Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

BUJARIA E MALESOREVE KA KRAHET E ENGJELLOREVE

by

    NGA ZEF PERGEGA/ Michigan/

Jane te njohura bujarite e malesoreve qe jetonje ne SHBA. Per to eshte shkruar dhe do te shkruhet se gurra e tyre u jep drite krojeve te vlerave te larta njerezore.

Me 22 shkurt 2016 shoqata e Malesise Madhe shtroi nje darke ne lokalin e kishes se Shen Palit, jo per te festuar dekoraten “Urdheri i Lirise” te akorduar nga Presidentja e Kosoves, por per te mbledhur ndihma per malesoret ne nevoje qe jetojne ne trojet e tyre ne Malesi te Madhe ne Mal te Zi. Dhe jo pak por 32 mije dollare ne pak ore. Ne keto ndihma me se shumti dha Simon Palushaj me 16 mije dollare dhe Pero Stani me 3 mije dollare, te cilet spikasin me humanizmin e tyre ne disa aktivitete kulturore dhe investime ne vendlindje.

Ne darken e shtuar moren pjese edhe shqiptare ne trojet e tyre ne Shqiperi dhe ne Malesi, te cilet edhe ata dikush me shume e dikush me pak kontribuan ne fondin e pervitshem qe u dergohet nevojtareve ne Malesi. Luigj Gjoka e ka te caktuar tash 14 vjet normen prej nje dollar ne dite ose 365 dollare ne vit. Ne fjalen e tij Gjokaj tha se per 14 vjet jane derguar ndihma ne vlere 946 mije dollare nga te cilat 176 mije per shtepine mortore ne Tuz dhe 50 mije per shtatoren e heroit te popullit Ded Gjo’lulin, e cila u inagurue ne Tirane.

Ne fjalen e tij Lek Leci Gjonaj ne cilesine e kryetarit te shoqates Malesia e Madhe tha se motoja e kesaj darke eshte ndihma per studentet malesore qe studiojne ne universitete dhe dege te ndryshme, te cilet duke u diplomuar do te kthehen ne te mire te Malesise. Nga kjo ndihme kane perfituar shume familje malesore. Malesia ka nevoje per ndima, per investime, per perkrahje, ka nevoje per lobim e ngritje zani, per te gezuar te drejtat sipas konventave nderkombetare. Viset shqiptare nen Mal te Zi jane te pasura me resurse dhe jane me te pazhvilluara se kombesite e tjera qe jetojne ne kete shtet. Malesia sa te kete bijte e vet ne Amerike nuk guxon te vuaj! Me 8 shkurt 2015 u mbodhen 43 mije dollare, te cilat u shperndane si vijon: Shoqates “Martin Dreshaj” nje mije dollare, Kisha e Kastratit 2 mije dollare, Kristian Camaj 1500 dollare, Shtjefen Ivezaj 1800 dollare, studenteve nga Malesia 15700 dollare, shoqates “Dukagjini” 500 dollare, tifozave kuq e zi  nje mije dollare. Grupit “Shqiponja” nje mije dollare, portalit “Malesia.org” nje mije dollare. “Alb Tv USA  me pronar Gani Vila ne Detroit nje mije dollare, Tv Boin 1700 dollar, Shoqata “Labeatet” dy mije dollare., Pashk Nicaj nepermjet Nikoll Camaj tre mije dollare, dy mije dolare per ujet e pijshem ne Malesi, Dede Pjetrit Bojaj dy mije dollare. Me inisiativen  e dy shoqatave te Malesie nga ajo ne Detroit u mbodhen 32 mije dollare dhe ajo ne New-York 23 mije dollare per ngitjen e permendores se Ded Gj’lulit dhe 16 500 dollare jane dhene per bursat e studenteve ne Malesi.

Ne kete darke folen edhe Shtjefen Palushaj e Rush Dragu, te cilet shprehen nevojen e nguteshme per financimin e shkolles shqipe ne Detroit. Masho Uli ngriti shqetesimin se kjo bujari duhet te kthehet dhe nga vetja per te realizuar ato nevoja qe kane shqiptaret dhe familjet e tyre ne megrim. Pershendeten takimin edhe Ndue Ftoni e Luigj Sterbyqi.

