Rasti i rralle: Shkodranes i kthehet ecja pas 50 vitesh pas 6 mijë ndërhyrjeve në SHBA

May 12, 2016 by dgreca

Nga Saimir Lleshi/

Një gruaje nga Shkodra i ndryshoi jeta pas shumë vitesh. Mirjan Peraj banon në katin e 5-të të një pallati në qytetin verior.

Ajo mund të dilte dy deri tre herë në vit nga banesa e saj. Shkak ishte një operacion i dështuar në moshën 7 vjeçare, çka i solli asaj probleme të mëdha me shëndetin, duke ia pamundësuar lëvizjen.

Që prej asaj kohe, Peraj kishte vështirësi edhe për t’u veshur apo për t’u ulur në karrige për shkak të dhimbjeve. Apartamenti i saj nuk kishte ashensor dhe kështu mund të nxirrej jashtë vetëm nga të afërmit e saj duke e mbajtur në krah.

“Jeta është e gjatë dhe unë nuk do të heq dorë”, thoshte ajo. Por, zgjidhja i erdhi 5 mijë milje larg. Një kirurg ortopedik, Dr. Paul Apyan në Universitetin e Tennessee në Shtetet e Bashkuara i bëri të mundur gruas nga Shkodra që të ecte. Jo pak, por plot 6 mijë ndërhyrje në gju bënë të mundur rikthimin e ecjes për Mirjan Perajn.

Gjithçka u arrit fal edhe ndërhyrjes së kunatit të gruas, Ben Asllani, i cili i shpjegoi mjekut të gjitha problemet e gruas që qëndronte e mbyllur në banesën e saj.

Më pas, u bënë përpjekje për të shkuar në Shtetet e Bashkuara. Gruas ju refuzua fillimisht viza, por pas garancisë financiare, asaj ju dha herën tjetër. “Nuk kisha asnjë mundësi tjetër”, rrëfen gruaja në një intervistë në Amerikë.

“Ky nuk ishte një opsion. Ajo kishte nevojë për të qenë këtu në mjedisin tonë të kontrolluar, ku kam të gjitha gjërat në dispozicion”, tha Apyan.

“Ishte një punë e madhe dhe moment historik, kur ajo u ngrit nga shtrati vetë dhe hodhi disa hapa duke zbritur shkallët”, tregon terapistja.

“Ajo nuk ka ecur për 50 vjet, dhe nuk isha i sigurt se gjuri do të funksiononte normalisht”.

“Jam shumë, shumë e lumtur, falë Dr. Apyan dhe stafin e tij të mrekullueshëm”, thotë Peraj.

“Unë gjithmonë kam shpresuar se do të vinte kjo ditë dhe ajo erdhi”.

Doktori thotë se ka ende shumë për të bërë pasi muskujt e saj duhet të forcohen.

Dhe çfarë do të bëjë Peraj kur ajo kthehet në shtëpi?

Ajo ka një vëlla dhe do të dalë me të me biçikletë ose makinë rreth një liqeni aty, pra në Shkodër.

“Unë vetëm do të dalë për të parë”, tha ajo. “Sepse unë kam humbur shumë në jetën time”, shton./Ora News TV/

Blushi: Rama vetëm po bojatis gërmadhat që trashëgoi nga Berisha

May 12, 2016 by dgreca

Deputeti Ben Blushi ka vijuar edhe sot në Kuvend me akuzat ndaj kryeministrit Edi Rama, të cilin e ka quajtur disa herë si të paaftë për të na qeverisur.

Blushi iu referua Ramës si kryetari i Rilindjes, ndërsa Berishës si kryetari i Lindjes. Ai tha se të dy sëbashku ata po e shkatërrojnë prej shumë vitesh Shqipërinë. “Çfarë po bën Rama, vetëm po bojatis gërmadhat që na la trashëgim Berisha” vazhdoi ai. Gjatë fjalës së tij Blushi preku disa çështje të aktualitetit.

