ Lidhja Demokratike e Kosovës ka mbajtur sot mbledhjen me kryetarë të degëve, të cilën e udhëhoqi kryetari i LDK-së njëherësh kryeministër i vendit, Isa Mustafa.

Njoftimi i dërguar thekson se, gjatë mbledhjes u diskutua rreth organizimit të zgjedhjeve lokale që do të mbahen në tetor, përfshirë kriteret dhe orientimet rreth propozimeve për kryetar të komunave, për këshilltarë komunal si dhe programin të cilin LDK-ja do t’ua ofron qytetarëve në zgjedhjet lokale.

Kryetarët e Degëve të LDK-së, gjithashtu diskutuan dhe përkrahën fuqishëm kryetarin Mustafa dhe Kryesinë e LDK-së në qëndrimet e partisë në raport me formimin e qeverisë. Kryetarët e degëve siguruan kryetarin Mustafa se deputëtët e degëve përkatëse janë unik dhe të bashkuar rreth qëndrimeve të LDK-së dhe refuzimit të plotë për çfarëdo bashkëpunimi me koalicionin PAN.

Lidhja Demokratike e Kosovës, gjatë ditëve në vijim do të mbaj edhe mbledhjen e Këshillit të Përgjithshëm, kur edhe do të miratojë orientimet dhe kriteret për propozimet për kryetarë të komunave./b.j/

Aromë Shkodre, pulsim vendlindje buzë oqeanit Atlantik në Florida

July 21, 2017 by dgreca

– Sander Ruci Show – rikthim në vendlindje/
Nga Lek Gjoka/
Fare pranë Oqeanit Atlantik në Jacksonville Beach dallgët ndoshta të ardhura nga Evropa ndalin frymën . Në Cypress Records një studion amerikane që rekord dhe publikon muzike të grupeve të ndryshme në Florida dhe me gjere kësaj herë si para disa vitesh kishte frymëmarrje shqiptare . Aktori i humorit shkodran dhe shqiptar “Mjeshtri i Madh ” Sander Ruci pas 12 vitesh në mërgim vendosi që përkohësisht të rikthehet pranë Shkodër loces. Vitet kishin vrapuar aq shpejt në Jacksonville Florida saqë Sandri pa e kuptuar kishte trokitur në portën e pensionit duke u larguar nga udha e punëve normale të jetës dhe nisur një vrapim me të shpejte në fushën e artit dhe të humorit . Dukë i thëne “mirupafshim” dhe jo “lamtumirë” Amerikës Atdheut të dytë për atë dhe ne të gjithë shqiptaro-amerikanet përgatiti një Show për miqtë e tij që sikur edhe aktori e theksoi janë : “Ajka e ajkës së intelektualëve dhe shqiptareve të profesioneve të ndryshme në Jacksonville të cilët i qëndruan pranë në të mirë e në të keq ” . Akoma Dielli nuk kishte shkuar për të fjetur nga ku pafundësia e blutë e Atlantikut nuk ta lodhte shikimin salla shpërtheu në një këngë për Shkodrën vendlindjen e aktorit Ruci dhe e humorit shqiptar. Të gjithë të pranishmit shpërthyen në duartrokitje dhe një ndjenjë ëmbëlsie që vetëm Atdheu ta ngjyros fytyrën e shpirtit i përshkoi të gjithë . Përkohësisht të gjithë vetëm trupin e kishim në Florida sepse me ndjenja kishim ndaluar në vendlindje . Malli i mërgimtarët tepër i mërzitur ishte larguar me vrap drejt oqeanit Atlantik . Njëra pas tjetrës aktori Ruci me talentin e tij na argëton dhe teston për herë të pare krijimtarinë e re të Show-it që do ta paraqesë në fillim të vjeshtës për spektatorët e Shkodrës në teatrin “Migjeni” . Përveç parodisë me plot emocione interpreton plot mjeshtëri poezi malli , poezi satirike ku plot sarkazëm dhe ironi ve ne loje veset e gabimet e shqiptarëve në mërgim. Madje në një poezi me tona të forta flet për bashkëjetesën fetare të shqiptarëve edhe në diasporë ku gjaku , gjuha shqipe është ajo që na bashkon të gjithë neve shqiptarëve të Amerikës dhe ironizon disa shqipfolës që nëpërmjet Facebookut shfaqen me tonë urrejtje fetare thjeshte nga urrejtja personale dhe mos pasja e duhur e kulturës dhe tolerancës njerëzore.

Aq shpejt po ikin minutat saqë nuk kuptonim asgjë se jashtë oqeani Atlantik mbuluar me jorganin e dallgëve kishte bërë gjumin e parë .

Shpesh herë në minutat argëtuese vallja shqiptare u be jashtë skenarit pjese e këtij Show sepse shqiptarët e Amerikës prej mallit për muzikën shqiptare prishin çdo lloj protokolli artistik që në kështu rastesh edhe ja vlen sepse ne fund të fundit çdo show artistik është për të argëtuar spektatorin vlerësuesin kryesor të çdo artisti.