Darken e shtruar me kete rast e mbuloi keshilli i kishes se Shen Palit

Si konkluzion i diskutimeve: Te mendojme globalisht dhe te punojme lokalisht. Te nderojme njerezit qe kane kontribute ne humanizem, ne lemin e dokumentimit historik, letrar e kulturor dhe t’u krijojme sa ma shume hapsire njerezve e sidomos intelektualeve qe te kene respekt per ata qe marrin detyra mbi supe.

25 VJET B.S.P.SH- NË SHKODER…THEMELUE NGA FERDINAND TEMALI

by

 Ne Foto: FERDINAND TEMALI- 1991 BSPSH – SHKODER/

■BASHKIMI I SINDIKATAVE TË PAVARUNA TË SHQIPNISË OSE B.S.P.Sh./

NË SHKODER, ISHTE FLAMURTARE E FITOREVE TË DEMOKRACISË !/

■Ramja e Murit të Berlinit me 9 Nandor 1989, vrasja e Çausheskut me 25 Dhjetor 1989/

Nga Fritz RADOVANI/Australi/

Demostrata e Parë e heshtun me 14 Janar 1990 në Shkoder, per heqjen e bustit të Stalinit, Mesha e Parë në Rrëmaji me 11 Nandor 1990 nga Don Simon Jubani, shpallja e Don Simonit per me formue në Shkoder “Partinë Demokristjane” nga Prof. Nush Radovani, me 13 Nandor 1990, dhe zhgulja e bustit të diktatorit Enver Hoxha me 13 Dhjetor 1990, tek Prefektura e Shkodres, i paraprijnë Demokracisë, Lirisë Fesë dhe pluralizmit në të gjithë Shqipninë. Këto vepra heroike u pasuen nga Kavaja, Durrësi dhe në fund Tirana.

■Kur trashigimtarëve të fronit të Enverit, Nexhmijes dhe Ramizit filloi me ju dukë nder skutat e pallateve të tyne në Bllok fantazma e Çausheskut me të shoqen të shkrryem perdhe, nga tmerri pranuene “pluralizmin” e shpikun nga Kotovica: “…dhe të shartuem në Venecia, me ndihmen e Mentor Çokut dhe De Mikelis, tue i lanë “krijimin e disa partive” Fatos Nanos, Sali Berishës dhe Sabri Godos, i cili këte “pluralizem mashtrues” e mbrojti edhe me Kushtetuten e “Republikës së Shqipnisë” që i lejonte Shqiptarëve që me 2 Dhjetor 1992, edhe “praninë e kësaj Republike në “Konferencen Islamike”!

■Po Rinia Shqiptare, e harroi parullen “E duam Shqipërinë si gjithë Europa!”?

Shkodra nga viti 1990 e deri nga fundi i vitit 1992, asht kenë e zeza e komunizmit që u kalb mbi dhe e qelbi Ballkanin, kur të gjitha vendet e Lindjes e kishin varrosë e i kishin vue tek koka nga një shenjë të zi, ku mblidheshin qyqet e kuluenverat me e vajtue…

■Me daten 25 Shkurt 1991, u shpall në Teatrin “Migjeni” formimi i BSPSh në Shkoder nga Kryetari i Nderuem Ferdinand Temali dhe Arben Borshi, si dhe Kryesia e saj. Asht aprovue edhe një Program i randsishem i bazuem në parimet Demokratike Europjane.

■Me 11 Mars 1991, Ministria e Drejtësisë aprovoi BSPSH e Shqipnisë themelue në Shkurt 1991. Ferdinandi mori pjesë në zgjedhjet e Kryesisë BSPSH për të gjithë Republikën e Shqipnisë në Tiranë, dhe u zgjodh anëtar i asaj Kryesije, me të gjitha votat pro të pjesmarrësve nga e gjithë Shqipnia. Ai ishte ndër organizatorët kryesorë të saj në të gjitha betejat dhe fitoret e mohueme të cilat, sot, po punohet nga “rilindja” me u harrue!