Së pari foli për aksidentin në Kavajë, ku një familje humbi dy fëmijë pasi rrugës i ishin hequr mbrojtëset anësore në mënyrë që të favorizonte një karburant privat.

Më pas u ndalë tek Klemend Balili i kërkuar nga autoritetet greke si kreu i një organizate kriminale të trafikut të drogës.

Pjesë nga fjalimi i Blushit sot ne Parlament:

Për të kuptuar se çfarë është dhe si mbrohet po jap një rast që ka ndodhur para një jave, një grua me tre fëmijë po shkonte të shihte burrin e vet në burg, shteti me dashje i kishte cenuar mundësinë të mbrohej nga rruga, aksident nga sabotimi i interesit publik, vdiqën dy fëmijë, sepse një nënë po shkonte të shihte burrin në burg, a foli njeri nga qeveria sot për një familje që u shkatërrua se po ndërtonte një cati, aq më pak ai që duhet të fliste më shumë, kryeministri.

Po kush i hoqi 10 m kangjella nga rruga, kush i hoqi, kush e dëmtoi interesin publik, nevoja e qeverisë për të mbrojtur interesin privat para atij publik.

Pse ishin hequr ato? Nuk kishte para? Ishte borxhi i lartë? jo, i shërbyen një karburanti privat, këtë mbrojti qeveria, a keni parë të shkojë shteti atje dhe ta rivendosë kangjellën, shih me ca llogjesh merren sot.

Pse përfundoi kjo familje në burg, sepse babai i vajzave që shteti nuk i mbrojti, por i coi në humbje jete, ky ndërtoi një cati në tokën e vet, nuk zaptoi, e përfundoi në burg prej 6 muajsh, vajzat po shkonin ta vizitonin, po sa para tij edhe nga ky parlament duhet të ishin në burg, ai shkoi për një cati, humbi dhe dy vajzat, e kush e mbron interesin publik, interesi publik cenohet vetëm kur vjen puna te të varfërit.

Rasti i fundit në Sarandë që tregon se si sabotohet interesi publik në vend, ka tre ditë që shkruhet për trafik të madh droge, nuk e di kush është ai njeri, kujt i ka dhënë para, Rilindjes, PS, PD apo LSI, ky njeri është akoma në punë, deri dje, ka qenë në punë, për cfarë mbahet në punë, për ca thotë qeveria e kam hetuar prej tre muajsh, e hetojnë dhe e lënë të jetë në krye të transportit, mbrohet interesi privat, nuk ndahemi më, ndahemi në mbrojtës dhe cenues të interesit publik, qeveria e saboton këtë interes

Përse policia shqiptare nuk e ndalon Klemend Balilin ?

May 12, 2016 by dgreca

*Berisha: Klemend Balili është njeriu i Kokëdhimës/

Klemend Balili vazhdon të mbajë detyrën e kreut të Drejtorisë së Transportit Rrugor në Sarandë edhe pse emri i tij figuron në dokumentat e policisë greke si kreu i një rrjeti të madh narkotrafikantësh dhe është i shpallur në kërkim në Greqi.

I cilësuar “si baroni i drogës” në Ballkan, ai konsiderohet si organizatori i dërgimit të sasive të mëdha të marijuanës nga Shqipëria në Greqi. 700 kilogram marijuanë u sekuestruan në një operacion të tre ditëve më parë në Zakynthos, ku ranë në pranga 15 persona, 5 prej të cilëve shqiptarë dhe 10 grekë.

Përgjimet e policisë greke dhe zyrës së DEA –s në ambasadën amerikane në Athinë, kanë zbuluar komunikimet e tij me anëtarët e rrjetiti. “Mos u shqetësoni. Në qoftë se ju kapin, unë do t’ju paguaj avokatët. Do të kujdesem për familjet tuaja”, u thotë ai personave që po kryenin trafikun e 700 kg marijuanë.