Një surprize e kësaj nate ishte sepse njëri nga personazhet e humorit që aktori Sander Ruci e kishte përdorur edhe ne dy Show organizuar me parë bashkatdhetari i tij shkodrane Hila ishte pjesëmarrës . Bashkëbisedimi artistik i aktorit Ruci me Hilen dhe pyetjet plot humor, sarkazëm dhe ironi për presidentin amerikan Donald Trump ishte një perlë artistike që besoj që do të vlerësohet edhe në shfaqjet që do organizojë në Shqipëri .

As vete nuk e kuptuam se po vinte mesnata dhe para se 19 Korriku të largohet për të ardhur pas një viti duhet të uronim aktorin Ruci edhe për 62 vjetorin e lindjes se tij dhe daljes në pension . Sigurisht çdo artist dëshirë të vetme ka ta urojmë për përvjetorë kur ai ka dalë në skenë për herë të parë sepse skena dhe duartrokitjet e spektatorit e rinojnë deri në pavdekësi. Kaloi mesi i natës dhe askush nuk donte të largohet . Sigurisht duke i uruar rrugë të mbarë dhe suksese në jete dhe në Show që do organizojë në Shqipëri dhe të rikthehet përsëri tek shqiptarët në Jacksonville Florida sepse këtu ka një pjesë të jetesës , sepse këtu linden disa nga personazhet e humorit , sepse këtu shijoi edhe ndjenjën me të madhe atë të qytetarit me të lirë të botës demokratike në çastin e betimit për nënshtetësinë amerikane.

Urime të mëtejshme miku im Sander Ruci sepse edhe ti do të ngelesh pjese e pavdekshme e historisë se artit të diasporës shqiptare të Amerikës dhe besoj se megjithëse do të jetosh në vendlindje në Shkodër locen që të bëri aktor dhe *Mjeshtër i madh” besoj së përsëri do të kthehesh të paktën artistikisht për shqiptarët këtu në Florida dhe kudo në diasporën shqiptare të Amerikës.

Jacksonville Florida

Korrik 2017

Homazh për Ali Podrimjen

July 21, 2017 by dgreca

Nga Albana M.Lifschin*/

Shkalla e Poezisë Zotëri, bujarisht, nga ai fron perëndie ku qëndroni Ju , më lëshuat një shkallë. Ngjitu, më thatë. Por a mundem? Tek ju shoh Ju aq lart, Ndjej të më merren mend. (2010) Si e njoha unë Ali Podrimjen… Ka qenë fund tetori i vitit 2009 kur mora mesazhin e parë elektronik nga Ali Podrimja ku më shkruante se kishte lexuar dy herë librin tim me poezi ”Dje preva flokët” dhe se përveç poezisë titullin e të cilës mban libri, i kishin pëlqyer mjaft poezitë e shkurtra. Por mesazhi nuk mbetej në kufijtë e një komplimenti, siç ndodh zakonisht, por sugjeronte që të ndiqja rrugën e poezisë eliptike. ” Unë e respektoj një artikulim të tillë dhe e përkrah sepse aty është edhe mëncuria krijuese si dhe bukuria e artikulimit. Mendoj se kësaj rruge duhet të ecni dhe këtë ta bëni për hir të vet poezisë, e cila duhet të jetë një filigranizëm. Ndiqni rrugën e poezisë eliptike, filigramit zonjë. E bëni këtë për hir të poezisë tuaj dhe letrave shqipe” Deri atë kohë kisha marrë komplimenta e urime nga lexues e kolegë, nga poetë të njohur e të respektuar, por askush si Podrimja deri atë kohë, s’ishte prononcuar në një mesazh privat në emër të letrave shqipe, duke ngacmuar ndjenjën e madhe të përgjegjsisë që duhet të kemi kur vëmë penën në letër. Në mesazhin e Poetit dërguar në postën time në e-mail, në 31 dhjetor 2009, lexova: “Ajo që më gëzon është se poezia juaj gjithnjë e më pak ka fjalë të tepërta. E shoh se Ti dallon shumë nga poetet e tjera të hapësirës shqiptare. Artikulimi yt poetik sa vjen e bëhet më interesant për lexuesit. Urime poeteshë dhe suksese gjatë vitit që po trokasim.” Mendoj që këshilla e tij “për të hedhur tej nga trupi i poezisë fjalët e tepërta” ishte një mesazh që i drejtohej të gjithë poetëve. Në faqet e Jetës së Re në 60 vjetorin e saj, në mbyllje të vitit, qenë botuar disa poezi të miat. Atë kohë jam frymëzuar e kam shkruar poezinë kushtuar Ali Podrimjes “Shkalla e poezisë”. Ai më dërgoi një mesazh falenderimi me mirënjohje ku shprehej se kishte mbetur ‘pa tekst’, “sepse lexoja një poezi të rallë”. Në letrën e 26 Janarit 2010, Ali Podrimja, më shkruante: “Pata fat ndoshta që i pari i lexova poezitë Tuaja të fundit. Keni arritur një shkallë të lartë të ekliptizmit dhe kjo më gëzon. Ju lutem filloni t’i sistemoni nëpër cikle dhe ta krijoni librin e ri të cilin do t’ma dërgoni para botimit.” Dhe kështu ndodhi që unë pata fatin që Ali Podrimja, Poeti ynë kombëtar, të përgatiste për botim vëllimin tim poetik “Ka gjithmonë diku” duke shkruar edhe parathënien e tij. Ndihesha sa e nderuar aq edhe e habitur njëkohësisht me thjeshtësinë, me sakrificën kohore që AI bënte për të inkurajuar poetët. Koha është e çmueshme për të gjithë, por edhe më e çmueshme për përfaqësuesit e vlerave tona kombëtare. Ne ua respektojmë kohën atyre. Por Ali Podrimja nuk e përdorte atë vetëm për poezine e tij . Ai jepte kohë nga koha e tij edhe për krijuesit e tjerë, të rinj apo të vjetër qofshin, dhe kënaqësia që i jepte kontributi për ta ishte e madhe. Kështu mund ta përjetojë vetëm ai që ka shpirt fisnik. Ali Podrimja ishte vazhdimisht në kërkim të së bukurës në letërsi duke e ndjerë si “obligim ndaj poetëve, por edhe si guxim moral” ndërkohë që na udhëhiqte si POET dhe si NJERI. Ali Podrimjen e njoha personalisht pas botimit të librit, kur shkova në Prishtinë për ta falenderuar e shprehur mirënjohjen time. Nuk e kisha parë asnjëherë. Më priste ne aeroport bashkë me kolegen e Radios Vera Pelaj. Kisha lexuar kryeveprën e tij Lum Lumin, dhe kisha mbetur sa e drithëruar aq edhe e mrekulluar. Kisha lexuar esetë tek “Sfida e harrimit “ kisha parë kulturën, artistin e fjalës dhe fisnikërinë e shpirtit. Duke përfunduar këtu, desha të citoj kritikun Bashkim Kuçuku kur tha:”Ali Podrimja, nuk jeton vetëm poezinë e tij, por me krejt poezinë shqipe. Për dhjetra vjet duke punuar si redaktor në Shtëpinë botuese ‘Rilindja’, Podrimja ka ndikuar ndjeshëm në përpunimin dhe ngritjen cilësore të saj….në vëllimet e shumtë që ka redaktuar, të disa brezave, është edhe inkurajimi, “ndërhyrja’ apo qortimi mjeshtëror i tij…. Me këto ndihmesa, krahas poezisë së vet është bërë poeti më autoritar dhe më i përkujdesshëm ndaj krijimtarisë së poetëve të tjerë, sidomos të rinjve. Nuk është e rastit që pikërisht Ali Podrimja, ka patur dhe vazhdon të ketë dishepuj, më tepër se çdo poet tjetër i ditëve të sotme.” Ali Podrimja u largua papritur nga ne tre vjet më parë, por Poeti i Madh vazhdon e do të vazhdojë të lëshojë shkallë inkurajimi për krijuesit ,siç shprehej ai ”për hir të poezisë , për hir të letrave shqipe”.

