Dielli | The Sun

Albanian American Newspaper Devoted to the Intellectual and Cultural Advancement of the Albanians in America | Since 1909

Peticioni ndaj ambasadorit Delawie, kundërshtohet nga shoqëria civile

by

Peticioni i iniciuar për largimin e ambasadorit amerikan në Kosovë, Greg Delawie, po vazhdon të kundërshtohet edhe nga përfaqësues të shoqërisë civile dhe përfaqësuesit e institucioneve të Kosovës.

Shoqëria civile në Kosovë kërkon nga organet e drejtësisë në vend që të nisin hetime ndaj atyre personave, të cilët kanë bërë këtë peticion.Arton Demhasaj, nga organizata joqeveritare “Çohu” në një prononcim për Radion Evropa e Lirë, vlerëson se Kosova ka pasur çdo herë përkrahje të madhe nga Shtetet e Bashkuara të Amerikës dhe se një peticion i tillë nuk u bën mirë marrëdhënieve me Amerikën.“Ky peticion është i paligjshëm, për shkak se nuk është iniciuar nga njerëzit që janë nga Kosova dhe organet e drejtësisë, policia dhe gjykatat, duhet të fillojnë të iniciojnë hetime dhe të shikojnë se kush është personi që e ka iniciuar dhe të gjendet se kush qëndron prapa gjithë kësaj, si dhe të sqarohen të gjitha”, thekson Demhasaj.

Peticionin thuhet ta ketë iniciuar Roland Bartezko.

Sipas raportimeve të medieve vendore në Kosovë, thuhet se shoqëria civile ka nisur të nënshkruajë një peticion për largimin e ambasadorit amerikan në Kosovë, Greg Delawie.

Ndaj këtij peticioni ka pasur reagime të shumta nga udhëheqësit e institucioneve të Kosovës.

Gjatë ditës së shtunë ka reaguar edhe Qeveria e Kosovës nëpërmjet një komunikate për media.

“Qeveria e Republikës së Kosovës shpreh indinjatë të thellë dhe dënon ashpër përpjekjet e ulëta për linçim publik, iniciativat denigruese me adresa të dyshimta dhe ofendimet ndaj personalitetit të Ambasadorit të Shteteve të Bashkuara të Amerikës, mikut të popullit të Kosovës, Greg Delawie”, thuhet në komunikatën e Qeverisë së Kosovës.

Në anën tjetër, Behxhet Shala, drejtor ekzekutiv në Këshillin për Mbrojtjen e të drejtave të njeriut në Kosovë, thotë për Radion Evropa e Lirë se një peticion i tillë është i pavlerë.

“Kur një ambasador është në një shtet dhe kur i tejkalon kompetencat e ambasadorit që i ka të garantuara me Konventë, atëherë shteti (pritës) kërkon sqarime nga shteti që e ka dërguar atë ambasador, por në rastin tonë pra në rastin e këtij peticioni, është bërë një bujë e madhe dhe e panevojshme”, vlerëson Shala.

Keqardhje për nisjen e një peticioni të tillë ka shprehur edhe presidentja e Kosovës, Atifete Jahjaga, duke i quajtur “pakicë margjinale”, personat që kishin nisur këtë peticion.

Për fyerjet ndaj ambasadorit amerikan, Greg Delawie, ka reaguar edhe ministri i Punëve të Jashtme në Qeverinë e Kosovës, Hashim Thaçi. Ai në rrjetin social Facebook ka thënë se çdo fyerje ndaj ambasadorit amerikan në Kosovë, konsiderohet fyerje edhe ndaj popullit dhe Qeverisë së Kosovës.

Reagime ka pasur edhe nga kryetari i Aleancës për Ardhmërinë e Kosovës Ramush Haradinaj. Peticionin për largimin e ambasadorit amerikan nga Kosova, Haradinaj e ka quajtur jokredibil dhe të pavlerë.

Ambasadorit i Shteteve të Bashkuara të Amerikës, Greg Delawie, ditë më parë ishte shprehur i zhgënjyer me vendimin e partive politike në opozitë, për të hedhur sërish gaz lotsjellës në Kuvend.