BIRN zbuloi dokumentin e policisë greke ku përmendet emri i Balilit. “Të akuzuar për shkelje të ligjit N433/13 për “lëndët narkotike” , ligjit 187 të kodit penal të “Organizatave Kriminale” dhe të nenit 8 Kod Penal “Krimet e kryera në shtetin fqinj” të akuzuar por jo të arrestuar janë tre persona, ndër ta dhe Klemend Balili i Sabaudinit dhe Nazes lindur në 20/03/72 në Shqipëri dhe banues në Sarandë për shkeljet e mësipërme”, shkruhet në dokumentet e policisë greke.

Por edhe pse policia greke e ka shpallur në kërkim si kryesorin e rrjetit, në Shqipëri ai lëviz i lirë dhe vazhdon të drejtojë Drejtorinë e Transportit Rrugor në Sarandë dhe të firmosë shkresa në emër të shtetit.

Policia e shtetit jo zyrtarisht ka deklaruar se nuk mundet ta arrestojë Balilin për shkak se nuk ka një kërkesë nga pala greke për ta arrestuar.

Këto deklarata janë të drejtuesve të policisë së shtetit, të bëra në formën e burimeve konfidenciale për media si Top Channel apo Shqiptarja.com.

Por policia e shtetit deklaroi zyrtarisht një ditë më parë se edhe ajo ka qenë e përfshirë në operacionin e madh antidrogë me policinë greke dhe DEA –n amerikane. Me këtë pohim ajo pranon se ka patur akses në informacionin e autoriteteve greke mbi shqiptarët që kryenin trafikun e drogës.

Po përse nuk vepron për ta arrestuar?

Sipas Shqiptarja.com policia i ka kërkuar Prokurorisë së Krimeve të Rënda ta ndalojë Klemend Balilin, por nga prokuroria nuk ka patur asnjë përgjigje.

Ndërsa sipas Top Channel, fakti që emri i Balilit figuron në hetimet e policisë greke, “e detyron policinë shqiptare që të kërkojë një urdhër-arrest ndërkombëtar nga Greqia për të kryer arrestimin e tij.”

Megjithatë, po TCH thotë se policia nuk mund të veprojë. “Sipas të dhënave paraprake, hetimi mbi Balilin nuk e nxjerr atë të përfshirë në një trafik droge në Shqipëri, pasi rezulton se vendi ynë ka shërbyer si korridor tranziti. Për këtë arsye, deri në këtë moment, sipas policisë shqiptare, Balili nuk mund të arrestohet vetëm nga të dhënat paraprake që policia shqiptare ka. Kjo, për të shmangur edhe problemet e mëvonshme juridike që mund të dalin në procesin gjyqësor nga avokatët e tij mbrojtës, argumenton policia. Balili është nën vëzhgim policor dhe me të mbërritur kërkersa për arrestim do të veprohet menjëher, shtojnë më tej burimet”, raporton ky televizion.

Arsyet se përse policia nuk po lëviz, sipas informacioneve që ajo u ka dhënë mediave jozyrtarisht, janë kontradiktore.

Nëse ka patur bashkëpunim në këtë operacion, ajo do të duhej të kishte vepruar tashmë me arrestime në Shqipëri, siç ka ndodhur në shumë raste të tjera të goditjeve të grupeve të trafikut ndërkombëtar të drogës.

Partia Demokratike e ka akuzur Ministrin e Brendshëm Saimir Tahiri, si të lidhur direkt me Klemend Balilin, përmes të afërmve të tij në fisin Habilaj, në Vlorë. Dhe kjo, sipas PD, është arsyeja përse Balili vazhdon të mbrohet duke dhënë deklarata nga zyra tij në Drejtorinë e Transportit në Sarandë. Tahiri i ka hedhur poshtë akuzat. Ndërsa Balili mbetet i lirë dhe në detyrën shtetërore që i është ngarkuar që në vitin 2014, ndonëse PD e denoncoi në atë kohë si anëtarë të një bande të trafkut të drogës me Greqinë, të arrestuar së bashku me disa punonjës policie në vitin 2006.