U shkrua në kohëpërcjelljen e poetit kur ndërroi jetë. Botohet me rastin e 5 vjetorit te largimit nga jeta te poetit/

Agim Gashi, i gjallë dhe i pa vdekshëm për kombin shqiptar!

July 21, 2017 by dgreca

Agim Gashi pas vdekje si poet, rapsod dhe veprimtar mbeti i gjallë dhe i pa vdekshëm për kombin shqiptar!/

Shkruan Luan -Asllan Dibrani/

Me shumë pikëllim e përjetova humbjen tënde pas shumë vargjeve poetike ,portreteve dhe artikuj publicistik për atdheun , kulturën artin dhe sfidat e këtij populli. Fjalët janë të pakta të përshkruaj dhimbjen që e ndjeje për ty në këto momente njeriu i sakrificave deri në frymën e fundit e mbajte lënien për kombin,kulturën dhe vlerat e kombit. Gjithmonë ishim së bashku me opinionet tua që kishe në shënjestër kritike të metaltat në shoqërinë kosovare e ma gjerë ne rrafshin kombëtar. Për ndarjen nga jeta të poetit, rapsodit dhe veprimtarit të çështjes kombëtare, interpretues të këngëve burimore folklorike shqipe krijoj pikëllim dhe humbje të populli i ynë qe mbeti pa një port dhe këngëtar i vajeve dhe gëzimeve qe i kushtoj popullit të vet.

Agim Gashi poet,këngëtar rapsodik ,veprimtar ish i burgosur politik

Urtësia , kultura ,bujaria dhe ndërtimi njerëzor i yti, or Agim Gashi ishte i një rangu të lartë. Vdekja e jote me theu shpirtërisht mua dhe krijuesit tjerë në Lidhjen e Shkrimtarëve Shqiptarë në Gjermani, familjen dhe farefisin .Nga kjo humbje e mikut tim pas një sëmundje të gjatë na i ndërpreu cingirrimat e telefonit, bisedat ,dhe kujtimet e së kaluarës edhe si bashkëpunues në krijimtarinë tonë. Nga kjo humbje dhe mungesë për ty or vëlla nuk munda ndryshe ta ngushëlloj veten, pos ta përmbush këtë boshllëk për mes këtij artikulli me përkushtim, për ty i madhi Agim Gashi. Kujtimet do t’i filloj nga dita që u njohëm me rastin e pajtimit të gjaqeve në Kosovë,.