“I ftoj të gjithë që të shmangin fjalorin nxitës, duke cilësuar njëri-tjetrin ‘tradhtar’ ose ‘qyqar’, gjë që e vështirëson mundësinë e dialogut dhe zhvillimin e Kosovës, ashtu siç kanë nevojë dhe duan qytetarët e Kosovës”, pati thënë ambasadori amerikan.

Ai u kishte bërë thirrje të gjitha palëve që të punojnë bashkërisht përmes dialogut, për t’i dhënë fund krizës politike.

Prishtina në Ditën e Falënderimeve e dekoruar me flamuj amerikan (Foto nga arkivi)

Kosovë: 20 milionë euro letra me vlerë për diasporën

by

Ministria e Financave e Kosovës ka bërë të ditur se gjatë këtij viti do të përfshijë në letrat me vlerë të qeverisë edhe diasporën.Ministri i Financave, Avdullah Hoti, përmes një postimi në rrjetin social Facebook, ka treguar se po finalizohet projektin e ri prej rreth 20 milionë eurosh, të letrave me vlerë për diasporë, që ka një potencial të madh financiar.

“Këto letra me vlerë, do të sigurojnë mjete për qëllime specifike, siç janë subvencionet për bujqësi dhe për ndërmarrje të vogla. Përmes kësaj forme, diaspora mund të kontribuojë në zhvillimin ekonomik të Kosovës dhe, gjithashtu, përfiton një normë interesi, që është më e lartë krahasuar me normën e interesit nga depozitimi i mjeteve në bankat në vendet ku janë diaspora apo në bankat në Kosovë”, ka thënë Hoti.

Ndryshe, sipas regjistrimit të deritashëm të diasporës, janë evidentuar rreth 200 mijë qytetarë të Kosovës të cilët jetojnë në vende të ndryshme të botës. Ky proces i regjistrimit të diasporës është duke vazhduar dhe pritet të përfundojë në vitin 2017.

Dërgesat e emigrantëve kosovarë, që çdo vit hyjnë në Kosovë, sipas të dhënave zyrtare janë rreth 600 milionë euro.

Presidenti Nishani kërkon opinionin e Gjykatës Kushtetuese

by

Presidenti i Shqipërisë, Bujar Nishani, ka kërkuar opinionin e Gjykatës Kushtetuese lidhur me nominimin e minsitrave, lëvizje kjo që mund të shkaktoj krizë qeveritare.Javën e kaluar, kryeministri Edi Rama, e shkarkoi ministrin e financave, pastaj e nominoi ish-ministrin e ekonomisë, Arben Ahmetaj, në këtë post, ndërsa Milva Ekonomi, u nominua për postin e zotin Ahmetaj, raporton AP nga Tirana.

Çështja e konfirmimit të ministrave të rinjë është, në një masë, procedurale dhe nëse presidenti Nishani e kompleton këtë veprim deri ditën e martë. Por, Partia Socialiste në qeveri, ka dyshime se Nishani po e zvarritë çështjen dhe kjo po ndikon në nominimet e tjera.

Bujar Nishani ishte zgjedhur president i Shqipërisë në vitin 2012 në Kuvend, nga Partia Demokratike, që atëherë ishte në qeveri. Kjo parti tash është në opizitë.

Raportohet se ai ishte problem për koalicionin qeverisës të krahut të majtë të zotit Rama, për shkak të vonesës së nominimeve të gjeneralëve ushtarakë, diplomatëve dhe gjyqtarëve të lartë.

Ermonela Felaj, anëtare e qeverisë e ngarkuar me raportet me kuvendin, ka thënë se koalicioni qeveritar mund të kërkoj shkarkim të Nishanit, nëse ndryshimet në qeveri nuk konfirmohen deri të martën. Sipas saj, kjo parashihet edhe me Kushtetutën e Shqipërisë, raporton AP.

