dgreca – Page 2323 – Dielli

Kosovë-Mbrojtje dhe promovim trashëgimisë kulturore

December 17, 2016 by dgreca

-Policia e Kosovës, e gatshme të mbrojë dhe të promovojë trashëgiminë kulturore/

-Në Prizren, trajnim tre-ditor mbi mbrojtjen dhe promovimin e trashëgimisë kulturore, në kuadër të projektit “Ndërtimi i Besimit Përmes Mbrojtjes Kulturore”/-Vizitë studimore katër ditore në Irlandën e Veriut, ku morën pjesë shtatë policë të nivelit të lartë nga Policia e Kosovës/PRIZREN-Gazeta DIELLI/ Më shumë se 50 zyrtarë të policisë u mblodhën në Prizren këtë javë për të marrë pjesë në një trajnim tre-ditorë mbi mbrojtjen dhe promovimin e trashëgimisë kulturore, në kuadër të projektit “Ndërtimi i Besimit Përmes Mbrojtjes Kulturore”, të financuar nga Bashkimi Evropian në Kosovë dhe zbatuar nga Programi i Kombeve të Bashkuara për Zhvillim (UNDP).

Njësiti i Policisës së Kosovës për mbrojtjen e objekteve fetare dhe të trashëgimisë kulturore, drejtoria për planifikimin dhe vlerësimin operacional në Prishtinë, njësiti i policisë në komunitet dhe zyrtarët e policisë nga stacionet lokale që ndodhen në afërsi të objekteve të trashëgimisë kulturore në Kosovë janë trajnuar në ofrimin e shërbimeve më të mira policore komuniteteve, vendeve të trashëgimisë kulturore dhe në sigurimin e mbrojtjes së pronës dhe sigurinë e njerëzve pa dallim etnie, gjuhe apo gjinie.

Për më tepër, trajnimi u përqëndrua në forcimin e njohurive mbi sfidat që kanë të bëjnë me punën policore në mjedise shumë-etnike dhe gjithashtu, përmes metodave të angazhimit të komunitetit, në ngritjen e respektit, besimit dhe mirëbesimit në mes të Policisë së Kosovës dhe të gjitha komuniteteve.

Zyrtarët për komunikim të Policisë së Kosovës u njohën edhe me aftësitë e nevojshme të komunikimit për të krijuar dhe mbajtur marrëdhënie efektive me komunitetet në baza ditore.

Përveç kësaj, gjatë trajnimit tre-ditor, pjesëmarrësit përforcuan njohuritë e tyre mbi këto tema duke analizuar studime të rasteve të ndryshme dhe përmes seancave të diskutimit.

Përfaqësuesi i komunitetit islam, Imam Ali Veizaj, përfaqësuesi i kishës ortodokse serbe Igumani Ilarion nga manastiri Draganac dhe Pal Baftiaj nga Caritas Kosovë përfaqësues i kishës katolike, folën mbi rëndësinë e mbrojtjes së objekteve fetare, si dhe mbi vlerën e këtyre objekteve për trashëgiminë kulturore të vendit.

Në muajin nëntor, u organizua një vizitë studimore katër ditore në Irlandën e Veriut ku morën pjesë shtatë policë të nivelit të lartë nga Policia e Kosovës. Kjo ishte një mundësi që zyrtarët e policisë të shkëmbejnë përvoja të ndryshme me zyrtarët policorë në Belfast, dhe për të mësuar në lidhje me angazhimin e institucioneve të tjera civile në ngjarje të veçanta dhe situata potencialisht të paqëndrueshme.