■Perpjekjet per shkatrrimin e BSPSh së Shkodres dhe të Shqipnisë që drejtohej nga të nderuemit Gzim Shima, Eqerem Kavaja, Gzim Kalaja etjerë, ishin të vazhdueshme. Po e njajta rrugë kercnuese asht ndjekë edhe me BSPSh e Kavajës. Nuk duhet mohue kurrë roli i madh që kanë luejtë në trandjen e thëmeleve të komunizmit, minatorët e Valiasit, të cilët rrëzuen monumentin e diktatori perbindsh të Shqipnisë, njenin nga 100 Tiranët e Botës, sherbëtorin e sllavokomunizmit dhe mikun e shovenistëve grekë, Enver Hoxhën, bashkpuntorin e Nexhmije Hoxhës dhe parardhësin e Ramiz Alisë me bedelat e sotem.

■Në Mars 1991, BSPSh ishte e pranishme në ma shumë se 70% të ndërmarrjeve të Shkodres, dhe ishte formue në disa pika kyqe si, në hidrocentralin e Vaut të Dejës, Stacionin hekurudhor, Uzinat e mëdha të fermentimit, Pelhura, e telit, letrës etj., dhe kishte marrë mbas vetës armaten e madhe të mësuesve me kryetar Qazim Lika e Xhelal Fejzo, dhe të mjekëve të spitaleve, të poliklinikës me mjekun Leonard Kçira, përfshi këtu edhe klinikën dentare. Nuk imagjinohej kurrë nga komunistët se ndërmarrja e Minjerave dhe ajo gjeologjike ishin forca në favorin tonë. Per mue ato zgjedhje ishin Fitore!

■Me 29 Prill BSPSH mori edhe kokën drejtuese të arësimit dhe kulturës shkodrane, me serena nga z. Xh. Gjurkaj elektriçist në Institutin Pedagogjik. Nuk më besohej kur kam numrue 68 profesora nga 103 vetë, ku, përjashtohej grupi i spijunve me Sadik Ramën e Angjelin Kumrinë etj…të cilët, as nuk i kemi pranue në sallën e madhe ku janë zhvillue zgjedhjet e kur aty, u zgjodh kryetar i BSPSh Prof. Gjovalin Kolombi.

■Dy institucione me vlerë për ne ishin PTT dhe Radio Shkodra, sidomos e dyta, Radio ka luejt rol kryesor mbas shkumjes drejtor aty të z. Prof. Anton Çefa. Ashtusi në Shkoder priteshin emisionet e demaskimit të komunizmit, po me atë andje qytetarët tanë vraponin me u interesue a mërrijtën gazetat “Sindikalisti” dhe “RD” nga Tirana…

■BSPSh e Shkodres e lidhun me Tiranën e Kavajen, ishin qendrat ku BSPSh po hartonte ramjen e qeverisë komuniste… dhe, duhet vue në dukje roli i madh i rinisë shkodrane i pasuem nga mbarë Populli i Shkodres, në protesten e paorganizueme para selisë së komitetit të PPSH në mbasdreken e 1 Prillit 1991, kur turma mija vetësh u drejtuen nga ajo seli, mbas thirrjeve tek busti i Stalinit dhe Leninit në sheshin qendror. Ishte pikërisht Ferdinand Temali, që kërkoi me ngulm nga protestuesit mjete paqësore, dhe mbas orës 21.00 u shpërndanë tue thirrë në bulevardin e Shkodres: “Nuk e duam komunizmin jo, jo, jo..!” Pa u errë nata në Shkoder ishte zv. ministri i mbrendshëm Hajredin Shyti, i cili, në bashpunim me Çapajev Taçin, Dilaver Paparen dhe Gjekën e policisë, organizuen vepren terroriste që u realizue me 2 Prill 1991, (per të cilen duhet të jenë dekorue sivjet me Shyqyri Çokun…), mu në atë Shesh, ku një natë ma përpara çdo veprim ishte demokratik … Po aty, në mes të predhave dhe vrasjeve të organizueme nga presidenca terroriste e Ramiz Alisë, mbi trupat e të rinjve Arben Broci me 97 vetë tjerë të vramë e të plagosun, ishte Ferdinand Temali me Marina Rraboshtën, që hyjnë nën shnajpër për me i thanë sekretarit I-rë PPSh Xhemal Dymylja: “Kush asht ai terrorist që ka urdhnue me gjujtë mbi turmat e pambrojtuna të studentave të shkollës “J.Misja” dhe Popullit të Shkodres, o ndaloni zjarrin ose drejtohuni kufinit e ikni, se Populli do t’ju shkyejn përsëgjalli!” E pra, këta sindikalistë nuk kishin as armë, as tanke…Vetem guxim!