Agimi iu bashkua ikjes nga atdheu ne emigrim drejt shteteve perëndimore për shkaqe sigurie, pas një burgu disavjeçar në vitet tetëdhjetë kur shqiptarët kërkonin Kosovën Republikë. Me ty u njohëm në aktiviteteve kulturore në Gjermani në përvjetorë dhe manifestime qe ish pjese e pa ndashme deri në çlirimin e atdheut nga Serbia.

Përvjetorit e themelimit të “Lidhjes së Shkrimtarëve Artistëve dhe Krijuesve Shqiptarë në Gjermani”ishin ato takime qe zëri i yt n mbeti në kujtesë me vargjet e bukura kombëtare satirike dhe të dashurisë. Agim fizikisht nuk je ma në mesin tonë, por kujtesa e begatë shkrimore, do të mbajë të gjallë në mesin tonë, në mendjen dhe zemrën e familjes, të miqve, bashkëpunëtorëve dhe të dashamirëve të shumtë.
Agimi do të kujtohet, nga brezat shqiptarë, për krijimet poetike, për satirat brilante, për këngët dhe zërin kumbues.
Me ndarjen e tij nga jeta, ne e humbëm një rapsod që ishte një nga këngëtarët që një jetë të tërë ia kushtoi këngëve folklorike, duke u shndërruar kështu në një nga emrat e njohur të kësaj lëmie në vargun e krijuesve ma te mëdhenj të popullit tonë. Puna dhe vepra e tij do të mbeten kujtimi më i mirë për të gjithë ata që e njohëm bashkëpunuam dhe vepruam me te, gjatë gjithë jetës së tij. Poeti dhe rapsodi Gashi do të mbahet mend me personalitetin e tij, ndërsa vepra e tij do të ju shërbej brezave që do vijnë në vazhdim.
Andaj, bashkëndjejmë dhimbjen me familjarët dhe të gjithë ata që e njohën Agim Gashin, dhe përmes këtij shkrimi ftoj të nderuarën familje që ti pranoni ngushëllimet tona më të sinqerta nga ana ime .

Agim nuk mund te thoja, as fjalën lamtumirës, se ti ike shpejt për në botën e pa kthim!. Deri në frymën tënde të fundit ishim se bashku në telefonata,brenga ,dhembje shkrime. I kujtuam edhe vuajtjet tona gjatë burgjeve nën regjimin jugosllav .Agim i madh i penës i këngëve i poezive, na le kujtime për ty dhe do të mbetet gjithmonë i gjallë në mësimin se si duhet atdheu, kombi dhe flamuri. Edhe pse ti shkove,le pas shumë gjurmë dashuri dhe kujtime te bukura për popullin tënd ndërsa, ishe plumb për armikun dhe tradhtarët. Ti je ndarë fizikisht nga ne, por do jetosh gjithmonë në zemrat tona me zërin tënd artistik me një gërshetim artistik dhe melosin kombëtar.

Ai zë që ende dëgjohet, ai shpirt që ende këndon, ajo sharki që nuk rri e heshtur edhe kur të zotin nuk e ka pranë. Ai zë, i cili atdheut i këndoi po me aq besnikëri për kaq kohë. Shpirti i tij nuk gjen qetësinë për kaq kohë sa përballja me shëndetin jo të mirë, jo vetëm Agimin, por edhe miqtë e tij, i goditi në shpirt sa ishe në përballje.

Ka bërë aq sa ka mundur, duke e dhënë një pjesë të shpirtit të tij që Kosovën ta shohë ndryshe, ashtu siç edhe e ekzekuton në telat dhe zërin e kumbueshëm të sharkisë. Ata që e njohin shpirtin e tij, përveç që dëgjuan me shumë përkushtim këngën e tij rapsodike, poezitë e tij epiko-lirike, janë ato që çdo ditë u gjendën me fjalë dhe me vepra pranë tij edhe kur ishte në Kosovë, edhe kur ishte në mërgim, madje edhe kur ishte i shtrirë në spital.

Foto nga takimi tradicional i LSH në Gjermani me 01.05.2015 kushtuar Pavarësisë se Kosovës ku horren pjesë një numër i madh krijuesish nga Gjermani ,Austria , Italia, Greqia ,Rumania,Zvicra etj

Agim ti ishe pionier i frymëzuar nga këngë të bukura të Nexhmije Pagarushës e Naile Hoxhës, të Qamilit të Vogël e të Jusuf Myzyrit, të Rizah Bllacës e Dervish Shaqa etj. Kur ishte i vogël, i ngeli në kokë Skënderbeun, Lahuta e Malcisë“ këngët kreshnike dhe ato historike,folklorit që i mbollën dashuri për atdheun dhe popullin,për Skënderbeun dhe bashkëluftëtarëve të tij.