Projekti Ndërtimi i Besimit Përmes Mbrojtjes Kulturore përqëndrohet në rinovimin, zbukurimin dhe rehabilitimin e trashëgimisë kulturore dhe fetare në Kosovë, duke punuar në bashkëpunim të ngushtë me EULEX-in dhe Njësinë për Siguri të ndërtesave dhe Trashëgimisë Kulturore të Policisë së Kosovës. Qëllimi i përgjithshëm i projektit është të kontribuojë në përmirësimin e tolerancës ndëretnike dhe respektin për identitetin kulturor dhe të trashëgimisë./b.j/

Donika Mustafaj:Misteret e filmit “Kur kënga nuk kishte Pazar”

December 17, 2016 by dgreca

PERSONAZH/ Flet regjisorja e mirënjohur Donika Mustafaj: Dikur kënga ishte një qëllim më vete, sot qëllimi është fitimi i parasë/

-Ja misteret e filmit “Kur kënga nuk kishte Pazar”

– Të gjitha këngët e dashurisë sot janë këngë mekanike, nuk kanë shpirt

-Këngëtarët sot shesin më shumë imazhin se sa këngën

Nga Albert Z. ZHOLI/

Kënga për dashurinë është burim i kulluar i ndjenjave të shpirtit. Ajo të çon drejt virtytit, ndjenjës së pastër, mallit të përvëluar, kufijve të sentimentit njerëzor me dimensione të hiperbolizuara jashtë paragjykimeve dhe barrierave të shoqërisë. Ajo e lartëson bukurinë e vashës në tempullin e ndjenjës dhe dashurinë e djalit në himnin e lidhjes fizike dhe shpirtërore, me një temp perëndish. Kënga, e kthen realitetin në idealizëm dhe idealizmin pjesë të kënaqësisë së të jetuarit. Ajo është ankth, mall, përshpirtje, lartësim, ikjemendje drejt skutave të vetvetes. Kush jemi pse jetojmë? Si na kanë dashur dhe sa dashurojmë ne në jetën tonë?! Jo vetëm Nepor edhe të tjerë!. Asnjëherë populli nuk e ka shkruar eksperiencën e tij jetësore, më shumë se në zhanrin e këngës. Një përballje shpirti dhe mbi të gjitha brezash ndër vite, genesh dhe gjenetike të një populli, që ka ditur ta bëjë shpirtin të flasë me notat e këngës së tij. Duke rrjedhur nga kjo tokë e virgjër, brendësore e malaksur vetëm me natyralitet, kënga lartësohet në interpretimin e një këngëtari virtuoz dhe të talentuar. Është kjo lidhje e madhe shpirtërore e poezisë popullore me interpretimin, që ka krijuar në Shqipëri një plejadë këngëtarësh me emër që i kanë dhënë këngës për dashurinë emrin dhe talentin e tyre. Dhe pse muzika është kthyer në një mall tregu, këngëtarët më të talentuar ndjehen larg këtij manierizmi duke patur si pasion intelektual muzikën e vërtetë, muzikën e pastër, muzikën autoktone shqiptare, tekstin e bukur të mbështetur në folklorin shqiptar. Është pikërisht kjo shtresë intelektualësh e cila krijon një veçansi me interpretimin e saj. Por nuk është vetëm kjo. Është dhe e kundërta e saj, kur kënga për dashurinë përcillet me një muzikë absurde dhe një tekst pa kuptim në emër të komercializmit. Kështu foklori përjashtohet, teksti poetik shpërdorohet, muzika tradicionale mohohet. Të gjitha në emër të parasë….

Kënga për dashurinë dje dhe sot. Çfarë është në folklorin shqiptar, si ruhej kjo muzikë dje dhe si është sot kjo këngë magjike?