Berisha: Klemend Balili është njeriu i Kokëdhimës

Sali Berisha thotë se Klemend Balili, i kërkuar nga drejtësia greke nën dyshimin se është kreu i një grupi të madh narkotrafikantësh, është njeriu i Koço Kokëdhimës në Sarandë. “E di e gjithë Saranda që ai është sivëllau i Kokëdhimës. Dhe si i tillë ai është sivëllau i Ramës”, deklaroi ish –kryeministri në parlament. Klemend Balili mban detyrën e drejtorit të Drejtorisë së Transporteve në Sarandë dhe sipas Berishës ai është emëruar në këtë post me mbëshetjen e Koço Kokëdhimës, i akuzuar disa herë për punësimet e militantëve dhe të njerëzve të afërt me të në administratën publike

/Lapsi.al

Rajon: Kosovë-Maqedoni, ngritje bashkëpunimi

May 12, 2016 by dgreca

-Referencë pozitive bashkëpunimi Kosovë-Shqipëri/

-Ministri i Ekonomisë së Maqedonisë, Driton Kuqi, në vizitën në Kosovë është pritur nga ministri i Zhvillimit Ekonomik, Blerand Stavileci/

PRISHTINË, 12 Maj 2016-B.Jashari/ Ministri i Ekonomisë së Maqedonisë, Driton Kuqi, në vizitën sot në Kosovë është pritur nga ministri i Zhvillimit Ekonomik, Blerand Stavileci, ku diskuan për vazhdimin e bashkëpunimin në sferën e ekonomisë, projektet në fushën e energjetikës, shkëmbimin tregtar mes dy vendeve, heqjen eventuale të barrierave etj. Në takim u theksua se, bashkëpunimi Kosovë-Maqedoni duhet të ngritet në një nivel më të lartë.Republika e Kosovës dhe Republika e Maqedonisë duhet të intensifikojnë bashkëpunimin në fushat e interesit të përbashkët si energjia, infrastruktura dhe fusha tjera që hynë në kuadër të bashkëpunimit rajonal. Kështu u tha nga ministri i Zhvillimit Ekonomik i Kosovës, Blerand Stavileci dhe ministri i Ekonomisë i Maqedonisë, Driton Kuqi, pas takimit, gjatë një konference të përbashkët për shtyp në Prishtinë.

Ministri Stavileci tha se me homologun e tij nga Maqedonia janë pajtuar se niveli i bashkëpunimit që kemi pasur në të kaluarën, patjetër duhet të ngritet në një nivel tjetër nisur nga fakti që ne kemi pasur disa marrëveshje të nënshkruara në mes shteteve tona.

“Do të donim që tash e tutje ta ndryshonin kahen në kuptimin pozitiv sidomos për sa i takon ritmit të zhvillimeve, pra që t’i materializojmë ato dhe të nisim me aktivitete dhe projekte konkrete”, tha Stavileci.

Sipas tij, duke e ditur që të dyja shtetet janë bashkëpjesëmarrëse në të gjithat iniciativat rajonale, përfshi edhe ato që rrjedhin nga procesi i Berlinit në kuadër të cilit janë axhenda e rrjetit të transportit në shtetet e Ballkanit Perëndimor dhe interkonektiviteti në fushën e energjisë, ky bashkëpunim duhet quar më tej.

“Në këtë kuadër është shumë e rëndësishme që shtetet e Evropës Juglindore, sidomos këto me të cilat jemi fqinj të kemi projekte me të cilat do të lidheshim edhe më mirë njeri me tjetrin, pastaj do të lidheshim edhe në platformat tjera sidomos në aspektin e tregut rajonal”, tha Stavileci, duke marrë si referencë pozitive bashkëpunimin Kosovë-Shqipëri në këto fusha.