Me përkujtohet thënia e Faik Konicës „Shqipërinë shpëtoje, Zot, nga shqiptarët“! Pse e përkujtoj këtë thënie? Sepse, shqiptarët me vetë dëshirë shpesh ra nen lajthitje me vetveten . Kur eshte fjla te Muzika kenga dhe folklori Agimi shprehet se e kopjuan muzikën e huaj dhe ia servojnë masave të gjëra si diçka origjinale. Vazhdimisht duke e dëgjuar këtë muzikë, njeriu ynë mësohet dhe patjetër se është i detyruar të ndahet nga origjinalja shqiptare e cila sipas mendimit tim është më e bukura, më e larmishmja dhe më besnikja në botë. Këtë revolte e shihte edhe Agim Gashi që shkroi dhe i gjykoj këto të meta në shoqërinë kosovare. Mos të mendojnë se po bëjnë burrëri, përndryshe veprimet e tilla janë të barabarta me tradhtinë.

Agimi shpesh u shprehte se këta njerëz , me zell janë duke e shfrytëzuar kaosin e dhimbshëm të kombit në të gjitha trojet etnike, duke u bërë kujdestarë të pseudovlerave dhe të pseudopatriotizmit.

Në këtë kohë të tranzicionit kombëtar ma kudo që të shkosh s’ke për të dëgjuar më këngë të bukura të Nexhmije Pagarushës e Naile Hoxhës, të Qamilit të Vogël e të Jusuf Myzyrit, të Rizah Bllacës e Dervish Shaqes, por ke për të dëgjuar zëra insonant e të pa artikuluar të një muzike të huaj që as dreqi si bie në fije, thua se je në një vend të fosileve antiqytetruese, apo edhe në qytetet e atyre që në shekuj na i bënë shumë të këqija. Kam shpresë se pa kaluar kohë e gjatë, pa u bërë tepër vonë, do të këndellemi si kolektiv dhe do të mendojmë ndryshe , pra të mendojmë kombëtarisht shprehet nder te tjera Agim Gashi .

Biografia e Rapsodit dhe poetit Agim Gashit!

Agim Gashi lindi më 27.07.1954 në fshatin Akllap të Komunës së Lipjanit.Ishte fëmija i parë i prindërve të Hamitit dhe Fikrijes për të qenë pastaj 8 fëmijë, katër motra e katër vëllezër.Shkollën fillore katër klasëshe e kreu në vendlindje, ndërsa katër klasë tjera në Janjevë dhe Sllovi. Akademinë e mësuesisë e kreu më 1973 dhe u inkuadrua si mësues, së pari në fshatin e lindjes e pastaj në Janjevë. Ndërkohë vazhdoi studimet në gjuhë dhe letërsi. Meqenëse Agimi në shpirt kishte tërësisht i dhene pas këngëve e muzike, sepse që nga viti 1973 ishte edhe këngëtar i rregull i RTP-së, kjo e rrëmben për ta shkëputë nga studimet për të vazhduar shkollimin e zërit tek profesori i njohur Terpkov nga Shkupi që ishte baritonisti më i njohur i kohës. Në këtë kohë ai merrej edhe me folklorin, ku ishte edhe bashkpuntor i jashtëm i Institutit Albanologjik të Prishtinës, seksioni i etnomuzikologjisë dhe i folklorit. Këtu pati rastin të bashkëpunoj ngushtë me Prof. Anton Çetten, Bahtrir Shehollin, Anton Berishen, Dr. Zekiria Canen, Rexhep Munishin rtj.

Qysh në vegjëli Agimi pati fatin të bie në kontakt me „Lahuten e malsisë“ së At Gjergj Fishtes dhe me shumë vepra tjera të rilindëseve, që në atë kohë i mbante të mshefuar familja e tij.

Babai dhe axhallarët panë se te Agimi gufonte një talent i rrallë si në këndim ashtu edhe në recitime të vargjeve, ata u angazhuan të ia mbjellin dashurinë e madhe për atdheun dhe lirinë e tij. Qysh në moshën dhjetëvjeçare ai pothuaj e këndonte dhe e recitonte „Lahutën e Malcisë“ për çka fshat më fshat bëhej me gomar e me kali për të i prezantuar aftësitë në dasmat e ahengjet e kohës. Nuk është çudi pra që sot dorëshkrimet e Agimit numërojnë mbi dhjetëmijë tituj të këngëve dhe poezive të shkruara nga dora e tij e që fatkeqësisht një pjesë shumë e vogël është publikuar . Do të ishte fatkeqësi që ky arsenal të mbetet në sirtarë apo edhe të humbë fare. Vlen të përmendim se poezinë e parë Agimi e botoi në moshën dhjetë vjeçare në gazetën „Pionieri“.

Agimin nuk do e gjejmë vetëm me këngën dhe poezinë e tij por edhe në demonstratat e viti 1968, 1981, 1989…Për këtë nga regjimi komunist ai dënohet me vite burgim, maltretohet, persekutohet dhe izolohet e në fund në janarin e vitit 1994 derisa gjendej i mërguar nga dhuna, atij ia vrajnë djalin, Ninelin 17 vjeçar e që sot e atëherë nuk ia di as varrin.