■Po, drejtuesit e PD së Shkodres ku ishin?…Cilat ishin parullat që u hodhën në rrugë Xhabijej e ma vonë tek Radio Shkodra? – Besoj i kujton mirë Populli i Shkodres “ata” dhe rolin që ka luejt BSPSh, Ferdinandi, Tanush Mulleti, Besnik Komi, Arben Borshi Marina Rraboshta, Lela Zorba, Muhamet Gradeci, Fritz Radovani, etj., për ruejtjen nga djegëja të Radios, Fototekës, hetuesisë dhe të vetë Prefekturës, të cilat i kemi mbrojtë edhe me rrezik koke, kur shnajpërt ishin në gatishmeni mbi kokat tona…

■Po kerkesa ynë cila ishte? – Qeveria komuniste me dhanë dorëheqje sa ma parë, mbasi BSPSh do të organizojnë Grevë të Përgjithëshme në gjithë Shqipninë. Vrasësit e Arben Brocit me shokë ti kalonin organeve kompetente, njëkohësisht, edhe do të organizohën zgjedhjet e reja etj…Ndersa, kryetari i PD Pjeter Arbnori, i kerkoi gjyqtarit që “gjyqi i vrasësve, të zhvillohet mbasi PD të marrin pushtetin!”, domethanë “asnjëherë”! Edhe këte besoj e kujtojnë të pranishmit, bashkë me pergjegjen time: “Gjyqi duhet fillue që diten e hane, dhe mbasi të fillojë gjyqi, nderpritet greva e organizueme nga BSPSh!”.

■Sigurimin e shtetit, spijunët e sigurimit dhe oficerët besnik të tij, me dt. 2 Prill 1991, ora 14.00 nuk kanë pasë asnjeni ndër dyer etiketat e emnave në apartamente…tue fillue nga Çapajev Taçi e deri tek i dekoruemi per “trimni” Shyqyri Qoku…

■Me 20 Maji kam shkue në Tiranë dhe i kam paraqitë Kryesisë BSPSh., propozimin tonë për Presidentin e ri të Republikës, ku kerkohej nga BSPSh e Shkodres, ardhje e Prof. Arshi Pipa, Sami Repishti dhe zonjës Nermin Vlona (Palaschi) në poste qeveritare. Mbas dy ditësh z. Eqrem Kavaja na ka komunikue edhe aprovimin e Kryesisë së Tiranës. Kuvendi Popullor botoi ligjin e pranisë në Shqipni, në 20 vjetët e fundit…për me evitue ardhjen e të gjithë personaliteteve nga diaspora në organe drejtuese.

■Qeveria vertetë ra…Me 10 Qershor, ora 11.00, në intervistën e dhanun “Zërit Amerikës” nga anëtarët e kryesisë BSPSH së Shkodres, kam theksue: “Qeveria e ardhëshme kurrë nuk do të realizojë aspiratat tona dhe të mbarë Popullit Shqiptar, nëse në përbamjen e saj do të ketë kjoftë edhe vetëm një komunist..!”. Atëherë, shumë vetë më quejtën “ekstremist”…por, sot, besoj janë me mendimin tim edhe ata që atëherë menduen me bashkpunue në qeveri me “komunistët e konvertuem”! Ky ishte gabimi i madh! Prania e tyne në çdo zyrë sjelli vetem korrupsion, mashtrime, vjedhje dhe luftë per pushtet edhe nga trashigimtarët e tyne, që po kerkojnë edhe “rilindjen komuniste”!

■Në Shtator 1991, pak ditë mbasi krijueme edhe “Shoqaten e të Persekutuemëve Politik” me 11, 12, 13 dhe 14 u organizue në Durres një seminar i BSPSh me rreth 200 anëtarë nga kryesitë e të gjithë Shqipnisë. Aty drejtonin amerikani Donald Slaiman nga USA, Tom Cook nga Britania dhe Sasha Morina nga Gjermania. Ata dhanë konkluzionet e porositë e tyne për BSPSh, tue u cilësue nga D. Slaiman me këto fjalë: “…Ju jeni Sindikata që keni thye dogmen e komunizmit!”. Ndërsa, në emnin e të  gjithë BSPSh, Ata u falnderuen dhe u përshëndetën nga anëtari i Kryesisë së Shkodres Fritz Radovani.