-Tek këngën për dashurinë para viteve ’90 dhe pas viteve ’90, nuk kanë ndalur ende kritikët, apo muzikologët ta analizojnë. Kënga ka shumë komponentë. Kënga nuk është përqendruar vetëm tek teksti. Kënga është si çdo art tjetër që tregon se kush jemi. Kënga brenda ka edhe motivin e dashurisë. Unë jam përqendruar tek kënga e dashurisë dhe në film kam përcjellë tek shikuesi këngën e lehtë dhe atë popullore. Këto janë të gjitha këngë dashurie, për të parë ndikimin e dashurisë në këngët bashkëkohore. Duke parë si kanë ndikuar këngët e dashurisë në këngët bashkëkohore unë ndërtova këtë film duke e parë si ka qenë më përpara dhe e krahasoj me sot. Kam respektuar personalitete që kanë emër në fushën e artit si Jorgo Papingji, Flamur Shehu, Arben Duka, Pandi Laço. Këto janë personalitete që flasin. Konkluzioni im është: Nuk mund të mendosh që kultura jonë individuale, është thelbi kryesor i kulturës së këngës së dashurisë. Kënga është ajo që e çon kulturën tonë drejt një regresi apo progresi dhe më tej drejt një analize. Duke ballafaquar të dyja këngët para viteve ‘90 dhe pas viteve ‘90, kam si shënjestër dallimet ms tyre…Pra kam bërë një analizë të këngës në përgjithësi. Këngët pas viteve 1990 janë të gjithë këngë problematike, ka një marramendje të këngëve. Shumë njerëz mund të mendojnë se nuk është vetëm dashuria që duhet të marim në konsideratë se kemi edhe probleme të tjera, se ka edhe këngë shumë të bukura që nuk kanë dashuri. Unë shpjegoj në film se përse kemi zgjedhur këngë dashurie. Pse publiku jonë ka më shumë neps, sesa gjykim. Tërheq më shumë publikun me këtë pasion që ka brenda vetes dhe që e ka të identifikueshme se sa me pasione të tjera. Sepse është forcë që t’ia thuash vetes tënde dobësitë që ke. Një pyetje nga një gazetar ishte, se kë këngë pëlqeja! Unë jam për të gjitha shijet. Nëqoftëse dikur kënga ishte një qëllim më vete, kënga sot është kthyer për të arritur një qëllim dhe fitimi i parasë. Kjo mund të ketë pasoja në peizazhin muzikor shqiptar. Unë jap një sinjal dhe një alarm. Këta këngëtarë e kanë shpërfytyruar të qenit art dhe ne këtu duhet të ndalemi dhe ti biem fort këmbanave. Kemi shkuar drejt një uniformizimi të kulturës dhe progresit të saj meqenëse bëhen vetëm këngë të njëjta. Këngët zgjidhen për ti pëlqyer rinisë. Rinia është masa më e madhe dhe më evulive e shoqërisë dhe duhet ti përgjigjemi me gjuhë bazike. Por kur dëgjon këngët sot? Të gjitha janë këngë mekanike. Këngët mekanike nuk kanë shpirt.

Më përpara ne këngët i kemi pasur me tema të shumëllojshme dhe me poezi brenda. Po këngët e dashurisë sot?

Në këtë kohë kënga nuk ka asnjë lloj frymëzimi. Është gjetur një kallëp që po të realizojë diçka për fitim ka garantuar suksesin. Ata shesin më shumë imazhin se sa këngën. Kjo bëhet më shumë që ata të flasin për veten e tyre. Ata nuk e kanë më problemin e këngëve. Kënga është bërë konsum në masë. Më parë nuk ishte konsum, ishte kënaqësi. Mund të them se pjesa më e madhe e fajtorit është media, sepse ajo është edukative. Akoma nuk e kemi kuptuar se thelbi i kulturës jepet nëpërmjet medies. Kam studiuar dhe dëgjuar shumë se këta këngëtarë i bëjnë edhe heronj. I thërrasin nëpër studio, ku ka këngëtar të tjerë që kanë më shumë vlera dhe nuk i fton njeri. Sot këngët e mëparshme nuk transmetohen, ato kanë ngelur të ngrira nëpër sirtarë.

Deri para viteve ‘90 të gjithë kompozitorët dhe poetët kanë krijuar dhe kanë shkëputur nga e kaluara, nga folklori. Kanë ecur përpara. Por sot shohim një peizazh krejt tjetër, ku nuk pyet asnjeri për folklorin dhe traditën dhe akoma më keq kanë vënë fëmijët që të këndojnë këngë që nuk u përkasin dhe kjo është e tmerrshme. Këta lloj këngëtarësh thjesht nuk bëjnë art por bëjnë këngë për të fituar para.

Kush është mesazhi që përcjell në këtë film?