Menjëherë pas daljes nga burgu më 1989 dhe pak më vonë edhe nga izolimi, edhe pse disa here e rrahën mizorisht dhe barbarisht, ai nuk e ndali aktivitetin as ilegal e as atë legal, as të këngës e as të shkrimeve, ku për çdo ngjarje Agimi thurte nga një këngë për të mbetur histori e paharruar e kombit.

Viti 1990 Agim Gashi i bashkohet karvanit të pajtimtarëve për tu bërë krah i djathtë i Anton Çettes, Don Lush Gjergjit, Zekiria Canes, Hoxhë Kakrrukut e shumë e shumë veprimtarëve të pajtimit. Buçima e këngës së tij jehonte fuqishëm në trojet etnike dhe zbuste edhe zemrat prej guri për ta shtri dorën e pajtimit. I gjurmuar dhe i përcjellur nga policia serbe, i rrahur dhe i persekutuar me dhjetëra here u detyrua ta lë vendlindjen të migroj në Slloveni krejt me qëllim të vazhdimit të aktivitetit të tij. Aty në Lubjanë Agimi u kyç menjëherë në aktivitetet e shoqatës „Migjeni“ ku pati rastin të veproj me njerëzit që në atë kohë qëndronin atje e siç ishin: Ukshin Hoti, Sali Kabashi, Naim Maloku, Halil Matoshi, Shemsi Reçica, Abedin Maliqi e shumë të tjerë.

E kemi për obligim ta cekim se të vetmit Ukshin Hoti dhe Agim Gashi për shkak të kushteve ekonomike banonin në konviktin e nxënësve „Zvijezni Center“ të Lubjanës. Gjatë qëndrimit në Lubjanë Agimi nuk ndejti duarkryq, por me shpenzimet e veta regjistroi albumin dy pjesësh „I këndojmë Kosovës, i këndojmë demokracisë“ që më vonë me ndihmën e vëllezërve Kuzhnini dhe në përkujdesjen e prof.dr. Zekiria Canes dhe prof.dr.Shaban Hashanit, u shumzuan në Jugoton të Zegrebit. Ky album u shpërnda në të gjitha trojet etnike, por një sasi e konsiderueshme u konfiskua nga policia serbe duke mos menduar ata se kënga e Agim Gashin nuk ndalet as me dhunë e as me terror. Aktiviteti i tij tani ishte përqendruar në Zagreb ku pati rastin të punonte me dëshmorët Fehmi e Xheva Lladrovcin, të burgosur tjerë politik shqiptar e ata kroat, me Tuxhmanin, Mesiqin, Grakaliqin, Dr. Langun, me minatorët e Trepçës, me delegatët e Kuvendit të Kaçanikut, si dhe shumë personalitete të jetës politike dhe kulturore të kohës. Është i njohur koncerti i Zagrebit organizuar nga Shoqata „Nëna Terezë“ ku Agimi në prani të delegatëve të Kushtetutës së Kaçanikut dhe mijëra spektatorëve i këndoi Kushtetutës së Kaçanikut!

Helmimi i nxënësve në Kosovë Agimin e trondit thellë, kështu që duhej vepruar akoma. Ai kalon në Sarajevë për ta vazhduar aktivitetin e tij. Atje në atë kohë familjet boshnjake dhe kroate e në organizimin e këshillit për ndihma Kosovës ku Kryetar ishte këngëtari boshnjak Safet Isoviq, organizuan ftesën me qëllim këndelljeje të 1500 fëmijve shqiptar që ishin helmuar nga soldatesaka serbe. Agimi edhe këtu angazhohet e duke u takuar me Alia Izetbegoviqin, Halil Çengiqin, Fikret Abdiqin etj. Pas qëndrimit dy javor të fëmijëve shqiptar në BH, dita kulmore ishte organizuar në sallën „Zetra“ të Sarajevës ku me anë të koncertit ku do të këndonin Safet Isoviq, Hanka Palldu dhe Agim Gashi, do i thuhet lamtumirë fëmijëve mysafir. Koncerti ishte impozant. Kënga për falënderimin e organizatorit dhe popullit të Bosnjës që aq ngushtë solidarizohej me vuajtjet tona, Agimi kishte komponuar një këngë që e tërë salla prej 30 mijë njerëzish buçiste duke kërkuar përsëritjen. Ovacionet i shkaktuan rreshtat e fundit të këngës ku thuhej pos falënderimeve edhe „Të na rrojnë Ibrahimi dhe Alia“!

Jeta në Sarajevë iu vështirësua andaj Agimi detyrohet patjetër të vjen në Kosovë ilegalisht. Pas qëndrimit dy mujor, policia i bie në gjurmë dhe e arrestojnë duke e maltretuar mizorisht.