■Mbas mbledhjes së organizueme në teatrin “Migjeni” me z. Tony Freeman, që ishte Nënsekretar i Shtetit në USA, me datën 18 Korrik 1991, dhe takimit të nesërm me Té në hotel “Dajti” bashkë me Ferdinandin, unë kam kuptue mirë lojën e sindikatave italiane, të cilat bashkë me socialistët e Kraksit e Martelit, kanë luejtë rolin ma negativ për t’ardhmen tonë në të gjitha drejtimet, kryesisht në zhvillimet e ngadalshme demokratike. ■Pushteti demokratik porsa mori drejtimin e shtetit, bani kompromis me ishkomunistët tue ua krijue të gjitha mundësit e ruejtjes së “imunitetit” të paprekshëm të gjithë kriminelëve, nga Ramiz Alia e N. Hoxha deri tek vrasësit e të rijve në të katër anët e vendit prej piramidave kufitare e deri tek Mali me gropa…në afersi të Tiranës…apo, gjaksit e pafalshem të sigurimit shtetit që filluen me vra me “ligjët” e Kanunit, kur 95 % e tyne, as nuk njihnin as emnin e Autorit të Tij, e që as nuk e kishin pa kurrë atë liber!

■Njerzit e ndershëm që luftuen në ballin e luftës mbetën fukara dhe të vorfen pa asnjë fitim për mos me thanë se humbën edhe të gjitha iluzionet e Fitores…e, një ndër ta ishte edhe luftari i Demokracisë në Shkoder, Ferdinand Temali…pa u zgjatë me qindra të tjerë qytetarë shkodranë dhe shtetas në të gjithë Shqipninë.

***

■Shokët e bashkpuntorët e BSPSh, që luftuen për me rrëzue komunizmin gjakatar do të kujtojnë përjetë Luftarin Trim të Saj Ferdinand Temali…në sa e sa Përvjetorë të tjerë e zanin e Tij, që vazhdon me ushtue si gjithmonë: “Do fitojmë apo jo?!…Po, Po, Po..!”

■Me këte rast po ripërsëris fjalët e Prof. Arshi Pipës, që mi ka thanë personalisht mue:

“…Jeni e vetmja Sindikatë e një vendi të vogël, por që keni rrëzue një qeveri me të gjitha tiparët e terrorizmit komunist, gja që deri sot nuk ka ndodhë në historinë e të gjitha Sindikatave të Botës!…” (Shkoder, 1993).

■Themelues i Asaj BSPSh, 25 vjetë perpara, organizator dhe luftar besnik në betejën per përmbysjen e komunizmit  ishe Ti, o i pavdekshmi Ferdinand Temali!..

Vertetë që mbas Teje nuk ishim aq pak sa kujtojnë disa…

■Me Ty BSPSh… ishte i gjithë Populli Heroik i Shkodres dhe gjithë Shqipnia!

Melbourne, Shkurt 2015.

Grotesku i sfidantëve!

by

Nga Rexhep KASUMAJ/ Berlin/

Arena politike e Kosovës, do të ngjante komike, sikur të mos ishte tepër dhimbsunore.

Njëfarë Rafet Rama – rivalizon Hashim Thaçin!

Ç’cinizëm!

Një shpirtësi tipike diktaturash! A s’është vërtetë kështu?

Do t’më kujtojë kjo dromcë shpotitëse, një sfond të ngjashëm politik të një kohe të perënduar. Ishin vitet e 90-ta. Millosheviqi, i cili poashtu njihte formalisht postulatet e demokracisë, jetonte kulmin e Fuqisë. Gatiteshin zgjedhjet presidenciale të Sërbisë dhe cili ishte sfidanti i tij?
Nikolla Sheqeroski! Një pensionist strugan që shtynte ditët e fundjetës në Belgrad. Vinte në studio për të kaluar kohën, e me vete sillte prore një çantë të rëndë përplot procese, përmbarime gjyqësore, ankesa…Por dhe redaktorët kishin poaq një moment prehjeje nga lodhja e tempos elektorale.