Unë e dua shumë këngën. Kur kam qenë e vogël kam kënduar. Jam rritur duke kënduar. Kënga është elementi thelbësor i kulturës. Dhe të gjithë personazhet që kam në dokumentar janë të gjithë të shqetësuar për këtë gjë: Ku po shkon kënga sot?! Pra ky është mesazhi…

-Kush është bërë pengesë e kësaj rrokopujë që po ecën kënga e dashurisë…?

E para është media. Dikur në media kënga ishte art dhe vlerat përcaktoheshin nga profesionalizmi i një kënge, ndërsa sot është paraja në mes. Profesionalizmin nuk e sheh as me dylbi, poetikën e vargjeve nuk e shijon askund në horizont…

-Përse femrat kanë pasur sukses më shumë në këto lloj këngësh?

Sepse femrat shesin imazhin. Kënga është kthyer në një pjesë të ëndrrave tona. Atë që ne nuk na e jep libri apo filmi, sot kënga na e jep për 5 minuta. Por na e jep me një imazh të përmbysur, ku derdhet lumë paraja. Sheh një klip, ku derdhet shampanjë, vetura superluksoze, helikoptera etj, etj.

Populli një pjesë e shikojnë, (pra nuk e dëgjojnë ) në televizor, kompjuter apo celularë. Duke e parë vazhdimisht këtë lloj kënge që përsëritet për 10 vjet, ajo patjetër që kthehet në një shije. Sigurisht që populli do ta pëlqejë dhe këtë shije të hidhur. Këtë bën reklama negative.

-Kush është lufta kryesore për tu zhvendosur ndaj këtyre lloj këngëve ?

Duhet të ketë censurë nga specialistët e këngës. Duhet të ketë censurë niveli. Zgjidhjen duhet ta japin ata që janë të asaj fushe, unë kam bërë vetëm studimin. Një këngë pa mesazh, ku do ta çojë këtë brez?! Si po edukohet ky brez, dhe çfarë po i japim këtij brezi? Kjo lloj kënge është shkëputja totalisht nga folklori. Folklori nuk vlerësohet se është sqimatar, ka marrë vulën dhe vlerën e popullit, sot nuk ka se kush paguan për të. Media jep atë që paguan. Thjesht media është bërë komerciale. Të gjitha këto i vuan folklori, muzika, kënga e bukur që është zhdukur në pluhurin e harresës.

***

“Kur kënga nuk ishte Pazar”

Në veprën më të fundit, “Kur kënga nuk ishte Pazar”, Donika Mustafaj bën një ndërthurje të zbërthimit të estetikës së këngës me zbërthimin sociologjik të përmbajtjes së saj, duke mbajtur gjithnjë në qendër të vëmendjes si artiste problematikën e saj të parapëlqyer rreth identitetit të shqiptarit dhe tronditjeve që ka pësuar ky identitet nën presionin e fortë të shoqërisë së konsumit. Ajo zgjedh kësaj here një element të përjetshëm, sa universal aq edhe individual, përbashkues për të gjithë njerëzit pavarësisht moshës dhe gjinisë, e njëherësh burim i pavdekshëm frymëzimi për muzikantët, poetët e këngëtarët, që është dashuria. Përtej prapambetjes ekonomike apo edhe prapambetjes arsimore, gjendjes në liri apo i pushtuar nga të huajt, shqiptari i ka kënduar në mënyrë të magjishme dashurisë, duke nxjerrë në pah si ndjeshmërinë e tij të lartë shpirtërore, aftësinë për ta shprehur artistikisht me mjeshtëri impresionuese këtë ndjeshmëri, si edhe respektin publik ndaj dashurisë si burim energjish pozitive, qoftë edhe kur bëhej fjalë për një dashuri të mbetur pa përgjigje. Dashuria ka etikën e vet, në sajë të së cilës ajo e ndihmon njeriun fuqishëm të përsoset si njeri në anët e tij më të mira, ato që ofrojnë me të tjerët. Përballë këtij koncepti për dashurinë, që na vjen nga këngët e traditës, Donika Mustafaj na vendos këngët e sotme të dashurisë, ku dominon instinkti, seksi i egër dhe ku marrëdhënia intime përjetohet më së shpeshti si një traumë më pasoja të rënda për individin. Autorja nuk merr përsipër të gjykojë mbi cilësinë artistike të tekstit dhe as të muzikës së këtyre këngëve. Shqetësimi i saj si krijuese lidhet me përmbysjen e madhe, që ka pësuar vetë koncepti i dashurisë së pasqyruar në këto këngë, të cilat mishërojnë një ndërprerje brutale të traditës. Qëllimi i saj nuk është, megjithatë, ta shtrojë këtë ndërprerje të traditës si një çështje të zhvillimit estetik të këngës, për të nxjerrë përfundimet e veta nëse ky zhvillim është në rrugë të mbarë apo të gabuar. Qëllimi, drejt të cilit ajo ecën me kërkimet e veta, është krejt tjetër.