Pas disa ditësh e lirojnë por i konfiskohen të gjitha dokumentet e indetifikimit dhe se çdo ditë duhej lajmëruar policinë se ku gjendej. Një ditë, të vitit 1992, policia serbe e Lipjanit nuk patën fatin të takohen me Agimin. Ai tani me ndihmën e disa miqve ishte në Shkup tek miku i tij Mala. Atje i sigurohet një pasaportë falso dhe merr rrugën e mërgimit. Me sharkinë e tij së pari këngën e fillon në Vjenë të Austrisë. Disa koncerte humanitare për 3%-shin e RK, Agimi ishte i pari që e filloi këtë aksion për të mos u ndal deri me ditën e vdekjes. Duhet të përmendim edhe faktin se poqëse Agimi kishte marrë për veten e tij parat e fituara nga qindra e qindra koncerte në tubime tjera, ai do të ishte njeriu më i pasur i yni e jo si e përfundoj jetën e vet ne skamje varfëri dhe vuajtje. Ai të gjitha të ardhurat i dhuronte në destinacionet për të varfër e për luftën. Me rastin e keqësimit të gjendjes shëndetësore me një rast para dy vitesh me kërkoj dhe me tha “ Vëlla Asllan, unë po vdes, por mundësisht librat dorëshkrimet dhe videokasetat e krijuara mos të më mbesin në Gjermani se këtu ,pos koshit të plehrave nuk kane vlerë ”.Unë merrem me një firme transportesh që 17 vjet nga Evropa dhe për Kosovë. I thash bëri gati unë ta kryej këtë porosi edhe ashtu veprova. Librat dorëshkrimet dhe kasetat e tij te krijimtarisë sot janë në Kosovë, pos dorëshkrimeve të fundit qe i ka bërë edhe ne pragun e vdekjes edhe ne shtratin e spitalit ishte i lidhur me trungun ,kulturën tonë ,prandaj lus vajzën e tij Azalenë,shokët dhe miqtë tjerë që kanë ndonjë dorëshkrim të tij të më lajmërojnë t’ja kompletojmë edhe t’ja bashkojmë me tjerat në Kosovë. Është një turp i madh, po qe se Qeveritarët e Kosovës nuk e marrin si obligim ti botohen këto vepra kolosale këtij krijuesi te madh kombëtar. Pastaj si mund të harrohen qindra mbrëmje letraro-muzikore që Agimi i organizonte me mikun e tij, poetin Ali Podrimen, pastaj me Azem Shkrelin e ndjerë, me skulptorin Agim Çavderbashen, poeten Lindita Arapin, Adem Gashin, Faruk Tashollin etj. Me poshtë e bashkëngjis këngën e tij të fundit që lexuesi e kupton thellësisht patriotizmin dashurinë dhe vlerat e tij për atdheun.

KANGA E FUNDIT

AGIM GASHI

Kangën e fundit me sharki
Po e këndoj, atdhe, për Ty!

Vetë i dyti o këtë kangë këndoj,
Loti lotin s’po ma ndal,
Qajnë e qajnë sytë e mi,
Rrjedhin faqeve e mbi sharki.
Për nanë e atdhe malli m’ka marrë,
Këtë kangë vaji du me ua falë.

O i dashuri im atdhe,
Vend i shenjtë ku kam le,
Nga dhenat e hueja, në kurbet t’zi
Shumë e lus Zotin për Ty.
Të kesh paqë e lumturi,
Edhe varret në qetësi.

A më pret kjo jeta ime,
Për me ardhë e me ju pa?
Me marr n’gryk un’ nanën time,
Me lot rrudhat me ia la?
Mbushet bota me hijeshi hane,
Mbushet shpirti me aromë nane.

Me lot zemre këndoj e qaj,
Atdhe, lutje të kam kërkue,
Ma ep fjalën e ma ep besën:
Dy metra tokë me m’i dhurue,
Spo due kopshte e spo due arë
Por ta baj nji t’vogël varr.

Të vi i vdekur t´pushoj tek ti
Vetëm aty do t´gjej qetësi!
03.03.2013 Düren Gjermani

U prefsh në paq Agim Gashi! Do të mbetesh përherë në zemrat tona i gjalle e i pa vdekshëm.

Me respekt dhe përkushtim nga Luan-Asllan Dibrani kushtuar kengetarit rapsodit dhe krijuesit dhe mikut tim Agim Gashit.

Haradinaj merr mbeshtetje nga Familja e Presidentit Rugova

July 21, 2017 by dgreca

*AAK: Haradinaj merr mbeshtetje nga Familja e Presidentit Rugova/

*AVDULLAH HOTI: SHTEPIA E PRESIDENTIT ESHTE E HAPUR PER TE GJITHE./

-Lideri i Aleancës për Ardhmërinë e Kosovës, Ramush Haradinaj: Është nder i veçantë për mua që sot isha mysafir në Familjen e nderuar të Presidentit historik Dr. Ibrahim Rugova… Shfrytëzoj rastin që nga kjo shtëpi, t’i bëj ftesë të gjithë atyre që përqafojnë idetë e Presidentit Rugova, e në veçanti kreut të LDK-së Isa Mustafa dhe presidentit të AKR-së z. Behgjet Pacolli, që të mbështesin formimin sa më të shpejt të qeverisë së vendit dhe bashkimin e forcave shtet-formuese…/

PRISHTINË, 21 Korrik 2017-Gazeta DIELLI-B.Jashari/ Lideri i Aleancës për Ardhmërinë e Kosovës, Ramush Haradinaj – kandidat për kryeministër i koalicionit PDK-AAK-Nisma, ka shkruar sot në ‘facebook’:

“Në nderim të Presidentit historik, dr. Ibrahim Rugova, arkitektit të pavarësisë së Kosovës dhe prijësit të lëvizjes për liri e demokraci.Vepra e tij, udhëheqja dhe vizioni i tij do të jenë frymëzim për ndërtimin e shtetit të Kosovës, të ardhmes së tij të sigurt në miqësi të përhershme me SHBA-të, dhe e barabartë me kombet e tjera në botë.