Gara presidenciale SHBA,Triumfojnë Clinton dhe Trump, largohet Jeb Bush

by

Ish-sekretarja amerikane e Shtetit, Hillary Clinton, fitoi në garën partiake presidenciale të demokratëve në shtetin Nevada, ndërsa biznesmeni i pasur, Donald Trump, ngadhënjeu në votimet republikane në shtetin Karolina Jugore. Senatori demokrat, Bernie Sanders, pak kohë pasi kishin përfunduar votimet, e kishte thirrur zonjën Clinton duke ia uruar fitoren.

Pasi janë numëruar 93 për qind të fletëvotimeve, Clinton kishte 52.5 për qind, ndërsa Sanders 47.5 për qind.

“Disa mund të kenë dyshuar në neve, por ne kurrë nuk kemi pasur dyshim në njëri-tjetrin”, u tha Clinton mbështetësve të vet të hareshëm, gjatë një takimi në Las Vegas.

Në rrjetin Twitter ajo ka shkruar se “për secilin që doli në të gjitha pjesët e Nevadës me përkushtim dhe zemër: Kjo është fitore e juaj, ju falënderohem”.

Kjo është fitorja e dytë e zonjës Clinton. Ajo së pari ngadhënjeu në Ajova, ndërsa humbi në Nju Hempshër.

Në garën e republikanëve në Karolinën Jugore, Donald Trump fitoi me 32 për qind të votave. Ai në Ajova ka pësuar disfatë, por fitoi në Nju Hempshër.

“Nuk ka asgjë të lehtë në garën për president”, tha Trump në tubimin me mbështetës pas fitores, dhe shtoi se “është ashpër dhe pakëndshëm, do të thotë se është garë e egër… por, kur fiton, atëherë është e mrekullueshme”.

Senatori republikan nga Florida, Marco Rubio, u plasua në vendin e dytë, duke i tubuar afro 1 mijë vota më shumë se sa senatori, Ted Cruz, në vendin e tretë.

“Kjo është shndërruar në garë të tre personave”, tha Rubio, pasi duket se pozita e dytë në Karolinën Jugore, e forcon pikëpamjen ne tij se është kandidati më i moderuar republikan.

Ish-guvernatori i Floridës, Jeb Bush, ka shpallur tërheqjen nga gara republikane për president të Shteteve të Bashkuara, pasi në Karolinën Jugore doli i katërti.

Bush, babai dhe vëllai i të cilit ishin presidentë amerikanë, deklaratën për tërheqje e bëri pasi fitoi vetëm 7.8 për qind të votave, që ishte dëshpëruese për të.

Para votimeve në këtë shtet, atij në ndihmë gjatë fushatës i kishte ardhur edhe i vëllai, George Bush, ish-president amerikan, dhe nëna e tij.

Por, duke pasur parasysh plasmanin e dobët në votimet në Ajova dhe Nju Hempshër dhe tash në Karolinën Jugore, ai shpalli tërheqjen nga gara.

Kështu, tash në garën republikane mbeten gjithsej pesë kandidatë, përfshirë guvernatorin e Ohajos, John Kasich, dhe neurokirurgun Ben Carson.

Të dy partitë në Shtetet e Bashkuara, Partia Demokratike dhe ajo Republikane, në muajin korrik do t’i mbajnë konventat e tyre kombëtare, ku do të shpallet i nominuari partiak për të garuar për president, në zgjedhjet që mbahen më 8 nëntor të këtij viti.