Lobi Euroatlantik shqiptar”prek” Parlamentin Europian, por….

December 17, 2016 by dgreca

-Kujdes nga fraksionistet…..Komunikatë e Lobit Euroatlantik Shqiptar për media me qendër në Gjermani /

Pas konsultave, takimeve dhe analizave në mes të kryesuesve të degëve të LEUASH të shteteve, Gjermani,Austri,Suedi, Zvicër, Belgjikë si dhe në disa shtete që janë në themelim të Lobit Euro-Atlantik Shqiptar, duke përjashtuar kryesinë e degës se Norvegjisë, pasi qe nuk ka treguar ndonjë rezultat në vazhdën e programeve tona lëshojmë këtë:

Komunikatë publike

Lobi Euro-atlantik Shqiptar nuk ka shumë kohë që vuri gurthemelin e vet në Lorach të Gjermanisë,po dita ditës është duke marr hov dhe frymë me ambicie të reja drejt zgjuarëjes së shqiptarëve për ta bërë një unitet të bashkimit në mbarëvajtjen e gjithmbarshme kombëtare. Pas një serë aktivitetesh dhe lobimesh të LEASH-it nëpër Evropë, Lobi Euro-Atlantik Shqiptar, ka për qëllim ta bashkojë gjithë mërgatën shqiptare anekënd botës, në një frymë të re, e cila do t’u shërbejë gjithë shqiptarëve kudo në botë,madje këto ditë preku edhe në portat e Parlametiit Evropian dhe Natos nga një delegacion intelektualësh të prirë nga Suedia të udhëhequr nga zoti Avni Dervishi.

-Lobit Euro-Atlantik-Shqiptar ka një qëllim dhe synim të krijimit të unitetit rreth kombit, flamurit dhe gjuhës shqiptare. Ka synim me i larguar, eliminuar dhe injoruar grupacionet , bajraktarizmat, lokalizmat,grupet partiake, dhe formacionet e rrejshme të shantazheve vetanake. Ato grupe i krijuan plagë te rënda mërgatës sonë në shkapërderdhjen dhe përçarjen e sajë nga klane të fshehta dhe injorante ,po edhe nga kanale të ndryshme edhe anti lobiste me vetëdije apo edhe pa të, siç janë duke u paraqitur në:

Grupin fraksionistë nga disa persona të shkallës së ultë në arsim dhe kulturë. Këta vazhdojnë të shkaktoj huti dhe konfuzion në opinion për strukturat organizative të Lobit Euroatlantik shqiptar, me veprimet e tyre siç janë:

Gjëja formimit të degëve paralele dhe të pa koordinuara nëpër shtete,
Formimin e webfaqeve dhe grupeve nëpër Facebook, me qëllime të diskreditimit dhe të dezorientimit të mërgatës, thurjes se shpifjeve, shantazheve, intrigave për lobistët e vërtetë dhe të dëshmuar në kryesuesin e LEUASH.
Thirrjes së kuvendit sipas qefeve të disa personave me shfaqjeje bajraktarizmi edhe pa qenë fare anëtarë madje shpallin veten edhe koordinator pa marrë pjese edhe një takim të vetëm.
Futjes nëpër lista dhe manipulimit me emra të njerëzve, pa i pyetur fare ose duke i futur që të jenë nëpër lista të këshillave inicuese, që as vet nuk i dinë se si ti quajnë duke i premtuar se nuk do të kenë punë fare vetëm të futen në lista ndërsa punët do ti kryejnë ata.
Duke ju premtuar poste të ndryshme njerëzve shpesh të mire dhe duke i manipuluar.
Duke u thirrur në emër të unitetit, gjakut të derdhur, kombëtarizimit, UCK-s, të bashkimit kombëtarë,e shumë manipulime dhe falsifikimeve tjera, që bien ndesh edhe me ligjin e duke i shkaktuar dëme kësaj nisme të njerëzve të vullnetit të mirë, të pastër të sinqertë, humane, të mirëpritur për të gjithë shqiptarët dhe mërgatën.
-Këto i bëjnë të gjitha me qëllim që të krijojnë huti në opinion, marrjes në drejtim këtë kulm organizativ që sipas qefeve ta manipulojnë, duke mos ofruar as edhe një projekt konkret e duke mos patur asnjë koncept vizionar.

Kryesia qëndrore dhe degët e saj të lartpërmendura i bëjmë thirrje gjithë mërgimtarëve shqiptarë, që mos të bien pre e manipulimit të dezinformatave, propagandave të këtyre personave, që flasin në emër të kryesisë së Lobit Euroatlantik Shqiptar, sepse nuk janë më shumë se një grupacion kafesh e FB-ve nga tre ose katër persona që po mundohen LEUASH -in ta ndajnë në dy grupe, duke i shkaktuar dëme kësaj organizate, mërgatës dhe projekteve ekonomike, sociale, e kulturore për interesat kombëtare.

Prandaj ju informojmë se Kuvendi i Lobit Euroatlantik shqiptar – qendrorë do të mbahet pasi të themelohen degët e shteteve ku nuk janë formuar ende dhe pasi të jenë mbajtur të gjitha kuvendet zgjedhore nëpër degët e themeluara dhe të formuara.
I bëjë thirrje degëve të themeluara të LEUASH, se më së largëti deri në shkurtë të fillojë më mbajtjen e kuvendeve zgjedhore.
I bëjmë thirrje të gjithëve atyre që dëshirojnë të kyçen në LEUASH ose të jenë pjesëtar në themelimin e degëve, që të koordinohen me ne, gjegjësisht kryesinë, dhe kryesuesin aktual si iniciator i formimit të Lobit,zoti Skenderbeg Klaiqi, në mënyrë që të evidentohen si aktivistë dhe si lobistë. Ju sigurojmë se vend do të kenë për të gjithë ata vullnetarë që dëshirojnë të rreshtohen në anën e vërtetë të Lobit Euro-Atlantik Shqiptar.
Ju informojmë se webfaqja zyrtare e LEUASH është www.lobi-shqiptar.com, ndërsa faqet e facebook-ut të degëve, mundë ti gjeni në webfaqen tonë.

Për media informon kryesia e përkohshme e Lobit Euro-Atlantik Shqiptar me qendër në Gjermani dhe komisioni informativ.

Kosovë-Lançohet raporti i lirisë së mediave dhe sigurisë së gazetarëve

December 17, 2016 by dgreca

-Raporti paraqet rezultatet e hulumtimit të kryer në kuadër të projektit rajonal “Platforma Rajonale e Ballkanit Perëndimor për avokim për lirinë e mediave dhe sigurinë e gazetarëve”/

PRISHTINË, 17 Dhjetor 2016/ Asociacioni i Gazetarëve të Kosovës lançoi sot raportin e lirisë së mediave dhe sigurisë së gazetarëve, pjesë e projektit rajonal, ku janë të përfshira pesë shtete nga rajoni.Raporti “Treguesit e nivelit të lirisë së mediave dhe sigurisë së gazetarëve” është kryer në bazë të analizave cilësore të dokumenteve, intervista cilësore me 14 individë – shumica gazetarë, anketa me 50 gazetarë dhe në bazë të dhënave zyrtare statistikore.Raporti është i ndarë në tre grupe: Mbrojtja ligjore e lirisë së mediave; Pozita e gazetarëve nëpër redaksi, etika profesionale dhe niveli i censures; Siguria e gazetarëve.“Legjislacioni vendor ofron garanci për lirinë e shprehjes, të mediave dhe informacionit, mirëpo vlerësimi i përgjithshëm i të gjithë gazetarëve dhe ekspertëve të intervistuar është se zbatimi i garancive të tilla ligjore është i dobët në praktikë”, thekson raporti.Ligji për qasje në dokumente publike vazhdon të jetë ligji që nuk respektohet nga institucionet shtetërore. “Sipas anketës, 78% të gazetarëve kanë theksuar se institucionet shtetërore kanë refuzuar t’u japin qasje atyre në dokumente publike, të nevojshme për raportimin e tyre. Gazetarët e anketuar thonë se Kuvendi i Kosovës është më i hapur ndërsa qeveria është më e mbyllur”, shtohet më tej.