Kreu i MZHE-së, tha se praktika e bashkëpunimit me Shqipërinë ku hyn autostrada energjetike – 400 kV dhe projektet që do të kenë impakt edhe në zhvillimet e ardhshme në tregjet e përbashkëta, mund të ndiqen edhe me Republikën e Maqedonisë, me qëllim të krijimit të një tregut të integruar rajonal.

“Delegacionet përkatëse u zotuam që do t’i rinisim këto ide të mëparshme dhe të shohim si t’i avancojmë ato në mënyrë që shtetet tona të lidhen në kuptimin e infrastrukturës fizike por edhe në kuptimin e ndërtimit të kapaciteteve energjetike, me të cilat mund të komplementarizohemi, me çka ndikojmë edhe në sigurinë e furnizimit, jo vetëm për Kosovën dhe Maqedoninë, por edhe me shtete tjera”, tha Stavileci, duke shtuar se kjo do t’i japë një frymëmarrje tjetër të dyja vendeve.

Ministri i Ekonomisë i Maqedonisë, Driton Kuqi tha se dy vendet tanimë kanë vendosur bazë solide për themelimin e bashkëpunimit me projekte të reja në interes të qytetarëve të dy vendeve.

“Gjatë takimit u bisedua rreth projekteve energjetike aktuale të përbashkëta sikurse është interkonektimi i dytë Maqedoni -Kosovë prej 400 kV, në të cilën tani më marrin pjesë dy vendet në pranimin e studimeve për vërtetësi, ndërsa është nënshkruar edhe Marrëveshja Operative mes MEPSO dhe KOSTT me të cilën rregullohet bashkëpunimi i sistemeve interkonektive mes Republikës së Maqedonisë dhe Republikës së Kosovës”, tha ai.

Kuqi më tutje tha se me kolegun Stavileci janë pajtuar rreth rëndësisë së zhvillimit të sistemeve gazpërçues të dy vendeve, sepse në pajtim me studimet e fizibilitetit për sistemin gazpërçues në Maqedoni, në mesin e 6 interkonektimeve potenciale shtesë të parashikuara është edhe interkonektimi me Kosovën me të cilën do të shtohet sigurimi i furnizimit me energji.Sipas tij, bashkëpunimi realizohet në bazë të 28 marrëveshjeve të nënshkruara midis dy vendeve, por ky bashkëpunim pritet të konkretizohet edhe më tutje nga grupet punuese të dy ministrive.

PA REFORMEN BLLOKOHEN NEGOCIATAT PER 3 VJET

May 12, 2016 by dgreca

Donald Lu: Nga reforma të kenë frikë edhe ministrat, Vlahutin: Po nuk u miratua reforma, për 3 vjet rrezikohet hapja e negociatave/

Janë zhvilluar dje diskutimet në kuadër të reformës në drejtësi, brenda grupit parlamentar të PD-së me prezencën e ambasadorëve Lu dhe Vlahutin. Ambasadori Donald Lu ka deklaruar se nga reforma në drejtësi duhet të ndihen nervoz edhe ministrat, sepse Byroja e Hetimit nuk është vetëm për gjyqtarët dhe prokurorët e korruptuar. E ndërsa ambasadorja Romana Vlahutin, është shprehur se pa reformën në drejtësi, integrimi i vendit bllokohet për 3 vitet e ardhshme. “Po nuk u votua tani reforma në drejtësi, të paktën për 3 vjet rrezikon hapja e negociatave. Ne duhet ta miratojmë tani, pasi në tetor mblidhet këshilli i ministrave që vendos për hapjen e negociatave, vitin tjetër partitë anëtare futen në zgjedhje dhe do jetë e vështirë për të diskutuar për negociatat për Shqipërinë”- ka qenë kjo deklarata e ambasadores së BE.