Përgatiti: Fatmir Bujupi

BASHKIMI I TOKAVE PAS BASHKIMIT TË KOKAVE

by

SHQIPTARËT E AMERIKËS MBYLLËN FESTIMET PËR PAVARËSINË E KOSOVËS/

Festimet e sotme në MAESTRO’S , organizuar nga ansambleisti Mark Gjonaj, kanë shënuar mbylljen e festimeve për këtë përvjetor të trazuar të Pavarësisë së Kosovës, ku ishin bashkë protesta dhe festa, gëzimi dhe zemrimi, gazi lotsjellës(në Kosovë) dhe këngët e vallet e fjalimet(në Diasporë).
Z. Mark Gjonaj ka falenderuar pjesmarërsit, mysafirët dhe ka përcjellë mesazhin e urimit për përvjetorin e tetë të Pavarësisë së Kosovës.
Përshëndeti dhe ua uroi shqiptarëve festën e pavarësisë edhe Senatori i Shtetit të Nju Jorkut Jeffrey D. Klein,si dhe si dhe Z. Scott Stringer-NYC Comptroller .
Një përshëndetje të veçantë u drejtoi shqiptarëve miku i tyre i kahershëm, Kongresisiti Eliot Engel, i pranishëm në festë.
Ka përshëndetur dhe ka uruar bashkatdhetarët Konsulli i Republikës së Kosovës në Nju Jork z. Ylber Kryeziu.
Një mesazh të veçantë përcolli Miss Nju Jork-u, Serena Buçaj.
Në festimin e organizuar nga anëtari i Ansamblesë së Nju Jork-ut z. Mark Gjona, u mbajtën fjalime, u kënduan këngë nga Gëzim Nika, Hajro Ceka e Albërie Hadërgjonaj , u bënë fotografi dhe u përkujtua përvjetori i tetë i Pavarësisë me entuziazem.
Në këtë festë morën pejsë edhe një sërë vatranësh si dhe anëtarët e Kryesisë, Asllan Bushati-zv/ Kryetar me Familjen, Marjan Cubi, arkëtari i Vatrës dhe anëtar i kryesisë me zonjën, Pashko Camaj-anëtar i kryesisë, me zonjën, Zef Balaj, anëtar i këshillit të Vatrës me zonjën, Ramiz Mujaj, anëtar i këshillit, Besim Malota-anëtar i Këshillit, Elmi Berisha-kryetar i degës së Vatrës Hudson Valley, editori i Diellit Dalip Greca e të tjerë.
Në dekorin e festimeve, në vend të ndonjë urimi për Festën e Pavarësisë së Kosovës, përvjetorit të Tetë, organizatorët kishin zgjedhur një shprehje, që thonë se ka për autor At Gjergj Fishtën, ca të tjerë këmbëngulin se është e Faik Konicës, por që në fakt e ka përdorur gjatë një interviste dhënë nga prifti atdhetar, bibliografi më i shquar i Nënës Terezë Don Lush Gjergji, gjatë një interviste , këtu në Nju Jork, 12 vite të shkuara, dhënë për Gazetën Illyria (Gazetarit të atëhershëm Dalip Greca-sot editor i Diellit”). Don Lush Gjergji përdori pikërisht këtë shprehje”Shqiptarët, para se të bashkojnë tokat, duhet të bashkojnë kokat”. Kjo ishte një shprehje që u përdor për trojet e copëzuar shqiptare dhe msogjetjen e fjalës bashkuse të shqiptarëve, por që ansambleisti Mark Gjonaj po e përdor së fundmi si slogan gjatë tubimeve me shqiptarët.
Për të parën herë ai e përdori në piknikun e organizuar në anije me rastin e 103 vjetorit të Pavarësisë së Shqipërisë.
Në fakt kjo është një shprehje që na përshtatet shumë ne shqiptarëve, por efekti në komunitet duket i dyshimtë. U pa edhe sot në këtë organizim, ku edhe pse bileta e hyrjes ishte vetëm $25.00, pjesmarrja ishte për të dëshiruar. Në përpjekjet e tij për t’i bërë bashkë shqiptarët e Nju Jork-ut me rrethina, z. Gjonaj ka arritë që të bashkojë 25 kryetarë shoqatash(pjesën më të madhe ai e nderoi sot me Mirënjohje), por jo komunitetin,.. nuk ka arritë ta bashkojë. E dëshmoi këtë edhe salla e përgjysmuar. Pse ndodh kjo? Ose shoqatat kanë vetëm kryetarë dhe s’kanë anëtarë, ose anëtarët nuk po i dëgjojnë më kryetarët.(Dalip Greca)