Gazetarët e intervistuar kanë cekur disa brenga të tyre si mungesa e kontratave të punës, vonesat e pagave dhe borgjet ndaj tyre nga pronarët, gazetarët punojnë jashtë orarit dhe nuk kompensohen, dhe gjysma e gazetarëve të anketuar kanë thënë se pozita e tyre ekonomike është përkeqësuar ndër vite.“Kur bëhet fjalë për sigurinë e gazetarëve, ata thonë se sistemi i drejtësisë nuk është efikas në trajtimin e lëndëve të tyre kur ata kërcënohen apo sulmohen fizikisht. Sipas AGK-së, që nga viti 2014 e deri më tetor 2016, janë paraqitur 43 raste, shumica prej tyre kërcënime dhe sulme fizike. Ndërsa, sipas statistikave të policisë, që nga viti 2013 e deri në gusht 2016, rastet e tyre në polici i kanë raportuar 63 gazetarë”, vë në dukje raporti.Më tej, raporti rekomandon partitë politike që të heqin dorë nga ushtrimi i ndikimit në transmetuesin publik. AGK rekomandon po ashtu që Kuvendi i Kosovës duhet të gjejë një zgjidhje të duhur financiare për RTK-në.Ky raport paraqet rezultatet e hulumtimit të kryer në kuadër të projektit rajonal “Platforma Rajonale e Ballkanit Perëndimor për avokim për lirinë e mediave dhe sigurinë e gazetarëve”, i cili zbatohet nga asociacionet kombëtare të gazetarëve në Bosnje dhe Hercegovinë, Kosovë, Maqedoni, Mal të Zi dhe Serbi./b.j/

Kosova, Axhendë Evropiane

December 16, 2016 by dgreca

-Kosova dhe Komisioni Evropian, diskutime në kuadër të Marrëveshjes së Stabilizim Asociimit/

-Qeveria e Kosovës dhe Komisioni Evropian diskutuan mbi politikat sociale dhe të punësimit, edukimin, hulumtimin dhe shoqërinë e informacionit/

PRISHTINË, 16 Dhjetor 2016-B.Jashari/ Përfaqësues të Qeverisë së Kosovës dhe Komisionit Evropian u takuan në Bruksel për të diskutuar zhvillimet gjatë vitit në fushën e arsimit, punës dhe mirëqenies sociale, mbrojtjes së trashëgimisë kulturore, komunikimeve elektronike, shoqërisë së informacionit dhe politikave audiovizuale, shkencës dhe inovacionit. Diskutimi u mbajt në kuadër të Marrëveshjes së Stabilizim Asociimit e cila hyri në fuqi në prill 2016. Në të gjitha fushat, Komisioni dhe Kosova ranë dakord mbi rëndësinë e zbatimit të prioriteteve të Axhendës së Reformave Evropiane, bëhet e ditur në një komunikatë të përbashkët të dërguar.Në lidhje me arsimin, Komisioni ka theksuar edhe një herë rëndësinë që Kosova të vazhdojë përpjekjet për të siguruar autonominë dhe funksionimin e pavarur të institucioneve të arsimit të lartë dhe për të miratuar një ligj të ri mbi arsimin e lartë në bazë të standardeve ndërkombëtare. Komisioni rikujtoi nevojën për prioritizimin e sigurimit të cilësisë në të gjitha nivelet, nga arsimi parashkollor deri tek ai universitar, përmes ofrimit të fondeve të nevojshme.