I përjetshëm kujtimi për Presidentin Rugova”.

Ndërkohë, Aleanca për Ardhmërinë e Kosovës ka dërguar sot këtë deklaratë të kryetarit të saj Ramush Haradinaj:

Të nderuar qytearë,

Është nder i veçantë për mua që sot isha mysafir në Familjen e nderuar të Presidentit historik Dr. Ibrahim Rugova dhe njësoj si në vitin 2004 kur ishte nevoja e bashkimit të forcave për unitet politik, përballë sfidave të kohës, Presidenti Rugova pa hezitim theu paragjykimet për të kapërcyer ndasitë artificiale të atëhershme dhe për t’i dhënë fund armiqësive absurde mes shqiptarëve dhe me dha mbështetjen për Kryeministër të Republikës së Kosovës, edhe sot u ndjeva njëjtë kur mora mbështetje për misionin tonë të përbashkët të ndërtimit të shtetit dhe institucioneve të Republikës së Kosovës nga Familja e Presidentit historik Dr. Ibrahim Rugova. Historia e re e Kosovës është histori e afrimit dhe besimit në mes njerëzve, rezultat i luftës, sakrificës, mirëkuptimit dhe tolerancës. Këtë strategji kombëtare e ndiqte presidenti dr. Ibrahim Rugova, për te bërë shtetin dhe qeverinë e Kosovës. Tani e kemi shtetin tonë te pavarur të Kosovës, por këtë shtet duhet zhvilluar, ndërtuar dhe integruar në të gjitha mekanizmat ndërkombëtar. Ky edhe ishte përkushtimi dhe amaneti i Presidentit historik Dr. Ibrahim Rugova, me të cilin bëmë koalicion qeverisës në Nëntor të vitit 2004, duke besuar thellësisht në vlerat kombëtare, patriotike dhe integruese. Bashkëpunimi me familjen Rugova u vazhdua edhe më vonë, kur Ukë Rugova kandidoi i renditur në vendin e dytë në listën e përbashkët AAK-Lista Ibrahim Rugova. Bashkëpunimi me këtë familje të nderuar nuk është ndalur për asnjë moment, andaj sot në frymën e afrimit dhe filozofisë së Presidentit historik Dr. Ibrahim Rugova, ne po e konfirmojmë mbështetjen, bashkëpunimin e përhershëm dhe respektin e ndërsjellët. Unë si i nominuar për kryeministër të Republikës se Kosovës, me kënaqësi e pranoj mbështetjen e familjes emblematike të Presidentit Rugova dhe zotohem që do të bëj ç ‘mos për ruajtjen e vlerave dhe mësimeve të Presidentit Rugova, për ruajtjen e miqësisë të përhershme me SHBA-të, BE dhe NATO. Objektivat e përhershme për një Kosovë të zhvilluar ekonomikisht, të integruar në familjen evropiane, për lëvizje të lirë të qytetarëve të saj, për sundimin e ligjit dhe rendit, do të jenë prioritete në agjendën e qeverisjes sime!

Gjithashtu, do të kemi respekt dhe kujdes të veçantë për familjet emblematike dhe legjendare, siç është familja e Presidentit historik Dr. Ibrahim Rugova, familja Jashari si dhe familjet e tjera që sakrifikuan dhe u flijuan për lirinë e Kosovës.

Shfrytëzoj rastin që nga kjo shtëpi, t’i bëj ftesë të gjithë atyre që përqafojnë idetë e Presidentit Rugova, e në veçanti kreut të LDK-së Isa Mustafa dhe presidentit të AKR-së z. Behgjet Pacolli, që të mbështesin formimin sa më të shpejt të qeverisë së vendit dhe bashkimin e forcave shtet-formuese, për të përshpejtuar agjendën e forcimit të Republikës se Kosovës dhe integrimin e saj në strukturat euro-atlantike.

Zoti e bekoftë përjetësisht jetën dhe veprën e Presidentit historik Dr. Ibrahim RUGOVA!

Zoti e bekoftë Kosovën dhe popullin e saj!

Juaji,

Ramush Haradinaj

AVDULLAH HOTI: SHTEPIA E PRESIDENTIT ESHTE E HAPUR PER TE GJITHE.

Avdullah Hoti, kandidat për kryeministër të Kosovës nga koalicioni LDK-AAK-Alternativa ka shkruar në ‘facebook’:

“Shtepia e Presidentit eshte e hapur per te gjithe. Edhe per kundershtaret politik. Perkulja qe te gjithe i bejne atij tregon per madheshtine qe ka”.