Mirëpo, nëse kryeparët do të kenë mjaft vegëza përlidhëse të optikës politike, kundërshtarët e tyre dytësorë, i shquan një ndryshmëri e hollë karaketriale.

Ndërsa, pra, i pari dukej qiellësisht i mirë, bablok i shtruar që, madje, qahej për padrejtësitë e përjetuara, Sheqeroski i këtejmë e i kësomotshëm, është vetë autori i së padrejtës. Ka kryer vepër të dënueshme dhe, jo vetëm gëzon lirinë, por kujtohet të bëj teatrin politik për të marrë fronin e Presidencës!

Sidoqoftë, në të dy rastet, qëllimi dhe epilogu i pretendimit të tyre, do të kenë prapaskenën dhe fatin e njëjtë: një stoli shëmtuese për demokracinë e përdhunuar!

Dhe, mjerisht, një groteskë e trishtë në trupin dhe zemrën e këputur të Kosovës!

 Berlin, fundfror 2016

Mitrovica, një park me emrin Adem Demaçi

by

MITROVICË, 25 Shkurt 2016/Një park në Mitrovicë merr emrin e veprimtarit të çështjes kombëtare, simbolit të rezistencës Adem Demaçi, me rastin e 80 vjetorit të lindjes. Vendimin e mori unanimisht Kuvendi i Komunës së Mitrovicës jugore, në mbledhjen e mbajtur sot. “Simboli i rezistencës kundër pushtuesit, intelektuali dhe shkrimtari i madh Adem Demaçi, tërë jetën ia kushtoi shqiptarisë, Kosovës dhe Shqipërisë. Është nderë dhe krenari për ne që parku afër Shkollës së muzikës të mbajë emrin e kolosit të çështjes kombëtare”, u shpreh kryetari i komunës, Agim Bahtiri.Vendimi edhe u duartrokit nga këshilltarët e Kuvendit të Komunës jugore të Mitrovicës, qytetit më të madh verior të Kosovës./b.j/

Protesta non Stop, Kuvendi nesër voton presidentin e Republikës

by

-Të premten, më 26 shkurt, në orën 11:00, Kuvendi i Republikës së Kosovës do të mblidhet në seancë të jashtëzakonshme, me një pikë të vetme të rendit të ditës: zgjedhja e Presidentit të Republikës së Kosovës. Kështu vendosi sot Kryesia e Kuvendit, në mbledhjen e saj të përbashkët me kryetarët e grupeve parlamentare/

– Në kohën kur po diskutohej rreth rendit të ditës, nënkryetarja e Kuvendit nga radhët e Vetëvendosjes, Aida Dërguti, hodhi gaz lotsjellës.  VV  njofton se, ajo u arrestua/

-Protesta “non-stop” e opozitës në sheshe pranë Kuvendit dhe qeverisë së Kosovës po vazhdon në natën e dytë me tenda të ngritura dje pasdite/

 Nga Behlul Jashari/ PRISHTINË, 24 Shkurt 2016/ Kuvendi i Kosovës të premten mban mbledhje të jashtëzakonshme, për zgjedhjen e presidentit të Republikës së Kosovës. Për këtë pozitë janë nominuar dy kandidatë: Hashim Thaçi dhe Rafet Rama.

 Njoftimi zyrtar i sapodërguar bën të ditur se, të premten, më 26 shkurt, në orën 11:00, Kuvendi i Republikës së Kosovës do të mblidhet në seancë të jashtëzakonshme, me një pikë të vetme të rendit të ditës: zgjedhja e Presidentit të Republikës së Kosovës.

Kështu vendosi sot Kryesia e Kuvendit, në mbledhjen e saj të përbashkët me kryetarët e grupeve parlamentare, të kryesuar nga Kadri Veseli, kryetar.

Pas një kohe të gjatë, në këtë mbledhje ishin të pranishëm edhe përfaqësuesit e grupeve parlamentare në opozitë.

Në hapje të mbledhjes, kryetari Veseli bëri të ditur se kërkesa për seancë të jashtëzakonshme është nënshkruar nga 43 deputetë të Kuvendit, konform nenit 69, paragrafi 4 të Kushtetutës së Republikës së Kosovës, ndërsa për postin e Presidentit të Republikës së Kosovës, janë nominuar dy kandidatë: Hashim Thaçi dhe Rafet Rama.