Qasja në arsim cilësor për fëmijët me aftësi të kufizuara dhe komunitetet pakicë duhet të forcohet, theksohet më tej.

Sa i përket hulumtimit dhe inovacionit, Komisioni theksoi rëndësinë e kapaciteteve të mira për hulumtim dhe inovacion në nivel kombëtar për të rritur konkurrencën dhe integrimin në Zonën Evropiane të Kërkimit dhe pjesëmarrjen në programin “Horizon 2020”.

Në lidhje me mbrojtjen e trashëgimisë kulturore, Komisioni theksoi se Kosova duhet të ofrojë angazhim të vazhdueshëm ndaj Këshillit për Zbatim dhe Monitorim.

Sa i përket punësimit, palët ranë dakord se ekziston nevoja për të krijuar një sinergji në mes të agjencive të ndryshme shtetërore, ligjeve dhe strategjive për të siguruar se ka një rritje të mundësive të punësimit dhe përkrahje më të madhe nga ana e Kosovës për masat e nxitjes së punësimit.

Komisioni Evropian inkurajoi Kosovën për të përgaditur një plan veprimi për trajtimin e papunësisë së të rinjve bazuar në një vlerësim të sfidave dhe duke u fokusuar në përmirësimin e rezultateve të arsimit dhe mbështetjen e tranzicionit nga shkolla në vend pune.

Palët u pajtuan se përpjekje më të mëdha janë të nevojshme për të zbatuar ligjin mbi punën dhe legjislacionin mbi shëndetin dhe sigurinë në punë, veçanërisht përsa i përket çështjes së numrit të pamjaftueshëm të inspektorëve të punës.

Mbi shoqërinë e informacionit, Kosova ra dakord për të adresuar nevojat për burime, veçanërisht në lidhje me zbatimin e Strategjisë së Sigurisë Kibernetike.

Komisioni i bëri thirrje Komisionit të Pavarur për Media për të përshpejtuar përgatitjen e akteve nënligjore të nevojshme dhe për finalizimin e Strategjisë për Kalimin Digjital dhe për të siguruar se fondet e nevojshme janë ndarë për zbatimin e saj.

Në lidhje me politikat audiovizuale, Komisioni inkurajoi Kosovën për të gjetur një zgjidhje të qëndrueshme të financimit për transmetuesin publik në përputhje me acquis të BE-së, si një çështje prioritare.

Marrëveshja e Stabilizim Asociimit është korniza në kuadër të së cilës administrata e BE-së dhe Kosovës diskutojnë rregullisht çështjet teknike dhe politike lidhur me axhendën evropiane. Takimet sigurojnë të dhëna të drejtpërdrejta mbi raportet vjetore të Komisionit Evropian.

Çdo takim i nënkomitetit monitoron dhe përcjell arritjen e Kosovës në zbatimin e reformave dhe identifikon se si BE-ja mund të ndihmojë në këtë proces.

Janë shtatë fusha të cilat mbulohen nga takimet e nënkomiteteve: Drejtësia, Liria dhe Siguria; Inovacioni, Shoqëria Informative, Politika Sociale, Arsimi dhe Kultura; Tregtia, Industria, Dogana dhe Tatimi; Tregu i Brendshëm, Konkurrenca, Mbrojtja e Konsumatorëve dhe Shëndetit; Bujqësia, Peshkataria, Pylltaria, Siguria e Ushqimit; Transporti, Mjedisi, Energjia, Zhvillimi Rajonal; Çështjet Ekonomike dhe Financiare, Statistikat.

Dy fusha të tjera që mbulohen gjatë takimeve të grupeve speciale janë reforma mbi administratën publike dhe normalizimi i marrëdhënieve me Serbinë.

Takimet e Komitetit të Stabilizim Asociimit dhe nënkomiteteve bashkë-kryesohen nga Komisioni Evropian dhe Kosova. Çdo takim përfundon me veprime pasuese të rëna dakord për t’u ndërmarrë nga autoritetet kosovare.