Në kohën kur po diskutohej rreth rendit të ditës, nënkryetarja e Kuvendit nga radhët e Vetëvendosjes, Aida Dërguti, hodhi gaz lotsjellës në sallë.

Në pamundësi të zhvillimit të mbledhjes në sallën e përhershme, pas një pauze të shkurtër, Kryesia vazhdoi mbledhjen në sallën alternative, në të cilën, njëzëri vendosi që, konform kërkesës së 43 deputetëve, Kuvendi të mblidhet në seancë këtë të premte, për zgjedhjen e presidentit të shtetit, përfundon njoftimi i dërguar.

 Ndërsa subjekti më i madh opozitar kosovar bën të ditur se, në zyrën e grupit parlamentar të Lëvizjes Vetëvendosje në Kuvendin e Kosovës u arrestua nënkryetarja e Kuvendit të Republikës së Kosovës, Aida Dërguti.

Pak më parë u njofua edhe se sonte në në orën 20:30 kryetarët e subjekteve të opozitës së bashkuar, Visar Ymeri i VV, Ramush Haradinaj i AAK dhe Fatmir Limaj i Nismas do të mbajnë një konferencë të përbashkët për shtyp.

“Konferenca do të zhvillohet pranë binës, në kampin e tendave në sheshin përballë Kuvendit. Në këtë konferencë do të jepen qëndrime dhe shpjegime për situatën e fundit politike në vend”.

Kështu thekson njoftimi i dërguar, ndërkohë që protesta “non-stop” e opozitës në sheshe pranë Kuvendit dhe qeverisë së Kosovës po vazhdon në natën e dytë me tenda të ngritura dje pasdite. Opozita proteston kundër qeverisë, kundër seancave parlamentare të Kuvendit  dhe kundër zgjedhjes së Presidentit të Republikës së Kosovës.

“Tubimi në shesh vazhdon. Protesta po vazhdon me aktivitete të ndryshme sociale e kulturore, ditë e natë”, shprehet opozita.

Opozita e bashkuar, në përfundim të protëstës së ditëfestës së 8 vjetorit të Pavarësisë së Kosovës – 17 shkurtit, ku sipas saj ishim mbi 100 mijë pjesëmarrës e sipas Policisë kosovare rreth 15 mijë, ka paralajmëruar protestë tjetër në 27 shkurt nëse deri atëherë nuk dorëhiqet “qeveria që ka shkelur Kushtetutën me marrëveshjen për bashkësinë-asociacionin e komunave me shumicë serbe” dhe nuk shpallen zgjedhje të jashtëzakonshme paralamentare.

“Zgjedhjet mbahen në 10 qershor 2018”,  të rregullta sipas Kushtetutës së Kosovës, dhe nuk do ketë dorëheqje, ishte përgjigja e qeverisë në një konferencë shtypi pasditen e 17 shkurtit pas protestës së opozitës, ku u shpreh e palëkundur në punën e saj, “duke respektuar votuesin dhe ata që u kanë dhënë mandatit që janë mbi 200 mijë votues të LDK-së dhe mbi 230 mijë të PDK-së dhe mijëra tjerë të partive tjera të koalicionit”.

Liderët e partive më të mëdha të koalicionit qeverisës i kanë bërë ftesa të përsëritura opozitës që të gjitha çështjet që e preokupojnë, që mund të jenë reale, t’i diskutojë në Kuvendin e Republikës së Kosovës.

***

PDK MITROVICË – FESTON ZGJEDHJEN E PRESIDENTIT

Dega e PDK-së në Mitrovicë dërgoi sonte këtë komunikatë për media:

Dega e PDK-së në Mitrovicë mbajti takim me Kryesi, strukturat e nëndegëve, RDK-së dhe Gruas Demokratike. Në takim u diskutua për situatën në të cilën gjindet vendi ynë dhe u dha mbështetje e fuqishme për Kryetarin e Partisë Z. Hashim Thaçi që të zgjidhet President i vendit.

Pasi që Seanca për zgjedhjen e Presidentit mbahet të Premten me datë 26.02.2016 në ora 11:00 strukturat e degës vendosën që të festojnë së bashku në Prishtinë.

Urojmë që procesi i zgjedhjes së Presidentit të kaloj pa probleme, siç i ka hije vendit tonë!

 Gëzuar!